Ko Hono Maluʻi ʻo e Tokotaha Tonuhiá

ʻOku tukupā ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke maluʻi ʻa e tokotaha tonuhiá mei ha faʻahinga tūkunga pē ʻe ala iku ki ha fakatuʻutāmaki pe ngaohikovia (vakai, Ngaohi Kovia, Tokoni ʻo e Moʻuí, Gospel Library). Kapau kuo ngaohikovia koe pe ongoʻi ʻokú ke ʻi ha tuʻunga fakatuʻutāmaki, ʻoku totonu ke ke fetuʻutaki leva ki he kau polisi fakalotofonuá. ʻOku totonu foki ke ke fetuʻutaki ki ha tokotaha falalaʻanga ke tokoni ʻi hono fakapapauʻi ʻokú ke malú.

Koeʻuhí ʻoku poupou ʻa e Siasí ki hono tokangaekina ʻo kinautolu ʻoku ngāue pōpulá, ʻoku ʻikai hōloa heni ʻa e fiemaʻu ke maluʻi ʻa e tokotaha tonuhiá mo poupou kiate kinautolu ʻoku mamahí. Mahalo ʻe faingataʻa ki he kau taki mo e kāingalotu ʻoku nau ʻi ha tuʻunga ʻoku nau ʻiloʻi fakatouʻosi ai ʻa e tokotaha faihiá mo e tokotaha mamahí. ʻI heʻenau lotu mo fakafanongo ki he Laumālié, ʻe lava ke tataki kinautolu ʻe he ʻOtuá ʻi heʻenau ngāue mo e tokotaha kotoa pē ʻoku kau aí.

ʻI he ngaahi tūkunga fakafāmili kuo mole ai ʻa e falalá, ʻe lava ke ngāue ʻa e kau mēmipa ʻo e fāmilí mo ha kau ngāue tokoní, kau taki ʻo e Siasí, mo ha kau mataotao kehe. Te nau lava ʻo ngāue fakataha ke fokotuʻu ha ngaahi fakahinohino ki hono taʻofi ʻo e ngaahi palopalemá pea mo hono fokotuʻu ha fetuʻutaki lelei mo e kau mēmipa ʻo e fāmili ʻo kinautolu ʻoku lolotonga ngāue pōpula pe ngāue pōpula kimuʻá. ʻE lava ke maluʻi ʻa e fānaú, niʻihi fakafoʻituitui ʻoku tuʻu laveangofuá, mo kinautolu ʻoku tonuhiá ʻo fakafou ʻi he palani totonú pea mo hono fakaʻaongaʻi ʻo e ngaahi laó. Kapau ʻoku ʻikai malu ha fetuʻutaki mo ha kau mēmipa pau ʻo e fāmilí, ʻe lava ke fai ha ngaahi palani ke fakaʻehiʻehi ai mei ha fengāueʻaki kae ʻoua kuo hoko ha fakamoʻui mo ha fakalakalaka feʻunga.