Anga te Nakoanibonga ao te Katabuaki nakon te Nakoa

Karaoakin te otenanti aei e kainnnanoa te kariaiakaki mairoun te tia kairiiri n te nakoanibonga are e taui taian kiing aika a katauaki ke are e mwakuri iaan ana kaetieti te aomata are e taui kiing akanne .

Ngkana e tia raoi aron taian intawiu ao taian kariaiakaki:

1. Te beretitenti n te titeiki (ke temanna iaan ana kaetieti) e na katabua te aomata nakon te aobiti ni unimwaane ke e na kariaia temanna kaain te Nakoanibonga ae te Merekitereka bwa e na karaoia. Tii kaain te Nakoanibonga ae te Merekitereka ae a na tei n te mronron.

2. Te beretitenti n te titeiki (ke temanna iaan ana kaetieti) e na katabua te aomata nakon te nakoa n ibonga ae e rietaata, ke e na kariaia temanna te ibonga ae e rietaata ni karaoia. Bon tii ibonga aika a rietaata aika a na tei n te mronron.

3. Te bitiobi (ke temanna iaan ana kaetieti) e na katabua te aomata nakon te aobiti n rikan, te tia reirei ke te ibonga. Bon tii ibonga ao kaain te Nakoanibonga ae te Merekitereka ae a na mwakuri bwa taan taetae ke n tei n te mronron.

Ngkana ko na ira te katabuaki, ao e riai te aomata anne (1) n riki bwa te ibonga ke kaain te Nakoanibonga ae te Merekitereka ao (2) e na iai te kariaia n te nakoanibonga ae ti te arona ke e rietaata riki nakon are e na karaoaki n te otenanti. Ibukin te katooto, te unimwaane e na riai n aki tei n te mronron ngkana e katabuaki te ibonga ae e rietaata ke ngkana te mwaane e na kamatoaaki nakon te aobiti are e kainnanoaki nako iai bwa e na riki bwa te ibonga ae rietaata.

Ni karaoan te katabuaki n te nakoanibonga, temanna ke ae e raka riki kaain te nakoanibonga are a kariaiakaki a na katokai baia ni kabebetei iaon atuun te aomata. Imwina kaain te nakoanibonga are e karaoa te katabuaki e:

1. Wetea te aomata ni bwaninin arana.

2. Taekina te kariaiakaki are e karaoaki iai te katabuaki (te Nakoanibonga ae te Aaron ke te Merekitereka).

3. Anga te Nakoanibonga ae te Aaron ke te Merekitereka, ma tii ngkana e tuai n anganaki.

4. Katabua te aomata nakon te nakoa n te Nakoanibonga ae te Aaron ke te Merekitereka ao e anganna te inaomata, te mwaaka, ao te kariaia n te nakoa anne. (Kingin te Nakoanibonga a aki anganaki mwaane n tain anganakiia te nakoanibonga ke ni katabuaia nakon nakoa aikai.)

5. Anga taeka ni kakabwaia n aron ana kairiiri te Tamnei.

6. Kainna n aran Iesu Kristo.

Te katabuaki bon te tai ae e kakawaki n anga te kakabwaia. Bwaninin taeka ni ibuobuoki ao kaetieti a bon kaotaki ngkana e reireinaki te aomata tabena ao tiaki n tain te katabuaki.

Te katabuaki e riai n aki kabuburaki nakon te bootaki ni bukamaru. E bon aki riai bwa e na iai te tataro, kaoti koaua, ke te kaetieti ngkana e katabuaki temanna.