Alang sa mga Ten-edyer: Nabilanggo ang Akong Ginikanan, ug Lisod ang Paghisgot mahitungod Niini. Unsa man ang Akong Isulti?

Ang pagproseso sa tinuod nga hitabo nga ang usa ka minahal nabilanggo mahimong malisod. Mahimong mobati ka nga nag-inusara o naguol. Daghang mga butang sa imong kinabuhi tingali nausab. Mahimong malisod ang pagpadayon sa imong normal nga mga kalihokan, sama sa pag-eskuwela o trabaho. Mahimong masuko ka sa imong ginikanan, sa ubang mga sakop sa pamilya, mga higala, o gani sa imong kaugalingon. Kini nga mga emosyon makapalisod sa pagpakigsulti sa uban mahitungod sa unsay nahitabo.

Adunay daghang tawo sa imong edad nga nag-agi sa parehas nga mga kahimtang. Hinuon, ang matag tawo adunay iyang kaugalingong istorya ug mga pagbati nga ayom-ayomon. Usa ka tawo nga nakahibalo gayod sa imong gibati mao si Jesukristo. Samtang dili tingali nato masabtan sa hingpit kon sa unsa nga paagi nga kini nahimong posible, ang kasulatan nagsulti kanato nga si Kristo miantos “sa mga sakit ug mga kasakit ug mga pagtintal sa matag matang” (Alma 7:11).

Tungod Kaniya, dili ka kinahanglang mobati nga nag-inusara. Mahimo nimong basahon ang pakigpulong ni Elder Jeffrey R. Holland “Walay Bisan Usa nga Nakig-uban Kaniya” gikan sa Abril 2009 nga kinatibuk-ang komperensiya. Si Elder Holland mipasabot nga “tungod kay si Jesus mibaktas sa ingon ka taas, masulub-ong agianan nga nag-inusara dili na kita kinahanglang mohimo pa sa ingon.”

Si Presidente Russell M. Nelson mitudlo nga makakaplag ka og mga tubag ug kahupay samtang ikaw: “[m]ag-ampo sa ngalan ni Jesukristo bahin sa i[m]ong mga kabalaka, i[m]ong mga kahadlok, i[m]ong mga kahuyang—oo, [sa] mga tinguha sa i[m]ong kasingkasing. Ug dayon maminaw!” (“Pagpadayag alang sa Simbahan, Pagpadayag alang sa Atong mga Kinabuhi,” kinatibuk-ang komperensiya, Abr. 2018).

Lain pa nga butang nga makatabang kanimo nga dili mobati nga nag-inusara mao ang mahunahunaon nga pagpakigbahin sa imong mga kasinatian ngadto sa uban. Maayo ug importante ang pagsulti sa imong mga pagbati sa luwas nga mga palibot. Pag-ampo aron mahibalo kon kinsa ang imong sultihan ug kon kanus-a. Kon ang pagpakigsulti sa usa ka kasaligan nga higala daw lisod kaayo, pagsugod sa usa ka suod nga paryente. Sa dili pa makig-istorya og tawo, hunahunaa unsa ang imong gibati nga komportable nimong ipakigbahin. Dili nimo kinahanglang ipakigbahin ang tanan. Mahimo nimong ipasabot nga ang imong mga kasinatian lisod hisgotan ug gusto ka og suporta.

Kon ang pagpakigbahin sa imong mga pagbati ngadto sa usa ka tawo morag makahadlok para nimo karon, OK ra na! Makasugod ka pinaagi sa pagpakig-istorya sa Dios pinaagi sa pag-ampo. Nag-ingon Siya, “Paghunahuna ngari kanako sa matag hunahuna; ayaw pagduha-duha, ayaw kahadlok” (Doktrina ug mga Pakigsaad 6:36). Nahibalo Siya sa imong ngalan ug sa imong mga sirkumstansiya. Dili gayod Siya mobiya kanimo.

Kapanguhaan sa Komunidad

• Youth.gov, “In Their Words: 4 Young People Share Experiences with Having an Incarcerated Parent” (video), youtube.com