Mataupu 1

O Tatou Manaoga mo ni Perofeta Soifua

O Le Faatomuaga

Ua tatou ola i se taimi o le anoanoai o avanoa, faigata, ma faaosoosoga. E ui ina tele fesoasoani e maua mai saunoaga a perofeta ua tuanai, ua tatou manaomia le taitaiga faifaipea a le Alii e talafeagai ma tulaga o loo tatou ola ai. Na aoao mai Peresitene Ioane Teila (1808–87):

“Tatou te manaomia se laau ola—se punavai ola—atamai ola, e amata mai i le perisitua ola i le lagi, e oo mai i le perisitua ola i le lalolagi. E manaomia ai lava i taimi uma ni faaaliga fou, ua fetuunaiina i tulaga uiga ese ia na tuuina i ai ekalesia poo tagata taitoatasi.

“O faaaliga a Atamu e le’i faatonuina mai ai Noa e fau lona vaa; e le’i ta’u atua foi i faaaliga ia Noa e fai ia Lota e lafoai Sotoma; e le o tautala foi se tasi o ia faaaliga i le aveeseina mai o le fanauga a Isaraelu mai Aikupito. O nei mea uma sa i ai faaaliga mo i latou lava. … E faapena foi i tatou” (Aoaoga a Peresitene o le Ekalesia: Ioane Teila [2001], 158).

O lenei mataupu ua mamanuina e fesoasoani i au tamaiti aoga ina ia malamalama i lo latou manaomia o perofeta soifua ma faamanuiaga ua tatou maua e ala i le usiusitai ia latou fautuaga.

O Nisi o Aoaoga Faavae ma Mataupu Faavae

Ua faaali mai e le Alii Lona finagalo i perofeta soifua i le taimi nei e faapei ona sa Ia faia i taimi ua mavae.
Ua atiae le Ekalesia a le Alii i luga o le faavae o perofeta ma aposetolo.
O uso o le Au Peresitene Sili ma le Korama a Aposetolo a le Toasefululua o perofeta, tagatavaai, ma talifaaaliga.
E fesoasoani perofeta e atiae lo tatou faatuatua ia Iesu Keriso.
O le saogalemu e oo mai i le iloa ma ola ai i aoaoga a perofeta soifua.

Manatu mo le Aoaoina Atu

Ua Faaali mai e le Alii Lona Finagalo i Perofeta Soifua i le Taimi Nei e Pei ona sa Ia Faia i le Taimi ua Mavae

Faasoa ma lau vasega le saunoaga a Peresitene Hugh B. Brown (1883-1975) o le Au Peresitene Sili e uiga i le manaomia o perofeta soifua i le vaega 1.1 o le Tusi Lesona a Tamaiti Aoga o Aoaoga a Perofeta Soifua.

Faitau le Amosa 3:7 o se vasega ma fesili atu:

E faapefea e le Amosa 3:7 ona faamalosia mea sa aoao mai e Peresitene Brown?

Tusi mau nei i luga o le laupapa: 1 Nifae 2:1–3; Esoto 3 otootoga o le mataupu. Valaaulia tamaiti aoga e faitau se tasi o mau faasino ma faailoa mai le mea ua finagalo le Alii i tagata ina ia fai ma e ua maua faaaliga. Talanoa puupuu mea na latou maua.

Valaaulia se tamaitiiti aoga e faitau le saunoaga a Peresitene Ioane Teila (1808-87) i le vaega 2.4 o le tusi lesona a tamaiti aoga. Ona talanoa lea o mafuaaga na tuuina mai e Peresitene Teila mo le manaomia o ni perofeta soifua.

Ina ia faamamafa atu e faaali mai e le Alii i perofeta soifua ia fautuaga ma faatonuga tatou te manaomia i o tatou taimi, tusi le upu ponokalafi i luga o le laupapa. Faasoa ma tamaiti aoga e faapea o le taimi muamua sa faaaoga ai le upu ponokalafi o le konafesi aoao o Oketopa 1959. I le tusa ma le 10 tausaga na sosoo ai, mai le 1959 i le 1969, e faa 8 taimi na taua ai i le konafesi. Ae peitai, i le 10 tausaga mai le 1999 i le 2009 e 81 taimi na taua pe talanoaina ai i le konafesi aoao. Fai atu i tamaiti aoga fesili nei:

Aisea e te manatu ai sa i ai se suiga matautia i le numera o mau faasino na taua ai le ponokalafi e le Usoga? (Faaeteete ina ia le oo lenei talanoaga i mea patino i ponokalafi; ua na o se faataitaiga faigofie o le manaomia mo perofeta soifua e fuafua ma talafeagai i tulaga fesuisuiai.)
O a nisi faataitaiga o loo i ai upumoni taua po o fautuaga ua maua i o tatou taimi e ala mai perofeta soifua atonu sa le mafai ona faamamafaina e perofeta anamua? (Tusi tali a tamaiti aoga i luga o le laupapa e toe foi i ai i le faaiuga o le lesona. Atonu e aofia ai i tali afiafi faaleaiga po o timaiga e tetee ai i fualaau faasaina, faapau pepe, ma faatosinaga o itupa tutusa.)

Faasoa atu le saunoaga lenei a Peresitene Henry B. Eyring o le Au Peresitene Sili:

“O faaaliga ma musumusuga na oo mai ia [Peresitene Thomas S. Monson] a o ou i ai. … O au o se molimau patino” (Henry B. Eyring, “O Le Ekalesia Moni ma le Ola,” Ensign po o le Liahona, Me 2008, 20).

Fesili atu:

Aisea e taua ai le iloa e faaauau e le Alii i le aso ona faaalia mai Lona finagalo i Ana perofeta soifua?

Molimau atu i le manaomia mo perofeta soifua i le lalolagi i aso nei ma e faaauau e le Alii ona faaalia mai Lona mafaufau ma Lona finagalo i Ana perofeta filifilia.

Ua atiae le Ekalesia a le Alii i luga o le faavae o perofeta ma aposetolo.

Tusi le ata o loo iinei i luga o le laupapa ma fai atu i tamaiti aoga le fesili lenei:

I le iloa ai o le taua o se faavae malosi, o le a le eseesega e maua mai ituaiga o mea faufale i le faavae?

Valaaulia tamaiti aoga e faitau le Mataio 7:24-27.

Faasoa atu le saunoaga lenei a Peresitene Russell M. Nelson o le Korama a Aposetolo e Toasefululua:

“E tusa ma le 20 tausaga ua mavae ina o le a fausia se malumalu i le Aai o Mekisiko, sa faafeagai ai le au tusiata ma se luitau tele. Ona o le Aai o Mekisiko e i se faatanoa i luga o le vai, o nisi o ona fale ua amata ona sisipa e tusa ai ma le taimi. O le fausia o le malumalu iina e manaomia ai se faavae faapitoa. E lua selau luasefulu ma le tasi faaputuga sima faamalosi tetele, [e tusa le faaputuga sima ma le 18 inisi lona taiamita] ua vili i lalo e sili ma le 100 futu le loloto i le palapala. … I lenei faavae e le iloa atu ae faamaonia, o loo tulai mai lena malumalu malosi ma le sao.

“O se faavae malosi e moomia e soo lava se fale, faalapotopotoga, po o tagata taitoatasi ina ia tumau pea. I le i ai o lena mea e mafaufau i ai, tatou manatu i le faavae o le Ekalesia a Iesu Keriso o le Au Paia o Aso e Gata Ai. Sei o tatou vaai pe faapefea e le faavae malosi o le Ekalesia ona lagolagoina lo tatou faavae o le faatuatua o tagata taitoatasi o le Ekalesia” (Russell M. Nelson, “Le Faavae Malosi,”Ensign, Iulai 2002, 83).

Faitau leotele le Efeso 2:19-21 ma le vasega ma faaaoga fesili nei e fesoasoani ai i tamaiti aoga e faatusatusa le faavae o le Malumalu o le Aai o Mekisiko i le faavae o le Ekalesia o perofeta ma aposetolo:

O a ni auala e tali tutusa ai le faavae o perofeta ma aposetolo i faaputuga sima tetele o loo faaaogaina e faamau ai le Malumalu i le Aai o Mekisiko?
O le a se mea e fai e se tagata ina ia mautinoa ai o loo atiae e ia se faavae malosi?

Faamatala atu sa tuuina mai e le Aposetolo o Paulo nisi o mafuaaga i le faavae o perofeta ma aposetolo. Valaaulia se tamaitiiti aoga e faitau le Efeso 4:11–14. Fai atu i le vasega e vaavaai mo ni mafuaaga na tuuina mai ai e le Alii perofeta ma aposetolo o so tatou faavae. Talanoa mea na latou maua.

Valaaulia se tamaitiiti aoga e faitau le saunoaga a Elder Jeffrey R. Holland (1906-2004) o le Korama a Aposetolo e Toasefululua i le vaega 1.4 o le tusi lesona a tamaiti aoga. Fai atu i tamaiti aoga fesili nei:

E tusa ai ma le saunoaga a Elder Holland, aisea ua taua tele ai se faavae o perofeta ma aposetolo i aso nei?
O le a se faataitaiga o se aoaoga mai se tasi o perofeta ma aposetolo mai le lomiga aupito lata mai o le konafesi aoao ua fesoasoani e faamalosia ai lou faavae o le faatuatua?
E faapefea e le pipii i lena aoaoga po o isi aoaoga e te manatua mai konafesi ona fesoasoani e puipuia ai oe mai le “felafoaiina e pei o peau … ma feaveaiina e matagi uma lava o mataupu” (Efeso 4:14) i le lalolagi o nei aso?

O uso o le Au Peresitene Sili ma le Korama a Aposetolo a le Toasefululua o Perofeta, Tagatavaai ma Talifaaaliga

Ia faaali atu se ata o le Peresitene o le Ekalesia.

Faamanatu atu i tamaiti aoga i le taimi o konafesi a a tatou uarota, siteki, ma konafesi aoao tatou te sii o tatou lima i le sikuea e molimauina ai lo tatou lagolagoina o le Pulega Aoao. Fai atu i tamaiti aoga fesili nei:

O le a le faaupuga e faaaoga pe a tatou lagolagoina le Peresitene o le Ekalesia? (Perofeta, tagatavaai, ma talifaaaliga.)
E i ai ea se tasi tatou te lagolagoina i lena lava gagana?
O le a le faamanuiaga o le i ai o le sili ae i le tasi se alii e umia lena pule?

Valaaulia se tamaitiiti aoga e faitau le saunoaga a Peresitene Harold B. Lee (1899-1973) mai le vaega 1.5 o le tusi lesona a tamaiti aoga. Fesili atu:

Pe a maliu le Peresitene, o ai o loo umia le pule e galue ai e avea ma Peresitene e sosoo ai o le Ekalesia?

Tusi le upu perofeta i luga o le laupapa. Valaaulia tamaiti aoga e faitau le uputomua i le Bible Dictionary mo le upu perofeta. Ona fai atu lea ia galulue ma se tasi tagata i le vasega ma saili mai se faauigaga puupuu mo le upu. Valaaulia ni nai tamaiti aoga e faasoa mai ni o latou faauigaga.

Fai i tamaiti aoga e sue i le vaega 1.6 o le tusi lesona a tamaiti aoga ma faitau faamatalaga i lalo o le soaulutala “Perofeta” (vaega 1.6.1). Valaaulia tamaiti aoga e faasino mai nisi upu po o fasifuaitau patino o faamatala atili ai po o ai se perofeta ma po o a ni ona tiute.

Vaevae le vasega i ni vaega se lua, ma faatonu ia tatala pea a latou tusi lesona i le vaega 1.6. Tofi se vaega e tasi e iloilo faamatalaga o loo i lalo o le soaulutala “Tagatavaai” (vaega 1.6.2) ae o le isi vaega e iloilo faamatalaga o loo i lalo o le soaulutala “Talifaaaliga” (vaega 1.6.3).

Ina ua maea ma lava se taimi mo le iloiloga ma le suesuega, fai atu i vaega taitasi e filifili so latou failauga. Valaaulia lenei failauga e aoao atu le vasega pe faapefea ona eseese se tagatavaai po o se talifaaaliga mai se perofeta. Faamalosiau atu ia latou faasoa mai ni o latou lagona ma molimau e uiga i le mafuaaga ua taua ai tagatavaai ma talifaaaliga i aso nei. Afai na feiloai tino se tamaitiiti aoga ma se Aposetolo (perofeta, tagatavaai, ma le talifaaaliga) pe sa auai foi i se sauniga sa saunoa ai se Aposetolo, uunai atu ina ia latou faasoa mai o latou aafiaga ma nisi lagona na o latou maua.

E fesoasoani perofeta e atiae lo tatou faatuatua ia Iesu Keriso

Faitau le Mataupu Faavae ma Feagaiga 1:17 ma lau vasega ma fesili atu:

O le a le mafuaaga na fetalai ai le Alii na valaauina ai le Perofeta o Iosefa Samita?

Faitau le Mataupu Faavae ma Feagaiga 1:21 ma lau vasega ma fesili atu:

O le a seisi mafuaaga na fetalai ai le Alii i le manaomia o Iosefa Samita i aso amuli?
E faapefea e lou iloa o le soifuaga ma aoaoga a Iosefa Samita ona faatupulaia ai lou faatuatua?
E faapefea e lou iloa o le soifuaga ma aoaoga a isi perofeta o le Ekalesia ona faatupulaia ai lou faatuatua?

O le Saogalemu e oo mai i le Iloa ma Ola Ai i Aoaoga a Perofeta Soifua

Ina ia fesoasoani i tamaiti aoga e manatunatu i le maua o le saogalemu e ala i le usitaia o perofeta soifua, atonu e te manao e faaali atu i tamaiti aoga le vitio “Watchman on the Tower” (4:17), o loo maua i le Mataupu Faavae ma Feagaiga ma le Church History Visual Resource DVDsma i le LDS.org. O lenei vitio o loo faamatala ai le ala e oo mai ai le saogalemu ona o le usitaia o perofeta soifua.

Aumai se fagu vailaau fufulu faamama (po o se tasi aitema o loo i ai se pepa lapatai) ma faitau le lapataiga o loo i le pepa i le vasega. Fesili atu:

O le a se mea e ono tupu pe a na leai se pepa lapatai pe ua le usitaia e se tagata le lapataiga o loo i le pepa?
O a ni mea tutusa e te vaaia i le va o le pepa lapatai i luga o le fagu vailaau fufulu faamama ma aoaoga a se perofeta?

Faasino atu o nisi o tagata latou te faaaoga sese ia vailaau fufulu faamama ma faamanualia ai i latou lava ona ua latou le iloaia le lapataiga, ae o isi ua latou iloa le lapataiga ae ua le faaaoga lelei lena malamalama o le a aafia ai foi i na lava manuaga.

E faapefea e lenei faatinoga o le faaaogaina sese o se vailaau fufulu faamama ona faatusa i o tatou perofeta o aso nei?

Valaaulia se tamaitiiti aoga e faitau le Mataupu Faavae ma Feagaiga 1:2-4. Fai atu i le vasega e faailoa mai pe faapefea ona lapataia i tatou e le Alii i aso e gata ai. Ona fesili atu lea o fesili nei:

O ai “soo” o le Alii i o tatou aso?
E faapefea e lenei lapataiga ona faatusatusa i le lapataiga o loo i le fagu vailaau fufulu faamama?

Valaaulia se tamaitiiti aoga e faitau le saunoaga a Peresitene Harold B. Lee (1899-1973) mai le vaega 1.10 o le tusi lesona a tamaiti aoga. Fesili atu:

E tusa ai ma Peresitene Lee, o le a se ki e tatou te ola saogalemu ai e ui i luitau o le olaga?
O le a se mea tatou te fai e mautinoa ai ua tatou iloa atu ia “pepa lapatai” ua tuuina mai e Aposetolo o aso e gata ai e tusa ai ma luitau o le olaga o nei aso?

Faitau atu i au tamaiti aoga le saunoaga lenei a Peresitene Henry B. Eyring o le Au Peresitene Sili:

“Ona o le agalelei o le Alii, ua Ia valaauina ai Ana auauna e lapataia tagata e uiga i mea matautia. O lena valaauga e lapatai atu ua atili faigata ma sili atu ona taua ona o le mea moni e faapea, o lapataiga e aupito sili ona aoga ua faatatau lea i mea matautia ia e le i mafaufau i ai tagata e faapea ua moni” (Henry B. Eyring, “O le Leo o Lapataiga,” Liahona, Ian. 1999, 37).

Fesili atu i tamaiti aoga:

E faapefea e perofeta ona mafai ona latou vaai atu i mea matautia e le mafai e isi ona iloa? (Afai e le taua e tamaiti, atonu o se taimi talafeagai lea e molimau atu ai i le matafaioi a tagatavaai - latou te iloa atu mea e ala i faaaliga e le mafai e isi ona vaai iai.)

Faitau le saunoaga lenei a Elder M. Russell Ballard o le Korama a Aposetolo e Toasefululua:

“Afai tatou te faalogo i le fautuaga a le Alii na faailoa mai e ala i upu a le peresitene o le Ekalesia, o la tatou tali e tatau ona sao ma vave. O loo faaalia e talafaasolopito faapea e i ai se saogalemu, filemu, manuia ma le fiafia i le tali atu i fautuaga faaperofeta” (M. Russell Ballard, “O Lana Upu o le a Outou Talia,” Liahona, Iulai 2001, 79).

Fai atu i tamaiti aoga fesili nei:

O a ni mafuaaga e tuuina atu e tagata ona ua le amanaia lapataiga ua tatou maua mai le Usoga?
O le a se eseesega e i ai pe a tali atu i lapataiga ma fautuaga a perofeta ma aposetolo i le ala o loo faamatala mai e Elder Ballard?

Fai atu i au tamaiti aoga e vaavaai i le lisi o i le laupapa na saunia muamua i upumoni taua ua faailoa mai e o tatou perofeta soifua. Ua faaalu e le Usoga le anoanoai o taimi, taumafaiga, ma tupe e saunia ai konafesi aoao; o lo latou faamoemoega i savali, tatalo, ma musika o le a fesoasoani ia i tatou e faaleleia ai o tatou olaga. Fesili i le vasega:

O le a le mea e tatau ona fai e le Usoga ina ia mautinoa ai o le a faataunuuina lenei mea? (O tali e mafai ona aofia ai le saunia lelei, le musuia i mataupu e laugaina, ma lauga i lalo o le aafiaga a le Agaga Paia.)
O le a lou tiutetauave i lenei faagasologa? (O tali e mafai ona aofia ai faalogo, tatalo mo le Usoga o loo saunoa, tatalo ina ia talia, tusia o ni faamatalaga, tuusaoloto mai mea e faalavelave i le taimi o le konafesi, ma ia faatasi ma le Agaga Paia.)

Tuuina atu ia lava se taimi mo tamaiti aoga e mafaufau ai ia latou tali ma faia ni sini.

Faatulaga tamaiti i ni paga. Fai i paga taitasi e suesue le Mataupu Faavae ma Feagaiga 21:4-6 ona talanoa lea o fesili nei (e mafai one e tusia fesili nei i le laupapa a o lei amataina le vasega):

O le a le aoaoga faavae o loo aoao mai i nei fuaiupu?
Aisea atonu o nisi taimi e manaomia ai le onosai ma le faatuatua e uai atu ai i fautuaga a se perofeta?
O a folafolaga ua faia ia i latou o e usitaia saunoaga ma tulafono a le perofeta?

Faasoa atu i lau vasega le saunoaga lenei a Peresitene Henry B. Eyring o le Au Peresitene Sili:

“O le saili atu i le ala i le saogalemu e ala i fautuaga a perofeta e talafeagai lelei lea ia i latou e malolosi faatuatua. A saunoa se perofeta, o i latou e itiiti le faatuatua atonu ua latou manatu ane ua na ona latou faalogo i se tagata poto o loo tuuina mai se fautuaga. …

“… Ae o le filifiliga e le talia ai fautuaga faaperofetaga ua suia ai le tulaga lava ua tatou tutu ai. O le a matuai sili lava ona leaga. O le toilalo e taliaina fautuaga a perofeta e faaitiitia ai lo tatou malosiaga e taliaina ai fautuaga musuia i le lumanai” (Henry B. Eyring, “Mauaina o le Saogalemu i Fautuaga,” Ensign, Me 1997, 25).

Fai atu i tamaiti aoga fesili nei:

Aisea o le a “sili atu ai ona matautia” “le mea tonu lava o loo tatou tutu ai” pe a tatou teena le fautuaga a le perofeta?
O a nisi o faataitaiga o fautuaga sa tuuina mai e le perofeta i le vaitaimi o lou soifuaga o loo laugaina ai popolega o aso-nei? (Lisi i luga o le laupapa ia tali a tamaiti aoga’. O tali e mafai ona aofia ai ponokalafi, petipetiga, tatalaina o faaipoipoga, faamagaloga o isi, faamaualuga, faitauina o le Tusi a Mamona, po o isi fautuaga.)

Tuu atu i tamaiti aoga taitasi se fasipepa. Valaaulia ia latou filifili se tasi o tali o loo lisiina i luga o le laupapa ma tusi se palakalafa e faamatala ai pe afai e uai atu i fautuaga o le a maua ai le saogalemu faaleagaga ma o le a “faamataa ese ai mana o le pouliuli” (MF&F 21:6) i o latou olaga. Valaaulia nisi o tamaiti aoga e faasoa mai mea sa latou tusia. Mo tamaiti aoga sa faasoa mai a latou tali, mafaufau e fesili atu ia i latou fesili faaopoopo e pei o:

O anafea na e lagonaina ai le faamaoni o nei aoaoga i lou olaga?
E faapefea ona e aoao ma molimau i lenei mataupu faavae i se tagata o le aiga po o se uo?

Fesoasoani i tamaiti aoga ina ia malamalama e faapea o le taimi lava tatou te iloa ai le taua o perofeta soifua i o tatou olaga, e ao ona tatou gaoioi loa lava e faaaoga a latou aoaoga i o tatou olaga. Ua auina mai e le Alii ia perofeta e fesoasoani ina ia tatou saogalemu faaleagaga.