Kev Hu cov Txiv Neej Nuv Ntses (Khetos Hu Petus thiab Adales), los ntawm Harry Anderson
Tshooj 6
Nrhiav Kev Muaj Khetos tej Cwj Pwm
Xav Txog Qhov No
Qhov uas kuv nrhiav kev kom muaj Khetos tej cwj pwm yuav ua li cas pab kuv ua raws li kuv lub hom phiaj ua ib tug tub txib?
Kuv yuav ua li cas kom nrhiav thiab txais Khetos tej cwj pwm?
Kuv yuav tsum tsom ntsoov rau tus cwj pwm twg tam sim no?
Tej Lus Piav
Thaum Nws pib ua Nws txoj hauj lwm qhuab qhia hauv lub ntiaj teb no, Yexus tau taug kev ntawm ntug Dej Kalilais thiab hu rau ob tug neeg nuv ntse, Petus thiab Adales. Nws hais tias, “Los nrog kuv mus, thiab kuv yuav qhia kom [nej] paub mus nrhiav neeg” (Mathais 4:19; kuj saib Malakaus 1:17).
Tus Tswv kuj tau hu koj los ua Nws txoj hauj lwm, thiab Nws kuj caw koj los nrog Nws mus. “Nej yuav tsum ua neeg zoo li cas?” Nws nug. “Kuv hais tseeb rau nej tias, zoo tib yam li kuv” (3 Nifais 27:27).
Tej tshooj nyob hauv Qhia Kuv txoj Moo Zoo qhia txog tej yam uas koj yuav tsum ua thaum koj ua ib tug tub txib, xws li kev kawm, kev qhia, thiab kev cuab hom phiaj. Tiam sis qhov tseem ceeb ib yam yog qhov uas koj yog leej twg thiab koj hloov los ua neeg zoo li cas. Tshooj no yuav qhia txog qhov no.
Cov vaj lug kub piav txog Khetos tej cwj pwm uas koj yuav tsum nrhiav thaum koj ua tub txib thiab tas koj lub neej. Khetos tej cwj pwm yeej yog tej yam uas qhia tias tus Cawm Seej coj li cas los sis ua li cas. Tshooj no piav txog ib txhia ntawm tej cwj pwm ntawd. Cia li kawm txog tej no thiab cov vaj lug kub uas qhia txog tej no. Nrhiav Khetos tej cwj pwm ntxiv thaum koj kawm lwm nqe vaj lug kub thiab.
Kev Kawm Ntawv Koj tus Kheej
Cia li kawm Lus Qhuab Qhia thiab Kev Khi Lus 4. Tus Tswv qhia tias tej cwj pwm twg tseem ceeb rau cov tub txib muaj? Kev nrhiav tej cwj pwm no yuav pab koj li cas kom ua raws li koj lub hom phiaj ua tub txib?
“Nrhiav tus Yexus No”
The prophet Maulaunais exhorted, “Kuv xav kom nej nrhiav tus Yexus no, tus uas cov yaj saub thiab cov thwj tim tau sau txog” (Ethaws 12:41). Ib txoj kev tseem ceeb nrhiav Yexus yog kev rau siab siv zog kawm txog Nws thiab hloov los ua neeg zoo li Nws. Lub sij hawm uas koj ua tub txib yeej yog ib lub sij hawm zoo kawg nkaus tsom ntsoov rau qhov no.
Thaum koj siv zog hloov los ua neeg zoo li Yexus Khetos, koj yuav ua raws li koj lub hom phiaj ua ib tug tub txib. Koj yuav muaj kev xyiv fab, kev kaj siab lug, thiab koj sab ntsuj plig yuav hloov zuj zus ua zoo thaum koj ua raws li Nws tej cwj pwm. Koj kuj yuav tsim ib lub hauv paus rau koj tus kheej kom coj raws li Nws mus tas koj lub neej.
Tej Txiaj Ntsim Los ntawm Vajtswv
Khetos tej cwj pwm yog tej txiaj ntsim los ntawm Vajtswv. Ib yam li txhua yam zoo, tej txiaj ntsim no yeej yog los ntawm “Vajtswv uas yog Leej Txiv, thiab tus Tswv Yexus Khetos, thiab tus Vaj Ntsuj Plig Dawb Huv, … lawv txoj kev tshav ntuj yuav muaj nyob hauv nej mus ib txhis” (Ethaws 12:41).
Tsom ntsoov rau Yexus Khetos thaum koj sim muaj Nws tej cwj pwm (saib Lus Qhuab Qhia thiab Kev Khi Lus 6:36). Tej cwj pwm no tsis yog tej yam uas yus khij tseg xwb. Tsis yog tej txheej txheem uas koj siv tau thaum ua ib lub txheej xwm pab tau koj tus kheej. Tsis yog tej yam uas koj txais tau thaum koj mob siab ua. Tiam sis, koj txais tau tej no thaum koj siv zog hloov los ua Yexus Khetos ib tug thwj tim uas muaj siab xav hawm Nws.
Thov Vajtswv kom foom koob hmoov muab tej cwj pwm no rau koj. Txo hwj chim lees koj tej kev qaug zog thiab qhov uas koj xav tau Nws lub hwj chim hauv koj lub neej. Thaum koj ua li ntawd, Nws yuav “ua kom tej uas qaug zog los ua tej uas muaj zog rau [koj]” (Ethaws 12:27).
Ib tug Txheej Txheem uas Ua Zuj Zus
Kev hloov los ua neeg zoo li tus Cawm Seej yog ib tug txheej txheem uas ua zuj zus mus tas ib sim neej. Nrog ib lub siab uas xav ua rau Vajtswv zoo siab, cia li ua zoo dua txhua zaus koj txiav txim siab.
Ua siab ntev rau koj tus kheej. Vajtswv paub tias kev hloov siab thiab kev hloov los ua neeg zoo yog ib yam yus ua zuj zus. Nws zoo siab thaum koj mob siab xav ua zoo thiab yuav foom koob hmoov txhua zaus koj siv zog ua tej yam.
Thaum koj nrhiav kev hloov los ua neeg zoo li Yexus Khetos ntxiv, koj tej kev xav thiab tej yam koj ua yuav hloov. Dhau los ntawm Yexus Khetos txoj Kev Theej Txhoj, thiab tus Vaj Ntsuj Plig Dawb Huv lub hwj chim, koj lub siab lub ntsws yuav hloov (saib Mauxiyas 3:19).
Daim Duab
Parley P. Pratt
tus Vaj Ntsuj Plig Dawb Huv pab peb muaj txuj ci ntxiv. Nws “ua rau yus xav tsim txiaj, muaj siab dawb siab zoo, ua zoo, muaj siab hlub, thiab ua siab ntev. … Los yog hais tias, tus Ntsuj Plig yeej zoo li cov hlwb rau cov pob txha, kev xyiv fab rau lub siab, qhov kaj rau qhov muag, cov nkauj rau pob ntseg, thiab txoj sia rau lub cev” (Parley P. Pratt, Key to the Science of Theology [1855], 98–99).
Kev Kawm Vaj Lug Kub
Tej nqe vaj lug kub no qhia dab tsi txog kev coj raws li Yexus Khetos tus yam ntxwv?
“Thaum peb raug kev nyuaj siab txhawj xeeb, peb yuav cia siab ntsoov hais tias txhua yam yuav ‘ua hauj lwm ua ke kom zoo rau [peb]’ thaum peb ua raws li Vajtswv cov yaj saub tej lus qhia. Kev cia siab rau Vajtswv, Nws txoj kev zoo, thiab Nws lub hwj chim ua rau peb ua siab loj thaum raug tej teeb meem nyaj heev thiab muab dag zog rau cov uas raug kev ntshai, kev ua xyem xyav, thiab kev poob siab” (Dieter F. Uchtdorf, “The Infinite Power of Hope,” Liahona, Kaum Ib Hlis Ntuj 2008, 23).
Kev Kawm Vaj Lug Kub
Kev cia siab yog dab tsi, thiab peb cia siab rau dab tsi?
Tus yaj saub Maumoos qhia tias “Cia li thov Leej Txiv kawg siab kawg ntsws, xwv kom nej yuav muaj txoj kev hlub no puv npo,” (Maulaunais 7:48). Thaum koj thov Vajtswv kom muaj lub siab hlub hauv koj lub siab puv npo, koj yuav paub txog Vajtswv txoj kev hlub. Koj txoj kev hlub tib neeg yuav loj zuj zus, thiab koj yuav xav ntsoov tias koj xav kom lawv zoo siab mus ib txhis li. Koj yuav saib lawv yog Vajtswv cov me nyuam uas muaj peev xwm hloov los ua neeg zoo li Nws, thiab koj yuav ua hauj lwm kom pab lawv.
Thaum koj thov Vajtswv kom muaj lub txiaj ntsim lub siab hlub, koj yuav tsis tshua xav txog tej yam tsis zoo xws li kev npau taws los sis kev khib siab. Koj yuav tsis tshua xav txiav txim rau lwm tus los sis cem lawv. Koj yuav xav sim to taub lawv thiab vim li cas lawv xav zoo li lawv xav. Koj yuav ua siab ntev thiab sim pab neeg thaum lawv raug teeb meem los sis poob siab. (Saib Maulaunais 7:45.)
Kev siab hlub, ib yam li kev ntseeg, ua rau yus ua tej yam. Koj ua rau koj txoj kev siab hlub muaj zog thaum koj pab lwm tus.
Kev siab hlub yeej hloov yus lub neej. Leej Txiv Saum Ntuj Ceeb Tsheej muab rau “tag nrho cov uas coj raws li nws Leej Tub, Yexus Khetos, tiag tiag; xwv kom [peb] yuav hloov los ua Vajtswv cov tub; xwv kom thaum nws yuav tshwm los peb yuav zoo li nws, … xwv kom Vajtswv yuav ua rau peb hloov ua neeg huv ib yam li nws twb huv” (Maulaunais 7:48).
Exethaws (Niam Vaj Ntxwv Exethaws), los ntawm Minerva Teichert
Tsim Txiaj
Tej Nqe Kev Ntseeg hais “peb ntseeg tias yuav tsum … tsim txiaj” (1:13). Kev tsim txiaj yog tus txheej txheem xav thiab coj raws li tej kev cai dawb huv. Yog kev ua ncaj ncees rau Vajtswv thiab lwm tus. Ib feem ntawm kev tsim txiaj yog kev siv zog ua neeg dawb huv ntawm sab cev nqaij daim tawv thiab sab ntsuj plig.
Kev tsim txiaj yeej pib nyob hauv koj tej kev xav. Tus Tswv hais tias, “Cia kev tsim txiaj txhawb koj tej kev xav kom tsis tu ncua” (Lus Qhuab Qhia thiab Kev Khi Lus 121:45). Tsom ntsoov rau tej kev xav uas ncaj ncees thiab zoo. Tso tej kev xav tsis tsim nyog tseg tsis txhob xav ntsoov.
Koj lub siab yeej zoo li ib lub sam thiaj hauv qhov chaw ua yeeb yam. Yog tias koj cia tej kev xav uas tsis tsim nyog nyob hauv lub sam thiaj hauv koj lub siab, ntshe koj haj yam yuav ua txhaum. Yog tias koj xav txog tej yam tsim nyog hauv koj lub siab, ces nyaj koj yuav muab siab npuab tej yam tsim txiaj thiab tso tej yam phem tseg. Muaj tswv yim txog tej yam uas koj cia nkag hauv thiab nyob hauv lub sam thiaj ntawm koj lub siab.
Thaum koj siv zog ua neej raws li kev tsim txiaj, koj “txoj kev tso siab yuav muaj zog tuaj nyob ntawm Vajtswv xub ntiag; thiab … tus Vaj Ntsuj Plig Dawb Huv yuav ua koj tus khub tsis tu tsis tseg” (Lus Qhuab Qhia thiab Kev Khi Lus 121:45–46).
Daniyees Nyob hauv lub Qhov Tsov los ntawm Clark Kelley Price
Kev coj ncaj txhais tias koj tsis tso koj tej kev cai los sis coj li cas kom lwm tus qhuas los sis lees yuav koj. Koj ua qhov yog txawm yog lwm tus thuam koj txoj kev xav ua raws li Vajtswv hais (saib 1 Nifais 8:24–28). Koj ua ncaj ua ncees nyob hauv txhua qhov chaw, tsis hais thaum koj nyob online.
Thaum koj coj ncaj, koj ua raws li koj tej kev khi lus nrog Vajtswv thiab ua raws li tej yam ncaj ncees uas koj tau cog lus rau lwm tus thiab.
Muab Kev Tsim Txiaj Ntxiv rau Nej txoj Kev Ntseeg, los ntawm Walter Rane
Kev Txawj Ntse
Tus Tswv ntuas hais tias, “Nrhiav kev kawm, twb yog los ntawm kev kawm ntawv thiab los ntawm kev ntseeg” (Lus Qhuab Qhia thiab Kev Khi Lus 88:118). Thaum koj ua tub txib thiab mus tas koj lub neej, cia li nrhiav kev txawj ntse, qhov tseem ceeb yog kev txawj ntse los ntawm sab ntsuj plig.
Kawm cov vaj lug kub txhua hnub, tsis hais cov yaj saub tej lus los yog. Thaum koj kawm thiab thov Vajtswv, nrhiav kev pab teb tej lus nug, kho tej teeb meem, thiab muaj tej cib fim. Nrhiav tej nqe vaj lug kub uas koj siv tau thaum koj qhia thiab teb tej lus nug txog txoj moo zoo.
Thaum koj rau siab kawm thiab thov Vajtswv, tus Vaj Ntsuj Plig Dawb Huv yuav qhib koj lub siab. Nws yuav qhia koj thiab pab koj to taub. Nws yuav pab koj ua raws li tej lus qhia nyob hauv cov vaj lug kub thiab cov yaj saub tej lus hauv koj lub neej. Ib yam Nifais, koj hais tau tias:
“Kuv zoo siab kawg rau cov vaj lug kub, thiab kuv lub siab xav ntsoov txog cov vaj lug kub. … Saib seb, kuv zoo siab kawg rau tej uas yog tus Tswv li; thiab kuv lub siab yeej xav ntsoov tsis tu ncua rau tej uas kuv tau pom thiab tau hnov” (2 Nifais 4:15–16).
Kev Kawm Vaj Lug Kub
Kev txawj ntse yuav pab koj li cas kom ua tau tus Tswv txoj hauj lwm?
Thaum koj ua siab ntev, koj saib lub neej raws li lub zeem muag uas nyob mus ib txhis li. Koj tsis xav tias koj yuav txais cov koob hmoov los sis tej yam twg tam sim no. Yuav muaj raws li koj tej kev xav ncaj ncees “ib nqe lus ntxiv rau ib nqe lus, … muab me ntsis nim no thiab muab me ntsis lwm hnub” (2 Nifais 28:30). Muaj tej kev xav ncaj ncees uas tsis muaj txog thaum tom qab lub neej no.
Kev ua siab ntev tsis nyob twj ywm los sis lam tsis ua hauj lwm xwb. Yeej yog kev “zoo siab hlo ua txhua yam uas [koj] muaj hwj chim ua tau” thaum koj ua hauj lwm rau Vajtswv (Lus Qhuab Qhia thiab Kev Khi Lus 123:17). Koj cog, ywg dej rau, thiab tu lub noob, ces Vajtswv ua kom loj tuaj “tsis ntev” (Amas 32:42; kuj saib 1 Kauleethaus 3:6–8). Koj nrog Vajtswv koom tes ua hauj lwm, ntseeg tias thaum koj ua koj feem hauj lwm lawm, Nws yuav ua Nws txoj hauj lwm tiav raws li lub sij hawm Nws teem tseg thiab raws li lwm tus txoj kev ywj siab xaiv.
Kev ua siab ntev txhais tias thaum twg hloov tsis taus, ces koj ua siab loj, zoo siab, thiab muaj kev ntseeg lees qhov ntawd.
Ua siab ntev rau lwm tus, tsis hais koj cov khub thiab cov uas koj pab. Ua siab ntev rau koj tus kheej ib yam thiab. Siv zog kom ua zoo tshaj tiam sis nco ntsoov tias koj yuav kawm ib theem mus ib theem.
Ib yam li Khetos lwm tus cwj pwm, kev ua siab ntev yog ib tug txheej txheem uas yuav tsum kawm tas koj lub neej. Kev ua siab ntev yuav kho tau koj lub siab thiab cov uas nyob ib puag ncig koj.
Daim Duab
Thawj Tswj Hwm Dieter F. Uchtdorf
“Kev ua siab ntev yog txoj kev tos ntsoov thiab nyiaj kom dhau. Kev ua siab ntev txhais hais tias peb ua txhua yam peb ua tau—ua hauj lwm, cia siab, muaj kev ntseeg; rau siab nyiaj tej teeb meem, txawm yog peb tseem tsis tau tej yam uas peb lub siab xav tau. Kev ua siab ntev tsis yog kev nyiaj xwb; yog kev nyiaj kom dhau!” (Dieter F. Uchtdorf, “Continue in Patience,” Liahona, Tsib Hlis Ntuj 2010, 57).
Kev rau siab yog kev siv zog tsis tu tsis tseg. Thaum ua cov tub txib txoj hauj lwm, kev rau siab yog ib txoj kev qhia tias koj hlub tus Tswv. Thaum koj rau siab, koj yuav muaj kev xyiv fab thiab txaus siab ua tus Tswv txoj hauj lwm (saib Amas 26:16).
Kev rau siab yog kev siv koj txoj kev ywj siab xaiv ua ntau yam zoo thiab tsis tos cov thawj coj qhia koj tias koj yuav tsum ua dab tsi (saib Lus Qhuab Qhia thiab Kev Khi Lus 58:27–29).
Ua zoo tsis tu tsis tseg tsis hais thaum nyuaj rau koj los sis koj nkees. Tiam sis koj to taub tias yuav tsum so kom koj thiaj li tsis “khiav nrawm dua li qhov [koj] muaj zog” (Mauxiyas 4:27).
Tsom ntsoov rau tus Tswv thiab Nws txoj hauj lwm kawg siab kawg ntsws. Tsis txhob ua tej yam uas ua rau koj tsis nco qab txog tej yam uas tseem ceeb rau koj ua. Siv sij hawm thiab siv zog ua tej yam uas yuav pab koj cheeb tsam thiab pab cov neeg uas koj qhia.
Daim Duab
Thawj Tswj Hwm Henry B. Eyring
“Nov yog tus Tswv lub Koom Txoos. Nws tau hu peb thiab tso siab rau peb txawm yog Nws paub tias peb muaj tej kev qaug zog. Nws paub peb yuav raug tej kev sim siab. Thaum peb rau siab ua hauj lwm thiab dhau los ntawm Nws txoj Kev Theej Txhoj, peb yuav xav tau tej yam uas Nws xav tau thiab ua tus neeg uas peb yuav tsum ua kom foom koob hmoov rau cov uas peb pab. Thaum peb ua hauj lwm pab Nws ntev txaus thiab rau siab ua, ces peb yuav hloov siab. Peb yuav hloov los ua neeg zoo li Nws ntxiv” (Henry B. Eyring, “Rau Siab Ua Txhua Yam,” Liahona, Tsib Hlis Ntuj 2010, 62–63).
Ob Txhiab tus Tub Rog Hluas (Ob Txhiab tus Tub Rog Hluas), los ntawm Arnold Friberg
Mloog Lus
Koj txoj kev ua tub txib yeej yog los ntawm qhov uas koj tau nrog Vajtswv khi lus thaum koj ua kev cai raus dej thiab nyob hauv lub tuam tsev. Thaum koj tau txais ob txog kab ke ntawm kev cai raus dej thiab vaj txiaj ntsim, koj tau khi lus tias koj yuav ua raws li Nws cov lus txib.
Vaj Ntxwv Npeyamis hais tias: “Kuv thov kom nej xav txog qhov uas cov uas ua raws li Vajtswv tej lus txib tau koob hmoov thiab zoo siab. Vim saib seb, lawv tau koob hmoov rau txhua txhia yam, tsis hais sab cev nqaij daim tawv los sis sab ntsuj plig; thiab yog lawv rau siab ntseeg mus kom txog thaum kawg Vajtswv yuav txais lawv mus rau hauv ceeb tsheej, xwv kom lawv thiaj yuav nrog Vajtswv nyob hauv qhov chaw uas muaj kev zoo siab tsis txawj kawg” (Mauxiyas 2:41).
Kev ua raws li cov lus txib yog kev qhia Leej Txiv Saum Ntuj Ceeb Tsheej thiab Yexus Khetos tias koj hlub Nkawd (saib Yauhas 14:15). Yexus hais tias, “Yog nej ua raws li kuv tej lus, nej yuav muaj lub siab hlub ib yam li kuv ua raws li kuv Txiv tej lus thiab kuv muaj lub siab hlub ib yam li nws” (Yauhas 15:10).
Cia li ua raws li tej kev cai nyob hauv Kev Cai Ua Tub Txib ntawm Yexus Khetos cov Thwj Tim. Ua raws li koj qhov chaw tshaj tawm txoj moo zoo tus thawj tswj hwm thiab nws tus poj niam tej lus ntuas thaum lawv qhia kom koj ua raws li kev ncaj ncees.
Daim Duab
Txwj Laug Dale G. Renlund
“Txoj kev mloog lus yog ib yam uas peb xaiv tau. Tus Cawm Seej tau qhia meej txog qhov no. Raws li hais nyob hauv Joseph Smith Kev Txhais Lukas 14:28, Yexus qhia hais tias, ‘Yog li ntawd, txiav kiag txim siab, hais tias nej yuav ua tej yam uas kuv yuav qhia nej, thiab txib kom nej ua.’ Yeej yooj yim li ntawd. … Thaum peb ua li ntawd, ces peb sab ntsuj plig txoj kev muaj zog yuav loj tuaj. Peb yuav tsis nkim tej yam uas Vajtswv muab rau peb thiab tsis txhob ua yuam kev hauv peb lub neej uas ua rau peb raug puas tsuaj” (Dale G. Renlund, “Constructing Spiritual Stability” [Brigham Young University kev sib ntsib hawm Vajtswv, Cuaj Hlis Ntuj 16, 2014], 2, speeches.byu.edu).
Kev Kawm Vaj Lug Kub
Koj kawm dab tsi txog kev mloog lus los ntawm tej nqe vaj lug kub no?
Khetos thiab tus Neeg Nuv Ntse (Koj Hlub Kuv tshaj Lawv cov No Los), los ntawm J. Kirk Richards
Tus Txheej Txheej Hloov Los Ua Neeg Zoo Li Yexus Khetos Ntxiv
Tus txheej txheem no yuav pab koj kawm thiab txais tau tej cwj pwm uas piav txog hauv tshooj no thiab lwm tus cwj pwm uas nyob hauv cov vaj lug kub:
Cia li xaiv tus cwj pwm uas koj xav tau.
Sau ib zaj lus piav txog tus cwj pwm ntawd.
Sau thiab kawm txog tej nqe vaj lug kub uas qhia txog tus cwj pwm ntawd los sis muaj neeg coj yam ntxwv txog tus cwj pwm ntawd.
Sau ntawv txog koj tej kev tshoov siab thiab tej kev xav.
Cuab hom phiaj thiab npaj kev kom muaj tus cwj pwm ntxiv.
Thov Vajtswv kom pab koj kawm txog thiab txais tau tus cwj pwm ntawd.
Tej lub sij hawm ntsuas seb koj ua zoo li cas.
Daim Duab
Txwj Laug Jeffrey R. Holland
“Tus Tswv foom koob hmoov rau cov uas xav ua zoo dua, cov uas lees hais tias lawv yuav tsum muaj cov lus txib thiab sim ua raws li cov lus txib ntawd, cov uas saib tej cwj pwm Khetos rau nqi thiab sim ua raws li tej ntawd. Yog tias nej ua yuam kev thaum nej ua li ntawd, txhua leej txhua tus yeej zoo ib yam; tus Cawm Seej nrog nraim nej nyob kom pab nej. … Tsis ntev nej yuav muaj kev vam meej uas nej xav tau” (Jeffrey R. Holland, “Tag Kis tus Tswv Yuav Ua tej Txuj Ci Tseem Ceeb rau Nej Pom,” Liyahaunas, Tsib Hlis Ntuj 2016, 126).
Kev Kawm Ntawv Koj tus Kheej
Xaiv ib tug cwj pwm los ntawm tshooj no los sis los ntawm cov vaj lug kub. Ua raws li tus txheej txheem uas nyuam qhuav piav txog kom to taub thiab siv zog tau tus cwj pwm ntawd.
Saib koj daim npe ua tub txib. Daim ntawd txawv tej daim uas ib tug ua hauj lwm hauv ib lub koom haum coj? Cia li saib hais tias ob qho tseem ceeb ntawm koj daim npe yog koj lub npe thiab tus Cawm Seej lub npe.
Koj yuav ua li cas kom sawv tus Cawm Seej cev vim koj yog Nws ib tug thwj tim?
Vim li cas tib neeg yuav tsum saib tias koj lub npe thiab tus Cawm Seej lub npe yog ob lub npe zoo?
Sau txog tej yam uas koj xav txog nyob hauv koj phau ntawv ceev txog kev kawm.
Kev Kawm Vaj Lug Kub
Nyeem txog tej cwj pwm uas hais txog nyob hauv tej nqe vaj lug kub no. Sau ntawv txog koj tej kev tshoov siab hauv koj phau ntawv ceev txog kev kawm.
Cia li xaiv ib tug cwj pwm hauv tshooj no. Nug koj tus kheej:
Kuv yuav ua li cas kom kawm ntxiv txog tus cwj pwm no?
Kev nrhiav tus cwj pwm no yuav ua li cas pab kuv los ua ib tug neeg txhawb pab ntawm Yexus Khetos txoj moo zoo?
Nrhiav tej tus yam ntxwv txog Khetos tej cwj pwm hauv cov txiv neej thiab cov poj niam lub neej hauv cov vaj lug kub. Sau ntawv txog koj tej kev tshoov siab hauv koj phau ntawv ceev txog kev kawm.
Nrhiav tej tus yam ntxwv txog Khetos tej cwj pwm nyob hauv lub Koom Txoos cov nkauj dawb ceev. Thaum koj xaiv ib tug cwj pwm, cim ntsoov tej lus ntawm cov nkauj qhuas Vajtswv kom thiaj li muaj zog thiab hwj chim. Cia li hais los sis hu nkauj tej lus ntawd rau koj tus kheej kom txais kev tshoov siab thiab muaj tus Ntsuj Plig lub hwj huam.
Kawm tej nqe txog Khetos tej cwj pwm hauv Txoj Moo Zoo cov Ntawv los sis lawm yam kev pab uas pom zoo. Sib tham txog qhov uas neb yuav ua li cas siv tej yam uas neb kawm. Cia li sib tham txog tej yam uas neb kawm tau thaum neb sim hloov los ua neeg zoo li Yexus Khetos.
Koog Chaw Pawg Sab Laj, Thaj Chaw tej Rooj Sab Laj, thiab Qhov Chaw Tshaj Tawm Txoj Moo Zoo cov Thawj Coj Pawg Sab Laj
Ob peb hnub ua ntej pawg sab laj sib ntsib los sis lub rooj sab laj, thov txhua tus tub txib npaj ib zaj lus ntev li tsib feeb hais txog Khetos ib tug cwj pwm. Cia ob peb tug tub txib siv sij hawm hauv kev sib ntsib hais lawv zaj lus.
Muab cov tub txib faib ua plaub pawg thiab muab qhov no rau lawv ua:
Thov kom cov tub txib nyeem ib phau ntawm plaub phau Txoj Moo Zoo nyob hauv the Phau Tshiab los sis 3 Nifais 11–28. Hais kom lawv sau txoj kab hauv qab tej yam uas tus Cawm Seej ua uas lawv kuj ua tau.
Thaum nrog lawv xam phaj los sis nrog lawv sib tham, hais kom cov tub txib qhia koj txog Khetos ib tug cwj pwm uas lawv xav tau.
Yam Ntxim Ua txog tej Cwj Pwm
Lub hom phiaj ntawm yam ntxim ua no yog kom pab koj nrhiav cib fim rau koj sab ntsuj plig loj tuaj. Cia li nyeem txhua yam nyob nram qab no. Txiav txim siab seb kab lus ntawd puas hais tseeb txog koj, thiab xaiv kev teb uas tsim nyog. Sau tias koj tau teb li cas nyob hauv koj phau ntawv ceev txog kev kawm.
Tsis muaj leej twg uas teb tau “txhua lub sij hawm” rau tej yam no. Yuav tsum siv tas lub neej no kom yus sab ntsuj plig loj tuaj. Yog vim li ntawd qhov no muaj nqis heev—yog vim muaj ntau lub cib fim suav tsis txheeb kom loj hlob tuaj thiab txais cov koob hmoov uas los ntawm kev hloov ua zoo zuj zus.
Cia li txaus siab pib ntawm qhov uas koj nyob tam sim no. Cog lus rau koj tus kheej tias koj yuav ua hauj lwm ntawm sab ntsuj plig kom loj hlob tuaj. Nrhiav Vajtswv txoj kev pab. Thaum twg ua yuam kev, cia li tso siab rau Nws ntseeg hais tias Nws yuav pab koj. Thaum koj thov Vajtswv, thov kom Nws qhia koj tias yuav tsum tsom ntsoov rau tej cwj pwm twg thaum koj ua tub txib.
Teb Li Cas
1 = tsis ua hlo li
2 = tej lub sij hawm
3 = ntau zaus
4 = yuav luag txhua zaus
5 = txhua lub sij hawm
Kev Ntseeg
Kuv ntseeg Yexus Khetos thiab lees yuav Nws ua kuv tus Cawm Seej. (2 Nifais 25:29)