Te fā nō te Ha’api’ira’a mai tā te Fa’aora

E tauturu te mau parau tumu tei fa’ata’ahia i roto i teie buka i te mau ’orometua ha’api’i ’evanelia ato’a ’ia ha’api’i mai tā te Fa’aora. Tei roto ato’a ïa te mau metua, te mau taea’e ’e te mau tuahine aupuru, te mau misiōnare, te mau ’orometua séminaire ’e te institut, ’e te mau ta’ata ato’a e hōro’a tō rātou pi’ira’a i roto i te ’Ēkālesia i te rāve’a nō rātou ’ia ha’api’i.

E nehenehe ’oe e tuatāpapa i teie bukao ’oe ana’e ’aore rā, e fa’a’ohipa i te reira nō te arata’i i te mau ’āparaura’a e vetahi ’ē nō ni’a e nāhea ’ia riro ’ei ’orometua ha’api’i maita’i a’e. ’Ei hi’ora’a, e nehenehe teie mātēria e fa’a’ohipahia i roto i te mau purera’a pō ’utuāfare, te mau rurura’a peresidenira’a, te mau rurura’a ’āpo’ora’a pāroita ’aore rā titi, te mau rurura’a séminaire ’e institut, ’e te mau rurura’a ’āpo’ora’a ’orometua ha’api’i (hi’o « Nō te feiā fa’atere—Tauturu i te mau ’orometua ha’api’i ’ia manuia »).

E mea nāhea te fa’anahora’a o teie buka

Tē ha’apāpū nei te tuha’a 1 i te faufa’a rahi nō te fa’atumura’a i ni’a ia Iesu Mesia i te mau taime ato’a e ha’api’i tātou i te mau parau tumu o tāna ’evanelia. Tē fa’ata’a nei teie tuha’a i te mea tā tātou e ha’api’i.

Tē ha’apāpū nei te tuha’a 2 i te mau parau tumu nō te ha’api’ira’a mai te Mesia te huru. Tē fa’ata’a nei teie tuha’a nāhea tātou ’ia ha’api’i.

Tē hōro’a mai nei te tuha’a 3 i te mau mana’o nō te tauturu i te mau ’orometua ha’api’i ’ia fa’a’ohipa i te mau parau tumu nō te ha’api’ira’a mai te Mesia te huru.

Hi’ora’a rere ā manu nō te ha’api’ira’a i te ta’ata mai te Mesia te huru

E hōro’a mai te mau tāpura i muri nei i te hō’ē hi’ora’a rere ā manu nō te mau parau tumu i ha’api’ihia i roto i teie buka.

Hi’ora’a arata’i ha’api’ira’a