« ជំនាញ ៖ លើកទឹកចិត្តសិស្សឲ្យប្រើការបង្រៀនរបស់ព្យាការីសម័យទំនើបក្នុងការប្រជុំធម្មនិដ្ឋាន » ធនធានផ្តល់ការគាំទ្រ និងការបំពាក់បំប៉នដល់គ្រូបង្រៀន ( ឆ្នាំ២០២៤ )

ផ្ដោតលើការបង្រៀនរបស់ព្យាការី

ជំនាញ ៖ លើកទឹកចិត្តសិស្សឲ្យប្រើការបង្រៀនរបស់ព្យាការីសម័យទំនើបក្នុងការប្រជុំធម្មនិដ្ឋាន ។

សេចក្តីផ្ដើម

ប្រធាន អាវរិង បានបង្រៀនថា « វាហាក់ដូចជាគ្មានទីបញ្ចប់ចំពោះបំណងប្រាថ្នារបស់ព្រះអង្គសង្គ្រោះក្នុងការដឹកនាំយើងទៅកាន់សុវត្ថិភាពនោះទេ ។ ហើយវាមានភាពជាប់លាប់នៅក្នុងរបៀបដែលទ្រង់បង្ហាញផ្លូវដល់យើង ។ ទ្រង់ហៅតាមមធ្យោបាយច្រើនជាងមួយដើម្បីឲ្យវាទៅដល់អ្នកដែលចង់ទទួលយក ។ ហើយមធ្យោបាយទាំងនោះតែងតែរួមបញ្ចូលការផ្ញើសារតាមប្រសាសន៍របស់ព្យាការីទ្រង់នៅពេលណាដែលមនុស្សមានលក្ខណៈសម្បត្តិគ្រប់គ្រាន់ដើម្បីមានព្យាការីរបស់ព្រះនៅក្នុងចំណោមពួកគេ ។ អ្នកបម្រើដែលមានសិទ្ធិអំណាចទាំងនោះតែងតែទទួលខុសត្រូវក្នុងការព្រមានប្រជាជន ដោយប្រាប់ផ្លូវទៅកាន់សុវត្ថិភាព » ( ហែនរី ប៊ី អាវរិង « Finding Safety in Counsel » Ensign, ខែឧសភា ឆ្នាំ១៩៩៧ ទំព័រ ២៤ ) ។

អែលឌើរ គ្រីស្តូហ្វឺសិន បានបន្ថែមថា « នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ‹ យើងខ្ញុំជឿចំពោះការណ៍ទាំងអស់ ដែលទ្រង់បានបើកសម្ដែងមក និងការណ៍ទាំងអស់ដែលទ្រង់បើកសម្ដែងនៅពេលឥឡូវនេះ ហើយយើងខ្ញុំជឿថា ទ្រង់នឹងបើកសម្ដែងនូវការណ៍ដ៏ធំ និងសំខាន់ៗជាច្រើន ដែលទាក់ទងទៅនឹងនគរនៃព្រះ › ( មាត្រានៃសេចក្ដីជំនឿ ១:៩ ) ។ នេះមានន័យថា ខណៈដែលមានអ្វីជាច្រើនដែលយើងពុំទាន់ដឹងអស់នៅឡើយ នោះសេចក្ដីពិត និងគោលលទ្ធិ ដែលយើងទទួលនេះ បានមកដល់ ហើយវានឹងបន្ដមកតាមរយៈវិវរវណៈដ៏ទេវភាព ។ យើងឲ្យតម្លៃដល់អ្នកវិទូដែលពង្រីកការយល់ដឹង ប៉ុន្ដែនៅក្នុងសាសនាចក្រសព្វថ្ងៃ ក៏ដូចជាសាសនាចក្រពីបុរាណដែរ ការស្ថាបនាគោលលទ្ធិនៃព្រះគ្រីស្ទ ឬការកែតម្រូវលើការបង្វែរចេញពីគោលលទ្ធិ គឺជារឿងសំខាន់មួយនៃវិវរណៈដ៏ទេវភាព ចំពោះអ្នកទាំងឡាយ ដែលព្រះអម្ចាស់ប្រទានឲ្យនូវសិទ្ធិអំណាចជាសាវក » ( ឌី ថត គ្រីស្តូហ្វឺសិន « The Doctrine of Christ: Elder Christofferson » ខែឧសភា ឆ្នាំ២០១២ ) ។

ដើម្បីបំពេញតាមគោលបំណងនៃថ្នាក់សិក្ខាសាលា និងថ្នាក់វិទ្យាស្ថាន គ្រូបង្រៀនគួរតែចំណាយពេលវេលាដើម្បីរៀនស្គាល់ប្រសាសន៍របស់ព្យាការីដែលនៅរស់ រហូតដល់ពួកគេអាចថ្លែងអំពីប្រសាសន៍របស់ពួកលោកចេញពីមាត់របស់ពួកគេទៅកាន់សិស្សបានយ៉ាងរលូន ។

ប្រសាសន៍របស់ព្យាការីគឺជាព្រះបន្ទូលរបស់ព្រះយេស៊ូវគ្រីស្ទ ហើយព្រះបន្ទូលរបស់ព្រះយេស៊ូវគ្រីស្ទគឺជាប្រសាសន៍របស់ព្យាការី អ្នកមើលឆុត និងអ្នកទទួលវិវរណៈ ( គោលលទ្ធិ និងសេចក្តីសញ្ញា ១:៣៨ ) ។

នេះគឺជាសំណួរមួយចំនួនដែលគ្រូបង្រៀនអាចសួរពេញមួយឆ្នាំសិក្សា ៖

តើខ្ញុំមានទម្លាប់សិក្សាអ្វីខ្លះ ដែលវាទាក់ទងនឹងប្រសាសន៍របស់ពួកព្យាការីដែលនៅរស់ ?
តើខ្ញុំចំណាយពេលប៉ុន្មានក្នុងការសិក្សាប្រសាសន៍របស់ពួកលោក ?
តើខ្ញុំដកស្រង់ប្រសាសន៍របស់ពួកលោក ឬប្រើប្រសាសន៍របស់ពួកលោកញឹកញាប់ប៉ុនណាដែរ នៅក្នុងគេហដ្ឋានរបស់ខ្ញុំ នៅកន្លែងធ្វើការ នៅសាលារៀន ឬនៅកន្លែងកម្សាន្ដ ?
តើខ្ញុំស្គាល់អ្វីដែលប្រធាន ណិលសុន កំពុងមានប្រសាសន៍នៅសប្តាហ៍នេះឬទេ ?
តើខ្ញុំអាចធ្វើអ្វីខ្លះបាន ដើម្បីខិតខំធ្វើគ្រប់យ៉ាង ដើម្បីបានយល់ពីប្រសាសន៍របស់ព្យាការី និងអាទិភាពនៃប្រសាសន៍របស់ពួកលោក ?

នេះគឺជាវគ្គសិក្សាដែលបានរៀបចំឡើងសម្រាប់ការបំពាក់បំប៉នតិចតួចមួយក្នុងចំណោមការបំពាក់បំប៉នទាំងបួន ដែលបង្កើតឡើងដើម្បីជួយគ្រូបង្រៀន និងសិស្សឲ្យរៀនសូត្រ និងប្រើប្រាស់ប្រសាសន៍របស់ពួកព្យាការី ។ នេះគឺជាដំណើរការមួយដែលនឹងចំណាយពេលដើម្បីអភិវឌ្ឍ ។ នៅពេលគ្រូបង្រៀន និងសិស្សចាប់ផ្ដើម នោះពួកគេនឹងកាន់តែយល់ពីប្រសាសន៍របស់ពួកព្យាការី មួយបន្ទាត់ម្តងៗ ហើយពួកគេនឹងរៀនកាន់តែឆាប់ចេះនូវមាតិកា និងបរិបទនៃការបង្រៀនរបស់ព្យាការី ។ ពួកគេក៏នឹងក្លាយជាអ្នកជំនាញក្នុងការរកឃើញការបង្រៀនទាំងនេះនៅក្នុងបណ្ណាល័យដំណឹងល្អ និងកន្លែងផ្សេងទៀតដែលពួកគេអាចរកឃើញផងដែរ ។ នៅពេលមួយ ពួកគេនឹងអាចទទួលបានការសន្យានៅក្នុង ចោទិយកថា ៦:៦ ៖ « សេចក្តីទាំងនេះដែលយើងបង្គាប់ដល់ឯងនៅថ្ងៃនេះ នោះត្រូវនៅជាប់ក្នុងចិត្តឯងចុះ » ។

តើអ្វីជាការយល់ដឹង ឬសមត្ថភាពដំបូងរបស់ខ្ញុំ ? ( ការវាយតម្លៃ )

តើមានវិធីអ្វីខ្លះ ដែលអ្នកអាចជួយសិស្សរបស់អ្នកបានកាន់តែប្រសើរឲ្យផ្ដោតអារម្មណ៍ទៅលើដំបូន្មានរបស់ពួកព្យាការីសម័យទំនើបនៅក្នុងថ្នាក់ ?

តើវាគឺជាអ្វី ហើយហេតុអ្វីបានជាវាសំខាន់ ? ( កំណត់និយមន័យ ) ៖

គ្រូបង្រៀនអាចជួយសិស្សឲ្យស្គាល់កាន់តែច្បាស់អំពីប្រសាសន៍របស់ពួកព្យាការីសម័យទំនើបដោយការលើកទឹកចិត្តឲ្យប្រើប្រាស់ប្រសាសន៏របស់ពួកលោក ជាផ្នែកមួយនៃការប្រជុំធម្មនិដ្ឋានជារៀងរាល់ថ្ងៃនៅក្នុងថ្នាក់ ។ គ្រូបង្រៀនដែលមានបំណងប្រាថ្នាបែបនេះអាចសួរយ៉ាងសាមញ្ញទៅកាន់សិស្សដែលបានចាត់តាំង ឬគណៈប្រធានថ្នាក់នូវសំណួរមួយ ដែលលើកទឹកចិត្តពួកគេឲ្យផ្តោតលើការបង្រៀនរបស់ព្យាការីសម័យទំនើប ។ ឧទាហរណ៍ អ្នកអាចសួរសំណួរមួយក្នុងចំណោមសំណួរខាងក្រោមនេះបាន ៖

« នៅពេលដែលប្អូនរៀបចំចែកចាយគំនិតខាងវិញ្ញាណ សូមប្អូនជ្រើសរើសអ្វីមួយមកពីប្រសាសន៍របស់ព្យាការីដែលនៅរស់ម្នាក់ ដែលបំផុសគំនិតដល់ប្អូន ឬជាអ្វីមួយដែលប្អូនគិតថានឹងផ្ដល់ពរជ័យដល់សិស្សក្នុងថ្នាក់បានទេ ? »
« ចំពោះគំនិតដែលប្អូននឹងចែកចាយនៅក្នុងការប្រជុំធម្មនិដ្ឋានខាងមុខ សូមប្អូនជ្រើសរើសអ្វីមួយមកពីប្រសាសន៍ដកស្រង់របស់ព្យាការីនៅរស់ម្នាក់ ដើម្បីបន្ថែមទៅលើអ្វីដែលប្អូនបានដាក់ផែនការដើម្បីចែកចាយជាមួយសិស្សក្នុងថ្នាក់បានទេ ? »

ការជួយសិស្សឲ្យផ្តោតទៅលើការបង្រៀនរបស់ព្យាការីសម័យទំនើបក្នុងអំឡុងពេលនៃការប្រជុំធម្មនិដ្ឋាន អាចជួយឲ្យថ្នាក់របស់ពួកគេផ្តោតសំខាន់ទៅលើព្រះយេស៊ូវគ្រីស្ទ ហើយពួកគេនឹងកាន់តែស៊ាំជាមួយព្រះបន្ទូលរបស់ទ្រង់នៅអំឡុងពេលពួកគេសិក្សាជាមួយគ្នា ។

តើនរណា ឬតើអ្វីទៅដែលផ្ដល់នូវការពន្យល់ដ៏ល្អមួយអំពីការណ៍នេះ ? ( គំរូ ) ៖

បន្ទាប់ពីរៀនចប់ បងស្រី ចូនស៍ ជួបជាមួយ ជេមី ដែលជាសិស្សម្នាក់នៅក្នុងថ្នាក់របស់គាត់ ។ ជេមី នឹងដឹកនាំការប្រជុំធម្មនិដ្ឋានក្នុងរយៈពេលពីរថ្ងៃទៀត ។ បងស្រី ចូនស៍ បានរំឭក ជេមី អំពីការចាត់តាំងរបស់នាង ហើយបានសួរថា « កាលប្អូនត្រៀមខ្លួនចែកចាយគំនិតខាងវិញ្ញាណនៅក្នុងរយៈពេលពីរថ្ងៃទៀត សូមប្អូនជ្រើសរើសអ្វីមួយមកពីប្រសាសន៍របស់ព្យាការីនៅរស់ម្នាក់បានទេ ? »

តើខ្ញុំអាចហាត់រៀនប្រើជំនាញនេះ ឬអនុវត្តតាមគោលការណ៍នេះដោយរបៀបណា ? ( អនុវត្ត ) ៖

សូមគិតដល់សិស្សដែលត្រូវបានចាត់តាំងក្នុងការប្រជុំធម្មនិដ្ឋានក្នុងរយៈពេលពីរបីថ្ងៃខាងមុខនេះ ។ សូមសរសេរសំណួរដែលអ្នកនឹងសួរសិស្សម្នាក់ក្នុងចំណោមសិស្សទាំងនេះ ដើម្បីជួយពួកគេឲ្យផ្តោតលើប្រសាសន៍របស់ព្យាការីសម័យទំនើប ។

ជញ្ជឹងគិត ឬពិភាក្សា ៖

តើអ្នកគិតថា ពរជ័យអ្វីខ្លះនឹងកើតមានដល់សិស្សរបស់អ្នក នៅពេលដែលពួកគេផ្ដោតលើប្រសាសន៍របស់ព្យាការីសម័យទំនើបម្ដងហើយម្តងទៀតនោះ ?

រួមបញ្ចូល ៖

សូមចំណាយពេលដើម្បីធ្វើតាមការអនុវត្តនេះជារៀងរាល់សប្តាហ៍ ។ សូមបង្កើតវប្បធម៌ថ្នាក់រៀនមួយ ឲ្យចេះធ្វើការស្វែងរក និងការប្រើប្រសាសន៍របស់ពួកព្យាការី ។

សូមយកពេលមួយក្នុងអំឡុងឆ្នាំនេះ ដើម្បីស្វែងរកវិធីផ្សេងទៀតដែលអ្នកអាចរួមបញ្ចូលប្រសាសន៍របស់ពួកព្យាការីជាបទពិសោធន៍ក្នុងថ្នាក់រៀនរបស់អ្នកបាន ។

តើចង់បានបន្ថែមទៀតទេ ?

ម៉ូសាយ ១៨:១៩ ៖ « … កុំឲ្យបង្រៀននូវអ្វីផ្សេងៗក្រៅពីអ្វីដែលលោកបានបង្រៀន និងអ្វីដែលបាននិយាយចេញមកពីមាត់នៃពួកព្យាការីដ៏បរិសុទ្ធប៉ុណ្ណោះ » ។

ក្លាក ជី ហ្គីលប៊ឺត « ‘A Prophet in the Land: Current Prophetic Emphases to Young Adults’ S&I Annual Broadcast 2023 » ថ្ងៃទី២៧ ខែមករា ឆ្នាំ២០២៣ ។