“Jebta 12: Jipan̄ Armej ro M̧aanjabpopo n̄an Peptaij im Kapen,” Kwaļo̧k Gospel eo Aō: Juon Unin Tōl n̄an Leto Letak Gospel eo an Jisōs Kraist (2023)

“Jebta 12,” Kwaļo̧k Gospel eo Aō

Jebta 12

Jipan̄ Armej ro M̧aanjabpopo n̄an Peptaij im Kapen

Ļōmņak kōn Menin

Ekōjkan aō maron̄ jipan̄ armej ro m̧aanjabpopo n̄an peptaij im kapen?
Ekōjkan aō kōm̧m̧ane juon intōrpiu in peptaij?
Ekōjkan an juon iien peptaij ekōbōkakka kar karōke im kōm̧m̧ane?
Etke ej aorōk n̄an kadedeļo̧k im jilkinļo̧k Boom̧ in Peptaij im Kapen eo?
Ekōjkan aō maron̄ rie membōr ro rekāāl?

Peptaij ej juon kain̄i elan̄lōn̄ an kōjatdikdik me ej bōktok kajoor an Anij n̄an mour an juon armej. Kajoor jab in ej itok kōn bōk menin letok eo an Jetōb Kwojarjar. Enaaj wōnm̧aanļo̧ wōt ilo an armej eo niknik n̄an jem̧ļo̧kin ilo kōjparok bujen peptaij eo.

Jibadbad eo an katakin eo am̧ ej n̄an jipan̄ ro jet kalōk tōmak eo aer ilo Jisōs Kraist. Āinwōt an Mormon kar katakin, “leen ko m̧oktata an ukeļo̧k ej peptaij” (Moronai 8:25). Āinwōt an armej ro kwoj katakin kōjparok kallim̧ur ko kwoj kūr er n̄an kōm̧m̧an, renaaj pojak n̄an kōm̧m̧ani im kōjparok bujen ko ippān Anij im lem̧ōņōņō kōn kōjeram̧m̧an ko kar kallim̧ur kaki.

Peptaij im kapene rejjab mejān kajjik eo āliktata. Ijello̧kin, kain̄i kein rej oror eo me ajri ro nejin Anij rej deļo̧n̄e iaļ in bujen eo. Iaļ in ej tōlļo̧k n̄an kain̄i ko, bujen ko, im kōjeraam̧m̧an ko relem̧ōņōņō an tampeļ—im āliktata n̄an mour indeeo (lale 3 Nipai 11:20–40).

Men ko Aikuji n̄an Peptaij im Kepen

Anij ej kūr aolep ajri ro Nejin n̄an itok n̄an E kōn peptaij im kapen (lale 2 Nipai 26:33; 3 Nipai 27:20). Men ko aikuji n̄an peptaij rej juon wōt n̄an aolep.

Jān Katak im Bujen Ko 20:37:

Kōttāik eok make im̧aan Anij.
Ikdeelel n̄an peptaij.
Wōnm̧aantak kōn juon bōro erup im jetōb ettā.
Ukweļo̧k jān aolep am̧ jerawiwi im jar kōn jeorļo̧k bōd
M̧ōņōņō in bōk ioom̧ make etan Kraist.
Wōr juon kije n̄an jerbal n̄an Kraist n̄an jem̧ļo̧kin.
Kwaļo̧k kōn jerbal ko am̧ bwe kwar bōk Jetōb eo an Kraist n̄an jeorļo̧k jerawiwi ko am̧.

Jān Būreejtōnji eo Kein Kajuon im Doulul eo an Jon̄oulruo Rijilōk ro:

Uwaak jetjet n̄an kajjitōk in intōrpiu in peptaij ko.
Bōk aolep katak ko an mijenede.
Ioon būreejtōn eo an doulul eo an elder ro, būreejtōn eo an Doulul eo an Kōrā, im bisop eo.
Etal n̄an jejjo kweilo̧k in kwojkwoj eo.

Men kein aikuji rej kakōļļe ko an eddōk in oktak eo ilo jetōb. N̄e armej ro rej tōpar men kein aikuji, rej pojak n̄an kain̄i ko rekwojarjar an peptaij im kapene.

N̄e armej eo ej kapen juon iien peptaij:

Kanooj etale rekoot eo an ilo Kwaļo̧k Aō Gospel app eo n̄an kanooj lale bwe kwar katakin katak eo im kallim̧ur eo emenin aikuj.
Kōm̧m̧ane juon jikejuuļ n̄an m̧akūtkūt ko me rej aikuj n̄an m̧aanjabpopo n̄an peptaij im kapen. Etale jikejuuļ eo ippān armej eo.
Eļan̄n̄e emaron̄, kūr armej eo n̄an etal n̄an juon iien peptaij m̧okta jān peptaij eo an make.

Ekkatak Jeje ko Rekwojarjar

Ekkatak eoon kein. Ekōjkan am̧ maron̄ jipan̄ ro kwoj katakin m̧aanjabpopo n̄an peptaij im kapen? Ļo̧o̧ke ta eo kwoj katak jān ekkatak eo am̧.

Jipan̄ Armej ro M̧aanjabpopo n̄an Intōrpiu in Peptaij eo Aer

Intōrpiu in peptaij eo juon bun̄tōn aorōk n̄an kanooj lale bwe armej eo ej tōpar men ko aikuj n̄an peptaij an Irooj. Jikejuuļi juon iien intōrpiu in peptaij wōt n̄e armej eo ej pojak.

Jipan̄ armej ro kōppopo n̄an intōrpiu eo aer bwe ren en̄jake aenōm̧m̧an kake. Kōmeļeļeik ewi naaj jekjek in. Jiron̄ er bwe renaaj ioon bar juon mijenede āinwōt kwe.

Kōmeļeļeik jibadbad eo an intōrpiu eo. Ej juon iien em̧m̧an n̄an er n̄an kam̧ool bwe em̧ōj aer kar “ukeļo̧k jān aolep jero̧wiwi ko aer [im] kanooj kwaļo̧k jān jerbal ko aer bwe rekar bōk jān Jetōb eo an Kraist n̄an jeorļo̧k in jero̧wiwi ko aer” (Katak im Bujen Ko 20:37).

Kwaļo̧k kajjitōk ko eo ej intōrpiu enaaj kajjitōk (lale itulaļ). Menin ej jipan̄ armej pojak n̄an uwaaki.

Kanooj lale bwe armej eo en meļeļe ta eo kwar katakin im bujen eo enaaj kōm̧m̧an ilo peptaij. Bujen in ej n̄an:

M̧ōņōņō in bōk ioon etan Jisōs Kraist.
Kōjparok kien ko an Anij.
Jerbal n̄an Anij im ro jet.
Niknik n̄an jem̧ļo̧kin. (Lale katak 4.)

Kwaļo̧k naan in kam̧ool kōn kōjeraam̧m̧an ko reļļap me rej itok jān peptaij im kapen im kōjparok bujen peptaij eo. Kōjeraam̧m̧an kein ekūtbuuj jeorļo̧k bōd in jerawiwi ko im menin letok eo an Jetōb Kwojarjar.

Kōm̧m̧ane Intōrpiu in Peptaij eo

Kajjojo armej me ej ikdeelel n̄an peptaij ej intōrpiu jān juon rikabwijer priesthood eo kar kōmālimi. Ilo mijen, armej in ej ritōl eo an district ak zone eo. Ej kōm̧m̧ani intōrpiu ko n̄an:

Armej ro 9 iiō im rūttoļo̧k ro me rejjan̄in peptaij im kapen.
Ajri ro 8 iiō dettaer im rūttoļo̧k me ro jinen im jemen rejjab membōr in Kabun̄ in.
Ajri ro 8 iiō dettaer im rūttoļo̧k me jinen ak jemen ej barāinwōt peptaij im kapen.

Unnin tōl ko n̄an eo ej intōrpiu rej waļo̧k itulaļ.

Kōm̧m̧ane intōrpiu eo ilo juon jikin ejo̧kne, eņņojak ijo Jetōb eo maron̄ en̄jake.
N̄e intōrpiuik juon ajri, jodikdik, ak kōrā, eo m̧ōttan eo ej intōrpiu aikuj in epaak ilo juon ruum̧ eon̄ļo̧k, m̧aan kōjām (foyer), ak hall eo. Eļan̄n̄e armej ej kōņaan, bar juon rūtto emaron̄ in kūri n̄an bōk koņan ilo intōrpiu eo. Mijenede ro rej aikuj joļo̧k ilo aolep jekjek ko me remaron̄ in bōd meļeļe kaki.
Jino kōn jar.
Jipan̄ armej ro en̄jake ineem̧m̧an.
Kōm̧m̧an bwe intōrpiu eo juon en̄jake ekabakōkkōk ilo jetōb.
Kanooj lale bwe armej eo ej meļeļe jibadbad eo an intōrpiu eo.
Kajjitōk kajjitōk ko an intōrpiu in peptaij eo kar kōllaajraki itulaļ. Ukukōt kajjitōk ko an iiō eo an armej eo, keke mo̧o̧j, im jekjek eo n̄an aikuji.
Uwaake kajjitōk ko an armej eo.
Etale meļeļe ko ilo Boom̧ in Peptaij im Kapene eo n̄an jetjet in. Eļan̄n̄e armej eo ej juon ajri, jinen ak jemen ak rilale eo ej aikuj in jaini boom̧ eo m̧okta jān peptaij (lale “Peptaij im Kapen: Kajjitōk ko im Uwaak ko” ilo jekjōn in an jepta in).
Kūr armej eo n̄an kwaļo̧k naan in kam̧ool eo an ak kwaļo̧k en̄jake ko an.
Kwaļo̧k kam̧m̧oolol kōn maron̄ kweilo̧k ippān armej eo.

Kajjitōk in Intōrpiu ko an Peptaij

Kajjitōk ko an intōrpiu in peptaij eo rej āinwōt kein:

Kwōj ke tōmak bwe Anij ej Jemed Indeeo? Kwōj ke tōmak bwe Jisōs Kraist ej Nejin Anij im Rilo̧mo̧o̧r im Ripinmuur eo an laļ?
Kwōj ke tōmak bwe Kabun̄ in im gospel eo an Jisōs Kraist emōj an kar jepļaaktok kōn Rikanaan Josep Smith? Kwōj ke tōmak bwe [Būreejtōn eo an Kabun̄ in kiiō] ej juon rikanaan an Anij? Ta meļeļein menin n̄an eok?
Ta meļeļe in n̄an kwe n̄an ukweļo̧k? Kwoj ke en̄jake bwe kwar ukweļo̧k jān jerawiwi ko am̧ jem̧aan?
Emōj ke am kar katakin ro uwaan Kabun̄ eo an Jisōs Kraist im Armej ro Rekwojarjar ilo Raan ko Āliktata ekkeijeļļo̧k ilo mour kaki jonn̄ak ko an ko̧jpeļ eo. Ta eo kwōj meļeļe kake kōn loor jon̄ak ko? Kwōj ke m̧ōņōņō in pokaki?
- Kien erreo eo, eo ej kamo jabdewōt jemjerā in m̧ōm̧ an kanniōk ilikin pād ko an juon m̧are kōmālim ikōtaan juon em̧m̧aan im juon kōrā.
- Kien juōn m̧ōttan jon̄oul
- Naan in Mālōtlōt
- Kōjparok ekwojarjar eo an raan in Jabōt, ekoba bōk m̧ōttan kwojkwoj eo wiik otemjeļo̧k im jerbal n̄an ro jet.
Emōj ke am̧ kar kōm̧m̧ane juon jorrāān enana? Eļan̄n̄e innām, kwōj ke pād ilo juon tōre in mālijjon̄ ak parole?
Kwonan̄in ke kar bōk koņam̧ ilo m̧an ļo̧jiōm̧? (Lale Bok in Bōk Meļeļe Eļap, 38.6.1.)
N̄e kwoj peptaij, kwōj kallim̧ur ippān Anij bwe kwoj m̧ōņōņō in bōk ioom̧ make etan Kraist, jerbal n̄an ro jet, jutak āinwōt juon rikam̧ool an Anij ilo aolep iien, im kōjparok kien ko An ilo aolepān am̧ mour. Kopojak ke n̄an kōm̧m̧ane bujen in im wōnm̧aanļo̧k wōt im tōmake menin?

Kōn naan in kōmeļeļe ko eļan̄n̄e armej eo ej uwaak pen n̄an kajjitōk 5 ak 6, lale Bok in Bōk Meļeļe Eļap, 38.2.8.7 im 38.2.8.8.

Erom jeļā kōn kakien ko im unin tōl ko reiooļo̧k peptaij im kapen ilo Bok in Bōk Meļeļe Eļap, 38.2.8. Jet iaan kakien kein ekobaik jekjek ko rein juon me kwomaron̄ iooni.

Ālkin intōrpiu eo, mijenede eo im eo ej pojak rej koba ippān mijenede ro jet. Eļan̄n̄e armej eo ej pojak n̄an peptaij, mijenede ro rej kōmeļeļeik ta eo enaaj waļo̧k ilo iien peptaij eo. Rej barāinwōt kōmeļeļeik bwe kapne eo ekkā an bōk jikin ilo juon kweilo̧k in kwojkwoj eo an ward eo ijo armej eo jokwe ie.

N̄e juon Peptaij ej Aikuj in Rum̧wijļo̧k

Jet iien juon peptaij ej aikuj in rum̧wijļo̧k kōnke kōn apan̄ ko kōn naan in kam̧ool ak erreo. N̄e menin ej waļo̧k, kōm̧adm̧ōde jekjek ilo mejmejkaruo im ittiņo. Jipan̄ armej eo meļeļe ekōjkan kōppopo n̄an peptaij eo ilo juon tōre ilju im jekļaj.

Kōketak armej eo im leļo̧k kōjatdikdik ilo Kraist im Pinmuur eo An. Kajjitōk ippān membōr ro an ward eo n̄an leļo̧k jemjerā. Wōnm̧aanļo̧k wōt in katakin pedped in katak ko m̧oktata an gospel eo m̧ae iien eo armej eo ej pojak n̄an peptaij im kapen. Kōttar m̧ae iien raan in peptaij eo ekāāl naaj jikejuuli

Peptaij im Kapene: Kajjitōk ko im Uwaak ko

Ij ke aikuj mālim n̄an peptaiji juon ajri edik? Kabun̄ in ej n̄ūrbōktak kōn ājmour eo an ajri ro im jokkun wōt juon eo an mejaoto eo kapijuknene eo. Juon ajri, āinwōt kōmeļeļeik jān kien ko ijo jokwe ie, maron̄ peptaij n̄e jekjek kein jim̧or rej tōpari:

(Ro) jinen ak jemen rej bōk eddo in ak ribōk eddo in (ro) rej lewaj mālim ilo jeje. Rej aikulj ewōr juon aer meļeļe kōn katak eo ajri eo nejier enaaj katakin āinwōt juon membōr in Kabun̄ in. Rej aikuj bar kōņaan jipan̄ ajri eo ilo kōm̧m̧an im kōjparok bujen peptaij eo.
Armej eo ej kōm̧m̧ane intōrpiu eo ej ļōmņake n̄e ajri eo emeļeļe bujen peptaij eo. Ej aikuj en̄jake lōke ke ajri eo enaaj kajjieon̄ in kōjparok bujen in ilo pokake kien ko, ekoba pād ilo kweilo̧k ko an Kabun̄.

Ij ke aikuj in leļo̧k malim an eo pāleen n̄an peptaiji ļeo ak lio pālele? Aaet. Juon armej ekar m̧are ej aikuj in bōk mālim eo an eo pāleen m̧okta jān an peptaij.

Eļan̄n̄e juon jinen ak jemen ilo juon baam̧ļe ejjab pojak n̄an peptaij, ij ke aikulj peptaiji bar juon membōr in baam̧le eo ak kōttar m̧ae iien jinen ak jemen rej pojak? Kōttōpar eo ej bwe ro uwaan baam̧le eo ren peptaij ippān doon. Ijo ke, eļan̄n̄e juon ejjab pojak, kajjojo ro uwaan baam̧le eo remaron̄ in peptaij to̧o̧n wōt an jabdewōt mālim emenin aikuj rej liwaj.

Peptaij ko an ro uwaan baam̧le eo aikuj ke in rum̧wijļo̧k m̧ae iien eo eo jemen emaron̄ bōk Priesthood eo an Aron im kōm̧m̧ani peptaij ko kōn e make? Jaab. Em̧m̧aan ro rej kab peptaij rejjab bōk Priesthood eo an Aron ilo raan eo rej peptaij. M̧okta rej aikuj intōrpiu jān bisop eo im rejetak jān ward membōr ro.

Imaron̄ ke katakin im peptaiji juon armej eo ekar kam̧ōje membōr eo an ilo Kabun̄ in ak membōr eo aer ekar kōm̧akūti? Armej ro me membōr eo aer in Kabun̄ in ekar kam̧ōje ak ro membōr eo aer ekar kōm̧akūti maron̄ in bar deļo̧k kōn peptaij im kapene. Eļan̄n̄e rej kōņaan bwe ren katakin, kapilōk ippān ritōl ro an priesthood ijo jokwe ie im mijen būreejtōn eo am̧ kōn jabddwōt jerbal eo emaron̄ wōr am̧.

Ilo juon stake, bar kadeļo̧n̄e kōn peptaij ium̧win tōl eo an bisop eo ak stake būreejtōn eo. Ilo juon mijen, bar kadeļo̧n̄e ium̧win tōl eo an mijen būreejtōn eo. Ritōl rein renaaj bōk tōl eo jān Būreejtōnji eo Kein Kajuon n̄e aikuj. Mijenede ro rejjab kōm̧m̧an intōrpiu in peptaij kein ak kanne Boom̧ in Peptaij im Kapene eo. Ijoke, juon mijenede emaron̄ kajjitōk n̄an kōm̧m̧ane peptaij eo.

Membōr ro kar m̧otak an Kabun̄ in me rej bar koba rejjab rioktak ro. Mekarta, mijenede ro remaron̄ jet iiien ewōr juon aer jerbal aorōk ilo jipan̄ er lem̧ōņōņō kōn kōjeraam̧m̧an ko an membōr in Kabun̄ in bar juon alen.

Ta eo eļan̄n̄e juon armej ekar jikejuuļi iien peptaij eo bōtaab ejjab kōjparok aolep kallim̧ur ko? Kōttar n̄an jikejuuļi intōrpiu in peptaij eo m̧ae iien eo armej eo ej kōjparok kallim̧ur ko im tōpar men ko aikuj n̄an peptaij. Lale “N̄e juon Peptaij ej Aikuj in Rum̧wiļo̧k” ilo jebta in.

Ta eo eļan̄n̄e juon ripālele ekōņaan peptaij bōtaab rej mour ippān doon? Juon ripālele rej mour ippān doon itulikin m̧are eo kōmālim ikōtaan juon em̧m̧aan im juon kōrā maron̄ jab peptaij m̧ae iien rej mour kōn kien erreo. Menin ej meļeļe in ejako aer mour ippān doon—men̄e āinwōt juon ripālele heterosexual ak juon ripālele erier wōt juon (same-sex)—ak, n̄an juon em̧m̧aan im juon kōrā, ej meļeļe in m̧are. Ej barāinwōt kūtbuuj kōjerbal tōmak n̄an ukweļo̧k āinwōt kar kōmeļeļeik ilo Katak im Bujen Ko 20:37. M̧are eo ikōtaan juon em̧m̧aan im juon kōrā ej juon m̧ōttan karōk eo eaorōk an Anij.

Kajjitōk 5 im 6 ilo intōrpiu in peptaij eo kajjitōk eļan̄n̄e juon armej ekar kōm̧m̧ane juon jorrāān ļapļap ak bōk kuņan ilo juon m̧an lo̧jien. Ta eo ij aikuj kōm̧m̧ane eļan̄n̄e juon ej uwaak “aaet” n̄an kajjitōk kein? Eļan̄n̄e kwoj jeļā kōn juon iaan jekjek kein ilo juon iien intōrpiu in peptaj, jab kajjitōk kōn tipdik in meļeļe ko. Jab kallim̧ur bwe armej eo naaj kōmālim peptaij eo. Ijello̧kin, kwaļo̧k am̧ iakwe im jouj ilo kōmeļeļeik bwe juon eo eļapļo̧k an kekemooj im tijem̧ļo̧k naaj kōnono ippān armej eo im jipan̄.

Jilkinļo̧k juon kajjitōk kōn intōriu in peptaij n̄an mijen būreejtōn eo am̧. E ak juon iaan rikakpilōklōk ro an renaaj kweilo̧k ippān armej eo. Lale Bok in Bōk Meļeļe Eļap, 38.2.8.7 im 38.2.8.8.

Ta eo ij aikuj kōm̧m̧ane eļan̄n̄e rekoot in membōr eo ekar kōm̧m̧an m̧okta jān aō jilkinļo̧ Boom̧ in Peptaij im Kapen eo? Kepaak mijen būreejtōn eo am̧ kōn naan in kōmeļeļe ko.

Ekkatak Am̧ Make

Ļōmņak ekōjkan am̧ maron̄ en̄jake eļan̄n̄e kwe eo kar intōrpiuki. Ļōmņak kōn kajjitōk kein im ļo̧o̧ke im̧we ko am̧.

Ekōjkan an intōrpiu eo maron̄ āinwōt jab em̧m̧an n̄an kwe? Ta eo eo ej intōrpiu emaron̄ kōm̧m̧ane ak ba n̄an kabōjrak eok?
Ekōjkan am̧ kōņaan bwe eo ej intōrpiu n̄an ekkejel ippam̧?
Ekōjkan am̧ kōņaan bwe eo ejintōrpiu uwaak eļan̄n̄e kwoj kwaļo̧k pere ko ak likjab in meļeļe ko ak eļan̄n̄e kwoj kwaļo̧k jerawiwi ko reļļap?

Iien Peptaij eo

Iien peptaij eo im kapene eo aikuj in aorōk ko ilo jetōb n̄an juon membōr kāāl. Iien peptaij eo ej aikuj in jikejuuļ ilo iieo eo wōt armej eo tōpar men ko aikuji n̄an peptaij. Kōmeļeļeik ta eo kar karōke im etke. Ekōnono kōn nuknuk jetjet, ekoba ekōjkan an armej eo naaj leļo̧k n̄an e nuknuk mouj n̄an an kōņake n̄an peptaij eo.

Iien peptaij ko n̄an rioktak ro rej karōki ium̧win tōl eo an bisoprik eo. Ward mijen ritōl eo (eļan̄n̄e kar kūr juon) ak juon membōr in būreejtōnji eo an doulul eo an elder ro ej bōk eddo in jerbal in mijenede ej karōk im kōjeikik iien kein. E ej kōtōbalbal ippān mijenede ro rej jerbal aolep raan. Iien peptaij ko rej aikuj in ļam waan kadu, im kōbōkakkak ilo jetōb.

Kūr juon memebōr in bisoprik eo, juon membōr in būreejtōnji eo an Doulul eo an Kōrā ro, im juon membōr in būreejtōnji eo an doulul eo an elder ro (eļan̄n̄e ejjab kōjeikik) n̄an pād ilo iien peptaij eo. N̄e ekkar, kūr bar juon ritōl in juon doulul, ritōl ro an jodikdik ro, im m̧aan im kōrā in jerbal in karejar (eļan̄n̄e kar jitōne). Jerbal ippān armej eo ej peptaij n̄an kūr ro m̧ōttan im nukun n̄an pād ilo iien peptaij im kepene eo.

Ļōmņak in kūr armej ro jet kwoj katakin. En̄jake kein renaaj jipan̄ er en̄jake Jetōb eo im katak eļapļo̧k kōn gospel eo. Ālkin iien eo, etale ļo̧kan ļo̧k n̄an ekōnono kōn en̄jake eo aer im kūr er n̄an katakin.

Juon iien peptaij emaron̄ koba men kein:

Kōjan̄jan̄ ainikien al ko im̧aan kōppeļo̧k eo
Juon karuwainene ekadu jān ritōl eo an priesthood eo ej kōjeikik iien eo (juon membōr in bisoprik eo ej aikuj tōl eļan̄n̄e emaron̄).
Juon al im jar in kōppeļļo̧k.
Juon ak ruo kōnono ko rekkadu kōn unin kōnono ko an gospel, ko āinwōt peptaij im menin letok eo an Jetōb Kwojarjar.
Juon jokāālet in al ko
Peptaij
Juon iien kautiej ilo an armej ro me rekar bōk koņaer ilo peptaij eo jānij n̄an nuknuk ko remōrā. (Al in jar ko ak al ko an Būraimere maron̄ kōjan̄i ak al ilo iien in. Ak mijenede ro remaron̄ kwaļo̧k katak an gospel eo ekadu.)
Kwaļo̧k naan in kam̧ool jān membōr ro rekāāl, eļan̄n̄e rekōņaan.
Juon al im jar in ikkilōk
Kōjan̄jan̄ ainikien kōjan̄jan̄ wōt ālkin kweilo̧k eo

Eļan̄n̄e kwoj jikejuuļi juon peptaij ilo juon Jabōt, kāālet juon iien me ejjab kanooj idaaptōk ippān kweilo̧k ko an Jabōt ekkar aer kōm̧m̧an.

Kapene

Juon armej eo ej bōk kain̄i eo an kapene ālkin an kar peptaij (lale Katak im Bujen Ko 20:41). Juon rioktak kāāl ej watōke juon membōr an Kabun̄ in ālkin an kain̄i ko an peptaij im kapene jim̧or dedeļo̧k im jetjet rar ļo̧o̧ke.

Kapene ko rej ium̧win tōl eo an bisop eo. Ijoke, e ejjab kōm̧m̧an intōrpiu rejenolo̧k n̄an kapene eo.

Jerbal epaak ippān bisop eo im ward mijen ritōl eo (eļan̄n̄e kar kūr juon) n̄an kanooj lale bwe rioktak kāāl ro rej kapene. Kapene eo aikuj kōm̧m̧an ālkin wōt emaron̄ ālkin peptaij eo, ekkā an Jabōt eo tok juon. Ijoke, bisop eo emaron̄ kōtļo̧k bwe kapene eo en bōk jikin ilo iien peptaij eo āinwōt juon elmakot in oktak (lale Bok in Bōk Meļeļe Eļap, 18.8).

Rioktak ro ekkā aer kapen ilo juon kweilo̧k in kwojkwoj ilo ward eo ijo rej jokwe ie. Bisop eo ekkā an kūr elder mijenede ro rej jerbal ilo ward eo n̄an bōk koņaer ilo kapene eo. Eļan̄n̄e juon mijenede ej kōm̧m̧ane kapene eo, ej ej barāinwōt aikuji kōmālim eo jān mijen būreejtōn e0 (lale Bok in Bōk Meļeļe Eļap, 18.8.1). Dik tata juon membōr in bisoprik eo ej bōk koņan.

Kadedeļok Boom̧ eo an Peptaij im Kapene

Ej aorōk bwe juon rekoot in membōr ej kōm̧m̧an ilo iien eo em̧ōkaj ālkin an armej eo peptaij im kapen. Ikkijen kain rekoot ko ilo tōr eo an, Moronai ekar je bwe membōr ro rekāāl “rekar bōnbōn ilubwiljin armej ro an kabun̄ eo an Kraist; im etaer kar būki, bwe ren maron̄ keememej im naajdik er jān em̧m̧an eo an naan in Anij, n̄an kōjparok er ilo wāween ejim̧we” (Moronai 6:4).

Ilo am̧ katakin juon eo me ej kōppopo n̄an an peptaij, jino n̄an kanne Boom̧ in Peptaij im Kapene eo ilo Kwaļo̧k Gospel eo Aō app eo. Kōmeļeļeik bwe boom̧ in enaaj jerbal n̄an ejake juon rekoot in membōr. Rekoot in enaaj pād ie meļeļe ko raorōk kōn kain̄i ko armej eo ej būki. N̄e membōr ro an Kabun̄ in rej em̧m̧akūt, rekoot in membōr eo aer ej jilkinļo̧k n̄an ward kāāl eo aer bwe ritōl ro ijo jokwe ie im membōr ro ren jipan̄ er.

Ilo iien eo wōt membōr kāāl eo ej peptaij im kapen, bar kōkāāl kobaan boom̧ eo kōn meļeļe ko kōn kajjojo kain̄i, ekoba eo eo ekar kōm̧m̧ane. N̄e em̧ōj am̧ kar kadedeļo̧k boom̧ eo, ļo̧o̧ke meļeļe ko ilo Kwaļo̧k Gospel eo Aō app eo im jilkinļo̧ke n̄an ward kūļōk eo ilo electronic. Ilo iien eo wōt kūļōk eo ekar bōk boom̧ eo, e ej etale im ejake juon rekoot in membōr.

Ālkin an kōm̧m̧an uwaanļo̧k rekoot eo, kūļōk eo ej kōpooj Peba in Peptaij im Kapene eo. Peba in ej jain jān bisop eo im leļo̧k n̄an armej eo.

Āt eo im kadkad in piktok in (sex) ilo rekoot in membōr eo im peba in kam̧ool (certificate) eo rej aikuj jetjet an peba in ļota eo an armej eo, civil bith registry eo, ak āt eo kiiō ej kōjerbale.

Ekkatak Am̧ Make ak Ippān Kampānien Eo M̧ōttam̧

Ekkatak Mosaia 6:1–3 im Moronai 6:1–4. Ekōjkan an eoon kein iookļo̧k dāpij jejet eo an rekoot in peptaij ko im kapene ko?

Ālkin Peptaij im Kapene

Wōnm̧aanļo̧k wōt im Jerbal in Karejar

Wōnm̧aanļo̧k wōt n̄an jemjerā im rie membōr ro rekāāl ālkin aer kar peptaij im kapene. Jipan̄ er etal n̄an jar im kalōk jemjerā ko ippān membōr ro. Riiti Bok in Mormon ippāer, im jipan̄ er kwalo̧k gospel eo ippān membōr ro im ro m̧ōttaer. Kwaļo̧k n̄an er Iaļ in Bujen eo Aō bok eo. Wōnm̧aanļo̧k wōt im kōjerbal Kwaļo̧k Aō Gospel app eo n̄an ļo̧o̧ke eddōkļo̧k eo aer, ko āinwōt aer etal n̄an kweilo̧k in kwojkwoj eo im katak raar būki.

Ālkin kapene eo, katakin katak ko an mijenede bar juon alen. Kwon bōk m̧aan ilo katakin eo. Ijo ke, kōtōbalbal ippān ritōl ro an ward ak ward mijenede ro ak membōr ro jet n̄an bōk koņaer. Ilo am̧ katakin, kōketak membōr ro rekāāl n̄an kōjparok aolep kien ko ilo katak ko.

Ilo kweilo̧k in kōtōbalbal ko wiik otemjeļo̧k, kapilōk kōn ekōjkan an membōr ro maron̄ rie rioktak ro rekāāl im jipan̄ er niknik bōk koņaer ilo Kabun̄ in. Karōk wōn eo enaaj kwaļo̧k kadkadier n̄an ritōl ro an doulul ak ra ko. Kōtōbalbal bōk koņan eo an membōr ro jet ilo am̧ katakin katak ko bar juon alen. Kajjitōk bwe ren ijjitōn̄ m̧aan in jerbal in karejar ro (im kōrā in jerbal in karejar ro n̄an kōrā ro).

Ālkin an juon em̧m̧aan kapen, e ej maron̄ bōk Priesthood eo an Aron eļan̄n̄e enaaj 12 iiō dettan ilo jem̧ļo̧kin iiō eo. Ekkapit ko an Priesthood eo an Aron rej ium̧win tōl eo an bisop eo (lale Bok in Bōk Meļeļe Eļap, 38.2.9.1).

N̄e ekkar, kōnono ippān ro kwar katakin er ilo aolepān mour eo am̧. Rie er ilo bōk aolep kōjeraam̧m̧an ko an gospel eo an Jisōs Kraist.

“N̄e jej itok kōn bōro ko rerup im jetōb ko rettā, jej lo ainikien ilo Jisōs Kraist im kar jepool ilo pā ko raenōm̧m̧an Pein remeļeļe. Kain̄i ko rekwojarjar rej letok bujen eo an uwaan im ‘the power of godlineskajoor āinwōt anij’ n̄an kōkwojarjar kōttōpar an ilowa im jerbal eo itulik [Katak im Bujen Ko 84:20]. Kōn An iakwe ejouj im kōmmaanwa, Kabun̄ eo An ej erom Im̧ōn Ruwamājete eo im̧ōd” (Gerrit W. Gong, “Ruum̧ in Im̧ōn Ruwamāejet,” Liaona, Māe 2021, 27).

Jipan̄ Membōr ro Rekāāl Bōk Koņaer ilo Kōjeraam̧m̧an ko an Tampeļ

Membōr ro rekāāl me iiō ko aer ejetjet maron̄ bōk juon peba im mālim n̄an deļo̧n̄e tampeļ me ej kōtļo̧k aer peptaij kōn ro uwaan baam̧le eo aer raar mej (lale Bok in Bōk Meļeļe Eļap, 26.4.2). Rej bōk pepa in mālim in jān bisop eo. Kōketak im jipan̄ membōr ro rekāāl n̄an bōk juon peba in mālim n̄an deļo̧n̄e tampeļ ilo iien eo wōt ekkar. Eļan̄n̄e juon tampeļ ejaak, ļōmņak in leļo̧k juon kūr kōn juon iien ejenolo̧k n̄an membōr ro rekāāl n̄an kōm̧m̧ani peptaij ko kōn rūtto ro raar mej.

Ilo kweilo̧k in kōtōbalbal ko wiik otemjeļo̧k, karōk wōn eo enaaj kwaļo̧k kadkad in membōr ro rekāāl n̄an ritōl eo an ward tampeļ im menmenbwij an baam̧le. Ritōl in emaron̄ jipan̄ er m̧aanjabpopo n̄an bōk kōjeraam̧m̧an ko an tampeļ kōn kōm̧m̧ani bujen in tampeļ ko aer make.

Ļōmņak ko n̄an Ekkatak im Kōjerbali

Ekkatak Am̧ Make

Kōllaajraki apan̄ ko me juon eo ej pojān peptaij emaron̄ iooni. Etke eaorōk bwe juon armej en en̄jake iakwe im jemjerā an membōr ro an Kabun̄ in?
Ekkatak Moronai 6 im Katak im Bujen Ko 20:68–69. Ta eo kwomaron̄ katak jān eoon kein n̄an jipan̄ armej ro m̧aanjabpopo n̄an peptaij im kapene? Je ta eo kwoj katak. Kwaļo̧k ļōmņak ko am̧ ippān eo m̧ōttam̧ ilo ekkatak eo an ippān eo m̧ōttam̧.

Ekkatak Am̧ Make im Ippān Kampānien Eo M̧ōttam̧

Būreejtōn Henry B. Eyring ekar kōmeļeļeik etke jon̄ak ko an gospel eo rej aorōk. Ekōnono kōn ko̧o̧njeļ kein. Ekōjkan am̧ maron̄ kōketak armej ro n̄an kōņaan tōpar jon̄ak kein?

“Irooj ej kōm̧m̧ani jon̄ak ko An bwe E en maron̄ kōjeraam̧m̧an kōj. Ļōmņak kōjeraam̧m̧an ko: E ej kallim̧uri ro me rej tōpar jon̄ak ko jipan̄ eo an Jetōb Kwojarjar. E ej kallim̧uri aenōm̧m̧an an juon make. E ej kallim̧uri iien eo n̄an bōk kain̄i ko rekwojarjar ilo m̧weo Im̧ōn. Im E ej kallim̧uri ro me rej niknik ilo mour kōn jon̄ak ko An me renaaj bōk mour indeeo. …

“Kōnke jej iakwe armej ro jej jerbal n̄an er, aolepād wōj jej kōņaan kōm̧m̧an em̧m̧anļo̧k ilo ļōn̄aj ajri ro nejin Jemedwōj Ilan̄ n̄an tiljek im erreo rej aikuji n̄an bōk aolep kōjeraam̧m̧an ko an Irooj. …

“… Kwoj jino kōn dāpij jon̄ak ko an Irooj ilo alikkar im ejjeļo̧k joļo̧k bōd. Im an ļapļo̧k an laļ in peļo̧k jān er im kajirer kōn er, ad kajoorļo̧k ej aikuj bwe jen kōm̧m̧ane” (“Standards of Worthiness,” First Worldwide Leadership Training Meeting, Jan. 2003, 10–11).
Etale kajjitōk in intōrpiu in peptaij ko. Ļōmņak ekōjkan am̧ naaj kōm̧adm̧ōde jekjek ko āinwōt kein:
- Armej eo ejjab jiron̄ eok bwe e ej pād ilo probation kōn juon jorrāān.
- Armej eo ejjan̄in bōk juon uwaak in jar bwe Josep Smith ekar juon rikanaan.
- Armej eo ekar kōbataat juon jikka ruo raan remootļo̧k.
- Armej eo ejjab jeļā bwe ekar bōk juon uwaak n̄an jar ko an.
- Baam̧le eo ekar en̄jake kipel jān ro m̧ōttaer im rejjab jeļā rej pojak n̄an peptaij.
Etale Boom̧ in Peptaij im Kapene eo. Etke meļeļe ko kwoj liļo̧k rej aikuj in jim̧we im dedeļo̧k?

District Ko̧o̧njeļ, Kweilo̧k ko Reļļap an Zone, im Ko̧o̧njeļ an Ritōl ro an Mijen

Etale aorōk eo an intōrpui in peptaij eo. Ekōnono kōn ekōjkan an mijenede ro maron̄ jipan̄ armej ro m̧aanjabpopo n̄an intōrpiu eo.
Ekōnono kōn ekōjkan kōjerbal iien peptaij ko im kapene ko ilo iien ko rem̧m̧an n̄an kappok.

Ritōl ro an Mijen im Rikakpilōklōk ro an Mijen

Jerbal ippān ritōl ro an priesthood eo ijo jokwe ie im ritōl ro an ra ko n̄an kanooj lale bwe rej kōjerbal riboot eo an Eddōkļo̧k ilo Iaļ in Bujen eo ilo wejepedik.
Katakin ritōl ro an district, ritōl ro an zone, im sister in kaminene ritōl ro ekōjkan kōpooj armej ro n̄an intōrpiu in peptaij eo. Kūr er n̄an kamineneik mijenede ro jet n̄an kōpooj armej ro n̄an intōrpiu eo.
Katakin ritōl ro an district im zone eo kōn ekōjkan kōm̧m̧ani intōrpiu in peptaij ko.
Katakin ekōjkan n̄an uwaake juon intōrpiu in peptaij n̄e juon armej ej kwaļo̧k bwe ekar kōm̧m̧an juon jerawiwi eļap.
N̄e emaron̄, etal n̄an iien peptaij ko n̄an membōr ro rekāāl. Kōnono ipppān membōr ro rekāāl im katak kōn en̄jake ko an oktak eo aer. Kwaļo̧k ta eo kwoj katak ippān eo m̧ōttam̧ im ippān mijenede ro.