Unsaon Nako Pagsuporta sa mga Anak sa Nabilanggo nga Ginikanan?

Ang pagkabilanggo sa usa ka indibidwal makaapekto sa mga kinabuhi sa tanan nga anaa sa pamilya. Sagad nga masinati sa mga sakop sa pamilya ang hilabihan nga mga pagbati sa kasuko, pagkawala, kaulaw, kahadlok, o kasubo. Ang mga bata mahimong maglibog kon unsay nahitabo ug mabalaka bahin sa umaabot. Ikonsiderar ang mosunod nga mga ideya aron matabangan ang mga bata sa pag-atubang sa kalisod sa pagkabilanggo sa ginikanan:

• Pagmatinuoron. Tabangi ang mga bata nga makasabot nga dili ilang sala ang pagkabilanggo sa ilang mga ginikanan. Importante kini ilabi na kon ang krimen nahimo batok sa bata. Tubaga ang ilang mga pangutana sa matinud-anong paagi samtang magpakigbahin og impormasyon nga tukma sa pangedaron.

• Palig-ona ang seguridad. Ang regular, nahibaloan nang daan nga mga tulumanon usa ka dakong tinubdan sa kahupayan. Ipakigbahin ang mga detalye sa imong adlaw ngadto sa imong mga bata, pangutan-a sila kon unsa ang ilang gibati, ug pahinumdomi sila unsa kadako ang imong gugma nila. Ipamatuod nga sakto ang ilang mga pagbati, ug tabangi sila nga makahibalo kung kinsa ang ilang masaligan.

• Pangita pa og tabang. Dili nimo kinahanglan nga buhaton ang tanan nga ikaw ra. Kontaka ang imong mga lider sa Simbahan (sama sa bishop, presidente sa branch), mga higala sa Simbahan, mga propesyonal sa pag-atiman sa mental nga kahimsog. Mahimo ka usab nga mangita og grupo sa komunidad nga nagsinuportaay.

• Iawhag ang komunikasyon (kon angay). Awhaga ang mga bata sa paghimo og mga sulat, pagpadala og mga litrato, o pagsugyot og mga libro nga basahon sa nabilanggo nga ginikanan. Dapita sila sa pag-apil sa mga tawag sa telepono kon posible. Awhaga sila sa paghisgot bahin sa eskuwela ug uban pang mga kalihokan.