Iesu Mesia e parauparau ra i te vahine i te ’āpo’o pape

Nā roto i te Fa’aora ’ei hi’ora’a nō tātou, e riro mai te here ’ei tumu nō tā tātou ha’api’ira’a.

Here i te feiā tā ’oe e ha’api’i ra

Te mau mea ato’a tā te Fa’aora i rave i roto i tāna tāvinira’a i ni’a i te fenua nei, ’ua tūra’ihia ïa e te here. ’A tūtava ai tātou ’ia riro ’ei feiā pe’e mau i te Mesia, e nehenehe tātou e ’ī i teie here (hi’o Ioane 13:34–35 ; Moroni 7:47–48 ; 8:26). ’Ia vai ana’e te here o te Fa’aora i roto i tō tātou ’ā’au, e ’imi tātou i te mau rāve’a ato’a nō te tauturu ia vetahi ’ē ’ia mātau i te Mesia ’e ’ia haere iāna ra. E riro te here ’ei fa’aitoitora’a nō tā tātou ha’api’ira’a.

Here i te feiā tā ’oe e ha’api’i ra

• ’A hi’o i te mau pīahi mai tā te Atua e hi’o ra ia rātou.

• ’A ’imi ’ia mātau ia rātou—’ia hāro’aro’a i tō rātou huru orara’a, tō rātou mau hina’aro ’e tō rātou pūai.

• ’A pure nō rātou mā te fa’ahiti i tō rātou i’oa.

• ’A fa’atupu i te hō’ē vāhi pāpū i reira te mau ta’ata ato’a e fa’aturahia ai ’e e ’ite ai e mea faufa’a tā rātou mau hōro’ara’a.

• ’A ’mi i te mau rāve’a tano maita’i nō te fa’a’ite i tō ’oe here.

’Ua ’ite te Fa’aora i te fāito pūai hanahana i roto i te mau ta’ata ato’a tāna i ha’api’i

’Ua mana’o te rahira’a o te mau ta’ata i Ieriko ē, ’ua ’ite rātou i te mau mea ato’a e tītauhia ia rātou ’ia ’ite nō ni’a ia Zakaio. E telona ’e e ta’ata tītau tute ’oia—te telona rahi, ’oia ïa—’e e ta’ata tao’a rahi ’oia. E mea pāpū maita’i ē, ’ua mana’o rātou ē, e ti’a iāna ’ia ha’avare ’e ’ia tāviri. ’Ua hi’o rā Iesu i te ’ā’au o Zakaio ’e ’ua ’ite ’oia i te hō’ē « tamaiti nā Aberahama » tura (hi’o Luka 19:1–10). ’Ua ’ite te Fa’aora i te mau ta’ata ’eiaha noa mai tō rātou huru, mai te au rā i tō rātou huru mau—’e mai tā rātou e nehenehe e riro mai. I roto i te feiā rava’ai mātaro-’ore-hia mai ia Simona, Anederea, Iakobo ’e Ioane, ’ua ’ite ’oia i te feiā fa’atere nō ’ananahi o tāna ’Ēkālesia. I roto i te ta’ata hāmani ’ino ri’ari’a rahi ’o Saulo, ’ua ’ite ’oia i « te hō’ē ti’a i mā’itihia », ’o te poro i tāna ’evanelia i mua i te mau ari’i ’e te mau nūna’a (hi’o Te ’Ohipa 9:10–15). ’E i roto ia ’oe ’e te ta’ata tāta’itahi tā ’oe e ha’api’i nei, tē ’ite nei te Fa’aora i te hō’ē tamaiti ’aore rā te hō’ē tamāhine a te Atua ma te fāito ’ōti’a ’ore.

I rotopū i te mau ta’ata tā ’oe e ha’api’i nei, e mea pāpū ē, tē vai ra vetahi e riro ’ei mau ta’ata ha’apa’o maita’i ’e te fa’afāriuhia ’e te tahi atu, e au ra ē ’aita e ’ananatae ’aore rā e ’ōrure hau. ’A ara ’eiaha e rave i te mau mana’o tei niuhia i ni’a noa i te mea tā ’oe e ’ite ra. E nehenehe te Vārua Maita’i e tauturu ia ’oe ’ia ’ite i roto i te ta’ata tāta’itahi te tahi o te mau mea tā te Fa’aora e ’ite ra—’e e tauturu ia ’oe ’ia ha’amata i te here ia rātou mai tāna e nā reira.

Te mau uira’a e feruri : ’A feruri i te ta’ata tāta’itahi tā ’oe e ha’api’i ra, ’e ’a feruri i te mana’o o te Metua i te ao ra ’e ’o Iesu nō ni’a i te ta’ata tāta’itahi. E aha tā rāua e nehenehe e ’ite i roto iāna ? Nāhea teie mau mana’o i te fa’atupu i ni’a i tā ’oe huru ha’api’ira’a i taua ta’ata ra ?

Nō roto mai i te mau pāpa’ira’a mo’a : 1 Samuela 16:7 ; Salamo 8:4–5 ; Roma 8:16–17 ; Te Ha’api’ira’a Tumu ’e te mau Fafaura’a 18:10–14

’Ua ’ite te Fa’aora ia tātou ’e ’ua māramarama i tō tātou vaira’a, tō tātou mau hina’aro ’e tō tātou mau pūai

’Aita te vahine Samaria i haere mai i te ’āpo’o pape nō te fa’aro’o i te hō’ē parau poro’i o te ’evanelia. ’Ua haere mai ’oia e ti’i i te pape. Tera rā, ’ua ti’a i te Fa’aora ’ia ’ite ē, ’ua hau a’e tōna poihā i tō te tino nei. ’Ua ’ite te Fa’aora ē, tē pe’ape’a nei ’oia nō tōna mau tā’amura’a pāpū ’ore. Nō reira ’ua rave Iesu i te hina’aro pae tino tei tītau ’oi’oi iāna—te pape ’o te pāturu i te ora—’e ’ua tū’ati te reira i ni’a i tōna mau hina’aro pae vārua hōhonu a’e nō te « pape ora » ’e « te ora mure ’ore ». I te hope’a o tā rāua paraparaura’a, ’ua fāri’i te vahine i tōna iho ’itera’a pāpū ē, ’o Iesu te Mesia, tei fa’auruhia nā roto i tōna mātau-maita’i-ra’a iāna. « ’Ua parau mai [’oia] iā’u i te mau mea ato’a tā’u i rave », o tāna ïa i parau. « E ’ere ānei teie te Mesia ? » (hi’o Ioane 4:6–29).

Te rirora’a ’ei ’orometua ha’api’i mai te Mesia te huru ’o te ha’amātaura’a ïa i te ta’ata tā ’oe e ha’api’i ra, ’e te tūtavara’a ’ia hāro’aro’a e aha tō roto i tō rātou ’ā’au. E nehenehe ’oe e fa’atupu i te hō’ē ’ana’anataera’a i roto i tō rātou orara’a ’e ’ia fa’a’ite i te aumihi. E nehenehe ’oe e ’imi i te mau rāve’a nō te māramarama i tō rātou huru orara’a, tā rātou mau tārēni, tō rātou mau ’ana’anatae ’e tō rātou mau hina’aro. E nehenehe ’oe e ’ite mai nāhea rātou i te ’apo maita’i a’e. E nehenehe ’oe e ui i te mau uira’a, e fa’aro’o maita’i, ’e e hi’opo’a maita’i. Nā ni’a roa atu, ’a pure nō te hāro’aro’ara’a ’o tā te Vārua ana’e e nehenehe e hōro’a mai. Rahi noa atu tō ’oe mātaura’a i te hō’ē ta’ata, maita’i atu tō ’oe ti’ara’a ’ia tauturu iāna ’ia ’ite mai i te aura’a ’e tōna iho mana i roto i te ’evanelia a Iesu Mesia. ’Ia māramarama ana’e ’oe i te po’ihā o te hō’ē ta’ata, e nehenehe te Vārua e ha’api’i ia ’oe e nāhea i te tauturu iāna ’ia ha’amāha i te reira i te pape ora a te Fa’aora.

Te mau uira’a e feruri : E aha tā ’oe i ’ite a’ena nō ni’a i te mau ta’ata tā ’oe e ha’api’i ra ? E aha te mea faufa’a a’e nō rātou ? E aha tō rātou mau vāhi pūai ? E aha tā rātou e ʼaro nei ? E aha tā ʼoe e nehenehe e rave nō te hāro’aro’a atu ā ia rātou ?

Nō roto mai i te mau pāpa’ira’a mo’a : Salamo 139:1–5 ; Mataio 6:25–32 ; Mareko 10:17–21 ; Ioane 10:14 ; 3 Nephi 17:1–9

’Ua pure te Fa’aora nō te feiā tāna i ha’api’i.

’A feruri na, e aha tā Simona Petero i putapū i tōna fa’aro’ora’a i te Fa’aora i te paraura’a iāna : « E Simona, e Simona, inaha, i ani na Sātane ia ’oe … i pure na rā vau ia ’oe ’ia ’ore ’ia mure tō ’oe fa’aro’o » (Luka 22:31–32). E aha tā te reira e fa’atupu i ni’a ia ’oe i te ’itera’a ē, ’ua pure Iesu Mesia i te Metua nō ’oe ? ’Ua fāri’i te mau ta’ata nō Amerika tahito i te hō’ē ’ohipa mai teie te huru, ’e ’ua fa’a’ite mai rātou i te reira mai teie te huru : « ’E ’aita roa ho’i e ti’a i te hō’ē ta’ata ’ia ’ite i te ’oa’oa ’o tei fa’a’ī i tō mātou vārua i te taime ’a fa’aro’o ai mātou iāna [ia Iesu] i te purera’a atu i te Metua nō mātou » (3 Nephi 17:17).

E nehenehe ato’a ’oe e feruri i te ’ohipa e tupu mai i roto ia ’oe ’a pure ai ’oe nō te hō’ē ta’ata—ma te tāmau noa, ma tōna i’oa. Nāhea tā ’oe mau pure i te fa’atupu i ni’a i te mea tā ’oe e mana’o nei nō ni’a i terā ta’ata ? Nāhea te reira i te fa’atupu i ni’a i tā ’oe mau ha’ara’a ? Pāpū roa ē, e fa’aro’o ’e e pāhono mai tō tātou Metua i te ao ra i te mau pure ’ā’au tae a te hō’ē ’orometua ha’api’i, ’o tē hina’aro nei e tauturu i te hō’ē pīahi. ’E i roto e rave rahi huru, hō’ē rāve’a e pāhono ’oia i teie mau pure ma te ha’aputapūra’a i te ’ā’au o te ’orometua ha’api’i ’e te fa’aurura’a iāna ’ia rave ’aore rā ’ia parau i te hō’ē mea ’o te tauturu i te pīahi ’ia ’ite i tōna here.

Te mau uira’a e feruri : ’A feruri ai ’oe i te mau ta’ata tā ’oe e ha’api’i ra, tē vai ra ānei te hō’ē ta’ata tā ’oe e mana’o ra e hina’aro ta’a ’ē tōna i tā ’oe mau pure ? E aha te mana’o tei fa’auru ia ’oe ’ia pure nōna ? E aha te mau ha’amaita’ira’a e tae mai, ’a ani ai ’oe i te mau pīahi ’ia pure nō te tahi ’e te tahi ?

Nō roto mai i te mau pāpa’ira’a mo’a : Ioane 17 ; Alama 31:24–36 ; 3 Nephi 18:15–24 ; 19:19–23, 27–34

’Ua ha’apāpū te Fa’aora ē tē vai nei te mana’o fa’aturahia ’e te mana’o ha’afaufa’ahia i roto i te mau ta’ata ato’a

Te huru rahi i rotopū i te feiā fa’atere pae fa’aro’o i te ’anotau o Iesu, ’oia ho’i, e ti’a i te feiā rāva’ai ’ia ’apehia. Nō te reira, i te ’itera’a teie feiā fa’atere ia Iesu i te ’ohipara’a ’e te feiā rava’ai, ’ua māinaina rātou. Nāhea te hō’ē ta’ata tei ’āmui atu i te reira mau huru ta’ata e riro ai ’ei ’orometua ha’api’i pae vārua ?

’Oia mau, e mea ta’a ’ē te ravera’a a Iesu. Tē ’imi nei ’oia e fa’aora i te feiā ma’i i te pae vārua (hi’o Mareko 2:15–17 ; Luka 4:17–18). ’Ua toro tāmau noa ’oia i te rima i te feiā tei ta’a ’ē i te mau ta’ata e ha’ati ra ia rātou ’aore rā tei hepohepo na, ’e ’ua ’ohipa ’oia e te feiā tei rave i te hara. ’Ua ’ārue ’oia i te fa’aro’o o te hō’ē fa’ehau Roma (hi’o Mataio 8:5–13). ’Ua pi’i ’oia i te hō’ē ta’ata tītau tute ’ia riro ’ei hō’ē o tāna mau pipi ti’aturihia (hi’o Mareko 2:14). I te fa’ahapara’ahia te hō’ē vahine i te fa’aturira’a, ’ua rave ’oia ’ia ’ite teie vahine i te pārurura’a ’e ’ua fa’auru iāna ’ia tātarahapa ’e ’ia ora i te hō’ē orara’a maita’i a’e (hi’o Ioane 8:1–11).

Terā rā, ’ua rave hau atu ā Iesu i te reira. ’Ua fa’aitoito ’oia i teie huru fāri’ira’a ’e te here i rotopū i tāna mau ta’ata pe’e. E mea pāpū maita’i tei roto tōna hi’ora’a i te ’ā’au o tāna mau ’āpōsetolo, ’a tae mai ai te taime nō rātou ’ia hōpoi atu i te ’evanelia i te mau ta’ata ato’a. E ’itehia te reira i roto i te mau parau a Petero : « ’Ua ’ite mau atu ra vau e ’ore te Atua e ha’apa’o i te huru o te ta’ata » (Te ’Ohipa 10:34).

Mea pāpū, fātata te mau ta’ata ato’a tei pi’ihia ’oe ’ia ha’api’i, tē ’aro nei i te tahi taime ’ia fa’aturahia ’e ’ia ha’afaufa’ahia rātou. Nā roto i tā ’oe huru here ’e te fa’atura ia rātou, e nehenehe ’oe e fa’a’ite atu ē, ’aita rātou i fāri’i-poupou-noa-hia e hina’arohia rā rātou. E nehenehe ’oe e toro atu i te rima i te feiā ’aita e tae mai nei, ’o tē fifi nei, ’aore rā e au ra ’aita e ’ana’anatae nei, ’a fa’a’oroma’i mai te mea e mea tāere te haerera’a i mua. E nehenehe ’oe e tauturu i te feiā ato’a ’ia ’ite i te mana’o pāruru ’e te au maita’i ma te fa’a’itera’a i tō rātou mau māna’ona’ora’a i te mau hoa fa’aro’o. ’E e nehenehe ’oe e rave hau atu i te reira. E nehenehe ’oe e fa’auru i te mau pīahi ato’a ’ia tauturu mai ia ’oe ’ia fa’atupu i te hō’ē vāhi i reira te ha’api’ira’a tumu e ha’api’ihia ai, ma te hō’ē vārua fa’atura, te rirora’a ’e te here.

Te mau uira’a e feruri : E aha te mea e tauturu i te hō’ē ta’ata ’ia ’ite tē fa’aturahia ra ’e tē ha’afaufa’ahia ra ’oia ? E aha te mea e fa’auru i te hō’ē ta’ata ’ia fa’atura ’e ’ia ha’afaufa’a ia vetahi ’ē ? ’A feruri ai ’oe nā roto i te pure nō ni’a i te mau ta’ata tā ’oe e ha’api’i ra, e aha tei fa’auruhia ia ’oe e rave ’ia ’ite rātou ē, tē fāri’i-poupou-hia nei rātou pā’āto’a ’e e hina’arohia rātou ?

Nō roto mai i te mau pāpa’ira’a mo’a : Ioane 4 ; 2 Nephi 26:27–28, 33 ; Alama 1:26 ; 3 Nephi 18:22–25

metua tāne e ha’api’i ra i te mau tamari’i

E nehenehe te mau ’orometua ha’api’i e tauturu i te feiā tā rātou e ha’api’i ra ’ia ’ite ’ua herehia rātou.

’Ua fa’a’ite te Fa’aora i tōna here i te feiā tāna i ha’api’i

I te hope’a o te hō’ē mahana fa’ahiahia ’e te maita’i o te ha’api’ira’a ’e te aupurura’a i rotopū i te mau ’āti Nephi, ’ua ’ite atu ra Iesu ē, ’ua tae te taime nōna ’ia haere. E mau ta’ata ’ē fa’ahou tāna e haere e fārerei. « ’A haere ’oe i tō ’oe mau ’utuāfare », ’ua parau ’oia, « ’e ’a fa’aineine i tō ’oe mana’o nō ananahi ». Terā rā, ’ua pārahi noa te mau ta’ata i reira « ma te roimata », ma te hi’o « pāpū i ni’a iāna mai te huru ra ē, tē ani ra rātou iāna ’ia pārahi ri’i mai ā i pīha’i iho ia rātou ». Te ’itera’a ’oia i tō rātou hina’aro muhu, ’ua « ’ī ’oia i te aroha nō rātou », ’ua parahi ri’i mai ā o Iesu (3 Nephi 17:3, 5–6). ’Ua ha’amaita’i ’oia i tō rātou feiā ma’i ’e tei ’ati. ’Ua tuturi iho ra ’oia i raro ’e ’ua pure a’e ra ’e o rātou ra. ’Ua ’oto ’oia ’e o rātou, ’e ’ua ’oa’oa ’oia ’e o rātou.

’A feruri ’ia tuatāpapa nā roto i te pure i te mau parau ’e te mau ’ohipa a te Fa’aora i roto i te 3 Nephi 17. ’A feruri i te here tāna i fa’a’ite i te feiā tāna i ha’api’i. ’A ’imi i te mau fa’a’itera’a nō tōna here i roto i te tahi atu mau vāhi i roto i te mau pāpa’ira’a mo’a. I muri iho ’a feruri i te mau ta’ata tā ’oe e ha’api’i ra. Nāhea ’oe i te fa’a’ite maita’i atu i te here ia rātou ? Vaiiho i te Vārua ’ia arata’i ia ’oe. Mai te mea tē fifi nei ’oe ’ia fāri’i ’aore rā ’ia fa’a’ite i te here i te feiā tā ’oe e ha’api’i ra, ’a ha’amata nā roto i te fa’a’ite-pāpū-ra’a i te here o te Atua. I muri iho, « e pure atu i te Metua ma te pūai hope o te ’ā’au ’ia ’ī ’oe i [te aroha mau o te Mesia], o tāna i hō mai i te ta’ata ato’a e pe’e mai i tāna Tamaiti, ia Iesu Mesia » (Moroni 7:48). ’E ’a ha’amana’o ē, ’eiaha roa atu tō ’oe fifi nō te ha’api’i i te hō’ē ha’api’ira’a e tāpe’a ia ’oe ’ia fa’a’ite i tō ’oe here nā roto i tā ’oe mau parau ’e te mau ’ohipa. Mea pinepine, tā ’oe huru ravera’a i te mau ta’ata e mea faufa’a rahi ato’a, i te mea tā ’oe e ha’api’i nei ia rātou.

Te mau uira’a e feruri : Nāhea te Fa’aora i te tauturura’a ia ’oe ’ia ’ite i tōna here nō ’oe ? Nāhea te hō’ē metua ’aore rā te tahi atu ’orometua ha’api’i i te tauturura’a ia ’oe ’ia fāri’i i tōna here ? ’Ua ’ite ānei te mau ta’ata tā ’oe e ha’api’i ra ē, ’ua here ’oe ia rātou ? ’Ua ’ite ānei rātou ē, ’ua here te Fa’aora ia rātou ?

Nō roto mai i te mau pāpa’ira’a mo’a : Mareko 6:31–42 ; Ioane 13:3–16, 34–35 ; 15:12–13 ; 1 Korinetia 13:1–7 ; 1 Ioane 4:7–11

Te tahi mau rāve’a nō te fa’a’ohipa i te mea tā ’oe i ’apo mai

• Mai te mea tē ha’api’i nei ’oe i te hō’ē piha ha’api’ira’a, ’a ha’api’i mai i te i’oa o te mau pīahi ’e ’a fa’a’ohipa i te reira ’a ha’api’i ai ’outou.

• ’A fa’a’ite i tō ’oe māuruuru ’ia tauturu ana’e mai te mau pīahi.

• ’A rave i te ’ohipa ’e te mau pīahi nā mua a’e ’e i muri iho i tā ’oe ha’api’ira’a.

• Tauturu i te mau pīahi ’ia fa’atupu i te hō’ē vāhi nō te here ’e te fa’atura te tahi i te tahi.

• ’A fa’aro’o maita’i—’ia ha’api’i ana’e ’oe ’e i te tahi atu taime.

• ’A rave i te mau ’ohipa tāvinira’a nō te feiā tā ’oe e ha’api’i ra.

• ’Ia vai ineine noa nō te fa’atano i tā ’oe mau fa’anahora’a ha’api’ira’a, nō te rave rahi atu ā i taime i ni’a i te mau parau tumu faufa’a rahi nō te feiā tā ’oe e ha’api’i ra.