компьютер дээр ажиллаж буй эрэгтэй

Хавсралт

Хичээл хуваарилах удирдамж боловсруулах сургалт

Оршил

Семинарт суралцагчид Судар судлах, Амьдралд бэлтгэх хичээлүүдээр дамжуулан Есүс Христийн сайн мэдээг суралцдаг. Дараах хүснэгтэд энэ төрлийн хичээлийн өөр өөр ангиллыг жагсаасан болно.

Судар судлах хичээлийн ангилал	Амьдралд бэлтгэх хичээлийн ангилал
Судар судлах хичээлийн ангилал Ирээд, Намайг дага гарын авлагын долоо тутмын хуваарьтай холбогдох хичээл Суралцахуйгаа үнэлэх Төгс эзэмших сургаалын дасгал	Амьдралд бэлтгэх хичээлийн ангилал Төгс эзэмших сургаал: Асуултуудынхаа хариултыг олох Судар судлах ур чадвар Өсвөр үеийнхний бат бөх байдлын төлөө: Сонголт хийх нь Бие даах чадвар хөгжүүлэх Бие махбодын болон сэтгэл санааны эрүүл мэнд Ирээдүйн боловсрол, ажилд бэлдэх нь Сургуульдаа амжилттай сурах Номлогчийг бэлтгэх Ариун сүмийн бэлтгэл Сүмийн удирдагчдын сургаалууд

Хичээл хуваарилах удирдамжийг боловсруулахдаа энэхүү өөр өөр төрлийн хичээлийг жилийн турш хэзээ, ямар давтамжтайгаар хуваарьт оруулахаа мэдэх нь амаргүй байж болно. Энэ сургалт нь хөтөлбөрийн удирдагч, зохицуулагч, багш нарт эдгээр хичээлийг зохих ангиллаар нь тэнцвэртэй заахад анхааран, хичээл хуваарилах удирдамжаа боловсруулахад удирдамж заавар өгөх зорилготой.

Хичээл хуваарилах удирдамж боловсруулах үед мөрдөх зарчим

Дараах дөрвөн зарчмыг хичээл хуваарилах удирдамжийг боловсруулах үедээ ойлгож, дагаж мөрдвөл тус болж болох юм. Үүнд:

1-р зарчим: Судар судлах хичээлийг хуваарьт оруулахдаа Ирээд, Намайг дага гарын авлагын долоо хоног тутмын хуваарийг дага.

Судар судлах хичээлийн агуулга нь суралцагчдын хувиараа болон гэртээ гэр бүлийнхэнтэйгээ суралцаж байгаа зүйлтэй уялдаатай байхаар зориулагдсан болно. Тиймээс, ерөнхийдөө багш нар Судар судлах хичээлийг тухайн долоон хоногийн Ирээд, Намайг дага гарын авлагын хуваарийн дагуу заана. Зарим тохиолдолд семинарын ангид Судар судлах хичээлийг Ирээд, Намайг дага гарын авлагын хуваарьтай уялдуулахгүйгээр зааж болох ч энэ нь ховор тохиолдолд байх ёстой бөгөөд багш нар хичээлийг Ирээд, Намайг дага гарын авлагын хуваариас хэт хоцорч эсвэл түрүүлж заахаас зайлсхийх хэрэгтэй.

2-р зарчим: Долоо хоног бүр Судар судлах, Амьдралд бэлтгэх хичээлүүдийг зохих байдлаар хуваарьт оруул.

Судар судлах болон (Төгс эзэмших сургаалын дасгал болон Суралцахуйгаа үнэлэх хичээлийг оролцуулаад) Амьдралд бэлтгэх хичээл нь семинарын үйл явцад чухал үүрэг гүйцэтгэдэг. Долоо хоног бүр эдгээр хичээлийг хуваарьт тэнцвэртэй оруулахыг хичээ. Жишээлбэл: Долоо хоногт таван удаа ордог хөтөлбөрт Судар судлах хичээл дунджаар гурван удаа, Амьдралд бэлтгэх хичээл хоёр удаа ордог.

Орох хичээлийн санал болгож буй харьцааны ерөнхий график

Зарим долоо хоног санал болгосон харьцаанд өөрчлөлт оруулах нь тохиромжтой байж болох юм. Жишээлбэл: Мормоны Номыг судлах хичээлийн үеэр багш нар 3 Нифайд цэдэглэгдсэн Аврагчийн ирэлтийн талаар зааж байхдаа Судар судлах хичээлд илүү цаг хуваарилж болох юм. Мөн багш нар өөр долоо хоногт Амьдралд бэлтгэх хичээлд илүү цаг зарцуулж болох юм. Багш нар болон хөтөлбөрийн удирдагчдад эдгээр шийдвэрийг гаргахад нь туслахын тулд заримдаа сургалтын хөтөлбөрт долоо хоногт гурван удаа заах Судар судлах хичээлийн тоог хоёр эсвэл дөрөв болгосон байдаг. Ийм долоо хоногууд нь хэзээ нь Судар судлах хичээлийг, хэзээ Амьдралд бэлтгэх хичээлийг илүү онцлохоо мэдэхэд тань тусална. Тухайн долоо хоногт Судар судлах хичээл гурваас бага орох тохиолдолд та Амьдралд бэлтгэх хичээлийн тоог нэмж болно. Хэрэв тухайн долоо хоногт Судар судлах хичээл гурваас олон удаа орох бол та Амьдралд бэлтгэх хичээлийн тоог багасгаж болно.

Гэхдээ хичээлийн жилийн турш Амьдралд бэлтгэх хичээлийг нэг бүрчлэн заахад өөрийн чадах бүхнийг хийгээрэй. Амьдралд бэлтгэх хичээл нь гарын авлагад Судар судлах хичээлийн дараа орсон байна.

Дараах заавар нь хэзээ өөр өөр ангиллын Амьдралд бэлтгэх хичээлийг заахаар хуваарьт оруулах шийдвэрээ гаргахад тань тусална.

• Амьдралд бэлтгэх хичээлийн тоог хичээлийн жилийн хагас бүрд ижил тэнцүү орохоор хуваарил. Энэ нь багш нарт Судар судлах, Амьдралд бэлтгэх хичээлүүдийг жилийн турш тэнцвэртэй заахад тусална.

• Таны удирдлага доорх багш нар хичээлийн жилийн хагаст нэг жил Амьдралд бэлтгэх хичээлийг заасан байхад анхаар. Энэ нь хичээлийн хагас жил орж дууссаны дараа өөр багш ороход суралцагчид орсон Амьдралд бэлтгэх хичээлээ дахиж авахаас сэргийлнэ.

• Орон нутаг, бүс, хөтөлбөрийн зааврыг дагана уу. Орон нутаг, бүс, хөтөлбөрүүд нь Амьдралд бэлтгэх хичээлийн алийг нь нэг эсвэл бүгдийг нь хэзээ заах удирдамж заавар өгч болох юм.

• Амьдралд бэлтгэх хичээлийн ангилал бүрийн тойм хэсэг дэх хуваарь гаргах зөвлөмжийг харна уу. Амьдралд бэлтгэх хичээлийн ангилал бүрийн “Тойм” хэсэгт хуваарь гаргах зөвлөмж бий. Эдгээр зөвлөмж нь Амьдралд бэлтгэх хичээлийн заримыг хэзээ заавал илүү тохиромжтой байх талаар шийдвэр гаргахад танд тусална. Жишээлбэл: “Боловсрол, ажилд бэлдэх нь” тойм хэсэгт хичээлийн жилийн эхэнд “Боловсролын ач холбогдол” гэсэн гарчигтай хичээлийг заахыг зөвлөсөн байдаг. Мөн уг “Тойм” хэсэг нь Амьдралд бэлтгэх аль хичээлийг дараалан эсвэл ойр ойрхон заах нь илүү үр дүнтэй байх талаар удирдамж заавар өгдөг.

• Амьдралд бэлтгэх аль нэгэн хичээлийг тухайн жилдээ хэзээ заавал хамгийн үр дүнтэй байхыг тодорхойл. Тухайн жил Амьдралд бэлтгэх аль нэгэн хичээлийг заах хамгийн тохиромжтой цаг байж болно. Жишээлбэл: Семинарын ангид номлолд явах гэж байгаа суралцагчид байвал Номлогчийг бэлтгэх хичээлийг тухайн хичээлийн жилийн төгсгөлд заах нь хамгийн тохиромжтой байж болох юм. Эсвэл тухайн жил суралцагчид хамгийн их стресст ордог үеэр Бие махбодын болон сэтгэл санааны эрүүл мэндийн зарим хичээлийг зааж болно.

• Амьдралд бэлтгэх хичээлийн аль нэг ангилалд хамаарах Судар судлах хичээлийг тодорхойл. Судар судлах хичээлд ихэвчлэн Амьдралд бэлтгэх хичээл дээр суурилж болох сэдвүүд багтсан байдаг. Жишээлбэл: Та Сургаал ба Гэрээ 95; 109–110; 124; 127–128; Гэтлэл 35–40; эсвэл 1 Хаад 6–9 зэрэг ариун сүмд төвлөрсөн судрын хэсгүүдийг үзэх үеэр Ариун сүмд бэлтгэх хичээл орохоор хуваариа гаргаж болох юм.

3-р зарчим: Суралцагчдад сурч мэдсэн зүйлсээ эргэцүүлэн бодох, хуваалцах, үзүүлэх боломжийг тогтмол гаргаж өгч байх ёстой.

Уг гарын авлагын Судар судлах хичээлд үе үе Суралцахуйгаа үнэлэх, Төгс эзэмших сургаалын дасгал хичээлийг заахаар оруулсан байгаа. Эдгээр нь суралцагчдын семинарын туршлагын гурван чухал хэсэг юм. Суралцахуйгаа үнэлэх хичээл нь суралцагчдад гол сургаалуудыг тайлбарлах, сүнслэг байдлын хувьд гаргасан ахицаа эргэж харах боломжийг олгодог. Эдгээр хичээлд хамрагдах нь суралцагчдад семинарын кредит авахад тавигддаг шаардлага юм. Төгс эзэмших сургаалын дасгал хичээл нь суралцагчдад төгс эзэмших сургаалын зорилтот үр дүнд хүрэх боломжийг олгодог.

Хичээл хуваарилах удирдамжаа боловсруулж байхдаа семинар явагдаж байх үеийн Суралцахуйгаа үнэлэх эсвэл Төгс эзэмших сургаалын дасгал хичээлийг бүү алгасаарай. Харин та зун эсвэл өвлийн амралт гэх мэт суралцагчид сургуульдаа явдаггүй үеэр хуваарьт орсон Суралцахуйгаа үнэлэх эсвэл Төгс эзэмших сургаалын дасгал хичээлийг хойшлуулах шаардлагагүй юм.

4-р зарчим: Дараа нь үнэлгээ хийх Судар судлах хичээлээ төлөвлө.

Зарим долоо хоногт боломжит өдрүүдтэй харьцуулахад заах Судар судлах хичээл олон байж болно. Тиймээс ихэвчлэн Судар судлах хичээлээс алийг нь хуваарьт оруулахаа шийдэх хэрэг гарна. Ийм шийдвэр гаргахдаа аль Судар судлах хичээл нь (1) Суралцахуйгаа үнэлэх хичээлтэй холбогдож мөн төгс эзэмших сургаалын судрын хэсэг (2) орсон байна гэдгээр нь эрэмбэл. Ийн хийснээр Судар судлах хичээлээс хамгийн ач холбогдолтой, сургаалын хувьд чухал хэсэг нь хуваарьт орсон байна.

Дараах нь аль Судар судлах хичээл нь Суралцахуйгаа үнэлэх болон Төгс эзэмших сургаалын дасгал хичээлтэй холбогдож байгааг хэрхэн тодорхойлж сурахад танд туслах болно. Үүнд:

• Суралцахуйгаа үнэлэх хичээлтэй холбогддог Судар судлах хичээлийг тодорхойлох Янз бүрийн Судар судлах хичээлийн үйл ажиллагааг ихэнхдээ Суралцахуйгаа үнэлэх хичээлд дурдсан байдаг. Хуваарьт орсон Суралцахуйгаа үнэлэх хичээлээ уншиж судлах нь хичээл хуваарилах удирдамждаа оруулж болох Судар судлах хичээлийн талаар мэдэж авахад тусална.

• Төгс эзэмших сургаалын судрын хэсэг орсон Судар судлах хичээлийг тодорхойлох. Жил тутмын семинарын хөтөлбөрт төгс эзэмших сургаалын 24 судрын хэсэг орсон байдаг. Судрын эдгээр хэсгийн жагсаалтыг Төгс эзэмших сургаалыг судлах үндсэн материал-аас авч болно. Төгс эзэмших сургаалын судрын хэсгүүд орсон Судар судлах хичээл орох үеэр сургууль хичээллэж байвал тухайн хичээлүүдийг заах нь зүйтэй. Харин зун эсвэл өвлийн амралт гэх мэт суралцагчид сургуульдаа явдаггүй үеэр төгс эзэмших сургаалын судрын хэсгүүд орсон Судар судлах хичээлийг заах шаардлагагүй.

Хичээл хуваарилах удирдамжийг боловсруулан гаргахыг алхам алхмаар үзүүлсэн жишээ

Дээр дурдсан зарчмуудыг ашиглан хичээл хуваарилах удирдамжийг боловсруулан гаргах хэд хэдэн арга зам бий. Жишээлбэл: Та доорх дарааллаар хичээл хуваарилах удирдамжаа гаргаж болно.

1. Судар судлах хичээлийг хуваарьт оруулах. Үүнд:

   • Суралцахуйгаа үнэлэх хичээл

   • Төгс эзэмших сургаалын дадлага хичээл

   • Дээр дурдсан хоёр хичээлд суралцагчдыг бэлдэх Судар судлах хичээл

2. Амьдралд бэлтгэх хичээлийг хуваарьт оруул.

3. Шаардлагатай бол өөрчил.

Судлахад туслах жишээ

Мэндоза эгч бол өглөөний семинарын ангийн багш юм. Тэр семинарын зохицуулагч Амасио ахтай хамт 1-р сард эхлэх Сургаал ба Гэрээний ангийн хичээл хуваарилах удирдамжийг боловсруулан гаргаж байгаа. Мэндоза эгч, Амасио ах хоёр хичээл хуваарилах удирдамжийг боловсруулахдаа дээр дурдсан гурван алхмыг хэрхэн ашигласан тайлбарыг доор өгөв.

1-р алхам: Судар судлах хичээлийг хуваарьт оруулах

Мэндоза эгч, Амасио ах хоёр семинар хичээллэх үеийн долоо хоногуудад судар судлах бүх хичээлийг хуваарьт оруулан хичээл хуваарилах удирдамжаа боловсруулж эхэлжээ. Тэд Ирээд, Намайг дага гарын авлагаас судалж буй агуулгатай уялдсан хичээлүүдийг хуваарьт оруулсан байхад анхаарсан.

Тэд Судар судлах хичээлтэй нэг бүрчлэн танилцаж, хичээлийн жилийн хагас бүрд заах бүх Суралцахуйгаа үнэлэх болон Төгс эзэмших сургаалын дасгал хичээлийг тодорхойлов. Суралцагчдыг сургуульдаа явж байх үеэр Суралцахуйгаа үнэлэх таван хичээл орох ба хоёр нь хичээлийн жилийн эхний хагаст, гурав нь хоёрдугаар хагаст байв.

Дараа нь Мэндоза эгч, Амасио ах хоёр Төгс эзэмших сургаалын таван дадлага хичээл семинар хичээллэж байх үеэр буюу гурав нь жилийн эхний хагаст, хоёр нь хоёрдугаар хагаст орохыг анзаарчээ.

Дараа нь тэр хоёр хичээл хуваарилах удирдамждаа оруулсан Суралцахуйгаа үнэлэх хичээлийг нэг бүрчлэн харж танилцжээ. Тэд мөн үнэлгээний үйл ажиллагаа бүр Судар судлах аль хичээлд төвлөрч байгааг тэмдэглэж авав. Тэд хичээл хуваарилах удирдамж дээрээ тэдгээр хичээл бүрийн хажууд (*) тэмдэг тавьснаар Мэндоза эгч тэдгээрийг зохих ёсоор онцолж, аль үйл ажиллагааг дараа нь үзэхийг суралцагчдадаа хэлэх боломжтой болжээ.

Дараа нь Мэндоза эгч, Амасио ах хоёр тухайн ангийн төгс эзэмших сургаалын судрын 24 хэсгийг тодорхойлов. Мөн семинар хичээллэж байх үеэр Төгс эзэмших сургаалын судрын 11 хэсэг нь хичээлийн жилийн эхний хагаст, 7 нь хоёрдугаар хагаст заах хичээлд орсон байхыг олж мэдсэн байна. Тиймээс тэд хичээл хуваарилах удирдамж дээрээ эдгээр хичээлийн гарчгийг нэг бүрчлэн тодруулахаар шийдсэн бөгөөд ингэснээр Мэндоза эгч хэзээ хичээлийн төгс эзэмших сургаалын судрын хэсгийг онцлон заахаа мэддэг болох байв.

2-р алхам: Амьдралд бэлтгэх хичээлийг хуваарьт оруулах

Судар судлах бүх хичээлийг хуваарьт оруулсныхаа дараа Мэндоза эгч, Амасио ах хоёр хичээл хуваарилах удирдамждаа Амьдралд бэлтгэх хичээлийг хуваарьт оруулж эхлэв.

Өмнө нь Амасио ах өөрийн удирдлага доорх бүх багшид хичээлийн жилийн хагаст заах ёстой Амьдралд бэлтгэх хичээлийн талаар чиглүүлэг өгсөн байв. Тэрээр хичээлийн жилийн хагаст суралцагчдад заах Амьдралд бэлтгэх хичээлд давхцал үүсгэхгүйн үүднээс уг чиглэлийг өгсөн байна. Ялангуяа хичээлийн жилийн хоёрдугаар хагаст өөр багш заахаар дуудагдах тохиолдолд ийн чиглүүлэг өгөх нь чухал хэмээн Амасио ах боджээ.

Амасио ахын заавар дараах байдлаар хийгдсэн байна.

Хичээлийн жилийн эхний хагаст оруулахаар шийдсэн Амьдралд бэлтгэх хичээл:

• Төгс эзэмших сургаал: Асуултынхаа хариултыг олох (бүх таван хичээл)

• Судар судлах ур чадвар (бүх таван хичээл)

• Сургуульдаа амжилттай суралцах (бүх дөрвөн хичээл)

• Бие махбодын болон сэтгэл санааны эрүүл мэнд (бүх долоон хичээл)

• “Ерөнхий чуулганд бэлдэх нь” (4-р сарын ерөнхий чуулганаас өмнө заах)

• “Их Эзэний үйлчлэгчдийн захиасыг судлах” (хичээл эхлэх үеэр заах)

• “Загвар: Сүмийн удирдагчдын сургаалууд”-аас авсан Сүмийн удирдагчдын найман захиас (хичээлийн жилийн эхний хагаст эн тэнцүү хуваан заах)

Хичээлийн жилийн хоёрдугаар хагаст оруулахаар шийдсэн Амьдралд бэлтгэх хичээл:

• Бие даах чадвар хөгжүүлэх (бүх дөрвөн хичээл)

• Өсвөр үеийнхний бат бөх байдлын төлөө: Сонголт хийх нь (бүх зургаан хичээл)

• Ирээдүйн боловсрол, ажилд бэлдэх нь (бүх дөрвөн хичээл)

• Номлогчийн бэлтгэл (бүх таван хичээл)

• Ариун сүмийн бэлтгэл (бүх дөрвөн хичээл)

• “Ерөнхий чуулганд бэлдэх нь” (аравдугаар сарын ерөнхий чуулганаас өмнө заах)

Мэндоза эгч, Амасио ах хоёр хичээл хуваарилах удирдамж дээрээ Амьдралд бэлтгэх бүх хичээлийг хуваарьт оруулжээ. Өөр өөр хичээлийн ангилалд зориулан гаргасан “Тойм” хэсэгт өгсөн зөвлөмжийн дагуу Амьдралд бэлтгэх зарим хичээлийг Ирээд, Намайг дага гарын авлагаас судлах Сургаал ба Гэрээний хэсэгтэй уялдуулан тодорхой долоо хоногт хуваарилжээ. Тэд бусад хичээлийг суралцагчдад хамгийн их хэрэгтэй гэдэг дээр нь үндэслэн хуваарьтаа оруулсан.

Хичээл хуваарилах удирдамж дээрээ Амьдралд бэлтгэх хичээлийг оруулсных нь дараа хичээлийн жилийн эхний болон хоёрдугаар хагаст орох хичээлийн хуваарьт нь тус тус дөрвөн хичээлийн зай үлдсэн байна. Эдгээр зайд хамгийн сүүлийн ерөнхий чуулган дээр хэлсэн Сүмийн удирдагчдын үгийг судлах хичээлийг оруулахаар шийдэв. Мендоза эгч “Загвар: Сүмийн удирдагчдын сургаал”-ыг ашиглан эдгээр хичээлийг заана.

3-р алхам: Шаардлагатай тохиолдолд өөрчил

Мэндоза эгч, Амасио ах хоёр аливаа өөрчлөлт хийх хэрэгтэй эсэхийг шалгахаар боловсруулсан хичээл хуваарилах удирдамжаа нягтлан харжээ. Тэд сургуулийн хичээлийн хуваарийн дагуу суралцагчид амарч, семинар хичээллэхгүй долоо хоногийг тусгаагүй болохоо анзаарав. Тухайн долоо хоногийн турш суралцагчид төгс эзэмших сургаалын судрын хэсгийг судлах байсан байна. Тэд хоёулаа уг хичээлийг долоо хоногийн өмнө эсвэл дараа орохоор хуваарьт оруулсан нь дээр гэж боджээ. Тэд хичээлийг өмнөх долоо хоног руу нь шилжүүлэв. Үүнийг хийхийн тулд хуваарьт орсон нэг хичээлийг солих хэрэг гарчээ. Тэд уг хичээлийг Сүмийн удирдагчдын сургаал гэсэн нэг хичээлийн оронд тавихаар болов. Энэ нь хичээл хуваарилах удирдамж дээрээ оруулах хэрэгтэй байсан ганц өөрчлөлт нь байлаа.

Мэндоза эгч, Амасио ах хоёр хоёулаа гаргасан шийдвэртээ сэтгэл хангалуун байв. Мэндоза эгч суралцагчид нь Тэнгэрлэг Эцэг, Есүс Христ хоёрт илүү ойртуулах эерэг туршлагыг семинараасаа олж авна гэдэгт итгэлтэй болов. Тэрээр зааж эхлэхээсээ өмнө эдгээр шийдвэрийг гаргаж, хичээлийн жилийн турш заах хичээлүүддээ төвлөрөх боломжтой болж байгаадаа баяртай байлаа. Мэндоза эгч хичээлдээ бэлдэхийн хажуугаар тухайн долоо хоног ямар хичээл заахаа шийдэх хэрэггүй болж байгаа нь ачааг нь мэдэгдэхүйц хөнгөлж өгч байгааг мэдэрчээ.