“Jebta 9: Pukōt Armej ro n̄an Katakin,” Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)

“Jebta 9,” Kwaļo̧k Gospel eo Aō

Jebta 9

Pukōt Armej ro n̄an Katakin

Ļōmņak kōn Menin

Ekōjkan aō maron̄ kōjerbal tōmak ilo Kraist n̄an pukōt armej ro n̄an katakin?
Ekōjkan ad maron̄ kōdepakpakļo̧k visōn eo ad im kōkōm̧anm̧anļok karōk ko ad n̄an pukōt armej ro n̄an katakin?
Ekōjkan aō eddōkļo̧k ilo maron̄ eo im lōk eo aō n̄an kōnono ippān armej ro ij ioon er kajjojo raan?
Ekōjkan ad maron̄ koba ippān membōr ro ilo leto letak gospel eo?
Ta eo jej aikuj kōm̧m̧ane n̄e jej bōk armej ro rej litok?
Ta jet iaan aitia ko n̄an pukōt armej ro n̄an katakin me jejjan̄in de kar kajjieon̄?

Jerkakpeje Rilo̧mo̧o̧r ekar jiron̄ rikaļoor ro An, “Innām kom̧win ilo̧k, im kōm̧man ri aelōn̄ ko otemjej bwe ren ri kaļora, im peptaij er ilo etan Jema im Nejin im Jetōb Kwōjarjar” (Matu 28:19; lale barāinwōt Mark 16:15). Irooj ekar āliji eddo in ilo tōre in ad, “Kom̧in ilo̧k ilo aolepān laļ, im kwaļo̧k naan kōn gospel eo” (Katak im Bujen Ko 68:8; lale barāinwōt 50:14).

Jerbal in mijenede ej n̄an pukōt armej ro, katakin er, im jipan̄ er m̧aanjabpopo n̄an peptaij. Kwonaaj kakūrm̧ool eddo eo an Irooj n̄an katakin gospel eo An im peptaij rioktak ro ilo am̧ “lo er im renaaj bōk kom̧ ” (Katak im Bujen Ko 42:8). Ejjeļo̧k men ej waļo̧k ilo jerbal in mijenede m̧ae iien eo kwoj lo juon n̄an katakin. Lale aolep iien n̄an iien ko rem̧m̧an n̄an kwaļo̧k kadkad in gospel eo. Katak n̄an kōjerbal wāween ko me rōwejepedik ilo eria eo am̧.

Eļap tata an aorōk n̄an jerbal ippān membōr ro ilo kappok. Buuļ jerbal n̄an bōk lōke eo aer. N̄e membōr ro rej lōke mijenede ro, eļapļo̧k aer maron̄ karuwaineneik ro m̧ōttaer im ro uwaan baam̧le eo n̄an ioon kom̧. Armej rein eļapļo̧k aer naaj oktak n̄an Irooj, peptaij, im eddōkļo̧k ilo iaļ in gospel eo.

Pukōt eo enaaj waļo̧k ekkar n̄an pojak eo an armej eo n̄an ron̄jake gospel eo. Iien eo enaaj oktak n̄an kajjojo armej. Pukōt eo emaron̄ tōprak jān juon iien iaio ak jān elōn̄ kōttan iaio ko ilo juon iien aitok. Elōn̄ armej ewōr aer jejjo iien iaio kko ippān mijenede ro ak membōr ro an Kabun̄ in mo̧ktak jān jinoin juon iien ekkatak gospel eo eļap. Jab āliklik in kepaak er bar juon alen.

Kijejeto ko am̧ n̄an pukōt emaron̄ in kwaļo̧k leen ālin am̧ em̧m̧akūt n̄an bar juon jikin ak em̧ool ālik am kadedeļo̧k mijen eo am̧. Jekdo̧o̧n ta iien eo ak jem̧ļo̧k eo, Irooj ej kam̧m̧oolol kōn kijejeto ko am̧.

Jebta in ej kōllaajrak pedped in katak ko im aitia ko n̄an jipan̄ eok kappok. Pedped in katak kein rej aolep jikin. Ijoke, mijenede ro im ritōl ro an mijen remaron̄ aikuj in ukukōt er n̄an jekjek ko aer.

Kōjerbal Tōmak n̄an Pukōt Armej ro n̄an Katakin

Jekdo̧o̧n ia eo kwoj jerbal ie, Irooj ekar kūr eok n̄an jerbal “lo̧mo̧o̧r an armej raņ” (Katak im Bujen Ko 100:4). N̄an kōm̧m̧ane menin, kwoj aikuj in kōjerbal tōmak ilo Kraist n̄an pukōt armej ro n̄an katakin bwe ren maron̄ kāālet n̄an ļoor E im pepaij.

Tōmak ej juon pedped in m̧akūtkūt im kajoor. Tōmak ilo Irooj ej kōpooj armej ro n̄an bōk gospel eo kar kōjepļaaktok. Kwon kijenmej lōke bwe E enaaj tōlļo̧k eok n̄an er, ak er n̄an kwe. Jerbale tōmak eo am̧ kōn kōm̧m̧an kōttōpar ko, kōm̧m̧ani karōk ko, im jerbale karōk ko am̧ n̄an pukōt armej ro n̄an katakin (lale jepta 8).

Jar kōn tōmak ilo am̧ kajjitōk kōn jipan̄ eo an Anij n̄an pukōt armej ro n̄an katakin. Ke Alma ekar tōl juon mijen n̄an Rizoram ro, ekar jar: “O Irooj, Kwōn letok n̄an kōm bwe kōmin maron̄ lo tōpran jerbal ilo bar bōktok er n̄an eok ilo Kraist. Lo, O Irooj, jetōb ko aer reaorōk … ; kōn menin, letok n̄an kōm, O Irooj, kajoor im mālōtlōt bwe kōmin maron̄ bōktok [er] bar n̄an Eok” (Alma 31:34–35).

Armej ro emakijkij am̧ ioon er rejjab kile bwe rej kappukōt gospel eo kar kōjepļaaktok m̧ae iien rej loe. N̄an waanjon̄ak, juon rioktak ekar ba, “Ke ikar ron̄ kōn gospel eo, ekar jeen̄ ro̧n̄ eo ilo būruō me ikar jab jeļā ekar pād ijo.” Bar juon ekar ba, “Ededeļo̧k aō kam̧ōj kappukōt eo ikarjab jeļā ikar pukōte.” Ro rej lukkuun kappukōt m̧ool eo bōtaab rejjab jeļā ia eo n̄an pukōte ie (lale Katak im Bujen Ko 123:12).

Kappukōt tōl eo an Jetōb ilo am̧ pukōt armej ro n̄an katakin. Pukōt kōn Jetōb eo ej aorōk in wōt katakin kōn Jetōb eo. Wōr tōmak bwe kwonaaj jeļā ekōjkan n̄an pukōt ro me renaaj bōk eo.

Ekkatak Ippān Kampānien Eo M̧ōttam̧

Emaron̄ wōr membōr ro ilo eria eo am̧ me rej rioktak ro n̄an Kabun̄ in. Kajjitōk ekōjkan aer kar itok n̄an jeļā kōn Kabun̄ in. Uwaak ko aer maron̄ lewaj n̄an eo kōļmenļo̧kjeņ ko kōn ekōjkan pukōt. Kajjitōk barāinwōt ekōjkan aer kar jeļā bwe mijenede ro raar katakin er m̧ool eo. Ba ilo tukadu in en̄jake ko aer ilo jōnōļ in ekkatak eo am̧.

Ekkatak Jeje ko Rekwojarjar

Ekōjkan an ajri ro nejin Anij kar kōppopo im tōl n̄an gospel eo kar kōjepļaaktok?

Kōdepakpakļo̧k Visōn eo Am̧ kōn Karōk n̄an Pukōt

Ilo am̧ kappukōt armej ro n̄an katakin, mejmejkaruo kōn oktak eo ikōtaan jikejuuļ eo im karōk eo. Jikejuuļ ej kanne bok in karōk eo am̧ im raan eo am̧. Karōk ej jar ilo kōm̧m̧an juon kijejeto, ilo kōttōpar n̄an kalimjōk wōt armej ro im wāween ko rem̧m̧an tata n̄an pukōt er.

M̧akūtkūt eo ejetjet, ilo iien eo ejetjet im ilo jikin eo ejetjet, kwomaron̄ ke lo armej ro n̄an katakin. Kajjitōk ippam̧ make kajjitōk kein:

Ia eo jemaron̄ ioon armej ro Irooj emaron̄ kōpooj er?
Ta jikin ko rem̧m̧an tata im kain m̧akūtkūt rōt ko n̄an pukōt armej ro ilo iien ko rejenolo̧k an raan eo ak wiik eo?
Ekōjkan ad kwaļo̧k iakwe, jerbal n̄an er, ak bōkļo̧k aorōk n̄an mour ko aer kiiō?
Ekōjkan ad maron̄ kōjerbal kajoor ko ad, kapeel ko, im tōļan ko n̄an ļōn̄aj er?
Ta karōk in jortoklik ko ad eļan̄n̄e juon men ejjab jerbal?

Kajjieon̄ in kile wāween ko me Irooj ej kōpooj armej ro kaki. Rej ke m̧ōņōņō in kōnono ippam̧? Rej ke kappukōk jipan̄ ak kaenōm̧m̧an?

Ļōmņak kōn kijejeto in kappok ko me raar wejepedik. Kar ia eo kein kajuon in iaio eo? Kijejeto ko raar ke kobaik membōr ro? Kar ke kōjerbal technology?

Jino karōk eo am̧ kōn kalimjōk wōt ekōjkan am̧ maron̄ kōjeraam̧m̧an armej ro, innām jikeuuļ eo am̧ enaaj waļo̧k ļōmān.

Ekkatak Ippān Kampānien Eo M̧ōttam̧

Ippān kampānien eo m̧ōttam̧, kōjerbal tebōļ eo itulaļ n̄an etale kijejeto ko am̧ ilo pukōt armej ro n̄an katakin. Karōk n̄an kajjieon̄e jet iaan aitia ko me rekāāl n̄an kwe.

Kijejeto in Kappok ko	Jet iien	Ekkā	Enan̄in Aolep Iien
Jej jeļā membōr ro im rie er ilo kijejeto ko aer n̄an leto letak gospel eo, ekoba membōr kāāl ro, jodikdik ro, ro me rej m̧aanjabpopo n̄an jerbali mijen ko, mijenede ro rej ro̧o̧l, baamle ko ejjab aolep rej membōr, im ro rej pojān elder.
Jej jerbal n̄an bōk lōke eo an membōr ro bwe renaaj ineem̧m̧an ilo kūr membōr ro an baam̧le eo aer im ro m̧ōttaer n̄an ioon kōj.
Jej jerbal ippān ritōl ro an ward eo ilo kweilo̧k in kōtōbalbal ko wiik otemjeļo̧k n̄an rie kijejeto in kappok koad im lale eļan̄n̄e ewōr armej ro jemaron̄ kepaak er.
Jej jerbal ippān armej ro kiiō rej katakin, armej ro m̧okta raar katak, im armej ro litok jān media n̄an pukōt er.
Jej kōnono ippān jon̄an lōn̄ in armej eo jemaron̄ kajjojo allōn̄.
Jej m̧aanjabpopo ilo jetōb im jar kōn jipan̄ eo an Anij ilo ad karōk n̄an pukōt armej ro n̄an katakin.
Ij tōmak bwe Irooj ej kōpooj armej ro n̄an kōm n̄an katakin.
Kōmij ļōmņak ekōjkan jipan̄ ro kōmij ioon er n̄an en̄jake kareel eo an Jetōb Kowjarjar.
Kōmij kōm̧m̧ani kōttōpar in kappok ko rejenolo̧k wiik otemjeļo̧k im raan otemjeļo̧k (lale jepta 8).
Kōmij jab bōjrak pukōt armej ro n̄an katakin.
Kōmij lo̧ļe im kōjerbal elōn̄ wāween ko n̄an pukōt armej ro. Kōmij kajjieon̄i wāween ko rekāāl im kabōjrak am pād wōt ilo juon jekjek.
Kōmij karōk eļap tata n̄an kappok. Kōmij karōk n̄āāt, ia, im ekōjkan am kalimjōk wōt.
Kōmij ļōmņak kōn jikin ko rem̧m̧an tata im awa ko an raan eo remaron̄ in n̄an pukōt armej ro n̄an katakin.
Kōmij ļōmņak kōn ta m̧akūtkūt in kappok ko raar wejepedik m̧otakļo̧k.
Kōmij ukukōt karōk in kappok ko am n̄e aikuj im en wōr karōk in jortokļik ko n̄e iien ko kar jikejuuļi rej tōprak.
Kōmij kōjerbal Kwaļo̧k Gospel eo Aō app eo n̄an pukōt, n̄an kōm̧m̧ani kōttōpar ko im kōm̧m̧ani karōk ko, im n̄an etale im bar kōkāāle rekoot ko am raan otemjeļo̧k.
Kōmij kōjerbal tōļan ko im kajoor ko am make n̄an jipan̄ kappok.
Kōmij karōk n̄āāt im ekōjkan am naaj kōjerbal social media im technology ko jet n̄an pukōt armej ro n̄an katakin.
Kōmij kōjerbal media m̧akūtkūt ko im jipan̄ ko ijo jokwe ie me rej tōpar itok limo ko im aikuj ko an armej ro ilo eria eo am.
Ej m̧ōkaj am uwaak n̄an kajjitōk ko ilo online im ennaan ko jān armej ro me remaron̄ in itok limo.
Kōmij karōk men ko kōmij likūt ilo social media m̧oktakļo̧k im jerbal ippān membōr ro n̄an pukōt ilo online.

Kwon Tiljek ilo Kappukōt

Kōm̧m̧an Bwe Kappok en juon Kijejeto Ejjab Bōjrak

Ilo raan ko m̧oktata an Kabun̄ in kōjepļaaktok, Irooj ekar ālij an jiron̄ juon kumi in em̧maan ro n̄an katakin gospel eo An “iaļ eo tok” ilo aer ito itak. E ekar kōņaan bwe ren kōjerbal aolep iien em̧m̧an n̄an kwaļo̧k gospel eo. (Lale Katak im Bujen Ko 52:9–10, 22–23, 25–27.)

Kōjerbal naan in kōmeļeļe in n̄an pukōt eo am̧. Kōm̧m̧ane juon kijejeto etiljek n̄an pukōt aolepān raan eo. Karōk kijejeto in kappok kko am̧—im barāinwōt pukōt iien ko rem̧m̧an kar jab karōki. Pukōt armej ro rekāāl n̄an katakin ej juon aikuj ejjab jem̧ļo̧k.

Kappukōt im̧we eo im m̧ōņōņō in kōjerbal elōn̄ wāween ko. Kalimjōk wōt wāween ko me eļap tata aer wejepedik ilo eria eo am̧.

Doori Wōt Eoo ko ilo Dān eo

Ikkijien jerbal an mijenede ro, Būreejtōn Dallin H. Oaks ekar ba;

“Ejjeļo̧k iaad en aikuj in āinwōt rieo̧n̄ad ro me rej ļōmņak ekar eo̧n̄ad aolepān raan eo ke ilo m̧ool ekar joļo̧k enan̄in aolep iien eo an etal n̄an im itok jān dān eo, m̧ōn̄ā rōraelep, im inepata kōn kein eo̧n̄ad ko an. Jeraam̧m̧an ilo eo̧n̄ad ej iookļok ewi aitokan am̧ door eoo eo am̧ ilo dān eo, ejjab n̄an ewi aitokan am̧ jako jān jikin jokwe eo am̧. Jet rieo̧n̄ad rej ettoļo̧k jān kapijuknen eo ium̧win jon̄oulruo awa ko im kōm̧m̧an bwe eoo eo aer ilo dān ium̧win jon̄oul awa ko. Rieo̧n̄ad ro jet raar ettoļo̧k jān kapijuknen eo ium̧win jon̄oulruo awa ko im kōm̧m̧an bwe eoo eo aer en pād ilo dān eo ium̧win wōt ruo awa ko. Jekjek in āliktata emaron̄ ļōmņak etke rejjjab bōk ejja jeraam̧m̧an in wōt an āinwōt ro jet.

“Ejja pedped in katak in wōr ej jerbal n̄an mijenede ro, eo M̧aajta eo ekar ņa etan ‘ri eo̧n̄ad armej’ [Matu 4:19]. Eoo eo an juon mijenede ej aikuj door laļļo̧k n̄an dān in eo̧n̄ad eo ilo iien eo ej ilo̧k jān jikin jokwe eo an” (seminar for new mission presidents, June 20, 2000).

Elder Quentin L. Cook ekar kōdepakpakļo̧k keidi in. Ilo kakobaba n̄an door wōt “eoo eo ilo dān eo” ium̧win tōre ko raittok, ekar katakin bwe mijenede ro rej pukōt armej ro n̄an katakin rej “ejjab jemļo̧k aer likūt elōn̄ eoo ko ilo dān eo. …

“Rej kili im kepaak baam̧le ko ejjab aolep rej memebōr.

“Rej etale [Kwaļo̧k Gospel eo Aō app] eo aer kōn armej ro me raar katakin er m̧okta n̄an kepaak er kōn talboon ak jeje ilo talboon.

“Rej kōm̧m̧an jerbal in jipan̄ n̄an membōr ro, armej ro me raar katakin jem̧aan, armej ro kiiō rej katatkin, im jukjuk in pād eo eļap tata. …

“Rej jipan̄ membōr ro ejake ennaan ko an gospel eo n̄an kwaļo̧ki ilo social media… jibadbad ko aer make.

“Rej bōk armej ro liļo̧k jān armej ro rej loļo̧k im katakin” (“Be Spiritual Pathfinders and Influencers,” missionary devotional, Sept. 10, 2020; kōmejaja kar kakobaba).

Ekkatak Ippān Kampānien Eo M̧ōttam̧

Ekōnono kōn kajjitōk kein:

Ta jet iaan wāween ko kwomaron̄ door wōt “eoo eo ilo dān eo” aitokļo̧k jān juon raan?
Ta jet iaan wāween ko kwomaron̄ door wōt elōn̄ eoo ko ilo dān eo ilo am̧ pukōt armej ro n̄an katakin?
Ta jekjek ko ilo Kwaļo̧k Gospel eo Aō app eo remaron̄ jipan̄ eok?
Ekōjkan am̧ maron̄ kōjerbal technology n̄an jipan̄ eok door wōt elōn̄ eoo ko ilo dān eo?

Kōnono ippān Aolep

Kōļapļo̧k juon ikdeelel em̧wilaļ n̄an bōktok jetōb ko n̄an Kraist (lale Mosaia 28:3). N̄e kwoj en̄jake ikdeelel in, am̧ iakwe im n̄ūrbōktak naaj waļo̧k ilo kijejeto ko am̧ n̄an pukōt. Am iakwe enaaj barāinwōt waļo̧k ilo bwebwenato ko am̧.

Kōnono ippān jon̄an lōn̄ in armej eo kwomaron̄ kajjojo raan. Kōnono ippāer jabdewōt jikin kwoj etale ie ļo̧k. Ijo ekkar, etal jān em̧ n̄an em̧. Irooj ekar kōmeļeļeik jet iaan elder ro m̧okatat an Kabun̄ in, “Kōpeļļo̧ke lo̧n̄iiūm n̄an kwaļo̧k gospel eo aō.” Innām E ekar kallim̧ur bwe lo̧n̄ier enaaj kar “obrak” kōn ta eo n̄an katakin (Katak im Bujen Ko 30:5; lale barāinwōt 33:7–10).

Ejjeļo̧k oktak, Irooj ekar jiron̄ Josep Smith im Sidney Rigdon, “Kotak ainikiōmiro n̄an armej rein; ekkōnono ļōmņak ko Inaaj likūt ilo būruōmiro, im kom̧ ro jamin naaj pok im̧aan armej raņ.” Innām E ekar kallim̧ur, “Bwe naaj lewōj e n̄an kom̧ro … ilo iien eo wōt, ta kom̧ro naaj ba” (Katak im Bujen Ko 100:5–6).

Ilo am̧ ioon armej ro, enaaj emakijkij am̧ en̄jake an Jetōb eo jipan̄ eok jeļā ta eo n̄an ba. Ijo ke, eļan̄n̄e kwojjab en̄jak juon im̧we, baj jino juon jikin—bōlen kōn kajjitōk juon kajjitōk im ron̄jake uwaak eo aer (lale “Pukōt Armej ro Ijo Rej Pād ie” ilo jebta in). Ak bōlen kōnono kōn Irooj Jisōs Kraist ak kōn kūr eo an Josep Smith n̄an erom juon rikanaan an Anij.

Ļoor aitia ko emaron̄ jipan̄ eok kōnono ippān ro kwoj ioon er:

Kwon ineem̧m̧an, m̧ool, im jouj. Kappukōt wāween ko n̄an ekkejel ippān armej ro im jino juon bwebwenato.
Ron̄jake ilo m̧ool n̄an ta eo armej ro rej ba. Kappukōt n̄an meļeļe aikuj ko im itok limo ko an kajjojo armej. Leļo̧k jipan̄ eo am̧ make n̄e ekkar.
Ļōmņak kōn ekōjkan an gospel eo maron̄ jipan̄ tōpar aikuj ko aer. Innām katakin juon m̧ool an gospel eo epidodo im kajjitōk ippāer n̄an katak eļapļo̧k. Kwaļo̧k ekōjkan an gospel eo kar kōjepļaaktok maron̄ bōktok eļapļo̧k kōjatdikdik im meļeļe n̄an mour ko aer.
Kajjitōk kōn baam̧le ko aer. Jipan̄ er lo ekōjkan an gospel eo kar kōjepļaaktok maron̄ kōjeraam̧m̧an baam̧le ko aer. Leļo̧k jipan̄ n̄an er n̄an pukōt āt ko etan rūtto ro aer remej.
Kajjitōk ippāer n̄an itok n̄an kweilo̧k in kwojkwoj eo.
Leļo̧k bok jiddik ko ak kein katakin ko jet an Kabun̄ in, jim̧or ko ilo jeje im digital.
Kwaļo̧k ippāer jibadbad eo am̧ āinwōt juon mijenede im etke kwar kāālet n̄an jerbale juon mijen.

Pedped in katak in kein rej barāinwōt jerbal n̄an iaio ko am̧ ippān membōr ro.

Ekkā an waļo̧k āinwōt juon men kam̧m̧oolol kake kōn kōnono ippān armej ro. Jar kōn tōmak im peran n̄an katakin gospel eo kar kōjepļaaktok. Aolep ro kwoj ioon er ej ro jeiūm̧ im jatūm̧ ilo baaam̧le eo an Anij. Keememej bwe E “ejjeļo̧k ej kabbōjrak e jān an itok Ippān, kilmeej im mouj, rilokjak im rianemkwōj, m̧aan im kōrā; … aolep rej āinwōt juon n̄an Anij” (2 Nipai 26:33).

Ekkatak Am̧ Make im Ippān Eo M̧ōttam̧

Riiti bwebwenato eo jān Victor Manuel Cabrera ilo “Thirsting for the Living Water,” Ensign, Aug. 2001, 60–61. Ilo am̧ riiti, lale elmen an kar kōppopo n̄an bōk mijenede ro im elmen an mijenede ro kar kōjerbal iien eo em̧m̧an jab karōk n̄an katakin gospel eo.

Ekōjkan an em̧m̧aan eo kar pojak n̄an gospel eo kar kōjepļaaktok?
Ta eo enaaj kar waļo̧k eļan̄n̄e elder ro raar jab kwaļo̧k juon ennaan gospel eo?
Etale ta eo kwar kōm̧m̧ane inne. Kwar ke kōnono ippān elōn̄ armej ro jon̄an wōt komaron̄ in kar? Eļan̄n̄e jaab, kōm̧m̧ani kōttōpar ko im kōm̧m̧ani karōk ko n̄an kōnono ippān elōn̄ armej ro rainin.

Ekkatak Jeje ko Rekwojarjar

Ta eo kwomaron̄ katak jān eoon kein kōn pukōt armej ro n̄an katakin? Ta eo kwomaron̄ katak jān eoon kein kōn ta eo kwoj aikuj katakin? Ta eo Irooj ekar kallim̧ur kake?

Katak im Bujen Ko 24:12; 28:16; 33:7–15; 60:2–3, 7

Koba ippān Membōr ro

“Karuwaineneik aolep n̄an bōk gospel eo ej m̧ōttan jerbal in lo̧mo̧o̧r im mour aiboojoj eo eutiej tata” (Bok in Bōk Meļeļe Eļap, 23.0). Jerbal ippān membōr ro an Kabun̄ in n̄an pukōt armej ro n̄an katakin. N̄e membōr ro rej lewaj juon armej n̄an kwe innān bōk koņaer ilo katak ko, armej ro remaron̄ in peptaij im niknik wōt ilo Kabun̄ in.

Kalōk Jemjerā ko Rekajoor ippān Ritōl ro Ijo Jokwe ie

Kalōk jemjerā ko rekajoor ippān bisoprik eo im ritōl ro jet an ward eo. Ritōl mijen an ward eo (eļan̄n̄e juon kar kūri) im būreejtōnji ko an doulul eo an elder ro im Doulul eo an Kōrā ro rej ro kwoj kepak er eļaptata. Kappukōt tōl eo aer, im rie er ilo kweilo̧k in kōtōbalbal ko wiik otemjeļo̧k (lale jepta 13).

Ilo kweilo̧k in kōtōbalbal ko wiik otemjeļo̧k, jerbal ippān rijipan̄ eo an doulul eo an pris ro im kūlaaj būreejtōn eo an Doulul eo an Jiron̄ ro n̄an kūlaaj eo erūttoļo̧k. Jodikdik rein ewōr ippāer juon jerbal aorōk ilo leto letak gospel eo. Jipan̄ er kōketak ro uwaan dolulul eo ak kūlaaj eo n̄an leto letak gospel eo. Juon wāween ej n̄an an jodikdik ro karuwaineneik ro m̧ōttaer n̄an m̧akūtkūt ko.

Iien otemjej kajjitikin eok make, “Ij ke juon kōjeraam̧m̧an n̄an ritōl ro ijo jokwe ie?” Ejake juon m̧wil an “Ekōjkan aō maron̄ jipan̄?” Āinwōt Ammōn ilo Bok in Mormon, kepaak ritōl ro ijo jokwe ie kōn juon m̧wil in jerbal in jipan̄ (lale Alma 17:23–25).

N̄an ritōl ro an mijen, Būreejtōn Russell M. Nelson ekar katakin: “Ij kōjatdikdikbwe kom̧ naaj katak n̄an iakwe ritōl ro im membōr ro ijo jokwe ie. Ļōn̄aj er im imwe er. Maron̄ eo ami n̄an kobaik ellwetak eo an mijenede ro ippān kijin̄en̄e eo im kijejeto ko rem̧m̧an an membōr ro ejjab maron̄ in katōr jān jon̄an. Wejepedik eo am̧ enaaj orļo̧k wōt ļap” (“Hopes of My Heart,” seminar for new mission leaders, June 23, 2019).

Rie Membōr ro ilo Kijejeto ko Aer n̄an Kwaļo̧k Gospel eo

Elōn̄ wāween ko n̄an rie im kōketak membōr ro ilo leto letak gospel eo. Jipan̄ er kejekļo̧kjeņ kōn ekōjkan an gospel eo kar kōjeraam̧m̧an mour ko aer. Kōketak er n̄an “kotak [aer] meram bwe en maron̄ kōmeramļo̧k laļ” (3 Nipai 18:24).

Jipan̄ membōr ro kōjerbal pedped in katak eo an iakwe, kwaļo̧k, im kūr. Leļo̧k waanjon̄ak ko kōn wāween ko rekkā im make waļo̧k remaron̄ kōjerbal pedped in katak kein.

Iakwe. Juon wāween n̄an kwaļo̧k iakwe n̄an Anij ej kōn iakwe im jerbal n̄an ajri ro Nejin. Kōketak membōr ro n̄an pukōtļo̧k ro uwaan baam̧le eo kōn iakwe, ro m̧ōttaer, ro rutiūrier, im ro jet. Jabdewōt kijejeto n̄an kwaļo̧k iakwe ej juon wāween aorōk n̄an kōjparok bujen ko raar kōm̧m̧an ippān Anij (lale Mosaia 18:9–10).

Kwaļo̧k. Kōnke kōn iakwe eo aer n̄an Anij im ajri ro Nejin, membōr ro rej make kōņaan kwaļo̧k kōjeraam̧m̧an ko E ekar liļo̧k n̄an er (lale Jon 13:34–35). Kōketak membōr ro n̄an jiron̄ ro jet kōn ekōjkan an gospel eo kōjeraam̧m̧an mour ko aer. Kōketak er n̄an kōnono kōn Rilo̧mo̧o̧r eo im kareel eo An. Jipan̄ er en̄jake lan̄lōn̄ eo an kwaļo̧k iakwe eo aer, iien, im iien ko ilo mour. Jipan̄ er katak ekōjkan n̄an kwaļo̧k ilo wāween ko iminene kaki im rej make waļo̧k—ejja m̧ōttan ta eo em̧ōj aer kōm̧m̧an kadede ilo mour ko aer.

“Jej aolep kwaļo̧k men ko ippān ro jet Emakijkij ad kōm̧m̧ane. Jej kwaļo̧k ta pija ko im m̧ōn̄ā ko rem̧m̧an ippād, men ko rōkam̧ōņōņō jej loi, jikin ko jej loļo̧k, jin̄a ko jej nōbari, kout ko jej im̧we kaki.

“Ekōjkan ad maron̄ kakkobabatok n̄an laajrak in men ko em̧ōj kadede ad kwaļo̧k kōn ta eo jej iakwe kōn gospel eo an Jisōs Kraist?. … Jān kwaļo̧ke en̄jake ko ad rem̧m̧an ilo gospel eo ippān ro jet, jej bōk koņaad ilo kakūrm̧ool kean̄ eo eļap an Rilo̧mo̧o̧r eo” (Gary E. Stevenson, “Iakwe, Kwaļo̧k, Karuwainene,” Liaona, Māe 2022, 86).

Karuwainene. Rilo̧mo̧o̧r ej karuwaineneik aolep n̄an bōk gospel eo An im m̧aanjabpopo n̄an mour indeeo (lale Alma 5:33–34). Ikkijien kwaļo̧k, karuwainene ej emakijkij an juon men ekoba baam̧le, ro m̧ōttad, im ro rituriid ilo ta eo membōr ro emōj aer kōm̧m̧an kadede. Kōketak membōr ro n̄an jar kōn karuwaineneik armej ro ilo wāween kein:

Itok im lale. Karuwaineneik armej ro n̄an “itok im lale” kōjeraam̧m̧an ko remaron̄ būki kōn Jisōs Kraist, gospel eo An, im Kabun̄ eo An.

1:17
Itok im jerbal. Karuwaineneik armej ro n̄an “itok im jerbal” n̄an ro jet ilo aikuj.
Itok im uwaan. Karuwaineneik armej ro n̄an “itok im uwaan” āinwōt membōr ro an Kabun̄ eo an Jisōs Kraist kar kōjepļaaktok.

Elder Gary E. Stevenson ekar ba: “Ewōr buki karuwainene ko jemaron̄ liļo̧k n̄an ro jet. Jemaron̄ karuwaineneik ro jet n̄an ‘itok im lo’ juon iien kwojkwoj, juon m̧akūtkūt an ward, juon online pija in alooj me ej kōmeļeļeik gospel eo an Jisōs Kraist. ‘Itok im lo’ emaron̄ juon karuwainene n̄an riit Bok in Mormon ak loļo̧k juon tampeļ kāāl ilo iien kōppeļļo̧k eo an m̧okta jān aje eo. Jet iien karuwainene eo ej juon men eo jej letok n̄an kōj make—juon karuwainene n̄an kōj make, letok n̄an kōj jeļā eo im visōn eo kōn iien ko rem̧m̧an ipeļakiid n̄an kōm̧m̧ane” (“Iakwe, Kwaļo̧k, Karuwainene,” 86).

Kanooj lale n̄an jipan̄ jodikdik ro iakwe, kwaļo̧k,im karuwainene. Jodikdik ro eļap tata aer kapeel ilo iakwe ro m̧ōttaer, kwaļo̧k ta eo ej pād ilo būruwier, im karuwaineneik ro jt n̄an m̧akūtkūt ko.

Jipan̄ membōr ro meļeļe bwe jabdewōt kijejeto n̄an mour kōn pedped in katak ko an iakwe, kwaļo̧k im karuwaienen ej em̧m̧an, men̄e aaet ak jaab armej eo ej ioon mijenede ro ak kobatok ilo Kabun̄ in.

Jipan̄ membōr ro atartar ioon kajoor ko aer ilo kwaļo̧k gosel eo. Jet eļap aer jeļā pukōt armej ro n̄an katakin, im jet rej rūkaki ro rem̧m̧an. Jet ewōr juon aer maron̄ n̄an ekkejel ippān ro m̧ōttaer, ilo an ro jet iakwe jar kōn ro m̧ōttaer. Jipan̄ er lo bwe elōn̄ wāween ko n̄an aolep n̄an bōk koņan ie.

N̄e kwoj loļo̧k membōr ro, kōm̧m̧an menin kōn juon jibadbad. Kwaļo̧k ta eo kwoj lo̧udin̄din̄ in bōk koņam̧ ie ilo jerbal in pukōt im katakin. Kautiej iien im jikejuuļ eo aer.

Jet membōr remaron̄ karuwaineneik eok n̄an katakin juon ennaan jān juon iaan katak ko. M̧ool ko an gospel eo rej ukōt mour. Kōkajoorļo̧k meļeļe eo an membōr ro kōn gospel eo enaaj kōļapļo̧k lōke eo aer ilo kwe im kalōk itok limo eo aer n̄an kwaļo̧ke. Jipan̄ er kile Jetōb eo im jerbali im̧we ko.

Kappukōt n̄an lo armej ro n̄an katakin kōn baam̧le ko rejjab aolep membōr, ro ej pojān erom elder ro, membōr ro rej bar ro̧o̧ltok, im membōr ro rekāāl. Enaaj maron̄ lōn̄ ro uwaan baam̧le eo im ro m̧ōttaer jān kabun̄ ko jet.

Ilo aolep men kwoj kōm̧m̧ani ippān membōr ro, ļoor Jetōb eo im kappukōt n̄an kalōk tōmak eo aer ilo Rilo̧mo̧o̧r, Jisōs Kraist.

Kōn elōn̄ļo̧k aitia ko im kein jipan̄ ko kōn ekōjkan am̧ maron̄ rie membōr ro ilo kwaļo̧k gospel eo, lale:

share.ChurchofJesusChrist.org.
“Sharing the Gospel” ilo Gospel Library eo.
Kwaļo̧k Gospel eo Aō, jebta 13.
Bok in Bōk Meļeļe Eļap, jebta 23.

Kallim̧ur Kōjeraam̧m̧an ko kōn Kwaļo̧k Gospel eo

Jipan̄ membōr ro meļeļe kōjeraam̧m̧an ko rekabwilōn̄lōn̄ an kwaļo̧k gospel eo. Men kein rekoba:

Lan̄lōn̄ im aenōm̧m̧an (lale Katak im Bujen Ko 18:10–16; Alma 26:11, 13, 35; Alma 36:24–28).
Rejtake kajoor eo jān Anij (lale Mosaia 18:8–13; Jon 15:4–5).
Kōjparok jān kapo (lale 3 Nipai 18:24–25).
Jeorļo̧k bōd in jerawiwi ko Katak im Bujen Ko 62:3).

Ekkatak Ippān Kampānien Eo M̧ōttam̧

Etale kweilo̧k in kōtōbalbal eo wiik otemjeļo̧k eo ļo̧k Ekōjkan am̧ maron̄ in kar kōm̧m̧ane bwe en wejepedikļo̧k? Etale kajjitōk ko jān ritōl ro an ward eo im karōk ekōjkan im n̄āāt eo n̄an uwaak.
Karōk ekōjkan am̧ naaj kōtōbalbal kijejeto in mijenede ko am̧ ilo kweilo̧k in kōtōbalbal eo tok juon.
Katak etan ritōl ro an ward eo (em̧m̧aan im kōrā ro). Karōk ta eo kwonaaj kōm̧m̧ane ilo allōn̄ eo tok juon n̄an kalōk jemjerā ko rekajoorļo̧k ippāer im rie er ilo kijejeto in mijenede ko aer.

Pukōte kōn Kwaļo̧k Gospel eo Aō App eo

Kwaļo̧k Gospel eo Aō app eo ej juon kein jipan̄ aorōk n̄an pukōt armej ro n̄an katakin. Mijenede ro me ejjab bōjrak aer kōjebal ļamļam ko ilo app in eļapļo̧k aer wejepedik ilo kappok. N̄an jeļā kōn ļamļam kein, etal n̄an kaminene eo kar letok ilowaan app eo. Mejmej karuo kōn im̧we ko ilo jetōb kwomaron̄ būki ilo aer etale āt ko etan armej ro.

App eo ekitbuuj meļeļe ko kōn armej ro me raar leļo̧k etaer im̧aanļo̧k, kepaak, ak katakin. Jet iaan armej rein remaron̄ kōņaan ioon mijenede ro bar juon alen. Remaron̄ barāinwōt jeļā kōn armej ro jet me remaron̄ itok lim ilo katak kōn gospel eo.

Ilo karōk eo am̧, kōjerbal mab eo im filter ko ilo app eo n̄an karōk ewi wōt armej ro n̄an loļo̧k. Lali meļeļe ko aer im katak ekōjkan kar lo er. Lale eļan̄n̄e ewōr juon ļo̧o̧k kōn membōr ro me raar jipan̄ er. Kōjerbal meļeļe in n̄an kōmlet ewi wōt men eo em̧m̧an tata n̄an pukōtļo̧k er bar juon alen.

Kōjerbal filter ko ilo app eo n̄an kile aolep ro me:

Kar jikejuuļ iien peptaij m̧oktaļo̧k bōtaab raar jab peptaij.
Kar etal n̄an juon kweilo̧k in kwojkwoj juon alen bōtaab kar jab peptaij.
Kar bōk eļōn̄ļo̧k jān jilu katak ko.
Kar jan̄in bar kepaak er kiiō epaak.

Eļan̄n̄e armej ro kwoj kepaak er rejjab itok limo in katak ak kāālet n̄an bōjrak jān loļo̧k, ļo̧oki meļeļe jab kein ilo app eo. Ļo̧o̧ke ekōjkan am̧ naaj kepaak er im naajdrik er m̧ae iien rej pojak in katak eļapļo̧k. N̄an waanjon̄ak, ļōmņak in kajjitōk ippāer n̄an sign up n̄an email n̄an bōk ennaan ko kōn Jisōs Kraist ak unin kōnono ko jet an gospel eo. Kwomaron̄ barāinwōt ekkejel ippāer ippān juon membōr eo emaron̄ uwaaki kajjitōk ko im naajdik itok limo eo aer im jemjerā eo. Kōm̧m̧ane juon kein kakeememej ilo app eo n̄an etale ļo̧kanļo̧k ippāer. Kajjitōk eļan̄n̄e rejeļā jabdewōt eo emaron̄ itok limo.

Kwomaron̄ barāinwōt lo armej ro n̄an katakin kōn Kwaļo̧k Gospel eo Aō app eo n̄an kōjerbal filter ko ak kumi ko n̄an jilkinļo̧k ennaan ko āinwōt kumi. Meni emaron̄ in juon wāween aorōk n̄an karon̄ armej ro jeļā kōn iien ko āinwōt m̧akūtkūt ko an ward im iien peptaij ko. Etale ļo̧kanļo̧k kōn kūr ko an juon make n̄an iien kein.

Ekkatak Ippān Kampānien Eo M̧ōttam̧

N̄an lo an Kwaļo̧k Gospel eo Aō app eo maron̄ juon kein jipan̄ em̧m̧an ilo pukōt, kajjieon̄ m̧akūtkūt kein: Ilo am̧ kōm̧mani, leļo̧k am̧ n̄an im̧we ko kwoj būki.

Kōjerbal juon filter, kile aolep armej ro me kar katakin er jilu ak lōn̄ļo̧k katak ko. Karuwaineneik er kajjojo n̄an etal n̄an jar Jabōt in.
Ejake juon filter im pukōt aolep ro me rekar jikejuuļi juon iien peptaij im kar etal n̄an jar ruo alen.
Karōk n̄an ennanōk armej ro kajjojo n̄an koba ilo juon m̧akūtkūt an ward eo ak būroojāāk in jerbal in jipan̄. Jān iien n̄an iien kwomaron̄ kōņaan jilkinļo̧k juon ennaan ilo kumi im etale ļo̧kan ļo̧k ippān armej ro kajjojo.
Ekōnono ippān kampānien eo m̧ōttam̧ ro me kwar en̄jake im̧we kake er. Kōm̧m̧ani karōk ko n̄an loļo̧k ak n̄e ejjab kepaak er kiiō wōt.

Pukōt kōn Jerbal in Jipan̄

Leļo̧k Iien ko Rem̧m̧an n̄an Armej ro n̄an Itok im Jerbal

Armej ro emaron̄ wōr aer en̄jake ko rem̧m̧an im ekkejel ippān mijenede ro im membōr ro ijo jokwe ie ilo m̧akūtkūt in jerbal in jipan̄ ko. Elōn̄ armej rej m̧ōņōņō n̄an kwaļo̧k tōļan ko, kapeel ko aer, ak jerbal in jipan̄ ko im rej aikuj wōt n̄an karuwainene.

Karuwaineneik armej ro n̄an bōk konaer ilo m̧akūtkūt in jerbal in jipan̄ ko kar ejaki jān ward eo. Kwomaron̄ barāinwōt kakkejel armej ro ippān iien ko rem̧m̧an an jerbal in jipan̄ ko ko āinwōt ilo JustServe.org ijio ewōr ie. Kwoj ke jerbal ippān ro jet, kom̧j itok ippān doon ilo juon wāween ekajoor.

Leļo̧k Jerbal in Jipan̄

Āinwōt Rilo̧mo̧o̧r eo, “[ilo̧k] kōm̧anm̧an em̧man” (Jerbal 10:38; lale barāinwōt “Ilo̧k im Kōm̧man Em̧m̧an” ilo jebta 1). Jar n̄an jeļā kōn iien ko rem̧m̧an n̄an kōm̧m̧an em̧m̧an ilo aolep kajjojo raan. Jet iien jerbal in jipan̄ eo am̧ naaj karōke, bōtaab emakijkij annaaj jab karōke. Pukōt wāween ko reļem waan im m̧ōkaj n̄an jerbal, jipan̄ im ļōn̄aj armej ro. Keememej bwe Irooj ekar bōk iien ko rem̧m̧an kar jab kōtmeni n̄an pukōtļo̧k im kōjeraam̧man ro jet.

Jerbal kōn juon ikdeelel em̧ool n̄an jipan̄ armej ro. Eļan̄n̄e jerbal in jipan̄ eo ej tōlļo̧k n̄an juon iien em̧m̧an n̄an katakin, kam̧m̧oolol kake. Eļan̄n̄e jaab, innām kwon kam̧m̧oolol bwe kwar kōm̧m̧an em̧m̧an n̄an juon. Uwaaki kajjitōk ko eļan̄n̄e armej ro rej kajjitōk kaki. Eļan̄n̄e juon ej kwaļo̧k itok limo, uwaak ilo tukadu in im karōk n̄an ioon doon ilo juon bar iien n̄an kwaļo̧k juon ennaan,.

Kanooj lale n̄an ļoor unin tōl ko n̄an jerbal in jipan̄ ilo Jon̄ak ko an Mijenede n̄an Rikaļoor ro an Jisōs Kraist, 2.7 im 7.2.

Pukōt Armej ro Ijo Rej Pād ie

Pukōt armej ro ijo rej pād ie ej ijjino kōn kajjieon̄ in lo er āinwōt an Anij lo er. Kōtmene bwe maron̄ kar tōlļo̧k eok n̄an kōnono ippān armej in, ak maron̄ kar tōlwaj armej in n̄an eok. Kappukōt meļeļe eo kōn aikuj ko ilo jetōb im ikdeelel ko an armej eo. Pukōt ta eo aorōk tata n̄an er, eļap tata jemjerā ko aer ippān baam̧le im Anij. Kwomaron̄ kajjitōk kajjitōk ko āinwōt kein itulaļ—innām lukkuun in ron̄jake:

Ta eo kwoj kaorōk eļap tata?
Ta eo ej lewaj n̄an eok lan̄lōn̄?
Ta eo kwoj kōņaan n̄an ilju im jekļaj eo am̧ make im ro kwoj iakwe er?
Ta apan̄ ko kwoj jelm̧ai ilo kōttōparļok kōjatdikdik ko im ettōņak ko am̧?
Ta m̧ōttan ko an mour eo am̧ kwoj kōņaan kōkōm̧anm̧anļo̧k?

Kappukōt im̧we eo ilo am̧ kejekļo̧kjeņ kōn ta eo kwoj katak kōn kōjatdikdik ko im ikdeelel ko an armej eo. Ta m̧ool ko an gospel eo rej make ekkejel ippān ta ej kōņaan?

Ļōmņak kōn wāween am̧ kōnono kōn kōļmenļo̧kjeņ eo an armej eo. Ta eo ejeļā kōn kwe? Ta eo kwomaron̄ leļo̧k me emaron̄ in jipan̄? Armej eo ej ke en̄jake bwe iaio ippam̧ enaaj wōr tokjān?

Ļōmņak kōn un ko rooktak jān doon armej ro remaron̄ kōņaan jeļā kajjiōm̧. membōr ro jet, ak Kabun̄ in. Jet waanjon̄ak ko kōn ta eo kwomaron̄ leļo̧k rej ellaajrak itulaļ.

Leļo̧k En̄jake ko ak Meļeļe eo Renaaj Kaorōke

Kōjerbal kein jipan̄ ko an Kabun̄ in im tōļan ko im kajoor ko am̧ make n̄an kobaiki ippān itok limo ko an juon. Kappukōt jipan̄ eo an Jemedwōj Ilan̄ ilo leļo̧k meļeļe ko ak en̄jake ko armej eo naaj kaorōki.

Kwon peļļo̧k n̄an im̧we eo im kwon loļe ilo am̧ ļōmņak kōn kain en̄jake ko rooktak jān doon ak meļeļe ko kwomaron̄ liļo̧k. Jet iaan aitia ko rej ellaajrak itulaļ.

Kwaļo̧k juon link n̄an juon kein jipan̄ an Kabun̄ in me ej leļo̧k meļeļe ko kōn juon men me enaaj kaitok limoier.
Bōk eddo in iien eo āinwōt juon nukun (ilo likieo in armej ak streaming live).
Leļo̧k juon men ilo juon iien ain doon ak m̧akūtkūt ijo jokwe ie (n̄an waanjon̄ak, ejake juon wōjke an baam̧le an menmenbwij ilo juon jikin wia kake ijo jokwe ie).
Ba bwe kwoj kōņan katakin juon kūlaaj.
Ejake juon kūlaaj in ekkatak jeje ko rekwojarjar, ak ba bwe kwoj riiti Baibōļ eo im jeje ko rekwoarjar jet ippāer.
Katakin Kajin In̄lij āinwōt kajin eo kein karuo.
Kōjjeļā kōn m̧akūtkūt ko an Kabun̄ in ijo jokwe ie āinwōt juon holiday bade ak kūlaaj ko an un̄are-peid make. Kōjerbal flyer ko ak social media.
Karuwaineneik er n̄an juon iien peptaij.
Ba kwoj kōņaan kōm̧m̧ane juon iien alooje m̧ōņ jar eo ijo jokwe ie.

Juon iaan en̄jake ko raorōk tata kwomaron̄ jipan̄ armej ro bōke ej etal n̄an juon iien jar an Kabun̄ in. Karuwaineneik er im kōmeļeļeik enaaj ewi jekjek in. Jiron̄ er kōn ekōjkan an etal n̄an juon kweilo̧k in kwojkwoj naaj kōjeraam̧man mour ko aer.

Jipan̄ Kōpeļaak Jemjerā ko Rem̧ool.

Elōn̄ armej renaaj kōņaan ioon ro jet ilo jukjuk in pād eo aer ak en em̧m̧anļo̧k aer jeļā kajjier. Jet armej rej make iaer. Jet aitia ko n̄an jipan̄ kōpeļaak jemjerā ko rem̧ool rej ellaajrak itulaļ.

Loļo̧k armej ro me rej kab em̧m̧akūt waj n̄an eria eo n̄an karuwaineneik er.
Kwaļo̧k kadkad in armej ro ilo jukjuk in pād eo n̄an membōr ro me eier wōt juon itok limo ko aer.
Karuwaineneik armej ro n̄an kweilo̧k ko an ward eo, m̧akūtkūt ko, im iien kōppeļo̧k kaloojoj ko an m̧weo.
Ba bwe kwoj kōņaan jipan̄ er ekkejel ippān ritōl ro an bwebwenato an tampeļ im menmenbwij an baam̧le, eo emaron̄ jipan̄ er katak eļapļo̧k kōn ro uwaan baam̧le eo aer raar mej.
Ba bwe kwon kōņaan katakin armej ro kōn ekōjkan kōm̧man nokon in jota ak riiti jeje ko rekwojarjar āinwōt juon baam̧le. (Lale Bok in Bōk Meļeļe Eļap, 2.2.4, kōn pepded in katak ko rejipan̄ me maron̄ ukukōti n̄an jekjek ko an armej ro.)
Karuwaineneik armej ro me ejetjet iiō eo aer n̄an etal n̄an jemeneri, etal n̄an institute, ak bōk koņan ilo BYU-Pathway Worldwide eo.

Elōn̄ wāween ko rem̧m̧an n̄an pukōt ro me em̧ōj kōpooj er n̄an gospel eo kar kōjepļaaktok. Kōm̧m̧ane ta eo kwomaron̄ kōm̧m̧ane n̄an likūt ilo iaļ eo an ro me kar kōpooj er.

Ekkatak Ippān Kampānien Eo M̧ōttam̧

Kile jet aitia ko ilo jekjōn me kwojjan̄in de kar kajjieon̄. Kōm̧m̧ani karōk ko n̄an kajjieon̄e et iaan aitia ko ilo wiik eo ej itok.

Kepaak Armej ro kar Lewaj n̄an Kwe

Armej ro kar liwaj n̄an kwe maron̄ in pojak n̄an bōk gospel eo an Jisōs Kraist. Rein liwaj remaron̄ iwōj jān membōr ro an Kabun̄ in, mijenede ro jet, opiij ko an Kabun̄ in, im kijejeto ko an social media ijo jokwe ie.

Pukōtļo̧k Ilo Iien Em̧ōkaj

N̄e juon armej kar lewaj n̄an eok jān opiij ko an ak social media ijo jokwe ie, etale meļeļe ko ilo Kwaļo̧k Aō Gospel appe eo kōn itok limo ko aer. Kajjieon̄ kepaak er ilo iien eo em̧ōkaj tata.

Kōjerbal unin tōl kein n̄e jerbal ippān armej kar liwaj n̄an kwe:

Eļan̄n̄e armej eo kar lewaj n̄an eok jān juon membōr ak jān mijenede ro jet, kepaak armej eo me ekar jilkinwaj lewaj eo n̄an katak eļapļo̧k. Eļan̄n̄e mijenede ro raar lewaj armej eo, remaron̄ in katakin ippām ilo online eļan̄n̄e ritōl eo an mijen eo aer ej kōmālim. Membōr ro remaron̄ koba ippam̧ ilo kanem armej ak online n̄an bōk koņan ilo katakin.
M̧ōkaj in kajjieon̄ n̄an kepaak armej eo kōn juon loļo̧k, talboon, jeje, email, ak wāween leto letak meļeļe ko jet. Eļan̄n̄e armej eo ejjab uwaak, kajjieon̄ kepaak e ilo juon iien oktak in raan eo.
Eļan̄n̄e kepaak eo am̧ im̧aan tata ekar kōn talboon, ak email, karōk juon iien n̄an ioon doon ilo liko in armej ak kōn technology.
Āinwōt juon kampānien, etale kajjitōk eo an armej eo im kile aikuj ko im itok limo ko an. Jokāālet ekōjkan an gospel eo maron̄ jipan̄ tōpar aikuj ko.
N̄e kom̧ij ioon doon, bōktok jabdewōt aitōm ko kar kajjitōk kaki, eo āinwōt Bok in Mormon. Kwaļo̧k m̧ool ko an gospel eo jān katak ko an mijenede me rej tōpar itok limo ko im aikuj ko an armej eo.

Jet iien armej ro me kar liwaj remaron̄ tōlļo̧k eok n̄an ro jet me Anij ej kōpooj er. Eļan̄n̄e armej ro kwoj kepaak er rejjab itok limo, kajjitōk eļan̄n̄e rejeļā ro jet me remaron̄ in itok limo ak eo ej aikuj kōjatdikdik ilo mour ko aer. Bōlen kar tōlļo̧k eok n̄an armej in kōnke bar juon ilo m̧weo ak peļaak eo ej pojak n̄an gospel eo.

Eļan̄n̄e juon iien loļo̧k ippān juon armej ekar tōprak, ļōmņak kōn ekōjkan am̧ maron̄ kōm̧m̧ane bar jet jerbal in mijenede ilo eria eo. Kwaļo̧k Aō Gospel app eo emaron̄ jipan̄ eok pukōt armej ro repaak me kar kepaak er im̧aanļo̧k ak ka katakin.

Armej ro Liļo̧k n̄an Mijenede ro ilo Bar Juon Eria

N̄e kwoj ioon armej ro me rej itok limo in katak eļapļo̧k kōn gospel eo ak rej jokwe itulikin eria eo am̧ kar kappeik, kwaļo̧k kadkadier n̄an gospel eo. Innām jipan̄ er kōppopo n̄an ioon mijienede ro im membōr ro ijo rej jokwe ie.

Kōn mālim eo an mijen būreejtōn eo, kwomaron̄ wōnm̧aanļo̧k wōt n̄an rie aramej rein n̄an jipan̄ er bōk gospel eo (lale Jon̄ak ko an Mijenede, 7.5.4).

Ekkatak Ippān Kampānien Eo M̧ōttam̧

Etale aolep armej ro me kar liwaj ilo eria eo am̧ ilowaan wōt allōn̄ eo ļo̧k. Kile jabdewōt armej ro kwar jab maron̄ kepaak er, im kajjieon̄ in kepaak er bar juon alen. Jokāālet ewi wōt ro me kar kepaak er aikujin bar loļo̧k er. Bar kōkāāli rekoot kein ilo Kwaļo̧k Gospel eo Aō .app eo.

Kōjerbal Technology

Elōn̄ wāween ko kwomaron̄ kōjerbal technology n̄an pukōt armej ro n̄an katakin. Jet waanjon̄ak ko rej ellaajrak itulaļ:

Kōjebal social media n̄an jerbal ippān membōr ro pukōt armej ro.
Kalōk jemjerā ko kōn pukōtļo̧k kōn email im social media.
Kwaļo̧k eoon ko rej ļōn̄aj, kout ko, im ennaan ko an gospel eo
Jipan̄ armej ro kōjrbal FamilySearch.org n̄an katak eļapļo̧k kōn ro uwaan baam̧le eo raar mej.
Leļo̧k kūlaaj ko ilo online n̄an katakin kapeel ko.
Kōm̧m̧ani ekkejel ko rejetjet n̄an kwaļo̧k ippān kumi ko rej itok limo ilo online.
Kōm̧m̧ane juon ennaan me ej kwaļo̧k kōn iien ko an ward eo rej itok wōt.

Kōjerbal technology ej juon wāween aorōk n̄an door wōt “elōn̄ eoo ko ilo dān eo” ilo aolepān raan eo. Ilo kakobaba n̄an kijejeto in kappok ko am̧, door wōt elōn̄ ļain in intōrnet peļļo̧k.

Elder David A. Bednar ekar katakin: “Technology ej letok elōn̄ channels ko rekajoor kōn eo jemaron̄ kean̄ kōn ‘Jisōs Kraist, im an kar debwāāl’ im ‘kwaļo̧k ukweļo̧k n̄an armej ro’ [1 Korint 2:2; Katak im Bujen Ko 44:3]. Diktak in epepen eo ekanooj jetjet aer kar m̧aanjabpopo n̄an ron̄jake im katak kōn gospel eo kar kōjepļaaktok kōn kein letok letak meļeļe ko” (“They Should Proclaim These Things unto the World,” seminar for new mission presidents, June 24, 2016).

Ekkatak Ippān Kampānien Eo M̧ōttam̧

Pukōt ta eo mijen eo am̧ ej kōm̧m̧an kōn social media. Ekōnono ippān kampānien eo m̧ōttam̧ ekōjkan am̧ maron̄ kōm̧m̧ani ennaan ko ilo social media me rej ekkejel ippān menin. Ennaan ko am̧ rej aikuj ļoor kakien eo an Kabun̄ in kōn intōrnet (lale “Internet” ilo jekjōn 38.8 in Bok in Bōk Meļeļe Eļap).

Eļan̄n̄e mijen eo am̧ ewōr juon an social media specialist, pedped ioon tijem̧ļo̧k eo an ilo am̧ kōm̧m̧ani ennaan ko ilo social media.

Kōjerbal Menmenbwij an Baam̧le

Menemenbwij an baam̧le ej bar juon wāween kwomaron̄ lo armej ro n̄an katakin. Ilo aolepān laļ in, Jetōb eo ej kareel milien armej ro an kile rūtto ro aer raar mej. Elōn̄ rej kōņaan juon ekkejel ekajoor ippān ro nukun baam̧le eo. Menin emaron̄ tōlļo̧k n̄an juon ikdeelel n̄an pukōt juon ekkejel im āt āinwōt m̧ōttan baam̧le eo an Anij.

Ta eo kōjjet iien kōnono kake āinwōt jetōb in Ilaija ej kareel eo an Jetōb Kwojarjar ej bōkļo̧k armej ro n̄an kile, likūt ilo jeje, im kautiej ro uwaan baam̧le eo aer— jim̧or etto im kiiō (lale Malakai 4:5–6).

Ilo kappok eo am̧, kwomaron̄ kwaļo̧k n̄an armej ro FamilySearch.org ak kajjitōk ippāer n̄an downloadi FamilySearch Tree app eo ak FamilySearch Memories app eo. Kwomaron̄ barāinwōt leļo̧k n̄an er juon kape in bok jidikdik eo My Family: Stories That Bring Us Together. Kein jipan̄ kein rej jipan̄ armej ro lo ro nukier im rūtto ro aer im ain bwebwenato ko aer.

Jokāālet ta kein jipan̄ ko an menmenbwij an baam̧le ewōr ilo eria eo am̧ im ekōn̄kan aer maron̄ jipan̄ armej ro kwoj kōnono ippāer. Ritōl eo an ward tampeļ im menmenbwij an baam̧le emaron̄ jipan̄ armej ro kile rūtto ro aer raar mej.

Kajjitōk ippān armej ro n̄an kwaļo̧k ememļo̧kjeņ ko kōn ro rejtōnbōro ippam̧. Ilo aer kōm̧m̧ane, remaron̄ en̄jake an Jetōb Kwojarjar eo kam̧ool n̄an er kōn aorōk eo an baam̧le ko ilo karōk eo an Anij. Iien kein remaron̄ tōlļo̧k n̄an iien bwebwenato ko rej make waļo̧k kōn jibadbad in mour, karōk in m̧ōņōņō eo an Anij, im jerbal eo an Rilo̧mo̧o̧r lo karōk jab in.

N̄e ekkar, katakin armej ro katak eo kōn etke memōr ro an Kabun̄ rej kōm̧m̧an jerbal in menmenbwij an baam̧le im ekōjkan aer iookļo̧k tampeļ.

Jar n̄an jeļā kōn iien ko rem̧m̧an n̄an kōjerbal menmen an baam̧le ilo kijejeto in kappok ko am̧. Kwon lo̧ļe, im jeļā kōn kein jipan̄ ko ewōr.

Ekkatak Jeje ko Rekwojarjar

Ekkatak eoon kein rej ellaajrak kōn menmenbwij an baam̧le. Ļo̧o̧ke ta eo kwoj katak.

Kajoor in Liāp Kōjepļaaktok kōn Ilaija

Jerbal kōn ro Remej

Ekkatak Am̧ Make im Ippān Kampānien Eo M̧ōttam̧

Kajjeon̄e juon ak elōn̄ļo̧k m̧akūtkūt kein n̄an jipan̄ eok pukōt kōn menmenbwij an baam̧le.

Kōm̧m̧an karōk n̄an loļo̧k ippān juon membōr me ewōr an en̄jake ko kōn menmenbwij an baam̧le. Katak kōn ta jerbal in jipan̄ ko ewōr jān ippān ritōl eo an tampeļ im menmenbwij an baam̧le an ward eo.
Kōmālmel ekōjkan am̧ naaj leļo̧k jipan̄ kōn menmenbwij an baam̧le n̄an ro kwoj ioon er. Kōm̧m̧ani karōk ko n̄an leļo̧k menmenbwij an baam̧le ilo kijejeto in kappok ko am̧.
Riiti im ekōnono kōn Families and Temples (Baam̧le ko im Tampeļ ko) bok jidikdik eo n̄an bōk juon meļeļe kōn jerbal in menmenbwij an baam̧ļe ekajoor. Je ta eo kwoj katak kake ilo jōnōļ in ekkatak eo am̧.
Kōjerbal My Family bok jidikdik eo ak FamilySearch.org kein jipan̄ ko ilo am̧ pukōt armej ro n̄an katakin.
Ijo emaron̄, kōm̧m̧ane juon iien kaloojoj in kōppeļļo̧k, katakin juon kūlaaj in menmenbwij an baam̧le ilo juon jikin ilo̧bwilej, ak leļo̧k kōkapilōklōk ko.

Pukōt N̄e Kwoj Katakin

Kappukōt im katakin rej m̧akūtkūt ko reier wōt juon. Armej ro kwoj katakin emakijkij an lōn̄ ro m̧ōttaer ak nukier me rej pojak n̄an bōk gospel eo kōjepļaaktok. Ilo an armej ro kwoj katakin en̄jake kōjeraam̧m̧an ko an gospel eo, ikdeelel eo aer n̄an kwaļo̧k enaaj ļapļo̧k (lale 1 Nipai 8:12). Ilo aolep jekjek ko—ko āinwōt kappukōt, katakin, im jerbal ippān membōr ro—kajjitōk, “Won eo kwojeļā enaaj jeraam̧m̧an jān ennaan in?”

N̄e ro kwoj katakin rej pojak n̄an iien peptaij eo aer, kajjitōk ippāer kōn baam̧le im ro m̧ōttan rej kōņaan karuwaineneik er n̄an peptaij eo aer. Kōm̧m̧ani karōk ko an karuwainene im kōketak aolep n̄an itok. Jetōb eo emaron̄ maron̄ en̄jake ekajoor ilo juon iien peptaij.

Ekkatak Ippān Kampānien Eo M̧ōttam̧

Etale juon laajrak in armej ro kwojj katakin. Kōm̧m̧ane juon laajrak in armej ro kom̧ kar kajjitōk kōn ro rilwaj im ro kom̧ kar jab kajjitōk. Kōmālmel ekōjkan amiro naaj leļo̧k juon kūr in ro liwaj n̄an ro ilo kajjojo kumi. Ilo bok in kōm̧m̧an karōk eo am̧, kōm̧m̧ane juon kakeememej n̄an leļo̧k kūr in ilo leļo̧k eo amiro tok juon.

Katakin N̄e Kwoj Lo

Ilo ami ioon armej ro im kile itok limo ko im aikuj ko aer, ejake juon iminene in jino katakin im kwaļo̧k naan in kam̧ool eo am̧. Kwonaaj lo elōn̄ļo̧k armej ro n̄an katakin ilo am̧ kam̧ool kōn Rilo̧mo̧o̧r eo im gospel eo an im kōm̧m̧an bwe ren en̄jake kajoor eo an Jetōb Kwojarjar.

Ļōmņak in katakin kōn unin kōnono ko āinwōt m̧ōņōņō, men ko reppen, jibadbad eo an mour in, ak mej. Jabdewōt men eo m̧oktata kwe kōm̧m̧ane, kōnono kake ilo m̧ōkaj im ļam waan n̄an Rilo̧mo̧o̧r eo, gospel eo An, im kūr eo an n̄an Rikanaan Josep Smith. Menin ej ennaan eo ad ejej uwaan n̄an laļ in.

Jekjōn kein rej letok waanjon̄ak ko kōn ekōjkan am̧ maron̄ ilo tukadu in katakin kōn Jepļaaktok eo an gospel eo an Jisōs Kraist im aorōk eo an baam̧le.

Katakin im Kam̧ool kōn Jepļaaktok eo an Gospel eo an Jisōs Kraist

Kam̧ool kōn Jisōs Kraist im katakin ilo tukadu in ennaan ko an m̧ool eo kōjepļaaktok. N̄an waanjon̄ak, kwomaron̄ kam̧ool kōn jepļaaktok eo an gospel eo an Jisōs Kraist ilo ruo ak jilu jentōj ko.

Ālkin buki iiō ko in an kar jako, m̧ool ko raar bar kōjepļaaktok jān juon Anij ej iakwe kōn juon rikanaan emour. Ewōr ippād kein kam̧ool eo kōn menin me kwomaron̄ jibwe ilo peiūm̧, riiti, im kejekļo̧kjeņ ilo būruōm̧. Kōmij karuwaineneik eok n̄an riit im jar n̄an katak kōn m̧ool ko an kōn kwe make. Kwonaaj ke kōtļo̧k bwe kōmin …

Eļan̄n̄e ewōr jikin bar am̧ iien, kwomaron̄ ba elōn̄ļo̧k:

Ennaan eo am eļem waan. Anij ej Jemedwōj. Jej ajri ro Nejin. Jej m̧ōttan baam̧le eo An. E ejeļā kōj kajjojo im iakwe kōj. E ekōņaan bwe jen en̄jake lan̄lōn̄. Jān jinoin jān laļ in, E ekar ļoor juon jon̄ak in pukōtļo̧k ilo iakwe n̄an kwaļo̧k gospel eo an Jisōs Kraist bwe ajri ro Nejin ren maron̄ jeļā ekōjkan bar ro̧o̧l n̄an Ippān. E ekar kwaļo̧k gospel eo n̄an rikanaan ro āinwōt Adam, Noa, Ebream, im Moses. Bōtaab elōn̄ armej ro raar āliji im bar āliji jab bōk gospel eo im rikanaan ro me raar katakin kake. Ruo taujin iiō ko ļo̧k, Jisōs Kraist E make ekar katakin gospel eo An. Em̧ool armej ro raar jab bōk Jisōs. Ālkin mej eo an Rijilōk ro an Jisōs, armej ro raar ikūr katak eo em̧ool, eo āinwōt kōn Doulul in Anij. Raar barāinwōt ukōk kain̄i ko, eo āinwōt peptaij.

Kūr eo am n̄an eok ej n̄an kobaikļo̧k n̄an m̧ool ko em̧ōj am̧ kaorōki kadede. Ļōmņak kōn kein kam̧ool eo bwe Jemedwōj Ilan̄ ekar bar juon alen pukōtļo̧k ajri ro Nejin ilo iakwe im kar kwaļo̧k katak eo em̧ool im kain̄i ko n̄an juon rikanaan. Etan rikanaan in ej Josep Smith. Kain kam̧ool eo an m̧ool in ej loe ilo juon bok—Bok in Mormon. Kwomaron̄ jibwe ilo peiūm̧, riiti, im kejekļo̧kjeņ kake m̧ool ko an ilo ļōmņak eo am̧ im būruōm̧. Kōmij karuwaineneik eok n̄an etal n̄an jar n̄an katak eļapļo̧k.

Katakin im Kam̧ool kōn Aorōk eo an Baam̧le.

Kōnono kōn aorōk eo an baam̧le enaaj jipan̄ eok lo armej ro n̄an katakin, men̄e ewōr ippāer juon jeļā an Rikūrijin ak juon eo ejjab Rikūrijin. Kwomaron̄ m̧ōkaj in kōnon okōn ta eo elōn̄ wōt armej rejeļā kōn baam̧le n̄an karōk in lo̧mo̧o̧r eo an Jemedwōj Ilan̄. Kwomaron̄ ba juon men āinwōt in:

Baam̧le eo am emaron̄ juon iaan kareel ko raorōk tata ilo mour ko am. Baam̧le eo am ej lukōj kōm n̄an doon im emaron̄ jipan̄ kōm en̄jake an aikuj in iakwe.

Wōr juon baam̧le ekajoor, em̧ōņōņō ej menin kōttōpar eo eutiej tata n̄an elōn̄ armej. Wōr juon m̧are ekajoor im karūttoļo̧k ajri ro ilo laļ rainin emaron̄ in lukkuun in apan̄.

Innām kwomaron̄ kōm̧m̧ane juon oktak n̄an ennaan eo an Jepļaaktok eo:

Kwar juon m̧ōttan baam̧le eo an Anij jān m̧okta jān am̧ kar ļotak. E ej Jemād. Jemedwōj Ilan̄ ej kōņaan bwe jen bar ro̧o̧l n̄an Ippān. Kwoj Nejin,im E ej iakwe eok. Ewōr juon An karōk n̄an jipan̄ eok bar ro̧o̧l n̄an Ippān.

M̧ool kein im ko jet em̧ōj aer bar jepļaaktok n̄an laļ in jān Jemedwōj Ilan̄ eo ej iakwe kōn juon rikanaan emour. M̧ool kein rej jipan̄ eok meļeļe ijo jikid ilo baam̧le eo an Anij. Kōm maron̄ ke katakin eok eļapļo̧k kōn m̧ool kein? Kwonaaj ke etal n̄an jar bwe kwon maron̄ katak eļapļo̧k?

Ekkatak Ippān Kampānien Eo M̧ōttam̧

Kōpooj juon ennaan juon minit pedped ioon juon iaan katak ko ilo jebta 3. Kōmālmel kwaļo̧ke ippān doon. Ļōmņak kōn wāween ko kwomaron̄ kwaļo̧k ennaan in ilo juon jekjek in kappukōt. Karōk n̄an kwaļo̧ke ilo juon jekjek ejetjet n̄an karuwaieneik ro jet n̄an katak eļapļo̧ kōn Jisōs Kraist.

Ejjeļo̧k Kijejeto Ejjeļo̧kTokjān

N̄e armej ro rej kāālet n̄an jab katak eļapļo̧k kōn gospel eo kōjepļaaktok, kijejto ko am̧ rejjab ejjeļo̧k tokjāer. Bōlen kwar katōk juon ine eo me enaaj eddōkļo̧k ilo bar juon iien, Men̄e ej waļo̧k ak jaab, jerbal in jipan̄ eo am̧ im kakōļļe ko kōn iakwe em̧ool renaaj kōjeraam̧m̧an jim̧or kwe im er.

Eļan̄n̄e armej ro rejjab pojak n̄an bōk gospel eo, lale bar ta eo kwomaron̄ kōm̧m̧ane n̄an kōkōm̧anm̧anļo̧k mour ko aer. Jemjerā ko kwoj ejaki ej wōr wōt meļeļeier im raorōk. Wōnm̧aanļo̧k wōt in juon m̧ōttā.

Armej ro jet iien rej aikuj iien n̄an ļōmņak kōn oktak ko me kar kajjitōk ippāer. Jipan̄ er etale ennaan ko jān email ko ak webstie ko an Kabun̄ in. Ennaan kein remaron̄ jipan̄ kōpooj armej ro n̄an bōk kūr ko ilju im jekļaj n̄an katak eļapļo̧k.

N̄e juon armej ejjjab bōk gospel eo, Ejjab bōd n̄an inepata. Ijo ke, ilo am̧ oktakļo̧k n̄an Irooj ilo kain iien rōt kei, E ekar kallim̧ur, “Inaaj kakajoor eok, aet, Inaaj jipan̄ eok; aet, Inaaj bo̧ur eok” (Aiseia 41:10).

Kōn tōmak ilo Kraist, kwomaron̄ lo aenōm̧m̧an im kam̧ool kōn kijejeto ko am̧. Dāpij wōt visōn eo kōn wōn kwe im etke kwoj jerbal n̄an Irooj āinwōt juon mijenede. Tōmak enaaj jipan̄ eok bun̄ m̧aanļo̧k im wōnm̧aanļo̧k wōt ilo ikdeelel ko rejim̧we.

Ļōmņak ko n̄an Ekkatak im Kōjerbale

Ekkatak Am̧ Make

Riiti Jon 15:12, Jon 21:15–17, 1 Tessalonika 2, im Mosaia 18:8–10. Ewi jon̄an am̧ m̧ōņōņō in kakūrm̧ool eddo eo am̧ n̄an iakwe im jerbal n̄an ro jet? Ekōjkan am̧ maron̄ em̧m̧anļo̧k? Je uwaak ko am̧ ilo jōnōļ in ekkatak eo am̧.
Riiti 3 Nipai 18:31–32, Alma 24:7–8, im Alma 32:41. Ta eo eoon kein rej katakin kōn jerbal ippān armej ro me kar katakin er m̧oktaļo̧k? Ļo̧o̧ke ta eo kwoj katak ilo jōņōļ in ekkatak eo am̧. Katakin kake n̄an kampānien eo m̧ōttam̧.

Ekkatak Ippān Kampānien Eo M̧ōttam̧ im Iien Jānij Kampānien

Kōm̧m̧ani karōk ko n̄an ioon membōr ro rekāāl ilo eria eo am̧. Eļan̄n̄e aikuj, kōjerbal Kwaļo̧k Gospel eo Aō app eo n̄an kūle er. Kajjitōk kajjitōk ko āinwōt kein:
- Ekōjkam̧ kar kar m̧aanjabpopo n̄an gospel eo?
- N̄āāt im ekōjkan am̧ kar ilo jinoin jeļā kōn Kabun̄ in?
- Ta eo ekar im̧we eok n̄an ioon mijenede ro?
- Ekōjkan am kar rejtake eddōļo̧k eo am̧ ejjab jem̧ļo̧k?
Jān ioon doon kein, ta eo kwar katak kōn kappukōt armej ro me rej wōnm̧aanļo̧k n̄an peptaij? Kōm̧m̧ani karōk ko n̄an kōjerbal ta eo kwoj katak ilo wiik in.
Etale kajjojo unin kōnono kein: Kōjeral katak ko ilo jebta 3, kōpooj juon kile kappok eļem waan. Kōmālmel katakin ilo juon jekjek in kappok.
- En̄jake juon aikuj kōn eļapļo̧k tōl im jibadbad ilo mour in.
- Kōņaan en̄jake epakeļo̧k Anij.
- Aikuj jipan̄ kōn jokāālet ko raorōk.

District Ko̧o̧njeļ, Kweilo̧k ko Reļļap an Zone, im Ko̧o̧njeļ an Ritōl ro an Mijen

Riiti im ekōnono kōn “Kōdepakpakļo̧k Visōn eo Am̧ kōn Karōk n̄an Pukōt” jekjōn eo. Kōm̧m̧an bwe kajjojo m̧ōttā en kadedeļo̧k etale eo.
- Ekōnono kō ekōjkan an aitia kein kar jipan̄ mijenede ro pukōt armej ro n̄an katakin.
- Kōllaajrake aitia ko jet n̄an kappok armej n̄an katakin. Kūr mijenede ro n̄an kwaļo̧k aitia ken.
- Kūr mijenede ro n̄an kōm̧m̧ani kōttōpar ko an juon make n̄an kōkōm̧anm̧anļo̧k kijejeto ko aer.
Ejake juon laajrak in jejjo iien ko rem̧m̧an an kappok.
- Jitōn̄ kajjojo mijenede juon iaan iien ko rem̧m̧an. Leļo̧k n̄an kajjojo mijenede ļalem minit ko n̄an kōpooj ekōjkan an naaj kar katakin m̧ōttan katak eo ilo jekjek eo kar kappeik kake.
- Kōmejajaik aikuj eo n̄an dāpij wōt aitokan ennaan eo ilo jetjet n̄an jekjek eo.
- Kūr jejjo mijenede ro n̄an katakin katak eo raar karōke ilo jekjek eo aer kar kappeik.
Kūr mijenede ro n̄an kōmālmel kwaļo̧k juon ennaan an gospel eo ilo juon-minit ippān doon. Kwomaron̄ kōņaan kōm̧m̧ane elōn̄ jekjek in kappok ko, eo āinwōt katakin ilo juon im̧ōn membōr, katakin ilo m̧aan kōjām eo, katakin ilo juon iaļ, ak kepaak eo lewaj. Kōm̧m̧an bwe mijenede ro ren kōmālmel ilo kajjojo jekjek kein.

Ritōl ro an Mijen im Rikakpilōklōk ro an Mijen

Kōm̧m̧ane juon waanjon̄ak in jerbal in membōr-mijenede ilo baam̧le eo am̧. Kwaļo̧k en̄jake ko am̧ ippān mijenede ro im membō ro.
Kapilōk ippān ritōl ro an priesthood im doulul ko ijo jowke ie kōn wāween ko rem̧m̧an tata n̄an mijenede ro n̄an kappok armej n̄an katakin ilo mijen eo am̧.
Ejaki noko ko an mijenede me kwomaron̄ kōnono n̄an armej ro kar katakin ilo mijen eo am̧. Kōtōbalbal ippān ritōl ro an priesthood ijo jokwe ie bwe membōr ro ren maron̄ pād ainwōt ro m̧ōttan. Kūr membōr ro rekāāl n̄an kwaļo̧k naan in kam̧ool ko aer im kwaļo̧k bwebwenato in arto artak ko m̧okta jān am̧ kōnono.
Jān iien n̄an iien etal ippān mijenede ro n̄an jipan̄ er kappok armej n̄an katakin.