Nō te feiā fa’atere—Tauturura’a i te mau ’orometua ha’api’i ’ia manuia

Te mau ’ōhipa i roto e piti ta’ata

Pinepine te rāve’a maita’i a’e nō te pāhono i te mau hina’aro hō’ē roa o te mau ’orometua ha’api’i ’o te mau fārereira’a hō’ē-hō’ē ïa. ’Ei hi’ora’a, ’ei ta’ata fa’atere, e nehenehe ’oe e paraparau poto noa ’e te hō’ē ’orometua ha’api’i nā mua a’e ’aore rā i muri a’e i te piha ha’api’ira’a nō te ’āparau i te mau parau tumu o te Ha’api’ira’a mai tā te Fa’aora. E nehenehe ’oe e fa’aineine i teie ’āparaura’a nā roto i te māta’ita’ira’a i te ’orometua ha’api’i ’ia ha’api’i. ’A ’imi ’ia māramarama atu ā i te mau pūai o te ’orometua ha’api’i ’e ’a ’imi i te mau rāve’a e nehenehe ai ’oe e pāturu.

E mea faufa’a ato’a te tūru’ira’a i ni’a i te pūai o te hō’ē ’orometua ha’api’i mai te ’imira’a i te mau fāna’ora’a nō te ha’amaita’i. E mea maita’i ’ia ha’amata i te ’āparaura’a ’e te mau ’orometua ha’api’i nā roto i te anira’a ia rātou ’ia feruri rātou iho e aha te mea e tere maita’i ra ’e i tei hea vāhi tā rātou e mana’o ra e ti’a ’ia ha’amaitahia.

’A fārerei ai ’oe i te mau ’orometua ha’api’i, ’a feruri i te mau rāve’a nō te ha’apūai ia rātou ’e nō te fa’aitoito ia rātou ma te au maita’i ’e te māuruuru nō te tāvinira’a tā rātou e hōro’a nei.

Te mau rurura’a ’āpo’ora’a nā te mau ’orometua ha’api’i

E fa’atupu te mau pāroita ato’a i te mau rurura’a ’āpo’ora’a toru ’āva’e nā te mau ’orometua ha’api’i, i reira te mau ’orometua ha’api’i e nehenehe ai e ’āparau ’āmui nō ni’a i te mau parau tumu nō te ha’api’ira’a i te ta’ata mai te Mesia te huru. E nehenehe ato’a te mau rurura’a ’āpo’ora’a nā te mau ’orometua ha’api’i e fa’atupuhia nō te mau metua (hi’o Buka arata’i rahi : Tāvinira’a i roto Te ’Ēkālesia a Iesu Mesia i te Feiā Mo’a i te mau Mahana Hopea nei, 13.5, ChurchofJesusChrist.org).

E aha te taime e fa’atupuhia ai teie mau rurura’a ?

E fa’atupuhia te mau rurura’a ’āpo’ora’a a te mau ’orometua ha’api’i i te taime ha’api’ira’a 50 minuti i roto i te mau piha i te sābati.

• E haere atu te mau ’orometua ha’api’i o te Autahu’ara’a, o te Sōtaiete Tauturu ’e o te Feiā ’āpī tamāhine i te sābati mātāmua ’aore rā i te toru o te sābati, mai te au i te fa’aotira’a a te feiā fa’atere i reira.

• E haere atu te mau ’orometua ha’api’i o te Ha’api’ira’a Sābati i te piti ’aore rā i te maha o te sābati, mai te au i te fa’aotira’a a te feiā fa’atere i reira.

• E haere atu te mau ’orometua ha’api’i o te Paraimere i te huru sābati ato’a, mai te au i te fa’aotira’a a te mau peresidenira’a o te Paraimere ’e o te Ha’api’ira’a Sābati o te pāroita. Mai te mea e hina’arohia, e nehenehe te mau ’orometua ha’api’i o te Paraimere e ruru fa’ata’a-’ē-hia i te tahi atu mau ’orometua ha’api’i, nō te ’āparau i te mau tītaura’a hō’ē roa nō te ha’api’i i te mau tamari’i. E nehenehe te reira e tupu i te taime hīmenera’a e 20 minuti, nā mua a’e ’aore rā i muri a’e i te mau purera’a i te sābati, ’aore rā i te tahi atu mahana o te hepetoma. E nehenehe e fa’atupu hau atu i te hō’ē rurura’a ’āpo’ora’a toru ’āva’e nā te mau ’orometua ha’api’i o te Paraimere, ’ia ’ore rātou ’ia ma’iri i te mau piha Paraimere i roto i te hō’ē ā hepetoma. Nota: Mai te mea e tītauhia, e fa’ata’a te peresidenira’a Paraimere i te mau ’orometua ha’api’i mono, e ’āmui i te mau piha ha’api’ira’a ’aore rā e rave i te tahi atu mau fa’anahora’a nō te fa’ati’a i te mau ’orometua Paraimere ’ia haere atu i teie mau rurura’a ’āpo’ora’a nā te mau ’orometua ha’api’i.)

• E nehenehe e fa’atupu i te mau rurura’a ’āpo’ora’a nā te mau ’orometua ha’api’i nō te mau metua i te mau huru sābati ato’a, mai tei fa’aotihia e te ’āpo’ora’a pāroita.

’O vai te ’āmui atu ?

E ti’a i te feiā ato’a e ha’api’i nei i te hō’ē pupu autahu’ara’a ’aore rā piha ha’api’ira’a i roto i te pāroita ’ia ’āmui atu, ’oia ato’a hō’ē a’e o te feiā fa’atere nō te autahu’ara’a ’aore rā o te mau pupu tauturu e ha’apa’o nei i taua mau pupu ra ’aore rā mau piha. Mai te mea e tītauhia, e nehenehe te mau ta’ata e ’āmui mai ’ia vāhihia ’ei mau pupu ’ia au i te mau hina’aro o te feiā tā rātou e ha’api’i ra. ’Ei hi’ora’a, e nehenehe te mau ’orometua ha’api’i nō te feiā ’āpī ’aore rā nō te mau tamari’i e fana’o i te mau rurura’a vāhihia i te tahi mau taime, nō te ’āparau i te mau fifi ta’a ’ē nō te ha’api’i i te feiā ’āpī ’aore rā i te mau tamari’i.

Nō te mau rurura’a ’āpo’ora’a nā te mau ’orometua ha’api’i nō te mau metua, nā te ’āpo’ora’a pāroita e fa’aoti e mea maita’i ānei ’ia ani i te tahi mau metua i ma’itihia ’aore rā e fa’atae i te tītaura’a i te feiā ato’a e hina’aro e ’āmui mai.

Nā vai e arata’i i teie mau rurura’a ?

E hi’opo’a te ’āpo’ora’a pāroita, ma te tauturuhia e te peresidenira’a o te Ha’api’ira’a Sābati i te mau rurura’a ’āpo’ora’a a te mau ’orometua ha’api’i. E ’āparau ’āmui rātou nō ni’a i te mau hina’aro o te mau ’orometua ha’api’i ’e te mau pīahi, ’ia au i te mea tā rātou i ’ite i roto i te mau piha ha’api’ira’a ’e te mau rurura’a. E ’ohipa ’āmui rātou nō te fa’aoti e aha te mau parau tumu ’e te mau fa’a’ohipara’a i roto i te Ha’api’ira’a mai tā te Fa’aora e pāhono maita’i atu ā i te mau hina’aro tā rātou i ’ite na.

Tei matauhia, nā te hō’ē melo nō te peresidenira’a o te Ha’api’ira’a Sābati e arata’i i te mau rurura’a ’āpo’ora’a nā te mau ’orometua ha’api’i. Teie rā, e nehenehe te tahi atu mau melo o te pāroita e fa’ata’ahia nō te arata’i i te mau rurura’a i te tahi taime. E ha’apūai te mau peresidenira’a o te pupu ’e o te mau pupu tauturu ’e tō rātou mau ’orometua ha’api’i i te mau parau tumu ’e i te mau fa’a’ohipara’a tei ’āparauhia i roto i te rurura’a.

E aha tē tupu i roto i te hō’ē rurura’a ’āpo’ora’a nā te mau ’orometua ha’api’i ?

E ti’a i te rurura’a ’āpo’ora’a nā te mau ’orometua ha’api’i e pe’e i teie fa’anahora’a :

• Hōro’a i te mana’o ’e ’āparau ’āmui. E ani i te mau ’orometua ha’api’i ’ia hōro’a i te mana’o nō ni’a i tō rātou mau ’itera’a i tupu a’e nei i roto i te ha’api’ira’a, e ui atu i te mau uira’a nō ni’a i te ha’api’ira’a, ’e ’ia hōro’a mai i tō rātou mau mana’o nō te upo’oti’a i ni’a i teie mau ’ā’ara’a. E nehenehe e tu’u i roto i teie tuha’a o te rurura’a te hō’ē tuatāpapa fa’ahoura’a i te mau parau tumu i tuatāpapahia na i roto i te mau rurura’a i ma’iri a’e nei.

• ’Apo ’āmui i te ha’api’ira’a. E ani i te mau ’orometua ha’api’i ’ia ’āparau i te hō’ē o te mau parau tumu i muri nei tei vauvauhia mai i roto i teie mātēria tauturu : ’A fa’atumu i ni’a ia Iesu Mesia, ’a here i te feiā tā ’oe e ha’api’i, ’a ha’api’i nā roto i te Vārua, ’a ha’api’i i te ha’api’ira’a tumu ’e ’a tītau manihini ’ia ’apo i te ha’api’ira’a ma te ’itoito. E nehenehe te mau parau tumu e tuatāpapahia ma te ’ore e fa’ata’a i te ’āna’ira’a, mai te mea rā ’uafa’ata’ahia te reira e te ’āpo’ora’a pāroita, e nehenehe te mau ta’ata o te ’āpo’ora’a e mā’iti i te parau tumu i muri mai nō te ’āparaura’a. E nehenehe ’oe e rave hau atu i te hō’ē ’āpo’ora’a nō te ’āparau i te hō’ē parau tumu mai te mea e hina’arohia.

• Fa’anaho ’e ani manihini. Tauturu i te mau ’orometua ha’api’i ’ia fa’anaho e nāhea rātou i te fa’a’ohipa i te parau tumu tā rātou i ’āparau. Mai te mea e tano, e nehenehe ato’a ’oe e fa’a’ohipa ’āmui hō’ē ’aravihi tā ’oe i ’āparau na. E ani manihini ia rātou ’ia tāpa’opa’o ’e ’ia tāmata i te mau fa’a’ihora’a tā rātou i fāri’i nō ni’a i te fa’a’ohipara’a i te reira parau tumu i roto i tā rātou ha’api’ira’a—’ia nā reira ato’a i roto i tā rātou mau tauto’ora’a nō te ha’api’i i roto i tō rātou iho ’utuāfare. E fa’aitoito ia rātou ’ia ha’amata i te tuatāpapa i te parau tumu e ’āparauhia i muri iho.

Mai te mea e nehenehe, e ti’a i te mau rurura’a ’āpo’ora’a a te mau ’orometua ha’api’i ’ia fa’ahōho’a i te mau parau tumu e ’āparauhia ra.

E tauturu te mau rurura’a ’āpo’ora’a a te mau orometua ha’api’i i te mau ’orometua ha’api’i ia māramarama ’e ’ia fa’a’ohipa maita’i a’e i te mau parau tumu nō te ha’api’ira’a i te ta’ata mai te Mesia te huru.

Arata’i i te mau ’orometua ha’api’i tei pi’i-’āpī-hia

’Ei ta’ata fa’atere, e hōpoi’a nā ’oe ’ia « fārerei atu i te mau ’orometua ha’api’i tei pi’i-’āpī-hia » i roto i tā ’oe pupu tauturu ’e ’ia « tauturu ia rātou ’ia fa’aineine nō tō rātou pi’ira’a » (Buka arata’i rahi, 17.3, ChurchofJesusChrist.org). E riro teie mau rurura’a ’ei taime fa’a’itera’a i te mau ’orometua ha’api’i ’āpī i tō rātou pi’ira’a mo’a ’e ’ei fa’aurura’a ia rātou nā roto i te hō’ē hi’ora’a i te aura’a ’ia ha’api’i mai tā te Fa’aora ra. ’Ei ta’ata fa’atere, e nehenehe ’oe e tauturu i te mau ’orometua ha’api’i ’āpī ’ia tāvini, nā roto i te ravera’a i teie mau mea i muri nei :

• ’A fa’a’ite i tō ’oe ti’aturira’a ē, e tauturu te Fa’aora ia rātou i roto i tō rātou pi’ira’a (hi’o Te Ha’api’ira’a Tumu ’e te mau Fafaura’a 88:78).

• ’A hōro’a nā te mau ’orometua ha’api’i ’āpī teie mātēria tauturu, ’e ’a fa’aitoito ia rātou ’ia ’imi i te mau rāve’a nō te fa’a’ohipa i teie mau parau tumu i roto i tā rātou ha’api’ira’a.

• ’A fa’a’ite i te mau ’orometua ha’api’i ’āpī i te mau mea ato’a nō ni’a i tā ’oe pupu tauturu ’o te nehenehe e tauturu ’ia rātou.

• Mai te mea e hina’arohia, e parau i te mau ’orometua ha’api’i ’āpī i roto i teihea piha rātou e ha’api’i ai ’e e ha’amata rātou i teihea ha’api’ira’a. ’A hōro’a i te mau ha’amāramaramara’a ato’a e hina’arohia e rātou nō ni’a i tā rātou piha ’e i te mau melo o te piha.

• ‘A fa’ata’a i te mau ’orometua ha’api’i ’āpī ē, e nehenehe ’oe e tauturu ia rātou i roto i tō rātou pi’ira’a. ’A hōro’a i te pāturura’a i roto i te piha ha’api’ira’a ’e te fāri’ira’a i te mau mātēria tauturu ha’api’ira’a e hina’arohia.

• ’A ani ’ia hi’opo’ahia i te tahi taime te mau piha ha’api’ira’a a te mau ’orometua ha’api’i, ’e ’a hōro’a i tō ’oe mau mana’o mai tei muhumuhuhia mai e te Vārua.

• ’A ani i te mau ’orometua ha’api’i ’ia ’āmui mai i roto i te mau rurura’a ’āpo’ora’a toru ’āva’e a te mau ’orometua ha’api’i.