Talateu

ʻE lava ke hoko ʻa e ngāue pōpula ha taha ʻokú te ʻofa aí ko ha aʻusia fakatupu manavasiʻi. Mahalo te ke ongoʻi tuenoa, fāifeinga ke moʻui ʻi he taimi faingataʻaʻia fakapaʻangá, pe hohaʻa ki he kahaʻú (vakai, ʻĪsaia 41:10). ʻOku ʻafioʻi ʻe he Tamai Hēvaní mo Sīsū Kalaisi hoʻo ngaahi fiemaʻú pea ʻokú Na finangalo ke fakafiemālieʻi koe. Ko e taha ʻo e ngaahi founga ʻoku ʻomi ai ʻe he ʻOtuá ha tokoní ʻoku fakafou mai ia ʻi he niʻihi kehé. Mahalo te ke loto-mamahi mo mā, pea mahalo te ke fakamamaʻo mei he niʻihi kehé. Ka neongo ia, ko hono fakaʻatā ʻo e niʻihi kehé ke fai ha tokoní ko ha founga ia ke fakahaaʻi ai ki he ʻOtuá ʻokú ke houngaʻia ʻi Heʻene ʻofá. Feohi mo e kakai ʻokú ke falala ki aí mo ha kau mataotao te nau lava ʻo tokoni.

Naʻe akoʻi ʻe ʻEletā Sefilī R. Hōlani, ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, “ʻOku tatali loto-vēkeveke mai ʻa e ʻOtuá ki ha faingamālie ke tali ai hoʻo ngaahi lotú mo fakahoko hoʻo ngaahi fakaʻānauá, ʻo hangē ko ia kuó Ne fai maʻu peé. Ka he ʻikai ke Ne lava ʻo fakahoko ia kapau he ʻikai te ke lotu, pea he ʻikai ke Ne lava ʻo fakahoko ia kapau he ʻikai te ke fakaʻānaua ki ai. Ko hono fakanounoú, he ʻikai ke Ne lava ʻo kapau ʻoku ʻikai te ke tui” (Terror, Triumph, and a Wedding Feast” [Brigham Young University devotional, Sept. 12, 2004], 3, speeches.byu.edu).

Naʻe fakahoko ʻe Sisitā Leina I. ʻApeto, ko ha taki ʻi he houalotu ʻa e houʻeiki fafine ʻo e Siasí, ha toe fakalotolahi ʻi heʻene akoʻi: “Kapau ʻokú ke ongoʻi he ʻikai te ke lava ʻo toe hoko atu, kātaki ʻo kole tokoni. Ko ʻeku kole kiate kimoutolú ke ʻoua naʻa mou foʻi. ʻOku ʻi ai ha ʻamanaki lelei. ʻOku ʻi ai ha fakamoʻui. ʻOku ʻi ai ha fiefia. ʻOku ʻi ai ha ʻofa ʻokú ne ʻātakaiʻi koe. Kātaki ʻo tafoki ki he ʻaloʻofa huhuʻi ʻa e ʻEikí pea tafoki ki he kakai ʻoku mou feohí. ʻOua te ke foʻi. Please don’t give up” (in “Sister to Sister Conversation” [Brigham Young University Women’s Conference, May 1, 2020], ChurchofJesusChrist.org).