ʻE Founga Fēfē Haʻaku Tokonaki ki Heʻeku Ngaahi Fiemaʻu Fakavavevavé hili ʻa e Ngāue Pōpula ha Mēmipa ʻo e Fāmilí?

Tokoni Fakaeloto Maʻau mo Ho Fāmilí

ʻI he taimi ʻoku ngāue pōpula ai ha taha ʻokú ke ʻofa ai, ʻoku angamaheni ʻaki ke aʻusia ʻe he kau mēmipa ʻo e fāmilí ha ongoʻi faingataʻaʻia fakaeloto, ʻikai lava ʻo mapuleʻi, mo taʻemalava ke fehangahangai mo e meʻa ʻoku hokó. ʻOku aʻusia foki ʻe he toʻu tupú mo e fānaú ʻa e ngaahi ongo ko ʻení, ʻa ia ʻe lava ke iku ki ha faingataʻaʻia ʻe fuoloa. Ko ha ʻuluaki sitepu lelei ʻa e fekumi ki ha tokoni mei he ngaahi kaungāmeʻa falalaʻangá mo e kāingalotu ʻo e Siasí. Kapau ʻoku fuoloa ʻa e ongoʻi loto-foʻí, fekumi ki he tokoni ʻa e kau mataotao fakafaitoʻó mo e moʻui lelei fakaeʻatamaí. Kapau ʻoku ʻikai ke ke ʻilo ʻa e feituʻu ke kamata aí, talanoa mo e kau taki ʻo e Siasí mo hoʻo kautaha maluʻi fakafaitoʻó fekauʻaki mo e kau mataotao ʻi homou feituʻú ʻa ia te nau lava ʻo ʻoatu ʻa e tokoni ʻokú ke fiemaʻú. ʻE tokoni ʻa e lotú, ako folofolá, muimui ki he ngaahi akonaki ʻa e kau palōfita moʻuí, ʻalu ki he lotú, mo e ʻalu ki he temipalé ke langaki hake mo fakafonu koe ʻaki ʻa e nongá lolotonga ʻa e ngaahi taimi faingataʻá.

Ngaahi Tafaʻaki Tokoní

Fekumi ki ha tokoni fakapalōfesinale ʻi he fakalao, fakapaʻanga, fakafaitoʻo, pe fakaeloto. Kae mahuʻinga tahá, ʻunuʻunu ofi ki he ʻOtuá. ʻOkú Ne ʻafioʻi hoʻo ngaahi fiemaʻú mo ʻofa ʻiate koe. Faʻa lotu pea fekumi ki he ngaahi founga lahi ʻoku tali ai ʻe he ʻOtuá hoʻo ngaahi lotú. Feohi mo ha kakai lelei te nau lava ʻo tokoní. Kapau ʻe feʻunga, talanoa mo ho kāingá, ngaahi kaungāmeʻa falalaʻangá, mo e kāingalotu falalaʻanga ʻo e Siasí fekauʻaki mo e tūkunga ʻokú ke ʻi aí. Ako ke talanoa fekauʻaki mo hoʻo ngaahi aʻusiá ʻi ha ngaahi founga ʻe tokoni kiate koe mo kinautolu ʻokú ke falala ki aí. Talaange ʻa e meʻa ʻokú ke fiemaʻú, pea tuku ke nau tokoni.

Ngaahi Fiemaʻu Vivili Fakalaó

ʻE lava ke faingataʻa ʻa e fengāueʻaki mo e potungāue fakamaauʻanga ki he faihiá. ʻOku lahi ha ngaahi lao mo ha ngaahi founga ngāue ʻe fiemaʻu ke mahino kiate koe. Fakakaukau ke ke talanoa mo hoʻo fakafofonga fakalaó ʻi he taimi ʻokú ke fehangahangai ai mo ha ngaahi meʻa fakalao mahuʻinga. Fakapapauʻi ʻoku mahino kiate koe ʻa e ngaahi ola taimi lōloa ʻo hoʻo ngaahi filí.

Ngaahi Fiemaʻu Fakapaʻangá

ʻI he taimi ʻoku ngāue pōpula ai ha taha ʻokú ke ʻofa ai, ʻe lava ke uesia fakapaʻanga lahi ʻa e fāmilí. ʻE lava ke iku ʻa e mole ʻa e paʻanga hū maí mo e ngaahi fakamole ʻo e fakamaauʻangá mo e ngaahi totongi fakalaó ki ha mole ʻa e tokoni fakafaitoʻó, mole ʻa e nofoʻangá mo e ʻosi ʻa e paʻanga talifakí. ʻOku mahuʻinga ke aleaʻi ʻa e ngaahi palopalema ko ʻení ʻi he vave tahá mo ha ʻetivaisa falalaʻanga.

Ko e Fakaangaanga ki ha Tuʻunga Angamaheni Foʻoú

ʻE ʻalu pē taimí mo e fiemaʻu ke toe foki ho fāmilí ki ha ngāue fakaʻaho angamaheni. ʻOku fiemaʻu ke ʻalu ʻa e fānaú ki he akó, feohi mo e ngaahi kaungāmeʻá, pea fiefia ʻi heʻenau moʻuí. Neongo ʻokú ke ʻofa ki haʻo ʻofaʻanga ʻoku ngāue pōpula, ka ʻoku SAI pē ke ke ongoʻi fiefia. Fakaʻaongaʻi ʻa e taimi ko ʻení ke ke fakatupulaki ai koe mo teuteu ki he kahaʻú.