“Tshooj 3: Kawm thiab Qhia txog Yexus Khetos txoj Moo Zoo,” Qhia Kuv txoj Moo Zoo: Phau Ntawv Pab Qhia txog Yexus Khetos txoj Moo Zoo (2023)
“Kawm thiab Qhia txog Yexus Khetos txoj Moo Zoo,” Qhia Kuv txoj Moo Zoo
Tshooj 3
Kawm thiab Qhia txog Yexus Khetos txoj Moo Zoo
Tej zaj lus qhia hauv tshooj no hais txog cov lus qhuab qhia, cov ntsiab cai, thiab cov lus txib ntawm Yexus Khetos txoj moo zoo. Tej zaj lus qhia yog tej yam uas cov yaj saub thiab cov thwj tim tau qhia koj kom kawm thiab qhia. Twb sau tej zaj lus qhia no kom koj thiaj li pab tau lwm tus to taub meej txog Khetos cov lus qhuab qhia.
Feem thib ib hauv tshooj no yog kev caw neeg ua kev cai raus dej. Ces txom qab ntawd muaj plaub zaj lus qhia no:
Cia li kawm cov vaj lug kub thiab xav ntsoov txog cov lus qhuab qhia hauv txhua zaj lus qhia. Thaum koj ua li ntawd, tus Ntsuj Plig yuav ua tim khawv txog tej lus tseeb uas koj kawm. Nws yuav pab koj paub hais li cas thiab ua li cas kom pab lwm tus txais ib zaj lus tim khawv txog qhov tseeb. (Saib Lus Qhuab Qhia thiab Kev Khi Lus 84:85.)
Tib neeg yuav paub tus Cawm Seej zoo dua thaum lawv ua raws li tej yam uas Nws tau caw lawv ua. Cia li caw tib neeg hauv txhua zaj lus qhia, thiab pab lawv ua raws li lawv tau cog lus lawm. Thaum tib neeg ua raws li lawv tau cog lus, lawv pib ua raws li Yexus Khetos txoj moo zoo thiab npaj siab nrog Vajtswv khi lus.
Qhia txhua zaj lus ua ntej thiab tom qab ua kev cai raus dej. Cov tub txib yuav coj txoj kev qhia tej zaj lus no ua ntej thiab tom qab ua kev cai raus dej. Pawg ntseeg cov tub txib los sis lwm tus mej zeej koom tes pab txhua zaus lawv muaj sij hawm ua. Saib tshooj 10 thiab 13 yog xav paub xov xwm txog kev koom nrog cov mej zeej qhia.
Npaj Qhia
Thaum koj npaj qhia, rov qab saib cov xov xwm txog txhua tus neeg nyob hauv qhov app Qhia Kuv txoj Moo Zoo. Npaj ib zaj lus qhia kom pab tus neeg uas koj yuav qhia. Xav seb nws yuav tsum paub thiab hnov thaum koj mus qhia nws. Tus Ntsuj Plig yuav txhawb nqa koj tej hauj lwm thaum koj siv sij hawm npaj.
Nov yog tej lus nug rau koj thiab koj tus khub xav txog thaum neb npaj qhia.
-
Wb yuav caw tus neeg no ua dab tsi kom pab txhawb nws txoj kev ntseeg Khetos thiab ua tau zoo zuj zus? Tej lus caw yog tej uas koj siv kom pab tau tib neeg hloov siab lees txim thiab paub txog “tus Txhiv Dim lub hwj chim” (Hilamas 5:11). Xav txog tus neeg ua tau zoo li cas, nws lub neej zoo li cas, thiab tej yam uas nws xav tau. Ces cia li xaiv ib los sis ob lo lus caw nyob hauv koj txoj kev npaj qhia.
-
Cov lus qhuab qhia thiab cov ntsiab cai twg yuav pab tus neeg ua raws li txoj kev cog lus uas peb tau caw nws ua? Thov Vajtswv kom pab koj txiav txim siab tias cov lus qhuab qhia thiab cov ntsiab cai twg yuav pab tib neeg to taub vim li cas kev ua raws li lawv tej lus cog tseg yog ib qho tseem ceeb rau lawv thiab tus Tswv saib yog ib qho tseem ceeb.
-
Wb yuav ua li cas kom pab tus neeg no kawm cov lus qhuab qhia? Kom npaj qhia cov lus qhuab qhia, cia li kho thiab sau ntsiab lus txog tej yam uas koj yuav qhia thaum siv zaj lus qhia 1–4. Xaiv tej lus nug, tej nqe vaj lug kub, tej zaj lus piv txwv, thiab tej lus tshaj tawm uas yuav pab tus neeg to taub tej yam uas koj qhia. Saib tshooj 10 kom kawm tias yuav ua li cas qhia zoo dua ntxiv.
-
Vajtswv tau cog lus tias koj yuav txais cov koob hmoov twg yog koj ua raws li koj tej kev khi lus? Thaum koj kawm cov lus qhuab qhia, cia li kawm txog Vajtswv cov koob hmoov uas Nws cog lus rau koj. Thaum koj qhia, cog lus tias lawv yuav txais koob hmoov thiab ua tim khawv txog tej ntawd.
-
Cov mej zeej twg yuav xav koom tes pab? Nyob hauv kev sib ntsib koom tes txhua lub lim tiam, txiav txim siab tias cov mej zeej twg yuav pab koj qhia thiab txhawb tus neeg uas koj qhia. Ua ntej zaj lus qhia, sib tham seb lawv yuav ua li cas. Saib tshooj 10.
-
Peb yuav ua li cas kom pab tib neeg ua raws li lawv tau cog lus lawm tom qab peb ncaim mus? Rov qab xyuas thaum koj sib tham me ntsis txhua hnub kom pab tib neeg ua raws li lawv tau cog lus lawm. Nrhiav seb puas muaj tej yam kom coj mej zeej tuaj pab cov neeg uas koj qhia kom ua raws li lawv tau cog lus. Tej zaum koj yuav xav nyeem ib tshooj los ntawm Phau Ntawv Maumoos los sis lwm phau vaj lug kub. Yog ib tug neeg tsis ua raws li lawv tau cog lus lawm, tej zaum yuav zoo dua yog koj pab lawv ua qhov ntawd ua ntej caw lawv ua lwm yam. Saib tshooj 11.
-
Peb yuav ua li cas kom pab lawv zoo dua lwm zaus? Tom qab txhua zaus koj qhia, xav seb tib neeg uas koj qhia tau xav li cas. Lawv txoj kev ntseeg Khetos puas loj tuaj? Lawv puas hnov tus Ntsuj Plig? Lawv puas hloov siab lees txim thiab ua raws li lawv tau cog lus? Lawv puas thov Vajtswv, kawm Phau Ntawv Maumoos, thiab koom lub koom txoos? Cia li npaj kom pab lawv.
Qhia Los ntawm Koj lub Siab Thaum tus Ntsuj Plig Coj Koj Kev
Thawj Pawg Thawj Tswj Hwm thiab Pawg Kaum Ob tug Thwj Tim tau hais rau tag nrho cov txwj laug thiab cov muam hais tias:
“Peb lub hom phiaj yog kev qhia zaj lus ntawm kev muab txoj moo zoo txum tim rov qab los kom ua rau tus Ntsuj Plig coj cov tub txib thiab cov uas lawv qhia. Yuav tsum kawm tej lub ntsiab ntawm [tej zaj lus qhia], tiam sis yuav tsis txhob nyeem xwb. Tus tub txib yuav tsum paub tias nws hais tau raws li tus Ntsuj Plig tshoov nws lub siab. Nws yuav tsum tsis txhob ua raws li nws tau cim ntsoov xwb, tiam sis hais lus los ntawm nws lub siab. Tej zaum nws yuav tsis qhia raws li tau teem sij hawm qhia tej zaj lus qhia, ua raws li tej kev tshoov siab, thiab raws li qhov uas tus [neeg] xav tau dab tsi. Thaum nws hais lus los ntawm nws lub siab thiab hais raws li nws xav, nws yuav tsum ua tim khawv txog qhov uas nws qhia qhov tseeb.”
Qhia thiab Caw Raws Li Tib Neeg Xav Tau
Koj qhia tau raws li txoj kev uas koj xav tias yuav pab tib neeg npaj ua kev cai raus dej thiab ua kev pom zoo. Koj qhia zaj lus twg, koj qhia thaum twg, thiab koj siv sij hawm npaum li cas los yuav tsum xav seb tus neeg uas koj qhia xav tau dab tsi thiab tus Ntsuj Plig qhia koj li cas. Piv txwv hais tias, thaum koj qhia tib neeg uas tsis tau ntseeg Yexus Khetos tas los, tej zaum koj yuav xav pib pab lawv sib raug zoo nrog Leej Txiv Saum Ntuj Ceeb Tsheej thiab to taub Nws txoj hau kev (saib “Kev Qhia Tib Neeg uas Tsis Tau Ntseeg Yexus Khetos” in tshooj 10).
Cia tus Ntsuj Plig coj koj mus kom paub tias koj yuav caw lawv ua dab tsi thiab thaum twg yuav caw lawv. Kev caw lawv thaum lub sij hawm yog lawm yuav pab tib neeg ua tej yam kom txhawb lawv txoj kev ntseeg. Tej yam no yuav pab lawv hloov lawv lub siab loj heev (saib Mauxiyas 5:2; Amas 5:12–14).
Cia li qhia tej zaj lus uas yooj yim, meej, thiab tsis ntev. Feem ntau, yuav tsum tsis txhob qhia ntev dhau 30 feeb, thiab koj qhia tau ib tug neeg thaum siv 5 feeb xwb.
Feem ntau koj yuav tsum sib ntsib ob peb zaug kom qhia tag nrho cov ntsiab cai hauv ib zaj lus qhia. Tib neeg yuav to taub koj zaj lus zoo dua yog koj qhia tsis ntev, qhia ntau zaus, thiab qhia ib me ntsis ntawm ib zaj lus.
Kev Kawm Vaj Lug Kub
Tus Tswv hais kom koj qhia dab tsi?
Vim li cas yuav tsum kawm cov lus qhuab qhia hauv tej zaj lus no?