រ៉ូម ៧–១២

« មានព្រះដ៏ប្រោសឲ្យរួច … នឹងបង្វែរសេចក្តីទមិលល្មើស »

ពេលខ្លះក្នុងដំណើរជីវិតរបស់យើង យើងអាចនឹងមានអារម្មណ៍បាក់ទឹកចិត្ត ឬតានតឹងពេលយើងប្រាចាកពីបុគ្គលដែលយើងគួរតែប្រែក្លាយជា ។ ដោយមានអារម្មណ៍ស្មុគស្មាញស្រដៀងគ្នានេះ សាវកប៉ុលបានពោលថា « វេទនាណាស់ខ្ញុំ ! » ( រ៉ូម ៧:២៤ ) ។ ទោះបីជាមានភាពទន់ខ្សោយដែលយើងដកពិសោធន៍នៅក្នុងជីវិតរមែងស្លាប់ក៏ដោយ ក៏យើងអាចដកពិសោធន៍នូវក្តីសង្ឃឹម និងសេចក្ដីសុខសាន្តបានដែរ នៅពេលយើងដាក់សេចក្តីទុកចិត្តរបស់យើងលើព្រះយេស៊ូវគ្រីស្ទ ។ មេរៀននេះនឹងជួយអ្នកឲ្យអនុវត្តសេចក្តីជំនឿកាន់តែខ្លាំងទៅលើព្រះយេស៊ូវគ្រីស្ទ ដើម្បីយកឈ្នះលើភាពទន់ខ្សោយរបស់អ្នក ។ 

ការប្រើប្រាស់ព្រះគម្ពីរមរមន ។ នីហ្វៃទទួលបានការបង្រៀនថា ព្រះគម្ពីរមរមន និងព្រះគម្ពីរថ្ងៃចុងក្រោយផ្សេងទៀតនឹងចេញមកដើម្បី « តាំងនូវសេចក្ដីពិត » នៃព្រះគម្ពីរប៊ីប ( នីហ្វៃ ទី១ ១៣:៤០ ) ។ ការអញ្ជើញសិស្សឲ្យសិក្សាវគ្គបទគម្ពីរនៃព្រះគម្ពីរមរមនជាមួយនឹងអ្នកនៅក្នុងព្រះគម្ពីរប៊ីបអាចជួយពួកគេឲ្យមើលឃើញសេចក្ដីពិតនៃដំណឹងល្អនៃព្រះយេស៊ូវគ្រីស្ទកាន់តែច្បាស់ ។

ការរៀបចំរបស់សិស្ស ៖ សូមអញ្ជើញសិស្សឲ្យអាន រ៉ូម ៧:១៤, ១៨–១៩, ២៤–២៥ រួមនឹង នីហ្វៃទី២ ៤:១៧–២០, ២៦–៣២ ។ សូមឲ្យពួកគេមករៀនដោយបានត្រៀមខ្លួនដើម្បីចែកចាយពីរបៀបដែលវគ្គបទគម្ពីរនៃព្រះគម្ពីរមរមននេះបានបន្ថែម ឬបំភ្លឺការយល់ដឹងរបស់ពួកគេអំពីអ្វីដែលបានបង្រៀននៅក្នុង រ៉ូម ៧ ។ សូមរំឭកសិស្សឲ្យយកច្បាប់ចម្លងព្រះគម្ពីរមរមនផ្ទាល់ខ្លួនរបស់ពួកគេមកថ្នាក់ផងដែរ ។

សកម្មភាពរៀនសូត្រដែលអាចមាន

ការដោះស្រាយភាពទន់ខ្សោយនៃជីវិតរមែងស្លាប់

សូមពិចារណាលើការកែសម្រួលសាច់រឿងខាងក្រោមដោយផ្អែកលើតម្រូវការរបស់សិស្ស ឬអញ្ជើញសិស្សឲ្យបង្កើតសាច់រឿងផ្ទាល់ខ្លួនអំពីក្មេងជំទង់ម្នាក់ដែលមានអារម្មណ៍បាក់ទឹកចិត្តដោយសារភាពទន់ខ្សោយរបស់គាត់ ។

ទ្រី គឺជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ គាត់ចង់ដើរតាមព្រះយេស៊ូវគ្រីស្ទ ប៉ុន្តែមានអារម្មណ៍ថាភាគច្រើនគាត់ធ្វើមិនបានល្អដូចដែលគាត់គួរធ្វើនោះទេ ។ ជារឿយៗ គាត់មានអារម្មណ៍ថាមានកំហុសដោយសារតែភាពទន់ខ្សោយរបស់គាត់ និងបារម្ភថាគាត់ប្រហែលជាមិនល្អគ្រប់គ្រាន់ ។

សូមគិតអំពីរបៀបដែលពេលខ្លះអ្នកអាចមានអារម្មណ៍ស្រដៀងនឹង ទ្រី ។

• តើអារម្មណ៍ទាំងនេះអាចមានឥទ្ធិពលលើទំនាក់ទំនងរបស់អ្នកជាមួយព្រះវរបិតាសួគ៌ និងព្រះយេស៊ូវគ្រីស្ទ ក៏ដូចជាជាមួយមនុស្សផ្សេងទៀតយ៉ាងដូចម្ដេច ?

• ហេតុអ្វីបានជាវាសំខាន់ដើម្បីស្វែងរកជំនួយពីព្រះវរបិតាសួគ៌ និងព្រះយេស៊ូវគ្រីស្ទ ដើម្បីយកឈ្នះលើភាពទន់ខ្សោយ និងភាពមិនល្អឥតខ្ចោះរបស់អ្នក ?

ប្រធាន រ័សុល អិម ណិលសុន បានបង្រៀនថា « ព្រះអម្ចាស់យល់ពីភាពទន់ខ្សោយក្នុងជីវិតរមែងស្លាប់របស់យើង ។ យើងទាំងអស់គ្នាស្ទាក់ស្ទើរពេលខ្លះ ។ ប៉ុន្តែទ្រង់ក៏ស្គាល់សក្ដានុពលដ៏អស្ចារ្យរបស់យើងផងដែរ » ( « Christ Is Risen; Faith in Him Will Move Mountain » Liahona ខែ ឧសភា ឆ្នាំ ២០២១ ទំព័រ ១០២ ) ។ នៅពេលអ្នកសិក្សាមេរៀននេះ សូមចងចាំពីអ្វីដែលប្រធាន ណិលសុន បានបង្រៀន ហើយរកមើលសេចក្ដីពិតដែលអាចជួយអ្នកបាន នៅពេលអ្នកស្គាល់ភាពទន់ខ្សោយក្នុងជីវិតរមែងស្លាប់ ។ សូមសញ្ជឹងគិតពីរបៀបដែលសេចក្តីពិតទាំងនេះអាចបង្កើនសេចក្តីជំនឿរបស់អ្នកថា ព្រះយេស៊ូវគ្រីស្ទអាចជួយអ្នកបាន ។

សាវកប៉ុលក៏បានដកពិសោធន៍នូវអារម្មណ៍ទន់ខ្សោយ និងពុះពាររវាង « សាច់ឈាម » ( រ៉ូម ៧:១៨ ) ឬ ចំណង់ខាងរូបកាយ និង « តាមប៉ែកខាងក្នុង » ( ខទី ២២ ) ឬខាងវិញ្ញាណ ។

សូមអាន រ៉ូម ៧:១៤, ១៨–១៩, ២៤–២៥ និងការបកប្រែដោយយ៉ូសែប ស្ម៊ីធ សម្រាប់ខគម្ពីរទាំងនេះដែលមាននៅក្នុង ការបកប្រែដោយយ៉ូសែប ស្ម៊ីធ នៅក្នុងឧបសម្ព័ន្ធព្រះគម្ពីរប៊ីប ។ សូមរកមើលពាក្យ និងឃ្លាដែលពិពណ៌នាអំពីគំនិត និងអារម្មណ៍របស់ប៉ុល ។ សូមពិចារណាគូសសម្គាល់អ្វីដែលអ្នករកឃើញ ។ សូមកំណត់ចំណាំថា នៅក្នុង ខទី ២៤ « សេចក្ដីស្លាប់នេះ » សំដៅទៅលើសេចក្ដីស្លាប់ខាងវិញ្ញាណ ឬការញែកចេញពីព្រះដែលកើតឡើងដោយសារអំពើបាប ។

• តើគំនិត និងអារម្មណ៍របស់ប៉ុលស្រដៀងនឹងអ្វីដែលអ្នកធ្លាប់មានយ៉ាងណា ?

• តើប៉ុលបានបង្រៀនសេចក្ដីពិតអ្វីខ្លះ ?

សេចក្តីពិតមួយដែលអ្នកប្រហែលជាបានរកឃើញពីខគម្ពីរទាំងនេះគឺថា ព្រះយេស៊ូវគ្រីស្ទអាចរំដោះយើងពីការជាប់ឃុំឃាំងនៃអំពើបាបបាន ។ អ្នកអាចនឹងចង់សរសេរសេចក្ដីពិតនេះនៅជិត រ៉ូម ៧:២៤–២៥ ។

• ដូចអ្វីដែលបានកើតឡើងចំពោះប៉ុល ហេតុអ្វីបានជាការចងចាំសេចក្ដីពិតនេះ នៅពេលដែលអ្នកកំពុងតស៊ូជាមួយនឹងភាពទន់ខ្សោយរបស់អ្នក អាចជួយអ្នកឲ្យមានអារម្មណ៍សង្ឃឹមកាន់តែខ្លាំង ?

ព្រះគម្ពីរមរមនគឺជាឧបករណ៍ដ៏មានអានុភាពដែលយើងអាចប្រើដើម្បីពង្រឹងការយល់ដឹងរបស់យើងអំពីសេចក្តីពិតដែលបានបង្រៀននៅក្នុងព្រះគម្ពីរប៊ីប ( សូមមើល នីហ្វៃទី១ ១៣:៤០ ; នីហ្វៃទី២ ៣:១២ ) ។

ឧទាហរណ៍នៅក្នុង នីហ្វៃ ទី២ ៤ នីហ្វៃបានចែកចាយការបង្រៀននានាដែលស្រដៀងគ្នាទៅនឹងការបង្រៀនដែលអ្នកទើបតែបានសិក្សាពីប៉ុលនៅក្នុង រ៉ូម ៧ ។ សូមជ្រាបថា លេខយោងនៅក្នុងរ៉ូម ៧ មាននូវសេចក្តីយោងឆ្លងទៅនឹងនីហ្វៃទី ២ ៤ ។ ការប្រើលេខយោងអាចវិធីដ៏មានសារៈប្រនឹយោជន៍ដើម្បីស្វែងរកវគ្គបទគម្ពីរមរមនដែលទាក់ទងនឹងអ្វីដែលអ្នកកំពុងសិក្សានៅក្នុងព្រះគម្ពីរប៊ីប ។

សូមអាន នីហ្វៃទី២ ៤:១៧–២០, ២៦–៣២ ដោយរកមើលពីរបៀបដែលនីហ្វៃបានបង្ហាញពីអារម្មណ៍ស្រដៀងទៅនឹងអារម្មណ៍របស់ប៉ុល ។

• តើពាក្យ ឬឃ្លាណាមួយរបស់នីហ្វៃមានអត្ថន័យបំផុតចំពោះអ្នក ? ហេតុអ្វីទៅ ?

• តើការបង្រៀនរបស់នីហ្វៃអាចជួយអ្នកឲ្យមានអារម្មណ៍កាន់តែជិតស្និទ្ធជាមួយព្រះវរបិតាសួគ៌ និងព្រះយេស៊ូវគ្រីស្ទ នៅពេលអ្នកកំពុងតស៊ូជាមួយនឹងភាពទន់ខ្សោយ ឬការសង្ស័យលើខ្លួនឯងដោយរបៀបណា ?

ការប្រើប្រាស់ព្រះគម្ពីរមរមនដើម្បីយល់កាន់តែប្រសើរពីសេចក្ដីពិត

ប្រសិនបើមានពេលវេលានៅសល់ក្នុងមេរៀន សូមពិចារណាប្រើសម្ភារខាងក្រោមនេះ ដើម្បីជួយសិស្សស្វែងរកទំនាក់ទំនងផ្សេងទៀតរវាងការបង្រៀនពីប៉ុល និងព្រះគម្ពីរមរមន ។

ដូចដែល នីហ្វៃ ទី២ ៤ បានពង្រឹងការសិក្សារបស់អ្នកអំពីការបង្រៀនរបស់ប៉ុលនៅក្នុង រ៉ូម ៧ នោះវគ្គបទគម្ពីរនៃព្រះគម្ពីរមរមនជាច្រើនទៀតក៏អាចជួយអ្នកឲ្យយល់កាន់តែច្បាស់ និងកោតសរសើរដល់ការបង្រៀនរបស់ប៉ុលផងដែរ ។

សូមអនុវត្តការប្រើព្រះគម្ពីរមរមន ដើម្បីបង្កើនការយល់ដឹងរបស់អ្នកអំពីការបង្រៀនរបស់ប៉ុល ដោយជ្រើសរើសវគ្គបទគម្ពីរពីរ ឬច្រើនដូចខាងក្រោមចេញពីរ៉ូមយកមកអាន ។ បន្ទាប់មក សូមប្រៀបធៀបវាជាមួយនឹងវគ្គបទគម្ពីរនៃព្រះគម្ពីរមរមនដែលទាក់ទងគ្នា ( ឬស្វែងរកវគ្គបទគម្ពីរនៃព្រះគម្ពីរមរមនដែលទាក់ទងគ្នារបស់អ្នកដោយប្រើប្រាស់ សេចក្ដីណែនាំដល់បទគម្ពីរទាំងឡាយ ) ។ សូមរកមើលពីរបៀបដែលវគ្គបទគម្ពីរនៃព្រះគម្ពីរមរមនបញ្ជាក់ ឬបំភ្លឺសេចក្ដីពិតនានាដែលបានបង្រៀននៅក្នុងរ៉ូម ។

សូមបង្ហាញតារាងខាងក្រោមឲ្យសិស្សមើល និងប្រើប្រាស់ ។ សូមលើកទឹកចិត្តពួកគេឲ្យស្វែងរកវគ្គបទគម្ពីរនៃព្រះគម្ពីរមរមន ដែលជាការសម្រាយផ្ទាល់ខ្លួនរបស់ពួកគេផងដែរ ប្រសិនបើពួកគេអាចធ្វើបាន ។

រ៉ូម	ព្រះគម្ពីរមរមន
រ៉ូម ៨:៥–៧	នីហ្វៃទី២ ៩:៣៩ ; ម៉ូសាយ ៣:១៩
រ៉ូម ៨:២៨	អាលម៉ា ៣៦:៣
រ៉ូម ១១:២៦	នីហ្វៃទី២ ៩:១៩–២១
រ៉ូម ១២:១	អោមណៃ ១:២៦
រ៉ូម ១២:២	អាលម៉ា ៥:៥៧
រ៉ូម ១២:២១	អាលម៉ា ៣៧:៣៣–៣៥

• តើវគ្គបទគម្ពីរនៃព្រះគម្ពីរមរមនពង្រឹងការយល់ដឹងរបស់អ្នកអំពីការបង្រៀនរបស់ប៉ុលនៅក្នុងគម្ពីររ៉ូមដោយរបៀបណា ?

សូមសញ្ជឹងគិតពីបទពិសោធន៍របស់អ្នក ដែលបានឃើញពីរបៀបដែលព្រះគម្ពីរមរមនអាចជួយអ្នកក្នុងការសិក្សាព្រះគម្ពីររបស់អ្នកបាន ។ សូមព្យាយាមប្រើព្រះគម្ពីរមរមនដើម្បីជួយអ្នក នៅពេលអ្នកបន្តការសិក្សារបស់អ្នកអំពីព្រះគម្ពីរសញ្ញាថ្មី ។

វិចារណកថា និង ព័ត៌មានសាច់រឿង

តើព្រះយេស៊ូវគ្រីស្ទអាចជួយខ្ញុំឲ្យយកឈ្នះលើភាពទន់ខ្សោយរបស់ខ្ញុំក្នុងជីវិតរមែងស្លាប់ដោយរបៀបណា ?

កាលកំពុងបម្រើក្នុងគណៈប្រធានទីមួយ ប្រធាន ឌៀថើរ អេហ្វ អុជដូហ្វ បានបង្រៀន ៖

មនុស្សជាច្រើនបាក់ទឹកចិត្តពីព្រោះពួកគេបន្តទទួលការបរាជ័យ ។ ពួកគេដឹងដោយខ្លួនឯងថា « ឯវិញ្ញាណ ក៏ប្រុងជាស្រេចមែន តែសាច់ឈាមខ្សោយទេ » [ ម៉ាថាយ ២៦:៤១ ] ។ ពួកលោកថ្លែងឡើងជាមួយពួកនីហ្វៃថា « ឯព្រលឹងខ្ញុំព្រួយដោយព្រោះសេចក្ដីទុច្ចរិតទាំងឡាយរបស់ខ្ញុំ » [ នីហ្វៃទី២ ៤:១៧ ] ។ …

ពេលខ្ញុំគិតពីអ្វីដែលព្រះអង្គសង្គ្រោះបានធ្វើពីមុនថ្ងៃអាទិត្យបុណ្យអ៊ីស្ទើរ ខ្ញុំចង់បន្លឺសំឡេង ហើយស្រែកសរសើរដល់ព្រះដ៏ខ្ពស់បំផុត និងបុត្រាទ្រង់ គឺព្រះយេស៊ូវគ្រីស្ទ !

ក្លោងទ្វារស្ថានសួគ៌បានបើកសោហើយ !

បង្អួចស្ថានសួគ៌បានបើកចំហហើយ !

ថ្ងៃនេះ និងដរាបតទៅព្រះគុណនៃព្រះមានសម្រាប់អ្នកដែលមានចិត្តសង្រេង និងមានវិញ្ញាណទន់ទាប [ សូមមើល នីហ្វៃទី៣ ៩:១៩–២០ ] ។ ព្រះយេស៊ូវគ្រីស្ទបានរៀបចំផ្លូវឲ្យយើងបានយល់អ្វី ដែលយើងមិនអាចយល់បានក្នុងគំនិតធម្មតា [ សូមមើល កូរិនថូស ទី១ ២:៩ ] ។

( ឌៀថើរ អេហ្វ អុជដូហ្វ « The Gift of Grace » Ensign ឬ Liahona ខែ ឧសភា ឆ្នាំ ២០១៥ ទំព័រ ១១០ )

តើយើងជាគ្រីស្ទានឬទេ បើយើងប្រើសៀវភៅផ្សេងទៀតក្រៅពីព្រះគម្ពីរប៊ីបនោះ ?

នៅក្នុងវីដេអូ « Are We Christians? » ( លេខកូដម៉ោង ០:០០ ដល់ ២:១៥ ) អែលឌើរ ហ្គែរី ចេ ខូលមែន ពេលកំពុងបម្រើជាសមាជិកនៃពួកចិតសិបនាក់ បានពិពណ៌នាអំពីរបៀបដែលព្រះគម្ពីរមរមនបានជួយលោកឲ្យយល់កាន់តែច្បាស់អំពីសេចក្ដីពិត និងបញ្ជាក់អំពីសាសនាគ្រិស្តរបស់លោក ។ វីដេអូនេះមាននៅលើគេហទំព័រ ChurchofJesusChrist.org ។

តើព្រះគម្ពីរប៊ីប និងព្រះគម្ពីរមរមនធ្វើការជាមួយគ្នា ហើយបង្ហាញសេចក្តីស្រឡាញ់របស់ព្រះចំពោះយើងដោយរបៀបណា ?

ប្រធាន ហារ៉ូល ប៊ី លី ( ឆ្នាំ ១៨៩៩–១៩៧៣ ) បានពន្យល់ ៖

ព្រះវរបិតាសួគ៌ដ៏នៅអស់កល្បជានិច្ចរបស់យើង ដែលតែងតែខ្វល់ខ្វាយអំពីសុខុមាលភាពខាងវិញ្ញាណនៃបុត្រាបុត្រីរបស់ទ្រង់ បានប្រទានដល់យើងនូវព្រះគម្ពីរមួយធ្វើជាដៃគូ ដែលត្រូវបានស្គាល់ថាជាព្រះគម្ពីរមរមន ដើម្បីជាការការពារចំពោះសេចក្តីពិតនានានៃព្រះគម្ពីរប៊ីបដែលបានសរសេរ និងនិយាយដោយពួកព្យាការី ដូចព្រះអម្ចាស់បានបង្គាប់ ។ …

… តាមរយៈសាក្សីទីពីរនេះ យើងអាចដឹងកាន់តែច្បាស់នូវអត្ថន័យនៃការបង្រៀនរបស់ពួកព្យាការីពីបុរាណ និងការពិតពីលោកចៅហ្វាយ និងពួកសិស្សរបស់ទ្រង់នៅពេលដែលពួកគេអនុវត្ត និងបង្រៀននៅក្នុងចំណោមមនុស្សទាំងឡាយ ។ ការណ៍នេះគប្បីបំផុសគំនិតដល់អស់អ្នកដែលជាអ្នកស្វែងរកសេចក្ដីពិតដ៏ស្មោះត្រង់ ដើម្បីដាក់ព្រះគម្ពីរដ៏ពិសិដ្ឋទាំងពីរនេះរួមគ្នា ហើយសិក្សាព្រះគម្ពីរទាំងពីរនេះជាព្រះគម្ពីរតែមួយ ដោយយល់ពីទំនាក់ទំនងដ៏ពិតរបស់វា ។

( ហារ៉ូល ប៊ី លី Ye Are the Light of the World [ ឆ្នាំ ១៩៧៤ ] ទំព័រ ៨៩, ៩១ )

ហេតុអ្វីបានជាប៉ុលនិយាយថា យើងត្រូវតែទទួលថ្លែងប្រាប់ព្រះនាមរបស់ព្រះយេស៊ូវដើម្បីបានសង្គ្រោះ ?

រ៉ូម ១០:១–១៣ ត្រូវបានដកស្រង់ជាញឹកញាប់ដើម្បីការពារគោលជំហរដែលយើងគ្រាន់តែត្រូវការទទួលថ្លែងប្រាប់ព្រះនាមនៃព្រះយេស៊ូវគ្រីស្ទប៉ុណ្ណោះដើម្បីបានសង្គ្រោះ ។ ទោះជាយ៉ាងណាក៏ដោយ ព្រះអង្គសង្គ្រោះបានមានព្រះបន្ទូលយ៉ាងជាក់លាក់ប្រឆាំងនឹងគោលលទ្ធិនេះ នៅពេលទ្រង់មានព្រះបន្ទូល « មិនមែនអស់អ្នកណាដែលគ្រាន់តែនិយាយមកខ្ញុំថា ឱព្រះអម្ចាស់ៗអើយ ដែលនឹងចូលទៅក្នុងនគរស្ថានសួគ៌នោះទេ គឺជាអស់អ្នកដែលធ្វើតាមព្រះហឫទ័យនៃព្រះវរបិតា ដែលគង់នៅស្ថានសួគ៌វិញទេតើ » ( ម៉ាថាយ ៧:២១ ) ។

លើសពីនេះ ប៉ុលបានសង្កត់ធ្ងន់លើសារៈសំខាន់នៃពិធីបរិសុទ្ធនៃពិធីបុណ្យជ្រមុជទឹកពីមុននៅក្នុងសំបុត្ររបស់លោកទៅកាន់សាសន៍រ៉ូម ( សូមមើល រ៉ូម ៦:១–៦ ) ហើយក៏បានបង្រៀនពីសារៈសំខាន់នៃអំពើល្អ និងចិត្តដែលបានផ្លាស់ប្តូរផងដែរ ( សូមមើល រ៉ូម ២:១, ៣, ៦–១៣, ២៥–២៩ ) ។

ដូចគ្នានេះផងដែរពាក្យ « ទទួលថ្លែងប្រាប់ » នៅក្នុង រ៉ូម ១០:៩ អាចត្រូវបានបកប្រែជា « សេចក្ដីសញ្ញា » ហើយឃ្លា « អំពាវនាវដល់ » នៅក្នុង រ៉ូម ១០:១៣ អាចត្រូវបានបកប្រែជា « ទទួលលើកដាក់លើខ្លួននូវព្រះនាម » ( សូមមើល ចេមស៍ ស្ត្រង The New Strong’s Exhaustive Concordance of the Bible ដូចដែលមាននៅលើគេហទំព័រ http://lexiconcordance.com/greek/3670.html; http://lexiconcordance.com/greek/1941.html ) ។ ពាក្យទាំងនេះអាចសំដៅលើការចូលទៅក្នុងសេចក្តីសញ្ញា ហើយទទួលយកព្រះនាមនៃព្រះគ្រីស្ទមកដាក់លើខ្លួនយើង ដែលដូចគ្នានឹងការបង្រៀនផ្សេងទៀតរបស់ប៉ុលផងដែរ ( សូមមើល កាឡាទី ៣:២៧ ; រ៉ូម ៦:១៤–២២ ) ក៏ដូចជាវគ្គបទគម្ពីរនៃព្រះគម្ពីរមរមនដែលទាក់ទងដូចជា ម៉ូសាយ ៥:១–៩ ជាដើម ។

សកម្មភាពរៀនសូត្របន្ថែម

រ៉ូម ៩ និង ១១ ៖ « មិនមែនអស់អ្នកដែលកើតក្នុងសាសន៍អ៊ីស្រាអែល ជាសាសន៍អ៊ីស្រាអែលពិតនោះឡើយ » ( រ៉ូម ៩:៦ )

សូមពិចារណាកែប្រែការផ្តោតអារម្មណ៍លើមេរៀននេះទៅនឹងគោលលទ្ធិនៃការរើសតាំង និងការតែងតាំងមុនកំណើតលោកិយវិញ ។ សិស្សអាចសិក្សា រ៉ូម ៩:១–៧ និង ១១:១–៥, ២៥–៣២ រួមជាមួយនឹងអត្ថបទនៃសេចក្ដីណែនាំដល់បទគម្ពីរទាំងឡាយ « រើសតាំង, ការរើសតាំង » និង « តែងតាំងមុនកំណើតលោកិយ, ការតែងតាំងមុនកំណើតលោកិយ » ( នៅក្នុង « ជំនួយការសិក្សា » នៅលើគេហទំព័រ scriptures.ChurchofJesusChrist.org ) ។ ពួកគេអាចស្វែងរកសុន្ទរកថាក្នុងសន្និសីទរបស់ប្រធាន ណិលសុន ដែលមានចំណងជើងថា « Let God Prevail » ( Ensign ឬ Liahona ខែ វិច្ឆិកា ឆ្នាំ ២០២០ ទំព័រ ៩២–៩៥ ) ហើយចែកចាយការយល់ដឹងដែលពួកគេរកឃើញអំពីរបៀបដែលសេចក្ដីពិតទាំងនេះអនុវត្តចំពោះពួកគេ ( សូមមើល រ៉ូម ៨:១៤–១៥ ) ។

ការផ្តោតអារម្មណ៍លើមេរៀនជំនួស

សូមពិចារណាផ្តោតលើមេរៀននេះនូវការជួយសិស្សឲ្យយល់ពីមូលហេតុមួយចំនួនដែលយើងមានព្រះគម្ពីរមរមនបន្ថែមលើព្រះគម្ពីរប៊ីប ។ សូមពិចារណាចាប់ផ្តើមដោយការពិពណ៌នាអំពីសាច់រឿងដែលសិស្សមានមិត្តម្នាក់ចុះផ្សាយនៅលើប្រព័ន្ធផ្សព្វផ្សាយសង្គមអំពីរបៀបដែលនាងគិតថាមិនចាំបាច់មានព្រះគម្ពីរបន្ថែមទៀត ក្រៅពីព្រះគម្ពីរប៊ីប ហើយសួរថា ហេតុអ្វីមនុស្សគ្រប់គ្នាមើលឃើញថាចាំបាច់ត្រូវមានព្រះគម្ពីរមរមននោះ ។

សិស្សអាចមើល « The Book of Mormon—a Book from God » ដែលមាននៅលើគេហទំព័រ ChurchofJesusChrist.org ចាប់ពីលេខកូដម៉ោង ៤:២៨ ដល់ ៥:៤១ បាន ។ នៅក្នុងវីដេអូនេះ អែលឌើរ ថាដ អ័រ ខាលីស្ទ័រ ដែលពេលនោះជាគណៈប្រធាននៃពួកចិតសិបនាក់បានពន្យល់ពីមូលហេតុមួយចំនួនដែលវាមានសារៈសំខាន់ក្នុងការមានព្រះគម្ពីរមរមនបន្ថែមពីលើព្រះគម្ពីរប៊ីប ។

បន្ទាប់មក សិស្សអាចប្រើព្រះគម្ពីរដែលបានយោងនៅក្នុងមេរៀននេះ ដើម្បីមើលពីរបៀបដែលព្រះគម្ពីរមរមនបំភ្លឺ និងបញ្ជាក់ពីសេចក្តីពិតនានានៅក្នុងព្រះគម្ពីរប៊ីប និងដើម្បីសរសេរចម្លើយទៅកាន់មិត្តភក្តិ ។