Te u Tokoniʻi Fēfē ʻa e Fānau ʻa ha Mātuʻa ʻoku Ngāue Pōpula?

ʻOku uesia ʻe he ngāue pōpula ʻa ha taha fakafoʻituitui ʻa e moʻui ʻa e tokotaha kotoa pē ʻi he fāmilí. ʻOku angamaheni ke aʻusia ʻe he kau mēmipa ʻo e fāmilí ha ngaahi ongo mālohi ʻo e ʻitá, molé, fakamāʻiá, ilifiá, pe mamahí. ʻE malava ke puputuʻu ʻa e fānaú ʻi he meʻa kuo hokó mo hohaʻa ki he kahaʻú. Fakakaukau ki he ngaahi fakakaukau ko ʻení ke tokoniʻi ʻa e fānaú ke nau lava ʻo fehangahangai mo e ngāue pōpula ʻa ha mātuʻa:

• Faitotonu. Tokoni ke mahino ki he fānaú ʻoku ʻikai ko honau foʻui ʻa e ngāue pōpula ʻenau mātuʻá. ʻOku mātuʻaki mahuʻinga ʻeni kapau naʻe fai ʻa e hiá ki he kiʻi tamasiʻí pe taʻahiné. Tali totonu ʻenau ngaahi fehuʻí lolotonga hono vahevahe ʻo e fakamatala ʻoku taau mo e taʻu motuʻá.

• Langaki ha ongoʻi malu. ʻE lava ke hoko ha ngāue ʻoku fai maʻu pē mo angamahení ko ha maʻuʻanga fakafiemālie lahi. Vahevahe mo hoʻo fānaú ʻa e ngaahi fakaikiiki ʻo ho ʻahó, fehuʻi ange pe ʻoku nau ongoʻi fēfē, pea fakamanatu ange ʻa e lahi hoʻo ʻofa ʻiate kinautolú. Tali ʻenau ngaahi ongó, pea tokoniʻi kinautolu ke nau ʻiloʻi ko hai te nau lava ʻo falala ki aí.

• Kumi ha tokoni lahi ange. ʻOku ʻikai fiemaʻu ke ke fai ʻa e meʻa kotoa ʻiate koe pē. Fetuʻutaki mo hoʻo kau taki fakalotofonua ʻo e Siasí (hangē ko e pīsopé pe palesiteni fakakoló), ngaahi kaungāmeʻa ʻi he Siasí, mo e kau mataotao ki he moʻui lelei fakaeʻatamaí. Mahalo foki te ke fiemaʻu ke kumi ha kulupu tokoni fakakolo.

• Poupouʻi ʻa e fetuʻutakí (ʻi he taimi ʻe feʻunga aí). Poupouʻi ʻa e fānaú ke nau faitohi, ʻave ha ngaahi tā, pe fokotuʻu ange ha ngaahi tohi ke lau ki he mātuʻa ʻoku ngāue pōpulá. Fakaafeʻi kinautolu ke nau kau ʻi he telefoní ʻi he taimi ʻe lava aí. Poupouʻi kinautolu ke lipooti fekauʻaki mo e akó mo e ngaahi ʻekitivitī kehé.