Kuv yuav ua li cas kom txhawb nqa kuv txoj kev ntseeg tus Tswv kom pab kuv kawm ib yam lus tshiab?
Vim li cas kuv yuav tsum kawm tsis tu tsis tseg kom txawj hais kuv yam lus ntxiv?
Kuv yuav ua li cas kom txawj hais kuv qhov chaw tshaj tawm txoj moo zoo yam lus thaum kuv hais thiab qhia?
Kuv yuav ua li cas kom txais tau lub txiaj ntsim hais ntau yam lus?
Npaj Koj tus Kheej Sab Ntsuj Plig
Tus Tswv tshaj tawm hais tias, “Txhua tus neeg yuav hnov qhov txhij txhua ntawm txoj moo zoo los ntawm nws yam lus hais, thiab los ntawm nws yam lus, los ntawm cov uas tau tsa los rau lub hwj chim no” (Lus Qhuab Qhia thiab Kev Khi Lus 90:11).
Nyob nram qab no muaj tej yam uas koj ua tau kom txhawb koj txoj kev ntseeg tias tus Tswv yuav pab koj qhia thiab ua tim khawv thaum hais koj qhov chaw tshaj tawm txoj moo zoo yam lus:
Cia li ntseeg tias Vajtswv tau hu koj dhau los ntawm ib tug yaj saub.
Ua neeg tsim nyog muaj tus Vaj Ntsuj Plig Dawb Huv nrog nraim koj nyob los ntawm koj txoj kev ua raws li cov lus txib thiab ua raws li cov tub txib tej kev cai.
Ua kom koj lub siab huv thaum koj hlub Vajtswv thiab hlub Nws cov me nyuam thiab muaj lub siab xav foom koob hmoov rau lawv.
Rau Siab thiab Fij Koj lub Siab
Yuav tsum rau siab ua hauj lwm thiab muaj tej txiaj ntsim ntawm tus Ntsuj Plig kom kawm kev qhia tib neeg thaum hais koj qhov chaw tshaj tawm txoj moo zoo yam lus. Txhob xav tsis thoob thaum nyuaj ua koj txoj hauj lwm. Yuav tsum siv sij hawm. Ua siab ntev rau koj tus kheej. Thaum koj muab koj tus kheej fij tseg kawm yam lus tshiab, koj yuav muaj txuj ci txaus kom ua raws li koj lub hom phiaj ua tub txib.
Koj tsis kawm koj qhov chaw tshaj tawm txoj moo zoo yam lus koj tus kheej xwb. Leej Txiv Saum Ntuj Ceeb Tsheej thiab Yexus Khetos yuav pab koj thaum koj nrhiav Nkawd txoj kev pab. Thov thiab qhib koj lub siab kom txais kev pab los ntawm koj tus khub, cov mej zeej, cov uas koj qhia, lwm tus tub txib, thiab lwm tus neeg.
Cia li mloog zoo thiab hais yam lus ntawd txhua lub sij hawm koj hais tau. Tsis txhob ntshai ua yuam kev. Txhua tus uas kawm ib yam lus tshiab ua yuam kev. Tib neeg yuav to taub, thiab lawv yuav zoo siab thaum koj siv zog kawm lawv yam lus.
Cia li kawm kom muaj txuj ci zoo dua hais koj yam lus mus txog thaum koj ua tub txib tas lawm. Thaum koj txawj hais lus zuj zus tuaj, tib neeg yuav mloog zoo ntxiv rau tej yam uas koj hais thiab tsis xav txog qhov uas koj txawj hais li cas. Koj yuav tsis txhawj txog koj txoj kev txawj sib tham thiab yuav muaj peev xwm pab lwm tus raws li lawv xav tau.
Daim Duab
Txwj Laug Jeffrey R. Holland
“Peb yeej … cia siab hais tias txhua tus tub txib uas kawm ib yam lus … tshiab yuav txawj hais txhua yam. … Thiab thaum nej ua li ntawd, nej tej txuj ci [qhia] thiab ua tim khawv yuav zoo zuj zus. [Tib neeg uas nej qhia] yuav haj yam txais nej thiab nej sab ntsuj plig yuav haj yam tshoov lawv lub siab. …
“Tsis txhob txaus siab kawm tej yam uas cov tub txib hais ntau xwb. Cia li kawm txhua yam nej kawm tau, thiab yuav txawj pab tib neeg qhib lawv lub siab” (Jeffrey R. Holland, kev tshaj tawm rau cov tub txib los ntawm lub tshuab xa xov xwm, Yim Hli Ntuj 1998).
Cia li siv koj qhov chaw tshaj tawm txoj moo zoo yam lus tom qab koj rov qab mus tsev. Tus Tswv tau muab ntau yam rau koj siv, thiab tej zaum Nws yuav xav siv koj tej txuj ci txawj hais yam lus ntawd thaum koj laus thiab.
Kawm Lus Askiv
Yog tias koj tsis hais lus Askiv, koj yuav tau kawm yam lus no thaum koj ua ib tug tub txib. Qhov no yuav pab koj thaum koj ua tub txib thiab tas koj lub neej. Kev kawm lus Askiv kuj yuav foom koob hmoov rau koj tsev neeg.
Cuab hom phiaj kom txawj hais lus zoo dua, thiab hloov koj tej hom phiaj ntau zaus. Tsim ib txoj kev npaj kawm yam lus tshiab. Siv koj yam lus txhua zaus koj ua tau.
Ua Kom Koj txoj Kev Kawm Muaj Nqis
Siv tej yam uas koj kawm thaum koj ua neej txhua hnub. Tsom ntsoov rau tej lus uas yuav pab koj hais tej yam uas koj yuav tsum paub hais.
Nrhiav Kev Txuas Lus
Nrog koj tus khub sib tham hais yam lus ntawd ntau npaum li hais tau. Siv txhua lub cib fim kom kawm thiab xyaum. Piv txwv hais tias, tej zaum koj yuav xav thov ib tug mej zeej uas rov qab los los sis ib tug uas koj qhia kom pab koj hais lawv yam lus. Tsis muaj ib yam dab tsi uas pauv tau qhov uas koj nrog cov neeg uas ib txwm hais yam lus ntawd.
Tsis Txhob Sib Piv
Tsis txhob muab koj txoj kev txawj hais yam lus piv rau koj cov khub los sis lwm tus tub txib. Kev sib piv ua rau yus muab hlob los sis poob siab.
Kawm tej Ntsiab Lus Kom Tag
Ntau zaus cia li rov qab xyuas tej yam uas koj tau kawm thiab xyaum hais thaum muaj xwm txheej tshiab. Qhov no yuav pab koj nco qab thiab siv tej yam uas koj kawm.
Daim Duab
txiv neej nyeem phau ntawv
Tsim Ib txoj Kev Npaj Kawm Yam Lus Tshiab
Ib txoj kev npaj kawm yam lus tshiab yeej pab tau cov tub txib tshiab thiab cov tub txib uas laus zog tsom ntsoov rau tej yam uas lawv ua tau txhua hnub kom txawj hais lawv qhov chaw tshaj tawm txoj moo zoo yam lus. Koj txoj kev npaj yuav muaj tej yam uas koj ua tau thaum koj siv sij hawm kawm yam lus thiab lwm lub sij hawm txhua hnub.
Tej yam nram qab no qhia koj tias yuav ua li cas kom tsim ib txoj kev npaj kawm yam lus tshiab thaum siv tus txheej txheem cuab hom phiaj los ntawm tshooj 8. Hloov tus txheej txheem no raws li xav tau.
Thov Vajtswv pab koj cuab hom phiaj thiab tsim txoj kev npaj. Cuab hom phiaj txhua lub lim tiam thiab txhua hnub kom txawj qhia txoj moo zoo thiab sib txuas lus zoo dua. Ua tej yam uas koj xav cim ntsoov, xws li tej lo lus, kab lus, tej nqe vaj lug kub, thiab tej zaj lus.
Sau tseg thiab teem sij hawm. Txiav txim siab tej cuab yeej kawm yam lus tshiab yuav pab koj ua raws li koj tej lub hom phiaj. Tej cuab yeej kawm yam lus tshiab yog tej yam xws li cov vaj lug kub, tej phau txhais lus, tej phau kawm kev cai siv lus, qhov app TALL Embark, thiab lwm yam. Teem sij hawm thaum koj yuav kawm thiab siv yam lus tshiab. Piv txwv hais tias, tej zaum koj yuav xav teem sij hawm nyeem nrov los ntawm Phau Ntawv Maumoos rau 15 feeb txhua hnub thaum noj su.
Ua raws li koj tau npaj. Tus Tswv hlub thaum koj siv zog ua tej yam, yog li ntawd cia li rau siab ua hauj lwm kom ua raws li koj tej lub hom phiaj. Pov hwm lub sij hawm uas koj kawm yam lus tshiab thiab rov qab teem sij hawm yog tias muaj dab tsi tab kaum koj.
Rov qab xyuas thiab rov qab ua ntxiv. Rov qab xyuas koj txoj kev npaj kawm ntau kom ntsuas seb puas zoo. Caw koj tus khub, qhov chaw tshaj tawm txoj moo zoo cov thawj coj, cov mej zeej, thiab lwm tus hauv koj cheeb tsam kom qhia txog tej yam koj ua tau kom ua zoo dua. Ua tej kev ntsuam xyuas seb puas txawj hais lus kom seb koj tau ua zoo li cas thiab kawm txog tej yam koj ua tau kom ua zoo dua.
Thaum koj kawm yam lus tshiab cia li siv sij hawm rau tej lub hom phiaj uas yuav tsum siv sij hawm ntev thiaj li tsim lub hauv paus kom koj txawj hais yam lus ntawd thiab tej lub hom phiaj uas siv sij hawm luv rau tej yam ntxim ua thiab tib neeg uas koj qhia.
Thaum txog lub sij hawm rau koj kawm yam lus tshiab, cia li ua raws li koj tej hom phiaj thiab tej kev npaj raws li tej lub ntsiab ntawm kev kawm yam lus tshiab nram qab no. Txiav txim siab tias koj yuav kawm dab tsi tas ib hnub.
tej txuj ci mloog
tej txuj ci nyeem ntawv
kev cai lus
tej txuj ci hais lus
tej txuj ci sau ntawv
tej lo lus
Kev Kawm Koj tus Kheej Los Sis Nrog tus Khub
Siv sij hawm txhua lub lim tiam kom xav seb koj kawm yam lus zoo npaum li cas los ntawm tej lus nug no:
Lub lim tiam no kuv puas tau kawm kuv qhov chaw tshaj tawm txoj moo zoo yam lus txhua hnub? Kuv ua tau dab tsi kom txawj hais kuv qhov chaw tshaj tawm txoj moo zoo yam lus zoo dua tsis tu tsis tseg?
Kuv nyiam dab tsi thaum kuv kawm yam lus tshiab? Kuv yuav ua li cas kom nyiam ntxiv?
Kuv yuav tsum siv sij hawm ntev li cas kom xyaum mloog, nyeem ntawv, sau ntawv, thiab hais lus? Kuv yuav ua li cas kom kawm tej lo lus, kev cai siv lus, thiab kev txawj hais lus zoo dua?
Kuv ua tej yam ntxim ua twg thiab siv tej ntaub ntawv twg kom kawm yam lus tshiab? Tej yam twg pab kuv ntau tshaj? Tej yam ntaub ntawv twg los sis tej yam ntxim ua twg yuav pab koj?
Yuav tsum tsom ntsoov rau tej yam twg?
Tom qab koj teb tej lus nug no, cia li hloov koj tej kev npaj kawm yam lus tshiab thiab seb puas pab koj kawm tau zoo dua ntxiv. Tus Ntsuj Plig yuav coj koj mus thaum koj nrhiav kev kawm yam lus tshiab zoo dua ntxiv.
Kawm Nrog Koj tus Khub
Pab koj cov khub kawm tau thiab ua siab loj thaum lawv kawm qhov chaw tshaj tawm txoj moo zoo yam lus los sis kawm lus Askiv. Mob siab qhuas koj cov khub thiab lwm tus tub txib ntau zaus thaum lawv ua tau zoo.
Ua siab dawb qhia lawv txog tej yam uas lawv ua tau yooj yim. Muab cib fim ntau rau lawv qhia thiab ua tim khawv. Saib ib tug tub txib uas laus zog tau ua li cas kom pab nws tus khub nyob hauv zaj lus uas muaj tseeb no.
Kuv twb nyuam qhuav tuaj txog kuv cheeb tsam thib ob thaum kuv tus khub qhia kuv tias yog kuv thib hais tej kev xav txog sab ntsuj plig thaum mus noj hmo. Kuv tus khub twb zoo siab qhia tib neeg, thiab kuv yeej swm qhov uas kuv qhia me ntsis ces mloog ntau zaus.
Kuv sim hais rau kuv tus khub tias nws yuav tsum hais kev xav txog sab ntsuj plig, tiam sis nws yaum kom kuv ua raws li kev txib no. Nws twb pab kuv xyaum.
Thaum txog lub sij hawm kuv yuav hais, kuv qhib kuv phau vaj lug kub thiab nyeem los ntawm 3 Nifais 5 thiab 7. Nyuaj rau kuv hais tiam sis kuv twb piav vim li cas kuv xav tias tej nqe vaj lug kub ntawd tseem ceeb, thiab kuv zoo siab thaum kuv tau hais tas lawm. Thaum lawv nug kuv ib yam, kuv saib kuv tus khub xav kom nws teb, tiam sis nws tsis tau qhib qhov ncauj li. Ces ua rau kuv xav tsis thoob thaum kuv twb hais lus Fabkis uas lawv nkag siab. Kuv twb xav tsis thoob ntxiv thaum tus mej zeej tsis tau paub tias kuv yeej txaus ntshai txog kuv txoj kev txawj sib txuas lus. Kuv ua siab loj thiab kawm tias kuv txoj kev txawj hais lus Fabkis yeej zoo dua qhov uas kuv xav.
Ob peb lim tiam dhau mus, es kuv tus khub tseem cia kuv qhia ntxiv—tsis hais thaum kuv xav tias kuv tsis muaj peev xwm thiab tsis hais nws xav paub seb kuv puas txawj ua. Kuv twb xav tias kuv hloov los ua ib lub cuab yeej ntawm peb Leej Txiv Saum Ntuj Ceeb Tsheej tsis yog ib tug khub uas nyob twj ywm xwb.
Kev Kawm Koj tus Kheej Los Sis Nrog tus Khub
Nrog lwm tus tub txib ua hauj lwm kom pab koj kawm koj qhov chaw tshaj tawm txoj moo zoo yam lus.
Yog tias koj nrog ib tug tub txib tshiab ua hauj lwm, koj yuav ua li cas kom pab koj tus khub kawm yam lus tshiab los sis kawm lus Askiv?
Yog tias koj yog ib tug tub txib tshiab, koj yuav thov koj tus khub pab koj li cas?
Daim Duab
cov tub txib qhia ib tug poj niam
Kev Kawm Kab Lig Kev Cai thiab Yam Lus
Ib txoj kab lig kev cai thiab ib yam lus los yeej koom ua ke. Thaum koj to taub tib neeg kab lig kev cai ces yuav pab koj paub tias lawv siv lawv yam lus li cas. Txoj kev to taub kab lig kev cai no kuj yuav pab koj qhia txog tej yam tshwj xeeb ntawm zaj lus qhia txog txoj Kev Muab Txoj Moo Zoo Txum Tim Rov Qab Los raws li ib txoj kev uas tib neeg yuav paub meej.
Ib yam zoo tshaj plaws uas koj ua tau kom tib neeg ntseeg thiab hlub koj yog kev saib taus lawv kab lig kev cai los ntawm tej yam tsim nyog. Cov tub txib coob twb tau ua li no (saib 1 Kauleethaus 9:20–23).
Kev Kawm Koj tus Kheej Los Sis Nrog tus Khub
Siv lub tswv yim nram qab no kom pab koj npaj qhia ib tug neeg uas muaj kab lig kev cai los sis keeb kwm txawv ntawm koj.
Xav txog tib neeg uas koj qhia lawv kab lig kev cai thiab txoj kev teev ntuj. Xav txog ib yam ntawm lawv keeb kwm uas tej zaum ua nyuaj rau lawv to taub ib lub ntsiab cai ntawm txoj moo zoo. Npaj tej kev kom qhia txog lub ntsiab cai no kom meej.
Lub Txiaj Ntsim Hais Ntau Yam Lus
Muaj tej txiaj ntsim ntawm tus Ntsuj Plig tiag tiag. Lub txiaj ntsim hais ntau yam lus thiab paub txhais tej lus txawv los muaj ntau yam. Ib txhia yog kev txawj hais, to taub, thiab txhais tej yam lus. Niaj hnub no lub txiaj ntsim hais ntau yam lus los feem ntau muaj thaum tus Ntsuj Plig pab cov tub txib kawm yam lus uas hais nyob hauv lawv qhov chaw tshaj tawm txoj moo zoo.
tus Vaj Ntsuj Plig Dawb Huv yuav qhia txog qhov tseeb ntawm koj zaj lus tim khawv txawm yog koj thiab cov neeg uas koj qhia tsis txawj sib txuas lus zoo. Ib yam li ntawd, tus Vaj Ntsuj Plig Dawb Huv yuav ua rau koj nco txog tej lo lus thiab tej kab lus thiab pab koj to taub tib neeg hais li cas nyob hauv lawv lub siab.
Feem ntau, koj yuav tsis txais tau tej txiaj ntsim no yog tias koj tsis siv zog. Koj yuav tsum siv zog nrhiav tej txiaj ntsim no kom foom koob hmoov rau lwm tus (saib Lus Qhuab Qhia thiab Kev Khi Lus 46:8–9, 26). Ib feem ntawm kev nrhiav lub txiaj ntsim hais ntau yam lus yog kev khwv ua hauj lwm thiab ua txhua yam koj ua tau kom kawm yam lus tshiab ntawd. Ua siab ntev thaum koj thov Vajtswv pab koj kawm thiab xyaum hais yam lus ntawd. Tso siab rau tus Ntsuj Plig hais tias Nws yuav pab koj thaum koj rau siab ua. Ntseeg tias koj yuav muaj lub txiaj ntsim hais ntau yam lus kom pab koj thiab cov uas koj qhia.
Thaum ua nyuaj rau koj hais meej npaum li koj xav hais, cia li nco ntsoov tias tus Ntsuj Plig muaj peev xwm hais lus kom nkag hauv Vajtswv cov me nyuam lub siab. Thawj Tswj Hwm Thomas S. Monson qhia hais tias:
“Muaj ib yam lus … uas txhua tus tub txib txawj hais—tus Ntsuj Plig yam lus. Tsis yog ib qho uas yus kawm tau ntaub ntawv kom thiaj paub, thiab tsis yog ib yam uas yus nyeem tau ntaub ntawv los yog cim tau dab tsi thiaj kawm tau. Tus Ntsuj Plig yam lus los rau tus neeg uas kawg siab kawg ntsws nrhiav kom paub Vajtswv thiab ceev Nws txoj lus txib. Thaum twg yus txawj hais yam lus no, yus muaj hwj chim nrog lwm tus neeg sib raug zoo, kov yeej tej kev cov nyom, thiab pab txhawb nqa ib tug neeg twg lub siab” (“The Spirit Giveth Life,” Ensign, Rau Hli Ntuj 1997, 2).
Kev Kawm Koj tus Kheej Los Sis Nrog tus Khub
Siv tej lus nram qab no kom ntsuas seb koj puas siv zog nrhiav lub txiaj ntsim txawj hais ntau yam lus. Sau ntawv txog tej kev tshoov siab thiab tej lub hom phiaj kom pab koj kawm yam lus zoo dua.
Kuv ntseeg tias Vajtswv tau hu kuv, dhau los ntawm Nws tus yaj saub, kom hais ib yam lus tshiab qhia txoj moo zoo. (Lus Qhuab Qhia thiab Kev Khi Lus 90:11)
Xyuas seb muaj tej yam pab kawm yam lus twg hauv Chaw Pab cov Tub Txib. Xaiv ib yam uas koj tseem tsis tau ua, thiab cuab ib lub hom phiaj kom sim ua li ntawd rau ob peb hnub tom ntej.
Nyob hauv koog chaw pawg sab laj, thov ib tug tub txib laus zog uas txawj hais yam lus zoo piav seb nws tau ua li cas kom kawm yam lus ntawd.
Xyaum ua kom ib leeg hais koj qhov chaw tshaj tawm txoj moo zoo yam lus qhia ib leeg txog cov tub txib tej zaj lus qhia. Thaum xub thawj, cov tub txib tshiab tej zaum yuav hais lus yooj yim, hais lus tim khawv yooj yim, thiab hais tej nqe vaj lug kub uas tau cim ntsoov. Thaum lawv ua siab loj ntxiv thiab txawj hais lus ntxiv, lawv yuav koom tes pab qhia ntxiv.
Rov qab xyuas tej lub tswv yim hauv tshooj no thiab tej yam pab kawm lus hauv Chaw Pab cov Tub Txib. ib tham txog tej lub tswv yim twg uas neb siv tau thaum kawm nrog tus khub rau lub lim tiam tom ntej.
Thov kom koj tus khub mloog koj txoj kev hais tej lo lus thiab pab koj hais zoo dua. Thov kom nws sau ntawv txog tej lub sij hawm thaum tib neeg tsis to taub koj. Sau tej lo lus, tej kab lus, los sis tej kev cai siv lus uas yuav pab. Piav txog thiab xyaum siv tej yam uas twb sau txog tej yam ntxim saib ntxim ua thaum yav tom ntej.
Xyaum mloog zoo. Npaj ib lub sij hawm thaum nruab hnub kom mloog zoo thiaj paub tej lo lus thiab tej txheej txheem hais uas koj tau kawm. Thaum koj hnov ib kab lus uas tsis zoo li txoj kev koj yuav hais, cia li sau kab lus ntawd thiab xyaum hais.
Sau tej yam uas tib neeg yuav hais hnub ntawd. Npaj thiab xyaum tej yam uas koj hais tau kom teb.
Koog Chaw Pawg Sab Laj, Thaj Chaw tej Rooj Sab Laj, thiab Qhov Chaw Tshaj Tawm Txoj Moo Zoo cov Thawj Coj Pawg Sab Laj
Caw cov neeg uas ib txwm hais yam lus no tuaj koom ib txoj kev sib ntsib no. npaj kom cov tub txib faib ua tej pawg me me qhia lawv. Thov kom cov neeg uas ib txwm hais yam lus no sau ntawv thiab qhia cov tub txib tias lawv txawj hais yam lus no zoo npaum li cas.
Txib ob peb tug tub txib ua ntej kom qhia txog tej lub sij hawm zoo thaum lawv kawm yam lus tshiab.
Txib ib tug tub txib laus zog kom qhia ib feem ntawm yam lus tshiab uas nyuaj rau cov tub txib kawm. Hais kom nws qhia txog tej kev uas siv tau yam lus ntawd zoo, thiab ua kom cov tub txib xyaum hais.
Cia cov tub txib uas ib txwm los ntawm kab lig kev cai ntawd qhia lawv tej lub tswv yim.