“Ako ki he Fakataukei Fakatokāteliné,” Ako ki he Naunau Fakalēsoni ʻa e Seminelí (2025)

ʻĪmisi

kau talavou ʻoku nau ako e folofolá

Ako ki he Fakataukei Fakatokāteliné

Talateu ki he Fakataukei Fakatokāteliné: Ko ha Sīpinga ki Hono Fekumi mo Hono Maʻu ʻo e Ngaahi Tali Fakalangí

ʻĪmisi

Sēkope mo Seialemi

ʻI he Tohi ʻa Molomoná, ʻoku fakamatala ai ʻa Sēkope ki ha aʻusia naʻá ne maʻu mo ha tangata ko Seialemi. Naʻe ako mo fakaʻaongaʻi ʻe Seialemi ha lea fakahekeheke mo e mālohi lahi ke kākaaʻi ʻa e loto ʻo e tokolahi pea ke “ikuʻi ʻa e tokāteline ʻa Kalaisí” (vakai, Sēkope 7:2–4). ʻOku fakamatalaʻi ʻe Sēkope naʻe “feinga lahi [ʻa Seialemi] ke maʻu ha faingamālie ke ne haʻu ai kiate au. … Pea naʻá ne ʻamanaki ke fakaʻauha ʻa ʻeku tuí” (Sēkope 7:3, 5). Ka naʻe tohi ʻe Sēkope ʻo pehē, “Naʻe ʻikai faʻa lava ke ueʻi au” (Sēkope 7:5). Koeʻuhí ko e ngaahi ngāue faivelenga kuo fai ʻe Sēkope ʻi he kotoa ʻo ʻene moʻuí, he ʻikai ha toe fehuʻi pe tūkunga te ne lava ʻo toʻo ʻa Sēkope mei hono tuʻunga kuo fokotuʻu maʻu ʻia Sīsū Kalaisi mo ʻEne ongoongoleleí.

ʻĪmisi

Fakatātā (meme) ʻo e Tuʻu Maʻu ʻi he Lotolotonga ʻo e Ngaahi Matangi Mālohí

ʻI hotau kuongá ni, ʻoku fehangahangai ʻa e toʻu tupu ʻo e Siasí mo ha ngaahi fehuʻi mo ha ngaahi tūkunga faingataʻa te ne lava ʻo ueʻi kinautolu mei heʻenau tuí. Ko e fakataukei fakatokāteliné ko ha founga ia ʻe taha ʻe lava ke teuteu ai ʻa e kau akó ki he ngaahi faingataʻa ko ʻení. ʻI hono fakatupulaki ʻe he kau akó ʻa e fakataukei fakatokāteliné, te nau mateuteu lelei ange ai ke ʻoua naʻa teitei ueʻi kinautolu mei heʻenau tui kia Sīsū Kalaisí. Naʻe vahevahe ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni mo e kau faiako ʻi he seminelí mo e ʻinisititiutí fekauʻaki mo e fakataukei fakatokāteliné:

ʻE nofotaha ʻa e [Fakataukei fakatokāteliné] ʻi hono fakatupulaki mo fakamālohia ʻa e tui ʻetau kau akó kia Sīsū Kalaisí mo fakamālohia kinautolu ʻaki ha malava lahi ange ke moʻui ʻaki mo fakaʻaongaʻi ʻa e ongoongoleleí ʻi heʻenau moʻuí. …

ʻOku ueʻi fakalaumālie mo taimi lelei ʻa e foungá ni. Te ne tākiekina lelei hotau kakai kei talavoú. Ka, ʻe fakafalala ʻa e ola lelei ʻo e fakataukei fakatokāteliné, pea mo e ngaahi polokalama ako kehe kotoa ʻa e CES ʻiate kimoutolu. (M. Russell Ballard, “The Opportunities and Responsibilities of CES Teachers in the 21st Century” [evening with a General Authority, Feb. 26, 2016], broadcasts.ChurchofJesusChrist.org)

Fakataukei Fakatokāteline ʻi he Naunau Fakalēsoní

ʻI he tohi lēsoni ʻa e faiakó, kuo faʻa fakakau ai ʻa e ngaahi aʻusia fakaako ʻo e fakataukei fakatokāteliné ke tokoni ki he kau akó ke aʻusia ʻa e ngaahi ola ʻo e fakataukei fakatokāteliné. ʻOku fakatātaaʻi ʻe he fakatātā ko ʻení ʻa e ngaahi ola ʻo e fakataukei fakatokāteliné. Ke maʻu ha fakamatala lahi ange, vakai ki he Fakamatala ki he ʻElito ʻo e Fakataukei Fakatokāteliné (2023).

ʻĪmisi

Saati Ako ki he Fakataukei Fakatokāteliné

ʻOku tokoni ʻa e naunau fakalēsoni ʻa e seminelí ki he kau akó ke nau lavaʻi ʻa e ngaahi ola ʻo e fakataukei fakatokāteliné ʻi he ngaahi founga ʻe tolu ko ʻení:

Ngaahi lēsoni talateu ki he fakataukei fakatokāteliné pea mo e ngaahi tefitoʻi moʻoni ʻo hono maʻu ʻo e ʻilo fakalaumālié
Ngaahi potufolofola fakataukei fakatokāteline ʻoku akoʻi hono puipuituʻá fakataha mo e taimi-tēpile ʻo e Haʻu, ʻo Muimui ʻIate Aú
Ngaahi lēsoni Akoako Fakataukei Fakatokāteliné

Hangē pē ko hono fiemaʻu ʻe he tokotaha kaka maká ha meʻangāue ke hifo lelei hifo ʻi ha teleʻa lilifá, ʻoku pehē pē ʻa e tokoni ʻa e ngaahi aʻusia fakaako ko ʻení ke teuteuʻi e kau akó ʻaki ʻa e ngaahi taukei ke foua ʻa e ngaahi fehuʻi mo e tūkunga faingataʻá ʻi he tui kia Sīsū Kalaisí.

ʻĪmisi

Fakatātā (meme) ʻo e Ngaahi Taukei ke Foua ʻa e Ngaahi Faingataʻá

Talateu ki he fakataukei fakatokāteliné mo e ngaahi lēsoni ki hono maʻu ʻo e ʻilo fakalaumālié

ʻOku ʻi ai ha ngaahi lēsoni fakataukei fakatokāteline ʻe nima, naʻe fakataumuʻa ke tokoni ke mahino ki he kau akó ʻa e taumuʻa ʻo e fakataukei fakatokāteliné mo ako fekauʻaki mo e ngaahi tefitoʻi moʻoni ki hono maʻu ʻo e ʻilo fakalaumālié.

Ko Hono Fakamālohia Ho Fakavaʻe Fakalaumālié: Talateu ki he Fakataukei Fakatokāteliné. ʻOange ki he kau akó ha vīsone fakalūkufua ki he ʻuhinga ʻo e fakataukei fakatokāteliné pea mo e faʻahinga aʻusia fakaako te nau lava ʻo ʻamanaki ke tokoniʻi kinautolu ke fakatupulaki ʻa e fakataukei fakatokāteliné. Lelei tahá ke akoʻi ʻi he kamataʻanga ʻo e taʻu fakaakó kapau ʻoku tokolahi ha fānau ako ʻoku foʻou ki he seminelí pe ko hano fakamanatu ʻi he vaeuaʻanga ʻo e taʻú.
Fekumi ki ha Fakahā Fakataautaha ki Heʻeku Ngaahi Fehuʻí: Ko Hono Maʻu ʻo e ʻIlo Fakalaumālié, Konga 1. Tokoni ke mahino ki he kau akó ʻa e founga te nau lava ai ʻo maʻu ha fakahinohino mo ha fakahā mei he ʻOtuá ʻo fakafou ʻi he Laumālie Māʻoniʻoní. Lelei tahá ke akoʻi ʻi he kamataʻanga ʻo e taʻu fakaakó.
Ko e Ngāue ʻi he Tuí ke Maʻu ʻa e Ngaahi Talí: Ko Hono Maʻu ʻo e ʻIlo Fakalaumālié, Konga 2. Tokoni ke mahino ki he kau akó ʻa e founga ke ngāue ai ʻi he tui kia Sīsū Kalaisí ʻi heʻenau fekumi ki ha tali ki heʻenau ngaahi fehuʻí. Lelei tahá ke akoʻi ʻi he kamataʻanga ʻo e taʻu fakaakó.
Ko Hono Sivisiviʻi ʻo e Ngaahi Tefito mo e Ngaahi Fehuʻi ʻo e Ongoongoleleí ʻaki ha Fakakaukau ʻoku Taʻengatá: Ko Hono Maʻu ʻo e ʻIlo Fakalaumālié, Konga 3. Tokoniʻi ʻa e kau akó ke nau vakai lahi ange ki he ngaahi fakakaukaú mo e ngaahi fehuʻí ʻo hangē ko Sīsū Kalaisí ʻi hono sivisiviʻi kinautolu ʻe he kau akó ʻaki ha fakakaukau ʻoku taʻengatá. Lelei tahá ke akoʻi ʻi he kamataʻanga ʻo e taʻu fakaakó.
Ko e Tafoki ki he Ngaahi Maʻuʻanga Tokoni Kuo Fokotuʻu Fakalangí ke Tokoni ke Maʻu ʻa e Ngaahi Talí: Ko Hono Maʻu ʻo e ʻIlo Fakalaumālié, Konga 4. Tokoni ke mahino ki he kau akó ʻa e mahuʻinga ʻo e fekumi ki he moʻoní mei he ngaahi maʻuʻanga tokoni kuo foaki ʻofa mai ʻe he Tamai Hēvaní mo Sīsū Kalaisí. Lelei tahá ke akoʻi ʻi he kamataʻanga ʻo e taʻu fakaakó.

Ngaahi potufolofola fakataukei fakatokāteline naʻe akoʻi ʻi hono puipuituʻá

ʻI hono akoʻi ha lēsoni mei ha konga folofola ʻoku kau ai ha potufolofola fakataukei fakatokāteline, kumi ha ngaahi founga ke fakamamafaʻi ai ʻa e potufolofolá. Akoʻi ʻa e potufolofolá ʻi hono puipuituʻá, pea tokanga taha ki he tokāteline ʻokú ne akoʻí. Te ke fakatokangaʻi ʻa e fakaʻilonga ko ʻení ʻi he taimi kotoa pē ʻoku ʻi ai ha potufolofola fakataukei fakatokāteliné. Mahalo te ke fie poupouʻi ʻa e kau akó ke fakaʻilongaʻi ʻa e potufolofola takitaha ke lava ʻa e kau akó ʻo maʻu kinautolu ʻamui ange.

ʻOku ʻi he Fakamatala ki he ʻElito ʻo e Fakataukei Fakatokāteliné (2023) ha lisi ʻo e ngaahi potufolofola fakataukei fakatokāteline ʻe 24 ki he kalasi takitaha. ʻOku ngalingali he ʻikai fakakau ʻi hoʻo fakahinohino ki he vave hono akoʻí ʻa e ngaahi lēsoni kotoa pē ʻokú ne fakamatalaʻi ʻa e ngaahi potufolofola fakataukei fakatokāteliné ʻi hono puipuituʻá lolotonga ʻoku lele ʻa e seminelí, ko ia fakapapauʻi ke kumi ha ngaahi faingamālie ke tokoni ki he kau akó ke nau toe vakaiʻi kotoa ʻa e ngaahi potufolofola ʻe 24.

ʻI he taimi ʻoku ako ai ʻa e ngaahi potufolofola fakataukei fakatokāteliné ʻi he kalasí, fakapapauʻi ke fakaʻaongaʻi ha taimi feʻunga ke ako ʻa e tokāteline ʻoku akoʻi ʻi he potufolofola fakataukei fakatokāteliné koeʻuhí ke ʻilo mo mahino ia ki he kau akó. ʻOku kau ʻi he lēsoni takitaha mo ha potufolofola fakataukei fakatokāteline ha fokotuʻu ke tokoni ki he kau akó ke ako maʻuloto ʻa e fakamoʻoni fakafolofolá mo e kupuʻi lea mahuʻinga ʻo e folofolá ko ha konga ʻo e lēsoní pea toe akoako fakahoko ia ʻi he ngaahi lēsoni ʻi he kahaʻú. ʻE fiemaʻu ke fakaangaanga maʻu pē ʻe he kau akó ke ako maʻuloto ʻa e ngaahi fakamoʻoni fakafolofolá mo e ngaahi kupuʻi lea mahuʻinga ʻo e folofolá. ʻOku kau ʻi he “Ngaahi Fakakaukau ki hono Toe Vakaiʻi ʻo e Fakataukei Fakatokāteliné” ha ngaahi fokotuʻu ki he founga te ke ala tokoni ai ke ako maʻuloto ʻe he kau akó ʻa e fakamoʻoni fakafolofolá mo e kupuʻi lea mahuʻinga ʻo e folofolá. ʻE lava ke maʻu ʻeni ʻi he fakamatala fakalahi ʻo e tohi lēsoni ʻa e faiako seminelí.

Ngaahi Lēsoni Akoako Fakataukei Fakatokāteliné

ʻOku fakataimi-tēpileʻi maʻu pē ʻa e ngaahi lēsoni Akoako Fakataukei Fakatokāteliné, fakafuofua ki he uike ʻe fā ki he ono kotoa pē. ʻOku nau ʻoange ki he kau akó ha ngaahi faingamālie ke ngāue ke aʻusia ʻa e ngaahi ola ʻo e fakataukei fakatokāteliné. ʻOku ʻi he lēsoni ako fakataukei fakatokāteline takitaha ha konga ʻe ua:

Toe Vakaiʻi ʻo e Fakataukei Fakatokāteliné
Ako mo fakaʻaongaʻi ʻa e Ngaahi Tefitoʻi Moʻoni ʻo Hono Maʻu ʻo e ʻIlo Fakalaumālié

Toe Vakaiʻi ʻo e Fakataukei Fakatokāteliné

ʻI he konga Toe Vakaiʻi ʻo e Fakataukei Fakatokāteliné, ʻe fakaangaanga ʻa e kau akó ke mahino mo fakamatalaʻi ʻa e tokāteliné ʻo fakaʻaongaʻi ʻa e ngaahi potufolofola fakataukei fakatokāteliné, kumi ʻa e ngaahi potufolofola fakataukei fakatokāteliné mo ako maʻuloto ʻa e ngaahi kupuʻi lea mahuʻinga ʻo e folofolá, pea fakaʻaongaʻi ʻa e tokāteline ʻoku akoʻi ʻi he ngaahi potufolofola ko ʻení. Neongo ʻoku mahuʻinga ʻa e ngaahi toe vakaiʻi ko ʻení pea ʻoku totonu ke hoko ia ko ha konga angamaheni ʻo e ngaahi aʻusia fakaako ʻa e kau akó, ka ke tokangaʻi lelei ʻa e taimi kalasí ke lava ʻo ʻoange ha konga lahi ʻo e taimí ki he konga Ako mo Fakaʻaongaʻi ʻa e Ngaahi Tefitoʻi Moʻoni ʻo Hono Maʻu ʻo e ʻIlo Fakalaumālié.

Ako mo Fakaʻaongaʻi ʻa e Ngaahi Tefitoʻi Moʻoni ʻo Hono Maʻu ʻo e ʻIlo Fakalaumālié

ʻOku totonu ke toʻo ʻe he konga ki he Ako mo Fakaʻaongaʻi ʻo e Ngaahi Tefitoʻi Moʻoni ʻo Hono Maʻu ʻo e ʻIlo Fakalaumālié ʻa e konga lahi ʻo e taimí ʻi he ngaahi lēsoni Akoako Fakataukei Fakatokāteliné. ʻOku ʻomi ʻe he konga ko ʻení ha ngaahi faingamālie ki he kau akó ke nau akoako fakaʻaongaʻi ʻa e tokāteline ʻo e ongoongolelei ʻo Sīsū Kalaisí pea mo e ngaahi tefitoʻi moʻoni ʻo hono maʻu ʻo e ʻilo fakalaumālié ki he ngaahi tūkunga moʻoni ʻo e moʻuí.

ʻOku kamata ʻa e konga akoako fakahoko takitaha ʻaki ha faingamālie maʻá e kau akó ke nau toe vakaiʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié. Manatuʻi neongo ʻoku ʻiloʻi lelei ʻe ha toko taha pe toko ua ʻo e kau akó ʻa e ngaahi tefitoʻi moʻoní, ka ʻe kei fiemaʻu pē ʻe ha niʻihi ia ha taimi mo ha akoako lahi ange. Fai ho lelei tahá ke tokoniʻi ʻa e kau akó kotoa ke nau maʻu ha loto-falala ʻo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié. ʻOku kau ʻi he “Ngaahi Fakakaukau ki he Toe Vakaiʻi ʻo e Ngaahi Tefitoʻi Moʻoni ʻo Hono Maʻu ʻo e ʻIlo Fakalaumālié” ha ngaahi fokotuʻu ki he founga hono toe vakaiʻi ʻo e ngaahi tefitoʻi moʻoni ko ʻení. ʻOku maʻu ʻeni ʻi he fakamatala fakalahi ʻo e tohi lēsoni ʻa e faiako seminelí.

ʻE ʻoatu leva ki he fānau akó ha foʻi palopalema ʻokú ne fakatātaaʻi ha fehuʻi pe tūkunga ʻe lava ke tokoni ai ha mahino totonu ki he tokāteline moʻoní. Ke tali ʻa e fehuʻí pe tūkungá, ʻe lava ke akoako fakaʻaongaʻi ʻe he kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié mo e tokāteline ʻoku akoʻi ʻi he ngaahi potufolofola fakataukei fakatokāteliné, ngaahi potufolofola kehé, pe ngaahi akonaki ʻa e kau taki ʻo e Siasí ne toki ako kimuí ni ʻe he kau akó.

ʻOku mahuʻinga ki heʻenau lavameʻa ʻi he fakataukei fakatokāteliné hono ʻoange ki he kau akó ha ngaahi faingamālie lahi ke nau akoako fakahoko ai iá. Fakakaukau ki he founga ʻoku fiemaʻu ai ʻe ha tokotaha ʻoku ako kalate ha taimi lahi ke akoako ai kae lava ke fakatupulaki ai ʻa e mafaofao hono uouá. ʻOku teuteuʻi heni kinautolu ke nau matatali ha ngaahi ʻohofi kehekehe. Ko e meʻa tatau pē, ʻoku fiemaʻu ʻe he kau akó ha akoako lahi ʻi he fakataukei fakatokāteliné. ʻI he fakaangaanga maʻu pē ʻa e kau akó, ʻe fakaʻau ke fakanatula mo ʻikai fakakounaʻi ʻa e ngaahi tali faivelenga ki he ngaahi faingataʻá.

ʻĪmisi

Fakatātā (meme) Fakaangaanga Maʻu Pē

Ke vakai ki ha sīpinga ʻo ha founga fakaangaanga, fakakaukau ke mamataʻi ha taha pe fakatouʻosi e ongo vitiō ko ʻení, ʻoku ʻi he ChurchofJesusChrist.org. ʻI hoʻo sió, kumi ʻa e founga ʻoku tokoniʻi ai ʻe he faiakó ʻa e kau akó ke nau fakaangaanga hono fakaʻaongaʻi ʻa e ngaahi tefitoʻi moʻoni kotoa ʻe tolu ki hono maʻu ʻo e ʻilo fakalaumālié.

Te ke lava ʻo liliu ʻa e ngaahi tūkungá mo e ngaahi fehuʻi ʻoku fokotuʻu atú pe ngaahi ʻekitivitī ako kehé ʻo ka fiemaʻu ke feau lelei ange ʻa e ngaahi fiemaʻu ʻa e fānau akó. Te ke lava foki ʻo liliu ʻa e hokohoko ʻoku fakaʻaongaʻi ai ʻe he kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié. Fakapapauʻi ʻoku kei ʻoange ʻe he ngaahi liliú ha ngaahi faingamālie ki he fānau akó ke nau akoako fakaʻaongaʻi ngaahi tefitoʻi moʻoni ʻo hono maʻu ʻo e ʻilo fakalaumālié pea mo e tokāteliné ki ha tūkunga moʻoni. Kapau ʻe liliu ʻa e ngaahi tūkungá, feinga ke tauhi ʻa e tefitoʻi fehuʻi pe meʻa ke tokanga ki ai ʻi he tūkungá. Kuo palaniʻi fakalelei ʻa e ngaahi fehuʻi pe meʻa ke tokanga ki ai ʻi he konga mahuʻinga taha ʻo e tūkunga takitaha ʻi he taʻu kotoa ʻe fā ʻo e seminelí.

Ke maʻu ha ngaahi fakakaukau ki he founga ke fai ai ha ngaahi fakafenāpasi feʻunga ke akoako hono fakaʻaongaʻí, fakakaukau ke mamataʻi ha taha pe lahi ange ʻo e ngaahi vitiō ko ʻení ʻoku ʻi he ChurchofJesusChrist.org.

Ngaahi Taukei ke Akoʻi Lelei ʻa e Fakataukei Fakatokāteliné

ʻOku akoʻi ʻe he ngaahi ako ko ʻení ʻa e ngaahi taukei ʻe lava ʻo tokoni ki he fānau akó ke nau fakatupulaki ʻa e fakataukei fakatokāteliné. Mahalo ʻe ʻaonga ke fakaʻaongaʻi taha taha ʻa e ngaahi taukei ko ʻení.

Taukei: Fakamatalaʻi ʻa e ʻuhinga ki ha ʻekitivitī fakataukei fakatokāteline.

Fakaʻuhingaʻí

ʻI hono vahevahe pe tuku ke vahevahe ʻe he kau akó ha ʻuhinga ki hono fakahoko ha ʻekitivitī fakataukei fakatokāteliné, ʻe ava ke fakaʻaiʻai ai ʻa e kau akó ke nau kau ki ai. Te ne lava foki ʻo fakaʻatā ʻa e Laumālie Māʻoniʻoní ke Ne akoʻi kinautolu fekauʻaki mo e mahuʻinga ʻo e ʻekitivitií. Hili hoʻo vahevahe ʻa e meʻa ʻe fai ʻe he kalasí, vahevahe ha ʻuhinga ʻe taha pe ua ʻokú ke fai ai ʻa e ʻekitivitií pe kole ki he kau akó ke vahevahe ʻa e ʻuhinga ʻoku nau pehē ai ʻe ala tokoni ʻa e ʻekitivitií.

Fakatātaaʻi

“Kalasi, ʻi he ngaahi miniti siʻi ka hokó te tau fakamatalaʻi ʻa e tokāteline ʻoku tau ako mei he Luke 2:10–12, ʻa ia ko Sīsū Kalaisi ʻa e Fakamoʻui ʻo e māmaní. Ko e ʻuhinga ʻe taha ʻoku tau fai ai ʻení ke tokoniʻi kitautolu ke tau lava ʻo tali loto-toʻa kapau ʻoku fehuʻi mai ʻe ha taha ʻoku tau ʻiloʻi ʻa e ʻuhinga ʻoku mahuʻinga ai ʻa Sīsū Kalaisi kiate kitautolú.”

Ke vakai ki ha sīpinga ʻo e founga ʻe lava ke fakahoko ai ʻení, mamataʻi ha taha pe lahi ange ʻo e ngaahi vitiō ko ʻení ʻoku ʻi he ChurchofJesusChrist.org.

Fakaangaanga

Fili ha taha ʻo e ngaahi meʻa ko ʻení pea fakakakato ʻa e sētesí.

“Tau fai ha ʻekitivitī ʻe tokoni ke tau ako maʻuloto ʻa e fakamoʻoni fakataukei fakatokāteliné mo e kupuʻi lea mahuʻingá. Ko e ʻuhinga ʻe taha ʻoku tau ngāue ai ke ako maʻuloto ʻení ko e …”

“‘I he ngaahi miniti siʻi ka hokó, te tau toe vakaiʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié. ʻE lava ke tokoni hono ʻiloʻi ʻa e ngaahi tefitoʻi moʻoni ko ʻení ke tau …”

“Te tau akoako fakaʻaongaʻi ʻa e ngaahi tefitoʻi moʻoni ʻe tolu ki hono maʻu ʻo e ʻilo fakalaumālié. ʻE lava ʻe hono fakaʻaongaʻi ʻo e ngaahi tefitoʻi moʻoni ko ʻení ʻo …”

ʻAnalaiso

Ko e hā ha meʻa ʻokú ke ako ʻi hoʻo akoako fakamatalaʻi ʻa e ngaahi ʻuhinga ki hono fai ha ʻekitivitī fakataukei fakatokāteliné?

Fakatahaʻi

ʻI hoʻo teuteu ke akoako ʻe he kau akó ha ʻekitivitī fakataukei fakatokāteliné, hiki hifo ha ʻuhinga ʻe taha pe lahi ange ʻe ala mahuʻinga ai ki he fānau akó.

Taukei: Fakaafeʻi ʻa e kau akó ke toe vakaiʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié.

Fakaʻuhingaʻi

ʻI hoʻo toutou fakamanatu maʻu pē ʻa e ngaahi tefitoʻi moʻoni ʻo hono maʻu ʻo e ʻilo fakalaumālié mo hoʻo kalasí, ʻe lava ke tokoniʻi ʻe he Laumālie Māʻoniʻoní ʻa e kau akó ke nau manatuʻi mo fakaʻaongaʻi kinautolu ʻi he taimi ʻo e faingataʻá. Te ke lava ʻo fakaafeʻi ʻa e kau akó ke nau toe vakaiʻi ʻa e ngaahi tefitoʻi moʻoni ko ʻení kimuʻa peá ke vahevahe ʻa e palopalemá pe lolotonga ʻenau ngāue ki he tūkungá. ʻOku kau ʻi he ngaahi fakaafe ko ʻení ha faingamālie ki he kau akó ke nau toe vakaiʻi ha tefitoʻi moʻoni ʻe taha pe lahi ange, ngaahi fakahinohino ki he fuoloa ʻoku totonu ke nau toe vakaiʻi ai ʻa e tefitoʻi moʻoní, pea mo ha faingamālie ke nau vahevahe ai ʻa e meʻa ne nau akó. ʻI hono fai ʻení, ʻe lava lelei ange ai ke fakaʻaongaʻi ʻe he fānau akó ʻa e ngaahi tefitoʻi moʻoní ko ha konga ʻo hono fakaʻaongaʻi fakaangaangá. Ki ha ngaahi fakakaukau ki he founga hono fakahoko ʻení, vakai ki he “Ngaahi Fakakaukau ki Hono Toe Vakaiʻi ʻo e Ngaahi Tefitoʻi Moʻoni ʻo Hono Maʻu ʻo e ʻIlo Fakalaumālié” ʻi he fakamatala fakalahi ʻo e tohi lēsoni ʻa e faiako seminelí.

Fakatātaaʻi

“ʻI he ʻahó ni te tau toe vakaiʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié mei he Fakamatala ki he ʻElito ʻo e Fakataukei Fakatokateliné (2023). Te tau vahevahe ki he ngaahi kulupu ʻoku tautau toko tolu. ʻE toe vakaiʻi ʻe he tokotaha ako kotoa pē ʻi he kulupú ha tefitoʻi moʻoni kehe.

“Tuku ha miniti ʻe tolu ki he fā ke lau mo teuteu ai ke vahevahe mo hoʻo kulupú ha founga ʻe taha ʻe lava ke tokoniʻi ai ʻe hoʻo tefitoʻi moʻoní ha taha ʻoku fehangahangai mo ha fehuʻi pe tūkunga faingataʻa.”

Ki ha sīpinga ʻo ha founga ke tokoniʻi ai ʻa e kau akó ke nau toe vakaiʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié, mamata ʻi he “ʻOange ki he kau akó ha ngaahi faingamālie ke toe vakaiʻi kotoa ʻa e ngaahi tefitoʻi moʻoni ʻe tolu ʻo hono maʻu ʻo e ʻilo fakalaumālié,” ʻoku maʻu ʻi he ChurchofJesusChrist.org.

Fakaangaanga

Hiki hifo ha founga ʻe taha te ke ala fakaafeʻi ʻa e kau akó ke nau toe vakaiʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié.

ʻAnalaiso

Ko e hā ha meʻa ʻokú ke ako fekauʻaki mo hono fakahoko ʻo e ngaahi fakaafe maʻá e kau akó ke nau toe vakaiʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié?

Fakatahaʻi

ʻI hoʻo teuteu hoʻo lēsoni Akoako Fakataukei Fakatokāteline hokó, palani ʻa e founga te ke fakaafeʻi ai ʻa e kau akó ke toe vakaiʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié.

Taukei: ʻEke ha ngaahi fehuʻi ʻe tokoni ke fakamatalaʻi ʻe he kau akó ʻa e founga ʻe lava ke tokoni ai ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi he ngaahi tūkunga moʻoni ʻo e moʻuí.

Fakaʻuhingaʻí

Hili hono toe vakaiʻi ʻe he kau akó ʻa e ngaahi tefitoʻi moʻoni ʻo hono maʻu ʻo e ʻilo fakalaumālié, vahevahe mo kinautolu ʻa e tūkungá pea fakaafeʻi ke nau fakamatalaʻi fakakulupu pea kimui ange mo e kalasí ʻa e ngaahi tefitoʻi moʻoni ʻoku nau ongoʻi ʻe ala tokoni ʻi he tūkunga ko iá. ʻE lava ke tokoni hono fai iá ki he kau akó ke fakatupulaki ʻenau loto-falala ʻi hono fakaʻaongaʻi ʻa e ngaahi tefitoʻi moʻoni ko ʻení ʻi heʻenau moʻuí.

Fakatātaaʻi

Hili hono toe vakaiʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié mo fakafeʻiloaki ʻa e tūkungá, te ke lava ʻo ʻeke ha ngaahi fehuʻi hangē ko ʻení:

“Ko e ngaahi tefitoʻi moʻoni fē ʻo hono maʻu ʻo e ʻilo fakalaumālié ʻokú ke pehē ʻe ala tokoni ʻi he tūkunga ko ʻení, pea ko e hā hono ʻuhingá?”
“ʻE tokoniʻi fēfē koe ʻe he ngaahi tefitoʻi moʻoni ko ʻení ʻi he taimi ʻokú ke fehangahangai ai mo ha fehuʻi hangē ko ia ʻi he tūkunga ko ʻení?”

Ki ha sīpingá, mamataʻi ha taha pe fakatouʻosi ʻo e ongo vitiō ko ʻení ʻoku ʻi he ChurchofJesusChrist.org.

ʻI he “Fakaʻaongaʻi ʻo e akoako fakataukei fakatokāteliné, sīpinga hono 1,” fakatokangaʻi ʻa e fakatātaaʻi ʻe he faiakó ʻa e taukei ko ʻení ʻo ofi ki he taimi 1:28.

ʻI he “Fakaʻaongaʻi ʻo e akoako fakataukei fakatokāteliné, sīpinga hono 2,” fakatokangaʻi ʻa e fakatātaaʻi ʻe he faiakó ʻa e taukei ko ʻení ʻo ofi ki he taimi 2:25.

Fakaangaanga

Hiki ha ngaahi fehuʻi te ke lava ʻo ʻeke ʻe ala tokoni ki he kau akó ke nau fakamatalaʻi ʻa e founga ʻe lava ke tokoniʻi ai kinautolu ʻe he ngaahi tefitoʻi moʻoni ʻo hono maʻu ʻo e ʻilo fakalaumālié ke nau tali ki honau kaungāmeʻá ʻi he tūkunga ko ʻení.

Naʻe toki sio ha taha ʻo hoʻo ngaahi kaungāmeʻa ʻoku ʻikai ke ne tui fakalotú ki ha talanoa ʻa ha ongo faifekau mo ha kakai ʻe niʻihi ʻi he paʻaké. Naʻe fehuʻi atu ʻe hoʻo kaungāmeʻá, “Ko e hā ʻoku ʻalu ai ʻa e kau faifekau mei homou siasí ʻo malanga fekauʻaki mo Sīsuú? Hangē ʻoku mou feinga ke fakamālohiʻi hoʻomou tuí ki he kakai kehé. Ko e hā ʻoku ʻikai ke mou tuku ai ke nau fiefia pē ‘i he tuʻunga ‘oku nau ‘i aí?”

ʻAnalaiso

ʻOkú ke pehē ko e hā ʻoku mahuʻinga ai ke fakamatalaʻi ʻe he kau akó ʻa e founga te nau ala fakaʻaongaʻi ai ʻa e ngaahi tefitoʻi moʻoni ki hono maʻu ʻo e ʻilo fakalaumālié?
ʻOkú ke pehē ʻe tākiekina fēfē ʻa e moʻui ʻa e kau akó ʻi hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié?

Fakatahaʻi

Ko e hā te ke lava ʻo fai ke tokoniʻi ʻa e fānau akó ke nau fakamatalaʻi ʻa e founga ʻe lava ke tokoniʻi ai kinautolu mo e niʻihi kehé ʻe he ngaahi tefitoʻi moʻoni ʻo hono maʻu ʻo e ʻilo fakalaumālié ʻi he taimi ʻoku nau fehangahangai ai mo ha fehuʻi pe tūkunga faingataʻá?

Fakaʻosi

Fakakaukauloto ki he founga ʻe lava ai hoʻo kau akó ʻo tali ha ngaahi fehuʻi pe hohaʻa hili haʻanau ngāue hokohoko ki he ngaahi ola ʻo e fakataukei fakatokāteliné ʻi he seminelí. ʻI he kamataʻangá, ʻe fiemaʻu ʻe he fānau akó ha tokoni mo ha poupou lahi ange meiate koe ko e faiakó ke fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié mo e tokāteliné ki he ngaahi tūkunga moʻoni ʻo e moʻuí. ʻOku fiemaʻu ha taimi ki he kau akó ke nau taukei ʻi he tokāteliné pea loto-falala ʻo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié. Ka neongo ia, ʻi hoʻo hokohoko atu ke ʻoange maʻu pē ki he kau akó ha ngaahi faingamālie ke akoakó, ʻe hoko ʻeni ko ha meʻa ʻoku fakanatula pē ʻenau fakahokó. Ko e founga ʻeni ʻe taha te ke lava ai ʻo tokoniʻi hoʻo fānau akó ke langa ke tuʻu-maʻu honau fakavaʻé ʻi he maka ʻo Sīsū Kalaisí pea fakaloloto ʻenau ului kiate Ia mo ʻEne tokāteliné.