Pagpanalipod sa Inosente

Ang Simbahan ni Jesukristo sa mga Santos sa Ulahing mga Adlaw mapasaligon sa pagpanalipod sa inosente gikan sa bisan unsa nga sitwasyon nga mahimong mosangpot sa pagpasakit o pag-abuso (tan-awa sa Abuso, Tabang sa Kinabuhi, Librarya sa Ebanghelyo). Kon ikaw giabuso o mibati nga anaa sa kakuyaw sa pagpasakit, kinahanglan nga mokontak dayon ka sa lokal nga pulis. Kinahanglan usab nga mokontak ka og kasaligan nga tawo aron motabang nga maseguro ang imong kaluwasan.

Ingon nga ang Simbahan nagpasiugda sa pag-atiman alang niadtong nabilanggo, dili kini mopakunhod sa pagpanalipod sa inosente ug sa paghatag og suporta niadtong mga biktima sa krimen. Tingali lisod alang sa mga lider ug sa mga miyembro nga anaa sa sitwasyon nga sila nahibalo sa tawo nga nagbuhat sa krimen ug sa biktima sa krimen. Pinaagi sa pag-ampo ug sa pagpaminaw sa Espiritu, mahimo sila nga magiyahan sa Dios sa ilang pakighinabi sa tanan nga nahilambigit.

Kon sa mga sitwasyon sa pamilya nga ang pagsalig nawala na, ang mga sakop sa pamilya mahimong makigtambayayong sa mga tighatag og pagtambal, mga lider sa Simbahan, ug ubang mga propesyonal. Sila mahimong makigtambabayong sa pag-establisar og mga lagda alang sa paglikay sa mga problema ug alang sa luwas nga pag-establisar sa pagkontak sa nabilanggo o kanhi nabilanggo nga mga sakop sa pamilya. Ang mga bata, ang talandogon nga mga indibidwal, ug ang inosente nga mga biktima mahimong mapanalipdan pinaagi sa tukmang pagplano ug pinaagi sa pag-implementar sa mga balaod. Kon ang panagkita tali sa piho nga mga sakop sa pamilya dili luwas sa kasamtangan, ang mga plano mahimong buhaton aron malikayan ang pakighinabi hangtod nga ang igong pagkaayo ug paglambo mahitabo.