Zaj Lus txog Kev Muab Yexus Khetos txoj Moo Zoo Txum Tim Rov Qab Los
Daim Duab
Thawj Zaug Ua Yog Toog
Tej Zaum Tib Neeg Yuav Xav Paub
Puas muaj Vajtswv tiag?
Kuv yuav ua li cas kom nrog Vajtswv sib raug zoo?
Kuv yuav ua li cas kom kawm txog qhov tseeb hauv ib lub ntiaj teb uas ntxhov hnyo?
Kev teev ntuj yuav ua li cas kom pab kuv?
Vim li cas muaj ntau lub koom txoos?
Vim li cas kuv muaj teeb meem ntau ua luaj?
Kuv yuav ua li cas kom muaj kev kaj siab hauv lub caij uas muaj kev kub ntxhov
Kuv yuav ua li cas kom zoo siab dua?
Ib tug yaj saub yuav ua li cas pab lub ntiaj teb niaj hnub no?
Txij thaum chiv keeb los, Vajtswv tau qhia txoj moo zoo rau Nws cov me nyuam dhau los ntawm cov yaj saub. Nws tau ua li no dhau los ntawm Nws Leej Tub, Yexus Khetos. Puag thaum ub, Yexus tau qhia txoj moo zoo rau cov yaj saub xws li Adas, Nau-as, Anplaham, thiab Mauxes. Tiam sis muaj neeg coob xyeej tsis kam ntseeg.
Ob txhiab xyoos tas los, Yexus Khetos tau qhia Nws txoj moo zoo thiab txhim tsa Nws lub Koom Txoos. Tib neeg tau xyeej Yexus. Tsis ntev tom qab Nws tau tuag,tag nrho tib neeg twb tso tus Tswv tej lus tseeb thiab lub Koom Txoos tseg. Twb tsis muaj txoj moo zoo tag nrho thiab txoj cai pov thawj hwj hauv lub ntiaj teb no lawm.
Ob txhiab xyoo tom qab ntawd, Vajtswv tau hu ib tug yaj saub ntxiv, Joseph Smith. Vajtswv tau muab txoj moo zoo txum tim rov qab los dhau los ntawm nws thiab tso cai rau nws txhim tsa Yexus Khetos lub Koom Txoos.
Qhov uas peb muaj Yexus Khetos txoj moo zoo tag nrho hauv lub ntiaj teb yeej yog ib txoj koob hmoov zoo kawg nkaus hauv peb hnub nyoog no. Txoj moo zoo pab peb teb tej lus nug tseem ceeb tshaj hauv lub neej no. Cov yaj saub coj peb kov yeej tej lub caij nyoog nyuaj heev. Twb rov qab muaj Vajtswv txoj cai pov thawj hwj nyob hauv lub ntiaj teb no kom foom koob hmoov rau Nws cov me nyuam.
Daim Duab
ob tug tub txib qhia ib tsev neeg
Tej lub Tswv Yim rau Kev Qhia
Feem no muab ib tug txheej txheem qhia rau koj kom pab koj npaj qhia. Kuj muaj tej lus nug thiab tej lus caw uas koj hais tau.
Thaum koj npaj qhia, thov Vajtswv kom xav txog txhua tus neeg tej xwm txheej thiab tej kev xav tau ntawm sab ntsuj plig. Txiav txim siab tias koj yuav qhia dab tsi kom pab zoo tshaj. Cia li npaj siab txhais tej lo lus uas tib neeg yuav tsis to taub. Npaj raws li lub sij hawm uas muaj, thiab nco ntsoov kom tsis txhob qhia ntev dhau.
Xav seb koj yuav nug tej lus twg thaum koj qhia. Npaj siab caw txhua tus neeg kom lawv ua tej yam.
Qhia txog cov koob hmoov uas Vajtswv tau cog lus tseg, thiab hais lus tim khawv txog tej yam uas koj qhia.
Tej Yam uas Koj Qhia Tau Tib Neeg Thaum Muaj 15–25 Feeb
Xaiv ib los sis ob peb lub ntsiab cai kom qhia rau lawv. Cov lus qhuab qhia lub hauv paus rau txhua lub ntsiab cai los muaj nyob hauv tus txheej txheem qhia no.
Yexus tau hu kaum ob tug Thwj Tim thiab muab txoj cai rau lawv coj Nws lub Koom txoos.
Thaum Nws tas lub neej no, Yexus tau theej peb lub txhoj thaum Nws raug kev txom nyem nyob hauv lub Vaj Khexemanes thiab thaum Nws raug Ntsia Saum Ntoo Khaub Lig. Tom qab Yexus tuag, Nws tau sawv rov los.
Vim Yexus tau theej peb lub txhoj, ces Nws ntxuav peb tej kev txhaum mus thaum peb hloov siab lees txim. Qhov no ua rau peb nyob kaj siab lug thiab qhib kev rau peb rov qab mus cuag Vajtswv thiab txais kev xyiv fab tag nrho.
Vim Yexus tau Sawv Rov Los, peb txhua tus yuav sawv rov los tom qab peb tuag. Qhov no txhais tias txhua tus neeg tus ntsuj plig thiab lub cev yuav rov qab koom ua ke thiab nyob mus ib txhis.
Lub Caij Nyoog Tso Qhov Tseeb Tseg
Tom qab Yexus cov Thwj Tim tuag, txhua tus neeg twb muab txoj moo zoo thiab Yexus Khetos lub Koom Txoos tso tseg lawm.
Nyob rau lub caij no, tib neeg tau muab tej lus qhia txog txoj moo zoo hloov. Tib neeg kuj tau muab cov kab ke pov thawj hwj hloov, xws li kev cai raus dej. Txoj cai pov thawj hwj thiab lub Koom Txoos uas Yexus tau txhim tsa los twb tsis muaj hauv lub ntiaj teb no lawm.
Kev Muab Yexus Khetos Txoj Moo Zoo Txum Tim Rov Qab Los Dhau Los ntawm Joseph Smith
Joseph Smith twb xav paub lub koom txoos twg yog Vajtswv lub Koom Txoos tseeb nws thiaj li koom tau. Leej Txiv Saum Ntuj Ceeb Tsheej thiab Yexus Khetos tau tshwm sim rau nws pom nyob rau xyoo 1820. Qhov no los hu ua Thawj Zaug Ua Yog Toog.
Vajtswv tau hu Joseph Smith los ua ib tug yaj saub, ib yam li Nws tau hu cov yaj saub puag thaum ub.
Twb tau muab Yexus Khetos txoj moo zoo txum tim rov qab los dhau los ntawm tus Yaj Saub Joseph Smith.
Lwm tus tim tswv saum ntuj ceeb tsheej tau muab lub pov thawj hwj txum tim rov qab los, thiab tau tso cai rau Joseph kom txhim tsa Yexus Khetos lub Koom Txoos.
Yexus Khetos tseem coj Nws lub Koom Txoos niaj hnub no dhau los ntawm cov yaj saub thiab cov thwj tim.
Phau Ntawv Maumoos yog ib phau vaj lug kub uas cov yaj saub hauv Amelikas tau sau puag thaum ub. Joseph Smith tau muab txhais lus los ntawm Vajtswv lub txiaj ntsim thiab lub hwj chim.
Tej lus nug no yog piv txwv txog tej yam uas koj nug tau neeg. Tej lus nug no pab tau koj nrog lwm tus sib tham thiab to taub ib tug neeg xav tau dab tsi thiab xav li cas.
Vajtswv yog peb Leej Txiv Saum Ntuj Ceeb Tsheej, thiab peb yog Nws cov me nyuam. Nws tau tsim peb kom muaj yam ntxwv zoo li Nws. Nws muaj “ib lub cev [zoo tag nrho uas] muaj nqaij thiab muaj txha uas kov tau ib yam li tib neeg” (Lus Qhuab Qhia thiab Kev Khi Lus 130:22).
Vajtswv paub peb thiab hlub peb txhua tus tshaj qhov peb to taub. Nws to taub peb tej kev sim siab, kev tu siab, thiab tej kev qaug zog, thiab Nws txhawb nqa peb kom peb nyiaj mus dhau. Nws zoo siab thaum peb ua tau zoo zuj zus thiab yuav pab peb xaiv tej yam ncaj ncees. Nws xav nrog peb sib txuas lus, thiab peb muaj cai nrog Nws sib txuas lus thaum peb thov Vajtswv.
Vajtswv tau muab lub sij hawm no rau peb hauv lub ntiaj teb no kom peb kawm, loj hlob, thiab hloov los ua neeg zoo li Nws. Vim Nws hlub peb zoo tag nrho, Nws xav kom peb rov qab mus cuag Nws tom qab peb tuag. Tiam sis, peb ua tsis tau peb tus kheej xwb. Vim Vajtswv hlub peb, Nws tau txib Nws Leej Tub, Yexus Khetos, los txhiv peb dim. “Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis” (Yauhas 3:16–17).
Vajtswv xav foom koob hmoov rau peb kom muaj kev kaj siab lug thiab muaj kev xyiv fab puv npo uas yuav kav ntev mus ib txhis li. Nws twb npaj ib txoj hau kev uas ua rau peb muaj cib fim txais cov koob hmoov no. Txoj hau kev no hu ua txoj hau kev cawm seej (saib zaj lus qhia 2).
Ib qho tseem ceeb uas Vajtswv siv kom qhia tias Nws hlub peb yog kev hu cov yaj suab, muab txoj cai pov thawj hwj rau lawv, thiab tshoov lawv lub siab kom sawv Nws cev hais lus. Cov yaj saub yog Vajtswv cov neeg sawv cev hauv lub ntiaj teb. Tus yaj saub Amaus hauv Phau Qub qhia tias “tus Tswv uas yog Vajtswv yuav tsis ua ib yam dab tsi, tsuas yog nws nws xub qhia rau nws cov tub qhe uas yog cov yaj saub ua ntej” (Amaus 3:7). Cov koob hmoov uas peb txais los ntawm cov yaj saub los muaj nram qab no.
Cov Tim Khawv txog Yexus Khetos. Cov yaj saub yog cov tim khawv tshwj xeeb txog Yexus Khetos, uas ua tim khawv hais tias Nws yog peb tus Cawm Seej thiab tus Txhiv Dim.
Tej Lus Qhia. Cov yaj saub txais Vajtswv tej lus qhia kom pab peb paub qhov tseeb thiab qhov cuav. Lawv qhia peb kom ua raws li Vajtswv cov lus txib thiab qhia kom peb hloov siab lees txim thaum peb ua yuam kev. Lawv tawm tsam kev txhaum thiab ceeb toom yuav raug li cas.
Cov yaj saub tej lus qhia txhawb nqa peb kom mus cuag Vajtswv thiab pab peb txais cov koob hmoov uas Nws xav kom peb txais. Peb yuav nyob nyab xeeb ntau tshaj plaws thaum peb coj raws li tus Tswv txoj lus raws li Nws cov yaj saub qhia.
Txoj Cai Pov Thawj Hwj. Tus yaj saub uas muaj tam sim no yog tus thawj tswj hwm uas tuav lub pov thawj hwj hauv lub ntiaj teb. Lub pov thawj hwj yog Vajtswv txoj cai thiab lub hwj chim. Cov yaj saub muaj txoj cai hais lus thiab ua tej yam los ntawm Vajtswv lub npe kom cawm Nws cov me nyuam dim.
Coj lub Koom Txoos. Yexus Khetos lub Koom Txoos lub hauv paus yog cov yaj saub thiab cov thwj tim (saib Efexus 2:19–20; 4:11–14).
Cov Yaj Saub Puag Thaum Ub
Adas yog thawj tus yaj saub hauv lub ntiaj teb. Vajtswv tau qhia Yexus Khetos txoj moo zoo rau nws thiab muab txoj cai pov thawj hwj rau nws. Adas thiab Evas tau qhia nkawd cov me nyuam tej lus tseeb no thiab pab lawv muaj kev ntseeg thiab ua neej raws li txoj moo zoo.
Thaum kawg Adas thiab Evas cov xeeb leej xeeb ntxwv tau ntxeev siab thiab tig mus tsis ntseeg txoj moo zoo lawm. Ua rau lawv tso qhov tseeb tseg. Thaum twg tib neeg coob tso qhov tseeb tseg, Vajtswv muab Nws txoj cai pov thawj hwj thim, txoj cai uas yuav tsum muaj kom qhia thiab ua cov kab ke ntawm txoj moo zoo.
Muaj ntau zaus nyob hauv Phau Qub uas cov neeg tag nrho tau tso qhov tseeb tseg. Xwv kom pab tib neeg rov qab ntseeg, Vajtswv hais lus rau Nws cov me nyuam thaum Nws hu ib tug yaj saub ntxiv. Nws tau qhia tej lus tseeb ntawm txoj moo zoo rau cov yaj saub no thiab muab txoj cai pov thawj hwj rau lawv. Cov yaj saub no yog neeg xws li Nau-as, Anplaham, thiab Mauxes. Tu siab uas tib neeg pheej tau xyeej cov yaj saub thiab tso qhov tseeb tseg.
Txij thaum Adas thiab Evas lub caij nyoog, tib neeg tau tos ntsoov Yexus Khetos txoj kev los ua lawv tus Cawm Seej thiab tus Txhiv Dim. Leej Txiv Saum Ntuj Ceeb Tsheej tau txib Yexus los rau hauv lub ntiaj teb 2,000 xyoos tas los.
Yexus tau ua neej zoo tag nrho, tsis tau ua txhaum hlo li. Nws tau qhia Nws txoj moo zoo thiab txhim tsa Nws lub Koom Txoos. Nws tau hu kaum ob tug Thwj Tim thiab muab txoj cai pov thawj hwj rau lawv qhia thiab ua cov kab ke dawb huv, xws li kev cai raus dej. Nws tau muab txoj cai rau lawv coj Nws lub Koom Txoos.
Thaum Nws tas lub neej no, Yexus tau theej peb lub txhoj thaum Nws raug kev txom nyem nyob hauv lub Vaj Khexemanes thiab thaum Nws raug Ntsia Saum Ntoo Khaub Lig. Vim Yexus tau theej peb lub txhoj, ces Nws ntxuav peb tej kev txhaum mus thaum peb hloov siab lees txim. Qhov no qhib kev rau peb rov qab mus cuag Vajtswv thiab txais kev xyiv fab tag nrho.
Tom qab Yexus raug ntsia saum ntoo khaub lig, Nws tau sawv rov los, Nws thiaj li kov yeej kev tuag los ntawm Leej Txiv Saum Ntuj Ceeb Tsheej lub hwj chim. Vim Yexus tau Sawv Rov Los, peb txhua tus yuav sawv rov los tom qab peb tuag. Qhov no txhais hais tias txhua tus neeg tus ntsuj plig thiab lub cev yuav rov qab los koom ua ke, thiab peb txhua tus yuav muaj ib lub cev zoo tag nrho uas tau sawv rov los nyob mus ib txhis li. (Saib “Yexus Khetos txoj Kev Theej Txhoj” nyob hauv zaj lus qhia 2.)
Daim Duab
tus Yaj Saub Joseph Smith
Tus Yaj Saub Joseph Smith tau qhia tias, “Tej ntsiab cai uas ua lub hauv paus ntawm peb txoj kev ntseeg teev yog cov lus tim khawv ntawm cov Thwj Tim thiab cov Yaj Saub, hais txog Yexus Khetos, hais tias Nws tau tuag, raug muab faus, thiab tias Nws tau sawv rov los tom qab peb hnub tiav tas, thiab tau nce mus dua saum ntuj ceeb tsheej lawm; thiab tag nrho lwm yam uas hais txog peb txoj kev ntseeg teev ces yog kev txuas ntxiv rau qhov no xwb” (Teachings of Presidents of the Church: Joseph Smith [2007], 49).
Tom qab Yexus Khetos tuag, Nws cov Thwj Tim xav qhia Khetos cov lus qhuab qhia meej heev thiab ua raws li tus txheej txheem raug nyob hauv lub Koom Txoos. Tiam sis, lub Koom Txoos cov mej zeej coob tau tig mus tsis mloog cov Thwj Tim ntxiv thiab tsis ntseeg cov lus qhuab qhia uas Yexus tau qhia.
Tom qab cov Thwj Tim tuag, txhua tus neeg twb muab txoj moo zoo thiab Yexus Khetos lub Koom Txoos tso tseg lawm. Ib txhia hu lub sij hawm uas tau txoj kev tso qhov tseeb tseg no hu ua Kev Tso Qhov Tseeb Tseg Loj Heev. Vim li ntawd, Vajtswv tau muab txoj cai pov thawj hwj tshem tawm hauv lub ntiaj teb no mus. Tsis tau muaj txoj cai kom coj lub Koom Txoos ntxiv. Yog li ntawd, lub Koom Txoos uas Yexus tau txhim tsa los tsis muaj hauv lub ntiaj teb no lawm.
Nyob rau lub caij no, tib neeg tau muab tej lus qhia txog txoj moo zoo hloov. Ntau yam kev txawj ntse txog qhov uas Leej Txiv Saum Ntuj Ceeb Tsheej, Yexus Khetos, thiab tus Vaj Ntsuj Plig Dawb Huv zoo li cas los twb ploj mus. Tib neeg kuj tau muab cov kab ke pov thawj hwj hloov, xws li kev cai raus dej.
Ntau xyoo tom qab ntawd, cov txiv neej thiab cov poj niam uas nrhiav qhov tseeb xav kho cov lus qhia thiab tej kab ke uas tau muab hloov. Lawv nrhiav txoj kev kaj ntawm sab ntsuj plig, thiab ib txhia hais tias yuav tsum muab qhov tseeb txum tim rov qab los. Lawv tej hauj lwm ua li no ua rau neeg coob txhim tsa ntau lub koom txoos.
Thaum lub sij hawm no twb ua rau neeg tsom ntsoov rau txoj kev ywj siab teev ntuj, uas qhib kev rau Vajtswv muab qhov tseeb thiab Nws txoj cai txum tim rov qab los.
Cov yaj saub thiab cov thwj tim thaum ub tau qhia tias yuav muaj lub caij nyoog no thaum tib neeg tso qhov tseeb tseg (saib 2 Thexalaunikes 2:1–3). Lawv kuj tau qhia tias yuav muab txoj moo zoo thiab Yexus Khetos lub Koom Txoos txum tim rov qab los rau hauv lub ntiaj teb (saib Tes Hauj Lwm 3:20–21). Yog tias tsis tau tso qhov tseeb tseg, ces tsis tas muab txoj moo zoo txum tim rov qab los.
Txoj Moo Zoo tej Ntsiab Lus: “Tso Qhov Tseeb Tseg”
Kev Muab Yexus Khetos Txoj Moo Zoo Txum Tim Rov Qab Los Dhau Los ntawm Joseph Smith
Thawj Zaug Ua Yog Toog thiab Kev Hu Joseph Smith Ua Ib tug Yaj Saub
Thaum lub sij hawm uas tsis muaj Yexus Khetos txoj moo zoo hauv lub ntiaj teb no, Leej Txiv Saum Ntuj Ceeb Tsheej tau xav nrog Nws cov me nyuam hais lus. Nws tau npaj ib txoj kev rau lawv kom lawv yuav rov qab muaj cov koob hmoov uas los ntawm Nws txoj moo zoo. Thaum xwm txheej zoo lawm, Nws tau hu Joseph Smith ua ib tug yaj saub kom muab txoj moo zoo thiab Yexus Khetos lub Koom Txoos txum tim rov qab los.
Joseph Smith tau nyob hauv lub Teb Chaws Amelikas thaum tib neeg coob xav xav kawm txog kev teev ntuj. Nws tsev neeg yeej tso siab rau Vajtswv thiab nrhiav qhov tseeb. Ntau lub koom txoos hais tias lawv qhia qhov tseeb, thiab Joseph xav paub lub koom txoos twg yog lub uas yog lawm (saib Joseph Smith—Keeb Kwm 1:18). Phau Npaivnpaum qhia tias muaj “ib tug Tswv, muaj tib txoj kev ntseeg, thiab muaj tib txoj kev cai raus dej xwb” (Efexus 4:5). Thaum Joseph mus rau tej kev sib ntsib hauv lwm lub koom txoos, nws xav paub lub twg yog lub nws yuav tsum koom. Nws hais tias:
“Nyob hauv txoj kev sib cav sib ceg thiab tej kev xav nrov nroo ntws no, kuv hais rau kuv tus kheej ntau zaus tias: Yuav ua li cas? Tag nrho tej pab no pab twg thiaj yog; los sis, lawv sawv daws puav leej yuam kev? Yog hais tias ib pab ntawm cov ntawd yog, ua li yog pab twg, thiab yuav ua cas kuv thiaj paub? (Joseph Smith—Keeb Kwm 1:8, 10).
Ib yam li neeg feem coob, Joseph Smith kuj xav paub tias nws puas yuav txais kev cawm seej. Nws xav kom Vajtswv zam txim pub rau nws tej kev txhaum thiab ua ib tug neeg huv rau Vajtswv pom. Thaum nws tseem nrhiav qhov tseeb nyob hauv tej lub koom txoos, nws tau nyeem li no nyob hauv phau Npaivnpaum, “Yog nej leej twg tsis muaj tswv yim, kom nws cia li thov Vajtswv, tus uas muaj siab dawb siab zoo pub rau neeg sawv daws, thiab tsis cem; ces yuav muab rau nws” (Yakaunpaus 1:5).
Vim nws nyeem nqe no, Joseph txiav txim siab nws yuav thov Vajtswv seb nws yuav tsum ua li cas. Thaum lub caij nplooj ntoo hlav xyoo 1820, nws tau mus rau ib koog ntoo nyob ze nws lub tsev thiab txhos caug. Muaj plaub zaj txog thawj zaug ua yog toog no, uas Joseph Smith sau los sis lwm tus neeg teev ntawv sau raws li nws qhia (saib Tej Zaj txog Txoj Moo Zoo tej Ntsiab Lus, “Tej Zaj txog Thawj Zaug Ua Yog Toog”). Nyob hauv zaj uas twb pom zoo ua vaj lug kub, nws piav txog lub sij hawm no li no hais tias:
Daim Duab
Thawj Zaug Ua Yog Toog, los ntawm Linda Christensen thiab Michael Malm
“Kuv pom ib tug duab ci nyob kiag ntawm kuv taub hau lawm saud, ci tshaj lub hnub ci, uas maj mam nqis los txog thaum tus duab ci roos kuv. … Thaum tus duab ci los txog kuv, kuv pom ob tug Tib Neeg, uas ci ntsa iab thiab muaj yeeb koob uas yeej piav tsis tau, sawv ntawm kuv lawm saum nruab cua. Ib tug hais rau kuv, tuav kuv lub npe thiab taw tes rau tus sab tod, thiab hais tias—Tus no yog Kuv Leej Tub uas Kuv Hlub. Cia li mloog Nws hais!” (Joseph Smith—Keeb Kwm 1:16–17).
Nyob hauv txo kev ua yog toog no, Vajtswv tus uas yog Leej Txiv thiab Nws Leej Tub, Yexus Khetos, tau tshwm sim rau Joseph Smith pom. Tus Cawm Seej tau hais kom nws tsis txhob koom tej lub koom txoos ntawd.
Nyob hauv lwm zaj lus txog kev ua yog toog no, Joseph hais tias tus Cawm Seej qhia nws tias: “Kuv zam txim rau koj. … Saib seb kuv yog tus Tswv uas muaj yeeb koob. Kuv raug muab ntsia rau saum ntoo khaub lig rau neeg ntiaj teb tej kev txhaum, xwv kom tag nrho cov uas yuav ntseeg kuv lub npe yuav tau txoj sia nyob mus ib txhis”
Tom qab txoj kev ua yog toog no, Joseph xav hais tias, “Ua rau kuv muaj lub siab hlub puv npo, thiab rau ntau hnub, kuv zoo siab heev, thiab tus Tswv nrog kuv nyob” (Joseph Smith Keeb Kwm, kwv yees li lub Caij Sov 1832, 3, josephsmithpapers.org; tau kho kev sau ntawv thiab cov cim ntawv kom haum lub caij niaj hnub nim no).
Los ntawm txoj kev ua yog toog no, Joseph Smith yog ib tug uas tau ua tim khawv txog Yexus Khetos thiab kawm tej yam tseem ceeb txog Pawg Vajtswv. Piv txwv hais tias, nws kawm tias Leej Txiv Saum Ntuj Ceeb Tsheej thiab Yexus Khetos yog ob tug neeg. Thaum Nkawd hu nws lub npe, nws kawm tias Nkawd paub nws. Thaum Yexus qhia Joseph tias twb zam txim pub rau nws, nws kawm tias Vajtswv muaj lub siab hlub tshua. Qhov no ua rau nws muaj kev xyiv fab heev.
Ib yam li Vajtswv ua rau cov yaj saub puag thaum ub, Nws tau hu Joseph Smith los ua ib tug yaj saub kom muab txoj moo zoo txum tim rov qab los nyob hauv lub ntiaj teb no. Txoj kev muab txoj moo zoo txum tim rov qab los no yuav pab Vajtswv cov me nyuam nrhiav tau kev zoo siab hauv lub neej no thiab txoj sia nyob mus ib txhis hauv lub neej tom ntej—txhua yam yog dhau los ntawm Yexus Khetos.
Kev Muab lub Pov Thawj Hwj thiab cov Yawm Sij Pov Thawj Hwj Txum Tim Rov Qab Los
Daim Duab
Rau Neb Kuv Ob tug Kwv Luag Tub Qhe, los ntawm Linda Curley Christensen thiab Michael Malm
Tom qab Leej Txiv thiab Leej Tub tshwm sim rau nws, tus Tswv tau txib lwm tus tub xa xov saum ntuj ceeb tsheej tuaj rau Joseph Smith thiab nws tus kwv luag Oliver Cowdery. Yauhas tus Muab Neeg Ua Kev Cai Raus Dej tau tshwm sim ua ib tug neeg uas tau sawv rov los thiab muab lub Pov Thawj Hwj Aloos thiab cov yawm sij rau nkawd. Lub Pov Thawj Hwj Aloos muaj txoj cai muab neeg ua kev cai raus dej.
Daim Duab
Petus, Yakaunpaus, thiab Yauhas lub Suab, los ntawm Welden C. Andersen
Tom qab ntawd, Petus, Yakaunpaus, thiab Yauhas—peb tug ntawm Yexus Khetos cov Thwj Tim—tau tshwm sim thiab muab lub Pov Thawj Hwj Mekhixedes thiab cov yawm sij ntawd rau Joseph Smith thiab Oliver Cowdery nkawd. Lub pov thawj hwj no yog txoj cai uas Yexus Khetos muab rau Nws cov Thwj Tim puag thaum ub.
Daim Duab
Image of Moses Elias and Elijah descending into the Kirtland temple and appearing to Joseph Smith.
Nyob hauv lub Tuam Tsev Kirtland, Mauxes, Eli-as, thiab Eliyas tshwm sim rau Joseph Smith thiab Oliver Cowdery thiab muab txoj cai thiab cov yawm sij pov thawj hwj ntxiv rau nkawd vim yog tej yam uas yuav tsum muaj kom ua Vajtswv txoj hauj lwm hauv hnub nyoog kawg no. Mauxes muab cov yawm sij kom thiaj sau tau tsev neeg Ixayees rov qab los ua ke.16 Eli-as muab lub caij nyoog tso txoj cai ntawm Anplaham txoj moo zoo. Eliyas muab cov yawm sij ntawm lub hwj chim khi tseg cia. (Saib Lus Qhuab Qhia thiab Kev Khi Lus 110:11–16; kuj saib Phau Qhia Kev Coj lub Koom Txoos, 3.1.)
Kev Txhim Tsa lub Koom Txoos
Tus Tswv tau qhia Joseph Smith kom muab Yexus Khetos lub Koom Txoos rov qab txhim tsa hauv lub ntiaj teb. Dhau los ntawm nws, Yexus Khetos tau hu kaum ob tug Thwj Tim.
Cov yaj saub hauv phau Npaivnpaum tau hais tias hnub nyoog uas peb nyob tam sim no yog hnub nyoog kawg los sis lub caij nyoog kawg. Yog lub sij hawm uas tsis ntev yuav muaj Yexus Khetos txoj Kev Los Zaum Ob. Yog vim li ntawd peb hu lub Koom Txoos no ua Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg (saib Lus Qhuab Qhia thiab Kev Khi Lus 115:3–4; kuj saib 3 Nifais 27:3–8).
Cov Yaj Saub thiab cov Thwj Tim Niaj Hnub No
Ib yam li Yexus tau hu cov Thwj Tim thaum Nws ua Nws txoj hauj lwm qhuab qhia coj Nws lub Koom Txoos, Nws tau hu cov Thwj Tim coj niaj hnub no thiab. Thawj Pawg Thawj Tswj Hwm thiab Pawg Kaum Ob tug Thwj Tim yog cov yaj saub, cov pom tau, thiab cov txais kev tshwm sim.
Tsuas yog tus thawj Thwj Tim xwb hu ua tus yaj saub vim nws tswj hwm tag nrho lub Koom Txoos thiab muaj txoj cai sawv tus Tswv cev hais lus. Nws yog tus uas tau txais kev tso cai ua tus yaj saub tom qab Joseph Smith. Nws thiab cov Thwj Tim uas muaj tam sim no yeej tau txoj cai los ntawm Yexus Khetos vim ib tug tau tsa ib tug pib thaum cov tub xa xov saum ntuj ceeb tsheej los tsa Joseph Smith.
Phau Ntawv Maumoos yog ib phau vaj lug kub dawb huv uas sau puag thaum ub ib yam li phau Npaivnpaum. Phau Npaivnpaum yog ib zaj lus tim khawv txog Yexus Khetos, thiab Phau Ntawv Maumoos yog ib phau ntxiv uas ua tim khawv txog Nws txoj hauj lwm qhuab qhia, Nws tej lus qhia, thiab Nws ntiag tug hauj lwm ua peb tus Cawm Seej.
Ib tug tub xa xov saum ntuj ceeb tsheej hu ua Maulaunais tau coj Joseph Smith mus rau ib lub toj uas twb muab ib phau ceev xwm txheej faus cia puag thaum ub. Phau ceev xwm txheej no, uas twb kos rau cov phiaj kub, muaj cov yaj saub tej lus sau txog Vajtswv tej hauj lwm hauv cov neeg uas nyob hauv tej teb chaws Amelikas puag thaum ub. Joseph Smith tau muab txhais lus los ntawm Vajtswv lub txiaj ntsim thiab lub hwj chim.
Cov yaj saub hauv Phau Ntawv Maumoos tau paub txog Yexus Khetos ntiag tug hauj lwm thiab tau qhia txog Nws txoj moo zoo. Tom qab Yexus tau sawv rov los, Nws tau tshwm sim rau cov neeg no thiab txhawb pab lawv. Nws qhia lawv thiab txhim tsa Nws lub Koom Txoos.
Phau Ntawv Maumoos pab peb nyob ze Vajtswv thaum peb kawm, to taub, thiab ua raws li tej lus qhia ntawd. Tus Yaj Saub Joseph Smith hais tias “tus neeg uas ua raws li phau ntawv no tej lus ntsiab cai yuav txav tau los ze rau Vajtswv dua lwm phau ntawv” (Teachings: Joseph Smith, 64).
Thaum peb nyeem Phau Ntawv Maumoos thiab thov Vajtswv txog phau no, peb yuav kawm tej lus tseeb txog Yexus Khetos uas yuav foom koob hmoov rau peb lub neej. Peb kuj yuav paub tias Joseph Smith yog Vajtswv ib tug yaj saub thiab txoj moo zoo thiab twb tau muab Yexus Khetos lub Koom Txoos txum tim rov qab los dhau los ntawm nws.
Daim Duab
Thawj Tswj Hwm Russell M. Nelson
“Kuv cog lus hais tias thaum nej ke thov Vajtswv ke kawm Phau Ntawv Maumoos txhua txhua hnub, nej yuav txiav txim siab zoo dua—txhua hnub. Kuv cog lus hais tias thaum nej xav txog tej yam uas nej kawm, lub rooj ntug yuav qhib plho, thiab nej yuav txais lus teb rau nej cov lus nug thiab kev coj rau nej lub neej. Kuv cog lus hais tias thaum nej rau rau siab nyeem Phau Ntawv Maumoos, nej yuav tiv thaiv nej tus kheej ntawm tej kev phem uas muaj niaj hnub nim no” (Russell M. Nelson, “Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?” Liahona, Kaum Ib Hlis Ntuj 2017, 62–63).
Txheej Txheem Qhia uas Tsis Ntev Los Ntev Me Ntsis
Tus txheej txheem qhia no yog tej yam uas tej zaum koj yuav xav qhia ib tug neeg yog tias tsis muaj sij hawm ntev. Thaum koj siv tus txheej txheem qhia no, cia li xaiv ib los sis ob lub ntsiab cai kom qhia xwb. Cov lus qhuab qhia lub hauv paus rau txhua lub ntsiab cai los muaj nyob hauv zaj lus qhia no thaum xub thawj.
Thaum koj qhia, cia li nug tej yam thiab mloog lawv hais li cas. Caw tib neeg kom pab lawv kawm ua li cas kom muab siab npuab Vajtswv. Ib cov lus caw tseem ceeb yog kom tug neeg ntawd rov qab nrog koj sib ntsib ua ke. Qhov uas koj qhia ntev li cas yuav nyob ntawm seb koj nug tej yam twg thiab koj mloog zoo npaum li cas.
Daim Duab
ob tug tub txib nrog ib tug txiv neej sib tham
Tej Yam uas Koj Qhia Tau Tib Neeg Thaum Muaj 3–10 Feeb
Vajtswv yog peb Leej Txiv Saum Ntuj Ceeb Tsheej, thiab Nws tau tsim peb kom muaj yam ntxwv zoo li Nws. Nws paub peb thiab hlub peb txhua tus. Nws xav foom koob hmoov rau peb kom muaj kev kaj siab lug thiab muaj kev xyiv fab puv npo uas yuav kav ntev mus ib txhis li.
Vajtswv hu cov yaj saub kom sawv Nws cev hauv lub ntiaj teb no. Puag thaum ub, Vajtswv tau hu cov yaj saub xws li Adas, Nau-as, Anplaham, thiab Mauxes. Ib tug yaj saub txais kev tshwm sim los ntawm Vajtswv kom paub qhia thiab coj peb niaj hnub no.
Thaum Yexus ua Nws txoj hauj lwm qhuab qhia, Nws txhim tsa Nws lub Koom Txoos. Tom qab Yexus cov Thwj Tim tuag, txhua tus neeg twb muab txoj moo zoo thiab Yexus Khetos lub Koom Txoos tso tseg lawm. Tib neeg tau hloov ntau yam txog txoj moo zoo thiab cov kab ke pov thawj hwj, xws li kev cai raus dej.
Vajtswv tau hu Joseph Smith los ua ib tug yaj saub, ib yam li Nws tau hu cov yaj saub puag thaum ub. Leej Txiv Saum Ntuj Ceeb Tsheej thiab Yexus Khetos tau tshwm sim rau nws pom. Twb tau muab Yexus Khetos txoj moo zoo txum tim rov qab los dhau los ntawm nws.
Phau Ntawv Maumoos yog ib phau vaj lug kub. Ib yam li phau Npaivnpaum, yog ib zaj lus tim khawv txog Yexus Khetos thiab pab peb nrog Vajtswv sib raug zoo dua thaum peb nyeem thiab ua raws li tej ntsiab cai nyob haud. Joseph Smith tau muab txhais lus los ntawm Vajtswv lub txiaj ntsim thiab lub hwj chim.