Yexus Qhia cov Neeg nyob ntawm Sab Hnub Poob (Yexus Mus Xyuas Amelikas), los ntawm John Scott

Tshooj 5

Siv lub Hwj Chim ntawm Phau Ntawv Maumoos

Xav Txog Qhov No

• Vim li cas Phau Ntawv Maumoos twb yog lub plawv zeb ntawm peb txoj kev teev ntuj?

• Vim li cas Phau Ntawv Maumoos muaj hwj chim heev pab neeg hloov siab los ntseeg?

• Phau Ntawv Maumoos qhia dab tsi txog Yexus Khetos?

• Kuv yuav ua li cas siv Phau Ntawv Maumoos kom pab kuv tus kheej thiab lwm tus muab siab npuab Vajtswv?

• Phau Ntawv Maumoos ua li cas kom teb tau tej lus nug ntawm sab siab ntsws?

• Kuv yuav ua li cas kom pab neeg nyeem thiab txais ib zaj lus tim khawv txog Phau Ntawv Maumoos?

Phau Ntawv Maumoos, nrog rau tus Ntsuj Plig, yeej yog qhov uas muaj hwj chim ntau tshaj plaws kom pab tib neeg hloov siab los ntseeg. Phau no yog ib phau ceev xwm txheej dawb ceev uas sau puag thaum ub kom tib neeg ntseeg tias Yexus yog tus Khetos (saib phab ntawv qhia npe ntawm Phau Ntawv Maumoos). Ib yam li lwm lub npe hais tias, Phau Ntawv Maumoos yog “ib zaj tim khawv ntxiv txog Yexus Khetos.” Phau ntawv no kuj yog puav pheej uas qhia tias Vajtswv twb tau hu Joseph Smith los ua ib tug yaj saub thiab siv nws los muab Yexus Khetos txoj moo zoo txum tim rov qab los.

ncej pob zeb uas nkhaus muaj lub plawv zeb

Phau Ntawv Maumoos Yog lub Plawv Zeb ntawm Peb txoj Kev Teev Ntuj

Tus Yaj Saub Joseph Smith tau qhia tias Phau Ntawv Maumoos yog “lub plawv zeb ntawm peb txoj kev teev ntuj” (zaj lus piav txog Phau Ntawv Maumoos). Lwm lub sij hawm nws hais tias: “Muab Phau Ntawv Maumoos thiab tej kev tshwm sim tshem mus, ces peb txoj kev teev ntuj yog dab tsi? Tsis muaj hlo li” (Teachings of Presidents of the Church: Joseph Smith [2007], 196).

Tus ncej pob zeb uas nkhaus yeej yog ib yam khov kho uas muab tej tus tsuas pob zeb uas sib puab nkaus. Lub pob zeb nyob nruab nrab, los yog lub plawv zeb, yeej loj dua lwm tus tsuas thiab ua rau txhua lub pob zeb khov kho thaum nyob ua ke.

Thawj Tswj Hwm Ezra Taft Benson hais tias muaj peb yam uas qhia tias Phau Ntawv Maumoos yog lub plawv zeb ntawm peb txoj kev teev ntuj:

Kev ua tim khawv txog Yexus Khetos “Phau Ntawv Maumoos yog lub plawv zeb rau peb txoj kev ua tim khawv txog Yexus Khetos, tus uas yog lub pob zeb ntawm txhua yam uas peb ua. Phau Ntawv Maumoos muaj hwj chim ua tim khawv meej txog Nws.”

Cov lus qhuab qhia txhij txhua. “Tus Tswv twb tau hais tias Phau Ntawv Maumoos muaj ‘Yexus Khetos txoj moo zoo txhij txhua’ [Lus Qhuab Qhia thiab Kev Khi Lus 20:9; 27:5]. … Nyob hauv Phau Ntawv Maumoos peb yuav nrhiav tau cov lus qhuab qhia tag nrho uas peb yuav tsum txais tau kom muaj kev cawm seej. Thiab Phau Ntawv Maumoos qhia txog tej no meej thiab yooj yim kom cov me nyuam kawm tau txog kev cawm seej thiab kev tsa nto.”

Lub hauv paus rau zaj lus tim khawv. “Ib yam li ncej pob zeb uas nkhaus no yuav vau yog tias muab lub plawv zeb tshem, ces lub Koom Txoos yuav sawv los sis poob mus nyob ntawm qhov uas Phau Ntawv Maumoos muaj tseeb. … Yog tias Phau Ntawv Maumoos muaj tseeb … ces yeej yuav tsum lees txais tej lus tseeb ntawm Kev Muab Txoj Moo Zoo Txum Tim Rov Qab Los.” (Teachings of Presidents of the Church: Ezra Taft Benson [2014], 129, 131, 128.)

Thaum peb muaj ib zaj lus tim khawv paub tias Phau Ntawv Maumoos yog Vajtswv txoj lus, peb yuav paub tias Joseph Smith yog ib tug yaj saub. Dhau los ntawm Nws, cov tub xa xov saum ntuj ceeb tsheej tau los muab txoj cai pov thawj hwj txum tim rov qab los. Vajtswv kuj tau tso cai rau Joseph muab Yexus Khetos lub Koom Txoos txhim tsa. Niaj hnub no los cov yaj saub kuj txais kev tshwm sim thiab.

ib tug tub hluas nyeem vaj lug kub

Yuav Tsum Muaj Phau Ntawv Maumoos Kom Hloov Siab Los Ntseeg

Ib feem tseem ceeb ntawm kev hloov siab los ntseeg yog kev txais ib zaj lus tim khawv los ntawm tus Vaj Ntsuj Plig Dawb Huv lub hwj chim hais tias Phau Ntawv Maumoos muaj tseeb. Thaum koj rau siab nyeem thiab kawm, koj yuav hnov tej lus ntawd ua rau koj sab ntsuj plig loj hlob tuaj. Phau ntawv no tej lus yuav ua rau koj to taub lub neej no, Vajtswv txoj hau kev, thiab to taub txog Yexus Khetos (saib Amas 32:28). Thov Vajtswv txog phau ntawv no nrog kev mob siab tiag tiag thiab kev ntseeg Yexus Khetos. Thaum koj ua li ntawd, tus Vaj Ntsuj Plig Dawb Huv yuav ua tim khawv rau koj tias yeej yog Vajtswv txoj lus (saib Maulaunais 10:4–5).

Koj zaj lus tim khawv txog Phau Ntawv Maumoos yuav ua rau koj muaj ib txoj kev ntseeg uas muaj zog heev thiab muaj hwj chim pab lwm tus hloov siab los ntseeg. Cia pab cov neeg uas koj qhia kom paub thaum twg lawv txais txoj kev kaj thaum lawv rau siab nyeem. Tsom ntsoov rau qhov uas Phau Ntawv Maumoos ua tim khawv txog Yexus Khetos. Yaum kom lawv thov Vajtswv kom txais tau ib zaj lus tim khawv tias phau no muaj tseeb.

Koj yeej yuav tsum tsom ntsoov rau txoj kev yaum kom tib neeg nrhiav tus Vaj Ntsuj Plig Dawb Huv txoj kev ua tim khawv txog Phau Ntawv Maumoos thaum koj qhia. Phau Ntawv Maumoos hloov tau lawv lub neej tas mus li.

Siv Phau Ntawv Maumoos Kom Qhia Yexus Khetos txoj Moo Zoo

Tus Yaj Saub Joseph Smith hais tias, “Phau Ntawv Maumoos yog phau uas raug tshaj txhua phau ntawv nyob hauv ntiaj teb no” (zaj lus piav txog Phau Ntawv Maumoos). Phau no ua tim khawv txog Yexus Khetos thiab qhia meej txog Nws cov lus qhuab qhia (saib 2 Nifais 31; 32:1–6; 3 Nephi 11:31–39; 27:13–22). Phau no qhia txog Nws txoj moo zoo uas muaj txhij txhua. Thawj cov ntsiab cai thiab cov kab ntawm txoj moo zoo raws li Phau Ntawv Maumoos qhia yeej yog txoj kev kom txais tau ib lub neej uas muaj ntau nplua mias.

Cia li siv Phau Ntawv Maumoos ua koj lub hauv paus ntawm koj txoj kev qhia txoj moo zoo. Daim ntawv nram qab no qhia txog tej lus tseeb nyob hauv Phau Ntawv Maumoos uas koj yuav qhia.

Cov Tub Txib zaj Lus Qhia hauv Tshooj 3	Cov Lus Qhuab Qhia	Tej Nqe hauv Vaj Lug Kub
Cov Tub Txib zaj Lus Qhia hauv Tshooj 3 Zaj Lus txog Kev Muab Yexus Khetos txoj Moo Zoo Txum Tim Rov Qab Los	Cov Lus Qhuab Qhia Vajtswv zoo li cas, tus Cawm Seej txoj hauj lwm qhuab qhia thiab txoj Kev Theej Txhoj, txoj kev tso qhov tseeb tseg, Kev Muab Txoj Moo Zoo Txum Tim Rov Qab Los, Joseph Smith, txoj cai pov thawj hwj	Tej Nqe hauv Vaj Lug Kub 1 Nifais 12–14 2 Nifais 3; 26–29 Mauxiyas 2–5
Cov Tub Txib zaj Lus Qhia hauv Tshooj 3 Leej Txiv Saum Ntuj Ceeb Tsheej txoj Hau Kev Cawm Seej	Cov Lus Qhuab Qhia “Vajtswv uas Nyob Mus Ib Txhis txoj hau kev uas tseem ceeb,” tsis hais Adas thiab Evas txoj Kev Poob, Yexus Khetos txoj Kev Theej Txhoj, Kev Sawv Rov Los, thiab Kev Txiav Txim	Tej Nqe hauv Vaj Lug Kub 2 Nifais 2; 9 Mauxiyas 3; 15–16 Amas 12; 34:9; 40–42
Cov Tub Txib zaj Lus Qhia hauv Tshooj 3 Yexus Khetos txoj Moo Zoo	Cov Lus Qhuab Qhia Kev ntseeg Yexus Khetos, kev hloov siab lees txim, kev cai raus dej, lub txiaj ntsim Vaj Ntsuj Plig Dawb Huv, thiab kev nyiaj kom mus txog thaum kawg	Tej Nqe hauv Vaj Lug Kub 2 Nifais 31–32 3 Nifais 11; 27:13–22
Cov Tub Txib zaj Lus Qhia hauv Tshooj 3 Hloov Los Ua Yexus Khetos cov Thwj Tim Tas Ib Sim Neej	Cov Lus Qhuab Qhia Cov kab ke xws li kev cai raus dej, kev tsa rau lub pov thawj hwj, thiab lub cim nco txog	Tej Nqe hauv Vaj Lug Kub 3 Nifais 11:22–28; 18 Maulaunais 2–6

Kev Kawm Vaj Lug Kub

Tus Cawm Seej hais dab tsi txog Phau Ntawv Maumoos?

• Lus Qhuab Qhia thiab Kev Khi Lus 1:29; 3:19–20; 19:26–27; 20:5–16; 33:16; 42:12

• Mauxes 7:62

Phau Ntawv Maumoos Ua Tim Khawv txog Yexus Khetos

Lub hom phiaj tseem ceeb tshaj plaws ntawm Phau Ntawv Maumoos yog kom ua tim khawv txog Yexus Khetos. Phau Ntawv Maumoos qhia txog Nws lub neej, ntiag tug hauj lwm, kev sawv rov los, thiab lub hwj chim. Phau no qhia txog Yexus Khetos cov lus qhuab qhia tseeb thiab Nws txoj Kev Theej Txhoj.

Muaj ob peb tug yaj saub uas ceev xwm txheej hauv Phau Ntawv Maumoos twb tau pom Yexus Khetos. Yales tus tij laug, Nifais, thiab Yakhauj twb pom tus Khetos ua ntej Nws yug los. Neeg coob twb pom thaum tus Cawm Seej ua hauj lwm qhuab qhia rau cov neeg Nifais (saib 3 Nifais 11–28). Tom qab ntawd, Maumoos thiab Maulaunais pom tus Khetos uas sawv rov los (saib Maumoos 1:15; Ethaws 12:39).

Thaum tib neeg nyeem thiab thov Vajtswv txog Phau Ntawv Maumoos, lawv yuav los paub tus Cawm Seej zoo dua thiab paub txog Nws txoj kev hlub. Lawv zaj lus tim khawv txog Nws yuav loj tuaj. Lawv yuav paub los cuag Nws thiab txais kev cawm seej. (Saib 1 Nifais 15:14–15.)

Thawj Tswj Hwm Russell M. Nelson

“Phau Ntawv Maumoos muaj cov lus qhia uas muaj hwj chim thiab meej tshaj plaws hais txog Yexus Khetos txoj Kev Theej Txhoj, ntau dua lwm phau ntawv qhov twg los xij. Phau no qhia saib txoj kev yug dua tshiab txhais li cas tiag tiag. … Peb paub hais tias yog vim li cas peb thiaj nyob hauv lub ntiaj teb. Tej qhov tseeb no thiab lwm cov yog qhia yam muaj hwj chim heev hauv Phau Ntawv Maumoos, ntau dua lwm phau ntawv huv tib si li. Lub hwj chim tag nrho ntawm Yexus Khetos txoj moo zoo yog muaj nyob hauv Phau Ntawv Maumoos” (Russell M. Nelson, “Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?” Liyahaunas, Kaum Ib Hlis Ntuj 2017, 62).

Kev Kawm Ntawv Koj tus Kheej

Txhua lub sij hawm uas koj ua tub txib, cia li sau tej lus teb rau tej lus nug nram qab no nyob hauv koj phau ntawv ceev txog kev kawm:

• Koj tau kawm dab tsi txog Yexus Khetos thaum koj kawm Phau Ntawv Maumoos?

• Koj txoj kev kawm Phau Ntawv Maumoos tau ua li cas pab koj zaj lus tim khawv txog Yexus Khetos?

• Koj yuav siv Phau Ntawv Maumoos li cas kom pab tib neeg zaj lus tim khawv muaj zog ntxiv?

Kev Kawm Vaj Lug Kub

Cov yaj saub hauv Phau Ntawv Maumoos tau qhia tias yog vim li cas lawv ceev lawv tej xwm txheej?

• 1 Nifais 6:4–6; 9:3–5

• 2 Nifais 4:15–16; 25:23–29; 26:15–16; 29:11–14; 33:13–15

• Yakhauj 1:4–8; 4:1–6, 12

• Enos 1:13

• Yaloos 1:2

• Oonis 1:25–26

• Maumoos cov Lus 1:3–8

• Amas 37:2, 14

• 3 Nifais 5:14–15

• Maumoos 8:35

Kev Kawm Koj tus Kheej Los Sis Nrog tus Khub

Twb tau sau Phau Ntawv Maumoos kom “yaum [txhua tus neeg] hais tias Yexus yog tus Khetos” (phab ntawv qhia npe ntawm Phau Ntawv Maumoos). Daim phiaj nram qab no qhia txog tej tshooj hauv Phau Ntawv Maumoos uas ua tim khawv txog Yexus Khetos lub neej, tej lus qhia, thiab txoj hauj lwm qhuab qhia. Cia li xaiv tej nqe kom kawm thaum koj ua tub txib.

Tsis tas li ntawd, cia li xav txog tej yam uas cov neeg koj qhia xav tau. Npaj kom nrog lawv nyeem tej nqe kom txhawb nqa lawv txoj kev txawj ntse thiab zaj lus tim khawv txog tus Cawm Seej.

Phab ntawv qhia npe thiab zaj lus piav	Qhia meej txog lub hom phiaj ntawm phau ntawv no.
1 Nifais 10–11	Lihais thiab Nifais ua tim khawv txog tus Cawm Seej.
2 Nifais 2; 9	Lihais thiab Yakhauj ua tim khawv txog Yexus Khetos thiab Nws txoj Kev Theej Txhoj.
2 Nifais 31–33	Nifais qhia txog Khetos cov lus qhuab qhia.
Mauxiyas 2–5	Vaj Ntxwv Npeyamis ua tim khawv txog Khetos.
Amas 5; 7	Amas ua tim khawv txog tus Cawm Seej.
Amas 36	Amas txais tau Yexus Khetos lub hwj chim uas theej txhoj.
3 Nifais 9–10	Tus Cawm Seej caw tib neeg los cuag Nws.
3 Nifais 11–18	Tus Cawm Seej qhia cov Neeg Nifais txog Leej Txiv thiab Nws cov lus qhuab qhia.
3 Nifais 27	Tus Cawm Seej qhia Nws txoj moo zoo.
Ethaws 12	Ethaws thiab Maulaunais qhia tias kev ntseeg Yexus Khetos yog ib lub ntsiab cai ntawm kev muaj peev xwm thiab hwj chim.
Maulaunais 7–8	Maumoos qhia txog Yexus Khetos txoj kev hlub uas dawb paug thiab Nws txoj Kev Theej Txhoj.
Maulaunais 10	Maulaunais caw txhua tus los cuag Khetos thiab los ua neeg zoo tag nrho vim yog los ntawm Nws.

Phau Ntawv Maumoos Pab Peb Muab Siab Npuab Vajtswv

Hais txog Phau Ntawv Maumoos, tus Yaj Saub Joseph Smith hais tias “tus neeg uas ua raws li phau ntawv no tej lus ntsiab cai yuav txav tau los ze rau Vajtswv dua lwm phau ntawv” (zaj lus piav txog Phau Ntawv Maumoos). Thaum koj qhia thiab caw tib neeg ua raws li tej ntsiab cai hauv Phau Ntawv Maumoos koj pab lawv txoj kev ntseeg Yexus Khetos loj tuaj thiab pab lawv muab siab npuab Vajtswv ntxiv.

Phau Ntawv Maumoos txhawb nqa tib neeg zaj lus tim khawv thiab caw lawv txais kev tshwm sim. Siv Phau Ntawv Maumoos kom pab tib neeg hnov tus Ntsuj Plig, qhov tseem ceeb kom tus Vaj Ntsuj Plig Dawb Huv ua tim khawv tias phau ntawv no yog Vajtswv txoj lus.

Siv tej nqe hauv Phau Ntawv Maumoos ntau thaum koj qhia. Tej nqe no muaj hwj chim los ntawm tus Vaj Ntsuj Plig Dawb Huv kom pab neeg hloov siab los ntseeg. Thaum koj siv Phau Ntawv Maumoos qhia txoj moo zoo, koj tej lus qhia yuav muaj hwj chim thiab yuav qhia meej rau tib neeg lub siab lub ntsws.

Thawj Tswj Hwm Gordon B. Hinckley qhia tias “cov uas tau thov Vajtswv thaum lawv nyeem [Phau Ntawv Maumoos], tsis hais lawv nplua nuj los sis pluag, tau kawm ntaub kawm ntawv los sis tsis tau kawm los yog, twb tau loj hlob tuaj los ntawm phau no lub hwj chim.” Nws qhia ntxiv hais tias:

“Kuv cog lus rau nej hais tias yog nej yuav thov Vajtswv thaum nej nyeem Phau Ntawv Maumoos, txawm nej twb nyeem pes tsawg zaus lawm los yog, ces tus Tswv tus Ntsuj Plig los yuav muaj ntxiv nyob hauv nej lub siab. Nej yuav haj yam xav ua raws nraim li nws cov lus txib thiab nej yuav paub zoo ntxiv hais tias Vajtswv Leej Tub muaj txoj sia nyob tiag tiag” (“The Power of the Book of Maumoos,” Ensign, Rau Hli Ntuj 1988, 6).

cov tub txib nyeem cov vaj lug kub

Phau Ntawv Maumoos Teb tej Lus Nug ntawm Sab Siab Ntsws

Kev nyeem Phau Ntawv Maumoos thaum tus Ntsuj Plig coj lawv kev yuav pab tib neeg nrhiav tej lus teb los sis tawm tswv yim txog lawv tej lus nug—los sis tej lus nug ntawm sab siab ntsws. Cia li pab tib neeg pom tias Phau Ntawv Maumoos tej lus qhia ua li cas kom teb tej lus nug ntawm lub neej no.

Muaj tej lus nug nyob nram qab no, nrog rau tej nqe hauv Phau Ntawv Maumoos uas hais txog tej lus nug ntawd.

• Puas muaj Vajtswv tiag? Vajtswv yog leej twg? (Mauxiyas 4:9; Amas 18:24–40; 22:4–23; 30:44)

• Vajtswv puas paub kuv thiab hlub kuv? Kuv yuav ua li cas kom paub txog Nws txoj kev hlub? Kuv yuav ua li cas kom muab siab npuab Nws? (2 Nifais 26:24; Mauxiyas 4:9–12; Enos 1:1–12; Amas 18:32; Maulaunais 10:32–33)

• Lub hom phiaj ntawm lub neej no yog dab tsi? (2 Nifais 2:25; Amas 34:32)

• Vim li cas lub neej no nyuaj heev? Kuv yuav ua li cas kom muaj zog txaus thaum raug xwm txheej nyuaj? (1 Nifais 17:3; 2 Nifais 4:20–21; Amas 36:3; Ethaws 12:27)

• Kuv yuav ua li cas kom muaj kev kaj siab hauv lub caij uas muaj kev kub ntxhov (Mauxiyas 24:13–15; Hilamas 5:47)

• Kuv yuav ua li cas kom zoo siab dua? (Mauxiyas 2:41; Amas 22:15–16)

• Kuv yuav ua li cas kom ua ib tug neeg zoo dua? (Mauxiyas 26:30–31; Amas 5:12–13; 7:23–24; Ethaws 12:27)

• Kuv yuav ua li cas kom paub tias Vajtswv tau zam txim pub rau kuv? (Enos 1:2–8; Amas 36:17–21)

• Yuav muaj li cas tom qab kuv tso lub ntiaj teb no tseg? (2 Nifais 9:3–6, 11–13; Amas 11:42–44; 40:11)

Phau Ntawv Maumoos kuj qhia txog tej lus nug tseem ceeb ntxiv thiab, xws li:

• Kuv yuav ua li cas kom kuv tsev neeg muaj zog ntawm sab ntsuj plig? (1 Nifais 1:1; 8:36–38; Mauxiyas 2:5–6; 4:14–15; 3 Nifais 18:21)

• Kuv yuav ua li cas kom pab kuv cov me nyuam muaj zog txaus tiv taus kev ntxias? (1 Nifais 15:23–25; Hilamas 5:12; 3 Nifais 18:15, 18–21, 24–25)

• Qhov uas kuv ua raws li Vajtswv cov lus txib yuav pab kuv li cas kom muaj ib lub neej uas zoo siab thiab huaj vam? (2 Nifais 2:25–28; 4:35; Mauxiyas 2:41; 4 Nifais 1:15–18)

Thawj Tswj Hwm Dallin H. Oaks

“Cov tub txib yuav tsum paub siv Phau Ntawv Maumoos kom teb lawv tej lus nug lawv thiaj li yuav paub siv kom pab lwm tus kawm ua zoo ib yam li ntawd. … Lawv yuav tsum paub ntawm lawv tus kheej txog Phau Ntawv Maumoos lub hwj chim kom qhia txog txoj moo zoo, siv hauv lawv lub neej ua ntej ces qhia ib yam li ntawd rau cov neeg uas lawv qhia” (Dallin H. Oaks, “Counsel for Mission Leaders,” kev sib ntsib rau qhov chaw tshaj tawm txoj moo zoo cov thawj coj tshiab, Rau Hli Ntuj 25, 2022).

Kev Kawm Koj tus Kheej Los Sis Nrog tus Khub

Cia li sau ntawv txog tej lus nug ntawm sab siab ntsws uas koj muaj los sis koj hnov lwm tus hais. Nrhiav tej nqe hauv Phau Ntawv Maumoos uas pab teb tej lus nug no. Sau koj lub tswv yim thiab tej nqe ntawm Phau Ntawv Maumoos hauv koj phau ntawv ceev txog kev kawm. Siv tej lus nug thaum koj qhia.

Phau Ntawv Maumoos thiab Phau Npaivnpaum Nyias Txhawb Nqa Nyias

Tus Tswv hais kom peb “qhia tej ntsiab cai ntawm kuv txoj moo zoo, uas muaj nyob hauv phau Npaivnpaum thiab Phau Ntawv Maumoos, uas yog qhov txhij txhua ntawm txoj moo zoo” (Lus Qhuab Qhia thiab Kev Khi Lus 42:12). Tsoom Haiv Neeg Ntseeg hauv Hnub Nyoog Kawg “ntseeg tias phau Npaivnpaum yog Vajtswv txoj lus npaum li uas tau txhais yog” (Tej Nqe Kev Ntseeg 1:8; kuj saib 1 Nifais 13:29). Phau Npaivnpaum yog cov vaj lug kub dawb ceev. Phau Ntawv Maumoos yog ib phau vaj lug kub dawb ceev uas muaj qhov txhij txhua ntawm Yexus Khetos txoj moo zoo.

Phau Npaivnpaum thiab Phau Ntawv Maumoos ob phau nyias txhawb nqa nyias (saib Exekhees 37:16–17; 1 Nifais 13:40; Maumoos 7:8–9). Ob phau vaj lug kub no yog tej lus qhia uas cov yaj saub puag thaum ub tau sau. Phau Npaivnpaum qhia txog Vajtswv txoj kev ua hauj lwm nrog cov neeg nyob hauv Sab Ntuj Hnub Tuaj rau ntau txhiab xyoos. Phau Ntawv Maumoos qhia txog Vajtswv txoj kev ua hauj lwm nrog cov neeg nyob hauv Amelikas puag thaum ub rau ib txhia xyoos tawm.

ib tug neeg kos xim rau ib nqe vaj lug kub

Qhov tseem ceeb tshaj plaws, phau Npaivnpaum thiab Phau Ntawv Maumoos nyias txhawb nqa nyias ua tim khawv txog Yexus Khetos. Phau Npaivnpaum sau ib zaj lus txog tus Cawm Seej txoj kev yug los, txoj hauj lwm qhuab qhia hauv lub ntiaj teb, thiab txoj Kev Theej Txhoj—tsis hais Nws txoj kev tuag thiab txoj Kev Sawv Rov Los. Phau Ntawv Maumoos muaj cov yaj saub tej lus qhia tej yuav muaj los yav tom ntej txog tus Cawm Seej txoj kev yug los thiab ntiag tug hauj lwm, tej lus qhia txog Nws txoj Kev Theej Txhoj, thiab zaj lus txog Nws txoj hauj lwm qhuab qhia hauv Amelikas. Phau Ntawv Maumoos pom zoo rau zaj lus hauv phau Npaivnpaum thiab ua tim khawv ntxiv hais tias Yexus yog Vajtswv Tib leeg Tub thiab tus Cawm Seej ntawm neeg ntiaj teb.

Phau Npaivnpaum thiab Phau Ntawv Maumoos ob phau no qhia txog txoj kev cai ntawm tej zaj lus tim khawv: “Yuav tsum yog ob leeg los sis peb leeg ua tim khawv thiaj tseeb” (2 Kauleethaus 13:1; kuj saib 2 Nifais 11:2–3). Raws li txoj kev cai no qhia, ob phau vaj lug kub ua tim khawv txog Yexus Khetos (saib 2 Nifais 29:8).

Kev Kawm Koj tus Kheej Los Sis Nrog tus Khub

Nrhiav tej nqe txog tej ntsiab lus no nyob hauv Phau Ntawv Maumoos thiab phau Npaivnpaum. Muaj tej nqe nyob hauv ob tug thaiv tej lus tom qab txhua ntsiab lus. Cia li sau lwm lub ntsiab lus thiab tej nqe vaj lug kub thiab.

• Cov yaj saub (Yakhauj 4:4–6; Amaus 3:7)

• Txoj kev tso qhov tseeb tseg (2 Nifais 28; 2 Timautes 4:3–4)

• Kev muab txoj moo zoo txum tim rov qab los (1 Nifais 13:34–42; Tes Hauj Lwm 3:19–21)

• Peb txhua tus yog Vajtswv cov me nyuam (1 Nifais 17:36; Tes Hauj Lwm 17:29)

Pab Tib Neeg Nyeem thiab To Taub Phau Ntawv Maumoos

Cov uas tsis nyeem thiab tsis to taub Phau Ntawv Maumoos mas yuav nyuaj rau lawv txais ib zaj lus tim khawv tias phau no muaj tseeb. Koj pab tau lawv to taub phau ntawv no thaum koj nrog lawv nyeem ntawv. Cia li nyeem nyob hauv lub sij hawm uas tau teem tseg qhia lawv, thaum rov qab mus xyuas lawv, los sis siv txuj ci technology ua. Koj kuj npaj tau kom cov mej zeej nrog lawv nyeem ntawv thiab. Kev saib ib qho vidi-aus txog Phau Ntawv Maumoos ces kev nyeem tej tshooj yeej pab tau thiab.

Thov Vajtswv kom pab koj xaiv tej nqe uas pab tau tib neeg tej kev txhawj xeeb thiab tej kev xav tau. Nyeem thiab sib tham txog tej nqe vaj lug kub tsis ntev, xws li 1 Nifais 3:7 los sis Mauxiyas 2:17. Cia li nyeem thiab sib tham txog tej nqe vaj lug kub los sis tej tshooj uas ntev zog thiab, xws li 2 Nifais 31, Amas 7, los sis 3 Nifais 18. Yaum kom tib neeg nyeem Phau Ntawv Maumoos txij ntawm qhov pib mus, tsis hais tej zaj lus tim khawv ntawm Peb tug Tim Khawv thiab Yim tus Tim Khawv thiab Tus Yaj Saub Joseph Smith zaj lus tim khawv.

hnub caiv kev kawm vaj lug kub

Xav txog tej lub tswv yim nram qab no thaum koj nrog tib neeg nyeem Phau Ntawv Maumoos:

• Thov Vajtswv ua ntej nej nyeem. Thov kom txais kev pab to taub. Thov kom tus Vaj Ntsuj Plig Dawb Huv yuav ua tim khawv rau lawv tias phau no muaj tseeb.

• Hais kom ib leeg nyeem zuj zus. Nyeem nrawm npaum li lawv nyiam xwb. Piav txog tej lus los sis kab lus uas tsis paub zoo.

• Tej lub sij hawm nres kom sib tham txog tej yam uas nej nyeem.

• Piav txog tej xwm txheej ntawm ib nqe los sis zaj lus, xws li leej twg yog tus hais, tus neeg ntawd zoo li cas, thiab nws muaj xwm txheej dab tsi. Yog tias muaj ib qho vidi-aus txog Phau Ntawv Maumoos ntawm tej nqe uas nej nyeem, xav seb puas qhib rau lawv saib.

• Qhia txog tej ntsiab lus los sis cov lus qhuab qhia ua ntej nej nyeem.

• Ua tim khawv thiab qhia txog tej lub tswv yim, tej kev xav, thiab tej xwm uas tau los rau koj tus kheej.

• Cia li qhia cov lus qhuab qhia ncaj qha ntawm cov yaj saub hauv Phau Ntawv Maumoos tej lus. Qhov no yuav pab tib neeg hnov qhov uas phau no muaj hwj chim ntawm sab ntsuj plig.

• Pab tib neeg muab tej yam uas lawv nyeem “piv rau” lawv lub neej (1 Nifais 19:23). Pab lawv pom tias cov vaj lug kub muaj nqis rau lawv tus kheej.

Thaum koj siv tej lub ntsiab cai no, koj yuav pab tib neeg txawj nyeem thiab xav nyeem Phau Ntawv Maumoos lawv tus kheej. Qhia tias kev nyeem Phau Ntawv Maumoos txhua hnub yog qhov tseem ceeb kom pab ib tug neeg xav ua kev cai raus dej thiab hloov siab los ntseeg tas mus li.

Tso siab rau cov lus cog tseg nyob hauv Maulaunais 10:3–5. Cia li yaum kom tib neeg rau siab nyeem Phau Ntawv Maumoos thiab mob siab thov Vajtswv tiag tiag kom paub tias phau no muaj tseeb. Piav hais tias kev mob siab tiag txhais tias lawv txaus siab ua raws li tej lus uas lawv teb dhau los ntawm tus Vaj Ntsuj Plig Dawb Huv. Txhua tus neeg uas rau siab nyeem thiab mob siab thov Vajtswv txog Phau Ntawv Maumoos yuav paub los ntawm tus Vaj Ntsuj Plig Dawb Huv lub hwj chim tias phau no muaj tseeb.

Koj kuj yuav tsum ua raws li cov lus cog tseg kom txhawb koj zaj lus tim khawv lub zog txog Phau Ntawv Maumoos. Koj zaj lus tim khawv yuav ua rau koj ntseeg tias cov neeg uas ua raws li cov lus cog tseg no yuav txais ib zaj lus tim khawv hais tias phau no yog Vajtswv txoj lus.

Siv Phau Ntawv Maumoos Thaum Ua Txhua Yam ntawm Koj txoj Hauj Lwm

Phau Ntawv Maumoos muaj hwj chim heev pab neeg hloov siab los ntseeg. Cia li siv phau no kom qhia tej lus tseeb uas tau muab txum tim rov qab los. Thawj Tswj Hwm Russell M. Nelson hais tias:

“Muaj ib qho hwj chim los thaum Vajtswv ib tug me nyuam nrhiav kom paub ntxiv txog Vajtswv thiab Nws Leej Tub. Tsis muaj lwm phau ntawv uas qhia tej qhov tseeb no uas meej meej thiab muaj hwj chim ntau tshaj Phau Ntawv Maumoos. …

“Thaum kuv xav txog Phau Ntawv Maumoos, kuv xav txog lo lus hwj chim. Tej qhov tseeb hauv Phau Ntawv Maumoos muaj lub hwj chim kho peb lub neej, nplij peb lub siab, coj peb rov qab los, txhawb nqa peb, ntxiv zog rau peb, ua rau peb zoo siab, thiab ua rau peb nyob kaj siab lug” (“Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?” 61, 62).

Thaum koj nrog tib neeg nyeem Phau Ntawv Maumoos, cia li hais lus tim khawv txog lub hwj chim ntawm sab ntsuj plig uas koj hnov thaum koj nyeem. Cia li qhia txog qhov uas phau no zaj lus tim khawv txog Yexus Khetos thiab Nws txoj Kev Theej Txhoj tseem ceeb npaum li cas. Qhia txog tej nqe uas yuav pab tib neeg hnov lawv tus Cawm Seej txoj kev hlub. Pab lawv pom tias lawv yuav ua li cas kom paub tus Cawm Seej zoo dua nyob hauv phau no.

Cia li nyeem tej nqe uas yuav txhawb nqa tib neeg thiab txhawb lawv lub dag zog. Tsom ntsoov rau tej yam uas lawv xav tau. Hais txog tej lus piv txwv txog qhov uas tej lus qhia hauv Phau Ntawv Maumoos muaj nqis rau peb lub neej hnub no.

Nco Ntsoov txog Qhov No

• Phau Ntawv Maumoos yog lub plawv zeb ntawm peb txoj kev ua tim khawv txog Yexus Khetos, peb cov lus qhuab qhia, thiab peb zaj lus tim khawv.

• Phau Ntawv Maumoos qhia meej txog cov lus qhuab qhia hauv cov tub txib tej zaj lus qhia.

• Phau Ntawv Maumoos teb tej lus nug ntawm sab siab ntsws.

• Cia li nrog cov neeg uas koj qhia nyeem Phau Ntawv Maumoos txhua lub sij hawm. Pab lawv nyeem lawv tus kheej txhua hnub thiab ua raws li tej yam uas lawv kawm.

• Tso siab rau tus Tswv cov lus cog tseg tias txhua tus uas mob siab nyeem thiab thov Vajtswv txog Phau Ntawv Maumoos yuav paub tias phau ntawv no muaj tseeb dhau los ntawm tus Vaj Ntsuj Plig Dawb Huv lub hwj chim.

---

Tej lub Tswv Yim rau Kev Kawm Ntawv thiab Kev Siv

Kev Kawm Ntawv Koj tus Kheej

• Cia li nyeem 2 Nifais 2; 9; 30; 31; 32. Kos xim rau txhua nqe uas hais txog Yexus Khetos. Sau tej npe rau Yexus Khetos uas siv nyob hauv tej tshooj no. Sau lub cim rau tej lus uas Nws tau hais. Kos xim rau Nws tej cwj pwm thiab tej yam Nws tau ua.

• Thaum nyeem Phau Ntawv Maumoos txhua hnub, sau ntawv hauv koj phau ntawv ceev txog kev kawm txog tej zaj lus uas muaj nqis tshwj xeeb rau koj. Sau ntawv txog qhov uas koj yuav ua raws li tej lus ntawd hauv koj lub neej.

• Sau ntawv hauv koj phau ntawv ceev txog kev kawm txog qhov uas koj xav li cas thaum tus Ntsuj Plig tau ua tim khawv rau koj tias Phau Ntawv Maumoos muaj tseeb.

• Sau ntawv kom teb peb lo lus nug no hauv koj phau ntawv ceev txog kev kawm. Thaum koj ua tub txib, sau ntxiv kom teb tej lus nug no.

  • Kuv lub neej yuav zoo li cas yog tias tsis muaj Phau Ntawv Maumoos?

  • Kuv yuav tsis paub dab tsi yog tsis muaj Phau Ntawv Maumoos?

  • Kuv yuav tsis muaj dab tsi yog tsis muaj Phau Ntawv Maumoos?

• Cia li nyeem Zaj Lus Qhia Pem Roob nyob hauv Mathais 5–7 thiab Yexus Khetos zaj lus qhia nyob ntawm lub tuam tsev nyob hauv 3 Nifais 12–14. Qhov uas koj nyeem tej nqe no ua ke pab koj li cas kom to taub tus Cawm Seej tej lus qhia zoo dua?

• Cia li kawm txhua zaus nyob hauv Phau Ntawv Maumoos uas ib tug neeg thov Vajtswv. Nyob hauv koj phau ntawv ceev txog kev kawm, cia li sau txog tej yam uas koj kawm los ntawm Phau Ntawv Maumoos txog kev thov Vajtswv.

• Los ntawm tej zaj lus piav txog tej tshooj Mauxiyas 11–16, sau ntsiab lus txog tej yam uas Anpinadais qhia. Ces nyeem tej tshooj no thiab sau ntxiv rau koj zaj ntsiab lus.

• Los ntawm tej zaj lus piav txog tej tshooj Mauxiyas 2–5, sau ntsiab lus txog tej yam uas Vaj Ntxwv Npeyamis qhia. Ces nyeem tej tshooj no thiab sau ntxiv rau koj zaj ntsiab lus.

Kev Kawm Ntawv Nrog tus Khub thiab Kev Sib Pauv Khub

• Nyeem tej nqe los ntawm Phau Ntawv Maumoos ua ke. Qhia tias neb tau kawm dab tsi thiab hnov dab tsi. Sib tham txog qhov uas neb yuav ua li cas kom ua raws li tej yam uas neb kawm.

• Nyeem Amas 26 thiab 29 ua ke. Qhia tias neb xav li cas txog neb ntiag tug hauj lwm ua ib tug tub txib. Sau tias neb tau teb li cas nyob hauv neb phau ntawv ceev txog kev kawm.

• Cia li nyeem Amas 37:9 thiab sib tham txog qhov uas cov vaj lug kub muaj nqis npaum li cas rau Amoos thiab cov uas nrog nws ua tub txib. Nrhiav tej nqe uas piav tias lawv tau siv cov vaj lug kub li cas.

• Nyeem Amas 11–14, es ib tug hais tej uas Amas los sis Amulej hais thiab ib tug hais tej yam uas cov yeeb ncuab hais. Sib tham seb cov tub txib no tau ua li cas kom teb tej lus nug nyuaj heev.

Koog Chaw Pawg Sab Laj, Thaj Chaw tej Rooj Sab Laj, thiab Qhov Chaw Tshaj Tawm Txoj Moo Zoo cov Thawj Coj Pawg Sab Laj

• Xyaum siv Phau Ntawv Maumoos raws li tej kev uas hais nyob hauv tej ntsiab lus ntawm tshooj no.

• Sau tej lus nug uas cov neeg uas nej qhia hais. Piav seb nej yuav ua li cas kom siv Phau Ntawv Maumoos thiaj teb tau tej lus nug no.

• Nyeem tej nqe los ntawm Phau Ntawv Maumoos ua ke. Qhia txog tej yam uas nej kawm, xav, thiab hais lus tim khawv.

• Xyaum siv Phau Ntawv Maumoos kom pom zoo rau zaj lus qhia ntawm Kev Muab Txoj Moo Zoo Txum Tim Rov Qab Los.

• Caw cov tub txib qhia tej lub sij hawm thaum Phau Ntawv Maumoos tau pab lawv thiab cov uas lawv qhia kom hloov siab los ntseeg.

• Cia cov tub txib qhia ib nqe vaj lug kub los ntawm Phau Ntawv Maumoos uas tau pab lawv teb ib lo lus nug ntawm sab siab ntsws.

• Caw ib tug mej zeej kom qhia tias Phau Ntawv Maumoos tau pab nws li cas thaum nws hloov siab los ntseeg.

Qhov Chaw Tshaj Tawm Txoj Moo Zoo cov Thawj Coj thiab Qhov Chaw Tshaj Tawm Txoj Moo Zoo cov Pab Cuam

• Qhia cov tub txib kom paub siv Phau Ntawv Maumoos pom zoo rau qhov tseeb ntawm txoj Kev Muab Txoj Moo Zoo Txum Tim Rov Qab Los.

• Nyeem 1 Nifais 1 nrog cov tub txib ua ke thiab muab piv rau Joseph Smith zaj lus.

• Muab ib Phau Ntawv Maumoos tshiab rau txhua tus tub txib. Caw lawv nyeem thiab sau lub cim rau hauv phau ntawv ntawd ob zaug ua ntej txog ob peb zaug uas yuav pauv chaw.

  • Thaum nyeem zaum thib ib, hais kom lawv sau lub cim txog txhua yam uas qhia txog los sis ua tim khawv txog Yexus Khetos.

  • Thaum nyeem zaum thib ob, hais kom lawv sau lub cim rau txoj moo zoo cov lus qhuab qhia thiab tej ntsiab cai.

  Cia li hais kom cov tub txib qhia tias lawv tau kawm thiab hnov dab tsi. Txwj Laug Ronald A. Rasband piav tias kev nyeem Phau Ntawv Maumoos zoo li no tau hloov nws txoj kev ua ib tug tub txib:

Txwj Laug Ronald A. Rasband

“Kuv txoj kev nyeem tsis yog kom kuv khij cov vaj lug kub xwb. Txhua zaus kuv nyeem Phau Ntawv Maumoos, ua rau kuv haj yam hlub tus Tswv. Kuv hnov hauv kuv lub siab tias Nws tej lus qhia muaj tseeb thiab muaj nqis rau “hnub no.” Phau no yeej phim lub npe, ‘Ib Zaj Lus Tim Khawv Ntxiv txog Yexus Khetos.’ Vim kuv tau kawm thiab txais kev tshoov siab los ntawm tus Ntsuj Plig li ntawd, kuv tau ua ib tug tub txib uas siv Phau Ntawv Maumoos thiab Yexus Khetos ib tug thwj tim” (“Hnub No,” Liyahaunas, Kaum Ib Hlis Ntuj 2022, 25).

• Caw cov tub txib kom qhia koj txog tej nqe hauv Phau Ntawv Maumoos uas tseem ceeb rau lawv lub neej.

• Kawm txog tej lus nug ntawm sab siab ntsws rau cov neeg nyob hauv koj qhov chaw tshaj tawm txoj moo zoo. Caw cov tub txib nrhiav tej nqe hauv Phau Ntawv Maumoos uas pab teb tej lus nug no.