Tej Lus Piav txog Qhia Kuv txoj Moo Zoo

Tus Tswv hais kom Nws cov tub qhe “mus tshaj tawm kuv txoj moo zoo los ntawm tus Ntsuj Plig, uas yog tus Nplij Siab uas tus Tswv xa los mus qhia qhov tseeb” (Lus Qhuab Qhia thiab Kev Khi Lus 50:14).

Phau Qhia Kuv txoj Moo Zoo los twb tsim kom pab koj ua raws li koj lub hom phiaj ua ib tug tub txib. Phau no tsom ntsoov rau tej yam tseem ceeb ntawm kev ua cov tub txib txoj hauj lwm. Yuav tsis teb txhua lo lus nug los sis qhia tias yuav tsum ua li cas thaum raug txhua yam xwm txheej. Tiam sis, phau no yog ib yam uas muaj nqis rau koj pab koj sab ntsuj plig muaj hwj chim thiab muaj peev xwm zuj zus tuaj. Cia li kawm thiab ua raws li txoj moo zoo cov lus qhuab qhia thiab cov ntsiab cai nyob hauv cov vaj lug kub thiab phau no.

Yauhas muab Yexus ua kev cai raus dej

Twb tau npaj phau Qhia Kuv txoj Moo Zoo kom pab koj raws li tej yam no:

• To taub koj lub hom phiaj ua ib tug tub txib

  • Tshooj 1: Ua Raws Li Koj lub Hom Phiaj Ua Tub Txib

• Kawm thiab qhia cov lus qhuab qhia

  • Tshooj 3: Kawm thiab Qhia txog Yexus Khetos txoj Moo Zoo

• Ua kom koj sab ntsuj plig muaj zog zuj zus thiab hloov siab los ntseeg

  • Tshooj 2: Tshawb Xyuas cov Vaj Lug Kub thiab Muab tej Cuab Yeej Ua Rog Coj Los Hnav

  • Tshooj 4: Nrhiav thiab Tso Siab rau tus Ntsuj Plig

  • Tshooj 5: Siv lub Hwj Chim ntawm Phau Ntawv Maumoos

  • Tshooj 6: Nrhiav Kev Muaj Khetos tej Cwj Pwm

• Ua kom koj txawj caw thiab pab tib neeg txais txoj moo zoo uas tau muab txum tim rov qab los

  • Tshooj 7: Kawm Koj Qhov Chaw Tshaj Tawm Txoj Moo Zoo Yam Lus

  • Tshooj 8: Ua txoj Hauj Lwm Los ntawm tej lub Hom Phiaj thiab Kev Npaj Ua

  • Tshooj 9: Nrhiav Tib Neeg rau Koj Qhia

  • Tshooj 10: Qhia Kom Txhawb Kev Ntseeg Yexus Khetos

  • Tshooj 11: Pab Tib Neeg Cog Lus thiab Ua Raws Li Lawv Tau Cog Lus

  • Tshooj 12: Pab Tib Neeg Npaj Ua Kev Cai Raus Dej thiab Txais Kev Pom Zoo

  • Tshooj 13: Nrog cov Thawj Coj thiab cov Mej Zeej Koom Siab Txhim Tsa lub Koom Txoos

Cia li kawm tej tshooj no ntau zaus thaum koj ua tub txib. Tshawb xyuas koj tej hauj lwm. Cuab hom phiaj thiab npaj kev kom ua raws li tej hom phiaj ntawd. Cov tub txib uas npaj lawv tus kheej txhua hnub thiab ua zoo dua zuj zus yuav foom koob hmoov rau cov neeg uas lawv qhia thiab pab. Lawv kuj yuav txais koob hmoov nyob hauv lawv lub neej.

Tej Cib Fim rau Kev Kawm Ntawv

Kev kawm ntawv zoo thaum koj ua tub txib yuav pab koj zaj lus tim khawv txog txoj moo zoo muaj zog tuaj thiab pab koj hloov los ua Yexus Khetos ib tug thwj tim uas rau siab ntseeg.

Kev kawm cov vaj lug kub thiab phau Qhia Kuv txoj Moo Zoo yuav pab koj muaj hwj chim ntawm sab ntsuj plig thaum koj qhia. Kev siv sij hawm kawm kuj yuav pab koj hloov koj txoj kev qhia kom haum tej yam uas tib neeg xav tau.

Tej cib fim rau kev kawm ntawv los muaj xws li no:

• Kev kawm ntawv koj tus kheej.

• Kev kawm ntawv nrog tus khub

• Kev sib pauv khub.

• Koog chaw pawg sab laj.

• Thaj chaw lub rooj sab laj.

• Qhov chaw tshaj tawm txoj moo zoo cov thawj coj pawg sab laj (rau cov tub txib uas yog thawj coj hluas).

Ntau hnub, koj yuav muaj sij hawm rau kev kawm ntawv koj tus kheej thiab nrog tus khub. Saib Kev Cai Ua Tub Txib rau Yexus Khetos cov Thwj Tim, 2.4, yog xav paub ntxiv txog koj txoj kev teem sij hawm txhua hnub.

Tej yam uas koj kawm thaum koj kawm koj tus kheej yuav pab koj thaum koj kawm ntawv nrog koj tus khub thiab ua lwm yam kev kawm ntawv raws li tau hais lawm. Thaum ob lub sij hawm no nej “ib leeg yuav … qhia ib leeg txog txoj lus qhuab qhia ntawm lub nceeg vaj” (Lus Qhuab Qhia thiab Kev Khi Lus 88:77).

Yexus Khetos qhia ib pawg neeg

Tej lub Tswv Yim Pab Koj Kawm phau Qhia Kuv txoj Moo Zoo

Qhia Kuv txoj Moo Zoo qhia txog cov vaj lug kub thiab cov ntsiab cai ntawm txoj moo zoo ua ke kom pab koj los paub tus Cawm Seej thiab Nws txoj moo zoo. Twb ua li no kom pab koj los paub cov vaj lug kub zoo thiab xav kawm cov vaj lug kub. Cia li kawm tej nqe vaj lug kub hauv txhua tshooj kom mus tas lub sij hawm uas koj ua tub txib.

Txhua tshooj hauv Qhia Kuv txoj Moo Zoo muaj tej lub tswv yim thiab tej yam ntxim ua kom pab koj kawm thiab ua raws li tej yam uas koj kawm. Cia li siv tej yam no thaum koj kawm ntawv koj tus kheej thiab kawm ntawv nrog tus khub (saib Tej Kev Cai Ua Tub Txib, 2.4). Koj siv tau tej no hauv koog chaw pawg sab laj thiab thaj chaw tej rooj sab laj. Koj yuav txawj kawm ntxiv thaum koj nrhiav kev siv tej yam uas koj kawm.

Qhov uas koj npaj ib txoj hau kev rau koj tus kheej kawm yeej yuav pab koj. Tej zaum koj yuav xav tsim koj txoj kev npaj kawm uas tsom ntsoov rau txoj moo zoo tej ntsiab cai uas koj xav to taub zoo dua. Tej zaum koj kuj yuav xav siv tej tshooj nyob hauv Qhia Kuv txoj Moo Zoo thaum koj kawm ntawv. Piv txwv hais tias, koj siv tau tej zaj lus qhia nyob hauv tshooj 3 kom pab koj kawm cov lus qhuab qhia thiab cov ntsiab cai uas koj yuav qhia rau lwm tus. Koj yuav tsum paub tej zaj lus qhia no zoo koj thiaj li yuav txawj siv koj tej lus thaum koj qhia raws li tus Ntsuj Plig coj koj ua.

Cia li sau ntawv thaum koj kawm. Siv cov ntawv los sis phau ntawv ceev txog kev kawm uas siv hluav taws xob (xws li Txoj Moo Zoo cov Ntawv) kom pab koj to taub meej thiab nco txog tej yam uas koj kawm.

Thov Vajtswv kom tus Vaj Ntsuj Plig Dawb Huv yuav pab koj kawm thaum koj pib kawm ntawv. Nws yuav muab kev txawj ntse, kev to taub, thiab kev paub qhov tseeb rau koj kom koj lub neej tau koob hmoov thiab cia koj foom koob hmoov rau lwm tus. Cia li qhib koj lub siab lub ntsws rau tej kev tshoov siab thiab lub tswv yim uas koj txais los ntawm Nws. Cia li sau tej lub tswv yim no tseg.

Rov qab xyuas koj phau ntawv ceev txog kev kawm ntau zaus kom nco qab txog tej yam uas muaj los ntawm sab ntsuj plig, pom tej lub tswv yim tshiab, thiab to taub koj ua tau zoo zuj zus li cas.

Qhov Application Qhia Kuv txoj Moo Zoo

Siv qhov app Qhia Kuv txoj Moo Zoo kom pab koj siv tej lub ntsiab cai uas koj kawm. Qhov app no los muaj nyob hauv koj xov tooj ntawm tes. Qhov no muaj tej yam uas yuav pab koj ua raws li koj lub hom phiaj ua tub txib. Tej yam no los muaj xws li:

• Xov xwm txog tej yam uas cov neeg koj qhia xav tau thiab ua zoo li cas.

• Ib qho chaw rau koj ceev tseg seb koj ua tau zoo li cas kom muaj raws li tej lub hom phiaj txog tej cim tseem ceeb.

• Ib daim qhia hnub rau koj sau ntawv txog tej yam uas koj npaj thiab teem sij hawm ua.

• Ib daim qhia kev txog koj cheeb tsam thiab lwm yam xov xwm tseem ceeb kom pab koj ua raws li koj lub hom phiaj.

Qhia Kuv txoj Moo Zoo muaj tej lub tswv yim ntau txog kev siv qhov app no km pab koj nrhiav, qhia thiab muab neeg ua kev cai raus dej.

tsev neeg kawm vaj lug kub ua ke

Lub Koom Txoos cov Mej Zeej txoj Kev Siv Qhia Kuv txoj Moo Zoo

Qhia Kuv txoj Moo Zoo tsis yog ib phau zoo rau cov tub txib xwb tiam sis kuj yog ib yam uas pab tau txhua tus mej zeej hauv lub Koom Txoos. Piv txwv hais tias, kev kawm phau no yuav pab cov mej zeej:

• Qhia thiab kawm Yexus Khetos txoj moo zoo (kawm tshooj 1, 2, 3, thiab 10).

• Teb tej lus nug txog txoj moo zoo (kawm tshooj 3 thiab 5).

• To taub ntxiv txog kev nrhiav thiab tso siab rau tus Vaj Ntsuj Plig Dawb Huv (kawm tshooj 4).

• To taub Phau Ntawv Maumoos lub hwj chim (kawm tshooj 5).

• Nrhiav Khetos tej Cwj Pwm (kawm tshooj 6).

• Ua raws li lawv tau khi lus kom qhia txoj moo zoo thaum lawv ua neej raws li tej lub ntsiab cai txog kev hlub, kev qhia, thiab kev caw (kawm tshooj 9 thiab 13).

• Koom siab nrog cov tub txib (kawm tshooj 13).

Kev kawm Qhia Kuv txoj Moo Zoo—qhov tseem ceeb yog tshooj 3—yuav pab cov hluas thiab cov laus uas npaj mus ua tub txib.