« ជំនាញ ៖ អញ្ជើញសិស្សថ្នាក់វិទ្យាស្ថានបច្ចុប្បន្នឲ្យជញ្ជឹងគិតអំពីរបៀបដែលពួកគេទទួលបានរួចហើយនូវពរជ័យដែលបានសន្យាដោយប្រធាន ណិលសុន » ធនធានផ្តល់ការគាំទ្រ និងការបំពាក់បំប៉នដល់គ្រូបង្រៀន ( ឆ្នាំ២០២៤ )

ផ្ដោតលើការបង្រៀនរបស់ព្យាការី

ជំនាញ ៖ អញ្ជើញសិស្សថ្នាក់វិទ្យាស្ថានបច្ចុប្បន្នឲ្យជញ្ជឹងគិតអំពីរបៀបដែលពួកគេទទួលបានរួចហើយនូវពរជ័យដែលបានសន្យាដោយប្រធាន ណិលសុន ។

តើអ្វីជាការយល់ដឹង ឬសមត្ថភាពដំបូងរបស់ខ្ញុំ ? ( ការវាយតម្លៃ ) ៖

តើអ្នកជួយសិស្សឲ្យជញ្ជឹងគិតពីពរជ័យដែលពួកគេទទួលបានពីការចូលរៀនថ្នាក់វិទ្យាស្ថានញឹកញាប់ប៉ុនណាដែរ ?

តើវាគឺជាអ្វី ហើយហេតុអ្វីបានជាវាសំខាន់ ? ( កំណត់និយមន័យ ) ៖

កាលពីពេលថ្មីៗនេះ ប្រធាន រ័សុល អិម ណិលសុន បានថតសារលិខិតពិសេសមួយសម្រាប់យុវមជ្ឈិមវ័យរបស់យើងដោយសន្យាថា ពួកគេនឹងទទួលបានពរជ័យដ៏អស្ចារ្យ ប្រសិនបើពួកគេចូលរៀនក្នុងថ្នាក់វិទ្យាស្ថានឲ្យបានញឹកញាប់នោះ ( រ័សុល អិម ណិលសុន « ការអញ្ជើញផ្ទាល់ខ្លួនឲ្យចូលរៀនថ្នាក់វិទ្យាស្ថាន » នៅលើគេហទំព័រ ChurchofJesusChrist.org ) ។ វិធីសាស្រ្តមួយដែលគ្រូបង្រៀនអាចប្រើសារលិខិតនេះដើម្បីបំពេញគោលបំណងរបស់ ស.&វ. និងបង្កើនការចុះឈ្មោះ គឺត្រូវអញ្ជើញសិស្សឲ្យពិចារណាពីរបៀបដែលការសន្យារបស់ប្រធាន ណិលសុន បានបំពេញក្នុងជីវិតរបស់ពួកគេផ្ទាល់ បន្ទាប់ពីពួកគេបានមើលវីដេអូនេះហើយ ។ ដើម្បីធ្វើបែបនេះបាន គ្រូបង្រៀនអាចចែកចាយការសន្យាមួយចំនួន ឬទាំងអស់ដែលប្រធាន ណិលសុន បានលើកឡើង ( សូមមើលបញ្ជីខាងក្រោម ) ឬអញ្ជើញសិស្សឲ្យស្វែងរកការសន្យាទាំងនោះ នៅពេលពួកគេមើលវីដេអូនេះ ហើយសួរថា « តើពរជ័យណាមួយក្នុងចំណោមពរជ័យទាំងនេះដែលប្អូនបានទទួល ពេលប្អូនបានចូលរួមក្នុងថ្នាក់វិទ្យាស្ថាន ? » បន្ទាប់ពីផ្តល់ពេលវេលាឲ្យសិស្សជញ្ជឹងគិតហើយ អ្នកអាចអញ្ជើញពួកគេឲ្យពិចារណាអំពីអ្វីដែលពួកគេនឹងធ្វើ ដើម្បីបន្តទទួលបានពរជ័យទាំងនេះ ឬនរណាដែលពួកគេអាចអញ្ជើញឲ្យចូលរួមថ្នាក់វិទ្យាស្ថានដើម្បីទទួលបានពរជ័យទាំងនេះផងដែរ ។ អ្នកក៏អាចអញ្ជើញសិស្សឲ្យចែកចាយជាមួយមិត្តរួមថ្នាក់នូវពរជ័យទាំងឡាយដែលពួកគេបានទទួល និងរបៀបដែលពរជ័យទាំងនោះបានភ្ជាប់ពួកគេទៅនឹងព្រះវរបិតាសួគ៌ និងព្រះយេស៊ូវគ្រីស្ទផងដែរ ។

ការសន្យាមួយចំនួនដែលប្រធាន ណិលសុន បានសន្យានឹងយុវមជ្ឈិមវ័យដែលចូលរួមថ្នាក់វិទ្យាស្ថាន រួមមានដូចខាងក្រោមនេះ ៖

ថ្នាក់វិទ្យាស្ថាន … នឹងជួយក្មួយៗធ្វើឲ្យការប្រែចិត្តជឿរបស់ក្មួយទៅលើព្រះយេស៊ូវគ្រីស្ទកាន់តែស៊ីជម្រៅ ។
ការចូលរៀនថ្នាក់វិទ្យាស្ថាននឹងជួយក្មួយៗឲ្យទទួលអារម្មណ៍កាន់តែខ្លាំងពីក្ដីស្រឡាញ់ដ៏ធំធេងរបស់ព្រះវរបិតាសួគ៌ចំពោះក្មួយៗ ។
ថ្នាក់វិទ្យាស្ថាននឹងផ្ដល់ឲ្យក្មួយនូវគ្រូបង្រៀនដ៏បំផុសគំនិត មិត្តភក្តិស្មោះត្រង់ និងអារម្មណ៍នៃការមានចំណែក ។
ថ្នាក់វិទ្យាស្ថាននឹងជួយក្មួយឲ្យយល់ពីមូលហេតុដែលការរស់នៅតាមដំណឹងល្អ នាំឲ្យមានសុភមង្គលដ៏មិនចេះចប់មិនចេះហើយ ។
ការចូលរៀនថ្នាក់វិទ្យាស្ថាននឹងជួយក្មួយៗឲ្យរស់នៅតាមដំណឹងល្អ និងមានអំណរកាន់តែខ្លាំងឡើងនាពេលឥឡូវនេះ ។
[ ថ្នាក់វិទ្យាស្ថាននឹងជួយក្មួយៗឲ្យ ] ដឹងសេចក្ដីពិតថា ក្មួយៗជានរណាឲ្យប្រាកដ ។
[ ថ្នាក់វិទ្យាស្ថាននឹងជួយក្មួយៗឲ្យ ] ដឹងពីគោលបំណងនៃជីវិត ។
[ ថ្នាក់វិទ្យាស្ថាននឹងជួយក្មួយៗឲ្យ ] បន្តនៅលើផ្លូវនៃសេចក្តីសញ្ញា ។
[ ថ្នាក់វិទ្យាស្ថាននឹងជួយក្មួយៗឲ្យ ] រៀនពីរបៀបទុកឲ្យព្រះឈ្នះក្នុងជីវិតក្មួយ ។
[ ថ្នាក់វិទ្យាស្ថាននឹងជួយក្មួយៗឲ្យ ] ធ្វើជាអ្នកផ្សះផ្សាគេ ។

តើនរណា ឬតើអ្វីទៅដែលផ្ដល់នូវការពន្យល់ដ៏ល្អមួយអំពីការណ៍នេះ ? ( គំរូ ) ៖

បងស្រី យ៉ាកូ បានបញ្ចាំងវីដេអូរបស់ប្រធាន ណិលសុន ដល់សិស្សក្នុងថ្នាក់វិទ្យាស្ថានរបស់គាត់ ហើយពួកគេពិភាក្សាអំពីការសន្យាមួយចំនួនដែលលោកបានលើកឡើង ។ បន្ទាប់មក គាត់បានសួរសិស្សរបស់គាត់ថា « សូមប្អូនពិចារណាបានទេថា តើពរជ័យណាមួយក្នុងចំណោមពរជ័យទាំងនេះ ដែលប្អូនបានទទួលរួចមកហើយតាមរយៈការចូលរួមថ្នាក់វិទ្យាស្ថាន ហើយតើពរជ័យទាំងនេះបានភ្ជាប់ប្អូនទៅនឹងព្រះអង្គសង្គ្រោះដោយរបៀបណា ? គាត់បានទុកពេលឲ្យសិស្សរបស់គាត់ពិចារណា ហើយបន្ទាប់មកគាត់បានអញ្ជើញពួកគេបីនាក់ឲ្យចែកចាយគំនិត និងអារម្មណ៍របស់ពួកគេជាមួយនឹងសិស្សក្នុងថ្នាក់ ។
បងប្រុស អឺឃែលឡែន បញ្ចាំងវីដេអូរបស់ប្រធាន ណិលសុន ទៅកាន់សិស្សក្នុងថ្នាក់វិទ្យាស្ថានរបស់គាត់ និងផ្តល់ឲ្យពួកគេនូវច្បាប់ចម្លងបោះពុម្ពនៃការសន្យាដែលប្រធាន ណិលសុន បានលើកឡើង ។ បន្ទាប់មក គាត់សួរសិស្សរបស់គាត់ថា « តើពរជ័យមួយណាក្នុងចំណោមពរជ័យទាំងនេះដែលប្អូនបានទទួលដោយសារការចូលរួមថ្នាក់វិទ្យាស្ថាន ? » បន្ទាប់ពីបានទុកពេលឲ្យពួកគេគិតរួចហើយ បងប្រុស អឺឃែលឡែន សុំឲ្យសិស្សរបស់គាត់ពិចារណាអំពីនរណាម្នាក់ដែលពួកគេស្គាល់ ដែលពួកគេអាចអញ្ជើញឲ្យមកថ្នាក់វិទ្យាស្ថាន ដើម្បីទទួលបានពរជ័យស្រដៀងគ្នានេះដែរ ។

តើខ្ញុំអាចហាត់រៀនប្រើជំនាញនេះ ឬអនុវត្តតាមគោលការណ៍នេះដោយរបៀបណា ? ( អនុវត្ត ) ៖

សូមសរសេរពីរបៀបដែលអ្នកនឹងអញ្ជើញសិស្សក្នុងថ្នាក់វិទ្យាស្ថានរបស់អ្នក ឲ្យពិចារណាពីរបៀបដែលពួកគេទទួលបានរួចទៅហើយនូវពរជ័យដែលបានលើកឡើងដោយប្រធាន ណិលសុន ។
សូមសរសេរពីរបៀបដែលអ្នកនឹងអញ្ជើញសិស្សក្នុងថ្នាក់វិទ្យាស្ថានរបស់អ្នកឲ្យពិចារណាអំពីនរណាម្នាក់ដែលពួកគេស្គាល់ ដែលពួកគេអាចអញ្ជើញឲ្យមកថ្នាក់វិទ្យាស្ថានដើម្បីទទួលបានពរជ័យស្រដៀងគ្នានេះដែរ ។

ជញ្ជឹងគិត ឬពិភាក្សា ៖

តើការពិចារណាអំពីពរជ័យដែលពួកគេបានទទួលរួចហើយតាមរយៈការចូលរួមក្នុងថ្នាក់វិទ្យាស្ថាន អាចនឹងបំផុសគំនិតសិស្សរបស់អ្នកយ៉ាងដូចម្ដេច ?

តើខ្ញុំនឹងរួមបញ្ចូលចំណុចនេះនៅពេលណា និងដោយរបៀបណា ?

សូមរៀបចំផែនការមួយក្នុងរយៈពេលឆាប់ៗនេះដើម្បីចែកចាយវីដេអូរបស់ប្រធាន ណិលសុន និងអញ្ជើញសិស្សឲ្យពិចារណាអំពីរបៀបដែលពួកគេទទួលបានរួចហើយនូវពរជ័យដែលបានសន្យាដោយប្រធាន ណិលសុន ឬនរណាដែលពួកគេស្គាល់ ដែលអាចបានទទួលប្រយោជន៍ពីពរជ័យទាំងនេះ ។