Unsaon nga Makatabang Ko sa Ubang mga Tawo nga Makasabot sa Akong mga Pagsulay ug mga Hagit?

Bisan og lisod, makatabang nga dawaton ang kamatuoran nga ikaw nakasinati og mga kausaban nga adunay malungtarong mga epekto. Kon imong dawaton kini nga kamatuoran, mas sayon ang pagsulti ngadto sa uban. Sugdi pinaagi sa pagdesisyon kon unsay imong isulti sa mga tawo. Dili angay nga ipakigbahin ang matag detalye. Hinuon, ang pagkamatinuoron sa imong mga pagbati ug sa imong mga panginahanglan makapahimo sa uban nga motabang. Pakigsulti niadtong imong gisaligan ug niadtong kinahanglang masayod sa unsay nahitabo. Kon ikaw adunay mga anak, tabangi sila nga makakita og paagi nga makig-istorya sa uban.

Si Russell M. Nelson, Presidente sa Ang Simbahan ni Jesukristo sa mga Santos sa Ulahing mga Adlaw, mitudlo: “Kamo adunay katungod sa paggamit sa gahom sa Manluluwas sa pagtabang sa inyong pamilya ug sa uban nga inyong gimahal. … Dili ninyo makita kini nga gipasabot sa detalye sa bisan unsa nga manwal. Ang Espiritu Santo mao ang inyong personal nga magtutudlo samtang maningkamot kamo nga makasabot unsay gusto sa Ginoo nga inyong mahibaloan ug buhaton” (“Espirituhanon nga mga Bahandi,” kinatibuk-ang komperensiya, Okt. 2019). Ang Ginoo motabang nimo nga mahibalo kon unsay isulti sa uban ug kon unsaon pagsulti nila.