Kapitulo 3: Adalen 1—Ti Mensahe ti Pannakaisubli ti Ebanghelio ni Jesucristo
“Kapitulo 3: Adalen 1—Ti Mensahe ti Pannakaisubli ti Ebanghelio ni Jesucristo,” Ikasaba ti Ebangheliok: Maysa a Pangiwanwan iti Panangibinglay iti Ebanghelio ni Jesucristo (2023)
Kapitulo 3: Adalen 1,” Ikasaba ti Ebangheliok
Kapitulo 3: Adalen 1
Ti Mensahe ti Pannakaisubli ti Ebanghelio ni Jesucristo
Ladawan
Ti Umuna a Parmata
Mabalin a Masdaaw dagiti tao
Adda kadi Dios?
Kasano a mariknak nga as-asidegak iti Dios?
Kasano a masursurok ti kinapudno iti agdama a makatikaw a lubong?
Kasano a matulongannak ti relihion?
Apay a nakaad-adu dagiti simbaan?
Apay a nakaad-adu dagiti karitko?
Kasano a masarakak ti talna iti panawen ti riribuk?
Kasano a makapagbalinak a naragragsak?
Kasano a makatulong ti maysa a propeta iti lubong ita?
Manipud idi punganay ti lubong, impalgak ti Dios ti ebanghelio kadagiti annakna babaen kadagiti propeta. Inaramidna daytoy babaen ti Anakna, a ni Jesucristo. Idi un-unana, impalgak ni Jesus ti ebanghelio kadagiti propeta a kas kada Adan, Noe, Abraham, ken Moises. Ngem adu a tattao ti saan nga immawat iti daytoy.
Dua ribu a tawen ti napalabasen, insuro ni Jesucristo mismo ti ebangheliona ken impasdekna ti Simbaanna. Uray dagiti tao saanda nga inawat ni Jesus. Saan a nagbayag kalpasan ti ipapatayna, adda nagsaknap a pannakatnag manipud iti kinapudno ken Simbaan ti Apo. Awanen ditoy daga ti pakabuklan ti ebanghelio ken ti turay ti priesthood.
Kalpasan ti adu a siglo, immawag ti Dios iti sabali pay a propeta, ni Joseph Smith. Insubli ti Dios ti pakabuklan ti ebanghelio babaen kenkuana ken pinusganna a mangbuangay manen iti Simbaan ni Jesucristo.
Ti kaadda ti pakabuklan ti ebanghelio ni Jesucristo ditoy daga ket maysa kadagiti naindaklan a bendision iti aldawtayo. Tulongannatayo ti ebanghelio a mangsungbat kadagiti kapapatgan a saludsod iti biag. Iwanwannatayo dagiti sibibiag a propeta kadagiti makakarit a panawen. Adda manen ditoy daga ti turay ti priesthood ti Dios a mangbendision kadagiti annakna.
Ladawan
dagiti misionario a mangisursuro iti pamilia
Dagiti Singasing para iti Panangisuro
Daytoy a benneg ti mangipaay iti pagarigan a balabala a mangtulong kadakayo nga agsagana a mangisuro. Iramanna pay dagiti pagarigan dagiti saludsod ken awis a mabalinyo nga usaren.
Bayat ti panagsaganayo a mangisuro, sikakararag nga ibilangyo ti kasasaad ken naespirituan a kasapulan ti tunggal tao. Ikeddengyo no anianto ti kangrunaan a makatulong iti panangisuro. Agsagana a mangilawlawag iti kaipapanan dagiti termino a mabalin a saan a maawatan dagiti tao. Agplano segun iti no kasano ti kaadunto ti orasyo, a laglagipenyo a pagtalinaeden nga ababa dagiti adalen wenno lesson.
Pumilikayo kadagiti nasantuan a kasuratan nga usaren bayat ti panangisuroyo. Ti benneg a “Pundasion a Mainaig iti Doktrina” ti adalen ket mangiraman iti adu a makatulong a nasantuan a kasuratan.
Ibilangyo no ania dagiti saludsod a madamag bayat ti panangisuroyo. Mangplano kadagiti awis nga ited a mangparegtanto iti tunggal tao nga agtignay.
Yunay-unay dagiti bendision nga inkari ti Dios, ken ibinglayyo ti pammaneknekyo maipapan iti isursuroyo.
Ania ti Mabalinyo nga Isuro Kadagiti Tao iti 15–25 a Minuto
Mangpili iti maysa wenno ad-adu pay kadagiti sumaganad a pagbatayan nga isuro. Maited ti pundasion a mainaig iti doktrina para iti tunggal pagbatayan kalpasan daytoy a balabala.
Ti Dios ti Managayat a Nailangitan nga Amatayo
Ti Dios ti Nailangitan nga Amatayo, ket datayo dagiti annakna. Pinarsuanatayo iti ladawanna.
Personal nga am-ammonatayo ti Dios ken ay-ayatennatayo.
Addaan ti Dios iti naitan-ok, naan-anay a bagi nga addaan iti lasag ken tulang.
Kayat ti Dios a bendisionannatayo iti talna ken pakabuklan ti rag-o nga agpautto iti agnanayon.
Gapu ta ay-ayatennatayo ti Dios, imbaonna ti Anakna, ni Jesucristo, tapno subbotennatayo manipud iti basol ken ipapatay.
Ipalgak ti Dios ti Ebanghelio babaen kadagiti Propeta iti Tunggal Dispensasion
Mangawag ti Dios kadagiti propeta nga agbalin a pannakabagina iti daga.
Idi un-unana, nangawag ti Dios kadagiti propeta a kas kada Adan, Noe, Abraham, ken Moises.
Umawat ti sibibiag a propeta iti paltiing manipud iti Dios tapno mangisuro ken mangidaulo kadatayo ita.
Ti Panagministro iti Daga ken Pannubbot ni Jesucristo
Ni Jesucristo ti Anak ti Dios.
Bayat ti panagministrona iti daga, insuro ni Jesus ti ebangheliona ken inpasdekna iti Simbaanna.
Inawagan ni Jesus dagiti Sangapulo-ket-dua nga Apostol ken inikkanna ida iti turay a mangidaulo iti Simbaanna.
Iti gibus ti biagna, sinubbot ni Jesus ti basbasoltayo babaen ti panagsagabana iti Minuyongan ti Getsemani ken kabayatan ti Pannakailansana iti Krus. Kalpasan ti ipapatay ni Jesus, nagungar Isuna.
Gapu iti pangsubbot a sakripisio ni Jesus, mapakawantayo iti basbasoltayo no agbabawitayo. Daytoy ti mangyeg kadatayo iti talna ken pagbalinenna a makapagsublitayo iti imatang ti Dios ken umawat iti pakabuklan ti rag-o.
Gapu iti Panagungar ni Jesus, mapagungartayonto amin kalpasan ti ipapataytayo. Kaipapanan daytoy a ti espiritu ken bagi ti tunggal tao ket agtiponto manen ken agbiag nga agnanayon.
Pannakatnag
Kalpasan ti ipapatay dagiti Apostol ni Jesus, adda nasaknap a pannakatnag manipud iti ebanghelio ken Simbaan ni Jesucristo.
Kabayatan daytoy a panawen, binaliwan dagiti tao ti adu a pannursuro ti ebanghelio. Binalbaliwan pay dagiti tao dagiti ordinansa ti priesthood, kas iti panagbuniag. Awanen ditoy daga ti turay ti priesthood ken ti Simbaan nga impasdek ni Jesus.
Ti Pannakaisubli ti Ebanghelio ni Jesucristo babaen ken ni Joseph Smith
Inkalikagum ni Joseph Smith a maammuan no ania a simbaan ti pudno a Simbaan ti Dios tapno makikappeng iti daytoy. Nagparang ti Nailangitan nga Ama ken ni Jesucristo Kenkuana idi 1820. Maawagan daytoy a pasamak iti Umuna a Parmata.
Inawagan ti Dios ni Joseph Smith nga agbalin a propeta, kas met laeng iti panangawagna kadagiti propeta kadagiti immun-una a panawen.
Naisubli ti ebanghelio ni Jesucristo babaen ken ni Joseph Smith.
Insubli dagiti dadduma pay a nailangitan a mensahero ti priesthood, ket napusgan ni Joseph a mangbuangay iti Simbaan ni Jesucristo.
Ituloy ni Jesucristo ti mangidaulo iti Simbaanna ita babaen kadagiti sibibiag a propeta ken apostol.
Ti Libro ni Mormon: Mainayon a Pammaneknek ken ni Jesucristo
Ti Libro ni Mormon ket maysa a tomo ti nasantuan a kasuratan nga insurat dagiti propeta kadagiti nagkauna a panawen kadagiti kontinente ti America. Impatarus ni Joseph Smith daytoy babaen ti sagut ken bileg ti Dios.
Kadua ti Biblia, mangipaay ti Libro ni Mormon iti saksi ti panangministro, dagiti panangisuro, ken mision ni Jesus kas Mangisalakantayo.
Ad-adda a makaasidegtayo iti Dios babaen ti panangbasa iti Libro ni Mormon ken panagtungpal kadagiti pammilinna.
Maammuantayo a ti Libro ni Mormon ti balikas ti Dios babaen ti panangbasa iti daytoy, panangutob iti daytoy, ken panangikararag iti maipapan iti daytoy. Matulongannatayto pay daytoy a proseso a maammuam a maysa a propeta ni Joseph Smith.
Agkararag tapno Maammuan ti Kinapudno babaen ti Espiritu Santo
Ti kararag ti dua-a-wagas a komunikasion iti nagbaetan ti Dios ken dagiti annakna.
Babaen ti napudno a kararag, maammuantayo a pudno ti mensahe ti Pannakaisubli ti ebanghelio ni Jesucristo.
Bayat ti panagkararagtayo, isuro ken ipatalged ti Espiritu Santo ti kinapudno kadatayo.
Ladawan
dagiti misionario a mangisursuro kadagiti agtutubo a lalaki
Dagiti Saludsod a Mabalinyo a Damagen Kadagiti Tao
Dagiti sumaganad a saludsod ket pagarigan ti mabalinyo nga isaludsod kadagiti tao. Dagitoy a saludsod ti makatulong kadakayo a maaddaan kadagiti napnuan kaipapanan a pagsasaritaan ken maawatan dagiti kasapulan ken pannirigan ti maysa a tao.
Ania ti patiem maipapan iti Dios?
Kasano a matulongannaka ti pannakariknam nga as-asidegka iti Dios?
Ania ti ammom maipapan ken ni Jesucristo? Kasano a nakaimpluensia kenka ti biag ken pannursurona?
Kasano a makasarakka kadagiti mapagtalkan a sungbat iti agdama a makatikaw a lubong?
Kasano a matulongannaka a mangammo nga adda maysa a sibibiag a propeta ditoy daga ita?
Nangngegmo kadin ti Libro ni Mormon? Mabalinmi kadi nga ibinglay no apay a napateg daytoy?
Dumar-aykanto kadi iti simbaan iti daytoy a Domingo tapno masursurom ti ad-adu pay maipapan iti insuromi?
Agbasakanto kadi iti Libro ni Mormon ket agkararagka tapno maammuan a daytoy ti balikas ti Dios?. (Mabalinmo nga isingasing dagiti masinunuo a kapitulo wenno bersikulo.)
Surotemto kadi ti pagwadan ni Jesus ket agpabuniagka? (Kitaen iti “Ti Awis a Mabuniagan ken Makumpirmaan,” nga immun-una a dagus iti daytoy nga adalen.)
Mabalinmi kadi ti mangyiskediul iti oras para iti sumaruno nga isasarungkarmi?
Pundasion a Mainaig iti Doktrina
Mangipaay daytoy a benneg iti doktrina ken nasantuan a kasuratan nga adalenyo tapno mapatibker ti pannakaammo ken pammaneknekyo iti ebanghelio ken tapno matulongannakayo a mangisuro.
Ladawan
pamilia
Ti Dios ti Managayat a Nailangitan nga Amatayo
Ti Dios ti Nailangitan nga Amatayo, ket datayo dagiti annakna. Pinarsuanatayo iti ladawanna. Addaan isuna iti naitan-ok, naan-anay a “bagi a nagtagilasag ken nagtagitulang a marikna a kas iti tao” (Doktrina ken Katulagan 130:22).
Personal nga am-ammonatayo ti Dios, ken ad-adda nga ay-ayatennatayo ngem ti kabaelantayo a maawatan. Maawatanna dagiti pannubok, ladingit, ken pagkapuyantayo, ken idiayana a suportarannatayo babaen kadagitoy. Agragsak iti panagdur-astayo ken tulongannatayonto nga agaramid kadagiti umno a pili. Kayatna ti makisarita kadatayo, ken mabalintayo ti makisarita Kenkuana babaen ti panagkararag.
Inted ti Dios kadatayo daytoy a padas iti rabaw ti daga tapno makasursuro ken makapagdur-as, ken makapagbalintayo nga ad-adda a kas Kenkuana. Addaan ti naan-anay nga ayat, kayatna nga agsublitayo Kenkuana kalpasan ti ipapataytayo. Nupay kasta, saantayo a maaramid daytoy a bukbukodtayo. Gapu ta ay-ayatennatayo ti Dios, imbaonna ti Anakna, ni Jesucristo a mangsubbot kadatayo. “Ta kasta la unay ti panagayat ti Dios iti lubong, nga intedna ti Anakna a Bugbugtong, … tapno ti lubong maisalakan gapu kenkuana” (Juan 3:16–17).
Kayat ti Dios a bendisionannatayo iti talna ken pakabuklan ti rag-o nga agpautto iti agnanayon. Nangipaay iti maysa a plano a mangted kadatayo iti gundaway nga umawat kadagitoy a bendision. Maawagan daytoy iti plano ti pannakaisalakan (kitaen iti adalen 2).
Ipalgak ti Dios ti Ebanghelio babaen kadagiti Propeta iti Tunggal Dispensasion
Dagiti Propeta ti Pannakabagi ti Dios Ditoy Daga
Maysa a napateg a wagas a pangipakpakitaan ti Dios iti ayatna kadatayo ket babaen ti panangawagna kadagiti propeta, panangtedna kadakuada iti turay ti priesthood, ken panangparegtana kadakuada nga agsao para Kenkuana. Dagiti propeta ti pannakabagi ti Dios ditoy daga. Inrekord ni Amos a propeta iti Daan a Tulag nga “awanto ti aramiden ni Apo Jehova a dinto maipalgak ti palimedna kadagiti adipenna dagiti mammadto” (Amos 3:7). Sumagmamano kadagiti bendision nga awatentayo manipud kadagiti sibibiag a propeta ket nabalabala iti baba.
Dagiti saksi ni Jesucristo. Dagiti propeta ti naisangsangayan a saksi ni Jesucristo, a mangpampaneknek Kenkuana kas Mangisalakan ken Mannubbottayo.
Dagiti Pannursuro. Umawat dagiti propeta iti panangiturong manipud iti Dios tapno matulongannatayo a mangilasin iti kinapudno manipud iti biddut. Isurodatayo nga agtungpal kadagiti bilin ti Dios ken agbabawi no agbasoltayo. Supringenda ti basol ken iballaagda ti maipapan kadagiti bungana.
Dagiti pannursuro dagiti propeta ti mangitag-ay kadatayo nga agturong iti Dios ken matulongannatayo nga umawat kadagiti bendision a tarigagayanna para kadatayo. Ti kadakkelan a panagtalgedtayo ket adda iti panangsurot iti balikas ti Apo a naited babaen kadagiti propetana.
Turay ti Priesthood. Ti agdama a propeta ti mangidadaulo a priesthood holder ditoy daga. Ti priesthood isu ti turay ken bileg ti Dios. Addaan ti propeta iti turay nga agsao ken agtignay iti nagan ti Dios para iti pannakaisalakan dagiti annakna.
Panangiturong ti Simbaan. Ti Simbaan ni Jesucristo ket nabangon iti pamuon dagiti apostol ken propeta (kitaen iti Taga-Efeso 2:19–20; 4:11–14).
Dagiti Propeta kadagiti Nagkauna a Panawen
Ni Adan ti immuna a propeta iti rabaw ti daga. Impalgak ti Dios ti ebanghelio ni Jesucristo kenkuana ken inikkanna iti turay ti priesthood. Insuro da Adan ken Eva kadagiti annakda dagitoy a kinapudno ken pinaregtada ida a maaddaan iti pammati ken agbiag iti ebanghelio.
Kamaudiananna nagalsa ti kaputotan da Adan ken Eva ket tinallikudanda ti ebanghelio. Daytoy ti nangiturong iti kasasaad a maawagan iti ikakalilis iti kinapudno, wenno pannakatnag. No mapasamak ti nasaknap nga ikakalilis iti kinapudno, ibabawi ti Dios ti turayna iti priesthood, a kasapulan tapno mangisuro ken mangannong kadagiti ordinansa ti ebanghelio.
Inrekord ti Daan a Tulag ti adu a pagarigan ti nasaknap nga ikakalilis iti kinapudno. Tapno igubus dagitoy a panawen, dimmanon ti Dios kadagiti annakna babaen ti panangawagna iti sabali a propeta. Impalgakna manen dagiti kinapudno ti ebanghelio kadagitoy a propeta ken inikkanna ida iti turay ti priesthood. Sumagmamano kadagitoy a propeta isu da Noe, Abraham, ken Moises. Nakalkaldaang, ta iti maulit-ulit a pagtuladan iti panaglabas ti panawen, idi agangay saan nga inawat dagiti tao dagiti propeta ket natnagda.
Gospel Topics: “Prophets,” “Restoration of the Church”
Ladawan
O Amak, ni Simon Dewey
Ti Panagministro iti Daga ken Pannubbot ni Jesucristo
Ni Jesucristo ti Anak ti Dios. Ni Jesus ken ti Pannubbotna ket kangrunaan iti plano ti Dios para kadatayo. Inraman ti Pannubbot ti panagsagabana iti Minuyongan ti Getsemani, ti panagsagaba ken ipapatayna iti krus, ken ti Panagungarna.
Manipud pay iti panawen da Adan ken Eva, pinadpadaanan dagiti tao ti yaay ni Jesucristo kas Mangisalakan ken Mannubbotda. Imbaon ti Nailangitan nga Ama ni Jesus iti daga nasurok a 2,000 a tawen ti napalabas.
Nagbiag ni Jesucristo iti naan-anay, awan basolna a biag. Insurona ti ebangheliona ken impasdekna ti Simbaanna. Inawaganna ti sangapulo-ket-dua nga Apostol ken inikkanna ida iti turay ti priesthood a mangisuro ken mangannong kadagiti sagrado nga ordinansa,a kas iti panagbuniag. Inikkanna pay ida iti turay a mangidaulo iti Simbaanna.
Iti gibus ti biagna, sinubbot ni Jesus ti basbasoltayo babaen ti panagsagabana iti Getsemani ken kabayatan ti Pannakailansana iti Krus. Gapu iti pangsubbot a sakripisio ni Jesus, madalusantayo iti basbasoltayo no agbabawitayo. Daytoy ti mangaramid a posible a makapagsublitayo iti imatang ti Dios ken umawat iti pakabuklan ti rag-o.
Kalpasan ti pannakailansa ni Jesus, nagungar Isuna, a nakagun-od iti balligi iti patay babaen ti bileg ti Nailangitan nga Ama. Gapu iti Panagungar ni Jesus, agungartayto amin kalpasan ti ipapataytayo. Kayatna a sawen a mapagkaykaysanto manen ti espiritu ken bagi ti tunggal tao, ken tunggal maysa kadatayo ket agbiagto iti agnanayon iti naan-anay, nagungar a bagi. (Kitaen iti “Ti Pannubbot ni Jesucristo” iti adalen 2.)
Ladawan
ni Propeta Joseph Smith
Insuro ni Propeta Joseph Smith a “Dagiti kangrunaan a pagbatayan ti pammatitayo ket ti pammaneknek dagiti Apostol ken Propeta, maipanggep ken ni Jesucristo, nga Isu ket natay, ket naitanem, ken nagungar iti maikatlo nga aldaw, ket immuli sadi langit; ken amin a dadduma pay a bambanag a mainaig iti pammatitayo ket nayon laeng dagitoy” (Teachings of Presidents of the Church: Joseph Smith [2007], 49).
Gospel Topics: “Jesus Christ,” “Atonement of Jesus Christ”
Pannakatnag
Kalpasan ti ipapatay ni Jesucristo, inkagumaan dagiti Apostolna a pagtalinaeden a natarnaw ti doktrina ni Cristo ken taginayonen ti urnos iti Simbaan. Nupay kasta, adu a miembro ti Simbaan ti timmallikud kadagiti Apostol ken iti doktrina nga insuro ni Jesus.
Kalpasan ti ipapatay dagiti Apostol, adda nasaknap a pannakatnag manipud iti ebanghelio ken Simbaan ni Jesucristo. No dadduma maawagan daytoy a pannakatnag iti Nakaro nga Ikakalilis iti Kinapudno. Gapu iti daytoy, imbabawi ti Dios ti turay ti priesthood manipud iti daga. Daytoy a pannakapukaw ket karaman ti turay a kasapulan tapno maiturong ti Simbaan. Kas resultana, awanen ditoy daga ti Simbaan nga impasdek ni Jesus.
Kabayatan daytoy a panawen, binaliwan dagiti tao ti adu a pannursuro ti ebanghelio. Naballikug wenno napukaw ti kaaduan a pannakaammo maipapan iti pudno a kinatao ti Nailangitan nga Ama, ni Jesucristo, ken ti Espiritu Santo. Binalbaliwan pay dagiti tao dagiti ordinansa ti priesthood, kas iti panagbuniag.
Sinigsiglo kalpasanna, inkagumaan dagiti agsapsapul iti kinapudno a lallaki ken babbai a mangbalbaliw manen kadagiti pannursuro ken kannawidan a nabaliwan idin. Nagsapulda iti dakdakkel a naespirituan a lawag, ket sumagmamano kadakuada ti nagsao maipapan iti panagkasapulan para iti pannakaisubli ti kinapudno. Dagiti panagkagumaanda ti nangiturong iti pannakabukel ti adu a simbaan.
Daytoy a panawen ti nagresulta iti napapigsa iti pannakayunay-unay iti wayawaya iti relihion, a nanglukat iti dalan para iti pannakaisubli ti kinapudno ken turay manipud iti Dios.
Impadto idin dagiti propeta ken apostol ti pannakatnag (kitaen iti 2 Taga Tesalonica 2:1–3). Impadtoda pay a maisubli ditoy daga ti ebanghelio ken Simbaan ni Jesucristo (kitaen iti Dagiti Aramid 3:20–21). No awan koma ti pannakatnag, saan koma a kasapulan ti pannakaisubli.
Ti Pannakaisubli ti Ebanghelio ni Jesucristo babaen ken ni Joseph Smith
Ti Umuna a Parmata ken ti Pannakaawag (Calling) ni Joseph Smith a kas maysa a Propeta
Kabayatan dagiti siglo idi awan ditoy daga ti pakabuklan ti ebanghelio ni Jesucristo, intultuloy ti Nailangitan nga Ama ti nangtulong kadagiti annakna. Iti panaglabas ti panawen, insaganana ti dalan tapno mabendisionanda manen iti pakabuklan ti ebangheliona. Idi umisu dagiti kasasaad, inawaganna ni Joseph Smith kas propeta a babaen kenkuana maisubli ti ebanghelio ken ti Simbaan ni Jesucristo.
Nagbiag ni Joseph Smith iti daya nga Estados Unidos iti panawen ti dakkel a panaggagar a mainaig iti relihion. Napasnek dagiti miembro ti pamiliana a nagserbi iti Dios ken nagsapul iti kinapudno. Adu a simbaan ti nangibaga nga addaanda iti kinapudno, ket tinarigagayan ni Joseph a maammuan no ania kadagitoy ti umno (kitaen iti Joseph Smith—Pakasaritaan 1:18). Isuro ti Biblia nga adda “maysa nga Apo, maysa a pammati, maysa a panagbuniag” (Taga Efeso 4:5). Dinar-ayan ni Joseph iti nadumaduma a simbaan, ngem natikaw isuna maipapan iti no ania kadagitoy ti pakikamenganna. Idi agangay kinunana:
“Ngem nabileg unay ti pannakakulkol ken panagsisinnait ti agduduma a kapanunotan iti pammati, ket adayo a mapasamak iti tao a kas iti kaganusko … a maaddaan iti umno a pangngeddeng no asino ti nasayaat wenno asino ti dakes.
“Iti baet daytoy sinnait ti sasao ken di agressat a panagsisinnupanget ti kapanunotan, masansan a kunak iti bagik: Ania ti maaramid? Asino kadagitoy a grupo ti pudno; wenno, agpapadada kadi a biddut? No maysa kadagitoy ti pudno, ania kadagitoy, ken kasano a maammuakto daytoy?” Joseph Smith—Pakasaritaan 1:8, 10).
Kas iti adu a tao, adda met saludsod ni Joseph Smith maipapan iti pannakaisalakan ti kararuana. Kayatna a mapakawan dagiti basolna ken agbalin a nadalus iti sanguanan ti Dios. Bayat ti panangsapsapulna iti kinapudno kadagiti nadumaduma a simbaan, binasana iti Biblia, “No siasino man kadakayo ti agkurang iti kinasirib, agdawat koma iti Dios; isu a mangted a sikakaasi kadagiti isu amin, ket saan a mangpabain; ket maitedto kenkuana” (Santiago 1:5).
Gapu iti daytoy a binatog, inkeddeng ni Joseph ti agsaludsod iti Dios no ania ti nasken nga aramidenna. Iti panagsusulbod ti 1820, napan isuna iti asideg a kakaywan ket nagparintumeng a nagkararag. Adda uppat a salaysay maipapan iti parmata a simmaruno, nga inrekord ni Joseph Smith wenno dagiti eskriba iti babaen ti panangiturongna (kitaen iti Gospel Topics Essays, “First Vision Accounts”). Iti pakaammuan a nakanonisado kas nasantuan a kasuratan, inladawanna ti padasna kas iti sumaganad:
Ladawan
Ti Umuna a Parmata, da Linda Christensen ken Michael Malm
“Nakitak ti kasla adigi a lawag iti mismo a ngatuen ti ulok, a naranraniag pay ngem init, nga in-inut a nagpababa a nagdisso kaniak. … Nakitak ti dua a Kinatao idi agdisso ti lawag kaniak, nga artapan ti lawag ken tan-okda ti amin a panangiladawan, a nagtakder iti angin iti ngatuek. Maysa kadakuada ti nagsao kaniak, nga inawagannak iti naganko, ket kinunana, intudona ti kaduana—Daytoy ti Ay-ayatek nga Anakko. Dumngegka Kenkuana!” (Joseph Smith—Pakasaritaan 1:16–17).
Iti daytoy a parmata nagparang ti Dios Ama ken ti Anakna, ni Jesucristo ken ni Joseph Smith. Imbaga ti Mangisalakan kenkuana a saan nga agkameng iti ania man kadagiti simbaan.
Iti sabali pay a pakaammuan maipapan iti daytoy a parmata, imbinglay ni Joseph nga imbaga pay kenkuana ti Mangisalakan: “Napakawankan kadagiti basolmo. … Adtoy, siak ti Apo ti dayag. Nailansaak iti krus para iti lubong, tapno maaddaan iti Agnanayon a biag ti amin a mamati iti naganko.”
Babaen iti daytoy a parmata, nagbalin ni Joseph Smith a maysa a saksi ni Jesucristo ken nasursurona dagiti napateg a kinapudno maipapan iti Kinadios. Kas pagarigan, naammuanna nga agsina a parsua ti Nailangitan nga Ama ken ni Jesucristo. Idi inawaganda isuna babaen ti naganna, naammuanna a personal nga am-ammoda isuna. Idi naibaga ken Joseph a napakawanen isuna, naammuanna a manangngaasi ti Dios. Daytoy a padas ti nangpunno kenkuana iti rag-o.
Kas iti inaramid ti Dios kadagiti immun-una a propeta, inawaganna ni Joseph Smith tapno agbalin a propeta a nakaisublian ti pakabuklan ti ebanghelio iti daga. Daytoy a pannakaisubli ket makatulong kadagiti annak ti Dios a makasarak iti rag-o iti daytoy a lubong ken agnanayon a biag iti lubong nga umay—amin babaen ken ni Jesucristo.
Pannakaisubli iti Priesthood ken dagiti Tulbek ti Priesthood
Ladawan
Kadakayo Padak a Katulongan, da Linda Curley Christensen ken Michael Malm
Kalpasan ti panagparang ti Ama ken ti Anak, naibaon ti dadduma pay a nailangitan a mensahero ken Joseph Smith ken iti kaduana a ni Oliver Cowdery. Nagparang ni Juan Bautista kas nagungar a parsua ket intalekna kadakuada ti Aaronic Priesthood ken dagiti tulbekna. Iraman ti Aaronic Priesthood ti turay a mangbuniag.
Ladawan
Ti Timek da Pedro, Santiago, ken Juan, ni Welden C. Andersen
Di nagbayag kalpasanna, nagparang da Pedro, Santiago, ken Juan—tallo kadagiti sigud nga Apostol ni Cristo—a kas nagungar a parsua ket intedda ti Melchizedek Priesthood ken dagiti tulbekna kada Joseph Smith ken Oliver Cowdery. Daytoy a priesthood ket isu met laeng a turay nga inted ni Cristo kadagiti Apostolna idi un-unana.
Ladawan
Image of Moses Elias and Elijah descending into the Kirtland temple and appearing to Joseph Smith.
Iti Templo ti Kirtland, nagparang da Moises, Elias, ken Elijah kada Joseph Smith ken Oliver Cowdery ket inkumitda kadakuada ti ad-adu pay a turay ken tulbek ti priesthood a kasapulan tapno maipatungpal ti aramid ti Dios kadagiti ud-udina nga aldaw. Inkumit ni Moises dagiti tulbek ti panaguummong ti Israel. Inkumit ni Elias ti dispensasion ti ebanghelio ni Abraham. Inkumit ni Elijah dagiti tulbek ti bileg a mangilantip. (Kitaen iti Doktrina ken Katulagan 110:11–16; kitaen met iti General Handbook, 3.1.)
Pannakabukel ti Simbaan
Nabilin ni Joseph Smith a mangbukel manen ti Simbaan ni Jesucristo iti rabaw ti daga. Babaen kenkuana, nangawag ni Jesucristo kadagiti Sangapulo-ket-dua nga Apostol.
Imbasar dagiti propeta idi panawen ti biblia ti panawen a pagbibiagantayo a kas dagiti maudi nga aldaw wenno dagiti ud-udina nga aldaw. Daytoy ti panawen sakbay laeng ti Maikadua a Yaay ni Jesucristo. Dayta ti gapuna a napanaganan ti Simbaan iti Ti Simbaan ni Jesucristo dagiti Santo iti Ud-udina nga Aldaw (kitaen iti Doktrina ken Katulagan 115:3–4; kitaen met iti 3 Nephi 27:3–8).
Dagiti Sibibiag a Propeta ken Apostol Ita
Kas iti panangawag ni Jesus kadagiti Apostol bayat ti mortal a panagministrona a mangidaulo iti Simbaanna, inawaganna dagiti Apostol a mangidaulo iti daytoy ita. Ti Umuna a Panguluen ken ti Korum dagiti Sangapulo-ket-dua nga Apostol ket dagiti propeta, mammadto, ken mammaltiing.
Ti laeng senior nga Apostol ti maawagan ti propeta gapu ta isu ti mangidaulo iti intero a Simbaan ken naidumduma a napusgan nga agsao para iti Apo. Isu ti napusgan a kasuno ni Joseph Smith. Isu ken dagiti agdama nga Apostol, matuntonda ti turayda ken ni Jesucristo iti saan a mawarwar a kawar dagiti ordinasion a nangrugi idi naordenan ni Joseph Smith iti sidong dagiti ima dagiti nailangitan a mensahero.
Gospel Topics: “Restoration of the Church,” “Restoration of the Priesthood”
Ti Libro ni Mormon: Mainayon a Pammaneknek ken ni Jesucristo
Ti Libro ni Mormon ket maysa a nagkauna a libro ti nasantuan a kasuratan a mayasping iti Biblia. Ti Biblia ket maysa a saksi ni Jesucristo, ken ti Libro ni Mormon ket maikadua a saksi iti panagministrona, dagiti pannursurona, ken ti misionna kas Mangisalakantayo.
Ni Joseph Smith ket binilin ti maysa a nailangitan a mensahero a managan iti Moroni a mapan iti turod a nakaikalian dagiti nagkauna a kasuratan iti adun a siglo. Daytoy a kasuratan, a naikitikit kadagiti pinanaid a balitok, (naingpis a pinanid a metal) ket naglaon kadagiti sinurat dagiti propeta kadagiti pannakilangen ti Dios iti sumagmamano a nagkauna a nagindeg kadagiti kontinente ti America. Impatarus ni Joseph Smith daytoy a kasuratan babaen ti sagut ken bileg ti Dios.
Ammo dagiti propeta iti Libro ni Mormon maipapan iti mision ni Jesucristo ken insuroda ti ebangheliona. Kalpasan ti panagungar ni Jesus, nagparang Isuna kadagitoy a tao ken nagministro a personal kadakuada. Nangisuro kadakuada ken impasdekna ti Simbaanna.
Tulongannatayo ti Libro ni Mormon nga umasideg iti Dios bayat ti panagsursuro, pannakaawat, ken panangyaplikartayo kadagiti pannursurona. Kinuna ni Propeta Joseph Smith nga “as-asidegto ti lalaki [wenno babai] iti Dios babaen ti panangsurotna kadagiti linaon [ti libro], ngem iti sabali a libro” (Teachings: Joseph Smith, 64).
Ladawan
lalaki nga agbasbasa
Tapno maammuan a balikas ti Dios ti Libro ni Mormon kasapulan a basaen, utoben, ken ikararagantayo daytoy. Inkari ti maysa a propeta ti Libro ni Mormon nga ipalgakto ti Dios kadatayo ti kinapudno ti libro bayat ti panagkararagtayo nga addaan iti napudno a puso, addaan iti pudno a panggep, ken pammati ken ni Cristo (kitaen iti Moroni 10:3–5). Kasapulan ti panagadal iti Libro ni Mormon para iti panagibtur iti kumbersion.
Bayat ti panangbasatayo iti Libro ni Mormon ken panagkararag maipapan iti daytoy, masursurotayo dagiti kinapudno maipapan ken ni Jesucristo a mangbendisionto iti biagtayo. Maammuantayo pay a propeta ti Dios ni Joseph Smith ken naisubli ti ebanghelio ken Simbaan ni Jesucristo babaen kenkuana.
Ladawan
Presidente Russell M. Nelson
“Ikarik a no nainkararagan nga agadalkayo iti Libro ni Mormon iti inaldaw, makaaramidkayto kadagiti nasaysayaat a desision—iti inaldaw. Ikarik a no utobenyo no ania ti adalenyo, maluktanto dagiti tawa ti langit, ket maawatyonto dagiti sungbat iti bukodyo a saludsod ken direksion iti biagyo. Ikarik a bayat iti inaldaw a panangiraremyo iti bagiyo iti Libro ni Mormon, masalaknibankayo a maibusor kadagiti dakes iti aldaw, (“The Book of Mormon: What Would Your Life Be Like without It?” Ensign wenno Liahona, Nob. 2017, 62–63).
Agkararag tapno Maammuan ti Kinapudno babaen ti Espiritu Santo
Gapu ta Ti Dios ti Amatayo, tulongannatayto a mangbigbig iti kinapudno. Mabalintayo nga ammuen a pudno ti mensahe ti Pannakaisubli ti ebanghelio ni Jesucristo bayat ti panangbasatayo iti Libro ni Mormon ken panagkararagtayo iti Dios. No agkararagtayo nga addaan pammati ken pudno a panggep, sungbatannanto dagiti saludsodtayo ken iturongna ti biagtayo.
Gagangay a sungbatan ti Dios dagiti kararagtayo babaen ti Espiritu Santo. Kabayatan ti panagkararagtayo, isuro ken patalgedan ti Espiritu Santo ti kinapudno. Nabileg dagiti komunikasion manipud iti Espiritu Santo. Gagangay nga umay dagitoy kas naulimek a pammatalged babaen kadagiti rikna, kapanunotan, ken impresiontayo (kitaen iti 1 Ar-ari 19:11–12; Helaman 5:30; Doktrina ken Katulagan 8:2).
Ti agtultuloy a panagadal kadagiti nasantuan a kasuratan (nangruna iti Libro ni Mormon), linawas a panagatendar iti miting ti sakramento, ken napudno a kararag ket tulongannatayo a makarikna iti bileg ti Espiritu Santo ken mangtakuat iti kinapudno.
Ababa agingga iti Kalalainganna a Balabala ti Adalen
Ti sumaganad a balabala ket maysa a pagarigan a mabalinmo nga isuro iti maysa a tao no ababa laeng ti panawenmo. No agusar iti daytoy a balabala, pumili iti maysa wenno ad-adu pay a pagbatayan nga isuro. Ti pundasion a mainaig iti doktrina para iti tunggal pagbatayan ket nasaksakbay a naited iti adalen.
Bayat ti panangisuroyo, agsaludsod ken dumngegkayo. Mangted kadagiti awis a mangtulongto kadagiti tao a makasursuro no kasano ti agbalin a nasingsinged iti Dios. Maysa a napateg nga awis ket makipagkita manen ti tao kadakayo. Ti kapaut ti adalen ket agpannurayto kadagiti saludsod a damagenyo ken ti panagdengngeg nga aramidenyo.
Ladawan
dagiti misionario a makisasao iti lalaki
No Ania ti Mabalinmo nga Isuro kadagiti tao iti 3–10 a Minuto
Ti Dios ti Nailangitan nga Amatayo, ket pinarsuanatayo iti ladawanna. Am-ammonatayo a personal ken ay-ayatennatayo. Kayatna a bendisionannatayo iti talna ken pakabuklan ti rag-o nga agpaut iti kinaagnanayon.
Ni Jesucristo ti Anak ti Dios. Misionna ti mangaramid a posible a madalusantayo kadagiti basoltayo, maparmektayo ti ipapatay, ken umawattayo iti biag nga agnanayon.
Awagan ti Dios dagiti propeta nga agbalin a pannakabagi iti daga. Idi un-unana, inawaganna dagiti propeta a kas kada Adan, Noe, Abraham, ken Moises. Umawat ti sibibiag a propeta iti paltiing manipud iti Dios tapno mangisuro ken mangidaulo kadatayo ita.
Kabayatan ti panagministro ni Jesus iti daga, impasdekna ti Simbaanna. Kalpasan ti ipapatay dagiti Apostol ni Jesus, adda nasaknap a pannakatnag manipud iti ebanghelio ken Simbaan ni Jesucristo. Binaliwan dagiti tao ti adu a pannursuro ti ebanghelio ken ordinansa iti priesthood, kas iti panagbuniag.
Inawagan ti Dios ni Joseph Smith nga agbalin a propeta, kas met laeng iti panangawagna kadagiti propeta kadagiti immun-una a panawen. Nagparang kenkuana ti Nailangitan nga Ama ken ni Jesucristo. Naisubli ti ebanghelio ni Jesucristo babaen kenkuana.
Ti Libro ni Mormon ket maysa a tomo ti nasantuan a kasuratan. Kas iti Biblia, maysa daytoy a tulag ni Jesucristo ken tulongannatayo nga umasideg iti Dios bayat ti panangbasatayo iti daytoy ken panangyaplikar kadagiti pammilinna. Impatarus ni Joseph Smith daytoy babaen ti sagut ken bileg ti Dios.
Babaen ti napudno a kararag, makasaritatayo iti Dios. Maammuantayo a pudno ti mensahe ti Pannakaisubli ti ebanghelio ni Jesucristo.