Jebta 2: Pukot Jeje ko Rekwojarjar im Kōņak Kein Tariņae an Anij
“Jebta 2: Pukot Jeje ko Rekwojarjar im Kōņak Kein Tariņae an Anij,” Kwaļo̧k Gospel eo Aō: Juon Unin Tōl n̄an Leto Letak Gosepel eo an Jisōs Kraist (2023)
“Pukot Jeje ko Rekwojarjar im Kōņak Kein Tariņae an Anij,” Kwaļo̧k Gospel eo Aō
Pija
Josep Smith ej Kappukōt Mālōtlōt ilo Baibōļ eo, jān Dale Kilbourn.
Jepba 2
Pukot Jeje ko Rekwojarjar im Kōņak Kein Tariņae an Anij
Ļōmņak kōn Menin
Etke ej aorōk n̄an jab m̧ūjkōk ekaktak naan an Anij ilo jeje ko rekwojarjar?
Ekōjkan aō maron̄ kōm̧m̧an bwe ekkatak jeje ko rekwojarjar aō en wejepedikļo̧k?
Jisōs Kraist “ej mour im meram an laļ. Lo, E ej naan in m̧ool eo im weeppān” (Alma 38:9; lale barāinwōt Jon 1). Ekkatak naan an Anij ilo jeje ko rekwojarjar enaaj bōktok bun̄ļo̧k n̄an mour eo am̧ (lale Jon 10:10). Naan ko an renaaj kobrak eok—im ro kwoj katakin—kōn meram im m̧ool. Renaaj jipan̄ eok—im ro kwoj katakin—mour jim̧we im bōk kōjparok im kōkajoor eo ekwojarjar. Renaaj jipan̄ eok itok n̄an jeļā E im edjon̄e iakwe eo An, eo etōn̄al ilōn̄ in aolep tōn̄al. Naan ko An renaaj kobrak am̧ kōn lan̄lōn̄ (1 Nipai 8:11–12; lale eoon ko 1–34).
Jeje ko rekwojarjar rej juon menin letok in lan̄. Juon iaan kōjeraam̧man ko reļļap ilo mijen eo am̧ ej an lōn̄ am̧ iien jikejuuļi n̄an ekkatak kaki aolep raan.
Ekkatak gospel eo ej juon iaan jinikjej ko an kain jerbal in jetōb eo kwomaron̄ kōm̧m̧ane. Ej lewaj kajoor jim̧or ilo kōļmenļo̧kjeņ im jetōb. Āinwōt an Alma kar katain, n̄e kwoj “kalbwin” naan eo an Anij ilo būruōm̧, enaaj “kōmeramļo̧k [am̧] meļeļe” im jino kaijoļjoļ n̄an eok (Alma 32:28; lale barāinwōt Inōs 1:3–4). Ilo am̧ wōnm̧aanļo̧k n̄an ekkatak im kōjerbal naan eo an Anij, “le okran; im … juon wōjke ej eddekļo̧k n̄an mour ejjeļo̧k jem̧ļo̧kin” (Alma 32:41; lale barāinwōt eoon ko 42–43). Jeļā eo am̧ im naan in kam̧ool eo kōn gospel in enaaj ļapļo̧k. Ikdeelel eo am̧ im maron̄ eo n̄an leto letak gospel eo enaaj barāinwōt ļapļo̧k.
Katak jān juon rūkaki em̧m̧an eaorōk, bōtaab ej barāinwōt aorōk n̄an kwe n̄an an wōr am iminene n̄an katak eo eļap meļeļe jān ekkatak jeje ko rekowjarjar eo am̧ make. Menin ej barāinwōt m̧ool n̄an armej ro kwoj katakin.
Meļeļe jeje ko rekwojarjar emaron̄ in pen ilo jinoin. Ijoke, ilo am̧ kijenmej jab bōjrak in ekkatak naan eo an Anij, meļeļe eo am̧ enaaj eddōkļo̧k. Kwonaaj itok n̄an kaorōk iien eo am̧ ippān jeje ko rekwojarjar. Kwonaaj kijooror ilo reim̧aanļo̧k n̄an ta eo kwonaaj katak im en̄jake.
Itok n̄an jeļā im iakwe jeje ko rekwojarjar emaron̄ in juon kōjeraam̧m̧an eļap to̧o̧n wōt am̧ mour jān jerbal in mijenede eo am̧. Ilo am̧ en̄jake kōjeraam̧m̧an ko an ekkatak jeje ko rekwojarjar ilo iien mijen eo am̧, kwonaaj kōņaan wōnm̧aanļo̧k wōt ilo aolepān mour eo am̧.
Pija
Elder D. Todd Christofferson
“Dilepān jibadbad eo an aolep jeje ko rekwojarjar ej n̄an koobrak jetōb ko ad kōn tōmak ilo Anij Jemen im ilo Nejin, Jisōs Kraist—tōmak bwe Rej mour; tōmak ilo karōk eo an Jemed kōn mour jab wabanban eo ad im mour indeeo; tōmak ilo Pinmuur eo im Jerkakpeje eo an Jisōs Kraist, eo ej bōktok karōn in m̧ōņōņō in; tōmak n̄an kōm̧m̧an bwe gospel eo an Jisōs Kraist ej iaļ in mour eo ad; im tōmak n̄an itok n̄an jeļā ‘e wōt Anij em̧ool, im Jisōs Kraist, eo [E ekar] jilkintok’ (John 17:3)” (D. Todd Christofferson, “The Blessing of Scripture,” Liahona, May 2010, 34).
Ekkatak Am̧ Make
Lale pija eo an Josep Smith ilo jinoin jebta in. Riiti Josep Smith—Bwebwenato 1:11–13. Uwaaki kajjitōk kein ilo jōnōļ in ekkatak eo am̧.
Ekōjkan an Josep Smith riit im kejekļo̧kjeņ kōn Jemes 1:5 tōlļo̧k e n̄an bōk revelesōn eo?
Ta kareel eo an ekkatak eo an ewōr an ippān diktak in epepen ko ilju im jekļaj?
Ta jelet eo jokāālet eo an n̄an ekkatak im kappukōt ewōr an ilo mour eo am̧?
Ekōjkan an ekkatak gospel eo am̧ kar kareel mour eo am̧ im mour ko an ro jet?
Ekkatak Jeje ko Rekwojarjar
Ta eo kwomaron̄ katak jān eoon kein kōn ekōjkan kōnono kōn ekkatak gospel eo?
Katak gospel eo eļapļo̧k jān bōk meļeļe ko. Ej barāinwōt juon jekjek ilo jetōb kōn kōjerbal m̧ool eo indeeo ium̧win tōl eo an Jetōb Kwojarjar Jekab 4:8; Katak im Bujen Ko 50:19–25). Kappukōt im lōke Jetōb eo n̄an katakin eok ilo am̧ ekkatak jeje ko rekwojarjar. Menin enaaj waļo̧k n̄an jon̄an eo me kwonaaj keidi jeje ko rekwojarjar n̄an kwe make kōn lukkuun kōttōpar n̄an jerbale ta eo kwoj katak (lale 1 Nipai 19:23; Moronai 10:4; Josep Smith—Bwebwenato 1:18).
Jar ilo ekkatak jeje ko rekwojarjar naaj kōpeļļo̧k wintō in revelesōn n̄an an Jetōb eo kōnono n̄an ļōmņak eo am̧ im būruōm̧. E enaaj kōjeraam̧m̧an eok kōn tōl, im̧we, im uwaaki kajjitōk ko am̧. Jān am̧ ekkatak jeje ko rekwojarjar, Jetōb Kwojarjar enaaj kōkajoorļo̧k im kaenōm̧m̧an eok. E enaaj lewaj n̄an eok jeļā eo im lōke eo bwe enaaj kōjeraam̧m̧an mour eo am̧ im kōmaron̄ eok n̄an kōjeraam̧m̧an ro jet indeeo.
Ekkatak Jeje ko Rekwojarjar
Ta jerbal eo an Jetōb Kwojarjar n̄an jipan̄ juon armej katak gospel eo?
Āinwōt juon mijenede, kwonaaj ron̄ elōn̄ kajjitōk ko. Enaaj barāinwōt wōr am̧ make kajjitōk ko. Etale jeje ko rekwojarjar im kein jipan̄ ko jet kar kōmālim n̄an uwaaki kajjitōk kein ej juon wāween ekajoor n̄an ekkatak. Ļo̧o̧ki kajjitōk ko im ta eo kwoj katak im en̄jake ilo jōnōļ in ekkatak eo am̧.
Kōjerbal kein jipan̄ ko rejetjet, kōjatdikdik kaki ilo ekkatak eo am̧—eļap tata jeje ko rekwojarjar, naan ko an rikanaan ro remour, im Kwaļo̧k Gospel eo Aō. Kōjerbal kein ijpan̄ kein ilo Gospel Library, ko āinwōt Unin Tōl eo n̄an Jeje Ko Rekwōjarjar, Bible Dictionary, index eo n̄an triple combination, Gospel Topics, im Gospel Topics essays. Katak ewi wōt kein jipan̄ ko ewōr ilo kajin ko an armej ro kwoj katakin.
Pija
Būreejtōn M. Russell Ballard
“Juon men ikar katak ilo mour ej ewi emakijkij an Irooj uwaaki kajjitōk ko ad im letok n̄an kōj kapilōk kōn jeje ko rekwojarjar. … Innām jen ilo̧k n̄an Irooj ilo jar, akweļap kōn jipan̄ ak uwaak ko; im uwaak ko renaaj itok ilo ad kōpeļļo̧k jeje ko rekwojarjar im jino ekkatak kaki. Jet iien ej āinwōt men̄e juon eoon buki ak taujin iiō dettan ekar ba eļap tata n̄an uwaake kajjitōk eo ad” (M. Russell Ballard, “Be Strong in the Lord, and in the Power of His Might” [Brigham Young University fireside, Mar. 3, 2002], 5, speeches.byu.edu).
Mour kōn Ta eo Kwoj Katak
Ilo am̧ en̄jake lan̄lōn̄ eo me ej itok eddōkļo̧k eo ilo meļeļe gospel eo, kwonaaj kōņaan kōjerbal ta eo kwoj katak. Kajjieon̄ in mour jokkun wōt juon ippān ta eo kwoj katak. Kōm̧m̧ane āindein enaaj kōkajoorļo̧k tōmak, jeļā, im naan in kam̧ool eo am̧. Jerbale ta eo kwoj katak enaaj bōktok eļapļo̧k im kijin̄en̄e meļeļe. (Lale Jon 7:17.)
Pija
Būreejtōn Boyd K. Packer
“Katak eo em̧ool, emeļeļe, ej ukōt m̧wil ko im m̧anit ko. Katak kake katak ko ilo gospel in enaaj mōkaj an kōkōm̧anm̧anļo̧k m̧wil jen ekkatak kōn mwil enaaj kōkōm̧anm̧anļo̧k iminene” (Boyd K. Packer, “Little Children,” Ensign, Nov. 1986, 17).
Gospel Library eo ej juon kein jipan̄ ilo online me emaron̄ kanooj kōkōm̧anm̧anļo̧k ekkatak im katakin eo am̧. Jeļā kōn men ko rellōn̄ ie. Jet jeraam̧m̧an ko kōn kōjerbal Gospel Library eo āinwōt m̧ōttan ekkatak im katakin ko am̧ rej ellaajrak itulaļ.
Ej lewaj n̄an eok maron̄ eo n̄an jeje ko rekwojarjar, naanko an rikanaan ro remour, im men ko jet an Kabun̄ in ilo elōn̄ kajin ko ilo jekjek ko ilo jeje, kein ron̄jake, im kein alooj ko.
Eļan̄n̄e kwoj rekoote ilo Gospel Library ta eo kwoj katak im im̧we ko kwoj kwar būki, kwomaron̄ wōnm̧aanļo̧k wōt in deļo̧n̄i im kōkajoorļo̧k kōn meļeļe jab eo ālkin mijen eo am̧.
Ej kōtļo̧k an pidodo am̧ kwaļo̧k jeje ko rekwojarjar, kout ko jān rikanaan ro remour, im pija in alooj ko ippān ro kwoj katakin.
Elōn̄ wōt iaan armej ro kwoj katkain im peptaij renaaj kōjerbal Gospel Library eo n̄an deļo̧n̄e kein jipan̄ ko an Kabun̄ in. Kwoj jeļā kōn m̧ōttan ko an Gospel Library eo bwe kwon maron̄ jipan̄ er katak n̄an kōjerbale.
Ekkatak Am̧ Make
Etale “Gospel Library User Guide eo.” Kāālet juon m̧ōttan ilo Gospel Library eo n̄an kajjieon̄ ilo ekkatak eo am̧ make im ippān eo m̧ōttam̧. Ekōjkan an m̧ōttan in kar jipan̄ eok kōn ekkatak eo am̧? Ta eo kwonaaj kōm̧m̧ane iien eo tok juon? Katakin mijenede ro jet ta eo kwoj katak.
Kōjerbal Technology Ilo Jim̧we
Irooj im rikanaan ro An raar lōke eok kōn technology n̄an jipan̄ kadedeļo̧k jerbal eo An. Technology emaron̄ kōkōm̧anm̧anļo̧k ekkatak eo am̧ kōn jeje ko rekwojarjar im Kwaļo̧k Gospel eo Aō. Kein jipan̄ ko ilo digital remaron̄ barāinwōt jipan̄ eok karōk. Remaron̄ jipan̄ ilo am̧ katakin im ilo kijejeto ko am̧ n̄an pukōt armej ro n̄an katakin.
Kōjerbal technology ilo mālōtlōt im jim̧we emaron̄ jipan̄ eok kakūrm̧ool jibadbad in mijenede eo am̧ im wejepedik kōjerbal iien. Emaron̄ barāinwōt jipan̄ eok joļo̧ men ko rejjab jetjet.
Ļoor Jetōb eo kōn n̄āāt im ekōjkan kōjerbal technology ilo wāween ko me renaaj jipan̄ kōkajoorļo̧k tōmak eo am̧ ilo Jisōs Kraist im tōmak eo an ro kwoj jerbal im katakin er.
Ļoor Kein Bōbrae ko kōn Kōjerbal Technology
Kein bōbrae ko emen rej ellaajrak itulaļ renaaj jipan̄ eok kōjerbal technology ilo jetjet. Ļoor kein bōbrae kein ej juon wāween aorōk n̄an eok n̄an “kōņak aolepen kein tariņae an Anij, bwe kom̧win maron̄ in jutak ņae etao ko an tepiļ” (Epesōs 6:11).
Pād Wōt ilo Im̧we ko an Jetōb
Nipai ekar kallim̧ur, “Bwe n̄e kom̧ naaj deļo̧n̄ ilo iaļ eo, im bōk Jetōb Kwōjarjar, enaaj kwaļo̧k n̄an kom̧ aolep men ko kom̧ij aikuj kōm̧m̧an” (2 Nipai 32:5). Jemedwōj Ilan̄ ekar lewaj n̄an eok ruo menin letok ko rekajoor me renaaj jipan̄ eok: anemkwoj in kāālet im menin letok eo an Jetōb Kwojarjar. Ewōr ippam̧ kajoor eo n̄an kāālet n̄an ļoor tōl eo an Jetōb Kwojarjar. An tōl ej aorōk ilo jipan̄ eok kōm̧m̧an em̧m̧an ilo am̧ kōjerbal technology. Ej barāinwōt jipan̄ kōjparok eok jān nana.
Mije Wōt Jibadbad in Mijenede eo Am̧
Im Irooj eaar ba, “Bwe eļan̄n̄e mājāmi rej reim̧aanļo̧k wōt n̄an aiboojoj eo Aō, aolepān ānbwinnōmi renaaj obrak kōn meram, im enaaj ejjeļo̧k marok ilo kom̧; im ānbwin eo eobrak kōn meram emeļeļe aolep men otemjeļo̧k” (Katak im Bujen ko 88:67). N̄an kōm̧m̧an bwe mejam̧ en reim̧aanļo̧k wōt n̄an aiboojoj eo an Anij ej meļeļe in kōm̧m̧an bwe am kalimjōk en lukkuun ilo jibabd eo an Anij, eo ej barāinwōt jibadbad eo am̧ āinwōt juon mijenede.
Am̧ kōjerbal technology ej aikuj in delepān jibadbad eo am̧, Kōjo̧ device eo nejum̧ wōt ālkin am̧ kar kile jibadbad eo an mijenede eo kwonaaj kōjerbale. Innām kune n̄e jibadbad jab eo ej dedeļo̧k.
Kwonaaj bōlen ioon men rejjab ekkar ilo internet n̄e kwoj bajjōk etale web eo ilo ejjeļo̧k juon un ilo ļōmņak.
Pija
mijenede ro rej kalimjōk talboon eo
Kwon Kauwe Eok Make
Mormon ekar je: “Lo, n̄aij rikaļooran Jisōs Kraist, eo Nejin Anij. Iaar bōk kūr jān E n̄an kwaļo̧k naan eo An ilubwiljin armej ro An, bwe ren maron̄ bōk mour indeeo” (3 Nipai 5:13). Āinļo̧k wōt Mormon, kwoj juon rikaļoor an Kraist. Jerbal āinwōt juon mijenede ej jerbal aolep-iien ej juon iien em̧m̧an ejenolo̧k n̄an kam̧wilaļļo̧k rikaļoor eo am̧.
Naan ko rikaļoor (disciple) im kauwe (discipline) rej itok jān juon wōt naan me ej meļeļe in “ rikkatak (learner)” ak “katak (pupil).” N̄an erom juon rikaļoor an Kraist ej meļeļe bwe kwon pukōt n̄an ļoor E im kōjparok kein ko An. Ej meļeļe in bwe ejjab bōjrak am̧ katak im katakin kōn Kraist.
Kauwe im kōm̧m̧ani kāālet ko rejim̧we kōn ekōjkan am̧ kōjerbal technology. Kāālet n̄an ļoor kein bōbrae ko. N̄e kwoj jelm̧ae armej māj n̄an māj, jab lali mājej ak call ko. Bōk eddo in wāween am̧ kōjerbla devise kein. Jab kōtļo̧k bwe kein jerbal kein ren kantōroole eok.
Irooj ekar kean̄, “E eo ej bōk kien eo Aō im kōm̧m̧an e, ejja in wōt ej Aō rikaļoor; im e eo ej ba bwe ej bōk e im jab kōm̧m̧an e, ejja in wōt ej jab Aō rikaļoor” (Katak im Bujen Ko 41:5). Ilo an ejjeļo̧k juon eweppān, Irooj ej kōtmene kijejeto eo jokkun wōt juon, kūttare n̄an ļoor E.
Aiboojoj eo an gospel eo ej bwe maron̄ jeorļo̧k ad bōd ilo ad ukweļo̧k—im Irooj ej kōņaan bwe jen ukweļo̧k ilo jab karum̧wijļo̧k (lale Katak im Bujen Ko 109:21). Eļan̄n̄e kwoj kōm̧m̧ane juon bōd, ekoba kōjerbal technology ilo jab jetjet, ukweļo̧k ilo iien eo wōt im kajjieon̄ mour kōn kien eo An. En̄in ej m̧ōttan erom juon rikaļoor an Kraist.
Erom Juon Wōt
Irooj ekar ba, “kom̧in juon; im eļan̄n̄e kom̧ij jab juon kom̧ij jab Aō” (Katak im Bujen Ko 38:27). Jipan̄ mijen eo am̧ ejake juon matin bōro kuk, lōke, bōk eddo in, im meanwōd bwe kwon maron̄ kōkajoorļo̧k im rie doon.
Aolep mijenede ro rej aikuj en̄jake ineem̧m̧an kajjitōk kōn jipan̄ n̄e aikuj. Juon mijenede eo me ekajoor ilo Jetōb emaron̄ jipan̄ juon eo ej en̄jake m̧ōjņo (lale Katak im Bujen Ko 84:106). Eļan̄n̄e kwoj en̄jake kapo, kajjitōk ippān eo m̧ōttam̧ ak ritōl an mijen kōn jipan̄.
Enan̄in aolep apan̄ ko rej iookļo̧k intōrnet ak kōn pija nana ko rej waļo̧k ilo am̧ makeļo̧k. Kōjerbal device ko wōt n̄e kwomaron̄ lo an doon screen. Kwon peran im bōk eddo n̄an doon.
Ewōr an Irooj lōke ilo kajjojo mijenede E ekar kūr, ekoba kwe. E ekar kōpooj ro m̧ōttā im ritōl ro n̄an jipan̄ kōjparok im rie eok. Ejja āinwōt Alma ekar rie eo m̧ōttan Amulek, pukōt n̄an kōkajoorļo̧k doon (lale Alma 15:18).
Ta eo Kwoj Aikuj Kōm̧m̧ane Eļan̄n̄e Kwoj En̄jake Kauwōtata ak Jedmatmat?
Katak n̄an ļoor kein bōbrae kein emen ej aikuji kijejeto eo, kauwe eo, im kaminene eo. Jekdo̧o̧n ālkin an kein bōbrae kein erom juon m̧ōttan ekōjkan am̧ ļōmņak im jerbal, enaaj wōr an iien ko me kwomaron̄ en̄jake kauwōtata ak jedmatmat. Bōlen ewōr jet am̧ iminene ko rejjab em̧m̧an kōjerbal technology m̧okta jān mijen eo am̧ me rekar eppen n̄an anjo̧ ioer. Jet mijenede ro rekar ļon̄tak kōn pija ettoon ko m̧okta jān kūr eo aer im maron̄ kapo n̄an bar ro̧o̧l likļo̧k n̄an jon̄ak in m̧wil ko m̧okta.
Pedped in katak ko itulaļ renaaj jipan̄ eok mour kōn kein bōbrae ko im kōjparok eok make ņae kapo:
Kwon ekkōl kōn ļōmņak ko am̧, en̄jake ko, im m̧wiļ ko m̧wilūm̧. Meļeļe kilen am̧ maron̄ en̄jake eļapļo̧k an pidodo am̧ po n̄an bōd am̧ kōjerbal tōkņaļiji ko.
Kālet n̄an jerbal. Uwaak ilo jim̧we, kwaļo̧k wāween ko n̄an ta eo kwoj en̄jake.
Katak, ukweļo̧k, im em̧m̧anļo̧k. Kōjerbal en̄jake ko am̧ n̄an wōnm̧aanļo̧k wōt in katak im em̧manļo̧k.
Kwojjab aikuj in anjo̧ ioon apan̄ ko kōn kwe make. Pedped ioon kajoor eo me ej itok kōn Pinmuur eo an Rilo̧mo̧o̧r im bujen ko kwar kōm̧m̧ani Ippān. Irooj ejeļā apan̄ ko kwoj jelm̧ai, im E enaaj jipan̄ eok ilo jerbal in eļap.
Iien otemjej keememej Rilo̧mo̧o̧r eo emaron̄ jipan̄ eok kōjerbal technology ilo jim̧we. Kwon m̧ool n̄an lōke eo E ekar lewaj n̄an eok. Jokāālet n̄an “etetal jim̧we im̧aan mejān” (Alma 53:21; lale barāinwōt eoon 20). En̄jake kam̧m̧oolol kōn aolep men me E im Jemen raar kōm̧m̧ane n̄an eok enaaj jian̄ eok kōm̧m̧ani kāālet ko rem̧m̧an kōn kilen wāween am̧ kōjerbal kein jipan̄ ko ilo digital.
Mijen eo am̧ ej juon iien em̧m̧aņ aorōk n̄an katak kilen kōjerbal technology ilo mālōtlōt. Kallim̧ur eo im iminene ko rem̧m̧an kwoj ejaki ilo iien mijen eo am̧ renaaj kōjeraam̧m̧an eok ilo aolepān mour eo am̧.
Kōņak Kein Tariņae eo an Anij
Maron̄ eo am̧ n̄an jum̧ae kapo enaaj ļapļo̧k ilo am̧ ekkatak im kōjerbal jeje ko rekwojarjar, naan ko an rikanaan ro remour, Kwaļo̧k Aō Gospel, Jon̄ak ko an Mijenede n̄an Erom̧ Rikaļoor ro an Jisōs Kraist, im kein bōbrae ko kar kōllaajraki ilo jebta in.
Pija
mijenede ro rej iak-iakwe em̧m̧aan eo
Jān kōņak “kein tariņae an Anij,” kwonaaj maron̄ in jeļā m̧ool eo jān bōd eo. Kwonaaj kōm̧m̧an bwe neem̧ en kōņan “gospel in aenōm̧m̧an.” Kōņak “wānōk āinwōt kein penjān ob” enaaj bōbrae eok. Kōn “kein tōrak in tōmak,” kwonaaj maron̄ in kune m̧ade kijeek ko an rikapo eo. Kwonaaj bōk “jāje [An] Jetōb ” n̄an katakin m̧ool kajoor im mālim. Naaj kōkajoorļo̧k eok ņae kareel ko an laļ in me remaron̄ ilo bar juon wāween tōl eok n̄an erom jōbwābwe, makeļo̧k, im em̧ool kon̄ūl. (Lale Epesōs 6:10–18; lale barāinwōt 1 Nipai 8:20, 30; 15:24–25; Hilamōn 3:29–30; Katak im Bujen Ko 27:15–18; Josep Smith—Matu 1:37; 2 Timote 3:15–17.)
Ekkatak Am̧ Make
Jar ilo kūle juon iaan kein bōbrae ko n̄an kalimjōke ilo wiik in. Pukōt jipan̄ eo an Irooj. Ļo̧o̧ke en̄jake ko am̧ im ta eo kwoj katak.
Ļōmņak ko n̄an Ekkatak im Kōjerbali
Ekkatak Am̧ Make
Kajjieon̄e elmakot kein n̄an kōkōm̧anm̧anļo̧k am̧ ekkatak.
Riiti jeje ko rekwojarjar kōn kajjitōk ko im n̄ūrbōktak ko ilo ļōmņak.
Kwaļo̧k ta eo kwoj katak ippān mijenede ro jet im ippān ro kwoj katakin. Kōmeļeļeik juon katak ak pedped in katak enaaj jipan̄ eok keememej e im bōk ilo alikkar.
Ekkatak kōn unin kōnono. Kalimjōk wōt unin kōnono ko me renaaj jipan̄ eok im armej ro kwoj katakin.
Kajjitōkin eok make, “Ta eo rijeje eo ba? Ta ennaan eo eļap tata? Ekōjkan an menin iooktok n̄a? Ekōjkan an menin jipan̄ juon eo kōmij katakin?”
Pijaikļo̧k ak jin̄aik ta eo kwoj ekkatak. N̄an waanjon̄ak, ļōmņake ļo̧k ta eo ekar āinwōt n̄an Ammōn n̄an jutak im̧aan kiin̄ eo an Rilaman.
Kakilōklōke aitia eo eļap an juon eoon ilo juon jentōj ak juon pārokūrāāp kadu.
Kakilōklōke eoon ko me rej kōmeļeļeik im rie pedped in katak ko kwoj katakin.
Etale eok make ilo men kein (1=n̄ani n̄an jidik, 3=jet iien, 5=eitōn aolep iien).
Ij eddōkļo̧k ilo tōmak eo aō im itok n̄an jeļā Jemedwōj im Jisōs Kraist em̧m̧anļo̧k.
Ij ļōmņak kōn armej ro ij katakin n̄e ij ekkatak.
Ilo aolepān raan eo, ij ļōmņak kōn ta eo ikar ekkatak ilo jibbon̄.
Ilo aō ekkatak, aitia ko rej itok n̄an ļōmņak eo aō me rejjan̄in kar waļo̧k m̧oktaļo̧k.
Ij ļo̧o̧ke im̧we ko ilo jetōb im aitia ko ilo jikin eo ejetjet.
Ij ruj wōt ilo aō ekkatak.
Ij reim̧aanļo̧k n̄an ekkatak eo aō make.
Ij reim̧aanļo̧k n̄an ekkatak eo ippān kampānien eo m̧ōtta.
Etale uwaak ko am̧. Ta eo em̧m̧an am̧ kōm̧m̧ane? Ekōjkan am̧ maron̄ em̧m̧anļo̧k? Kōm̧m̧ane juon ak ruo kōttōpar ko n̄an kōkōm̧anm̧anļo̧k em̧m̧an eo an ekkatak eo am̧.
Ekkatak Ippān Kampānien Eo M̧ōttam̧ im Jānij Kampānien
Riit ippān doon jejjo iaan eoon kein. Ekōnono kōn kōjeraam̧m̧an ko me rej itok jān ekkatak naan an Anij. Ewi wōt eoon ko renaaj em̧m̧an tata aer jipan̄ ro kwoj katakin?
District Ko̧o̧njeļ, Kweilo̧k ko Reļļap an Zone, im Ko̧o̧njeļ an Ritōl ro an Mijen
Kajjitōk ippān mijenede ro n̄an je juon ak ruo kajjitōk ko kōn gospel eo jān juon katak ilo jebta 3. Kajjitōk kein remaron̄ in am̧ make ak jān armej rej katakin. Kajjitōk ippān mijenede ro n̄an kwaļo̧k kajjitōk ko aer ippān kumi eo. N̄an kajjojo kajjitōk, ekōnono kōn men kein:
Ekōjkan an uwaake kajjitōk in maron̄ kōjeraam̧m̧an mour eo an mijenede eo?
Ekōjkan an maron̄ kōjeraam̧m̧an mour ko an armej ro ej katakin?
Ekōjkan an juon mijenede lo uwaak eo?
Ajije mijenede ro n̄an kumi ko, im kappeik kajjojo kumi n̄an ekkatak kōn juon iaan emen kein bōbrae ko im eoon ko rej itok ippāer. Kajjitōk ippān mijenede ro n̄an kwaļo̧k ta eo raar katak im ekōjkan an kein bōbrae ko kar jipan̄ er.
Ritōl ro an Mijen im Rikakpilōklōk ro an Mijen
Jān iien n̄an iien koba ippān mijenede ro ilo ekkatak ippān eo m̧ōttan eo aer.
Ilo iien intōrpiu ko ak bwebwenato ko, kajjitōk jet iaan kajjitōk kein:
Ta im̧we ko ekar wōr am̧ kiiō epaak ilo ekkatak jeje ko rekwojarjar am̧?
Jebta ta eo ak jekjōn eo an Kweilo̧k Gospel eo Aō ekar jipan̄ eok eļap tata ilo wiik ko ruo rej jem̧ļo̧kļo̧k? Ekōjkan an kar jipan̄ eok?
Ta eo kwoj kōm̧m̧ane ilo ekkatak eo am̧ me ej jipan̄ eok katak?
Ilo intōrpiu ko, ļōmņak in etale kein bōbrae ko n̄an kōjerbal technology im kajjitōk ippān mijenede ro ta eo rej katak ilo aer kōjerbal er.
Kwaļo̧k kōļmenļo̧kjeņ ko jān ekkatak eo am̧ make. Kwaļo̧k men ko kar je jān jōnōļ in ekkatak eo am̧ im naan in kam̧ool eo am̧ kōn aorōk eo an ekkatak gospel eo.