រ៉ូម ៨:១៨–៣៩ 

« សេចក្ដីស្រឡាញ់របស់ព្រះ ដែលនៅក្នុងព្រះគ្រីស្ទ » 

តើអ្នកធ្លាប់បានល្បួងឲ្យឆ្ងល់ថា តើព្រះយកព្រះទ័យទុកដាក់ចំពោះអ្នកក្នុងអំឡុងស្ថានភាពតានតឹង ស្ថានភាពអយុត្តិធម៌ ឬស្ថានភាពពិបាកដែរឬទេ ? សំបុត្ររបស់ប៉ុលទៅកាន់ពួកបរិសុទ្ធនៅរ៉ូម ដែលខ្លះត្រូវរងការសាកល្បងដ៏គួរឲ្យរន្ធត់ រួមមានសារលិខិតលួងលោមសម្រាប់នរណាម្នាក់ដែលរងទុក្ខ ។ មេរៀននេះអាចជួយអ្នកឲ្យមានអារម្មណ៍ថាមានក្តីសង្ឃឹម និងការលួងលោមតាមរយៈសេចក្តីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទ នៅពេលអ្នកប្រឈមមុខនឹងការសាកល្បង និងភាពមិនច្បាស់លាស់ ។ 

ការរៀនសូត្រដំណឹងល្អគឺជាសកម្មភាពដែលផ្តោតទៅលើគេហដ្ឋាន ។ សូមស្វែងរកឱកាសដើម្បីលើកទឹកចិត្តសិស្សឲ្យចែកចាយនូវអ្វីដែលពួកគេដកពិសោធន៍នៅក្នុងថ្នាក់សិក្ខាសាលាជាមួយក្រុមគ្រួសាររបស់ពួកគេ និងចែកចាយអ្វីដែលពួកគេរៀននៅផ្ទះជាមួយមិត្តរួមថ្នាក់របស់ពួកគេ ។

ការរៀបចំរបស់សិស្ស ៖ សូមអញ្ជើញសិស្សឲ្យធ្វើអ្វីមួយសម្រាប់សមាជិកគ្រួសារដែលបង្ហាញសេចក្ដីស្រឡាញ់របស់ពួកគេ តាមរយៈសកម្មភាពជាជាងពាក្យសម្ដី ហើយត្រៀមខ្លួនដើម្បីចែកចាយអ្វីដែលពួកគេបានរៀនពីបទពិសោធន៍នេះ ។

សកម្មភាពរៀនសូត្រដែលអាចមាន

តើអ្នកនឹងចេញវេជ្ជបញ្ជាអ្វីខ្លះ ?

សូមគិតអំពីអ្វីដែលវេជ្ជបណ្ឌិតអាចណែនាំដើម្បីជួយ ជាមួយនឹងលក្ខខណ្ឌដូចខាងក្រោម ៖

សូមពិចារណាអញ្ជើញសិស្សឲ្យផ្តល់យោបល់នូវអ្វីដែលពួកគេអាចនឹងណែនាំប្រសិនបើពួកគេជាវេជ្ជបណ្ឌិត ។ អ្នកអាចអញ្ជើញអ្នកស្ម័គ្រចិត្ដឡើងមកខាងមុខថ្នាក់ ហើយផ្តល់ឲ្យក្រដាសមួយសន្លឹកដែលមានជំងឺទូទៅដូចជា ជំងឺទាំងឡាយដែលបានរាយនាមដូចខាងក្រោម ។ ពួកគេម្នាក់ៗអាចរៀបរាប់ពីជំងឺរបស់ពួកគេ និងស្វែងរកការណែនាំខ្លីៗមួយចំនួនអំពីរបៀបព្យាបាលស្ថានភាពជំងឺរបស់ពួកគេ ។

• ជំងឺក្រពះ

• បាក់ម្រាមជើង

• ជំងឺឈឺក្បាលប្រកាំង

• ជំងឺផ្ដាសាយ

សូមឆ្លើយសំណួរខាងក្រោមនេះ ៖

• តើដំបូន្មានជាក់លាក់ណាមួយអាចផ្តល់ឲ្យសម្រាប់ស្ថានភាពជំងឺនីមួយៗ ?

• តើដំបូន្មានទូទៅអ្វីខ្លះដែលអាចជួយព្យាបាលគ្រប់ស្ថានភាពជំងឺទាំងនោះ ?

ជាការពិតណាស់ មិនមែនគ្រប់ការសាកល្បងទាំងអស់សុទ្ធតែមានលក្ខណៈខាងរូបរាងកាយនោះទេ ។ មនុស្សជាច្រើនបានរងទុក្ខដោយបញ្ហាប្រឈមខាងផ្លូវចិត្ត អារម្មណ៍ និងខាងវិញ្ញាណ ។ ព្រះអង្គសង្គ្រោះរបស់យើងញាណដឹងពីរបៀបជួយ និងពង្រឹងយើងម្នាក់ៗ ទោះបីជាយើងកំពុងជួបបញ្ហាអ្វីក៏ដោយ ។ ខណៈពេលដែលការសាកល្បងរបស់មនុស្សម្នាក់ៗមានលក្ខណៈពិសេស ព្រះបានបង្រៀនយើងអំពីសេចក្ដីពិតដ៏នៅអស់កល្បជានិច្ច ដែលអាចជួយ និងសម្រាលទុក្ខយើងក្នុងស្ថានភាពលំបាកណាមួយ ។នៅក្នុងសៀវភៅកំណត់ហេតុការសិក្សារបស់អ្នក សូមធ្វើបញ្ជីខ្លីៗនៃការសាកល្បងដែលអ្នក ឬមនុស្សជាទីស្រឡាញ់របស់អ្នកត្រូវការជំនួយ ។

សូមពិចារណាចែកក្រដាសមួយសន្លឹក ហើយអញ្ជើញសិស្សម្នាក់ៗឲ្យសរសេរសំបុត្រអនាមិកមួយច្បាប់ ដែលមាននូវការសាកល្បងមួយដែលពួកគេផ្ទាល់ ឬមនុស្សជាទីស្រឡាញ់កំពុងស៊ូទ្រាំ ។ សូមប្រាប់សិស្សថា អ្វីដែលពួកគេសរសេរអាចត្រូវបានចែកចាយ ជាអនាមិកជាមួយសិស្សក្នុងថ្នាក់ ។ សូមប្រមូលឯកសារ អានដោយស្ងៀមស្ងាត់ ហើយសរសេរពីការសាកល្បងផ្សេងៗជាច្រើននៅលើក្ដារខៀនដែលពាក់ព័ន្ធគ្នាបំផុត—ជាពិសេសឯកសារដែលបានលើកឡើងដោយសិស្សលើសពីម្នាក់ ។ សូមឲ្យសិស្សមើលបញ្ជីនេះ នៅពេលពួកគេឆ្លើយសំណួរខាងក្រោម និងនៅពេលសមស្របពេញមេរៀននេះទាំងមូល ។

• តើអ្នកដឹងអ្វីខ្លះអំពីព្រះវរបិតាសួគ៌ ព្រះយេស៊ូវគ្រីស្ទ និងផែនការនៃសេចក្តីសង្គ្រោះ ដែលជួយអ្នកឲ្យឆ្លងកាត់ការសាកល្បងទាំងនេះ ? តើចំណេះដឹងនោះបានជួយអ្នកយ៉ាងដូចម្ដេច ?

ខណៈពេលដែលទីបន្ទាល់របស់អ្នកមិនកាត់បន្ថយការពិត ការឈឺចាប់ ឬការលំបាកនៃការសាកល្បងដែលអ្នក និងមនុស្សជាទីស្រឡាញ់របស់អ្នកជួបប្រទះនោះ តែវាអាចផ្តល់នូវក្តីសង្ឃឹម ការលួងលោម និងទស្សនវិស័យដ៏នៅអស់កល្បជានិច្ចក្នុងអំឡុងពេលនៃការសាកល្បងទាំងនោះបាន ។

សូមពិចារណាបង្ហាញសេចក្ដីយោងបទគម្ពីរខាងក្រោមនេះ ។

រយៈពេលប៉ុន្មានឆ្នាំបន្ទាប់ពីប៉ុលបានផ្ញើសំបុត្ររបស់លោកទៅកាន់ពួករ៉ូម នោះពួកបរិសុទ្ធនៅរ៉ូមបានរងទុក្ខនឹងការបៀតបៀននានាដ៏គួរឲ្យរន្ធត់ ។ សូមអាន រ៉ូម ៨:១៨, ២៤–២៥, ២៨, ៣១–៣៩ ហើយគូសសម្គាល់ឃ្លានីមួយៗដែលអ្នកជឿថាអាចជួយ ឬលួងលោមនរណាម្នាក់បាន មិនថាពួកគេមានទុក្ខលំបាកអ្វីឡើយ ។

សូមអញ្ជើញសិស្សឲ្យបំពេញសកម្មភាពខាងក្រោមនេះនៅក្នុងសៀវភៅកំណត់ហេតុការសិក្សារបស់ពួកគេ ។

• សូមកត់ត្រាឃ្លាមួយចេញពីខគម្ពីរទាំងនេះ ដែលធ្វើឲ្យអ្នកចាប់អារម្មណ៍ ។ ហេតុអ្វីអ្នកជ្រើសរើសឃ្លានោះ ?

នៅចំណុចនេះ សូមអញ្ជើញសិស្សជាច្រើននាក់ឲ្យចែកចាយឃ្លាដែលពួកគេបានកត់ត្រាទុក ។ នៅពេលពួកគេចែកចាយ សូមពិចារណាចង្អុលទៅការសាកល្បងជាក់លាក់ដែលមានសរសេរនៅលើក្ដារខៀន ហើយសុំឲ្យពួកគេពន្យល់ពីរបៀបដែលសេចក្ដីពិតដែលមាននៅក្នុងឃ្លាដែលពួកគេបានកំណត់អាចជួយ និងលួងលោមនរណាម្នាក់ក្នុងស្ថានភាពជាក់លាក់នោះ ។

• សូមកត់ត្រាពីរបៀបដែលការដឹងពីសេចក្ដីពិតដែលបានបង្រៀននៅក្នុងឃ្លានោះអាចជួយអ្នក និងមនុស្សជាទីស្រឡាញ់របស់អ្នកដែលមានទុក្ខលំបាកណាមួយរបស់ពួកគេ ។

• សូមពិចារណាទន្ទេញឃ្លាដែលអ្នកបានជ្រើសរើស ។ អ្នកក៏អាចបង្កើតការជូនដំណឹងប្រចាំថ្ងៃអំពីឃ្លានេះនៅលើឧបករណ៍អេឡិចត្រូនិច ឬសរសេរវាទុក ហើយដាក់វានៅកន្លែងដែលអ្នកនឹងឃើញវាជារៀងរាល់ថ្ងៃសម្រាប់រយៈពេលជាច្រើនថ្ងៃបន្ទាប់ផងដែរ ។

ផ្នែកខាងក្រោមនៃមេរៀននេះផ្តោតលើឃ្លាមួយដែលមាននៅក្នុង រ៉ូម ៨:៣៩ ។ សូមផ្តោតដោយសេរីទៅលើឃ្លា ឬសេចក្តីពិតផ្សេងគ្នាមួយ ឬច្រើនដែលបានបង្រៀននៅក្នុង រ៉ូម ៨ ប្រសិនបើវាទាក់ទងច្រើនជាមួយសិស្ស ។

សេចក្ដីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទ

មុននឹងចែកចាយសេចក្តីពិតខាងក្រោម សូមអញ្ជើញសិស្សដែលបានបញ្ចប់ការស្នើសុំរៀបចំសិស្ស ឲ្យចែកចាយនូវអ្វីដែលពួកគេបានធ្វើដើម្បី បង្ហាញ សេចក្ដីស្រឡាញ់របស់ពួកគេចំពោះនរណាម្នាក់ ។

ឃ្លាមួយដែលអ្នកអាចនឹងគូសសម្គាល់ក្នុងខគម្ពីរទាំងនេះបង្រៀនពីសេចក្ដីពិតថា « [ គ្មានអ្វីអាច ] នឹងពង្រាត់យើង ចេញពីសេចក្តីស្រឡាញ់របស់ព្រះ » បានឡើយ ( រ៉ូម ៨:៣៩ ) ។

ព្រះវរបិតាសួគ៌ និងព្រះយេស៊ូវគ្រីស្ទចង់ឲ្យអ្នកដឹងថាទ្រង់ទាំងទ្វេស្រឡាញ់អ្នក ។ ទ្រង់ទាំងទ្វេបង្ហាញសេចក្ដីស្រឡាញ់នោះតាមរយៈសកម្មភាព និងព្រះបន្ទូល ។

• យោងតាម រ៉ូម ៨:៣២ តើព្រះវរបិតាសួគ៌បានធ្វើអ្វីខ្លះ ដើម្បីបង្ហាញថាទ្រង់ស្រឡាញ់អ្នក ?

សូមអានវគ្គបទគម្ពីរចំណេះចំណានខាងគោលលទ្ធិដែលមាននៅក្នុង យ៉ូហាន ៣:១៦ ហើយកត់ចំណាំពីអ្វីដែលព្រះអង្គសង្គ្រោះបានបង្រៀនអំពីហេតុផលរបស់ព្រះវរបិតាសួគ៌ក្នុងការបញ្ជូនព្រះរាជបុត្រាទ្រង់មកផែនដី ។ អ្នកអាចនឹងចង់ភ្ជាប់សេចក្តីយោងឆ្លង ឬភ្ជាប់វគ្គបទគម្ពីរនេះទៅ រ៉ូម ៨:៣២ ។

ដើម្បីជួយសិស្សឲ្យមានអារម្មណ៍ថា ព្រះវិញ្ញាណបរិសុទ្ធថ្លែងទីបន្ទាល់ដល់ពួកគេអំពីសេចក្ដីស្រឡាញ់របស់ព្រះ សូមពិចារណាអញ្ជើញពួកគេឲ្យច្រៀង ឬស្តាប់បទចម្រៀងអង្គការបឋមសិក្សា « ទ្រង់បញ្ជូនបុត្រាទ្រង់មក » ( សៀវភៅចម្រៀងកុមារ ទំព័រ ២០ ) ។

ព្រះទ័យរបស់ព្រះអង្គសង្គ្រោះក្នុងការធួនសម្រាប់អំពើបាបរបស់យើងក៏ជាភស្ដុតាងនៃសេចក្តីស្រឡាញ់របស់ទ្រង់ចំពោះយើងដែរ ( សូមមើល រ៉ូម ៨:៣៤–៣៥ ; គោលលទ្ធិ និង សេចក្តីសញ្ញា ៣៤:១–៣ ) ។

• តើពេលណាដែលអ្នកទទួលអារម្មណ៍នូវសេចក្ដីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទក្នុងជីវិតរបស់អ្នក ? តើសេចក្ដីស្រឡាញ់របស់ពួកទ្រង់បានជួយអ្នកឲ្យឆ្លងកាត់ទុក្ខវេទនាតាមរបៀបណា ?

សូមពិចារណាចែកចាយគំរូផ្ទាល់ខ្លួនអំពីរបៀបដែលការយល់ដឹងអំពីសេចក្ដីស្រឡាញ់របស់ព្រះបានជួយ ក្នុងអំឡុងពេលមានទុក្ខលំបាក ។

នៅក្នុងសៀវភៅកំណត់ហេតុការសិក្សារបស់អ្នក សូមកត់ត្រានូវអ្វីដែលអ្នកបានរៀននៅថ្ងៃនេះអំពីព្រះវរបិតាសួគ៌ និងព្រះយេស៊ូវគ្រីស្ទដែលអ្នកចង់ចងចាំ ។ អ្នកក៏អាចពិចារណាសរសេរសារខ្លីៗ ហើយផ្តល់ឲ្យសមាជិកគ្រួសារ ឬមិត្តភក្តិ ដែលអាចទទួលបានអត្ថប្រយោជន៍ពីអ្វីដែលអ្នកបានរៀន ឬបានទទួលអារម្មណ៍នៅថ្ងៃនេះផងដែរ ។

វិចារណកថា និង ព័ត៌មានសាច់រឿង

តើវាមានន័យយ៉ាងណាដែលថាការរងទុក្ខដែលយើងឆ្លងកាត់លើផែនដីនេះជា « សេចក្តីមិនគួរប្រៀបផ្ទឹមនឹងសិរីល្អ ដែលនឹងបើកសម្ដែងមកឲ្យយើងរាល់គ្នាឃើញនោះទេ » ? ( រ៉ូម ៨:១៨ )

ស៊ីស្ទើរ លីនដា អេស រីវស៍ ជាអតីតទីប្រឹក្សានៃគណៈប្រធានសមាគមសង្គ្រោះទូទៅ បានបង្រៀន ៖

ខ្ញុំមិនដឹងថា ហេតុអ្វីយើងមានការសាកល្បងច្រើនដូច្នេះទេ ប៉ុន្តែខ្ញុំមានអារម្មណ៍ផ្ទាល់ខ្លួនថា រង្វាន់មានសន្ធឹកណាស់ វានៅអស់កល្ប និងជានិរន្ដរ ពេញដោយអំណរ ហើយហួសពីការយល់ដឹងរបស់យើងនៅក្នុងថ្ងៃនៃការទទួលរង្វាន់នោះ យើងអាចមានអារម្មណ៍ចង់ទូលទៅព្រះវបិតាជាទីស្រឡាញ់ ប្រកបដោយព្រះគុណ និងក្ដីសប្បុរសរបស់យើងថា « ត្រូវធ្វើ តែ ប៉ុណ្ណឹងឬ ? » ខ្ញុំជឿថា ប្រសិនបើយើងចងចាំ ហើយទទួលស្គាល់ជម្រៅនៃក្ដីស្រឡាញ់ដែលព្រះវរបិតាសួគ៌ និងព្រះអង្គសង្គ្រោះរបស់យើង ដែលមានចំពោះយើងប្រចាំថ្ងៃ នោះយើងនឹងមានឆន្ទៈធ្វើអ្វីៗគ្រប់យ៉ាង ដើម្បីត្រឡប់ទៅទីវត្តមានទ្រង់វិញម្ដងទៀត ដែលមានពេញដោយក្ដីស្រឡាញ់ដ៏នៅអស់កល្បជានិច្ចរបស់ពួកទ្រង់ ។ តើអ្វីដែលយើងបានរងទុក្ខនៅទីនេះនឹងសំខាន់យ៉ាងណា …បើនៅទីបំផុត ការសាកល្បងទាំងនោះគឺជារឿងដែលធ្វើឲ្យយើងស័ក្ដិសមចំពោះជីវិតអស់កល្បជានិច្ច និងភាពតម្កើងឡើងនៅក្នុងនគរនៃព្រះជាមួយព្រះវរបិតា និងព្រះអង្គសង្គ្រោះរបស់យើងនោះ ?

( លីនដា អេស រីវស៍ន « Worthy of Our Promised Blessings » Ensign ឬ Liahona ខែ វិច្ឆិកា ឆ្នាំ ២០១៥ ទំព័រ ១១ )

តើការសាកល្បងរបស់យើងអាច « ផ្សំគ្នាសម្រាប់ជាសេចក្ដីល្អដល់ [ យើង ] » យ៉ាងដូចម្តេច ? ( រ៉ូម ៨:២៨ )

អែលឌើរ ជេមស៍ ប៊ី ម៉ាទីណូ បានថ្លែង ៖

ព្រះវរបិតាសួគ៌យើង ដែលស្រឡាញ់យើងអស់ពីព្រះទ័យ និងឥតខ្ចោះ បានអនុញ្ញាតឲ្យយើងមានបទពិសោធន៍ដែលនឹងអនុញ្ញាតឲ្យយើងអភិវឌ្ឍលក្ខណៈ និងគុណលក្ខណៈដែលយើងត្រូវការដើម្បីប្រែក្លាយកាន់តែដូចជាព្រះគ្រីស្ទ ។ ការសាកល្បងរបស់យើងកើតឡើងតាមទម្រង់ជាច្រើន ប៉ុន្តែវានឹងអនុញ្ញាតឲ្យយើងប្រែក្លាយកាន់តែដូចជាព្រះអង្គសង្គ្រោះ ពេលយើងរៀនស្គាល់ពីសេចក្ដីល្អដែលកើតចេញពីបទពិសោធន៍នីមួយៗ ។ ពេលយើងយល់ដឹងពីគោលលទ្ធិនេះ នោះយើងទទួលបានការបញ្ជាក់ដ៏ធំធេងពីសេចក្ដីស្រឡាញ់របស់ព្រះវរបិតាសួគ៌នៃយើង ។ យើងមិនអាចដឹងនៅក្នុងជីវិតនេះថា តើហេតុអ្វីបានជាយើងជួបប្រទះនូវរឿងទាំងនោះឡើយ ប៉ុន្តែយើងអាចមានអារម្មណ៍ជឿជាក់ថា យើងអាចទទួលបានការរីកចម្រើនចេញពីបទពិសោធន៍នោះបាន ។

( ជេមស៍ ប៊ី ម៉ាទីណូ « All Things Work Together for Good » Ensign ឬ Liahona ខែ ឧសភា ឆ្នាំ ២០១០ ទំព័រ ១០១ )

តើវាមានន័យយ៉ាងណាដែលថាគ្មានអ្វីអាច « ពង្រាត់យើងចេញពីសេចក្តីស្រឡាញ់របស់ព្រះ » បានឡើយ ? ( រ៉ូម ៨:៣៩ )

ប្រធាន ថូម៉ាស អេស ម៉នសុន ( ឆ្នាំ ១៩២៧–២០១៨ ) បានថ្លែង ៖

ព្រះវរបិតាសួគ៌របស់អ្នកស្រឡាញ់អ្នក—គឺអ្នកគ្រប់គ្នា ។ ក្ដីស្រឡាញ់នោះមិនផ្លាស់ប្ដូរឡើយ ។ វាពុំមែនមានឥទ្ធិពលតាមរូបរាង ទ្រព្យសម្បត្តិ ឬប្រាក់ដែលអ្នកមានក្នុងគណនីធនាគារអ្នកឡើយ ។ វាមិនផ្លាស់ប្ដូរតាមទេពកោសល្យ និងសមត្ថភាពអ្នកឡើយ ។ វាកើតមានយ៉ាងសាមញ្ញ ។ វាកើតមានសម្រាប់អ្នក ពេលអ្នកសោកសៅ ឬរីករាយ បាក់ទឹកចិត្ត ឬមានសង្ឃឹម ។ ក្ដីស្រឡាញ់ព្រះមានចំពោះអ្នក មិនថាអ្នកដឹងថាអ្នកគួរទទួលបានក្ដីស្រឡាញ់ ឬក៏អត់នោះទេ ។ វាតែងមានជានិច្ច ។

( ថូម៉ាស អេស ម៉នសុន « We Never Walk Alone » Ensign ឬ Liahona ខែ វិច្ឆិកា ឆ្នាំ ២០១៣ ទំព័រ ១២៣–២៤ )

ដោយសារព្រះពេញដោយសេចក្ដីស្រឡាញ់ជាខ្លាំង តើទ្រង់នឹងសង្គ្រោះអ្នករាល់គ្នាដោយមិនគិតពីជម្រើសរបស់ពួកគេដែរឬទេ ?

អែលឌើ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានបង្រៀនអំពីសេចក្ដីស្រឡាញ់របស់ព្រះដូចខាងក្រោមនេះ ៖

សេចក្ដីស្រឡាញ់របស់ [ ព្រះ ] បានពិពណ៌នានៅក្នុងព្រះគម្ពីរថាជា « សេចក្ដីស្រឡាញ់ដ៏ធំ និងអស្ចារ្យ » « សេចក្ដីស្រឡាញ់ដ៏ឥតខ្ចោះ » « សេចក្ដីស្រឡាញ់ដ៏ប្រោសលោះ » និង «សេចក្តីស្រឡាញ់ដ៏ស្ថិតស្ថេរនៅអស់កល្ប » ។ ទាំងនេះគឺជាពាក្យដែលល្អប្រសើរជាង ពីព្រោះពាក្យ ឥតលក្ខខណ្ឌ អាចបង្វែរចំណាប់អារម្មណ៍អំពីសេចក្ដីស្រឡាញ់នៃព្រះដោយខុសឆ្គង ដូចជាព្រះអត់ធ្មត់ ហើយលើកលែងឲ្យអ្វីៗដែលយើងធ្វើ ដោយសារតែសេចក្ដីស្រឡាញ់របស់ទ្រង់គឺឥតលក្ខខណ្ឌ ឬព្រះពុំតម្រូវអ្វីពីយើងទេ ដោយសារសេចក្ដីស្រឡាញ់របស់ទ្រង់គឺឥតលក្ខខណ្ឌ ឬមនុស្ស ទាំងអស់ ត្រូវបានសង្គ្រោះនៅក្នុងនគរស្ថានសួគ៌នៃព្រះ ដោយសារសេចក្ដីស្រឡាញ់របស់ទ្រង់គឺឥតលក្ខខណ្ឌ ។ សេចក្ដីស្រឡាញ់របស់ព្រះគឺឥតព្រំដែន ហើយនឹងមានជារៀងរហូត ប៉ុន្តែវាមានន័យបែបណាចំពោះយើងម្នាក់ៗនោះគឺអាស្រ័យលើរបៀបដែលយើងឆ្លើយតបចំពោះសេចក្តីស្រឡាញ់របស់ទ្រង់ប៉ុណ្ណោះ ។

( ឌី ថត គ្រីស្តូហ្វឺសិន « Abide in My Love » Ensign ឬ Liahona ខែ វិច្ឆិកា ឆ្នាំ ២០១៦ ទំព័រ ៤៨ )

សកម្មភាពរៀនសូត្របន្ថែម

ព្រះគម្ពីរមរមនបញ្ជាក់ និងអះអាងពីសេចក្ដីពិតដែលបានបង្រៀននៅក្នុងព្រះគម្ពីរប៊ីប

នៅក្នុងមេរៀនមុន សិស្សអាចនឹងត្រូវបានអញ្ជើញឲ្យប្រើព្រះគម្ពីរមរមន ដើម្បីជួយពួកគេឲ្យយល់កាន់តែច្បាស់អំពីការសរសេររបស់ប៉ុល ឬវគ្គព្រះគម្ពីរប៊ីបនានាផ្សេងទៀត ។

សូមពិចារណាអញ្ជើញសិស្សឲ្យអនុវត្តជំនាញនេះ ដោយស្វែងរកវគ្គបទគម្ពីរនៃព្រះគម្ពីរមរមនដែលបញ្ជាក់ និងបំភ្លឺសេចក្ដីពិតនានាដែលពួកគេបានរកឃើញនៅក្នុង រ៉ូម ៨ ។ វគ្គបទគម្ពីរមួយចំនួនដែលអាចមានរួមមាន នីហ្វៃទី១ ១:១ ; អាលម៉ា ៣១:៣១ ; អាលម៉ា ៣៦:៣ ។

សេចក្តីស្រឡាញ់របស់ព្រះ និងពរជ័យដែលទ្រង់ប្រទានឲ្យយើង

សូមពិចារណាផ្តល់រង្វាន់តូចមួយដល់មនុស្សគ្រប់គ្នានៅក្នុងថ្នាក់ដែលមានឆន្ទៈក្នុងការបំពេញកិច្ចការសាមញ្ញមួយ ។ ប្រសិនបើនរណាម្នាក់សម្រេចចិត្តមិនបំពេញកិច្ចការនោះ សូមសួរសិស្សថាតើវាអយុត្តិធ៌ម ឬបង្ហាញថាសិស្សមិនទទួលបានសេចក្តីស្រឡាញ់ស្មើៗគ្នាទេ ប្រសិនបើពួកគេមិនទទួលបានរង្វាន់ដូចសិស្សដែលបានបញ្ចប់កិច្ចការនោះ ។

សូមពិចារណាប្រើសេចក្តីថ្លែងការណ៍របស់អែលឌើរ គ្រីស្តូហ្វឺសិន ដែលមាននៅក្នុងផ្នែក « វិចារណកថា និង ព័ត៌មានសាច់រឿង » និងការបង្ហាញដំណើររឿងរបស់អែលឌើរ រិនឡាន់ ដែលបានប្រាប់ក្នុងវីដេអូ « Infuriating Unfairness » ចាប់ពីលេខកូដម៉ោង ១:១៦ ដល់ ២:២៨ ដែលមាននៅលើគេហទំព័រ ChurchofJesusChrist.org ដើម្បីជួយសិស្សឃើញថា ការជ្រើសរើសរបស់យើងរួមចំណែកដល់ពរជ័យដែលយើងទទួលបាន ។