Vahe 14

“ʻOku Malava ʻa e Meʻa Kotoa pē ʻi he ʻOtuá”

“Ko e natula ‘o e ngaahi fie maʻu ko iá ‘iate kitautolú [‘oku] hala ha taha ia te ne lava ‘o fakahoko kinautolu, tuku kehe pē ʻi ha tokoni mei he Fungani Māfimafí. … Kuó ne ‘osi talaʻofa mai e tokoni ko ‘ení.”

Mei he Moʻui ʻa Lolenisou Sinoú

Ko ha tangata ngāue ʻa Palesiteni Lolenisou Sinoú, ʻo ne muimui ‘i heʻene faleʻi naʻá ne toutou fakahokó: “Kuo pau ke tau ngāue. … ‘Oku ‘ikai hano ‘aonga ‘o e kei nofonoa taʻe te tau fai ha ngāué.”¹ Ka naʻá ne pehē foki ‘i heʻene holi ko ia ke langa ‘a e puleʻanga ‘o e ‘Otuá, he ‘ikai teitei feʻunga ‘ene ngāue ‘aʻaná pē taʻe kau mai e ‘aloʻofa ‘a e ‘Otuá—pe “tokoni pulipulia,”² ‘o hangē ko ‘ene faʻa ui iá. ‘I heʻene peheé, neongo naʻá ne fakalotolahiʻi ‘a e kau mēmipa ‘o e Siasí ke nau ngāue mālohi ‘i hono “paotoloaki ‘o e ngaahi tefitoʻi moʻoni ‘o e [māʻoniʻoní],” naʻá ne toe fakahā ‘i he taimi tatau “ʻoku totonu ke mahino pea mo manatuʻi ‘e kitautolu, Kāingalotu ‘i he Ngaahi ‘Aho Kimui Ní ‘oku maʻu ‘a e fakamoʻuí tuʻunga ‘i he ‘aloʻofa ‘a e ‘Otuá.”³ Naʻá ne fakamoʻoniʻi ‘e tānaki mai ‘e he ‘Otuá Hono iví ki heʻetau ngāué: “Ko e feituʻu ‘oku tuku kitautolu ki ai ‘e he ‘Eikí, ko e feituʻu ia ‘oku totonu ke tau ‘i aí; ko e taimi te ne fie maʻu ai kitautolu ke tau ngāue ‘o poupouʻi ‘a e ngaahi tefitoʻi moʻoni māʻoniʻoni ko ‘ení, kuo pau ke tau fai ia; ko e meʻa pē ia ‘oku fie maʻu ke tau tokanga ki aí; ko hono toengá ‘e tokangaʻi ia heʻetau Tamai Hēvaní.”⁴

Naʻe pehē ‘e he tuofefine ‘o Palesiteni Sinou ko ‘Ilisá naʻá ne moʻui faipau ki he akonaki ko ‘ení. Naʻá ne fakamatalaʻi ia ko ha tangata naʻe “taʻe-ueʻia ‘ene falala ki he mālohi tokoni mo e ‘aloʻofa ‘a e [‘Otuá].” Naʻá ne pehē naʻá “ne ‘ilo ‘a e taha ke falala ki aí” pea naʻá ne lava ai ke kātekina “ʻa e faingataʻa kotoa pē mo e fakafepaki kotoa pē” pea mo “ikunaʻi ‘a e ngaahi meʻa fakatuta kotoa.”⁵

Naʻe fakahaaʻi ‘e Lolenisou Sinou ‘ene falala ki he mālohi tokoni ‘o e ‘Otuá ‘i he taimi naʻe fononga ai ke ngāue fakafaifekau ‘i ‘Ingilani he 1840. ‘I he folau ‘aho ‘e 42 ko ia ‘i he Tahi ‘Atalanitikí, ne tofanga ai mo hono kaungā folaú ‘i ha matangi mālohi ‘e tolu. Naʻá ne fakamatala ki mui ko e ngaahi “matangi fakalilifú ni—ko ha ngaahi matangi mālohi ia ‘oku ui ‘e he kau kaivaí ‘oku mātuʻaki fakatuʻutāmaki.” Naʻá ne fakatokangaʻi ha faikehekehe ‘i he meʻa naʻá ne fai ‘i he ngaahi matangi mālohí mo ia naʻe fakahoko ‘e ha niʻihi ‘o e kau folau kehé: “ʻI ha ngaahi meʻa ‘e niʻihi, naʻe fakamanavahē ‘ene fakaʻofoʻofá. Naʻe ‘ikai ke u ‘ohovale ‘i he kau tangata mo e kau fefine pea mo e fānau naʻe teʻeki ke nau ako ke falala ki he ‘Otuá, ‘i heʻenau manavaheé, mo ‘enau tangí. Ko ‘eku falalá naʻe ‘i he tokotaha ia naʻá ne ngaohi ‘a e ngaahi tahí mo fokotuʻu honau ngaahi ngataʻangá. Naʻá ku ‘i Heʻene ngāué—Pea naʻá ku ‘ilo naʻe fekauʻi au ‘i he misioná ni ‘i he mafai ‘okú Ne ‘afioʻi, pea neongo naʻe taulōfuʻu ‘a e ngaahi ‘elemēnití mo sālue ‘a e vaká mo ngalulu ‘i he ngaahi peau taá, naʻe ‘i he fohé, pea naʻe malu ‘eku moʻuí ‘i he malumalu ‘o ‘Ene tauhí.” ⁶

‘Osi mei ai ha ngaahi taʻu lahi, ‘i he taimi ne hoko ai ‘a Lolenisou Sinou ko e Palesiteni ‘o e Siasí, naʻá ne toe maʻu ha nonga ‘i heʻene ‘ilo naʻe ‘i he fohé ‘a e ‘Eikí. ‘I ha fakataha naʻe fai ‘i he ‘aho 13 ‘o Sepitema 1898, naʻe fakahaaʻi loto taha ai ‘e he Kōlomu ‘o e Kau ‘Aposetolo ‘e Toko Hongofulu Mā Uá ‘a ‘enau tukupā ke poupouʻi ia ko e Palesiteni ‘o e Siasí. ‘Oku pehē ‘e ha lekooti ‘o e fakatahá naʻe toki tuʻu leva ki ‘olunga ‘o pehē “ʻoku ‘ikai hano toe ‘aonga ‘o e kumi ‘uhinga ‘okú te taʻe-taau etc., ke tali e ngaahi fatongia lahi fekauʻaki mo e fatongiá ni. … Naʻá ne ongoʻi ‘oku ‘aʻana ia ke fai hono lelei taupotu tahá mo fakafalala ki he ‘Eikí.”⁷ [Vakai, fokotuʻu fika 1 he peesi 202.]

Ngaahi Akonaki ʻa Lolenisou Sinoú

Te tau lava ‘o fai ha meʻa pē ‘e fie maʻu meiate kitautolu ka tokoni e ‘Otuá.

‘Oku ou fie lea ‘i ha founga te ne fakamāmaʻi mo fakaleleiʻi kitautolu ‘i he ngaahi mea ko ia ‘oku fekauʻaki mo hotau hākeakiʻí. ‘I he meʻá ni ‘oku ou kole ai ‘a e tui mo e lotu ‘a kinautolu kotoa pē ‘oku tui ki he hanga ki he ‘Eikí ke maʻu ha fakahinohino pea mo ha potó.

‘Oku totonu ke mahino kiate kitautolu ‘a ‘etau fetuʻutaki mo e ‘Eiki ko hotau ‘Otuá, pea mo e tuʻunga makehe ‘oku tau maʻú. ‘Oku tau fie maʻu ha tokoni taukakapa ke fakahoko totonu ‘a e ngaahi fatongia kuo tuku kiate kitautolú. …

… Naʻe folofola ‘a Sīsū ki [ha] talavou naʻe haʻu kiate ia ko e fie ‘ilo pe ko e hā ‘oku totonu ke ne fai ke ne maʻu ai ‘a e moʻui taʻengatá, ke ne “tauhi e ngaahi fekaú.” Naʻe tali ange ‘e he talavoú kuó ne tauhi e ngaahi fekaú ni talu mei heʻene kei siʻí. Naʻe ‘afioʻi ‘e he Fakamoʻuí, ‘i Heʻene vakai kiate iá, ‘oku ‘i ai ha meʻa ‘oku teʻeki ai fakahoko. Naʻe tauhi ‘e he talavoú ‘a e fono totonú, ‘a e fono naʻe foaki kia Mōsesé, pea ‘i he meʻá ni naʻe ‘ofa ai ‘a Sīsū kiate ia, ka naʻá Ne ‘afioʻi naʻe ‘i ai ha meʻa ʻe taha naʻe teʻeki fakahoko. Ko ha tangata tuʻumālie ia, mo pule ‘i he māmaní tuʻunga ‘i heʻene tuʻumālie makehé. Naʻe ‘afioʻi ‘e Sīsū naʻe fie maʻu ia ke ongongofua ‘i he meʻa kotoa pē, mo ‘iloʻi ko e talangofua ki he fonó ‘oku mahuʻinga tahá, ki muʻa peá Ne toki ‘ohake ia, pe ko ha toe taha, ki he maama fakasilesitialé. Naʻe ‘afioʻi ‘e Sīsū ‘a e meʻa naʻe fie maʻu ‘i he tangata kotoa pē ke ne maʻu ai ‘a e kalauni fakasilesitialé—ʻoku hala ha meʻa ‘oku totonu ke toe mahuʻinga ange ‘i he talangofua ki he ngaahi fie maʻu ‘a e langí. Naʻe fakatokangaʻi ‘e he Fakamoʻuí ‘i he talavoú ni ‘a ‘ene pīkitai ki ha faʻahinga meʻa naʻe ‘ikai fenāpasi mo e fono ‘o e puleʻanga fakasilesitialé. Naʻá Ne fakatokangaʻi, mahalo ‘a ‘ene fakahehema ke pīkitai ‘i hono lotó ki he meʻa naʻe fakatuʻutāmaki kiate iá, ‘a ia te ne ‘ai ‘a e talangofua ki he ngaahi fie maʻu kotoa ‘a e Ongoongoleleí ke taʻe-malavá, ko ia, naʻá ne folofola ange ai kiate ia ‘oku totonu ke ‘alu ‘o fakatau atu ‘a e koloa kotoa ‘okú ne maʻú “pea foaki ia ki he masivá, peá ke haʻu ‘o muimui ‘iate au.”

Naʻe ‘ai ‘e he fekaú ni ‘a e talavoú ke taʻe-fiemālie mo loto mamahi. Naʻá ne lau ‘a e koloá ko ha meʻa mahuʻinga ia ‘i he moʻuí, he ‘okú ne ‘omi kiate ia ‘a e mafai ‘o e māmaní, pea mo e ngaahi meʻa kotoa pē naʻe matamataleleí; hangē ko hono ‘omi kiate ia ‘a e ngaahi tāpuaki mo e meʻa fakafiefia ‘o e moʻuí, pea mo ha founga ke hiki hake ai ia ki ha ngaahi tuʻunga māʻolunga ‘i he sōsaietí. Naʻe ‘ikai ke lava ‘o mahino kiate ia ‘a e foʻi fakakaukau ‘o ha taha ‘okú ne maʻu e ngaahi tāpuakí, ngaahi meʻa fakafiefia pea mo e ngaahi faingamālie ‘o e moʻuí, pea mo e ngaahi meʻa ‘oku fakanatula ‘e ne fie maʻú, taʻe-kau ai ‘a ‘ene koloá. Ka ‘oku maʻu ‘e he ongoongoleleí ‘a e mālohi ke foaki ‘a e meʻa kotoa pē ‘oku fie maʻu ke fakalato ‘a e ngaahi holi mo e ngaahi fie maʻu kotoa ‘a e tangatá pea mo ‘ai ia ke fiefiá. Naʻe ‘ikai fakataumuʻa ‘a e koloá ia ke ne fakahoko ‘eni; pea naʻe finangalo ‘a e ‘Eikí ke ne tukuange ‘a e ngaahi fakakaukau ko ‘ení, pea siʻaki kinautolu mei heʻene fakakaukaú mo hono lotó, kae lava ke Ne maʻu ia ko ‘Ene tamaioʻeiki ‘i he meʻa kotoa pē. Naʻá Ne fie maʻu ‘a e tangatá ni ke līʻoa kakato ki Heʻene ngāué, pea mo kau ki heʻene ngāué ‘i he loto fakamātoato moʻoni, mo muimui ‘i he ngaahi ueʻi ‘a e Laumālie Māʻoniʻoní, mo teuteu ia ki he nāunau fakasilesitialé. Ka naʻe ‘ikai loto ki ai ‘a e talavoú ni; ko ha fuʻu feilaulau lahi fau ia. Pea folofola ai ‘a e Fakamoʻuí ‘i he meʻá ni, “ʻE faingataʻa ‘aupito ‘a e hū ‘a e tangata koloaʻiá ki he puleʻanga ‘o e langí. ‘Oku faingofua ke hū ‘a e kāmelí ‘i he avaʻi huí, ‘i he hū ‘a e tangata koloaʻiá ki he puleʻanga ‘o e ‘Otuá.”

Naʻe “ofo lahi ‘aupito” ‘a e kau ākongá ‘i he meʻá ni, “ʻo nau pehē, pea ko hai ‘e moʻuí?” Naʻa nau fakakaukau he ‘ikai ha taha te ne maʻu ‘a e koloá mo toe fakahaofi ‘i he puleʻanga ‘o e ‘Otuá. Ko e fakakaukau ‘eni naʻa nau maʻu mei he folofola ‘a e Fakamoʻuí. Ka ne tali ‘e Sīsū, “ʻOku ‘ikai faʻa fai ‘eni ‘e he tangatá, ka ‘oku faʻa fai ‘e he ‘Otuá ‘a e meʻa kotoa pē.” [Vakai, Mātiu 19:16–26; vakai foki, Liliu ʻa Siosefa Sāmita ʻo e Mātiu 19:26, footnote a, mo e Maʻake 10:27, footnote a.]⁸ [Vakai, fokotuʻu fika 2 he peesi 202.]

Kuo ‘osi talaʻofa ‘a e ‘Otuá ke tokoni mai ‘i heʻetau feinga fakatāutaha ke moʻui ‘aki ‘a e ongoongoleleí.

He ‘ikai ke tau lava ‘iate kitautolu pē ke tauhi kotoa ‘a e ngaahi fekau kuo tuku mai ‘e he ‘Otuá kiate kitautolú. Naʻa mo Sīsū tonu pē naʻe ‘ikai ke ne mei lava ‘o fakahoko ‘ene ngāué ka ne taʻe-‘oua e tokoni fakalangi mei Heʻene Tamaí. Naʻá Ne pehē ‘i ha meʻa ‘e taha, “ʻOku ‘ikai te u faʻa fai ‘e au pē ha meʻa, ‘oku hangē ko ‘eku fanongó ‘a ‘eku fakamāú: pea ‘oku totonu ‘eku fakamāú, koeʻuhí ‘oku ‘ikai te u fai ki hoku loto ‘oʻokú, ka ko e finangalo ‘o e Tamaí naʻá ne fekau aú.” [Sione 5:30.] Pea kapau naʻe fie maʻu ia kiate Ia, ko hotau ‘Eikí, ke ne maʻu e tokoni fakalangí, te tau ‘ilo ‘oku toe mahuʻinga ange kiate kitautolu ke tau maʻu ‘Ene tokoní. Pea ‘i he ngaahi tūkunga mo e tuʻunga kotoa pē ‘okú ne ‘ākilotoa ‘a e Kāingalotu ‘i he Ngaahi ‘Aho Kimui Ní he lolotonga ‘enau fakahoko honau ngaahi fatongiá, ‘oku ‘i ai ‘enau totonu ke ‘ekeʻi ha [tokoni taukakapa] mei he Laumālie Māʻoniʻoní, ke tokoni ‘i he ngaahi tūkunga kehekehe ‘okú ne ‘ākilotoa kinautolú, pea ‘i he ngaahi fatongia ‘oku fie maʻu ke nau fakahokó.

… ‘Oku ‘ikai ke u mafakakaukaua ‘e au ha faʻahinga meʻa ‘oku fuʻu mahuʻinga lahi fau ‘o hangē ko hano ngāueʻi mo maʻu e hakeakiʻi mo e nāunau fakafoʻituitui ‘o ha taha. ‘Oku ‘ikai ha veiveiua ko ha taumuʻa maʻongoʻonga ia ‘e taha ne tau omi ai ki he māmaní. … ‘Oku ‘ikai totonu ke loto foʻi ha tangata pe fefine ‘i he taimi ‘oku nau ongoʻi ai he ‘ikai ke nau lava ‘o fakahoko ‘a e meʻa ‘oku nau fie faí, ka ‘oku totonu ke tau fakahoko kotoa ‘a e meʻa ‘oku tau malavá ‘i hono fakahoko ‘o e ngāue kāfakafa ‘oku tau ‘i heni aí.⁹

Ko e natula ‘o e tui fakalotu kuo tau talí ‘okú ne fie maʻu ha tōʻonga ‘ulungaanga ‘oku ‘ikai ha toe tui fakalotu ia ‘oku tau ‘iloʻi te ne fie maʻu mei hono kau muimuí; pea ko e natula ‘o e ngaahi fie maʻu ko iá ‘iate kitautolú [‘oku] hala ha taha ia te ne lava ‘o fakahoko kinautolu, tuku kehe pē ʻi ha tokoni mei he ʻOtua Māfimafí. ‘Oku fie maʻu ke mahino kakato kiate kitautolu, pe fakakonga pē, ‘a e ngaahi tāpuaki mahuʻinga mo maʻongoʻonga kuo pau ke fāifai pea tau maʻú, ‘i heʻetau fakahoko ‘a e ngaahi fie maʻu ‘o e tui fakalotu pe ongoongolelei kuo tau maʻú. Ko e natula ‘o e ngaahi feilaulau ‘oku fie maʻu meiate kitautolú he ‘ikai ha tangata ia pe fefine te ne lava ‘o fakahoko kinautolu, tuku kehe ka tokoniʻi ‘e ha mālohi tāukakapa; pea naʻe ‘ikai teitei fakataumuʻa ‘e he ‘Eikí, ‘i heʻene fokotuʻu e ngaahi tuʻunga ko ‘ení, ke fie maʻu hono kakaí ke nau tauhi kotoa kinautolu tuku kehe ‘i ha tokoni taukakapa, pea ko e faʻahinga fie maʻu ko iá ‘oku ‘ikai malangaʻi ia ‘e ha toe faʻahinga kakai tui fakalotu. Kuó ne ‘osi talaʻofa mai e tokoni ko ‘ení. …

Ko e ngaahi fie maʻu ko ‘ení … naʻe tuʻutuʻuni ia ‘i he kuonga mo e vahaʻa taimi kotoa pē naʻe ui ai ‘e he ‘Otuá ha kakai ke nau tokoni kiate Ia, pea mo maʻu ‘a ‘ene ngaahi fonó. Naʻe fie maʻu kinautolu ‘i he ngaahi ‘aho ‘o ‘Isilelí, ‘i he kamataʻanga ‘o e kakai ko iá. Naʻe fie maʻu kinautolu ‘ia ‘Ēpalahame, ‘Aisake, pea mo Sēkope. Naʻe fie maʻu kinautolu ‘ia Mōsese, pea mo e kakai naʻá ne taki mei he nofo pōpula ‘i ‘Isipité. Naʻe fie maʻu kinautolu ‘i he kau palōfita kotoa naʻe moʻui talu mei he ngaahi ‘aho ‘o ‘Ātamá ‘o aʻu mai ki he lolotongá ni. Naʻe fie maʻu kinautolu ‘e he kau ‘aposetolo ne maʻu honau uiuiʻí ‘i he hilifaki ‘o e nima ‘o Sīsū Kalaisi, ko e ‘Alo ‘o e ‘Otua moʻuí, pea mo e kau muimui ki he tui fakalotu naʻe malangaʻi ‘e he kau ‘aposetoló ki he kakaí, ‘i honau kuongá pea ‘oku ‘ikai ha tangata pe kau tangata pe faʻahinga kakai mei he ngaahi ‘aho ‘o ‘Ātamá ki he lolotongá ni, te nau lava ‘o tauhi ‘a e ngaahi fie maʻu ko ‘ení, tuku kehe pē kakai ‘o e ‘Otuá, he kuo ‘osi fakakoloaʻi kinautolu ‘aki e mālohi mei ‘olunga, ‘a ē ‘oku toki maʻu pē mei he ‘Eiki ko hotau ‘Otuá. ¹⁰ [Vakai, fokotuʻu fika 3 he peesi 203.]

‘Oku tau fie maʻu e tokoni ‘a e ‘Otuá ‘i he taimi ‘oku tau kau ai ‘i he ngāue ‘a e ‘Otuá.

Ko e hā pē ha meʻa te ke fakahoko ki hono paotoloaki e ngaahi fie maʻu ‘o Saioné, kuo pau ke ke fakafalala ki he ‘Eikí ke ikuna.¹¹

‘Oku totonu e fakakaukau ‘a ha taha ke tāfataha pē ki hono fakalāngilangiʻi ‘o e ‘Otuá ‘i he meʻa kotoa pē ‘oku kamata ke ne fakahoko. ‘Oku totonu ke tau fakakaukau he ‘ikai ke tau lava ‘o fai ha meʻa ‘iate kitautolu pē. Ko e fānau kitautolu ‘a e ‘Otuá. ‘Oku tau ‘i he fakapoʻulí, [tuku kehe] ka fakamāmaʻi ‘e he ‘Otuá hotau ‘atamaí. ‘Oku ‘ikai hatau ivi, [tuku kehe] ka tokoniʻi kitautolu ‘e he ‘Otuá. ‘Oku natula pehē ‘a e ngāue kuo pau ke tau fakahoko ‘i hení tuku kehe ka tau ka maʻu e tokoni ‘a e ʻOtua Māfimafí. … Ko e palopalema lahi ‘eni mo e kakai he māmaní, pea ‘oku tōtuʻa pehē pē mo e Kaumātuʻa ‘o ‘Isilelí; ‘oku ngalo ‘iate kitautolu ‘oku tau ngāue maʻá e ‘Otuá; ‘oku ngalo ‘iate kitautolu ‘oku tau ‘i hení ke fakahoko ha ngaahi taumuʻa ne tau palōmesi ki he ‘Eikí te tau fakahoko. Ko ha ngāue nāunauʻia ‘oku tau kau aí. Ko e ngāue ia ‘a e ʻOtua Māfimafí; pea kuó ne ‘osi fili ‘a e kau tangata mo e kau fefine ‘a ia kuó Ne ‘osi ‘afioʻi te nau fakahoko ‘Ene ngaahi taumuʻá.¹²

‘E toki lava pē ngāue ko ‘eni ‘okú ke kau mou kau aí ke tupulaki mo fakalakalaka ‘i he ngaahi tāpuaki ‘a e ‘Otuá ki heʻetau ngaahi ngāue faivelenga mo faitotonú pea mo ‘etau loto fakapapau ke fakahoko e ngāue ne tau omi ai ki he moʻui ko ‘ení. Ko e taimi ‘oku tau vakai atu ai ki he ngaahi meʻa ne tau foua maí, ‘oku faingofua leva ke mahino naʻe makatuʻunga ‘etau tuʻumālié ‘i heʻetau feinga fakamātoato ke fakahoko e ngāue ‘a e ‘Otuá, ke ngāue maʻá e ngaahi fie maʻu ‘a e kakaí, pea mo tekeʻi meiate kitautolu ‘i he meʻa ‘e lavá, ‘a e siokitá. Naʻe pehē ia ‘i he kuo hilí, pea ‘oku totonu ke tau tui ‘e makatuʻunga ‘etau fakalakalaka ‘i he kahaʻú ‘i heʻetau loto moʻoni ke fai e finangalo ‘o e ‘Otuá ‘i he tūkunga kotoa pē pea mo e tokoni te Ne fai mai kiate kitautolú.¹³ [Vakai, fokotuʻu fika 4 he peesi 203.]

Ngaahi Fokotuʻu ki Hono Akó mo hono Akoʻí

Fakakaukauʻi ʻa e ngaahi meʻá ni ʻi hoʻo ako ʻa e vahé pe teuteu ke faiakó. Ke maʻu ha tokoni lahi ange, vakai, peesi vii–x.

Toe fakamanatu ‘a e fakamatala ‘i he peesi 195–97. ‘Okú ke pehē ko e hā ‘oku kehe ai e fakakaukau ‘a e kakai ‘oku nau falala ki he ‘Otuá mei he kakai ‘oku ‘ikai ke nau falala ki he ‘Otuá?
Fakakaukau ki he talanoa ‘o e Fakamoʻuí pea mo e talavou koloaʻiá (peesi 197–99). Ko e hā ha ngaahi meʻa ‘oku tuku ki ai e loto ‘o e kakaí ‘e lava ke ne taki kinautolu “ke nau foki loto mamahí”? Ko e hā ‘oku fie maʻu ai ke tau “siʻaki” ‘a e faʻahinga meʻa peheé mei heʻetau moʻuí ki muʻa pea tau toki lava ke maʻu e ngaahi tāpuaki maʻongoʻonga taha ‘a e ‘Eikí?
Naʻe akoʻi ‘e Palesiteni Sinou naʻa mo e Fakamoʻuí naʻá Ne fie maʻu ha “tokoni fakalangi” ke “fakahoko ‘Ene ngāué” (peesi 199). ‘E anga fēfē haʻo fakaʻaongaʻi e ngaahi lea ‘a Palesiteni Sinoú ke tokoniʻi ha taha ‘okú ne ongoʻi taʻe-feʻunga mo e ngaahi fie maʻu ‘o hono moʻui ‘aki e ongoongoleleí?
Fekumi ʻi he konga fakaʻosi ‘o e vahe ko ‘ení (peesi 201–03). ‘Okú ke pehē ko e hā ‘oku ‘ikai ke tau faʻa kole tokoni ai ki he ‘Otuá ‘i ha ngaahi taimi ‘e niʻihí? Fakakaukauʻi pe ko e hā te ke lava ‘o fai ke maʻu lahi ange ‘Ene tokoní ‘i hoʻo moʻuí.

Ngaahi Potufolofola Fekauʻakí: Filipai 4:13; 2 Nīfai 10:23–24; 25:23; Sēkope 4:6–7; Mōsaia 24:8–22; Ngaahi Tefito ‘o e Tuí 1:3

Tokoni Fakafaiako: “Vahe ki he kau mēmipá ke nau lau ha ngaahi fehuʻi ne fili mei he ngataʻanga ‘o e vahé (tatau ai pē pe ‘e fai fakatāutaha pe fai fakakulupu). Kole ange ke nau kumi ‘a e ngaahi akonaki ‘i he vahé ‘oku fekauʻaki mo e ngaahi fehuʻí. Pea toki fakaafeʻi leva ke nau fakamatalaʻi ‘enau ngaahi fakakaukaú mo ‘enau ‘iló ki he toenga ‘o e kulupú. (peesi ix ʻi he tohí ni).

“Naʻe folofola ‘a e Fakamoʻuí ki muʻa peá ne fakaʻā ha tangata kui, “[Kuo pau] ke u fai ‘a e ngaahi ngāue ‘o ia naʻá ne fekau aú” (Sione 9:4).”

“ʻE toki lava pē ngāue ‘okú ke fakahoko mou fakahokó ke tupulaki mo laka ki muʻa tuʻunga ‘i he ngaahi tāpuaki ‘a e ‘Otuá ‘i he ‘etau ngaahi ngāue faivelenga mo faitotonú.”