Aralin sa Kabataan: Pagiging Responsable sa Paggamit Natin ng Teknolohiya

I. Panimula

Bilang mga kabataan, nabubuhay tayo sa isang mundo kung saan ang teknolohiya ay isang malaking bahagi ng ating buhay. Maaaring maging madali na maligaw sa walang hanggang pag-scroll, tuluy-tuloy na mga notification, at sa nakalululong na katangian ng teknolohiya. Ngunit bilang mga disipulo ni Jesucristo, tinawag tayong gamitin ang teknolohiya nang sa paraang intensyonal at positibo. Sa araling ito, malalaman natin kung paano tayo magiging responsable sa paggamit ng ating teknolohiya at kung paano natin ito magagamit ito paraang nagpupuri sa Diyos.

II. Ang Mga Pakinabang at Kapalit ng Teknolohiya

Mga Pakinabang

Ginagamit ng Simbahan ang teknolohiya para makipag-ugnayan sa iba’t ibang panig ng mundo at ipalaganap ang ebanghelyo.
Nagbibigay sa atin ng access ang teknolohiya sa pinagsama-samang kaalaman ng mundo na kasya sa ating bulsa.

Mga Kapalit

Ang kapalit ng teknolohiya ay ang ating oras at atensiyon, o mas masahol pa, pag-aaksaya ng pagkakataon at mga pagpapala.
Kung hindi tayo maingat, maaari tayong mabaling sa isang bagay na hindi natin dapat bigyang-pansin, o malihis tayo sa ating mga tipan sa Ama sa Langit at kay Jesucristo.

Filipos 4:8
Kahuli-hulihan, mga kapatid, anumang bagay na totoo, anumang bagay na kagalang-galang, anumang bagay na matuwid, anumang bagay na malinis, anumang bagay na kaibig-ibig, anumang bagay na kapuri-puri, kung mayroong anumang kagalingan, at kung may anumang nararapat papurihan, ay isipin ninyo ang mga bagay na ito.

III. Mga Hamon ng Teknolohiya

May kakulangan ka ba kung hindi mo kayang kontrolin ang paggamit ng teknolohiya? Mahina ka lang ba sa espirituwal? Siyempre hindi! Normal lamang na gumamit ng teknolohiya, ngunit ang pagkontrol nito ay maaaring maging mahirap. Ikaw ay kumokontra sa agham, mga kemikal ng utak, at mapagkumpetensiyang industriyang umaagaw sa ating atensiyon—at hindi ito patas na laban.

Ang “Bliss Point” ng Teknolohiya

Ang teknolohiya ay isang kasangkapan na nagbibigay sa atin ng access sa pinagsama-samang kaalaman ng mundo at maaaring magamit para sa kabutihan.
Habang mas nagbibigay-pansin tayo sa teknolohiya, mas nababayaran ang mga lumilikha ng teknolohiya.
Gumagamit ng mga pamamaraan ang mga mananaliksik at mga taga-disenyo nito upang mas mapanatili ang ating paggamit at masiyahan tayo sa teknolohiya, tulad ng sa “bliss point” sa industriya ng pagkain.
Nauunawaan ng Ama sa Langit at ng ating Tagapagligtas ang ating mga paghihirap sa pagkontrol ng teknolohiya at palalakasin tayo.

2 Corinto 12:9

Subalit sinabi niya sa akin, “Ang aking biyaya ay sapat na sa iyo, sapagkat ang aking kapangyarihan ay nagiging sakdal sa kahinaan.” Ako’y lalong magmamalaki na may galak sa aking kahinaan, upang ang kapangyarihan ni Cristo ay manatili sa akin.

Pagtagumpayan ang “Bliss Point”

Tanggapin na ang teknolohiya ay may sariling “bliss point” na gumagabay sa ating emosyon at mga kemikal sa katawan.
Normal lang na mahirapan sa teknolohiya, at tayo ay kumokontra sa agham, mga kemikal ng utak, at mapagkumpetensiyang industriyang umaagaw sa ating atensiyon.
Maaari nating kontrolin ang ating teknolohiya sa pamamagitan ng pagtatanong sa ating sarili ng mga tanong na may layunin, paggawa ng plano, at pagtigil kapag kinakailangan.
Ang pagiging maingat sa content na ating nakukonsumo at paglikha ng mga lugar kung saan ipagbabawal ang paggamit ng teknolohiya sa ating mga tahanan ay makakatulong din sa atin na mapagtagumpayan ang “bliss point” ng teknolohiya.

Mateo 26:41
Kayo’y maging handa at manalangin, upang hindi kayo madaig ng tukso. Ang espiritu ay tunay na nagnanais subalit ang laman ay mahina.

Ang pagtukoy kung saan kinakailangan ang mga limitasyon sa paggamit ng teknolohiya at paggawa ng mga hakbang upang mapagtagumpayan ang pagnanais na labis na gamitin o abusuhin ang teknolohiya ay maaaring lumikha ng isang mahusay na relasyon sa teknolohiya. Tandaan, tayo ang magkokontrol ng ating teknolohiya, hindi tayo ang kokontrolin nito.

IV. Responsableng Gamitin ang Teknolohiya

A. Layunin: Sadyang paggamit ng teknolohiya upang matuto at lumikha.

Colosas 3:23
Anuman ang inyong ginagawa, ay inyong gawin ng buong puso, na gaya ng sa Panginoon, at hindi sa mga tao.

Tanungin ang iyong sarili ng mga tanong tulad ng “Bakit ko ginagamit ang aking device ngayon?” at “Maganda ba ang pakiramdam ko sa ginagawa ko?”

Maaari mong sadyang gamitin ang teknolohiya para sa kabutihan sa pamamagitan ng pagpapadala ng isang positibong mensahe, pakikinig sa mapayapang musika, at paglikha ng iyong sariling content. Ano pa ang mga paraan na magagamit mo ang teknolohiya para sa mabuting layunin?

B. Plano: Pagpaplano nang maaga para sa mas mahusay na mga pagpipilian.

Mga Kawikaan 16:3
Italaga mo sa Panginoon ang iyong mga gawa, at magiging matatag ang iyong mga panukala.

Itanong sa sarili ang mga tanong na tulad ng “Ano ang plano ko sa paggamit ng aking device?” at “Anong tanda ang ipinapakita ko sa Diyos kung paano ko ginagamit ang aking oras?”

Maaari mong gamitin ang teknolohiya sa paraang intensyonal sa pamamagitan ng pagbibigay sa iyong sarili ng isang pang-araw-araw na limitasyon para sa screen time, pag-follow at pakikipag-ugnayan lamang sa malapit na pamilya at mga kaibigan, pagkakaroon ng mga lugar na ipinagbabawal ang paggamit ng gadget sa tahanan, pag-set up ng isang lugar kung saan maaaring mag-charge ang pamilya, at paggamit ng isang filter. Ano pang ibang mga paraan ang maaari mong planuhin nang maaga upang gumawa ng mas mahusay na mga pagpipilian kapag gumagamit ng teknolohiya?

C. Huminto: Pagpapahinga kapag kailangan.

Mga Awit 46:10
Magsitigil at kilalanin ninyo na ako ang Diyos.

Itanong sa sarili ang mga tanong na tulad ng “Iniiwasan ko ba ang content na alam kong hindi tama o makabuluhan?” at “Nadama ko bang umalis ang Espiritu?”

Maaari mong gamitin ang teknolohiya sa paraang intensyonal sa pamamagitan ng paglalapag ng iyong device at paglayo, pagdarasal para sa lakas, at pakikipag-usap sa isang tao. Paano pa ninyo mapangangalagaan ang inyong sarili kapag gumagamit ng teknolohiya?

V. Talakayan ng Grupo:

Itanong ang sumusunod na mga tanong at talakayin sa grupo ang mga karanasan at pagiging responsable sa paggamit ng teknolohiya.

Ano ang pinakamalalaking hamon na kinakaharap ninyo sa pamamahala ng teknolohiya?
Ano ang nararamdaman ninyo kapag matagal na kayong gumagamit ng teknolohiya?
Paano ninyo malalaman kung oras na para magpahinga?
Paano nakakaapekto ang social media sa inyong pagpapahalaga sa sarili at pakiramdam ng koneksyon sa iba?
Ano ang ilang paraan na magagamit ninyo ang teknolohiya para positibo itong makaapekto sa inyong mental na kalusugan?
Paano ninyo babalansehin ang mga gawain sa paaralan at paggamit ng teknolohiya? Anong mga estratehiya ang naging mabisa para sa inyo sa nakaraan?
Ano ang ilang potensyal na panganib na kaugnay ng paggamit ng teknolohiya, (tulad ng cyberbullying o adiksiyon)? Paano ninyo mapoprotektahan ang inyong sarili mula sa mga panganib na iyon?
Paano ninyo magagamit ang teknolohiya para matuto ng mga bagong kasanayan o ipagpatuloy ang inyong mga interes sa halip na manood lamang ng content?
Paano kayo nakikipag-ugnayan sa inyong mga magulang o tagapag-alaga tungkol sa paggamit ninyo ng teknolohiya? Paano nila kayo tinutulungan na magtakda ng mga hangganan?
Ano ang ilang estratehiya sa responsableng paggamit ng teknolohiya, tulad ng pag-iwas sa multitasking o pagtatakda ng mga limitasyon sa oras?
Ano ang ilang paraan na magagamit ninyo ang teknolohiya para makaugnay sa iba sa makabuluhang paraan, tulad ng pakikilahok sa mga online community o pagsuporta sa mga layuning mahalaga sa inyo?

VI. Katapusan

Bilang mga disipulo ni Jesucristo, tinawag tayong gamitin ang teknolohiya sa paraang intensiyonal at positibo. Bagama’t maraming benepisyo ang teknolohiya, mayroon din itong mga kapalit, tulad ng ating oras at atensiyon. Kailangan nating alalahanin ang “bliss point” ng teknolohiya at kontrolin ang paggamit ng ating teknolohiya sa pamamagitan ng pagtatanong ng may layunin, paggawa ng plano, at pag-iingat sa content na ating kinokonsumo. Sa pamamagitan ng pagiging responsable sa kung paano natin ginagamit ang teknolohiya, magagamit natin ito sa paraang nagpupuri sa Diyos at nagpapalapit sa atin at sa iba sa Kanya.