Kuv yuav ua li cas kom nrog pawg ntseeg cov thawj coj thiab cov mej zeej ua hauj lwm kom txhawb pab lub Koom Txoos?
Ceg txheem ntseeg thiab tej pawg ntseeg cov thawj coj muaj kev lav ris ua dab tsi kom ua tau cov tub txib txoj hauj lwm?
Yuav tsum ua dab tsi hauv kev sib ntsib koom tes txhua lub lim tiam nrog pawg ntseeg cov thawj coj?
Kuv yuav ua li cas kom txhawb nqa cov thawj coj qhia txog txoj moo zoo thiab txhawb cov mej zeej tshiab thiab cov uas rov qab los lub zog?
Cov tub txib nrog pawg ntseeg cov thawj coj thiab cov mej zeej ua hauj lwm kom nrhiav neeg qhia thiab coj lawv mus rau tus Cawm Seej. Nej koom siab koom ntsws vim nej hlub Vajtswv thiab Nws cov me nyuam. Nws yuav pab kom koj muaj peev xwm rau siab ua hauj lwm yog tias koj koom siab nrog pawg ntseeg cov thawj coj thiab cov mej zeej. Saib txoj kev nrog lawv ua hauj lwm yog ib qho tseem ceeb thaum koj cuab hom phiaj thiab npaj ua tej yam.
Thaum koj paub thiab hlub pawg ntseeg cov thawj coj thiab cov mej zeej, koj yuav pom tej yam uas koj ua tau kom txhawb nqa lawv thaum lawv ua tej yam uas Vajtswv hu lawv ua thiab ua cov tub txib txoj hauj lwm. Muab koj tej lub txiaj ntsim thiab txuj ci kom txhawb nqa thiab txhawb lawv lub dag zog.
Tshooj no piav tias koj yuav ua li cas kom nrog cov mej zeej ua hauj lwm qhia txoj moo zoo thiab txhawb cov mej zeej tshiab thiab cov uas rov qab los lub zog. Yog xav kawm ntxiv, saib tshooj 25 ntawm Phau Qhia Kev Coj lub Koom Txoos.
Kev Kawm Koj tus Kheej Los Sis Nrog tus Khub
Cia li nyeem zaj dab neeg txog Vaj Ntxwv Lamaunais, nws tus poj niam, thiab nws cov neeg lawv txoj kev hloov siab los ntseeg nyob hauv Amas 18–19.
Anpis lub luag hauj lwm rau kev hloov siab los ntseeg no yog dab tsi? Nws tau ua dab tsi uas Amoos ua tsis taus?
Koj kawm dab tsi los ntawm nws tus yam ntxwv txog cov mej zeej thiab cov tub txib txoj kev ua hauj lwm ua ke?
Cia li xav txog tej yam ntxwv no uas hais txog cov mej zeej uas pab ua cov tub txib txoj hauj lwm:
Lub Koom Txoos cov thawj coj thiab cov mej zeej hauv pawg ntseeg yog cov uas nrog koj koom tes ua Vajtswv txoj hauj lwm. Nrog lawv sib raug zoo kom pab nej ua hauj lwm ua ke kom Leej Txiv Saum Ntuj Ceeb Tsheej cov me nyuam muaj txoj moo zoo uas tau muab txum tim rov qab los. Tej kev sib raug zoo no yuav pab koj mus tas ib sim neej.
Ua kom pawg ntseeg cov thawj coj thiab cov mej zeej tso siab rau koj thiab ua phooj ywg nrog koj. Mus xyuas lawv thiab kawm txog lawv tsev neeg, keeb kwm, tej yam lawv nyiam, thiab lawv lub neej hauv lub Koom Txoos. Mob siab xav paub lawv txog lub neej.
Thaum koj mus xyuas lawv, cia li muaj ib lub hom phiaj. Qhia tias koj mob siab ua txoj hauj lwm nrhiav neeg thiab qhia neeg. Saib lawv lub sij hawm rau nqi.
Thaum koj nrog lawv sib ntsib los yog qhia txoj moo zoo nyob hauv lawv lub tsev, nrhiav kev kom pab lawv txhawb lawv txoj kev ntseeg kom muaj zog. Thov Vajtswv kom muaj tus Ntsuj plig nrog nraim koj nyob. Qhia txog kev ua tub txib txoj hauj lwm nyob hauv koj cheeb tsam.
Daim Duab
ib pawg sib ntsib
Txhawb Nqa Pawg Ntseeg cov Thawj Coj Ua Lawv tej Hauj Lwm
Cov thawj uas Vajtswv hu ib txhia muaj kev lav ris rau cov tub txib txoj hauj lwm. Qhov uas koj to taub tej kev lav ris no yuav pab koj txhawb nqa cov thawj coj no. Tej lus piav no yog los ntawm tshooj 23 nyob hauv Phau Qhia Kev Coj lub Koom Txoos.
Pawg txwj laug thiab Koom Haum Niam Tsev pawg thawj tswj hwm Nrog pawg txwj laug thiab Koom Haum Niam Tsev pawg thawj tswj hwm: Coj pawg ntseeg txoj kev ua hauj lwm qhia txoj moo zoo thiab txhawb pab cov mej zeej tshiab thiab cov uas rov qab los. Lawv ua hauj lwm ua ke kom nrog pawg ntseeg pawg sab laj coj tej hauj lwm no, raws li tus npisov coj kev. Saib Phau Qhia Kev Coj lub Koom Txoos, 8.2.3 thiab 9.2.3.
Pawg ntseeg qhov chaw tshaj tawm txoj moo zoo tus thawj coj (yog tau hu): Pab pawg ntseeg cov mej zeej thiab cov thawj coj, pawg ntseeg qhov chaw tshaj tawm txoj moo zoo cov tub txib, thiab cov tub txib sawv daws koom tes ua hauj lwm. Yog tias tsis tau hu pawg ntseeg qhov chaw tshaj tawm txoj moo zoo ib tug thawj coj, ces ib tug hauv pawg txwj laug pawg thawj tswj hwm yuav ua lub luag hauj lwm no. Saib Phau Qhia Kev Coj lub Koom Txoos, 25.5.3.
Nug koj tus kheej seb “Kuv puas yog ib txoj koob hmoov rau cov thawj coj hauv zej zog?” Cia li muaj tus xeeb ceem li no tias “Kuv yuav ua li cas kom pab?”
Kev Kawm Ntawv Nrog tus Khub
Teem sij hawm nrog ib tug thawj coj hauv pawg ntseeg sib ntsib. Nug seb xav kom neb ua dab tsi kom txhawb nqa nws. Npaj kev ua zoo dua.
Daim Duab
pawg sab laj txoj kev sib ntsib
Tej Kev Sib Ntsib Koom Tes Txhua lub Lim Tiam
Kev nrog pawg ntseeg cov thawj coj koom tes—tsis hais cov thawj coj hluas los yog—yeej tseem ceeb kom koom siab ua nej tej hauj lwm qhia txog txoj moo zoo. Yog tias tau hu pawg ntseeg qhov chaw tshaj tawm txoj moo zoo tus thawj coj, nws yog tus uas coj tej kev sib ntsib koom tes txhua lub lim tiam. Yog tsis tau hu, ces ib tug hauv pawg txwj laug pawg thawj tswj hwm yog tus uas coj kev sib ntsib.
Nyob hauv tej kev sib ntsib tsis ntev no, pawg ntseeg cov thawj coj thiab koj sib tham txog tej hauj lwm qhia txog txoj moo zoo thiab kev txhawb nqa cov mej zeej tshiab thiab cov uas rov qab los (saib Phau Qhia Kev Coj lub Koom Txoos, 23.5.7). Nej sib ntsib tim ntsej tim muag los yog sib ntsib hom virtual los tau. Kuj siv tau lwm txoj kev coj hauj lwm nyob rau ib lub lim tiam, tsis hais kev hu xov tooj, kev ntaus ntawv, thiab kev xa email.
Daim Duab
Txwj Laug Quentin L. Cook
“Kev koom siab thiab kev tsom ntsoov kom cov tub txib txoj kev npaj kev thiab kev cuab hom phiaj muaj raws li pawg ntseeg los sis ceg ntseeg txoj kev npaj kev thiab kev cuab hom phiaj yeej yuav pab kom ua tau hauj lwm muab Ixayees sau los ua ke” (Quentin L. Cook, “Purpose and Planning,” kev sib ntsib rau qhov chaw tshaj tawm txoj moo zoo cov thawj coj, Rau Hli Ntuj 25, 2019).
Npaj rau tej Kev Sib Ntsib Koom Tes Txhua lub Lim Tiam
Cia li npaj kom txhawb nqa pawg ntseeg cov thawj coj thaum mus koom ua ke hauv tej kev sib ntsib koom tes txhua lub lim tiam. Ua ntej kev sib ntsib, siv sij hawm thaum nrog tus khub kawm ua ke kom sib tham seb neb yuav pab lawv li cas.
Ua tib zoo saib xyuas cov ntaub ntawv zoo hauv qhov app Qhia Kuv txoj Moo Zoo kom cov thawj coj muaj cov xov xwm txog cov neeg uas koj qhia. Npaj kom qhia txog tej yam uas tau txib koj ua nyob hauv kev sib ntsib tas los.
Koom tej Kev Sib Ntsib Koom Tes Txhua lub Lim Tiam
Lub hom phiaj ntawm tej kev sib ntsib koom tes txhua lub lim tiam yog kev tsom ntsoov rau tej yam uas tib neeg xav tau. Nyob hauv kev sib ntsib, cia li hais txog tej yam uas koj ua tau kom txhawb nqa pawg ntseeg cov thawj coj, tsis hais cov hluas los yog, kom muab tej yam raws li tib neeg xav tau.
Kev sib ntsib koom tes txhua lub lim tiam los feem ntau hais txog plaub lub ntsiab lus no:
Peb yuav ua li cas kom pab cov neeg uas cov tub txib qhia? Tej zaum yuav sib tham txog tej no:
Cov mej zeej twg yuav koom tej zaj lus qhia thaum lub lim tiam no? Leej twg yuav caw lawv los koom tes ua li no?
Cov uas cov tub txib qhia muaj tej teeb meem twg? Cov mej zeej pab tau li cas?
Cov uas tau teem sij hawm ua kev cai raus dej xav tau dab tsi? Puas tau npaj kev sib ntsib ua kev cai raus dej? (Saib “Kev Sib Ntsib Ua Kev Cai Raus Dej” nyob hauv tshooj 12.)
Peb yuav ua li cas kom pab cov uas nyuam qhuav ua kev cai raus dej? Tej zaum yuav sib tham txog tej no:
Cov mej zeej tshiab twg nyob hauv thawj xyoo ua mej zeej puas tuaj koom kev sib ntsib txais lub cim nco txog? Peb yuav ua li cas kom pab cov uas tsis tuaj?
Cov mej zeej tshiab twg muaj cov phooj ywg hauv pawg ntseeg? Cov kwv tij uas txhawb pab los yog cov viv ncaus uas txhawb pab yuav ua li cas kom pab tau? Tej pawg hluas yuav ua li cas kom pab?
Cov mej zeej tshiab twg tau txais kev txib los yog kev hu ua tej yam?
Peb yuav ua li cas kom pab cov mej zeej tshiab pib nrhiav cov poj koob yawm txwv uas tuag lawm lub npe kom ua tau cov kab ke hauv lub tuam tsev rau lawv? Cov mej zeej tshiab puas muaj ib daim ntawv nkag tuam tsev? Yog tias ib lub tuam tsev nyob ze, peb yuav ua li cas kom pab lawv mus rau lub tuam tsev kom ua kev cai raus dej rau cov poj koob yawm txwv no?
Yuav tsum rov qab qhia tej zaj lus qhia twg los ntawm tshooj 3? Cov mej zeej pab tau li cas?
Saib Kuv txoj Kev Ua Raws Li Kev Khi Lus rau txhua tus mej zeej tshiab seb nws ua tau zoo li cas.
Peb yuav ua li cas kom pab cov mej zeej uas rov qab los? Tej zaum yuav sib tham txog tej no:
Cov tub txib muaj cib fim mus xyuas thiab qhia tej tsev neeg uas tsis yog mej zeej tag nrho twg?
Cov tub txib muaj cib fim mus xyuas thiab qhia cov mej zeej uas rov qab los twg?
Cov mej zeej uas rov qab los twg muaj phooj ywg hauv pawg ntseeg thiab muaj cib fim kom ua hauj lwm pab?
Peb ua tau li cas kom pab cov mej zeej no?
Peb yuav ua li cas kom nrhiav tau neeg rau peb qhia ntxiv? Tej zaum yuav sib tham txog tej no:
Peb yuav ua li cas kom pab tib neeg, tsis hais cov tub hluas ntxhais hluas los yog, thiab tej tsev neeg ua raws li tej lub ntsiab cai ntawm kev hlub, kev qhia, thiab kev caw? (Saib “Koom Siab Nrog cov Mej Zeej” nyob hauv tshooj 9.)
Peb yuav ua li cas kom pab cov mej zeej, tsis hais lub Koom Haum Me Nyuam Yaus cov thawj coj, caw cov phooj ywg tuaj rau pawg ntseeg tej yam ntxim saib ntxim ua?
Kev Kawm Ntawv Nrog tus Khub
Saib qhov vidi-aus txog kev sib ntsib koom tes txhua lub lim tiam nyob hauv Phau Qhia Kev Coj lub Koom Txoos, 23.5.7. Neb tau kawm dab tsi uas neb siv tau nyob hauv kev sib ntsib koom tes txhua lub lim tiam? Neb yuav ua li cas kom npaj zoo dua kom sib tham txog tej yam uas tib neeg xav tau thiab nrog pawg ntseeg cov thawj coj npaj ua ke? Thaum neb siv sij hawm npaj kev, cia li cuab hom phiaj seb neb yuav ua li cas kom npaj zoo dua.
Pawg ntseeg pawg sab laj yuav tsim ib txoj kev npaj uas yooj yim to taub kom qhia txog txoj moo zoo (saib Phau Qhia Kev Coj lub Koom Txoos, 23.5.6). Kawm paub txog txoj kev npaj no. Nyob hauv tej kev sib ntsib koom tes txhua lub lim tiam, nrhiav kev kom pab cov thawj coj ua raws li lawv tej lub hom phiaj. Pheej qhia cov thawj coj txog tej yam uas koj ua kom txhawb nqa cov mej zeej qhia txog txoj moo zoo.
Yog tias lawv caw koj los koom rau pawg ntseeg pawg sab laj kev sib ntsib, cia li npaj kom qhia txog qhov uas cov neeg koj qhia ua tau zoo li cas thiab txog tej yam uas tau txib koj ua (saib Phau Qhia Kev Coj lub Koom Txoos, 29.2.5). Cia li saib lub cib fim no yog ib lub sij hawm kom txhawb nqa pawg ntseeg cov thawj coj txoj kev tso siab rau cov tub txib.
Daim Duab
ob tug neeg tuav tes
Hloov Kom Pab Tau cov Neeg hauv Cheeb Tsam
Txhua pawg ntseeg los yog ceg ntseeg muaj tej yam uas lawv xav tau uas ua rau koj yuav tsum hloov tej yam. Tej zaum koj ua hauj lwm hauv ib ceg ntseeg me me los yog ib pawg ntseeg rau cov tub hluas ntxhais hluas, los yog koj ua hauj lwm hauv ob peb pawg ntseeg. Cov thawj coj ib txhia yuav paub ntau ntxiv thiab ib txhia yuav paub tsawg. Cov thawj coj ib txhia yuav muaj sij hawm ntau dua li lwm tus.
Nyob hauv tej qhov chaw uas nyuam qhuav txhim tsa lub Koom Txoos, tej zaum ceg ntseeg cov thawj coj yuav thov koj pab cov mej zeej tshiab to taub tias tus Tswv tau muab Nws lub Koom Txoos txhim tsa li cas.
Txhua cheeb tsam los nyias txawv nyias thaum koj ua hauj lwm nrog cov thawj coj, tiam sis tag nrho tej yam ntxim ua no yeej tseem ceeb kom tib neeg tau koob hmoov thiab kom txhia tsa tus Tswv lub Koom Txoos.
Yaum cov mej zeej kom qhia txoj moo zoo raws li tej yam uas ib txwm ua thiab tsis txawv txav. Phau Qhia Kev Coj lub Koom Txoos muaj tej lus qhia thiab cov vidi-aus kom pab cov mej zeej thiab cov thawj coj ua li no thaum lawv ua raws li tej lub ntsiab cai txog kev hlub, qhia, thiab kev caw (saib General Handbook, 23.1.1, 23.1.2, and 23.1.3). Cia li nco txog tej lub ntsiab cai thaum koj nrog cov thawj coj ua hauj lwm.
Koj yuav foom koob hmoov rau cov thawj coj thaum koj txhawb nqa lawv ua tej hauj lwm no. Tsis tas li ntawd, lawv tus yam ntxwv yuav pab cov mej zeej xav koom tes qhia txog txoj moo zoo thiab txhawb nqa cov mej zeej tshiab thiab cov uas rov qab los.
Kawm tej nqe vaj lug kub no. Tus Cawm Seej thiab cov thwj tim no tau ua li cas kom hlub, qhia, thiab caw? Cov neeg txoj kev coj yawm ntxwv ua rau koj xav ua dab tsi thaum koj qhia? Koj yuav ua li cas kom pab cov mej zeej qhia txoj moo zoo raws li tej yam uas ib txwm ua thiab tsis txawv txav?
Pab cov mej zeej tshiab txhawb nqa lawv txoj kev ntseeg tus Cawm Seej Yexus Khetos thiab Nws txoj moo zoo. Tej lus tseeb thiab cov ntsiab cai ntawm txoj moo zoo yuav mus tog hauv cov mej zeej tshiab lub siab thaum lawv kawm los ntawm tus Ntsuj Plig mus ntxiv.
Tom qab ua kev cai pom zoo, cia li rov qab qhia cov tub txib tej zaj lus qhia dua. Koj yog tus coj tau kev qhia. Tiam sis, cia li nrog pawg ntseeg cov thawj coj sib tham kom pawg ntseeg qhov chaw tshaj tawm txoj moo zoo cov tub txib los yog lwm tus mej zeej yuav los pab. Kev rov qab qhia tej zaj lus qhia nyob hauv tshooj 3 yeej yog ib txoj kev tseem ceeb kom “Vajtswv txoj lus zoo yuav los yug” cov mej zeej tshiab (Maulaunais 6:4). Thaum koj qhia, yaum cov mej zeej tshiab ua raws li tag nrho cov lus cog tseg hauv tej zaj lus qhia.
Cia li nrog cov mej zeej tshiab nyeem cov vaj lug kub, qhov tseem ceeb yog Phau Ntawv Maumoos, thiab qhia txog txoj moo zoo tej lub ntsiab cai. Pab lawv qhia txog txoj moo zoo rau lawv cov phooj ywg thiab tsev neeg. Txhua tus mej zeej tshiab muaj tej yam uas nws xav tau, thiab koj pab tau nws paub tias muaj neeg hlub nws thiab tos txais nws.
Daim Ntawv Ceeb Toom Kev Taug Mus Zoo Li Cas ntawm Txoj Kev Ua Raws Li Kev Khi Lus thiab Kuv txoj Kev Ua Raws Li Kev Khi Lus
Cov thawj coj hauv pawg ntseeg muaj tej yam uas pab tau lawv ua cov tub txib txoj hauj lwm ib yam li koj. Ib yam yog daim ntawv ceeb toom Kev Taug Mus Zoo Li Cas ntawm Txoj Kev Ua Raws Li Kev Khi Lus, nyob hauv qhov app Mej Zeej tej Cuab Yeej los yog Tej Yam Pab cov Thawj Coj thiab cov Teev Ntawv. Daim ntawv ceeb toom qhia cov thawj coj hauv pawg ntseeg pom tej yam tseem ceeb uas ib tug neeg yuav tsum ua kom taug txoj kev ua raws li lawv tej kev khi lus ua ntej thiab tom qab ua kev cai raus dej.
Kuv txoj Kev Ua Raws Li Kev Khi Lus yog ib yam uas pab tau cov mej zeej tshiab “txheem [lawv] kom ntseeg Yexus Khetos thiab xav tias lub Koom Txoos yeej zoo li lawv lub tsev” (Kuv txoj Kev Ua Raws Li Kev Khi Lus, iv). Qhov no yeej pab cov mej zeej tshiab ua tej yam thiab muaj cib fim, xws li kev nrhiav tsev neeg zaj keeb kwm thiab pab cov poj koob yawm txwv uas tuag lawm txais cov kab ke dawb ceev hauv lub tuam tsev. Yaum kom cov mej zeej hauv pawg ntseeg coj cov mej zeej tshiab ua tej yam no. Txhawb nqa lawv thaum lawv thov.
Kev Kawm Koj tus Kheej Los Sis Nrog tus Khub
Cia li kawm Kuv Txoj Kev Ua Raws Li Kev Khi Lus. Koj tau kawm dab tsi txog koj lub luag hauj lwm pab cov mej zeej txhawb cov neeg hloov siab los ntseeg tshiab lub zog? Koj yuav ua li cas kom txhawb nqa pawg ntseeg pawg sab laj tej hauj lwm? Txhua lub sij hawm koj kawm tshooj no, cia li sau ntawv txog tej yam uas koj kawm.
Txhawb Nqa cov Thawj Coj hauv Zej Zog Kom Txhawb cov Mej Zeej uas Rov Qab Los lub Zog
Cov mej zeej ib txhia xaiv kom tsis tuaj koom lub Koom Txoos ntxiv. Cov thawj coj thiab lwm tus mej zeej hauv ib pawg ntseeg siv zog kom sib raug zoo nrog lawv thiab nrog lawv tham. Tus Cawm Seej hais tias:
“Nej yuav tsum txhawb pab cov uas zoo li no tsis tu ncua; vim nej twb tsis paub tiam sis muaj ib hnub lawv yuav rov los thiab hloov siab lees txim, thiab los cuag kuv kawg siab kawg ntsws, thiab kuv yuav kho kom lawv zoo; thiab nej yog txoj kev uas coj lawv mus rau txoj kev cawm seej” (3 Nifais 18:32).
Tej zaum cov thawj coj hauv pawg ntseeg yuav thov koj pab cov mej zeej uas rov qab los kom txhawb lawv txoj kev ntseeg. Feem ntau kev txib koj ua li no yog kom pab tej tsev neeg uas tsis yog mej zeej tag nrho. Cia li thov Vajtswv kom xav tias koj yuav ua li cas kom caw tus Ntsuj Plig los nyob hauv cov mej zeej uas rov qab los lub tsev thaum koj qhia lawv txog txoj moo zoo tej lub ntsiab cai thiab caw lawv ua tej yam. Qhia lawv tias koj to taub lawv xav li cas thiab muaj kev khuv leej rau tej yam uas lawv txhawj txog.
Thaum ua tau, cia li qhia txoj moo zoo rau cov neeg hauv lawv lub tsev uas tseem tsis tau ua kev cai raus dej. Koj txoj kev hlub thiab kev txhawb nqa yuav pab lawv txoj kev ntseeg Khetos muaj zog ntxiv thiab ua rau lawv xav khi lus thiab ua raws li lawv tau khi lus.
Nrog cov thawj coj hauv pawg ntseeg sib tham thaum koj ua hauj lwm pab cov mej zeej uas rov qab los. Tej kev siv zog ua hauj lwm no yeej pab tau tib neeg thiab ib pawg ntseeg.
Kev Kawm Vaj Lug Kub
Yexus Khetos tau qhia dab tsi txog txoj kev pab cov neeg uas nyuaj siab?
Amas thiab Amulej tau qhia neeg coob uas poob ntawm lub Koom Txoos mus lawm. Koj kawm dab tsi los ntawm nkawd tej hauj lwm txhawb nqa cov mej zeej uas rov qab los?
Nyeem thiab sib tham txog tshooj 23 nyob hauv Phau Qhia Kev Coj lub Koom Txoos. Neb yuav ua tau li cas kom txhawb nqa pawg ntseeg cov thawj coj ua lawv tej kev lav ris?
Nyob hauv tej kev sib ntsib koom tes txhua lub lim tiam, nug pawg ntseeg cov thawj coj seb puas muaj cov meej zeej uas rov qab los hauv koj cheeb tsam uas lawv xav kom neb mus xyuas lub lim tiam no. Tom qab neb mus xyuas lawv, cia li nrhiav kev txhawb lawv txoj kev ntseeg Yexus Khetos.
Saib tag nrho cov uas tau ua kev cai raus dej thiab kev pom zoo nyob hauv xyoo tas los no. Nyeem cov ntaub ntawv ntawm ib tug thiab nyob hauv kev sib ntsib koom tes txhua lub lim tiam sib tham seb neb yuav nrog cov thawj coj ua hauj lwm li cas kom pab tus neeg no. Sau ntawv txog koj tej lub tswv yim thiab tej kev xav nyob hauv qhov app Qhia Kuv txoj Moo Zoo. Rov ua li no rau tag nrho cov neeg hloov siab los ntseeg tshiab hauv neb cheeb tsam.
Koog Chaw Pawg Sab Laj, Thaj Chaw tej Rooj Sab Laj, thiab Qhov Chaw Tshaj Tawm Txoj Moo Zoo cov Thawj Coj Pawg Sab Laj
Caw ib tug npisov los yog lwm tus thawj coj hauv pawg ntseeg kom nrog lawv sib tham txog kev txhawb cov mej zeej tshiab thiab cov uas rov qab los lub zog. Nug tus neeg no qhia seb cov tub txib yuav ua li cas kom pab tau.
Sib tham txog tej zaj lus piv txwv ntawm tus yaj uas ploj lawm, lub npib nyiaj uas ua xiam lawm, thiab tus tub ua txhaum (saib Lukas 15). Caw cov tub txib qhia tias lawv kawm dab tsi thiab lawv yuav ua li cas kom siv thaum ua cov tub txib txoj hauj lwm.
Txais ib daim ntawv nkag tuam tsev kom mus ua kev cai raus dej hauv lub tuam tsev rau lawv cov poj koob yawm txwv uas tuag lawm.
Npaj lub npe ntawm ib tug poj koob yawm txwv uas tuag lawm kom coj mus rau lub tuam tsev.
Txais kev txib los yog kev hu ua hauj lwm hauv lawv pawg ntseeg los sis ceg ntseeg.
Nyob hauv kev sib ntsib koom tes nrog ceg txheem ntseeg tus thawj tswj hwm, cia li qhia cov thawj coj hauv pawg ntseeg kom paub ua li cas coj kev sib ntsib koom tes txhua lub lim tiam.
Tej lub sij hawm rov qab nrog cov mej zeej tshiab sib tham kom paub seb lawv ua dab tsi thiab cov tub txib thiab cov mej zeej ua li cas kom pab tau.
Caw cov mej zeej tshiab kom hais lus rau cov tub txib thiab hais txog lawv lub neej nyob hauv lub Koom Txoos.