Vahe 19

Vahe 19: Ngāue Fakafaifekaú: “Ke Aʻu ki he Loto ʻo e Tangata Kotoa”

“ʻOku ʻi ai ha founga ke aʻu ai ki he loto ʻo e tangata kotoa, pea ko ho ngafa ia ke kumi e founga ki he loto ʻo kinautolu kuo ui koe ki aí.”

Mei he Moʻui ʻa Lolenisou Sinoú

Naʻe papitaiso ʻa Lolenisou Sinou ʻi Ketilani ʻi ʻŌhaiō, ʻa ia ne ako ai ki he lea faka-Hepeluú ʻi ha kalasi mo e Palōfita ko Siosefa Sāmitá mo ha kau taki kehe ʻo e Siasí. Naʻá ne fakaʻamu te ne hoko atu ʻi ha ʻaho ʻi he “ako ki he kuonga muʻá” ʻi ha ʻunivēsiti he fakahahake ʻo e ʻIunaiteti Siteití.¹ Ka ʻi heʻene ngāue ki heʻene taumuʻá, naʻe kamata ke ne ongoʻi ʻoku fusi ia ki ha taumuʻa kehe. Naʻá ne fakamatala kimui ʻo pehē:

“Naʻá ku tali ʻa e [moʻoni ʻo e ongoongoleleí] ʻi ha loto hangamālie, pea naʻá ku fakapapau he ʻikai ke u ngata ai. … Ne u kamata ke hohaʻa ʻi he hili ʻeku maʻu e ʻilo fakaofo ko ʻení pe naʻe totonu nai ke u taʻe-fakamoʻoniʻi ia,. Ko e kau talavou naʻe fekau atu ke ngāue fakafaifekaú ne nau foki mai ʻo fakamoʻoniʻi e ngaahi tāpuaki kuo foaki ange kiate kinautolú … , pea kamata leva ke u fakakaukau, ʻoku totonu ke u kamata mo fai ha fakamoʻoni ki he meʻa kuo foaki kakato mai ʻe he ʻEikí ke u ʻiló, kae ʻoua te u teuteu ki ha kolisi pe ʻunivēsiti ʻi he hahaké. ʻI he taimi tatau pē, naʻe ʻikai ke u fie tukuange hoku faingamālie fakaakó, koeʻuhí he naʻá ku fakakaukauʻi ia ʻi ha taimi lahi, pea kuó u maʻu ʻeni ʻa e faingamālie mo e paʻanga ke fakahoko iá.”

ʻI heʻene fekuki mo e ongo ko ʻení, naʻe kole faleʻi ki hano kaungāmeʻa falalaʻanga: “Naʻá ku fakahā ange ʻa e meʻa ne u fie maʻú, pea pehē mai ia, ʻMisa Sinou, he ʻikai ke u toe fai ki ha taha ʻa e faleʻi ʻoku ou ongoʻi ke fai atú, ʻi he ngaahi tūkunga ʻokú ke ʻi aí. Kapau ne ko au koe, te u hoko atu mo ʻeku taumuʻá ʻo ako. ʻKo meʻa tofu pē ia naʻá ku fie maʻu ke ne talamaí, pea naʻe fakafiefia ia kiate au. Naʻá ku fiemālie ai ʻi ha kiʻi taimi; ka ʻi he faʻahitaʻu momokó, ʻi heʻeku fanongo ki he fakamoʻoni ʻa e Faifekau kei talavoú ni ki heʻenau lavameʻa ʻi hono malangaʻaki e Ongoongoleleí, naʻá ku kamata leva ke toe fakakaukauʻi lahi ange. Kuo foaki mai ʻe he ʻEikí kiate au ha ʻilo ʻe hāʻele mai ki he māmaní pea ʻoku ʻi ai ha teuteu ʻoku fie maʻu ke fakahoko: Kuó ne foaki mai kiate au ʻa e meʻa kotoa kuó u kolé, pea toe lahi ange; ʻi he papitaisó naʻá ku maʻu ʻi he Laumālie Māʻoniʻoní pea mo e ʻilo haohaoa ne foaki maí, naʻe toe moʻoni ange mo mahino ange ʻi hono fakauku au ʻi he vai momokó; pea naʻá ku ongoʻi ʻoku ʻi ai ha fatongia kuo hilifaki kiate au. Naʻá ku tāpuni leva ʻeku ʻū tohí [pea] tuku ki tafaʻaki mo ʻeku lea faka-Latiná mo e lea faka-Kalisí.”²

Hili ʻene fai e fili ko ʻení, ne ngāue fakafaifekau leva ʻa Lolenisou Sinou ʻi he siteiti ʻŌhaioó ʻi he 1837. Naʻe toe ngāue fakafaifekau lahi ange foki kimui—ʻuluaki ʻi he siteiti Mīsulí, ʻIlinoi, Kenitaki, pea mo ʻŌhaiō, pea toe hoko ki ʻIngilani, ʻĪtali, ʻOtumotu Hauaiʻí, tokelau-hihifo ʻo e ʻIunaiteti Siteití, pea mo e siteiti Uaiomingí. Lolotonga ʻo ʻene ʻi ʻIngilaní, naʻá ne fai mai ha tohi ki hono mehikitangá, ʻo fakamatalaʻi e ʻuhinga naʻe loto fiemālie ai ke mavahe mei ʻapi ʻo hoko ko ha faifekaú: “Ko e fakakaukau ki heʻete mamaʻo ʻaki ha maile ʻe fāafe pe nimaafe mei hoku ʻapi tupuʻangá pea mo hono kotoa hoku ngaahi maheni fuoloa mo angaʻofá, ʻoku fakanatula ʻene langaʻi mai ʻa e fehuʻi, Ko e hā ʻoku ou ʻi heni aí? … ʻOku ou ʻi hení koeʻuhí kuo folofola ʻa e ʻOtuá, mo fokotuʻu hake ha Palōfita, ʻa ia kuó Ne fakafoki mai ai e kakato ʻo e Ongoongolelei taʻengatá, fakataha mo hono ngaahi meʻafoakí, mālohí, ouaú, pea mo e ngaahi tāpuakí kotoa; pea mo ha fanongonongo ki he kakai kotoa pē, ʻFakatomala, he ʻoku ofi ʻa e puleʻanga ʻo e langí.ʻ ʻI he tauhi ʻa e ʻOtuá, kuo ui ai au ko ha fakafofonga, ke ʻoatu e pōpoakí ni ki he ngaahi puleʻanga ʻo e māmaní, ʻa ia kuó u ʻilo ʻokú ne ʻomi kiate au ha fatongia maʻongoʻonga he ʻikai ke u lava ʻo fakahoko taʻe-kau mai e tokoni ʻa e ʻOtua Māfimafí.”³

Naʻe houngaʻia maʻu pē ʻa Palesiteni Sinou ʻi heʻene fili ke tokoni ki he ʻEikí ʻi heʻene hoko ko ha faifekaú. ʻI Sepitema 1901, ko hono taʻu 87, naʻá ne pehē ai: “Kuó u fiefia ʻo aʻu mai ki he taimí ni ʻi heʻeku fakakaukau atu ki he ngaahi ʻaho ʻo ʻeku ngāue fakafaifekaú. Kuo hoko ʻa e ngaahi ongo ne fakatupu ʻe he ngaahi taukei makehé ni ko ha konga mahuʻinga ʻo ʻeku moʻuí.”⁴ [Vakai, fokotuʻu fika 1 he peesi 263.]

Ngaahi Akonaki ʻa Lolenisou Sinoú

ʻI heʻetau maʻu e kakato ʻo e ongoongoleleí, ʻoku tau fakaʻamu leva ke tokoniʻi e kakai kehé ke nau fiefia ʻi he ngaahi tāpuaki tatau.

Ko e taimi ʻoku maʻu ai ʻe ha tangata ha ʻiló, ʻoku ueʻi ia ke ne vahevahe mo e niʻihi kehé; ko e taimi ʻoku fiefia ai ha tangata, akoʻi ia ʻe he laumālie ʻokú ne ʻākilotoa iá ke ne feinga ke fiefia e niʻihi kehé. … ʻOku ʻi ai nai ha faingamālie ke fiefia ai ha tangata taʻe-maʻu e ʻilo ki he ongoongolelei ʻo Kalaisí? … Neongo ʻoku feinga ʻa e [kakaí] ʻi māmani ke nau fiefia, ka ʻoku ʻikai fuʻu ola lelei e meʻa ʻoku nau feinga ke aʻusiá. He ʻikai ke nau lava ʻo fiefia, tuku kehe pē ʻi ha tefitoʻi moʻoni ʻe taha, ʻa ia ko haʻanau tali ʻa e kakato ʻo e ongoongoleleí, he ʻokú ne akoʻi mai ke ʻoua naʻa tau tatali ke tau toki aʻu ki ʻitāniti pea tau toki kamata ke fiefia, ka ʻokú ne akoʻi mai ke tau feinga ke tau fiefia fakataha mo kinautolu ʻoku tau feohí ʻi he ngaahi tāpuaki ʻa e ʻOtua Māfimafí.

ʻOku totonu leva ke hoko ʻeni ko ʻetau taumuʻa mo ʻetau kaveinga: ke tau moʻui ʻaonga; ke tau hoko ko e kau faifakamoʻui ki hotau kāingá; ke tau ʻilo ʻa e founga ke fakamoʻui ai kinautolú; ke fakahoko kiate kinautolu ha ʻilo ki he ngaahi tefitoʻi moʻoni ʻoku fie maʻu ke hiki hake ai kinautolu ki he tuʻunga poto tatau ʻoku tau maʻú.⁵

Mou ō ʻo fakakaungāmeʻa mo e kakai fakafoʻituitui ʻi homou lotolotongá ʻa ia ʻoku mou feohí; pe fili ha taha mo feinga ke ueʻi hono lotó, ʻa ʻene tuí, ʻa hono ngaahi tūkungá pea mo ʻene fakakaukaú pea feinga ke fakamāmaʻi kinautolu pea kapau ko ha kau faiangahala, fāifeinga ke fakamoʻui kinautolu mei heʻenau angahalá, pea ʻomi kinautolu mei heʻenau nofo pōpulá ki he maama mo e tauʻatāina ʻokú ke ʻi aí, he te ke lava ʻi he foungá ni ʻo fakahoko ha lelei ʻi he fakamatala kuo foaki atu ʻe he ʻEikí kiate koé.⁶ [Vakai, fokotuʻu fika 2 he peesi 263.]

ʻOku loto fiemālie ʻa e kau faifekaú ke nau fai ha ngaahi feilaulau ke tokoniʻi ʻa e niʻihi kehé ke nau ʻilo ʻa e moʻoní.

Naʻe ʻikai fuoloa mei he kamata ke nofo lelei hifo ʻa e Kāingalotú ʻi he ngaahi teleʻa ko ʻeni [ʻi ʻIutaá] kuo fakatafoki ʻe he kau tamaioʻeiki ʻa e ʻEikí ʻenau tokangá ki he ngāue fakafaifekau maʻongoʻonga naʻe tuku ki he Siasí.

Ne mau ʻi he uhouhonga ʻo e masivá mo fāifeinga ke ala nofoʻi ʻa e fonuá, ka naʻe ʻikai ke mau lava ʻo liʻaki ʻa e fatongia ne mau maʻu ke fakamafola atu ʻa e Ongoongoleleí ki mulí; he kuo tuku mai ʻe he ʻEikí ʻa e fekau kuo pau ke malangaʻi ʻi he māmaní kotoa. Ko e taha ia ʻo e ngaahi fakamoʻoni ki hono fakalangi ʻo e ngāué ni, he ʻi he lotolotonga ʻo e ngaahi faingataʻa kotoa ko ʻení mo e fakatangá, ne feinga faivelenga ʻa e Kau Māʻoniʻoni ʻi he Ngaahi ʻAho Kimui Ní ke fakahoko e fekau ko ʻeni ʻa e ʻEikí.

ʻI he konifelenisi lahi ʻa e Siasí naʻe fakahoko ʻi ʻOkatopa 1849—ko ha taʻu pē ia ʻe ua mei he tūʻuta ʻa e kau paioniá ki he teleʻa [Ano Māsimá]—kuo ui ha kaumātuʻa ʻe niʻihi ke nau fakaava ha ngaahi misiona ʻi ha ngaahi feituʻu kehekehe ʻo e māmaní. Naʻe fokotuʻu ha toko fā ʻo e Kau ʻAposetolo ʻe Toko Hongofulu Mā Uá ke nau muʻomuʻa. Naʻe ui ʻa e ʻAposetolo ko ʻIulesitasi Sinoú (Erastus Snow) ke ʻalu ki Sikenitinēvia, ʻAposetolo Sione Teila ki Falanisē, ko au ki ʻĪtali, pea mo ʻAposetolo Felengikilini D. Lisiate ki ʻIngilani, ʻa ia naʻe ʻosi fokotuʻu ai ha misiona. ʻI he malumalu ʻo e ngaahi tuʻunga masivesiva ne tuku kimautolu ki aí, pea meimei pakupaku moʻoni siʻomau ngaahi fāmilí, ne hoko ʻeni ko ha ngāue maʻongoʻonga kiate kimautolu; ka kuo ui ʻa e ʻEikí, pea mau ongoʻi ʻoku totonu ke mau tali, tatau ai pē pe ko e hā ha feilaulau naʻe fie maʻu.⁷

Ne mau fakatapui ʻemau moʻuí he naʻe ʻikai ke mau lau ia ʻoku fuʻu mahuʻinga kiate kimautolu, kae lava ke mahino ki he māmaní ʻoku ʻi ai ha ʻOtua ʻi he ngaahi maama taʻengatá; ke mahino kiate kinautolu ʻoku ʻi ai ha meʻa ke fakahoko ʻe he ʻOtuá ʻi he taimi lolotongá mo e ngaahi ngāue ʻa e fānau ʻa e tangatá. Kuo aʻu ʻa e māmaní ʻo pehē ʻoku sai pē ʻa e taʻe-anganofó. Naʻa mo e ngaahi konga faka-Kalisitiane ʻo e fāmili ʻo e tangatá, kuo lauiafe mo lauimano, neongo ʻoku ʻikai ke nau loto ke vetehia koeʻuhí he ʻikai manakoa ai kinautolu, ʻoku ʻikai ke nau tui ʻoku ʻi ai ha kākunga ʻa e ʻOtuá ki he fānau ʻa e tangatá. Kuo pau ke tau tuʻu hake ʻo fai ha ngaahi feilaulau kae lava ke hoko mai ʻa e tuí mo e ʻilo ko iá ki he fānau ʻa e tangatá.⁸

Ko e taimi ʻoku tau ui ai ʻetau kau faifekau kei talavoú ke nau ō ki he ngaahi puleʻanga ʻo e māmaní, ʻoku nau fakakaukauʻi ia, pea ʻi heʻenau ʻosi fanongo ki he aʻusia ʻa kinautolu ne nau ʻosi ʻi he māmaní ko e kau faifekaú, ʻoku ʻikai ko e meʻa fakafiefia taha ia ki ha taha ke ne ʻamanaki atu ki he ngaahi ʻahiʻahi mo e ngaahi faingataʻa kuo pau ke ne fouá. Ka ko hono leleí ʻoku maʻu ia ʻi he fie kamata mo talangofua ki he ngaahi fiemaʻú.⁹

ʻOku ʻi ai ha ngaahi meʻa fekauʻaki mo e ngāue fakafaifekaú ʻoku ʻikai fakafiefia ki he kau Faifekau kei talavoú. ʻOku nau ʻiloʻi kuo pau ke nau feilaulauʻi ʻa e ngaahi nonga ʻo ʻapí, pea ʻoku mahino kiate kinautolu te nau ō ki he lotolotonga ʻo ha kakai he ʻikai ke nau ongoʻi houngaʻia ʻi he meʻa kuo pau ke nau fakahā angé; ka ʻi he tafaʻaki ʻe tahá, ʻoku nau ongoʻi ʻoku nau maʻu ʻa e ngaahi faingamālie ki he moʻui taʻengatá, pea kapau te nau lava ʻo maʻu ha tangata pe fefine faitotonu, ʻe ngāue ʻa e Laumālie ʻo e ʻEikí ʻi hona lotó, mahalo te na tali ʻa e pōpoaki nāunauʻia ko ʻeni kuo pau ke nau fakahokó. ʻOku ʻoange ʻe he meʻá ni kiate kinautolu ha fiefia mo ha nonga. Ko e meʻa ʻe taha, ʻoku nau fakatokangaʻi ʻi he aʻusia ko ʻení ha faingamālie ke nau maʻu ai ʻa e meʻa ʻe mahuʻinga lahi kiate kinautolu ʻi honau ngaahi fatongia he kahaʻú. Ko ha meʻa faikehe ia, he ʻi he ngaahi tohi ʻe lauiafe kuó u maʻu meiate kinautolu ne ui ke ō ʻo ngāue fakafaifekaú—ko e tokolahi tahá ko e kau talavou —ʻoku ʻikai ke u tui kae mahalo ko e meʻa pē taha naʻe ʻikai talí. Ko e hā hono ʻuhingá? ʻOku tuʻunga ia he ʻoku ʻi he kau ʻEletā kei talavoú ni ʻa e ongo ʻo e ʻofá pea mo e moʻui taʻe-faʻa-maté, ʻa e laumālie ʻo e ʻOtua Māfimafí, pea kuo nau ʻosi maʻu ha ngaahi fakahā ʻokú ne ueʻi kinautolu ke fakahoko ʻa e meʻa he ʻikai ha faʻahinga meʻa fakaʻaiʻai kehe te ne ueʻi kinautolu ke nau fai.¹⁰ [Vakai, fokotuʻu fika 3 he peesi 263.]

ʻOku ʻikai totonu ke teitei ngalo ʻi he kau faifekaú ko e kau fakafofonga kinautolu ʻo e langí, ko e kau fakahoko ʻo e ngaahi ongoongo lelei mo fakafiefiá.

ʻOku tau fekauʻi atu ʻetau kau ʻEletaá ke nau malangaʻi ʻa e Ongoongoleleí. Ko hai ʻokú ne fekauʻi atu kinautolú? … Ko e ʻOtua ʻo ʻIsilelí ʻokú Ne fekauʻi atu kinautolú. Ko ʻEne ngāue. ʻOku ʻikai ha tangata matelie ʻe fuʻu mahuʻingaʻia ʻi he ola lelei ʻa ha ʻEletā ʻi he taimi ʻokú ne malangaʻi ai ʻa e Ongoongoleleí ʻo tatau mo e ʻEikí, ʻa ia naʻá Ne fekauʻi atu ia ke ne malanga ki he kakai ko e fānau ʻa e ʻEikí. Naʻá ne fakatupu kinautolu ʻi he maama kimuʻá, pea nau omi ki heni koeʻuhí naʻe finangalo ʻa e ʻEikí ke nau ō mai.¹¹

ʻOku mau ongoʻi te mou [kau faifekau] lavameʻa lahi, koeʻuhí ʻoku mau ongoʻi mo ʻiloʻi kuo ui kimoutolu ʻe he ʻOtuá. He ʻikai teitei fakakaukau ʻa e poto ia ʻo e tangatá ki ha faʻahinga ngāue pehē, hangē ko ʻení. ʻOku ou fakatumutumu he taimi ʻoku ou fakakaukau ai ki hono maʻongoʻongá. Te u lava ke pehē ko e ngāue tonu pē ʻeni ʻoku fie maʻu ʻi he taimi ko ʻení: pea ʻoku ou ongoʻi te mou kau ki ai ʻaki e kotoa hoʻomou moʻuí. Tanumaki ʻa e Laumālie ʻo Sīsuú ʻi Heʻene folofola he ʻikai ke Ne lava ʻo fai ha meʻa tukukehe pē ʻa ia naʻe tuku ange ki ai Heʻene Tamaí ke Ne faí [vakai, Sione 5:30].

Tukunoaʻi hoʻomou ngaahi faingataʻaʻiá mo hoʻomou ngaahi mole mahinó; fakangaloʻi e ngaahi meʻa ʻoku mou tokanga ki aí, pea ʻe lahi mo nāunauʻia hoʻomou lavameʻá, pea ʻe ongoʻi ʻe he Siasí kotoa hono ʻaonga hoʻomou ngāué.

Tukunoaʻi e talatalakehe ʻa e niʻihi te mou ngāue aí, kae ʻumaʻā ʻa e fanga kiʻi taʻe-fiemālie te mou fetaulaki mo iá; ʻe ʻiate kimoutolu ʻa e Laumālie ʻo e ʻEikí ke fakaʻaiʻai e laumālie ʻo kinautolu ʻoku mou ngāue ki aí, mo mou ikunaʻi ʻenau talatalakehé; … te mou fiemālie he kuo mou fakahoko e ngāue ne fekau atu ke mou faí. …

Kuo mou maʻu ʻa e mafai kakato taha ne foaki kiate kimoutolú, ka ʻoku ʻikai fie maʻu ke mou teitei talanoa fekauʻaki mo ia; ʻe fakapapauʻi ia ʻe he Laumālie ʻo e ʻEikí, pea ʻe ongoʻi ʻe he kakaí ʻokú ke fuesia ia, pea ʻe hoko leva ʻa e fakamahino mo e ongo ko ʻení ko ho mafai.

Te mou maʻu ha niʻihi te nau pehē ʻoku lahi ange ʻenau ʻiló ʻiate koe, ka ʻo kapau te ke fakahoko ho fatongiá ʻo hangē ko hono fokotuʻu atú, kimuʻa peá ke mavahe meiate kinautolú, te nau ongoʻi ʻoku lahi siʻi hake haʻaú ʻi he meʻa ʻoku nau maʻú, pea kuó ke tāpuekina mo tokoniʻi kinautolu. …

Feinga ke ke anga fakakaumeʻa kiate kinautolu ʻoku fekauʻi atu koe ki aí. ʻE fakahaaʻi ʻe he anga fakatōkilalo ʻokú ke maʻú mo e nofoʻia koe ʻe he Laumālie ʻo e ʻEikí ʻa hoʻo taau mo e fatongia kuo ui koe ki aí. Feinga ke mahino kiate koe ʻa e natula ʻo e tangatá pea ngāue fakatatau mo ia, kae lava ke fiefia ʻa e taha kotoa pea tukungamālie ʻa e meʻa kotoa. …

ʻOku ʻi ai ha founga ke tokoni ai ki he loto ʻo e tangata kotoa pē, pe ko hoʻo ngāué ia ke kumi ha founga ki he loto ʻo kinautolu kuo ui koe ki aí. …

ʻOku ou ongoʻi ke u pehē atu, ʻofa ke tāpuekina koe ʻe he ʻOtuá. ʻE vaheʻi koe kimuʻa peá ke ʻalú, pea te mau lotua koe mo tokanga moʻoni atu kiate koe. Ke ke angamalū mo loto fakatōkilalo. Ko e taimi te ke vakai ai kiate kinautolu te ke akoʻí, ʻe ʻi ai ha ongo meʻa te na ueʻi koe; ʻuluakí, te ke lava ʻo lea lelei mo fotu lelei ki he haʻofangá ko ha taha poto he leá; pea ko e hokó, ʻe ʻalu hake ha fehuʻi, ko e hā ʻoku ou ʻi heni aí? Ke tūtuuʻi ʻa e tenga ʻo e moʻuí ki he loto ʻo kinautolu ʻoku ʻi he haʻofangá; pea ʻoku totonu ke ake ʻi ho lotó ha lotu, “ʻE ʻEiki, tuku muʻa; ke u maʻu ha mālohi ʻi ho Laumālié ke ongo ki he loto ʻo kinautolu ko ʻeni ko ho kakaí?” Ko e lotu nounou ko iá, ko hono kotoa ia ʻe fie maʻu ʻe ha ʻEletā ke ne faí. Ko ia pē ʻoku fie maʻu ke ke fakahokó. “Tuku muʻa ke u lea ʻaki ha meʻa ke fakamoʻui ʻa e ngaahi laumālie ko ʻení?” Ko e meʻa ʻeni ʻoku fie maʻu ʻe he Kau Palesitenisī ʻUluakí … mo e kotoa hotau kau takí ke ke faí.¹²

Fakatafoki hoʻo tokangá ki hono fakaleleiʻi ho teunga tau fakalaumālié. ʻOku ou fakatokangaʻi ko e taimi ʻoku tuku kotoa ai ki tafaʻaki ʻeku ngaahi meʻa fakamāmaní, ʻoku tāfataha hoku matá ki he ngaahi meʻa fakalaumālié. Lotu, ʻe hoku ngaahi tokoua, pea ʻoua naʻa fakakaukau ʻoku ʻi ai hano kovi ʻo e ʻaukaí. … ʻOua te mou fuʻu fakakata ʻo tōtuʻa, [pea] tokanga ke ʻoua naʻa fakamamahiʻi e Laumālié. Naʻá ku fakatokangaʻi ʻi heʻeku ngāue fakafaifekaú, hili ha uike ʻe taha pe ua kuó u lava pē ʻo fakangaloki ʻa ʻapi, pea pouaki leva au ʻe he Laumālie ʻo e ʻOtuá. ʻOku tohoakiʻi ʻa e Laumālié ki he tauʻatāiná mo e fiefiá, kae ʻoua naʻá ke fuʻu fiefia tōtuʻa. … Hokohoko atu hoʻo faʻa lotú ke ke lava ʻo maʻu ʻa e Laumālie ʻo e ʻOtuá ke ʻiate koe mei he tumuʻaki ho ʻulú ʻo aʻu ki ho ʻaofi vaʻé.¹³

ʻOku ʻikai totonu ke teitei ngalo ʻi he kau ʻEletā ʻoku ngāue ʻi he ngoue vainé ʻa e foʻi moʻoni ko ia ko e kau fakafofonga kinautolu ʻo e langí, ko e kau fakahoko ʻo e pōpoaki lelei mo fakafiefiá ki he kakai ʻoku ʻikai ke nau ʻilo ʻa e ʻEikí. …

Ko e taimi naʻe fekau atu ai ʻe he Palōfita ko Siosefa Sāmitá ʻa e fuofua Kau ʻEletaá ki ha fonua mulí, naʻá ne tomuʻa sioloto atu ki he faʻahinga talitali ʻe fai ʻe he kakaí kiate kinautolú, peá ne talaange kiate kinautolu neongo ʻe ʻi ai ha niʻihi tokosiʻi te nau talitali kinautolu ko ha kau tamaioʻeiki ʻa e ʻOtuá, ko ha tokolahi he ʻikai ke nau tali kinautolu, mo ʻikai tokanga ki heʻenau pōpoakí. Kuo hoko ʻeni ko e tufakanga ʻo e kau tamaioʻeiki ʻa e ʻOtuá talu mei he kamataʻanga ʻo taimí, pea kuo pau ke tau fiemālie ʻi he ola ʻo e ngāue faivelengá, ʻo tatau ai pē kapau ko ha tokosiʻi pē ʻoku tau lava ʻo ʻomai ki he ʻilo ʻo e moʻoní. …

ʻOku ou fakatauange mo lotua he ʻikai ha ʻEletā ʻe ngāue … ʻe ngalo ʻiate ia pea tō ki he ngaahi fakatauele ʻo e māmaní. ʻOku taha pē founga malu ke hao ai meiate kinautolú, ko ha tafoki mei he koví, ʻio, naʻa mo e kiʻi hā ngali koví. ʻE fakaʻaliʻali mai ʻa e fakatauelé kiate kinautolu ʻi ha ngaahi founga kehekehe. Ko e ngāue ʻeni ia ʻa e fili ʻo hotau fakamoʻuí; ka ko e ngāue ʻa e kaumātuʻa ʻo ʻIsilelí ke tekeʻi ʻa e fakatauelé, pea koeʻuhí ke lava ʻo fakahoko lelei ʻeni, kuo pau ke nau tauhi kinautolu ke taʻe ha mele mei māmani. … Kapau te nau tanumaki mo fakamahuʻingaʻi ʻa e ongo ʻo ʻenau ngāue fakafaifekaú, pea mo fakatokangaʻi hono mahuʻinga ʻo honau uiuiʻi māʻolunga ʻia Kalaisi Sīsuú, pea moʻui ʻi he laumālie tatau, te nau lava ʻo tuʻu ko ha kau fakahinohino mo ha kau faifakamoʻui ki he kakaí, ʻo fakahā atu ʻa e maama ʻo e langí kiate kinautolu, ʻo ʻikai tatau mo e kau tangata kehé; ka ʻo kapau te nau halalotoʻapi ʻi he kelekele ʻo e filí mo tali ʻa e fakakaukau ʻa e māmaní, ʻe toʻo meiate kinautolu honau iví pea nau tatau mo e toenga ʻo e kau tangatá, ʻo feʻunga pē ke foki ki ʻapi ʻo ʻūkuma ʻa e mamahi ʻo e kau hingá, pea mo ʻai e loto ʻo honau ngaahi ʻofaʻangá ke nau mamahi koeʻuhí ko honau tuʻungá. … Ka kapau te nau fekumi maʻu ai pē ki he ʻEikí ʻi he loto fakatōkilalo, ʻo maʻu ha mata ʻoku tāfataha pē ki Hono ngeiá mo Hono nāunaú, pea mo fakaʻamua ʻi honau lotó ʻa e fakamoʻuí ki he laumālie ʻo e tangatá, pea mo fakahoko ʻa e meʻa kotoa pē ʻoku nau lava ke fakahoko ai honau fakamoʻuí, te nau maʻu ha fiefia ʻoku ʻikai ke mafakamatalaʻi ʻi he ngāue ne nau fakahoko ʻi he kakanó, pea fakaiku ʻo nau kau ʻi hono maʻu fakataha mo e Tamaí pea mo e ʻAló ʻa e ngaahi meʻa ʻoku fuʻu maʻongoʻonga mo nāunauʻia ke fakakaukauʻi ʻe he matelié.¹⁴ [Vakai, fokotuʻu fika 4 mo e 5 he peesi 263–64.]

ʻOku nēkeneka hotau lotó ʻi heʻetau tokoniʻi ʻa e kakai kehé ke nau maʻu ʻa e kakato ʻo e ongoongoleleí.

ʻOku tau ongoʻi … ʻi heʻetau tafaʻakí, kuo pau ke fakaʻaongaʻi mo aʻusia ʻi he faʻa kātaki, tui, faivelenga, vilitaki, pea mo ha kātaki fuoloa ʻoku lahí kae lava ke fakahoko ʻa e ngāué ni; ka ʻi he ngaahi koló … ʻa ia ʻoku iku tali ai ʻe ha lauiafe ʻa e Ongoongoleleí, naʻe fakamoleki ha ngaahi māhina lahi ʻi he ngaahi koló ni ʻi ha ngaahi ngāue naʻe ʻikai ola lelei ki muʻa pea toki fai ha tokanga feʻunga pea mo aʻusia ʻa e talangofua ki he ngaahi tefitoʻi moʻoni ko iá. … Te tau lava ʻi ha ngaahi [meʻa] ʻe niʻihi ke ngāue ʻo ʻikai lau māhina pē, kae mahalo ʻi ha ngaahi taʻu; ka ʻoku tau ongoʻi fakapapau ʻe makatuʻunga ʻi he tuí, lotú, ngāué, pea mo e ngaahi tāpuaki ʻa e ʻEikí, haʻatau lavaʻi mo ikunaʻi ʻa e ngaahi faingataʻá ni kotoa ki he ngeia mo e nāunau ʻo e ʻOtuá; pea ʻikai ngata aí, ʻe maʻu ʻa e lāngilangí ʻe kitautolu foki kuo tau ʻosi fakahoko hotau fatongiá, pea mo fakamaʻa hotau kofú mei he toto ʻo e tangata kotoa pē.¹⁵

ʻI ha meʻa ʻe [taha], kimuʻa peá u hoko atu ki ʻĪtalí, naʻá ku ʻaʻahi ki Menisesitā, Makelesifila, Pēmingihemi, Selatenihemi (Cheltenham), Lonitoni, Sautehemitoni (Southampton) pea mo ha Ngaahi Konifelenisi he Sauté [ʻi ʻIngilani]. … Naʻá ku maʻu e faingamālie ke feʻiloaki mo ha tokolahi ne u ʻomi ki he Siasí [ʻi he taʻu ʻe valu ki muʻá]; pea ʻoku ʻikai fie maʻu ke u tala atu ne hoko e toe feʻiloaki mo e kakai ko ʻení ko ha fiefia moʻoni, he naʻe fakafiefia maʻu pē ke te fakakaukau ki ai. Naʻe pehē ʻe he ʻAposetolo ko Sioné ʻi hono kuongá, “ʻOku tau ʻilo kuo tau hao mei he maté ki he moʻuí, ko e meʻa ʻi heʻetau ʻofa ki he kāingá.” [1 Sione 3:14.] Ko e ʻofa ko ʻeni ʻoku fofoaʻi ʻi he loto ʻo e kau faifekau tangata ʻo e Siasí ki he kakai ʻo e māmaní, ʻa ia ko e kau muli kiate kinautolú, pea ʻi he loto ʻo e kakaí ki he kau ʻEletā ʻoku nau ʻoatu kiate kinautolu ʻa e pōpoaki ʻo e Ongoongoleleí, ko ha fakamoʻoni ia ʻoku feʻunga ke fakalotoʻi ʻa e loto moʻoní ko hono maʻuʻangá ʻoku fakalangi, pea ʻoku ʻiate kitautolu ʻa e ʻOtuá. Ko e ongo toputapu mo māʻoniʻoni ko ʻení, ʻoku fakaakeʻi ʻi loto ʻiate kitautolu ʻe he Laumālie Māʻoniʻoní, kuó ne ʻosi fakamavaheʻi kitautolu ko ha kakai mei he toenga ʻo e fāmili ʻo e tangatá; pea ko e ongo ʻeni te ne liliu ʻa e māmaní kotoa, pea mo fakalotoʻi ʻa e kakai taʻe-tuí ko e ʻOtuá ʻoku ʻikai ngata pē ʻi Heʻene hoko ko e Tamai ʻatautolu kotoá, ka ko Hono ngaahi kaungāmeʻa kitautolu mo ʻEne kau tamaioʻeiki.¹⁶

Kuó u līʻoa ʻeku moʻuí ki he ngāue ʻa e ʻEikí; ko hoku kotoá kuo ʻosi hilifaki ia ki he funga ʻōlita ʻo e feilaulaú, ke u fakalāngilangiʻi Ia, fakahōifua ki Hono finangaló, mo fakamafola ʻa e ngaahi tefitoʻi moʻoni ʻo e moʻuí ʻi he lotolotonga ʻo e fānau ʻa e tangatá. Ko e taimi ʻoku ou fakakaukau ai ki he kuohilí, mo fakatokangaʻi e fakaofo hono fakaava ʻe he toʻukupu ʻo e ʻEikí hoku halá, mo tokoni ke ʻaonga kiate au ʻa e meʻa kotoa pē fekauʻaki mo e ngaahi ngāue fakafaifekau ko ʻení ʻoku mahulu hake ia ʻi heʻeku ʻamanaki taupotu tahá, ʻoku ou ongoʻi mātuʻaki lotolahi ke tuiaki atu ki he kahaʻú; ʻoku ʻikai malava ʻe ha lea ke fakamatalaʻi ʻa e houngaʻia lahi ʻi hoku lotó ʻi Heʻene ngaahi tāpuakí. Ko e kāinga mo e Kāingalotu ko ia kuo foaki ʻofa ʻenau moʻuí mo e meʻa ʻoku nau mahuʻingaʻia aí ki he ngāue ʻa e ʻOtuá kuo fakafōtunga moʻoni ia ʻi he ngaahi ngāue fakafaifekaú ni, pea fakatauange ke lilingi mai ʻa e ngaahi tāpuaki mo e foaki ʻofa ʻa e Fungani Māʻolungá, pea ʻi he ngaahi taʻu hili e moʻui ní te nau fanongo ki he ongomālie ʻo ha ngaahi puleʻanga lauiafe, mo lauimano ʻi haʻanau kalanga ʻaki e fakahīkihikiʻi e ʻOtua Māfimafí koeʻuhí ko e maama ʻo e fakahaá, pea ʻe toki nēkeneka foki honau lotó ʻi he fakafiefia ʻo e ʻilo ne nau kau mo kinautolu ʻi hono fakahoko ʻo e huhuʻi nāunauʻia ko ʻení.¹⁷ [Vakai, fokotuʻu fika 6 he peesi 264.]

Ngaahi Fokotuʻu ki Hono Akó mo Hono Akoʻí

Fakakaukauʻi ʻa e ngaahi meʻá ni ʻi hoʻo ako ʻa e vahé pe teuteu ke faiakó. Ke maʻu ha tokoni makehe, vakai, peesi vii–x.

Lau ʻa e peesi 253–55, pea fakakaukauʻi e ngaahi tali ʻa Lolenisou Sinou ki he fehuʻi “Ko e hā ʻoku ou ʻi heni aí?” Ko e hā ha ngaahi founga ʻe ala tokoniʻi ai ʻe he fehuʻí ni ʻa e kāingalotu kotoa ʻo e Siasí ʻi hotau faingamālie ke vahevahe ʻa e ongoongoleleí?
Fakakaukauʻi e faleʻi ʻa Palesiteni Sinou ʻi he konga ʻoku kamata he tafaʻaki ki ʻolunga ʻo e peesi 255–56. Fakakaukau ki ha founga te ke ala muimui ai ki he faleʻi ko ʻení ʻi hono tokoniʻi ha taha ke fiefia moʻoni.
Naʻe fakamatalaʻi ʻe Palesiteni Sinou ʻa e ngaahi feilaulau naʻá ne fakahoko mo ha niʻihi kehe kae lava ke nau vahevahe ʻa e ongoongoleleí (peesi 256–58). Ko e hā ha ngaahi sīpinga ʻo ha kakai ne nau fai ha ngaahi feilaulau ke vahevahe ʻa e ongoongoleleí? ʻOkú ke pehē ko e hā ʻoku fie fakahoko ai ʻe he kakaí ʻa e ngaahi feilaulau ko ʻení?
ʻE anga fēfē ha tokoniʻi ʻe he ngaahi fakamahino ʻi he peesi 258–59 ha faifekau taimi kakato? Te nau tokoniʻi fēfē kitautolu fakatāutaha ʻi heʻetau vahevahe ʻa e ongoongoleleí? Ko e hā ha ngaahi founga te tau lava ai ʻo fakaʻaongaʻi ʻa e ngaahi akonaki ko ʻení ke tokoniʻi ha taha ʻoku fakatuotuai ke ngāue fakafaifekaú?
ʻI hoʻomou fakamanatu e faleʻi ʻa Palesiteni Sinou he peesi 258–63, fakakaukau ki he founga hono fakaʻaongaʻi ʻi he moʻui ʻa e kāingalotu kotoa ʻo e Siasí. Hangē ko ʻení: ʻOkú ke pehē ko e hā hono ʻuhinga ʻo e “fakangaloki e ngaahi meʻa ʻoku mou tokanga ki aí”? Ko e hā ha ngaahi founga kehekehe te tau ala maʻu ke “tokoni ai ki he loto ʻo e tangata kotoa pē”?
Lau ʻa e palakalafi fakaʻosi ʻi he vahé, ʻa ia ʻoku fakamatala ai ʻa Palesiteni Sinou ki he fiefia tuʻuloa ʻo e ngāue fakafaifekaú. Ko e fē ha taimi ne ke aʻusia ai ʻa e fiefia ʻo e ngāue fakafaifekaú? Ko e hā ʻoku fie maʻu ai kitautolu he taimi ʻe niʻihi ke tau faʻa kātaki kae toki lava ke tau aʻusia e fiefia ko ʻení?

Ngaahi Potu Folofola Fekauʻakí: ʻAlamā 26:1–8, 35–37; T&F 12:7–8; 18:10–16; 84:88

Tokoni Fakafaiako: ““Kole ki he kau akó ke nau fili ha konga pea lau fakalongolongo ia. Fakaafeʻi kinautolu ke nau vahevahe fakakulupu ʻo tautau toko ua pe tautau toko tolu ʻo nau fili e konga tatau pea aleaʻi e meʻa ne nau akó” (mei he peesi ix ʻi he tohi ko ʻení).

“Ko e taimi ʻoku maʻu ai ʻe ha tangata ha ʻiló, ʻoku ueʻi ia ke ne vahevahe mo e kakai kehé; ko e taimi ʻoku fiefia ai ha tangata, ʻoku akoʻi ia ʻe he laumālie ʻokú ne ʻākilotoa iá ke feinga ke fiefia e niʻihi kehé.“

“Fakangaloki e ngaahi meʻa ʻoku mou tokanga ki aí, pea ʻe lahi mo nāunauʻia hoʻomou lavameʻá, pea ʻe ongoʻi ʻe he Siasí kotoa hono ʻaonga hoʻomou ngāué.”