Aranakia ao Kakabwaiakia Ataei

a kakabwaia te ataei mwaane

Karaoakin te otenanti aei e kainnanoa te kariaiakaki mairoun te tia kairiiri n te nakoanibonga are e taui taian kiing aika a katauaki ke are e mwakuri iaan ana kaetieti te aomata are e taui kiing akanne .

Kainibaire ni Kabuta

“Kaain ana ekaretia Kristo n tatabemaniia ake iai natiia a na uotiia nakoia unimwaane imataia kaain te ekaretia, ake a na katokai baiia iaoia n aran Iesu Kristo, ao ni kakabwaiaia n arana”(Reirei ao Berita aika Tabu 20:70). Ni irakin nanon te kaotioti aio, tii kaain te Nakoanibonga ae te Merekitereka aika a na iri n aranakia ao kakabwaiakia ataei. Taan kairiiri n te Nakoanibonga a riai ni kaongoia membwa te kaetieti aio imwain aranakia ao kakabwaiakia natiia. Ngkai e kawakinaki aron tabun te kakabwaia, taan kairiiri a riai ni karaoi aia kabanea ni kona n tuka reken te maama ke aki raun nanon temanna ke utu.

Ataei a tataneiai n aranaki ao ni kakabwaiaki inanon bootakin te aki mamatam ao te kaotikoaua inanon te uoote ike kaaro boni membwa ao iai araia n te rekooti.

Kaetieti ibukin Aranakin ao Kakabwaian te Teei

Ngkana e kakabwaiaki te ataei, kaain te Nakoanibonga ae te Merekitereka a na ikotaki n te mronron ao ni katokai baia iaan te ataei. Ngkana e kakabwaiaki te teei ae e a ikawai, taari a na katokai baia ni kabebetei iaon atuun te teei. Te aomata are e anga te kakabwaia:

1. E na atonga Tamara are I Karawa.

2. Taekinna bwa te kakabwaia e karaoaki man te kariaiakaki n te Nakoanibonga ae te Merekitereka.

3. Angan te teei arana.

4. Anga taekan te kakabwaia n aron ana kairiiri te Tamnei.

5. Kainna n aran Iesu Kristo.