Maʻá e Fānaú: Ko e Hā Te u Lava ʻo Fai ʻi he Taimi ʻOku Ngāue Pōpula ai ha Taha ʻOku ou ʻOfa ai?

ʻE lava pē ke faingataʻa ʻi he taimi ʻoku ngāue pōpula ai ha taha ʻokú te ʻofa ai. Mahalo he ʻikai mahino kiate koe ʻa e ngaahi ʻuhinga kotoa kuo hoko ai ʻení, ka ʻokú ke ʻiloʻi ʻokú ke ʻofa ki ai, pea mahalo te ke ongoʻi loto-mamahi koeʻuhí ʻokú ne mamaʻo. ʻOku mahuʻinga hoʻo ngaahi ongó. Mahalo te ke ongoʻi ilifia, ʻita, pe puputuʻu. ʻI he taimi ʻokú ke vahevahe ai ʻa e ongo ʻokú ke maʻú mo e niʻihi kehé, te ne tokoniʻi koe ke ke ongoʻi lelei ange.

ʻOku faʻa fai ʻe he kakaí ʻi he taimi ʻe niʻihi ha ngaahi fili ʻoku kovi, ka ʻoku ʻikai ʻai ʻe he ngaahi fili taʻe-fakapotopoto ko iá ke nau hoko ai ko ha kakai kovi. ʻOku ʻofa ʻa e ʻOtuá ʻi Heʻene fānaú kotoa, kau ai ʻa e tokotaha kotoa pē ʻoku ngāue pōpulá. Te Ne tokoniʻi kinautolu mo koe ʻi he ʻaho kotoa pē. Naʻe akoʻi ʻe Sīsū, “Haʻu kiate au, … pea te u foaki ʻa e fiemālié kiate kimoutolu” (Mātiu 11:28). ʻOku ʻuhinga ʻeni ko e taimi ʻoku tau muimui ai ki he ngaahi akonaki ʻa Sīsū Kalaisí, te Ne tokoniʻi kitautolu ʻi heʻetau ngaahi palopalemá. Lotu ki he Tamai Hēvaní ʻo kole tokoni kiate Ia. Te Ne tokoniʻi koe ke ke ongoʻi ʻEne ʻofá mo e melinó.

Naʻá ke ʻiloʻi nai kuo ʻi ai ha taha ʻoku ʻofa ai ʻa e fānau kehé naʻe ngāue pōpula foki mo ia? Ko ha niʻihi ʻeni ʻo e ngaahi meʻa naʻa nau aʻusiá:

• Naʻe fakakaukau ha tamasiʻi ʻe taha (taʻu 14) ko e kakai koví pē ʻoku nau ō ki he pilīsoné ka naʻá ne toki ʻilo ʻe lava foki ke fakahoko ʻe he kakai leleí ha ngaahi fili hala.

• Naʻe tokanga ha tamasiʻi ʻe taha (taʻu 12) ki heʻene tangataʻeiki naʻe ngāue pōpulá—naʻe ʻikai ke ne fakapapauʻi pe ʻe sai pē ʻene tamaí pe ʻe lava nai ke ne ʻaʻahi kiate ia.

• Naʻe ʻi ai ha kiʻi taʻahine ʻe taha (taʻu 10) naʻe tuku pilīsone ʻene faʻeé, naʻá ne ʻofa ki ai ʻi he ʻaho kotoa pē. Naʻá ne toe loto-mamahi ʻi he taimi ʻe niʻihi ʻi heʻene ʻaʻahi ki heʻene faʻeé. Ka naʻá ne ʻiloʻi naʻe ʻofa ʻene faʻeé ʻiate ia pea ʻe vavé ni pē haʻana toe fakataha.

• Naʻe lotua ʻe ha tamasiʻi ʻe taha (taʻu 16) ʻi he pō kotoa pē, ʻa ia naʻe ʻi pilīsone ʻene tangataʻeikí. Naʻá ne ʻiloʻi naʻe lotua foki ia ʻe heʻene tamaí pea naʻe tokoniʻi ʻe he Tamai Hēvaní honau fāmilí ke nau malu.

Ngaahi Maʻuʻanga Tokoni ʻa e Siasí mo e Koló

• “Coping with Incarceration,” Sesame Street in Communities, sesamestreetincommunities.org

• Tokoni maʻá e Niʻihi Fakafoʻituitui Naʻe Ngāue Pōpula Kimuʻá

• Ako Kuo Fokotuʻutuʻu maʻá e Kakai Lalahi ʻoku Tauhi Fakalaó