Tshooj 8: Ua txoj Hauj Lwm Los ntawm tej lub Hom Phiaj thiab Kev Npaj Ua
“Tshooj 8: Ua txoj Hauj Lwm Los ntawm tej lub Hom Phiaj thiab Kev Npaj Ua,” Qhia Kuv txoj Moo Zoo: Phau Ntawv Pab Qhia txog Yexus Khetos txoj Moo Zoo (2023)
“Tshooj 8,” Qhia Kuv txoj Moo Zoo
Daim Duab
Yog Li Ntawd, Nej Cia Li Mus (Yog Li Ntawd, Nej Cia Li Mus, thiab Qhia Txhua Haiv Neeg), los ntawm Harry Anderson
Tshooj 8
Ua txoj Hauj Lwm Los ntawm tej lub Hom Phiaj thiab Kev Npaj Ua
Xav Txog Qhov No
Vim li cas kuv yuav tsum cuab hom phiaj?
Tej cim tseem ceeb txog kev hloov siab los ntseeg yuav ua li cas pab kuv tsom ntsoov rau tib neeg txoj kev ua zoo zuj zus?
Kuv yuav ua li cas kom cuab hom phiaj, npaj kev ua raws li tej hom phiaj ntawd, thiab ua raws li tej yam uas kuv tau npaj?
Kuv yuav ua li cas kom siv sij hawm npaj txhua lub lim tiam thiab txhua hnub?
Kuv yuav ua li cas kom siv qhov app Qhia Kuv txoj Moo Zoo kom pab kuv ua txoj hauj lwm no?
Lub ntsiab cai lav ris yog dab tsi? Lub ntsiab cai no yuav pab kuv tej hauj lwm li cas?
Twb tau txib koj pab ua tus Tswv txoj hauj lwm hauv ib cheeb tsam. Nws xav kom koj foom koob hmoov rau tib neeg muab Nws txoj kev hlub thiab qhov tseeb rau lawv. Nws xav kom koj caw thiab pab lawv los cuag Nws.
Tus Tswv xav kom koj “mob siab ua tej yam zoo.” Nws hais kom koj “ua ntau yam los ntawm lawv tus kheej txoj kev ywj siab xaiv, thiab coj kom muaj kev ncaj ncees ntau los” (Lus Qhuab Qhia thiab Kev Khi Lus 58:27; saib nqe 26–29). Ua txhua yam koj ua tau kom txhua pawg ntseeg los sis ceg ntseeg uas koj nyob hauv muaj zog tshaj thaum lub sij hawm koj nyuam qhuav tuaj txog.
Tshooj no yuav pab koj kawm paub cuab hom phiaj, npaj ua raws li tej lub hom phiaj ntawd, thiab rau siab ua raws li koj tau npaj. Tshooj no piav txog tej cim tseem ceeb txog kev hloov siab los ntseeg, uas coj koj tej hauj lwm kom pab Vajtswv cov me nyuam ua zoo zuj zus. Ces qhia txog ib tug txheej txheem yooj yim kom cuab hom phiaj uas koj siv tau thaum ua txhua yam hauj lwm ua tub txib, tsis hais kev cuab hom phiaj rau koj tus kheej thiab nrog koj tus khub. Tshooj no kuj qhia tias yuav tsum ua li cas kom coj kev sib ntsib npaj txhua lub lim tiam thiab txhua hnub nrog koj tus khub.
Kev kawm cuab hom phiaj thiab npaj kev yuav foom koob hmoov rau koj kom tas koj lub neej. Yuav pab koj ua raws li koj tej kev khi lus nrog Vajtswv, rau siab ntseeg ua hauj lwm hauv lub Koom Txoos, kawm ntaub kawm ntawv, ua zoo zuj zus thaum koj ua hauj lwm, thiab muaj ib tsev neeg uas muaj zog.
Kev Kawm Vaj Lug Kub
Koj kawm dab tsi los ntawm tej nqe vaj lug kub no txog kev npaj pab ua Vajtswv txoj hauj lwm?
Nws Kho Neeg Coob cov uas Nyias Raug Nyias Mob, los ntawm J. Kirk Richards
Pab Lwm Tus Hloov Siab Los Ntseeg tus Cawm Seej
Tsom Ntsoov rau txoj Kev Ua Raws Li Koj lub Hom Phiaj Ua Tub Txib
Tej zaum koj tau xav paub seb tej luag hauj lwm ua tub txib twg yog tej uas tseem ceeb tshaj plaws. Nov yog ib lo lus nug zoo rau koj xav txog thaum koj cuab hom phiaj thiab npaj txhua lub lim tiam thiab txhua hnub. Kom pab teb qhov no, cia li xav txog koj lub hom phiaj ua ib tug tub txib:
“Caw lwm tus neeg los cuag Khetos thaum pab lawv txais txoj moo zoo uas txum tim rov qab los los ntawm txoj kev ntseeg Yexus Khetos thiab Nws txoj Kev Theej Txhoj, kev hloov siab lees txim, kev cai raus dej, txais lub txiaj ntsim Vaj Ntsuj Plig Dawb Huv, thiab nyiaj kom mus txog thaum kawg.”
Cia li koj lub hom phiaj ua tub txib pab coj koj tej lub hom phiaj thiab tej kev npaj. Tsom ntsoov rau qhov uas koj yuav pab tib neeg siv lawv txoj kev ywj siab xaiv hloov siab los ntseeg tus Cawm Seej thiab lees txais Nws txoj moo zoo.
Nrhiav tus Ntsuj Plig txoj kev qhia thiab nrog koj tus khub sib tham thaum koj cuab hom phiaj thiab npaj tej yam. Ces rov qab xyuas kom ua raws li tej yam uas koj tau npaj thiab siv koj lub sij hawm kom zoo.
Daim Duab
Thawj Tswj Hwm Dallin H. Oaks
“Peb tsis tshaj tawm thiab qhia txog txoj moo zoo kom ‘coj tib neeg los koom lub Koom Txoos’ los sis kom muaj cov mej zeej ntawm lub Koom Txoos coob ntxiv. Peb tsis tshaj tawm thiab qhia txog txoj moo zoo kom tib neeg ua neej zoo dua. … Peb caw txhua tus los cuag Khetos los ntawm kev hloov siab lees txim thiab kev cai raus dej thiab kev pom zoo kom qhib qhov rooj ntawm lub nceeg vaj xilethi-aus rau Vajtswv cov tub txhiab cov ntxhais. Tsis muaj lwm tus uas ua tau li no” (Dallin H. Oaks, “The Purpose of Missionary Work,” kev tshaj tawm rau cov tub txib los ntawm lub tshuab xa xov xwm, Plaub Hlis Ntuj 1995).
Kev Kawm Vaj Lug Kub
Cov tub txib thiab cov yaj saub no tau ua li cas kom ua raws li lawv tau npaj nrog tus Tswv txoj kev pab?
Ua Raws Li tej Cim Tseem Ceeb txog Kev Hloov Siab Los Ntseeg
Cov thawj coj hauv lub Koom Txoos tau qhia tias muaj rau lub cim tseem ceeb txog kev hloov siab los ntseeg. Tej cim tseem ceeb pab koj tsom ntsoov rau Vajtswv cov me nyuam txoj kev ua zoo ntawm sab ntsuj plig zuj zus. Tej cim no yuav pab koj ua tej yam txhua hnub raws li koj lub hom phiaj ua tub txib.
Tej cim tseem ceeb txog kev hloov siab los ntseeg los muaj nram qab no.
Daim Duab
cov tub txib tuav tes nrog ib tug txiv neej
Cov Neeg Tshiab uas Tab Tom Qhia. Txhua tus neeg (uas tsis tau ua kev cai raus dej) uas tau txais ib zaj lus qhia hauv ib lub lim tiam (tiam sis tsis tau qhia nws rau peb lub hlis dhau los) thiab twb kam teem sij hawm cia koj rov qab los. Ib zaj lus qhia feem ntau yog kev thov Vajtswv (thaum tsim nyog ua), qhia txog ib lub ntsiab cai ntawm txoj moo zoo, thiab caw tus neeg uas koj qhia.
Daim Duab
ob tub txib qhia
Tej zaj Lus Qhia uas Ib tug Mej Zeej Koom. Qhia pes tsawg zaj lus qhia hauv ib lub lim tiam thaum qhia ib tug neeg (uas tsis tau ua kev cai raus dej) thiab ib tug mej zeej koom ua ke.
Daim Duab
ib tsev neeg hauv lub tsev koom txoos
Tib Neeg uas Tab Tom Qhia uas Tuaj Koom Kev Sib Ntsib Txais lub Cim Nco Txog. Txhua tus neeg (uas tsis tau ua kev cai raus dej) uas koj qhia thiab tuaj koom kev sib ntsib txais lub cim nco txog hauv ib lub lim tiam.
Daim Duab
tsev neeg thov Vajtswv
Tib Neeg uas Tau Teem Sij Hawm Ua Kev Cai Raus Dej. Txhua tus neeg uas twb txaus siab thiab teem sij hawm ua kev cai raus dej thiab txais kev pom zoo.
Daim Duab
kev cai raus dej
Tib Neeg uas Ua Kev Cai Raus Dej thiab Ua Kev Pom Zoo. Txhua tus neeg uas tau txais cov kab ke ua kev cai raus dej thiab kev pom zoo thiab twb tau xa daim ntawv ntawm hluav taws xob nyob hauv ib lub lim tiam. (Saib tshooj 12 kom txhais lus tias ib tug neeg hloov siab los ntseeg ua kev cai raus dej txhais li cas thiab kom tau xov xwm txog kev tsim ntaub ntawv.)
Daim Duab
cov poj niam hauv lub tsev koom txoos
Cov Mej Zeej Tshiab uas Tuaj Koom Kev Sib Ntsib Txais lub Cim Nco Txog. Txhua tus mej zeej tshiab uas koj xa Daim Ntawv txog Kev Cai Raus Dej thiab Kev Pom Zoo rau 12 lub hlis dhau los uas tuaj koom kev sib ntsib txais lub cim nco txog nyob hauv lub lim tiam tas los.
Ntsiab lus hais tias, cia li tsom ntsoov rau kev pab tib neeg xaiv koom ua tej yam no. Cia li ua hauj lwm kom ua tej yam ntxim ua nram qab no:
Cov uas pab tib neeg ua zoo zuj zus kom ua raws li tej kev khi lus
Cov uas pab tib neeg uas tau ua kev cai raus dej thiab ua kev pom zoo nyob hauv lub xyoo tas los
Yog tias koj tsis txawj pom tias koj tej hauj lwm yuav pab li cas kom ib tug neeg ua zoo zuj zus raws li ntsuas tau ntawm koj tej cim tseem ceeb, ntsuam xyuas seb yam ntawd puas yog kev siv sij hawm zoo.
Rau tib neeg uas koj tau siv sij hawm tsawg dua, cia li pab txhawb nqa lawv txoj kev xav kawm txog txoj moo zoo. Tej zaum koj yuav xav caw cov mej zeej ncav tes pab lawv. Tej zaum koj kuj yuav xav siv txuj ci technology kom txhawb nqa lawv thiab txhawb pab lawv mus ntxiv. Saib “Siv Txuj Ci Technology” nyob hauv tshooj 9 kom muaj tswv yim ntxiv.
Daim Duab
Txwj Laug Quentin L. Cook
“Lub hom phiaj tseem ceeb tshaj plaws ntawm kev npaj kev thiab kev cuab hom phiaj yog kom hloov los ua cov thawj—los yog hais tias, muaj cov neeg hloov siab los ntseeg uas mob siab ua raws li lawv tej kev khi lus dawb ceev, pib thaum lawv ua kev cai raus dej mus txog thaum lawv khi lus hauv lub tuam tsev” (Quentin L. Cook, “Purpose and Planning,” kev sib ntsib rau qhov chaw tshaj tawm txoj moo zoo cov thawj coj, Rau Hli Ntuj 25, 2019).
Cuab Hom Phiaj txog tej Cim Tseem Ceeb thiab Npaj Kev
Thaum npaj kev txhua lub lim tiam, koj thiab koj tus khub cuab hom phiaj rau tag nrho tej cim tseem ceeb. Koj tej lub hom phiaj txog tej cim tseem ceeb yuav tsum muaj raws li koj txoj kev xav pab tib neeg ntxiv txais cov koob hmoov los ntawm kev hloov siab los ntseeg.
Cuab hom phiaj thiab npaj kev ua tej yam uas koj tswj tau thiab yuav hloov tej yam uas los ntawm tej cim tseem ceeb. Piv txwv hais tias:
Tej zaum koj yuav xav cuab hom phiaj txog ib lub cim tseem ceeb kom pib qhia pes tsawg tus neeg tshiab nyob hauv lub lim tiam. Txawm yog koj ua raws li lub hom phiaj ntawd los yeej nyob ntawm lwm tus neeg txoj kev ywj siab xaiv. Tiam sis ua tej yam uas koj ua tau kom thiaj li ua tiav. Ib txoj kev ua li no yog kev cuab hom phiaj kom sib tham nrog pes tsawg tus neeg tshiab nyob rau ib hnub. Ces cia li npaj seb koj yuav ua li cas kom ua tau. Saib tej lub tswv yim nyob hauv Cov Ntawv Ntxiv Tom Kawg 2 hauv tshooj no thiab nyob hauv tshooj 9.
Tej zaum koj yuav xav cuab hom phiaj txog tej cim tseem ceeb kom muaj pes tsawg tus mej zeej tshiab thiab tib neeg uas koj qhia koom kev sib ntsib txais lub cim nco txog. Txawm yog lawv tuaj los sis tsis tuaj nyob ntawm lawv txoj kev ywj siab xaiv. Tiam sis ua tej yam uas koj ua tau kom hloov tej yam uas los ntawm tej cim tseem ceeb no. Npaj rau lub sij hawm uas yuav caw lawv thiab rov qab xyuas.
Tej zaum koj yuav xav cuab hom phiaj txog ib lub cim tseem ceeb kom cov mej zeej koom pes tsawg zaj lus qhia nyob hauv ib lub lim tiam. Qhov uas koj ua raws li lub hom phiaj ntawd nyob ntawm cov mej zeej thiab cov neeg uas koj qhia. Tiam sis ua tej yam uas koj ua tau kom hloov tej yam uas los ntawm lub cim tseem ceeb no. Cuab hom phiaj kom nrog pawg ntseeg cov thawj coj ua hauj lwm kom cov mej zeej tuaj koom. Ces npaj seb koj yuav tswj li cas kom lawv koom ua ke.
Nrog koj tus khub, koj cuab hom phiaj txog tej cim tseem ceeb rau koj cheeb tsam. Cuab hom phiaj no raws li (1) cov neeg uas koj qhia ua zoo zuj zus npaum li cas thiab (2) yuav tsum nrhiav neeg tshiab rau koj qhia. Kev nrhiav cov neeg tshiab yog ib yam uas yuav tsum ua txhua lub sij hawm.
Qhov chaw tshaj tawm txoj moo zoo tej hom phiaj txog tej cim tseem ceeb yeej los ntawm tej lub hom phiaj ntawm txhua khub tub txib.
Qhov app Qhia Kuv txoj Moo Zoo yuav pab koj tsom ntsoov rau tib neeg thaum koj cuab hom phiaj txog tej cim tseem ceeb. Qhov app no kuj yuav pab koj kawm ntawm tej lub hom phiaj dhau los thiab qhia tias koj ua zoo npaum li cas ua raws li tej lub hom phiaj uas muaj tam sim no.
Tej hom phiaj thiab tej uas muaj los ntawm tej cim tseem ceeb los yeej xa mus rau koj qhov chaw tshaj tawm txoj moo zoo cov thawj coj thiab cov thawj coj tub txib hluas nyob hauv qhov app Qhia Kuv txoj Moo Zoo.
Ceev faj kom tsis txhob tsom ntsoov rau ib lub hom phiaj txog tej cim tseem ceeb ntau dua li lwm lub hom phiaj. Kev tsom ntsoov rau tag nrho tej cim tseem ceeb yuav pab koj caw lwm tus los cuag Khetos thiab ua raws li tej kev khi lus.
Daim Duab
Thawj Tswj Hwm Thomas S. Monson
“Thaum ntsuas tej yam yus ua, ces yus ua zoo dua. Thaum ntsuas thiab qhia tej yam yus ua, ces yeej ua zoo sai dua” (hais los ntawm Thomas S. Monson, “Thou Art a Teacher Come from God,” Improvement Era, Kaum Ob Hlis Ntuj 1970, 101).
Rau Siab Ua Hauj Lwm
Tus Tswv xav kom koj “rau siab kawg nkaus” thaum koj ua tub txib txoj hauj lwm (Lus Qhuab Qhia thiab Kev Khi Lus 107:99). Kev rau siab yog kev rau siab siv zog tsis tu tsis tseg.
Rau siab ua hauj lwm kom muaj raws li koj tej hom phiaj txog tej cim tseem ceeb. Caw tib neeg cog lus ua tej yam kom lawv yuav hloov siab los ntseeg. Qhov uas koj rau siab ua hauj lwm yuav tshoov lawv lub siab kom ua tej yam uas yuav pab lawv los cuag Khetos (saib 2 Nifais 2:14–16).
Cia li qhia txoj moo zoo kom pab tau tib neeg. Cov lus qhuab qhia, thaum tus Ntsuj Plig pab lawv to taub, yeej zoo dua lwm yam kom tshoov lawv lub siab ua.
Tiam sis, yuav tsum nco ntsoov tias tej lub hom phiaj txog tej cim tseem ceeb nyob ntawm lwm tus txoj kev ywj siab xaiv. Saib taus tib neeg txoj kev ywj siab xaiv txhua lub sij hawm.
Nco ntsoov tias tej cim tseem ceeb tsis yog lub hom phiaj thaum kawg. Tiam sis, tej cim tseem ceeb yeej piv txog ib tug neeg sab ntsuj plig txoj kev ua zoo zuj zus mus txog thaum lawv ua kev cai raus dej, ua kev pom zoo, thiab hloov siab los ntseeg kom khov kho. Qhov uas tib neeg ua zoo zuj zus npaum li cas yeej nyob ntawm qhov uas lawv xaiv ua dab tsi. Koj txhawb nqa lawv thaum muab siab rau ntseeg Yexus Khetos pab lawv thaum koj cuab hom phiaj, rau siab ua, thiab txhawb pab lawv raws li koj tau txais kev tshoov siab ua.
Ua Li Cas Kom Cuab Hom Phiaj thiab Npaj Kev Kom Ua Raws Li tej Hom Phiaj Ntawd
Kev cuab hom phiaj thiab npaj kev yeej yog tej yam yus ua los ntawm kev ntseeg. Tej hom phiaj qhia tias koj lub siab xav li cas thiab koj txoj kev xav pab koj tus kheej thiab lwm tus los cuag tus Cawm Seej.
Tej hom phiaj thiab tej kev npaj uas koj tau xyuam xim ua yuav pab koj paub meej yuav tsum ua dab tsi. Tej no yuav pab koj nrhiav tau tib neeg ntxiv rau koj qhia. Tej no yuav coj koj kev kom pab cov neeg uas koj qhia txhawb nqa lawv txoj kev ntseeg thiab ua zoo zuj zus mus kom hloov siab los ntseeg.
Ua kom lub sij hawm uas koj cuab hom phiaj thiab npaj kev ua ib lub sij hawm uas tshoov koj lub siab. Rau siab thov Vajtswv, muab siab rau ntseeg, nrog koj tus khub sib tham, thiab ua raws li tus Ntsuj Plig tej kev tshoov siab. Thaum koj npaj kev li no, koj yuav hnov tus Tswv txoj kev siv koj ua hauj lwm kom foom koob hmoov rau lwm tus.
Daim Duab
Thawj Tswj Hwm M. Russell Ballard
Ib lub hom phiaj yog ib qho chaw yus xav mus los yog qhov kawg, tiam sis kev npaj kev yog kev xav tias yus yuav taug txoj kev twg kom mus txog qhov ntawd. … Kev cuab hom phiaj yeej yog kev pib ua tom qab xav txog qhov kawg. Thiab kev npaj tswv yim yog kev tsim ib txoj kev kom txog qhov kawg ntawd (M. Russell Ballard, “Rov Qab Los thiab Txais Tau,” Liyahaunas, Tsib Hlis Ntuj 2017, 62–63).
Tej Ntsiab Cai rau Kev Cuab thiab Kev Ua Raws Li Hom Phiaj
Tus txheej txheem no yuav pab koj cuab hom phiaj thiab ua raws li koj tej hom phiaj ntawd.
Daim Duab
daim phiaj txog kev cuab hom phiaj
Thov Vajtswv pab koj cuab hom phiaj thiab tsim txoj kev npaj. Cuab hom phiaj uas ua taus tiam sis yuav pab koj ua zoo zuj zus thiab ua kom koj yuav tsum muaj kev ntseeg. Tsis txhob cuab hom phiaj uas nyuaj dhau los sis yooj yim dhau. Npaj seb koj yuav ua li cas kom ua taus.
Sau tseg thiab teem sij hawm. Sau ntawv txog koj tej hom phiaj thiab tej kev npaj nyob rau hauv ib daim ntawv teem sij hawm.
Ua raws li koj tau npaj. Rau siab ua hauj lwm kom ua raws li koj tej hom phiaj. Muab siab rau ntseeg tus Tswv kom pab koj.
Rov qab xyuas thiab rov qab ua ntxiv. Ntsuas seb puas ua zoo zuj zus thiab sau ntawv txog tej yam koj ua ntau zaus. Txiav txim siab yuav ua dab tsi uas tsis zoo li qub thiab yuav ua li cas kom zoo zuj zus. Kho tej yam uas tau npaj raws li yuav tsum ua.
Thaum koj siv tus txheej txheem cuab hom phiaj no, tus Tswv yuav txhawb koj lub zog thaum koj ua hauj lwm. Koj yuav muaj peev xwm zuj zus tuaj ua ib lub cuab yeej hauv Nws txhais tes. Koj yuav ua zoo ntau heev thaum koj foom koob hmoov rau Leej Txiv Saum Ntuj Ceeb Tsheej cov me nyuam.
Cuab Hom Phiaj thiab Npaj Kev Thaum Ua Txhua Yam ntawm Txoj Hauj Lwm No
Thov Vajtswv kom tus Ntsuj Plig coj koj kev thaum koj siv tus txheej txheem cuab hom phiaj ua txhua yam ntawm cov tub txib txoj hauj lwm. Ib txhia yog li no:
Koom siab nrog koj tus khub ua hauj lwm (saib nqe 6 nyob hauv “Sij Hawm Npaj Kev Txhua lub Lim Tiam”).
Txhawb koj txoj kev ntseeg Yexus Khetos kom muaj zog.
Ua kom muaj kev txawj ntse thiab txuj ci ntxiv, tsis hais kev kawm yam lus tshiab (saib tshooj 7).
Cuab Hom Phiaj Tsim Nyog
Tsis txhob cuab hom phiaj txog tej cim tseem ceeb rau lwm tus tub txib. Tiam sis, koj coj thiab txhawb nqa lawv los tau pab lawv siv tej ntsiab cai ntawm kev cuab hom phiaj thaum lawv cuab lawv tej hom phiaj.
Ceev faj kom tsis txhob muab piv rau lwm tus.
Tsis txhob siv kev ua raws li koj tej lub hom phiaj kom suav ua pes tsawg, kom tib neeg qhuas, los sis kom cem los sis ua rau lwm tus txaj muag.
Daim Duab
Thawj Tswj Hwm Spencer W. Kimball
“Peb ntseeg tias yuav tsum cuab hom phiaj. Peb ua neej raws li tej hom phiaj. … [Ib lub] hom phiaj tseem ceeb yog kom muab txoj moo zoo rau txhua tus neeg. … Peb lub hom phiaj yog kev txais tau txoj sia nyob mus ib txhis. Qhov ntawd yog lub hom phiaj zoo tshaj plaws hauv lub ntiaj teb no” (Spencer W. Kimball, zaj lus uas hais nyob hauv lub rooj qhia cov sawv cev rau thaj tsam, Plaub Hlis Ntuj 3, 1975, 6).
Siv Sij hawm Npaj Kev Txhua lub Lim Tiam thiab Txhua Hnub
Kev npaj txhua lub lim tiam pab koj pom tau ntau yam thiab tsom ntsoov rau tib neeg. Kuj pab tau koj tsom ntsoov rau tej yam ntxim ua uas tseem ceeb tshaj plaws. Kev npaj txhua hnub pab koj hloov thiab npaj ua tej yam txhua hnub. Koj xav ua tau zoo, tsis xav lam ua tej yam ntau xwb.
Thaum koj siv sij hawm npaj kev, nug koj tus kheej tej lus tseem ceeb txog tej yam uas koj xav tias tus Tswv xav kom koj ua. Nrhiav kev tshoov siab kom teb tej lus nug no uas tsim nyog rau txhua lub sij hawm thiab txhua tus neeg. Ces tej lus teb no los yuav siv hauv koj tej yam npaj kev.
Sij Hawm Npaj Kev Txhua lub Lim Tiam
Nrog koj tus khub siv sij hawm npaj kev rau ib hnub thiab ib lub sij hawm uas koj qhov chaw tshaj tawm txoj moo zoo tus thawj tswj hwm tau teem. Ua raws li tej yam nram qab no.
Thov Vajtswv thiab nrhiav kev tshoov siab. Thov Leej Txiv Saum Ntuj Ceeb Tsheej coj koj mus thaum npaj tej yam uas yuav pab kom muaj raws li Nws tej lub hom phiaj. Thov Nws kom foom koob hmoov rau koj txoj kev siv zog pab tib neeg ua zoo zuj zus thiab los cuag Khetos.
Siv qhov app Qhia Kuv txoj Moo Zoo kom cuab hom phiaj thiab npaj kev rau txhua lub cim tseem ceeb. Siv tus txheej txheem cuab hom phiaj nyob hauv tshooj no. Pib ua li no:
Tib neeg uas tau ua kev cai raus dej thiab txais kev pom zoo nyob hauv lub xyoo tas los.
Tib neeg uas tau teem sij hawm ua kev cai raus dej.
Tib neeg uas koj tab tom qhia uas tuaj koom kev sib ntsib txais lub cim nco txog.
Saib Cov Ntawv Ntxiv Tom Kawg 1 nyob hauv tshooj no kom tau tswv yim txog kev siv tus txheej txheem cuab hom phiaj thaum koj ua hauj lwm qhia tib neeg.
Siv tus txheej txheem cuab hom phiaj kom nrhiav tau neeg rau koj qhia (saib Cov Ntawv Ntxiv Tom Kawg 2 nyob hauv tshooj no thiab tshooj 9 kom pab nrhiav neeg).
Siv tus txheej txheem cuab hom phiaj kom nrog pawg ntseeg cov thawj coj thiab cov mej zeej sib raug zoo. Cuab hom phiaj thiab npaj kev seb koj yuav ua li cas kom txhawb nqa lawv txoj kev siv zog qhia txoj moo zoo (saib tej lub tswv yim nyob hauv tshooj 9 thiab 13). Npaj rau pawg ntseeg kev sib ntsib koom tes txhua lub lim tiam (saib tshooj 13).
Saib koj tej kev npaj kev thiab tej lub hom phiaj nyob hauv qhov app Qhia Kuv txoj Moo Zoo. Saib koj tej kev teem sij hawm thiab kev sib ntsib.
Nrog koj tus khub sib sab laj. Ua li no los feem ntau yuav ua tej no:
Yog xav ua, qhia txog koj tej lub hom phiaj uas tsim nyog hais thiab thov koj tus khub pab koj ua tej ntawd.
Sib tham seb neb ob leeg sib raug zoo li cas. Sib tham txog tej teeb meem ntawm kev mloog lus los sis kev koom siab ua hauj lwm. Kho tej yam uas neb tsis sib raug zoo thaum neb (1) cia neb ob leeg nyias hais tag nrho nyias tej kev xav, (2) ib leeg to taub thiab lees txais nyias tej kev txhawj xeeb, thiab (3) ua hauj lwm ua ke kom tsim ib txoj kev kho teeb meem uas kho tau tej kev txhawj xeeb uas tseem ceeb tshaj.
Qhia koj tus khub txog tej yam uas koj xav tias ua rau nws muaj zog. Thov kom nws tawm tswv yim txog qhov uas koj yuav ua li cas kom ua zoo dua.
Cuab hom phiaj uas yuav pab neb ob leeg sib raug zoo.
Ob tug khub kev sib sab laj yuav koj muaj txuj ci tseem ceeb uas koj siv tau hauv koj lub neej thiab nrog koj tsev neeg, thaum ua hauj lwm hauv lub Koom Txoos, ua hauj lwm, thiab lwm lub koom haum.
Thov Vajtswv kaw.
Sij Hawm Npaj Kev Txhua Hnub
Siv 30 feeb nrog koj tus khub cuab hom phiaj thiab npaj kev txhua hnub thaum sawv ntxov. Ua raws li tej yam nram qab no.
Thov Vajtswv thiab nrhiav kev tshoov siab.
Rov qab xyuas seb ua zoo li cas rau neb tej hom phiaj txog tej cim tseem ceeb lub lim tiam no.
Rov qab xyuas neb tau npaj ua dab tsi kom pab tib neeg uas neb qhia. Tsom ntsoov rau tej yam uas pab cov uas uas tab tom ua zoo zuj zus. Hloov tej hom phiaj thiab tej kev npaj kev txhua hnub raws li yuav tsum hloov.
Cog lus tias hnub ntawd neb yuav ua tej yam kom nrhiav tau tib neeg tshiab rau neb qhia thiab pab cov neeg uas neb qhia.
Npaj kev seb neb yuav ua li cas kom nrog cov thawj coj thiab mej zeej ua hauj lwm.
Thov Vajtswv kaw.
Kev Kawm Ntawv Nrog tus Khub
Rov qab xyuas Cov Ntawv Ntxiv Tom Kawg 1 thiab Cov Ntawv Ntxiv Tom Kawg 2 hauv tshooj no seb puas muaj tswv yim txog kev siv tus txheej txheem cuab hom phiaj thaum neb qhia thiab nrhiav neeg. Xaiv seb neb yuav ua li cas kom siv tej lub tswv yim no.
Siv qhov App Qhia Kuv txoj Moo Zoo
Hais txog cov uas tau ua kev cai raus dej nyob rau nws lub caij nyoog, Maulaunais hais tias, “Cov ntseeg muab lawv lub npe sau cia, xwv kom yuav nco qab lawv thiab Vajtswv txoj lus zoo yuav los yug lawv, kom ceev tau lawv taug txoj kev yog” (Maulaunais 6:4). Kev ceev xwm txheej kom zoo yeej yog ib txoj kev rau koj ua raws li lub ntsiab cai no.
Ceev Ntawv txog Koj Tes Hauj Lwm
Kev ceev xwm txheej yog ib feem ntawm kev rau siab saib xyuas koj cheeb tsam nrog lub siab hlub thiab kev txhawj xeeb. Ceev koj cov ntawv xwm txheej kom raug thiab raws li lub sij hawm tam sim no. Qhov no yuav pab koj nco ntsoov tias koj yuav tsum ua dab tsi kom pab tib neeg.
Qhov app Qhia Kuv txoj Moo Zoo cia koj koom tes ua ke thiab qhia xov xwm tseem ceeb rau cov thawj coj thiab cov mej zeej txog qhov uas tib neeg thiab txoj hauj lwm no zoo li cas.
Ua Raws Li tej Kev Cai txog Kev Khaws Xov Xwm thiab Kev Ceev Cia
Cia li ua raws li tej kev cai txog kev khaws xov xwm thiab kev ceev cia thaum sau tej hom phiaj thiab kev npaj kev nyob hauv qhov app Qhia Kuv txoj Moo Zoo thiab thaum sau cov ntaub ntawv. Yog xav paub ntxiv, saib Kev Cai Ua Tub Txib ntawm Yexus Khetos cov Thwj Tim, 7.5.
Nug koj tus kheej tej lus no ua ntej koj sau ntawv los sis qhia xov xwm nyob hauv qhov app Qhia Kuv txoj Moo Zoo, email, kev sib tham saum huab cua, tej lus cim, los sis lwm yam kev sib txuas lus:
Tus neeg no yuav xav li cas txog qhov uas kuv sau ntawv?
Kuv yuav xav li cas yog lwm tus qhia xov xwm li no txog kuv rau lwm tus?
Kuv puas ua raws li lub Koom Txoos tej kev cai thiab tej kev cai khaws xov xwm rau kuv cheeb tsam yog tias kuv sau los sis qhia cov xov xwm no?
Daim Duab
ob tug tub txib thov Vajtswv
Kev Lav Ris
Lub ntsiab cai txog kev lav ris yeej tseem ceeb rau Vajtswv txoj hau kev mus ib txhis li (saib Amas 5:15–19; Lus Qhuab Qhia thiab Kev Khi Lus 104:13; 137:9). Lub ntsiab cai no hloov taus koj txoj kev xav txog kev lav ris dawb ceev uas tus Tswv tau muab rau koj no. Kev lav ris kuj hloov taus koj txoj kev ua txoj hauj lwm no.
Thaum Nws ua hauj lwm qhuab qhia hauv lub ntiaj teb no, tus Cawm Seej tau txib Nws cov thwj tim kom pab lawv ua zoo zuj zus, hloov siab, thiab ua Nws txoj hauj lwm. Nws kuj tau muab cib fim rau lawv lav ris rau txoj hauj lwm uas Nws muab rau lawv ua (saib Lukas 9:10; 3 Nifais 23:6–13). Vim koj yog ib tug tub txib, koj lav ris txoj hauj lwm uas tus Tswv muab rau koj ua.
Thaum cuab hom phiaj thiab npaj kev cia li xav tias koj yuav qhia txog tej yam uas koj lav ris rau tus Tswv thaum thov Vajtswv txhua hnub. Koj kuj lav ris tej no rau koj tus kheej thiab rau koj qhov chaw tshaj tawm txoj moo zoo cov thawj coj.
Kev hais txog tej yam uas koj lav ris yeej yuav tsum txhawb nqa koj lub siab thaum pom zoo rau tej yam koj tau ua thiab kawm txog tej yam uas koj ua tau zoo dua.
Cia li xav txog kab lus no los ntawm tsab ntawv uas hu koj ua tub txib: “Thaum koj rau siab siv sij hawm thiab tsom ntsoov rau kev ua hauj lwm rau tus Tswv, muab txhua yam xwm txheej ntawm tus kheej tso tseg, ces tus Tswv yuav foom koob hmoov rau koj kom muaj kev txaj ntse ntxiv thiab ib zaj lus tim khawv txog Yexus Khetos thiab Nws txoj moo zoo uas txum tim rov qab los.” Nug koj tus kheej txog tej lus nug no, thiab sau ntawv txog koj tej kev tshoov siab.
Kuv ua zoo li cas siv sij hawm thiab tsom ntsoov rau kev ua hauj lwm rau tus Tswv?
Nyob hauv koj phau ntawv ceev txog kev kawm, cia li sau ntawv teb txhua lo lus nug no. Siv tus txheej txheem cuab hom phiaj kom npaj kev rau tej yam uas koj ua tau tam sim no raws li tej lub hom phiaj no. Ceev koj tej kev npaj kev.
Yog koj yuav rov qab xyuas koj qhov app tam sim no, ces qhov app ntawd puas yuav pab koj paub tib neeg nyob qhov twg? Puas yuav pab koj paub txog lawv txoj kev ua zoo zuj zus?
Koog Chaw Pawg Sab Laj, Thaj Chaw tej Rooj Sab Laj, thiab Qhov Chaw Tshaj Tawm Txoj Moo Zoo cov Thawj Coj Pawg Sab Laj
Caw cov tub txib kom qhia txog tej lub hom phiaj uas lawv cuab lawm thiab tej kev npaj kev uas tau npaj kom pab tib neeg ua zoo zuj zus. Tej yam ntxwv yog tej hom phiaj thiab tej kev npaj kev kom pab tib neeg:
Muaj siab ntseeg tus Cawm Seej ntxiv.
Hloov siab lees txim thiab hloov siab kom txav ze dua rau Vajtswv.
Ua kev cai raus dej thiab txais kev pom zoo.
Rov qab los rau lub Koom Txoos thiab rov qab khi lawv txoj kev khi lus thaum ua kev cai raus dej.
Nyeem ib zaj lus nram qab no rau cov tub txib. Hais kom cov tub txib faib ua tej pawg me me. Hais kom txhua pawg siv yam 1 thiab 2 hauv tus txheej txheem cuab hom phiaj kom pab cov neeg haus tej zaj lus piv txwv no ua zoo zuj zus kom ua kev cai raus dej thiab txais kev pom zoo. Cia txhua pawg qhia txog lawv tej lub tswv yim.
Ib tug neeg uas nej qhia twb hais tias nws yuav ua raws li nej caw kom nws koom lub koom txoos rau lub lim tiam no.
Ib tug neeg tau hais tias yuav ua raws li nej caw kom nws ua kev cai raus dej thiab tau nrog nej cuab hom phiaj ua kev cai raus dej.
Ib tug neeg tau hais tias yuav ua raws li nej caw kom nyeem Phau Ntawv Maumoos thiab tau cog lus tias yuav nyeem 1 Nifais 1.
Caw cov tub txib siv qhov app Qhia Kuv txoj Moo Zoo pab lawv cuab tej hom phiaj uas ua taus tiam sis yuav pab lawv ua zoo zuj zus ntxiv thaum nej:
Rov qab xyuas keeb kwm thiab tau ua zoo li cas siv tej cim tseem ceeb.
Kev cuab hom phiaj txhua hnub, txhua lub lim tiam, thiab txhua lub hli.
Muab tib neeg txuas rau tej hom phiaj txog tej cim tseem ceeb.
Sib tham seb tej yam no yuav pab cov tub txib li cas kom npaj kev zoo dua thaum lawv pab tib neeg ua tau zoo zuj zus. Hais kom cov tub txib xav txog tej yam no:
Nej yuav siv qhov app Qhia Kuv txoj Moo Zoo nyob rau yav tom ntej thaum nej npaj kev?
Nej tau kawm dab tsi ntxiv uas pab nej siv qhov app no zoo dua?
Rov qab xyuas cov tub txib qhov app Qhia Kuv txoj Moo Zoo ntau zaus. Caw lawv qhia tias lawv siv qhov app no zoo li cas kom seb lawv ua zoo li cas ua raws li lawv tej lub hom phiaj thiab tej kev npaj pab tib neeg ua tau zoo zuj zus.
Tej lub sij hawm saib cov tub txib tej lub sij hawm npaj kev txhua lub lim tiam los yog txhua hnub.
Cov Ntawv Ntxiv Tom Kawg 1
Siv tus Txheej Txheem Cuab Hom Phiaj Thaum Koj Ua Hauj Lwm Qhia Tib Neeg
Zaj lus no muaj tej zaj lus piv txwv txog qhov uas yuav ua li cas kom siv tus txheej txheem cuab hom phiaj pab tib neeg uas koj qhia.
1. Cuab Hom Phiaj thiab Npaj Kev
Thov Vajtswv seb tib neeg uas neb qhia xav tau dab tsi rau lawv sab ntsuj plig. Cuab hom phiaj thiab npaj kev kom pab lawv muaj tej yam uas lawv xav tau no. Siv qhov app Qhia Kuv txoj Moo Zoo kom rov qab xyuas txhua tus neeg ua tau zoo li cas. Siv tej cim tseem ceeb rau kev hloov siab los ntseeg kom xaiv tej yam uas yuav pab txhua tus neeg mus tom ntej kom los cuag Yexus Khetos.
Thaum neb cuab hom phiaj thiab npaj kev, nug neb tus kheej tej lus nug zoo li no:
Tus neeg no xaiv ua dab tsi kom qhia tias nws txoj kev ntseeg Yexus Khetos loj tuaj?
Tus neeg no puas muaj sij hawm thaum nws hnov tus Ntsuj Plig?
Nws muaj tej teeb meem twg?
Wb yuav kawm dab tsi ntxiv los ntawm tus neeg no kom pab tau nws?
Yuav tsum ua dab tsi kom pab tus neeg no muab siab rau ntseeg Yexus Khetos, hnov thiab to taub tus Ntsuj Plig, hloov siab lees txim, thiab ua kev cai raus dej?
Wb yuav ua li cas kom npaj rau pawg ntseeg kev sib ntsib koom tes txhua lub lim tiam kom pawg ntseeg cov thawj coj thiab cov mej zeej pab tau tus neeg no? (Saib tshooj 13.)
Peb yuav cuab tej hom phiaj txog tej cim tseem ceeb twg uas yuav qhia tias peb ntseeg tus Tswv?
Siv qhov app Qhia Kuv txoj Moo Zoo kom ceev ntawv thiab teem sij hawm rau neb tej hom phiaj thiab tej kev npaj kev. Qhov no yuav pab neb npaj ua txoj hauj lwm thiab xaiv tej yam uas neb yuav ua txhua hnub. Ua raws li tej kev cai khaws xov xwm rau neb cheeb tsam.
Thaum neb ceev ntawv thiab teem sij hawm rau neb tej kev npaj kev, nug neb tus kheej tej yam xws li no:
Wb ua tau dab tsi hnub no thiab lub lim tiam no kom txhawb nqa tus neeg no txoj kev ua tau zoo zuj zus?
Cov lus qhuab qhia (los sis zaj lus qhia) twg yuav pab tus neeg no txoj kev ntseeg Yexus Khetos muaj zog ntxiv thiab pab nws ua raws li txoj moo zoo? Wb yuav qhia cov lus qhuab qhia no zoo li cas kom nws to taub thiab kom tus Vaj Ntsuj Plig Dawb Huv qhia tau nws?
Wb yuav ua li cas kom ceeb toom tias wb yuav tuaj thiab yuav ua li ntawd thaum twg?
Wb yuav caw tib neeg ua dab tsi los sis rov qab xyuas txog tej kev caw twg? Wb yuav rov qab xyuas li cas thiab thaum twg?
Wb yuav ua li cas thiab thaum twg yuav pab tus neeg tuaj koom lub koom txoos, nyeem cov vaj lug kub, thov Vajtswv, thiab ua raws li tej kev cog lus uas ua rau peb nrog Vajtswv khi lus?
Cov mej zeej pab tau li cas?
Muaj tej kev pab nyob online uas wb muab tau rau tus neeg ntawd?
Wb yuav npaj ua dab tsi yog tias muaj ib yam uas tsis zoo li wb tau npaj ua ntej?
3. Ua Raws Li Neb Tau Npaj
Thov Vajtswv hauv koj lub siab tas ib hnub thaum koj ua raws li koj tau npaj. Tus Ntsuj Plig yuav pab koj paub mus qhov twg, ua dab tsi, hais li cas, thiab hloov dab tsi.
Nyob tas ib hnub, nug koj tus kheej tej lus nug xws li no:
Wb yuav ua li cas kom ua hauj lwm nrog kev ntseeg, tso siab rau tus Tswv kom pab wb thiab txhawb nqa wb tes hauj lwm kom pab Nws cov me nyuam?
Wb yuav ua li cas kom txawj tsim thiab ua siab loj thaum wb ua raws li wb tau npaj?
Wb yuav ua li cas kom hloov tej yam uas wb tau npaj kom muaj raws li tib neeg tej kev xav tau thiab tej xwm txheej?
Tsis yog txhua yam yuav muaj raws li koj cia siab. Cia li ua yooj yim kom hloov tej yam uas tau npaj lawm thiab siv tej yam uas tau npaj kom txhawb nqa yog yuav tsum siv.
4. Rov Qab Xyuas thiab Rov Qab Ua Ntxiv
Nrog koj tus khub, rov qab xyuas seb neb puas tau ua raws li tej lub hom phiaj uas neb cuab kom qhia tib neeg thiab pab lawv ua tau zoo zuj zus. Npaj tej kev kom rov qab xyuas. Hloov tej yam uas neb npaj yog yuav tsum hloov thaum neb siv zog ua raws li neb tej lub ho phiaj.
Nug neb tus kheej tej lus xws li no:
Cov neeg uas wb qhia puas ua tej yam zuj zus kom muaj siab xav nrog Vajtswv khi lus?
Lawv muaj tej teeb meem dab tsi? Lawv txhawj txog dab tsi?
Wb yuav ua li cas hnub no kom pab lawv thiab yaum lawv ua tej yam—tab meeg lawv los sis siv txuj ci technology ua?
Wb yuav kawm dab tsi los ntawm tej yam uas tab kaum?
Wb tau ua zoo li cas kom muaj raws li wb tej lub hom phiaj? Puas muaj dab tsi uas wb yuav tsum hloov los sis ua txawv qhov qub?
Puas tau txog lub sij hawm uas wb yuav tsis tshua mus xyuas?
Saib tshooj 11 yog xav kawm tej ntsiab cai thiab tej lub tswv yim ntxiv txog kev paub ua li cas kom rov qab mus xyuas thiab pab tib neeg ua tau zoo zuj zus.
Cov Ntawv Ntxiv Tom Kawg 2
Siv tus Txheej Txheem Cuab Hom Phiaj Thaum Nrhiav Neeg rau Koj Qhia
Zaj lus no muaj tej zaj lus piv txwv txog qhov uas yuav ua li cas kom siv tus txheej txheem cuab hom phiaj pab nrhiav tau neeg tshiab rau koj qhia. Siv tus txheej txheem no thaum neb npaj txhua lub lim tiam thiab txhua hnub.
1. Cuab Hom Phiaj thiab Npaj Kev
Nrog koj tus khub, thov Vajtswv seb Leej Txiv Saum Ntuj Ceeb Tsheej xav kom neb ua kom nrhiav tau tib neeg ntxiv rau neb qhia. Ua li no txhua lub lim tiam thiab txhua hnub. Ntseeg tias Nws npaj tib neeg rau neb qhia (saib Lus Qhuab Qhia thiab Kev Khi Lus 100:3–8).
Cuab hom phiaj kom nrhiav tau neeg txhua hnub. Npaj ua tej yam uas neb ua tau kom muaj raws li tej lub hom phiaj txog tej cim tseem ceeb. Piv txwv los muaj xws li:
Neb yuav nrog pes tsawg tus neeg tshiab tham txog txoj moo zoo txhua hnub.
Neb yuav ua dab tsi sai npaum li cas kom teb cov ntawv uas xa neb mus qhia lwm tus los sis tej lus uas sau rau hauv kev sib tham saum huab cua.
Rov qab saib qhov app Qhia Kuv txoj Moo Zoo thiab nug neb tus kheej tej lus nug zoo li no:
Leej Txiv Saum Ntuj Ceeb Tsheej xav kom wb ua hnub no thiab lub lim tiam no kom nrhiav neeg rau wb qhia?
Peb yuav cuab hom phiaj txog tej cim tseem ceeb twg txhua hnub thiab txhua lub lim tiam kom wb nrhiav tau neeg rau wb qhia?
Txoj kev twg kom nrhiav neeg yog txoj kev zoo tshaj plaws rau lub sij hawm no thiab qhov chaw no?
Wb yuav ua li cas kom tshoov thiab txhawb nqa pawg ntseeg cov mej zeej lub siab thaum lawv siv zog qhia txoj moo zoo los ntawm tej lub ntsiab cai txog kev hlub, kev qhia, thiab kev caw?
Peb yuav ua hauj lwm li cas nrog pawg ntseeg pawg sab laj los sis cov neeg uas koom pawg ntseeg txoj kev sib ntsib koom tes kom xaiv tej tsev neeg uas tsis yog mej zeej tag nrho, cov mej zeej uas rov qab los, thiab cov uas tseem tsis yog txwj laug rau wb tham?
Wb yuav nrog leej twg tham los ntawm cov neeg uas tab tom qhia, cov neeg uas qhia dhau los, thiab cov neeg hauv ntawv xa wb mus qhia? Wb yuav ua li cas kom nrog lawv txuas lus? (Tim ntsej tim muag, siv txuj ci technology, xov tooj, los sis lwm txoj kev)
Muaj tej txoj kev tshiab twg rau wb nrhiav neeg?
Wb yuav siv wb tej txuj ci thiab tej kev muaj zog twg?
Wb yuav ua li cas kom muaj peev xwm nrhiav tib neeg rau wb qhia ntxiv?
Wb yuav ua li cas kom pab cov uas nrog wb tham hnov tus Vaj Ntsuj Plig Dawb Huv lub hwj huam?
Siv qhov app Qhia Kuv txoj Moo Zoo kom koj xaiv tej yam ntxim ua kom nrhiav neeg uas yeej zoo siv thaum yav tas los. Piv txwv hais tias, koj pom tau hais tias twb tau ua li cas kom nrhiav tau cov neeg uas nyuam qhuav hloov siab los ntseeg.
Nrhiav kev tshoov siab thiab qhib siab rau tej kev tshoov siab thiab tej lub tswv yim tshiab. Tsis txhob lam ua qhov qub tas li. Cov tub txib uas nrhiav tau tib neeg tshiab rau lawv qhia feem ntau ua ntau yam sib txawv txhua lub lim tiam. Lawv ua hauj lwm ua li no tas li.
Nrog koj tus khub, cia li siv qhov app Qhia Kuv txoj Moo Zoo kom ceev ntawv thiab teem sij hawm rau neb tej hom phiaj thiab tej kev npaj kev. Kev ceev xwm txheej thiab teem sij hawm rau tej yam uas neb npaj yuav pab neb xaiv ua tej yam twg thiab yuav ua thaum twg.
Nug neb tus kheej tej lus xws li no:
Wb yuav ua li cas kom nrog tib neeg txuas lus thiab yuav ua thaum twg? Tej txoj kev sib tham twg zoo tshaj plaws? Tej qhov chaw twg zoo tshaj plaws? Txhua hnub tej lub sij hawm twg zoo tshaj rau wb nrhiav neeg?
Wb yuav ua li cas kom sib tham kom muaj nqis heev nrog tib neeg uas wb sib ntsib?
Wb yuav ua li cas kom nrhiav neeg nyob online siv kev sib tham saum huab cua thiab lwm yam txuj ci technology thiab yuav ua thaum twg?
Thaum twg wb mam li sim nrog tib neeg tham los ntawm kev xa ntawv rau wb mus qhia?
Wb yuav npaj ua dab tsi yog tias muaj ib yam uas tsis zoo li wb tau npaj ua ntej?
3. Ua Raws Li Neb Tau Npaj
Rau siab siv zog ua raws li neb lub hom phiaj kom nrhiav tau neeg rau neb qhia. Thov Vajtswv hauv neb lub siab tas ib hnub. Qhib neb lub siab kom hais lus thiab tos txais tib neeg uas neb ntsib. Tus Ntsuj Plig yuav pab koj paub mus qhov twg, ua dab tsi, hais li cas, thiab hloov dab tsi.
Nyob tas ib hnub, nug koj tus kheej tej lus nug xws li no:
Wb yuav ua li cas kom ua hauj lwm nrog kev ntseeg, tso siab rau tus Tswv kom pab wb thiab txhawb nqa wb tes hauj lwm kom pab Nws cov me nyuam?
Wb yuav ua li cas kom txawj tsim thiab ua siab loj thaum wb ua raws li wb tau npaj?
Wb yuav ua li cas kom hloov tej yam uas wb tau npaj kom muaj raws li tib neeg tej kev xav tau thiab tej xwm txheej?
Wb yuav ua li cas kom pab tib neeg hnov tau tus Vaj Ntsuj Plig Dawb Huv lub hwj huam?
Tsis yog txhua yam yuav muaj raws li koj cia siab. Cia li ua yooj yim kom hloov tej yam uas tau npaj lawm thiab siv tej yam uas tau npaj kom txhawb nqa yog yuav tsum siv.
4. Rov Qab Xyuas thiab Rov Qab Ua Ntxiv
Tas ib hnub thiab lub lim tiam no, thov Vajtswv rov qab xyuas tau ua raws li neb tej lub hom phiaj zoo li cas kom nrhiav tau tib neeg rau neb qhia. Nug neb tus kheej tej lus xws li no:
Wb tau ua zoo li cas kom muaj raws li wb tej lub hom phiaj thiab ua raws li wb tau npaj lawm?
Wb yuav tsum hloov dab tsi kom muaj raws li wb tej lub hom phiaj txog kev nrhiav tau neeg?
Wb yuav ua li cas kom txhob lam ua qhov qub uas tsis pab wb nrhiav neeg rau wb qhia?
Muaj yam dab tsi tshiab uas wb sim ua tau thaum lub sij hawm no?
Muaj tej lub tswv yim twg uas wb yuav hais txog nyob hauv pawg ntseeg kev sib ntsib koom tes txhua lub lim tiam kom pab wb nrhiav tau neeg rau wb qhia? (Saib tshooj 13.)
Nrog tus khub, siv daim phiaj “Kev Siv Zog Nrhiav Neeg” nyob hauv tshooj 9 kom tshawb xyuas koj tej kev siv zog nrhiav tau neeg txhua lub lim tiam thiab txhua hnub. Cia li to taub txog tej yam uas neb ua zoo, thiab xav tias neb yuav ua li cas kom ua zoo dua.
Tas ib hnub, tos ntsoov rau ib me ntsis kom nco txog Vajtswv txoj kev pab neb tes hauj lwm.