Mataupu 2: O Le Perofeta Soifua: O Le Peresitene o le Ekalesia
Mataupu 2
O Le Perofeta Soifua: O Le Peresitene o le Ekalesia
O Le Faatomuaga
O ki ua taulimaina e le Peresitene o le Ekalesia i lona valaauga o se perofeta, tagatavaai, ma talifaaaliga ua tulaga ese ai o ia mai tagata uma o i le lalolagi. O fautuaga musuia a le perofeta o le a ogatusa lava ma upumoni e faavavau ma o le a taulai i manaoga ma tulaga o ona aso. O le usitaia o ana fautuaga e faavavau ona iuga. Fesoasoani i au tamaiti aoga e iloa a o tuu atu lo latou talitonuga ma le faalagolago i fautuaga a le perofeta soifua, o le a latou taitaiina i latou i le ala o le saogalemu. A o auauna ai o se uso o le Korama a Aposetolo e Toasefululua, na folafola mai e Peresitene Gordon B. Hinckley (1910–2008):
“Ua faamalieina au o le filemu ma le alualu i luma ma le manuia o nei tagata e faalagolago i le faia o le finagalo o le Alii e pei ona faamatala mai e [Peresitene o le Ekalesia]. Afai tatou le mulimuli i ana fautuaga, ua tatou tetee i lona valaauga paia. Afai tatou te usitaia ana fautuaga, o le a faamanuiaina i tatou” (Gordon B. Hinckley, “We Thank Thee, O God, for a Prophet,” Ensign, Ian. 1974, 125).
Ata
Peresitene Benson, Hinckley, Monson
Peresitene Gordon B. Hinckley (agavale), Peresitene Ezra Taft Benson (ogatotonu), ma Peresitene Thomas S. Monson (taumatau).
O Nisi o Aoaoga Faavae ma Mataupu Faavae
O le Peresitene o le Ekalesia e umia ma taitaia le faaaogaina o ki uma o le perisitua.
E ave le faamuamua i aoaoga ma taitaiga a perofeta soifua nai lo o mea na saunoa iai perofeta ua mavae.
O le a lē faatagaina lava e le Alii le perofeta soifua e taitai eseina le Ekalesia.
Manatu mo le Aoaoina Atu
O le Peresitene o le Ekalesia e umia ma taitaia le faaaogaina o ki uma o le perisitua.
Valaaulia se tamaitiiti aoga e sue le vaega 2.1 o le Tusi Lesona a Tamaiti Aoga o Aoaoga a Perofeta Soifua, ma fesili ia te ia e faitau parakalafa muamua e fa (seia oo i le “matou te faaaoga ia mea i aso uma”) o le saunoaga a Peresitene Boyd K. Packer (1924-2015) o le Korama a Aposetolo e Toasefululua.
O le a se mea na fetalai le Faaola o le a Ia tuuina atu ia Peteru?
O le a le mea e mafai ona fai e Peteru ona o nei ki?
O ai isi latou te maua nei ki? (Tagai Mataio 18:18; ia iloa Mataio 18:1 e faailoa mai ai sa fetalai atu Iesu nei upu i Ana Aposetolo e Toasefululua.)
O ai sa tuuina atu iai na lava ki i aso nei?
Fai atu i se tamaitiiti aoga e faamaea le faitauga o le saunoaga a Peresitene Packer i le vaega 2.1 i le tusi lesona a tamaiti aoga. Ona fesili atu lea:
O le a le uiga o le upu ki o le perisitua?
Faasoa atu le faamatalaga lenei mai a Elder Bruce R. McConkie (1915–85) o le Korama a Aposetolo e Toasefululua:
Ata
Elder Bruce R. McConkie
“O ki o le perisitua o aia ma le mana o le au peresitene. O le mana o le taitaiga, faatonutonuina, ma le puleaina. O i latou e umia nei ki ua faamanaina e taitai i le ala e faaaoga ai e isi lo latou perisitua” (Bruce R. McConkie, A New Witness for the Articles of Faith [1985], 309).
Fai atu i tamaiti aoga e otooto, i a latou lava upu, le faauigaga e Elder McConkie o ki o le perisitua.
Faitau mau nei ma lau vasega ma fai e tamaiti aoga se lisi i le laupapa o ki o le perisitua e pei ona faailoa mai i fuaiupu taitasi:
E faapefea e nei ki ona aafia ai tagata taitoatasi o le Ekalesia? (O sauniga uma o le talalelei ua taitaiina e i latou ua i ai ki.)
E faapefea ona faaaoga e le Peresitene o le Ekalesia nei ki e taitaiina ai le galuega a le Alii i le lalolagi? (Tatala atunuu i le talalelei, faamatuu atu tofi o faamauga, fausia malumalu, faamatala mealilo o le talalelei.)
Fesoasoani i tamaiti aoga e malamalama i le eseesega i le va o ki ma le pule e ala i le faasoa o faataitaiga nei:
O le ositaulaga o lo o i ai le pule o le perisitua e papatiso ai (tagai MF&F 20:46), ae o lana epikopo—o lo o umia ki e pulefaamalumalu ai i le uarota (tagai MF&F 107:13-15)—e na te muamua ona tuuina atu le faatagana e fai ai le papatisoga ma tau atu i le ositaulaga o afea, pe faapefea, nofoaga, ma le tagata e papatiso.
E umia e le Au Peresitene Sili o le Ekalesia ki o le mana o faamauga o le perisitua. Latou te valaauina ma vaetofia isi o umia le perisitua e agavaa, ma tofia i latou e galulue e fai faamauga i le malumalu.
Faasoa atu le fuaitau lenei a Peresitene Gordon B. Hinckley (1910–2008):
Ata
Peresitene Gordon B. Hinckley
“A faauuina se alii i le tofi aposetolo ma faamanuiaina o se uso o le Aufono a le Toasefululua, e tuuina atu ia te ia ki o le perisitua a le Atua. Ua umia e uso soifua taitoatasi e sefulu ma le lima ua faauuina i lena tofi ia ki uma. Peitai, ua na o le Peresitene o le Ekalesia ua i ai le aia na te faaaogaina ai i lo latou atoatoa. E mafai ona ia faataga atu i se toatasi, pe sili atu, o ona Uso, le faaaogaina o soo se tasi o ia ki. Ua tofu ia uso uma ma ki, ae ua na o le taimi lava e faataga ai i latou e le perofeta a le Alii, e mafai ona latou faaaogaina ai” (Gordon B. Hinckley, “Ua Tonu le Alu a le Ekalesia,” Liahona, Ian. 1993, 70).
Fesili i le vasega:
E faapefea e le Peresitene o le Ekalesia ona taitaiina le faaaogaina o ki o le perisitua e le Korama a Aposetolo e Toasefululua?
Aisea e manaomia ai e Aposetolo ona umia ki lava ia e pei foi ona umia e le Peresitene o le Ekalesia?
Molimau atu o Peresitene taitasi o le Ekalesia sa umia ki uma o le perisitua. O nei ki e mafua ai ona maua faamanuiaga o le faaolataga e ala i sauniga o le talalelei e mo tagata uma.
E ave le faamuamua i aoaoga ma taitaiga a perofeta soifua nai lo o mea na saunoa i ai perofeta ua mavae
Fesili atu i tamaiti aoga mo ni faataitaiga o ni gaoioiga a le Ekalesia ua suia po ua amataina i le taualumaga o tausaga. Afai e le mafai e tamaiti aoga ona maua ni faataitaiga, atonu e te fautua atu nisi o nei faataitaiga:
Faatulagaga o sauniga o Aso Sa (tolu itula poloka nai lo sauniga eseese i le taeao ma le afiafi)
Ua faaaoga le sefuluai mo le tele o mea manaomia i le paketi a le uarota (sa masani ona manaomia uarota e saili a latou lava tupe mo le paketi)
Faatulaga tutusa lesona a faifeautalai (toe iloilo i le tele o taimi i le 30 tausaga ua tuanai, talu ai nei i le Aoao Atu Lau Talalelei [2004])
Malumalu laiti (o malumalu laiti ua talafeagai ma manaoga o atunuu laiti)
Tupe Faaagaaga mo Aoga (sa faalauiloa mai ia Aperila 2001)
Korama a Fitugafulu (i se tasi taimi sa i ai korama a fitugafulu i siteki taitasi; ona tasi lea o le korama i le ekalesia aoao; o le taimi nei ua tele ia korama)
Fesili atu i tamaiti aoga:
O a ni auala e fai ma toatuga i le Ekalesia pe a tatou faia mea uma i le ala lava e tasi e pei o augatupulaga muamua?
E faapefea e nei suiga ona fesoasoani i le ola a le Ekalesia i le lalolagi atoa?
Faamatala atu e faaopoopo i le taitaiina o gaoioiga ma faatulagaga o le Ekalesia, ua faamalamalama mai foi e perofeta ma faatupulaia lo tatou malamalama i aoaoga faavae a le Ekalesia. Tusi fesili nei i le afa e tasi o le laupapa:
E faafia ona saunoa Peresitene Spencer W. Kimball sa maua e perofeta faaaliga talu mai le 1820?
E faapefea ona oo mai e le aunoa faaaliga i perofeta soifua?
O le a le lapataiga na tuuina mai e Peresitene Kimball ia i tatou?
Tofi le afa o le vasega e faitau le saunoaga a Peresitene Spencer W. Kimball (1895-1985) i le vaega 2.3 o le tusi lesona a tamaiti aoga. Fai atu i tamaiti aoga e vaavaai mo tali i fesili o loo i lo latou itu o le laupapa a o latou faitau.
I le tasi afa o le laupapa tusi ai fesili nei.
Aisea na filifili ai e Polika Iaga saunoaga a perofeta soifua nai lo tusitusiga paia?
O le a le uiga o le saunoaga a Peresitene Ezra Taft Benson na faapea mai o lo o i ai i le perofeta le mana “o le TNT”?
O le a le mea na fautua mai Peresitene Benson o le faitauga sili ona taua tatou te faia?
O le a le mea na lapatai mai Peresitene Benson tatou te faaeteete i ai?
Tofi le isi afa o le vasega e faitau “mea faavae” lua ma le tolu mai le saunoaga a Peresitene Ezra Taft Bensn (1899-1994) mai le “Enrichment Material” i le faaiuga o le mataupu 2 o le tusi lesona a tamaiti aoga. (O vaega nei o se saunoaga e taua o le “Faavae e Sefulufa i le Mulimuli ai i le Perofeta.”) Fai atu i tamaiti aoga e vaavaai mo tali i fesili o loo i lo latou itu o le laupapa a o latou faitau.
Ina ua lava se taimi mo tamaiti aoga e faitau ma mafaufau ai ma tali i fesili, uunai ina ia latou faasoa tali ma manatu ma le vasega. Valaaulia ni nai tamaiti aoga e faasoa mai a latou molimau i perofeta soifua ma faamanuiaga ua latou maua e ala i le mulimuli i fautuaga faaperofeta.
O le a lē faatagaina lava e le Alii le perofeta soifua e taitai eseina le Ekalesia.
Valaaulia se tamaitiiti aoga se toatasi e faitau le Numera 12:6-8 ma se isi tamaitiiti aoga e faitau le Esoto 33:11 i le vasega. Talanoa poo a mea e le ala e mafai ai e se perofeta ona silafia ona taitaia i tatou.
Vaevae lau vasega i ni vaega toalaiti. Fai atu i vaega taitasi e faitau saunoaga i le vaega 2.5 i le tusi lesona a tamaiti aoga. Fai i vaega e talanoa fesili nei a o latou suesue (atonu e te manao e tusi fesili i luga o le laupapa pe tuuina atu i se pepa e tufa atu):
O le a le mea na saunoa mai Peresitene Wilford Woodruff o le a le tupu lava?
O le a le mea na ia faimai ai o le a faia e le Alii a o lei tupu lava lena mea?
O le a le uiga o le “ia e vaai ma le totoa” i le perofeta? O a ni auala e mafai ai ona tatou faia ma le atoatoa lena mea?
O le a le saunoaga a Peresitene Gordon B. Hinckley ua faapea mai na o le pau lea o le naunautaiga o taitai o le Ekalesia?
E faapefea ona ia faimai ai e uiga i le auala e faia ai faaiuga a le Ekalesia?
E faapefea e le malamalama i nei mataupu faavae ona aafia ai lo tatou faatuatua i le Ekalesia ma perofeta soifua?
Faitau le Teuteronome 18:18–22. E faapefea e nei upu a Mose ona lagolagoina le manatu o le a lē faatagaina lava e le Alii le perofeta soifua e taitai eseina le Ekalesia?
Valaaulia tamaiti aoga e faasoa atu i le vasega nisi o mea sa latou talanoaina i a latou vaega.