Te Toa

Karaoakin te otenanti aei e kainnanoa te kariaiakaki mairoun te tia kairiiri n te nakoanibonga are e taui taian kiing aika a katauaki ke are e mwakuri iaan ana kaetieti te aomata are taui kiing akanne.

Kainibaire ni Kabuta

Membwa n te Ekaretia a na kaitibo n te Tabati n taromauria te Atua ao ni kana te toa (taraa Reirei ao Berita aika Tabu 20:75; 59:9). Inanon tain te otenanti ae tabu aio, a na katoonga te kariki ao te ran ni kauringa ana anga karea te Tia Kamaiu n rabwatana ao raraana ao ni kaboua aia berita (taraa Mataio 26:26–28; Ana Rairairi Iotebwa Timiti, Mareko 14:20–25; Ruka 22:15–20; 3 Nibwaai 18; Moronaai 6:6).

Kakabwaian ao Kabutan te Toa

Ibonga ao kaain te Nakoanibonga ae te Merekitereka a kona ni kakabwaia te toa. Rikan, taan reirei, ibonga, ao kaain te Nakoanibonga ae te Merekitereka a kona ni kabuta te toa.

Ngkana a anenea anenen te toa kaain te taromauri, kaain te nakoanibonga ake a na kakabwaia te toa a na karaurau n teirake, ni kanakoa te kunnikai are e rabuna tureen te kariki, ao n tatabeuta te kariki nakon te bubura ae bon tau. Ngkana a tia n tatabeuta te kariki, a na tekateka ao n raona aneneakin kunan te toa.

Imwin te anene, te aomata are e kakabwaia te kariki e na katorobubua ao n taekina taromaurin te toa ibukin te kariki. Taromauri n te toa a kaotaki iroun te Uea (taraa Reirei ao Berita aika Tabu 20:77, 79; Moronaai 4–5). Te bitiobi e na kakoaua bwa a taekinaki n te aro ae mataata, eti raoi, ma te aro ni karinerine. Ngkana e karaoa te kairua te aomata are e katabua te toa n taekana ma e kaetia bon ngaia, akea kaetakina ae kainnanoaki. Ngkana e aki kaeta te kairua te aomata, te bitiobi e na kaotia bwa e riai ni manga kaoka riki te tataro n te aro ae eti.

Imwin te tataro, riikan ke kaain te nakoanibonga tabeman a na kabuta te kariki nakoia kaain te taromauri n te aro ni karinerine ao n te aro ae barongaaki. Te aobitia n tararua e na moan kana moa te toa. Te bitiobi (ke te kauntira ngkana akea ngaia) e na tararua bootakin te toa tii ngkana akea n te tabo n tekateka te membwa n te Beretitentii n te titeiki, te Itingaun n te Aono, ke te Mataniwi ni Kabuta. Te kauntira ae rietaata e na aki tararua ao n aki karekea moa te toa.

Ngkana e karekea te toa te aobitia n tararua, tabeman ake a kabuta te toa a na nakonako nakon taabo ake a katauaki iai.

Imwin are e a tia n anga tureen te toa kaain te nakoanibonga nakon te membwa, tabeman a na kabuta te turee mai iroun temanna ibukin karokoakina.

Ngkana a tia ni kabuta te kariki taari, a na kaoki turee nakon taiboran te toa. Koraki ake a mena n taiboran te toa a na rabuna tureen te kariki n te kunnikai ao ni kanakoa rabunan tureen te ran. Te aomata are e katabua te ran e na katorobubua ao n taekina taromaurin te toa ibukin te ran (taraa Reirei ao Berita aika Tabu 20:79), onean mwin te taeka te ran ibukin te wain.

Imwin te tataro, riikan ao tabeman kaain te nakoanibonga a na kabuta te ran nakoia kaain te taromauri. Ngkana a tia, a na kaoki turee nakon taiboran te toa, n taningaia taan kakabwaia te toa bwa a na rabuni taian turee ao ni karaurau n tekateka.