Vahe 21

Ko e ʻOfa he ʻOtuá ʻo Lahi Ange ʻi Heʻetau ʻOfa he Māmaní

“Kuo pau ke tau aʻusia … ha tuʻunga māʻolunga ange: kuo pau ke tau ʻofa he ʻOtuá ʻo lahi ange ʻi heʻetau ʻofa he māmaní.”

Mei he Moʻui ʻa Lolenisou Sinoú

Taimi nounou pē mei hono papitaiso mo hilifakinima ʻo Lolenisou Sinou ʻi Ketilani ʻi ʻŌhaioó, kuo fakafepaki ha niʻihi ʻo e Kāingalotu he Ngaahi ʻAho Kimui Ní, kau ai mo ha kau taki faka-Siasi ʻe niʻihi, ki he Palōfita ko Siosefa Sāmitá. Fakatatau mo Lolenisou Sinou, naʻe lāngaʻia ʻa e hē ko ʻení ʻe ha fakamahamahalo, pe, ko hono ʻai ʻe tahá, ko ha ngaahi pisinisi tuʻu taʻemahino ʻi he fakaʻamu ke nau tuʻumālie vavé. Naʻe tafoki ʻa e kakaí mei he ngaahi tāpuaki taʻengata ʻo e ongoongoleleí ʻi hono fakakuihi ʻe he holi ki he ngaahi meʻa lusa ʻo e māmaní.

ʻOsi nai ha taʻu ʻe 50 mei ai, kuo lea ʻa Palesiteni Sinou, naʻe hoko he taimi ko iá ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, ki ha Kāingalotu ʻi Lōkani ʻi ʻIutā. Naʻá ne fakamatala kiate kinautolu ʻa e faingataʻa naʻe mamata ai ʻi Ketilaní pea mo fakatokanga kiate kinautolu ʻe vavé ni pē haʻanau aʻusia e ngaahi faingataʻa tatau. Naʻá ne talaange, “ʻOku vavé ni mai ha hoko ha faʻahinga meʻa te ne siviʻi kimoutolu, pea mahalo ʻe ʻikai tatau mo hano siviʻi kimoutolu kimuʻa. Neongo ia, ko e meʻa pē ʻoku fie maʻu ke tau fai ʻi he taimi ní ko haʻatau kumi pe ko e fē ʻetau ngaahi fehalākí mo honau ngaahi vaivaí, ʻo kapau ʻoku ʻi ai. Kapau ne tau taʻeanganofo ʻi he kuohilí, tau fakafoʻou ʻetau ngaahi fuakava mo e ʻOtuá pea lotoʻaki, ʻaki haʻatau ʻaukai mo lotu, ke tau maʻu ha fakamolemole ʻo ʻetau ngaahi angahalá, ke lava ʻa e Laumālie ʻo e ʻOtua Māfimafí ʻo nofoʻia kitautolu, pea mahalo ke tau lava ai ʻo hao mei he ngaahi fakatauele mālohi ʻoku tuʻunuku maí. ʻOku tuʻulaki mai ʻa e kaupōʻulí. Kuo mou mamata ki he nunuʻa ʻo e faʻahinga laumālie fakamamahalo peheé ʻi Ketilani. Ko ia, tokanga.”¹

Ko e konga lahi ʻo ʻene malanga ki he Kāingalotu ʻi Lōkaní ʻoku fakakau ʻi he vahé ni, he ko e fakatokanga ʻa Palesiteni Sinoú ʻoku kei kaunga pē ki he Kāingalotu ʻi he Ngaahi ʻAho Kimui Ní he ʻahó ni. Naʻá ne pehē, Mahalo ʻe iku ʻaonga he kahaʻú ha ngaahi lea siʻi fekauʻaki mo homau tuʻunga he taimi ko iá [ʻi Ketilaní]—pea te ne ala ʻomi ha ngaahi meʻa ʻaonga kiate kitautolu.”² [Vakai, fokotuʻu fika 1 he peesi 286.]

Ngaahi Akonaki ʻa Lolenisou Sinoú

Ko e taimi ʻoku tuku ai ʻe he kakaí ʻa e anga fakakakanó ke ne kāpui honau ʻatamaí, ʻoku nau sītuʻa leva ki he ngaahi tefitoʻi moʻoni taʻengatá.

ʻOku ou manatuʻi lelei ʻa e ngaahi taimi faingataʻa naʻe hoko ʻi Ketilaní … , ʻa ia naʻe nofo ai ʻa e Palōfita ʻa e ʻOtuá, ʻa ia naʻe hā ai ʻa e ʻOtuá tonu pē, pea mo Sīsū, ko e ʻAlo ʻo e ʻOtuá, mo fakahaaʻi Ia ʻi Hono nāunaú. Naʻá Ne tuʻu ʻi he funga tuʻunga malanga ʻo e Temipalé, ʻa ia naʻe langa ʻi he fekaú. Naʻe ʻi Hono lalo ʻaofi vaʻé ha tuʻuʻanga ʻo e koula haohaoa hangē ko e ʻāmipá. Naʻe tatau Hono louʻulú mo e sinou maʻa. Naʻe ulo Hono fofongá ʻo hangē ko e laʻaá ʻi hono mālohí. Ko Hono leʻó naʻe hangē ko e ongo ʻo ha vai ʻoku tafe mālohí. [Vakai, T&F 110.] Ko e fakahā fakaʻofoʻofá ni naʻe hoko ia ʻi he temipalé ʻa ia naʻe langa ko Hono fakalāngilangiʻi. Naʻá ku ʻi Ketilani ʻi he taimi tatau, ʻo mau foua ʻa e ngaahi meʻá ni ʻa ia, ʻoku ou faʻa fakakaukau he taimi ʻe niʻihi, ʻoku tau kamata ʻeni ke toe fouá. Ko e tūkunga naʻe ʻi ai ʻa e Kāingalotu ʻo e Ngaahi ʻAho Kimui Ní he taimi ko iá naʻe anga kehe; he ko hono anga ʻi he kakaí naʻe natula faikehe. … Ko e taimi ko ʻení naʻe kāpui e fakakaukau ʻa e kakai ʻo e fonuá ni ʻe he loto fie maʻu koloá. Naʻe ʻi ai ʻa e fie maʻu paʻangá, fie maʻu he pangikeé, fie maʻu kelekelé, fie maʻu ʻapi he koló, pea mo e fie maʻu ʻi ha ngaahi tafaʻaki kehekehe. Naʻe hake mai ʻa e laumālie ʻo e fie maʻu ko iá mei māmani, ʻo ne ʻufiʻufi ʻa e loto ʻo e Kāingalotú hangē ha fuʻu peaú pe ko e ʻoho mai ʻa e vai lahí, pea tafia ai ʻa e tokolahi ʻo hē mei he moʻoní.³

Naʻe kamata ha niʻihi ʻo kinautolu [Kāingalotu ʻi Ketilaní] ke fie maʻu meʻa; naʻe ngalo ʻenau tui fakalotú, ngalo e ngaahi tefitoʻi moʻoni naʻe ʻosi fakahā kiate kinautolú, pea ko hanau tokolahi naʻa nau hinga ki he fakakaukau fakafiepoto ʻo e taimi ko iá. Ake mai e ngaahi faingataʻá—ʻa e meheká mo e fekainakí— pea ʻi he houhau ʻa e ʻEikí ʻiate kinautolú, naʻá Ne ʻomi ʻa e fakaʻauhá ki honau lotolotongá pea nau moveuveu ʻo mavahevahe ʻi honau nofoʻangá.⁴

Kae ki muʻa ʻi he hē lahi ko ʻeni mei he moʻoní, ne lilingi mai ʻe he ʻEikí ha ngaahi tāpuaki fakaʻofoʻofa ki he kakaí. Ne lilingi mai ʻa e ngaahi meʻafoaki ʻo e Ongoongoleleí ʻo lahi fau— ʻa e ngaahi koloa ʻo ʻitānití. Naʻe ʻaʻahi mai ha kau ʻāngelo kiate kinautolu. Ne fefolofolai ʻa e ʻAlo ʻo e ʻOtuá mo ʻEne kau tamaioʻeikí, ʻo hangē ko ʻeku lau ki muʻá. Naʻe fakaofo ʻa e ngaahi tāpuaki naʻe maʻu ʻe he kakaí ʻi he fakatapui ʻo e Temipalé. ʻI he lolotonga ʻo e taimi fakaʻofoʻofa ko ia ʻo e ʻofa ʻa e ʻOtuá, naʻá ku kau ki ha ngaahi fakatahaʻanga kehekehe naʻe fakahoko ʻi he Temipalé. Naʻe fai haʻamau ngaahi fakataha lotu teuteu, ngaahi houalotu fakamoʻoni, pea ko e ngaahi fakamoʻoni naʻe lava ʻa e houʻeiki tangatá mo e houʻeiki fafiné ʻo fakahokó naʻe fakaʻofoʻofa. Naʻa nau kikite, naʻa nau lea ʻi he lea kehekehe, pea naʻa nau fakaʻuhingaʻi ʻa e ngaahi lea kehekehé ʻo aʻu ki ha tuʻunga māʻolunga fau. Ko e ngaahi tāpuakí ni naʻe meimei ke fakakātoa ia ʻi he kakai ʻi Ketilaní. Naʻe līʻoa leva honau lotó; naʻa nau ongoʻi hangē te nau lava ʻo feilaulauʻi ha faʻahinga meʻa pē naʻa nau maʻú. Naʻa nau ongoʻi hangē kuo nau meimei nofo ʻi he ʻao ʻo e ʻOtuá, pea naʻe fakanatula pē ke nau maʻu ʻa e ongo ko iá ʻi ha faʻahinga ivi tākiekina pehē.

Naʻe fiefia kotoa e Kāingalotu ʻo e Ngaahi ʻAho Kimui Ní he ngaahi tāpuaki ko ʻení, pea mo ha ngaahi tāpuaki lahi kehe ʻoku ʻikai ke u fakamatalaʻi atu, kimuʻa siʻi he taimi naʻe kamata ai ke mafola ʻa e laumālie ʻo e fie māʻolungá ʻi he loto ʻo e kakaí. Mahalo ʻe pehē ʻe ha taha ka hili hono maʻu ʻo e ngaahi meʻa fakaʻofoʻofa ko ʻení he ʻikai ha fakatauele te ne ikunaʻi ʻa e Kāingalotú. Ka naʻe hoko, ʻo ne fakamovetevete kinautolu ki he ngaahi matangí ʻe faá.

Neongo ʻene ngali makehé, ka naʻe kāpui ʻe he laumālie ko ʻení ʻa e Kōlomu ʻo e Kau ʻAposetolo ʻe Toko Hongofulu Mā Uá mo e Kōlomu ʻo e Kau Palesiteni ʻe Toko Fitu ʻo e Kau Fitungofulú; ʻio, naʻe ʻikai ha kōlomu ʻi he Siasí naʻe taʻe-uesia ʻe he laumālie ko ʻeni ʻo e fie māʻolungá. ʻI he fakautuutu ʻo e laumālie ko iá, ne muiaki mai leva ʻa e moveteveté. Naʻe kamata ʻa e houʻeiki tangatá mo e houʻeiki fafiné ke nau felauʻi koviʻaki mo fekēʻaki, he naʻe ʻikai fenāpasi ʻa e meʻa naʻa nau tokanga ki aí.

ʻE hoko pehē nai ʻeni ki he Kāingalotu ʻo e Ngaahi ʻAho Kimui Ní ʻoku ou lea ki ai he taimi ní? ʻOku ou manavasiʻi he ʻoku haʻu, ka ko e hā hano lahi ʻene uesia kimoutolú, ʻoku ʻikai ʻaʻaku ia ke tala atu. Neongo ia, kuo pau ke mou foua, pea mahalo ʻoku fuʻu fie maʻu ke mou aʻusia.

… Ko ha vaheua ʻe taha ʻo e kōlomu ʻo e Kau ʻAposetoló, ʻi he ngaahi ʻaho ʻi Ketilaní, ne hinga ʻi he ngaahi mālohi ko ʻeni ʻo e koví. Ko e fie māʻolunga ko ʻení, ʻa e ʻofa ki he koulá—ko e ʻotua ʻo e māmaní—naʻá ne fakatupu ʻa e meʻa mātuʻaki fakamamahí ni. Pea kapau ʻoku uesia pehē ʻa kinautolu ne nau maʻu ʻa e lakanga fakataulaʻeiki māʻolunga taha he māmaní, ʻe fēfē leva haʻane uesia kitautolu ʻoku, mahalo, teʻeki ke tau maʻu ʻa e potó, ʻa e fakamatala mo e taukei ne nau maʻú? …

Ka ko ʻeni, ko ha kakai lelei kimoutolu. … ʻOku ʻofa ʻa e ʻOtuá ʻiate kimoutolu. ʻOku fiefia ʻi hoʻomou angatonú, pea ʻoku ʻikai finangalo Ia ke toe hoko ʻa e meʻa ko ʻení … ʻa ia naʻe hoko ʻi Ketilaní. ʻOku ʻikai fie maʻu ia. ʻOku pukepuke ʻi hotau nimá ʻa e mālohi ke maluʻi kitautolu mei he ngaahi meʻa naʻá ne fakamavahevaheʻi ʻa e Kāingalotu ʻi Ketilaní mo liua ha vaheua ʻe taha ʻo e Toko Hongofulu Mā Uá. ʻOku ʻikai finangalo ki ai ʻa e ʻEikí, ʻi he ʻaho ki mui ko ʻení, ke toe mātaʻia ʻa e ngaahi palopalema ko iá.⁵

ʻOku fuʻu lahi e ʻilo mo e poto ʻo e Kāingalotu ʻi he Ngaahi ʻAho Kimui Ní ke hinga ki he ngaahi tauhele pehení. ʻOku ʻikai hano ʻaonga. He ʻikai ʻaonga ki ha taha ke sītuʻa ki he ngaahi tefitoʻi moʻoni nāunauʻiá pea mo e ngaahi meʻa ne maʻu mei he ngaahi maama taʻengatá—ke tau sītuʻa ki he ngaahi meʻá ni ka tau puputuʻu mo mateakiʻi e ngaahi meʻa lusa ʻo e māmaní. He ʻikai ʻaonga ia kiate kitautolu. Ko e hā pē ha fakatauele ʻe tō kiate kitautolu pe ʻoku tau fehangahangai mo ia he taimí ni, ʻoku totonu ke tau tokanga ki he hisitōlia ʻo e kuo hilí ʻo ʻoua naʻa tuku ke ikunaʻi kitautolu, he te tau fakaʻiseʻisa lahi ai.⁶ [Vakai, fokotuʻu fika 2 he peesi 286.]

Kuo tau fuakava ke fakamavaheʻi kitautolu mei he ngaahi meʻa fakaemāmaní pea tau momoi kitautolu ki he puleʻanga ʻo e ʻOtuá.

Ko e ʻotua ʻo e māmaní ʻa e koulá mo e silivá. ʻOku lotu e māmaní ki he ʻotua ko ʻení. ʻOku mālohi taʻe-fakangatangata ia kiate kinautolu, neongo he ʻikai ke nau loto ke fakahaaʻi ia. Ka ko ʻeni, naʻe fokotuʻutuʻu, ʻi he ʻofa ʻa e ʻOtuá, ʻoku totonu ke fakahaaʻi ʻe he Kāingalotu ʻi he Ngaahi ʻAho Kimui Ní pe kuo lahi ʻenau ʻiló mo e potó pea mo e mālohi ʻo e ʻOtuá ke ʻoua naʻa lava ʻo ikunaʻi kinautolu ʻe he ʻotua ʻo e māmaní. Kuo pau ke tau aʻusia ʻa e tuʻunga ko iá. Kuo pau foki ke tau toe aʻusia mo ha tuʻunga ʻe taha, ko ha tuʻunga māʻolunga ange: kuo pau ke tau ʻofa ki he ʻOtuá ʻo lahi ange ʻi heʻetau ʻofa ki he māmaní, ʻo laka ange ʻi heʻetau ʻofa ʻi he koulá pe silivá, pea mo ʻofa hotau kaungāʻapí ʻo hangē pē ko kitautolú.⁷

Kapau he … ʻikai ke tau tauhi ʻa e ngaahi fuakava ne tau faí, ʻa ia, ko hono fakaʻaongaʻi hotau taimí, talēnití mo hotau iví ki hono langa hake ʻo e puleʻanga ʻo e ʻOtuá he funga māmaní, ʻe anga fēfē leva haʻatau ʻamanaki ke tuʻu mai ʻi he pongipongi ʻo e uluaki toetuʻú, ʻo lau fakataha mo e ngāue maʻongoʻonga ʻo e huhuʻí? Kapau te tau faʻifaʻitaki ʻi heʻetau tōʻongá, ʻulungāngá mo ʻetau ngaahi angafai ʻa e … māmaní, ʻo lau fakataha ai kitautolu mo e māmaní, ʻokú ke pehē, ʻe hoku ngaahi tokoua, ʻe foaki mai nai ʻe he ʻOtuá kiate kitautolu ʻa e ngaahi tāpuaki ʻoku tau holi ke maʻú? Te u talaatu ʻikai, he ʻikai ke Ne fai ia! … Kuo pau ke tau langaki hake kitautolu ʻi he angatonu ʻo e langí pea tō ʻi hotau lotó ʻa e angatonu ʻa e ʻOtuá. Naʻe folofola ʻa e ʻEikí, ʻo fakafou he palōfita ko Selemaiá, “Te u ʻai ʻeku fonó ki honau lotó, pea te u tohi ia ʻi honau laumālié; pea te u hoko ko honau ʻOtuá, pea ʻe hoko ʻa kinautolu ko hoku kakai.” [Selemaia 31:33.] Ko e meʻa ʻeni ʻoku fāifeinga ʻa e ʻEikí ke faí, pea te Ne lavaʻi ʻeni ʻiate kitautolu kapau te tau talangofua ki Hono finangaló.⁸

ʻOku ou fakafetaʻi ki he ʻOtuá ʻi he ngaahi taimi ko ʻeni ʻo e taʻe-faitotonu mo e angahala ʻi he māmaní, kuo tau maʻu ha kau tangata mo ha kau fafine māʻoniʻoni mo angatonu te nau lava ke momoi kakato ʻa e ngaahi talēniti māʻolunga ko ia ne foaki kiate kinautolu ʻe he ʻOtuá ki Hono lāngilangí mo Hono nāunaú. Pea mahalo te u toe pehē, ʻoku lauiafe ha kau tangata mo ha kau fafine angamaʻa mo fakaʻeiʻeiki, kuo tānaki ʻe he ʻEikí mei he ngaahi puleʻangá, ʻoku nau loto fiemālie mo kinautolu ke foaki honau taimí mo e ngaahi talēnití ke tokoni ʻi hono fakahoko e ngāue ʻa e ʻOtuá maʻa ʻEne fānaú.⁹ [Vakai, fokotuʻu fika 3 he peesi 286.]

ʻOku tau muimui ʻi he sīpinga ʻa e Fakamoʻuí ʻi he taimi ʻoku ʻikai ai ke tau tali ke fakafetongi e nāunauʻia ʻo ʻitānití ʻaki e ngaahi koloa ʻo e māmaní.

Te ke ala ʻamanaki … ke fehangahangai mo ha ngaahi meʻa fakafeʻatungia ʻi he hala ʻo e moʻuí, ʻa ia te ne siviʻi ai koe ki he taupotu tahá, pea ʻe ʻi ai hamou niʻihi ʻe ʻahiʻahiʻi ke mou fakahehema mei he hala ʻo e moʻoní mo e ngeiá, pea hangē ko ʻĪsoá, naʻe holi ke ne tukuange ʻa e ngaahi nāunau ʻo ʻitānití ʻi ha ngaahi mōmeniti siʻi ʻo fakatōliaʻi ʻene holí mo ʻene fakaʻamú. [vakai, Sēnesi 25:29–34]; ka ke … puke ho faingamālie ke faʻifaʻitaki ai ki he sīpinga hotau Fakamoʻuí ʻi he taimi naʻe tuʻuaki ange ai kiate Ia ʻa e nāunauʻia ʻo e māmaní, kapau ʻe tukulolo ki ha tōʻonga fakavalevale; naʻá ne tali ki he taha fakatauelé, “ʻAlu ki hoku tuʻá, Sētane!” [Vakai, Luke 4:5–8.]¹⁰

Kuó u fakatokangaʻi heʻeku fakakaukau ki he moʻuí, ʻoku fuonounou ʻa e māmaní ʻi hono fakafehoanaki mo ʻitānití; ko hotau ʻatamaí, ʻa e meʻa fakalangi ʻoku ʻiate kitautolú, naʻe ʻi ai maʻu pē, naʻe ʻikai teitei ngaohi, pea ʻe ʻi ai maʻu ai pē ia ʻo aʻu ki ʻitāniti kotoa [vakai, T&F 93:29]. ʻI heʻetau fakakaukau ki he ngaahi foʻi moʻoni ko ʻení, ʻoku taau mo kitautolu ko e kakai poto, ke tau fakatokangaʻi ʻoku ʻosi pē ʻa e moʻuí ni ʻi ha ngaahi ʻaho siʻi, pea hoko mai leva ʻa e moʻui ʻoku taʻengatá; pea ʻoku tau maʻu ha tuʻunga lelei ange ʻiate kinautolu naʻe ʻikai ke nau fai ʻa e ngaahi fakalakalaka ko iá ʻo fakatatau mo e tuʻunga lelei ʻo ʻetau tauhi ʻa e ngaahi fekaú.¹¹

ʻOku haʻi fakataha ʻe he ongoongoleleí ʻa e loto kotoa ʻo hono kau muimuí, ʻe tatau ai pē, ʻoku ʻikai ke ne ʻilo ha faikehekehe ʻi he koloaʻiá mo e masivá, ʻoku haʻi fakataha kotoa kitautolu hangē ha taha fakafoʻituitui ʻokú ne fakahoko ʻa e ngaahi fatongia kuo tuku kiate kitautolú. … Tuku muʻa ke u fai atu ʻa e fehuʻí, Ko hai ʻokú ne maʻu ha faʻahinga meʻa, te ne lau moʻoni ʻoku ʻaʻana ʻa e ngaahi koloa ʻo e māmaní? ʻOku ʻikai ke u fakakaukau pehē au, he ko ha tauhi pē au ʻo ha fanga kiʻi meʻa iiki, pea ʻoku ou haʻisia ai ki he ʻOtuá ʻi hono fakaʻaongaʻí mo hono foungá. Kuo maʻu ʻe he Kāingalotu ʻo e Ngaahi ʻAho Kimui Ní ʻa e fono ʻo e ongoongoleleí ʻo fou mai he ngaahi fakahā ʻa e ʻOtuá, pea kuo mātuʻaki tohi mahino ke lava ʻo mahino ki he taha kotoa. Pea kapau ʻoku mahino mo maama kiate kitautolu ʻa e tuʻunga ne tau maʻu ʻi heʻetau tali ia he taimi naʻa tau fakahoko ai hono ngaahi fuakavá ʻi he papitaiso ke fakamolemole ʻo e angahalá, kuo pau ke tau kei tokanga ʻi he foʻi moʻoni ʻoku fie maʻu kitautolu ʻe he fonó ke tau fuofua fekumi ki he puleʻanga ʻo e ʻOtuá, pea kuo pau ke fika ua hotau taimí, talēnití mo e meʻa ʻoku malavá ki he puleʻanga ʻo e ʻOtuá [vakai, Mātiu 6:33; 3 Nīfai 13:33]. Kapau naʻe ʻikai pehē, ʻe anga fēfē leva haʻatau ʻamanaki ki he kahaʻú, ke maʻu ʻa e moʻui taʻengatá pea nofo mo pule fakataha mo Ia, ʻi he taimi e ngaohi ai ʻa e māmaní ko e ʻafioʻanga ʻo e ʻOtuá mo Hono ʻAló?

Ko hai te ne lava ʻo pehē ʻe maʻu ʻe he koloaʻiá, pe ko kinautolu ʻoku nau maʻu ha ngaahi talēniti lahí, ha fakatuʻamelie lahi ange pe ʻamanaki ke maʻu ʻa e ngaahi tāpuaki ko ʻení, ʻi he masivá, pe ko kinautolu ʻoku taha mātē pē honau talēnití? Ko ʻene mahino kiate aú, ko e tangata ʻoku ngāue ʻi he falengāué, tatau ai pē pe ko ha taha tuitui, tufunga, ngaohi sū pe ʻi ha toe tafaʻaki fakatekinikale, pea ʻoku moʻui fakatatau mo e fono ʻo e Ongoongoleleí, pea ʻoku faitotonu mo angatonu ʻi hono uiuiʻí, ʻoku feʻunga tatau pē ʻa e tangata ko iá mo ha toe taha ke maʻu ʻeni pea mo e ngaahi tāpuaki kotoa ʻo e Fuakava Foʻou mo Taʻengatá; tuʻunga ʻi heʻene angatonú te ne maʻu ʻa e ngaahi nofoʻa fakatuʻí, ngaahi pulé mo e ngaahi mālohí, ko ʻene fānaú te nau tupu ʻo tokolahi ʻo hangē ko e ngaahi fetuʻu ʻo e vavaá pe ʻoneʻone ʻo e matātahí. ʻOku ou fehuʻi ai, ko hai ʻoku lahi ange ʻene ʻamanakí ʻi he tokotahá ni?¹² [Vakai, fokotuʻu fika 3 mo e 4 ʻi laló.]

Ngaahi Fokotuʻu ki Hono Akó mo Hono Akoʻí

Fakakaukauʻi ʻa e ngaahi meʻá ni ʻi hoʻo ako ʻa e vahé pe teuteu ke faiakó. Ke maʻu ha tokoni lahi ange, vakai, peesi vii–x.

Fakakaukauʻi ʻa e fakamatala ʻi he peesi 279–80. Ko e hā ʻoku ʻi he anga fakamāmaní ʻokú ne tohoakiʻi ʻa e kakaí ke ngalo ʻiate kinautolu ʻenau tui fakalotú? ʻE anga fēfē haʻatau fakalato ʻetau ngaahi fie maʻu fakaesinó ʻo ʻikai ikunaʻi ʻe he ngaahi anga fakamāmaní?
Fakakaukauʻi ʻa e konga ʻoku kamata ʻi he peesi 280. ʻE founga fēfē ha tokoniʻi kitautolu heʻetau ʻofa ki he ʻOtuá ke tau fakaʻehiʻehi mei hano ikunaʻi ʻe he anga fakamāmaní?
Naʻe akoʻi ʻe Palesiteni Sinou ne tau ʻosi fuakava ke “fakaʻaongaʻi hotau taimí, talēnití mo hotau iví ki hono langa hake ʻo e puleʻanga ʻo e ʻOtuá he funga māmaní” (peesi ). Fakakaukau ki he meʻa te ke lava ʻo fai ke tauhi ai ʻa e fuakava ko ʻení.
Toe fakamanatu ʻa e konga fakaʻosi ʻi he vahé. Ko e hā ha ngaahi founga ʻe lava ai ʻa e ngaahi moʻoni ko ʻení ʻo tokoniʻi kitautolu ke tau tauhi ʻetau ngaahi fuakavá? “ʻOku fuonounou ʻa e māmaní ʻi hono fakafehoanaki mo ʻitānití.” He ʻikai ke lava ʻe ha taha ʻo “lau moʻoni ʻoku ʻaʻana ʻa e ngaahi koloa ʻo e māmaní.”

Ngaahi Potufolofola Fekauʻakí: Mātiu 6:19–24; Sione 17:15; 1 Sione 2:15–17; Sēkope 2:13–19; Molomona 8:35–39; T&F 38:39; 63:47–48; 104:13–18

Tokoni Fakafaiako: Ko e ngaahi fealēleaʻaki ʻi he fanga kiʻi kulupu īkí ʻokú ne “ʻoange ha faingamālie ki ha fuʻu kakai tokolahi ke nau kau ʻi he lēsoní. Ko kinautolu fakatāutaha ʻoku ʻikai ke nau faʻa fie kau maí, mahalo naʻa nau fie vahevahe ʻenau ngaahi fakakaukaú ʻi he fanga kiʻi kulupu īkí ʻa ia he ʻikai te nau lea ai ʻi muʻa ʻi he fuʻu kulupú kātoa.” (ʻOku ʻIkai ha Ui ʻe Mahuʻinga Ange ʻi he Faiakó, 197).

Naʻa mo e ʻosi ʻo e ngaahi fakahā maʻongoʻonga ʻi he Temipale Ketilaní, naʻe kei hinga pē ha Kāingalotu tokolahi ʻi Ketilani ʻo hē mei he moʻoní.

Hangē ko e talavou koloaʻia naʻe talanoa mo e Fakamoʻuí (vakai, Mātiu 19:16–22), ʻoku fakataueleʻi ha kakai ʻe niʻihi he ʻahó ni ke nau tafoki meiate kinautolu ʻoku paeá.