Akonaki ʻa e Kau Palesitení
Vahe 12: Vahehongofulú, ko ha Fono ki Hotau Maluʻí pea mo ‘Etau Fakalakalaká

Vahe 12

Vahehongofulú, ko ha Fono ki Hotau Maluʻí pea mo ‘Etau Fakalakalaká

“Ko e fono ‘o e vahehongofulú ko e mahuʻinga taha ia kuo faifaiangé pea fakahā ki he tangatá. … Tuʻunga ‘i he talangofua ki he fono ko ‘ení ‘e foaki leva ‘a e tāpuaki ‘o e tuʻumālié mo e ikuná ki he Kāingalotú.”

Mei he Moʻui ʻa Lolenisou Sinoú

‘I he konga ki muʻa ‘o Mē 1899, ne ongoʻi ai ‘e Palesiteni Sinou naʻe ueʻi ia ke ‘aʻahi ki he kolo Seni Siaosí mo ha ngaahi nofoʻanga kehe ‘i he fakatonga ‘o ‘Iutaá. Naʻá ne fokotuʻutuʻu fakavavevave leva ha falukunga kakai, kau ai mo ha kau Taki Māʻolunga, ke nau fakahoko ‘a e fononga lōloa ko ‘ení mo ia.

Ko e taimi naʻe fokotuʻutuʻu ai ‘e Palesiteni Sinou ‘a e fononga ko ‘ení, naʻe ‘ikai ke ne fakahā ‘e ia ki ha taha pe ko e hā ‘a e ‘uhinga ‘oku nau ō aí—naʻa mo ia naʻe ‘ikai ke ne ‘ilo ‘a e ‘uhingá. Naʻá ne pehē ki mui ange, “Ko e taimi naʻa mau mavahe ai mei Sōleki Sití, naʻe ‘ikai ke mau ‘iloʻi ‘a e ‘uhinga ‘o ‘emau ‘aʻahi ki he ngaahi nofoʻanga ‘i he fakatongá.”1 Ka ‘i he ‘aho 17 ‘o Meé, hili pē ia e aʻu atu ‘a e kau fonongá ki Seni Siaosí, naʻe “fakahā mahino” mai ‘a e finangalo ‘o e ‘Eikí ki Heʻene palōfitá.2 ‘I ha fakataha naʻe fakahoko ‘i he ‘aho 18 ‘o Mē 1899, naʻe fakahā ai ‘e Palesiteni Sinou:

“Ko e folofola ‘a e ‘Eikí kiate kimoutolu, ko hoku ngaahi tokoua mo e tuofāfiné, ‘oku totonu ke mou loto ki he meʻa ‘oku fie maʻu meiate kimoutolu ko e kakai ‘oku toka ai ‘a e ‘amanaki lelei ‘o e hākeakiʻí mo e nāunaú. Ko e hā ia? Ko e hā hono ʻuhinga ʻoku hoko ai ia ko ha faʻahinga meʻa ke toutou fakaongo atu ki homou telingá mei he taimi ki he taimi kae ‘oua mahalo kuo mou fiu he fanongo ki aí. … “Ko e folofola ʻa e ʻEikí kiate kimoutolú ʻoku ʻikai ko ha meʻa foʻou; ko ʻeni ia: KUO HOKOSIA ʻA E TAIMI KI HE TAHA KOTOA PĒ ʻI HE KĀINGALOTU ʻO E NGAAHI ʻAHO KIMUI NÍ, ʻOKU HOLI KE MATEUTEU KI HE KAHAʻÚ PEA MO FOKOTUʻU MAʻU HONO VAʻÉ ʻI HA FAKAVAʻE ʻOKU TOTONÚ, KE NE FAKAHOKO ʻA E FINANGALO ʻO E ʻEIKÍ PEA MO TOTONGI KAKATO ʻENE VAHEHONGOFULÚ. Ko e folofola ia ʻa e ʻEikí kiate kimoutolú, pea ʻe hoko ia ko e folofola ʻa e ʻEikí ki he ngaahi nofoʻanga kotoa pē ʻi he fonua ʻo Saioné kotoa.” Ka hili haʻaku mavahe meiate kimoutolu pea mou fakakaukauʻi ‘a e meʻá ni, te mou fakatokangaʻi kuo hokosia ‘a e taimi ‘oku totonu ai ke tuʻu ‘a e tangata kotoa pē ‘o totongi kakato ‘ene vahehongofulú. Kuo tāpuekina kitautolu ‘e he ‘Eikí mo ‘aloʻofa kiate kitautolu ‘i he kuo hilí; ka ‘e hokosia mai ha taimi ‘e fie maʻu ai kitautolu ‘e he ‘Eikí ke tau fakahoko e meʻa kuó Ne fekaú kae ‘oua ‘e toe toloi. Ko e meʻa ‘oku ou leaʻaki kiate kimoutolu ‘i he Siteiki ko ‘eni ‘o Saioné te u leaʻaki ia ki he Siteiki kotoa pē ‘o Saione kuo ‘osi fokotuʻú. He ‘ikai ha tangata pe fefine ‘oku fanongo mai he taimí ni ki he meʻa ‘oku ou leaʻakí te ne ongoʻi fiemālie kapau he ‘ikai ke totongi vahehongofulu kakato.”3

‘I he ngaahi taʻu ‘e 50 ki muʻa ‘o ‘ene hoko ko e ‘Aposetoló, naʻe hāhāmolofia ke leaʻaki ‘e Palesiteni Sinou ‘a e fono ‘o e vahehongofulú ‘i haʻane malanga. Naʻe liliu ‘eni ‘i Seni Siaosi ‘i ‘Iutā, koeʻuhí ko e fakahā naʻá ne maʻú. Naʻá ne pehē ki mui ai, “Naʻe teʻeki ai ke u maʻu ha fakahā ‘e toe haohaoa ange ‘i he [fakahā] naʻá ku maʻu ‘i he kaveinga ‘o e vahehongofulú.”4 Mei Seni Siaosí, naʻe fononga leva hono kaungā fonongá mei he kolo ki he kolo ‘i he fakatonga ‘o ‘Iutaá ‘i heʻenau fononga foki ki Sōleki Sití, ‘o nau fakahoko ai ha ngaahi fakataha ‘e 24. Naʻe fakahoko ai ‘e Palesiteni Sinou ha malanga ‘e 26. Pea ko e taimi kotoa pē naʻe lea ai, naʻá ne faleʻi ‘a e Kāingalotú ke nau talangofua ki he fono ‘o e vahehongofulú.

Naʻe foki mai ‘a e kau fonongá ki Sōleki Siti ‘i he ‘aho 27 ‘o Meé. Naʻe pehē ‘e ha taha faiongoongo he nusipepá, “Naʻe hā ngali mālohi ange ‘a e Palesitení he ‘ahó ni ‘i he ‘aho ko ia naʻe mavahe ai mei Sōlekí.” ‘I heʻene tali ki he fakamatala ko ia naʻe pehē naʻá ne “kātakiʻi lelei ‘a e fonongá,” naʻe pehē ‘e he palōfita taʻu 85 ni: “ʻIo, ko ‘enau laú kotoa ia. … Kuo fakahoko ‘e he fonongá ha lelei maʻaku. Kuo teʻeki ke u ongoʻi lelei ange ‘i heʻeku moʻuí. ‘Oku ou ongoʻi ‘oku poupouʻi au ‘e he ‘Eikí ko ha tali ‘o e ngaahi lotu ‘a e Kāingalotú.”5

Makehe mei heʻene fakamatala ki heʻene moʻui leleí, naʻá ne toe fakamatala ‘a ‘ene ongo fekauʻaki mo e tui pea mo e angatonu ‘a e Kāingalotu ‘i he fakatonga ‘o ‘Iutaá. Naʻá ne pehē naʻe talitali lelei ia mo hono kau fonongá “ʻaki e ngaahi fakafōtunga māfana taha ‘o e fiefiá pea mo e houngaʻiá.”6 Naʻá ne pehē ko e taimi naʻá ne faleʻi ai ‘a e Kāingalotú ke nau talangofua ki he fono ‘o e vahehongofulú, “naʻe nofoʻia ‘e he Laumālie ‘o e ‘Eikí ‘a e kakaí, pea naʻa nau fiefia lahi fau, mo nau fakapapau ‘i honau lotó te nau tauhi ‘a e tefitoʻi moʻoni ko ‘ení ki he taupotu tahá pea ‘i hono laumālié.”7 Naʻá ne pehē ‘i haʻane tali ha fehuʻi fekauʻaki mo e tuʻunga fakalūkufua ‘o e kakaí: “ʻOku nau nofo ‘i ha ngaahi ‘api lelei, ‘oku nau vala lelei, pea ngali ‘o hangē ‘oku lahi ‘enau maʻu ‘a e ngaahi meʻa lelei ‘o e māmaní ke nau kai mo inu. ‘Oku tofanga ‘a e kakai ‘i he Siteiki Seni Siaosí ‘i ha laʻalaʻā lahi, ko e kovi taha kuo tō ki he fonuá, ka ‘oku nau maʻu ha tui ‘e vavé ni pē haʻane ‘uha.”8

‘I he ‘aho 29 mo 30 ‘o Meé, naʻe fakahoko ai ‘e Palesiteni Sinou ha malanga ‘e ua ‘i he fono ‘o e vahehongofulú, ‘uluakí ki he kau ‘ōfisa ‘o e Mutuale ‘a e Kau Finemuí (Mutual Improvement Association) pea toki hoko ‘a e kau ‘ōfisa ‘i he Mutuale ‘a e Kau Talavoú.9 ‘I he fakaʻosi ‘o ‘ene malanga hono uá, ne fokotuʻu leva ‘e ‘Eletā B. H. Lōpeti (Roberts) ‘o e Kau Fitungofulú ‘a e tukupā ko ‘ení, ‘a ia naʻe poupouʻi ia ‘i he lototaha ‘a kinautolu kotoa naʻe ‘i aí: “Tukupā: Ke tau tali ‘a e tokāteline ‘o e vahehongofulú, hangē ko hono fakamatala atu ko ‘eni ‘e Palesiteni Sinoú, ko e folofola pea mo e finangalo lolotonga ia ‘o e ‘Eikí kiate kitautolú, pea ‘oku tau tali ‘aki ia hotau lotó kotoa; te tau tauhi ia ‘e kitautolu, pea te tau fai ‘a e meʻa kotoa pē ‘i hotau mālohí ke ‘ai ‘a e Kāingalotu ‘o e Ngaahi ‘Aho Kimui Ní ke nau fai pehē.”10 ‘I he ‘aho 2 ‘o Siulaí, naʻe kau ai ‘a e Kau Taki Māʻolungá mo e kau fakafofonga kotoa pē mei he ngaahi siteikí mo e ngaahi uooti ‘i he Siasí ki ha fakataha mamalu ‘i he Temipale Sōlekí, hili ia haʻanau ‘aukai mo lotu ‘o teuteu mai ki he fakatahá ni. Naʻa nau tali ‘i he lototaha he fakatahá ‘a e tukupā tatau.11 Naʻe fai pau ‘a Palesiteni Sinou ki he tukupā ko ‘ení, ‘o ne akoʻi ‘a e fono ‘o e vahehongofulú ‘i ha ngaahi siteiki lahi pea mo tokangaʻi ‘a e ngāue tatau ne fakahoko ‘e he toenga ‘o e kau takí.

Hili ha ngaahi māhina mei he ‘aʻahi ‘a Palesiteni Sinou ki he fakatonga ‘o ‘Iutaá, kuó ne maʻu ha tala ‘o e toe tukupā ‘a e Kāingalotu ‘o e Ngaahi ‘Aho Kimui Ní ke talangofua ki he fono ‘o e vahehongofulú. Naʻe ‘oange ‘e he ongoongó ni kiate ia “ʻa e fiefia mo e fakafiemālie lahi tahá,”12 koeʻuhí he naʻá ne ‘ilo ‘e makatuʻunga ‘i ha talangofua taʻe-tuku ki he fonó ni, ha lilingi mai ‘a e “ngaahi tāpuaki ‘a e Fungani Māfimafí ki he kakaí ni, pea ‘e fakalakalaka “mālohi mo vave” ‘a e Siasí ‘i ha tuʻunga kuo teʻeki ai aʻusia ki muʻa.”13

Naʻe toutou fakapapauʻi ‘e Palesiteni Sinou ki he Kāingalotú ‘e tāpuekina fakafoʻituitui kinautolu, fakatuʻasino mo fakalaumālie fakatouʻosi, ‘i heʻenau talangofua ki he fono ‘o e vahehongofulú.14 Naʻe fakahoko ha konga ‘o e palōmesí ‘i ‘Aokosi 1899, ‘i he taimi ne maʻu ai ‘e he kakai ‘o Seni Siaosí ha fakanonga fakataimi mei heʻenau laʻalaʻaá; naʻe fakapaleʻi ‘enau tuí ‘aki ha ‘uha ‘inisi ‘e 2.93, ‘o laka ange ia ‘i he ‘uha ne nau maʻu ‘i he māhina fakakātoa ‘e 13 ki muʻá.15 Naʻe toe palōmesi ange foki ‘a Palesiteni Sinou ‘e hanga ‘e he talangofua ki he fono ‘o e vahehongofulú ‘o ‘omai ha ngaahi tāpuaki ki he Siasí fakakātoa. Naʻá ne ongoʻi fakapapau ‘e lava ‘e he vahehongofulu ‘a e kakai faivelengá ‘o fakatauʻatāinaʻi ‘a e Siasí mei hono ngaahi moʻuá, ‘a ia naʻe ‘uhinga lahi taha ‘ene hokó mei he fakatangá.16 Naʻe fakahoko ‘a e palōmesi ko ‘ení ‘i he 1906, ‘osi ia ha taʻu ‘e nima mei heʻene pekiá. ‘I he konifelenisi lahi ‘o ‘Epeleli 1907, naʻe fakahā ai ‘e Palesiteni Siosefa F. Sāmita:

“ʻOku ou tui kuo teʻeki ai ha taimi ‘i he hisitōlia ‘o e Siasí, naʻe tauhi fakakātoa mo totonu ange ai ‘a e fono ‘o e vahehongofulú ‘o hangē ko ia ne fai ‘e he Kāingalotu ‘o e Ngaahi ‘Aho Kimui Ní. Ne fakalaka e vahehongofulu ‘a e kakaí he lolotonga ‘o e 1906, ‘i he vahehongofulu ‘o ha toe taʻu. Ko ha fakaʻilonga lelei ‘eni ‘oku fakahoko ‘e he Kāingalotu ‘i he Ngaahi ‘Aho Kimui Ní honau fatongiá, ‘oku nau tui ki he Ongoongoleleí, ‘oku nau loto fiemālie ke tauhi e ngaahi fekau ‘a e ‘Otuá, pea ‘oku nau moʻui faivelenga ‘aki ia ‘i ha toe taimi ki muʻa. ‘Oku ou toe fie lea atu ‘i ha meʻa ‘e taha kiate kimoutolu, pea ‘oku ou fai ia ‘i ha founga ‘o e fakamālōʻia, kuo tau lava, ‘i he tāpuaki ‘a e ‘Eikí pea mo e faivelenga ‘a e Kāingalotú ‘i he totongi ‘enau vahehongofulú, ke totongi hotau moʻuá. Ko e ‘aho ní ‘oku ‘ikai ke moʻua ‘aki ‘e he Siasi ‘o Sīsū Kalaisi ‘o e Kau Māʻoniʻoni ‘i he Ngaahi ‘Aho Kimui Ní ha paʻanga ‘e taha ‘o ‘ikai taʻe-totongi ia he taimi pē ko iá. Kuo fāifai pea kuo tau ‘i ha tuʻunga te tau lava ai ‘o totongi taʻe-fai ha fakamoʻua. ‘Oku ‘ikai fie maʻu ke tau toe fakamoʻua, pea he ‘ikai ke tau toe fai pehē kapau ʻe hokohoko atu ‘a e Kāingalotu ‘i he Ngaahi ‘Aho Kimui Ní hono moʻui ‘aki ‘enau tui fakalotú mo tauhi ‘a e fono ‘o e vahehongofulú.”17 [Vakai, fokotuʻu fika 1 he peesi 184.]

Ngaahi Akonaki ʻa Lolenisou Sinoú

‘Oku faingofua pē fono ‘o e vahehongofulú ke mahino pea mo talangofua ki ai ‘a e taha kotoa.

‘Oku ou kole kiate kimoutolu ‘i he huafa ‘o e ‘Eikí, pea ‘oku ou fakatauange ko e tangata mo e fefine pea mo e fānau kotoa pē … te nau totongi ha vahehongofulu ‘e taha ‘o ‘enau koloa hū maí ko ha vahehongofulu.18

‘Oku ‘ikai ko ha fono faingataʻa ‘a e [vahehongofulú]. … Kapau ‘oku maʻu ‘e ha taha ha paʻanga ‘e hongofulu, ko ‘ene vahehongofulú ko e paʻanga ‘e taha; kapau ‘okú ne maʻu ha paʻanga ‘e teau, ko ‘ene vahehongofulú ko e paʻanga ‘e hongofulu. … ‘Oku faingofua ‘aupito ke mahino.19

[Mahalo ‘e fehuʻi ‘e ha taha kiate ia pē] Ko e hā ha lahi ‘o e vahehongofulu ko ‘ení te u ‘avé? ‘E ‘ikai ‘apē ke u lava ‘o tauhi hano konga maʻaku? ‘Oku mātuʻaki tuʻumālie pē ‘Eikí ia pea ‘oku ‘ikai ke u tui ‘e faingataʻaʻia kapau te u tuku hano kiʻi konga maʻaku; pea ko ia ‘oku tuku ai ha kiʻi konga maʻa ha taha. Ka ko e kihiʻi konga ko ia ‘oku tukú te ne fakafaingataʻaʻiaʻi ‘a e tangata ko iá, kapau ‘oku tatau hono konisēnisí mo e konisēnisi ‘o e tokolahi taha ‘o e Kāingalotu ‘i he Ngaahi ‘Aho Kimui Ní. Te ne fakahohaʻasi ia ‘i he lolotonga ‘o e ‘ahó, pea mo e taimi ‘e fakakaukau ai ki ai ‘i he poʻulí. ‘Oku ‘ikai ke ne maʻu ‘a e fiefia ko ē ʻoku totonu ke maʻú— ‘oku mole ia meiate ia.20

‘Oku ‘ikai ko ha vahehongofulu ‘a e konga pē ‘o e vahehongofulú, ‘o tatau pē ia mo hano fakauku fakakonga ha sino ‘o ha taha ‘oku ‘ikai ko ha papitaiso ia.21

‘Oku ‘ikai ha tangata ia pe fefine te ne taʻe-lava ke totongi ha vahe hongofulu ‘e taha ‘o e meʻa ‘okú ne maʻu maí.22

Ngaahi tokoua mo e tuofāfine, ‘oku mau fie maʻu ke mou ‘ai ‘eni ko ha kaveinga ke mou lotuʻi. … ‘Oku totonu ke tau totongi ‘etau vahehongofulú, kae ‘oua ʻe puke ‘a e ngaahi fakakaukau taʻe-totonú ‘o hangē ko ha niʻihi fekauʻaki mo e paʻangá, ‘oku totonu ke tau totongi ‘etau vahehongofulú. … Ko e meʻa ‘oku fie maʻu ‘e he ‘Eikí meiate kitautolú ke totongi ‘etau vahehongofulú he taimí ni. Pea ‘okú ne fie maʻu ‘a e taha kotoa pē ‘i he kahaʻú ke totongi ‘ene vahehongofulú. ‘Oku tau ‘ilo ‘a e meʻa ko e vahehongofulu ‘e tahá; tau totongi ia ki he ‘Eikí. Pea te tau toki lava leva ‘o fehangahangai mo e Pīsopé ‘i he faitotonu kakato ‘o kole ha lekomeni ke tau ō ki he temipalé.23

Te u pehē kiate kimoutolu ‘i he huafa ‘o e ‘Eiki ko e ‘Otua ‘o ‘Isilelí, kapau te mou totongi vahehongofulu mei he taimí ni ‘o fāi atu, ‘e fakamolemoleʻi ko e ‘e he ‘Eikí ‘i he [taʻe-totongi] kotoa ‘o hoʻo vahehongofulú he kuo hilí pea ‘e lilingi mai ‘a e ngaahi tāpuaki ‘a e Fungani Māfimafí ki he kakaí ni.24

‘Oku ou loto ke nofo maʻu ‘a e tefitoʻi moʻoni ko ‘ení ‘i homou lotó ke ‘oua naʻa toe teitei ngalo ‘iate kitautolu. Kuo tuʻo lahi haʻaku faʻa pehē, ‘oku ou ‘ilo ‘e fakamolemoleʻi ‘e he ‘Eikí ‘a e Kāingalotu ‘i he Ngaahi ‘Aho Kimui Ní ‘i heʻenau taʻe-tokanga ke totongi ‘enau vahehongofulú he kuo hilí, kapau te nau fakatomala he taimí ni pea totongi kakato moʻoni ‘enau vahehongofulú mei he taimí ni ‘o fāi atu.25 [Vakai, fokotuʻu fika 2 he peesi 184.]

Ko e taimi ‘oku tau totongi vahehongofulu aí, ‘oku tau tokoni ki he ngāue ‘o e Siasí

He ‘ikai ke lava ‘a e Siasí ‘o hoko atu kae ‘oua kuo ‘i ai ha paʻanga hū mai, pea ko e paʻanga hū mai ko ‘eni ‘oku foaki mai ia ‘e he ‘Otuá [‘i he fono ‘o e vahehongofulú]. ‘Oku langa hotau ngaahi temipale, ko ia ‘oku tau maʻu ai ‘a e ngaahi tāpuaki fungani taha kuo faifaiangé pea foaki ki he tangata fakamatelié, ‘aki e paʻanga hū maí. Naʻe ‘ikai ke tau mei lava ‘o ‘oatu ‘a e … kau ‘Eletaá ki he māmaní ke nau malangaʻi ‘a e Ongoongoleleí, ‘o hangē ko ia ‘oku tau fai he taimi ní, ka ne ‘ikai ha paʻanga hū mai ke fakahoko ‘aki ia. … Pea ‘oku ‘i ai mo ha ngaahi meʻa kehe ‘e lauiafe ‘oku hoko maʻu pē ‘e fie maʻu ai ‘a e paʻangá. …

Kapau naʻe taʻe-totongi vahehongofulu ha niʻihi ‘o e Kāingalotu ‘i he Ngaahi ‘Aho Kimui Ní naʻe ‘ikai ke mei lava ‘o langa hotau ngaahi Temipalé ʻe fā ko ‘ení [‘i he 1899], pea naʻe ‘ikai ke mei lava ‘o tauhi ‘a e ngaahi fakamaau mo e ngaahi tuʻutuʻuni ‘a e ‘Otuá fekauʻaki mo e hākeakiʻí mo e nāunaú. Ko e ‘uluaki tefitoʻi moʻoni ke ngāueʻi ‘e he Kāingalotu ‘o e Ngaahi ‘Aho Kimui Ní ko hono fakamāʻoniʻoniʻi ‘a e fonuá ‘aki hono tauhi e fono ko ‘eni ‘o e vahehongofulú pea fokotuʻu ai kinautolu ‘i ha tuʻunga te nau lava ‘o maʻu ‘a e ngaahi ouau fekauʻaki mo e hākeakiʻi mo e nāunau ‘o hotau kau pekiá.26 [Vakai, fokotuʻu fika 3 he peesi 184.]

‘E tāpuakiʻi fakatuʻasino mo fakalaumālie kitautolu ‘e he ‘Eikí ‘i heʻetau talangofua ki he fono ‘o e vahehongofulú.

Ko e fono ‘o e vahehongofulú ko e mahuʻinga taha ia kuo faifaiangé pea fakahā ki he tangatá. … Tuʻunga ‘i he talangofua ki he fono ko ‘ení ‘e foaki leva ‘a e tāpuaki ‘o e tuʻumālié mo e ikuná ki he Kāingalotú.27

Kapau te tau tauhi ‘a e fonó … ‘e fakamāʻoniʻoniʻi ‘a e fonuá, pea ‘e lau ‘oku tau taau ke maʻu ‘a e ngaahi tāpuaki ‘a e ‘Eikí pea ‘e poupouʻi mo langomaki kitautolu ‘i heʻetau ngaahi meʻa fakapaʻangá pea ‘i he meʻa kotoa pē ‘oku tau fai, fakatuʻasino mo fakalaumālie fakatouʻosi.28

Ko e fakamoʻui fakatuʻasino ‘o e Siasi ko ‘ení … ‘oku fakafalala ia ki he talangofua ki he fono ko ‘ení.29

‘Oku ‘i he Kāingalotu ‘o e Ngaahi ‘Aho Kimui Ní ‘a e masivá, pea ‘e kei ‘i ai maʻu pē kae ‘oua kuo tau talangofua ki he fono ‘o e vahehongofulú.30

‘Oku ou tui moʻoni kapau ‘e talangofua ‘a e Kāingalotu ‘o e Ngaahi ‘Aho Kimui Ní ki he fono ko ‘ení te tau lava ‘o ‘ekeʻi ha fakatauʻatāina mei he kovi kotoa pē ‘e ala tō mai.31

Ko ha fono ‘eni naʻe fakahā mai ‘ataʻatā pē ki hotau maluʻí pea mo tau hao, pea pehē foki ke tau fakalakalaka ai ‘i he hala ki he angatonú pea mo e māʻoniʻoní; ko ha fono ‘e lava ai ‘a e fonua ‘oku tau nofo aí ‘o fakamāʻoniʻoniʻi; ko ha fono ‘e ala langa ai ‘a Saione pea mo fokotuʻu ke ‘oua naʻa toe holoki pe ‘e toʻo mei hono tuʻuʻangá ‘e he kau angahalá mo e kau tangata anga taʻe-faka‘otuá.32

‘Oku ‘i ai hotau ngaahi temipale, pea ‘oku tau maʻu ha ngaahi tāpuaki fekauʻaki mo kinautolu, ‘o aʻu ki he ngaahi ouau māʻolunga taha kuo foaki ki he tangatá he māmaní, tuʻunga ‘i heʻetau talangofua ki he fonó ni.33

He ‘ikai ke tau teitei lava ‘o mateuteu ke mamata ki he fofonga ‘o e ‘Otuá kae ‘oua kuo tau faivelenga ‘i hono totongi ‘o e vahehongofulú mo e ngaahi fatongia kehé.34

Kuó u lea mahino, pea te u pehē ‘oku haʻu mei he ‘Eikí ‘a e meʻa ne u lea atu ‘aki fekauʻaki mo e vahehongofulú. Mou ngāue he taimí ni ‘o fakatatau mo e Laumālie ‘o e ‘Eikí, pea ‘e fakaʻā homou matá.35 [Vakai, fokotuʻu fika 4 he peesi 184.]

‘Oku maʻu ‘e he mātuʻá mo e kau faiakó ‘a e fatongia ke totongi vahehongofulu pea mo akoʻi ‘a e fānaú ke nau fai e meʻa tatau.

Akoʻi e [fānaú] ke totongi ‘enau vahehongofulú ‘i heʻenau kei siʻí. Ko kimoutolu ngaahi faʻeé, akoʻi hoʻomou fānaú ko e taimi ‘e maʻu ai haʻanau paʻangá ‘oku totonu ke nau totongi ha vahe-hongofulu ‘e taha ‘o ia ki he ‘Eikí, neongo pe ko e hā hano siʻisiʻi. Akoʻi kinautolu ke totongi kakato ‘enau vahehongofulú.36

‘Oku totonu mo taau … ke maʻu ‘e he kau ‘ōfisa mo e kau faiako [‘i he Siasí] ‘i honau lotó pea mo ‘enau moʻuí ‘a e laumālie ‘o e fonó ni, koeʻuhí ka nau feʻunga kakato ke fakamamafaʻi ‘a e meʻa tatau, pea mo fakalotoa ‘a e toʻu tangata ‘oku ‘alu haké ‘i hono mahuʻingá mo hono toputapú. ‘Oku fie maʻu ‘eni meiate kimoutolu, ngaahi tokoua mo e tuofāfine, ke ‘oua naʻa ngata pē ‘i hoʻomou talangofua ki he fonó, ka ke mou toe akoʻi ia ki he kakai kehé, ‘o aʻu ki he toʻu tangata ‘oku ‘alu haké, … pea fakatatau mo hoʻomou lava ke maʻu ‘a hono laumālié, te mou lava leva ke fakamatalaʻi mo akoʻi ia. …

… ‘Oku ou fie maʻu ia ‘iate kimoutolu, ‘o ‘ikai ke talangofua pē ki ai, ka ke akoʻi ia ki he fānau ‘a e Kāingalotu ‘i he Ngaahi ‘Aho Kimui Ní, pea mo fakatōkakano ia ki honau ‘atamaí, koeʻuhí ka nau ka tupu ‘o aʻu ki he taʻu ‘oku ala fakamāua ai kinautolú, ‘e lava ke pehē naʻe akoʻi ia kiate kinautolu, pea naʻa nau talangofua ki ai talu mei heʻenau kei īkí.37 [Vakai, fokotuʻu fika 5 he peesi 184.]

Ngaahi Fokotuʻu ki Hono Akó mo Hono Akoʻí

Fakakaukauʻi ʻa e ngaahi meʻá ni ʻi hoʻo ako ʻa e vahé pe teuteu ke faiakó. Ke maʻu ha tokoni lahi ange, vakai, peesi vii–x.

  1. Toe fakamanatu e fakamatala ‘o e maʻu ‘e Palesiteni Sinou e fakahā fekauʻaki mo e vahehongofulú (peesi 175–79). Fakakaukau ki heʻene loto fiemālie ke fononga ki Seni Siaosí pea mo e mateuteu ‘a e kakaí ke talangofua ki he fono ‘o e vahehongofulú. Ko e hā ha meʻa te tau lava ‘o maʻu mei he fakamatala ko ‘ení?

  2. Ko e hā ha ngaahi founga ‘oku hoko ai ‘a e vahehongofulú ko ha “fono ‘oku ‘ikai faingataʻa”? (Ke maʻu ha ngaahi sīpinga, vakai, peesi –81.) Ko e hā nai ha ‘uhinga ‘e fakakaukau ai ha kakai ia ‘e niʻihi ko e fono ‘o e vahehongofulú ‘oku faingataʻa ke talangofua ki ai? ‘E anga fēfē ha tokoni e ngaahi akonaki ‘a Palesiteni Sinoú ki ha taha ke ne maʻu ha fakamoʻoni ki he totongi vahehongofulú?

  3. Ako ‘a e konga ‘uluaki ‘oku kamata ‘i he peesi 181. Ko e hā ha ngaahi tāpuaki kuó ke maʻu mo ho ngaahi ‘ofaʻangá tuʻunga ‘i he ngaahi langa pea mo e ngaahi polokalama ‘oku fakapaʻanga ‘aki e vahehongofulú? Ko e hā ‘oku hoko ai e totongi vahehongofulú ko ha faingamālié?

  4. Naʻe fakamoʻoni ‘a Palesiteni Sinou ‘e tāpuakiʻi kitautolu ‘i heʻetau talangofua ki he fono ‘o e vahehongofulú (peesi –83). Ko e hā ha ngaahi tāpuaki kuo ‘omi ‘e he fono ‘o e vahehongofulú ki hoʻo moʻuí? ki he moʻui ‘a e kau mēmipa ho fāmilí mo e kaungāmeʻá?

  5. Fakakaukauʻi ‘a e faleʻi ‘a Palesiteni Sinou ki he mātuʻá pea mo e kau faiakó (peesi 183). ‘Okú ke pehē ko e hā ‘oku mahuʻinga ai ki he fānaú ke totongi ‘enau vahehongofulú, “neongo pe ko e hā haʻane siʻisiʻi”? Ko e hā ha ngaahi founga ke akoʻi ai ‘a e fānaú ke nau totongi vahehongofulu mo e ngaahi foaki kehé?

Ngaahi Potufolofola Fekauʻakí: Malakai 3:8–10; T&F 64:23; 119:1–7

Tokoni Fakafaiako: “Tokanga ke ‘oua naʻá ke fakangata vave ha fealēleaʻaki lelei koeʻuhí ka ke fakahoko kotoa e ngaahi meʻa kuó ke teuteú. Neongo ‘oku mahuʻinga ke fakahoko kotoa e lēsoní, ka ‘oku mahuʻinga ange ke tokoniʻi e kau akó ke nau ongoʻi e mālohi ‘o e Laumālié, tali ‘enau ngaahi fehuʻí, fakatupulaki ‘enau mahino ki he ongoongoleleí pea mo fakamālohia ‘enau tukupā ke tauhi e ngaahi fekaú. (ʻOku ʻIkai ha Ui ʻe Mahuʻinga Ange ʻi he Faiakó, 71).

Maʻuʻanga Fakamatalá

  1. ‘I he “In Juab and Millard Stakes,” Deseret Evening News, ‘Aho 29 ‘o Mē 1899, 5.

  2. ‘I he “In Juab and Millard Stakes,” 5.

  3. Millennial Star, ‘Aho 24 ‘o ‘Aokosi 1899, 532–33; vakai foki, Deseret Evening News, ‘Aho 17 ‘o Mē 1899, 2; Deseret Evening News, ‘Aho 18 ‘o Mē 1899, 2. ‘Oku pehē ‘e he Millennial Star naʻe fakahoko ‘e Palesiteni Sinou ‘a e malanga ko ‘ení ‘i he ‘aho 8 ‘o Meé, ka ‘oku fakahaaʻi ‘e he ngaahi maʻuʻanga fakamatala fakamuimui tahá naʻá ne fakahoko ia ‘i he ‘aho 18 ‘o Meé. Naʻe toe lea foki ‘a Palesiteni Sinou fekauʻaki mo e vahehongofulú ‘i he ‘aho 17 ‘o Meé.

  4. ‘I he “President Snow in Cache Valley,” Deseret Evening News, ‘Aho 7 ‘o ‘Aokosi 1899, 1.

  5. ‘I he “Pres. Snow Is Home Again,” Deseret Evening News, ‘Aho 27 ‘o Mē 1899, 1. Naʻe ‘i ai ha siteiki ‘e 40 ‘o e Siasí he taimi ko iá.

  6. ‘I he “Pres. Snow Is Home Again,” 1.

  7. Deseret Evening News, ‘Aho 24 ‘o Sune 1899, 3.

  8. ‘I he “Pres. Snow Is Home Again,” 1.

  9. Vakai, “The Annual Conference of the Young Menʻs and Young Ladiesʻ Mutual Improvement Associations,” Improvement Era, ‘Aokosi 1899, 792–95; vakai foki, Ann M. Cannon, “President Lorenzo Snowʻs Message on Tithing,” Young Womanʻs Journal, ‘Epeleli 1924, 184–86.

  10. B. H. Roberts, fakaʻaongaʻi ‘i he “The Annual Conference of the Young Menʻs and Young Ladiesʻ Mutual Improvement Associations,” 795.

  11. Vakai, B. H. Roberts, Comprehensive History of the Church, 6:359–60.

  12. ‘I he Conference Report, ‘Okatopa 1899, 28.

  13. ‘I he “President Snow in Cache Valley,” Deseret Evening News, ‘Aho 7 ‘o ‘Aokosi 1899, 2.

  14. Vakai, sīpinga ‘i he Deseret Evening News, ‘Aho 24 ‘o Sune 1899, 3. ‘Oku fakahaaʻi ‘e he lekooti ‘o e ngaahi malanga ‘a Palesiteni Sinoú pea mo e ngaahi fakamatala ‘i he nusipepá fekauʻaki mo ‘ene ngaahi fefonongaʻakí neongo naʻe palōmesi ki he Kāingalotú ‘e tāpuakiʻi fakatuʻasino pea mo fakalaumālie kinautolu ‘i heʻenau talangofua ki he fono ‘o e vahehongofulú, naʻe ‘ikai ke palōmesi ange ‘e ngata ‘a e laʻalaʻā ‘i he fakatonga ‘o ‘Iutaá.

  15. Vakai, Western Regional Climate Center, http://www.wrcc.dri.edu/cgi-bin/cliMONtpre.pl?utstge.

  16. Vakai, sīpinga ‘i he “The Annual Conference of the Young Menʻs and Young Ladiesʻ Mutual Improvement Associations,” 793.

  17. ‘I he Conference Report, ‘Epeleli 1907, 7.

  18. ‘I he Conference Report, ‘Okatopa 1899, 28.

  19. Deseret Semi-Weekly News, ‘Aho 28 ‘o Siulai 1899, 10.

  20. ‘I he Conference Report, ‘Epeleli 1899, 51.

  21. Deseret Evening News, ‘Aho 24 ‘o Sune 1899, 3.

  22. ‘I he “President Lorenzo Snowʻs Message on Tithing,” 185; mei he ngaahi miniti ‘o e fakataha naʻe fakahoko ‘i he Holo Fakatahaʻanga ‘i Sōleki Sití he ‘aho 29 ‘o Mē 1899.

  23. Deseret Semi-Weekly News, ‘Aho 28 ‘o Siulai 1899, 10.

  24. ‘I he “President Snow in Cache Valley,” 2.

  25. ‘I he Conference Report, ‘Okatopa 1899, 28.

  26. ‘I he Conference Report, ‘Okatopa 1899, 27–28.

  27. ‘I he “In Juab and Millard Stakes,” 5.

  28. Deseret Evening News, ‘Aho 24 ‘o Sune 1899, 3.

  29. ‘I he “The Annual Conference of the Young Menʻs and Young Ladiesʻ Mutual Improvement Associations,” 794.

  30. Deseret Semi-Weekly News, ‘Aho 28 ‘o Siulai 1899, 10.

  31. ‘I he “President Lorenzo Snowʻs Message on Tithing,” 185.

  32. “Tithing” Juvenile Instructor, ‘Epeleli 1901, 216.

  33. “Vahehongofulú,” 243.

  34. ‘I he “Conference of Granite Stake,” Deseret Evening News, ‘Aho 21 ‘o Mē 1900, 2; mei hono toe fakamatala fakaikiiki ‘o e malanga ‘a Palesiteni Sinou naʻe fai ‘i he konifelenisi ‘a e Siteiki Kalānité he ‘aho 20 ‘o Mē 1900.

  35. Deseret Semi-Weekly News, ‘Aho 28 ‘o Siulai 1899, 10.

  36. Millennial Star, ‘Aho 31 ‘o ‘Aokosi 1899, 546.

  37. “Vahehongofulú,” 243–44.

Ko e Tāpanekale Seni Siaosí. Naʻe fakahoko ‘e Palesiteni Lolenisou Sinou ‘i he falé ni ‘ene fuofua malanga ‘i he ngaahi malanga kotoa pē naʻá ne fakahoko he fono ‘o e vahehongofulú.

Naʻe faleʻi ‘e Palesiteni Sinou ‘a e mātuʻá mo e kau faiakó ke nau akoʻi e fānaú ke nau totongi vahehongofulu.

‘Oku fakaʻaongaʻi e paʻanga vahehongofulú ke tokoni ‘i hono totongi hono langa mo monomono e ngaahi temipalé.