Te u Tokoni Fēfē ke Mahino ki he Kakai Kehé Hoku Ngaahi ʻAhiʻahí mo e Faingataʻá?

Neongo ʻa e faingataʻá, ʻoku tokoni ke ke tali ʻa e liliu ʻi he tūkunga moʻoni kuó ke aʻusiá mo ha ngaahi ola tuʻuloa. ʻI hoʻo tali ʻa e foʻi moʻoni ko ʻení, ʻe faingofua ange ai ke talanoa mo e niʻihi kehé. Kamata ʻaki haʻo fakakaukauʻi ʻa e meʻa te ke talaange ki he kakaí. Mahalo he ʻikai taau ke vahevahe ʻa e fakaikiiki kotoa pē. Ka neongo ia, ʻe hanga ʻe hoʻo faitotonu ki he ngaahi ongo ʻokú ke maʻú mo hoʻo ngaahi fiemaʻú ʻo fakaʻatā ʻa e niʻihi kehé ke nau tokoni. Talanoa mo kinautolu ʻokú ke falala ki aí pea mo kinautolu ʻoku fiemaʻu ke nau ʻiloʻi ʻa e meʻa kuo hokó. Kapau ʻoku ʻi ai haʻo fānau, tokoniʻi kinautolu ke maʻu ha founga ke talanoa ai mo e niʻihi kehé.

Naʻe akoʻi ʻe Lāsolo M. Nalesoni, Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní: “ʻOku mou maʻu e totonu ke maʻu ʻo lahi e mālohi ko ia ʻo e Fakamoʻuí ke tokoniʻi homou fāmilí mo e niʻihi kehe ʻoku mou ʻofa aí. … He ʻikai te ke maʻu ia ʻe koe ʻi ha tohi fakahinohino. ʻE hoko e Laumālie Māʻoniʻoní ko [ho] faiako fakataautaha ʻi hoʻo fekumi ke mahino ʻa e meʻa ʻoku finangalo e ʻEikí ke ke ʻilo mo fakahokó” (“Ngaahi Koloa Fakalaumālié,” konifelenisi lahí, ʻOkatopa 2019). ʻE tokoniʻi koe ʻe he ʻEikí ke ke ʻilo ʻa e meʻa ke talaange ki he niʻihi kehé mo e founga ke talanoa ai mo kinautolú.