Mataupu 4

O Le Korama a le Au Peresitene Sili

O Le Faatomuaga

O le Au Peresitene Sili ua umia “ki o le malo” ma o le aufono pule faamalumalu sili ona maualuga i le Ekalesia (MF&F 81:2; tagai foi MF&F 81 vaega otooto; 107:80-81). E faaali mai e le Alii Lona finagalo i le Au Peresitene Sili. I le avea ai o le korama pule faamalumalu o le Ekalesia, o le Au Peresitene Sili o le pule maualuga lea mo aoaoga faavae a le Ekalesia i le lalolagi. O Peresitene Iosefa Filitia Samita(1876-1972) na faia le tautinoga lenei ia i latou o mulimuli i fautuaga a le Au Peresitene Sili:

“Ou te manatu e tasi le mea e ao ona tatou matua manino ai i o tatou mafaufau. O le a le taitaiseseina lava e le Peresitene o le Ekalesia, po o le Au Peresitene Sili … pe auina atu foi se fautuaga i le lalolagi e ese mai le finagalo ma le agaga o le Alii. …

“Ou te molimau atu afai tatou te vaai atu i le Au Peresitene Sili ma mulimuli i a latou fautuaga ma taitaiga, e leai se mana i le lalolagi e mafai ona suia lo tatou ala o se ekalesia, ma o le a tatou maua taitoatasi le filemu i lenei olaga ma fai ma suli o le mamalu e faavavau i le lalolagi a sau” (Joseph Fielding Smith, “O Ki e Faavavau ma le Aiatatau e Pulefaamalumalu ai,” Liahona, Mati 1973, 88).

Fesoasoani i tamaiti aoga e malamalama i le taua o le mulimuli i le Au Peresitene Sili. Iloilo folafolaga ua tuuina atu ia i latou e faia lea mea. O se faaiuga o lenei lesona, e ao i tamaiti aoga ona lagona se naunautaiga sili e lagolago ai ma ia ogatusa ai ma le Au Peresitene Sili. E ao ona latou lagona e tau atu, e faapei o Peresitene Boyd K. Packer o le Korama a Aposetolo e Toasefululua: “Faafetai i le Atua mo le au peresitene. E pei lava foi o tumutumu [mauga], e tutu e aunoa ma se mea i o latou luga ae ua na o le lagi lava” (“O Le Agaga e Molimau,” Liahona, Ian. 1972, 87).

Au Peresitene Sili, 1894

O le Au Peresitene Sili i le 1894: George Q. Cannon, Fesoasoani Muamua (agavale); Uilifoti Uitilafi, Peresitene (ogatotonu); ma Iosefa F. Samita, Fesoasoani Lua (taumatau).

O Nisi o Aoaoga Faavae ma Mataupu Faavae

• Sa faaali mai e le Alii faatonuga i le Perofeta o Iosefa Samita e uiga i le Au Peresitene Sili.

• O le Au Peresitene Sili e umia ki o le malo, e aofia ai le pule e taitaiina ai le galuega a le Alii i le lalolagi.

• A o lagolagoina le Peresitene o le Ekalesia e ona fesoasoani ma tagata o le Ekalesia, ua faamanuiaina le Ekalesia aoao.

Manatu mo le Aoaoina Atu

Sa faaali mai e le Alii faatonuga i le Perofeta o Iosefa Samita e uiga i le Au Peresitene Sili

Lisi mea nei na tutupu i luga o le laupapa, ma fai atu i tamaiti aoga e faavasega i lo latou faasologa sao:

Faatulagaga o le Ekalesia

O Le Uluai Faaaliga a Iosefa Samita

Toefuataiga o le Perisitua Mekisateko

Toefuataiga o le Perisitua Arona

Tali: (1) Uluai Faaaliga a Iosefa Samita; (2) toefuataiga o le Perisitua Arona; (3) toefuataiga o le Perisitua Mekisateko; (4) faalapotopotoga o le Ekalesia.

Fesili atu i tamaiti aoga:

• Aisea e te manatu ai o nei mea na tutupu i lenei faasologa? Aisea ua le tutupu ai i se faasologa ese?

Valaaulia se tamaitiiti aoga e faitau le Mataupu Faavae ma Feagaiga 128:20-21. Ona fesili atu lea:

• E faapefea e lenei mau ona fesoasoani e faamatala le faasologa o mea na tutupu i le Toefuataiga? (maitau faapitoa le vaega mulimuli o le fuaiupu 21).

Faamatala atu sa faaali mai foi e le Alii le faatulagaga o le Ekalesia o lea fuaitau i luga o lea fuaitau, e aofia ai faatonuga e uiga i le Korama o le Au Peresitene Sili. Ina ua muai faatulaga le Ekalesia, sa leai se Au Peresitene Sili e pei ona i ai i aso nei.

Fai i tamaiti aoga e faitau le siata i le vaega 4.2 o le Tusi Lesona a Tamaiti Aoga o Aoaoga a Perofeta Soifua. Ona fesili atu lea:

• O le a le faalagiga sa faaaoga i le tofiga o Iosefa Samita ina ua faatoa faatulaga le Ekalesia ia Aperila 6, 1830?

• O le a le umi ina ua maea le faatulagaina o le Ekalesia na faatuina ai le uluai Au Peresitene Sili?

• Aisea e te manatu ai sa lei atoatoa le faatulagaga o le taitaiga o le Ekalesia mai le taimi sa amata ai ona faatulaga le Ekalesia?

Molimau atu e mai le taimi o le Perofeta o Iosefa Samita seia oo mai i le taimi nei, sa faatonuina e le Alii Ana perofeta i le auala e faatulaga ma taitaia ai Lana Ekalesia, faailoa mai le malamalama e pei ona sa manaomia, mai lea fasifuaitau i lea fasifuaitau (tagai MF&F 128:21). Ina ua oo i le taimi sao, sa faaali mai e le Alii faatonuga ia Iosefa Samita e uiga i le faatulagaina o le Au Peresitene Sili.

O le Au Peresitene Sili e umia ki o le malo, e aofia ai le pule e taitaiina ai le galuega a le Alii i le lalolagi.

Valaaulia tamaiti aoga e sue i le Mataupu Faavae ma Feagaiga 90. Faailoa atu o le ulutala o le vaega e faailoa ai o “lenei faaaliga o se laasaga faaauau pea i le faatuina o le Au Peresitene Sili.” Fai atu i se tamaitiiti e faitau le Mataupu Faavae ma Feagaiga 90:9. Faamatala atu o le fuaitau “lau taitaiga” e faatatau i le Peresitene o le Ekalesia ma o le fuaitau “latou taitaiga” e faatatau i fesoasoani i le Au Peresitene Sili. Fesili atu:

• I le fuaiupu lenei, o le a le eseesega o matafaioi a le Peresitene ma matafaioi a ona fesoasoani? (E maua e le Peresitene le upu; e fesoasoani ona fesoasoani ina ia oo atu le upu i tuluiga o le lalolagi.)

Tusi i le laupapa: E taitai le Peresitene. (Atonu e te manao e faailoa atu o le matafaioi a le Peresitene o le talia o faaaliga mo le Ekalesia aoao o loo taua foi i le MF&F 90:4.)

Fai atu i se tamaitiiti aoga e faitau le Mataupu Faavae ma Feagaiga 90:6. Ona fesili atu lea:

• O ai na valaauina e le Alii o ni fesoasoani i le Perofeta o Iosefa Samita? (Sidney Rigdon ma Frederick G. Williams.)

• E tusa ai ma lenei fuaiupu, o le a le tulaga e tutusa ai fesoasoani i le Au Peresitene Sili ae i lalo o le taitaiga a le Peresitene? (I le umiaina o ki.)

Tusi i luga o le laupapa :E tutusa fesoasoani i le umiaina o ki.

Valaaulia se tamaitiiti aoga e faitau le saunoaga a Elder John A. Widtsoe (1872-1952) o le Korama a Aposetolo e Toasefululua i le vaega 4.4 o le tusi lesona a tamaiti aoga.

I le toe tepa i mataupu faavae e lua ua e tusia i le laupapa, faamatala atu o le malamalama i nei upumoni e lua e manaomia ina ia iloa ai le ala o loo taitaiina ai e le Au Peresitene Sili le Ekalesia.

Mo se faataitaiga, faitau e se tamaitiiti aoga le Mataupu Faavae ma Feagaiga 102:9-11. Ona fesili atu lea:

• Afai ua le avanoa le Peresitene o le Ekalesia ona o gasegase po o nisi tulaga, o le a le auala ua saunia e le Alii ina ia faaauau pea Lana galuega?

Faamanatu: Atonu e te fesili atu i tamaiti aoga e faitau le saunoaga muamua o le lua a Peresitene Gordon B. Hinckley (1910–2008) i le vaega 4.7 o le tusi lesona a tamaiti aoga.

Tusi le lisi o mau nei i le laupapa, ma tuu atu i vaega o tamaiti aoga e faitau, ma saili i tiute o le Au Peresitene Sili. Tuu atu se taimi i tamaiti aoga e suesue ai, ona valaaulia lea o vaega taitasi e faasoa mai a latou faaiuga ma fau se lisi o tiute o le Au Peresitene Sili i luga o le laupapa.

Mau	Tiute o le Au Peresitene Sili
MF&F 68:14-15
MF&F 90:16
MF&F 107:8-9
MF&F 107:33
MF&F 107:78-81
MF&F 120 vaega ulutala ma le fuaiupu 1
MF&F 124:126

E mafai ona foliga faapea la outou lisi:

Mau	Tiute o le Au Peresitene Sili
MF&F 68:14-15	Vaetofia Epikopo
MF&F 90:16	Pule Faamalumalu, faatulaga tatau mataupu uma o le Ekalesia
MF&F 107:8-9	Taitai i tofi uma o le Ekalesia
MF&F 107:33	Taitai galueaga o le Korama a Aposetolo e Toasefululua
MF&F 107:78-81	Fai faaiuga o mataupu faigata, i luga o feteenaiga i mataupu faaleagaga
MF&F 120 vaega ulutala ma le fuaiupu 1	Fai faaiuga i le faaaogaina o sefuluai
MF&F 124:126	Talia faaaliga mo le Ekalesia aoao

Tofi vaega taitasi e faitau se tasi o upu sii nei mai le mataupu 4 o le tusi lesona a tamaiti aoga, ma vaavaai mo ni tiute faaopoopo a le Au Peresitene Sili. (Atonu e te manao e faaopoopo atu tali a tamaiti o le vasega i le lisi o loo i luga o le laupapa.)

1. Peresitene Jame E. Faust (1920-2007) o le Au Peresitene Sili (tagai i le vaega 4.9 o le tusi lesona a tamaiti aoga).

2. O Peresitene Iosefa Filitia Samita(1876-1972) (tagai i le saunoaga lona lua a Peresitene Samita i le vaega 4.5 o le tusi lesona a tamaiti aoga).

Fesili i le vasega:

• E faapefea e tiute o le Au Peresitene Sili ona aafia lou olaga?

A o lagolagoina le Peresitene o le Ekalesia e ona fesoasoani ma tagata o le Ekalesia, ua faamanuiaina le Ekalesia aoao.

Toe iloilo le lisi o tiute a le Au Peresitene Sili i le laupapa ma tiute o le Peresitene o le Ekalesia sa outou suesueina i le mataupu 2.

Fai atu i se tamaitiiti aoga e faitau le Esoto 17:8-13. Faasino atu o Arona ma Huro sa faapei o ni fesoasoani i le Au Peresitene Sili. Ona talanoaina lea o fesili nei:

• Mulimuli ane, o le a le mea na tupu ia Isaraelu ona ua fesoasoani Arona ma Huro ia Mose e taofi i luga ona lima?

• O le a se mea e ao ona aoao mai e Isaraelu i lena aso a o latou vaavaai i taualumaga o le taua ma iloa Mose i luga o le mauga?

• O a ni lesona tatou te maua mai lenei mataupu e faatatau ia i tatou i aso nei?

Valaaulia se tamaitiiti aoga e faitau le saunoaga a Elder William R. Walker o le Fitugafulu i le mataupu 4.6 o le tusi lesona a tamaiti aoga. Fesili atu:

• E faapefea e fesoasoani i le Au Peresitene Sili ona fesoasoani e tauave le avega o loo tauaveina e le perofeta i aso nei?

Faamanatu: Atonu e te manao e faasoa le saunoaga a Peresitene N. Eldon Tanner (1898–1982) o le Au Peresitene Sili i le vaega 4.8 o le tusi lesona a tamaiti aoga. Ona fesili atu lea:

• O ai isi, faatasi ai ma ona fesoasoani, e fesoasoani i le perofeta e tauave lena avega?

Valaaulia tamaiti aoga e faitau saunoaga a Peresitene Harold B. Lee (1899-1973) i le vaega 4.11 o le tusi lesona a tamaiti aoga. Ona fesili atu lea:

• O a ni mea tatou te fai i aso nei o ni tagata o le Ekalesia e sapasapaia ma lagolagoina ai le Au Peresitene Sili?

• O a ni auala e te manatu “o le talitonuga, faatuatua, ma tatalo” MF&F 107:22 a tagata o le Ekalesia e fesoasoani ai i le perofeta ma ona fesoasoani e tauave a latou avega?

Faitau e tamaiti aoga le Mataupu Faavae ma Feagaiga 21:4-6, ma vaavaai mo mea e tutupu ia i tatou o e ua lagolago i le perofeta ma ona fesoasoani. Ona fesili atu lea o fesili nei:

• E tusa ai ma nei fuaiupu, o a faamanuiaga e maua e tagata o le Ekalesia pe a tatou lagolagoina le perofeta ma ona fesoasoani?

• E faapefea ona faatusatusa lena i mea sa tutupu i le fanauga a Isaraelu ina ua taofi i luga e Arona ma Huro lima o Mose?

• O anafea na e lagonaina ai le faamalosia, puipuia, pe faamanuiaina e ala i le lagolagoina o le Peresitene o le Ekalesia ma ona fesoasoani?

Valaaulia se tamaitiiti aoga e faitau saunoaga a Perofeta Iosefa Samita (1805-1844) i le vaega 4.12 o le tusi lesona a tamaiti aoga. Fesili atu:

• O a ni auala ua avea ai faatonuga ua tuuina mai e le Au Peresitene Sili o ni faamanuiaga i lou olaga?

Atonu e te manatu e faatosina ifo agaga o tamaiti aoga i le tamai tusi Mo le Malosi o le Autalavou, na saunia e le Au Peresitene Sili mo le autalavou a le Ekalesia. E mafai ona e fai i tamaiti aoga e faasoa mai auala ua faamanuiaina ai i latou i le ola ai i tulaga moomia a le Ekalesia.

Valaaulia se tamaitiiti aoga e faitau saunoaga a Peresitene Iosefa Filitia Samita (1876-1972) i le vaega 4.13 o le tusi lesona a tamaiti aoga. Ona tuuina atu lea o lau molimau i lenei mea ma isi o faamanuiaga ua folafola i e ua mulimuli i le Au Peresitene Sili. Valaaulia tamaiti aoga e lagolago ma mulimuli i le Au Peresitene Sili i o latou olaga.