Mataupu 6

Konafesi Aoao

O Le Faatomuaga

Na saunoa Elder Jeffrey R. Holland o le Korama a Aposetolo e Toasefululua i nisi o mafuaaga o konafesi aoao:

“O se konafesi aoao a le Ekalesia o se folafolaga i le lalolagi atoa e faapea o Iesu o le Keriso, ma o Ia ma Lona Tama, le Atua ma le Tama o i tatou uma, sa faaali atu i le perofeta taulealea o Iosefa Samita i le faataunuuina o lena folafolaga anamua e faapea, o Iesu o le Nasareta toetu o le a toefuataiina mai Lana Ekalesia i le lalolagi. … [Ua folafola mai e nei konafesi] i atunuu uma, ituaiga, gagana, ma tagata le alofa faalemesia e faapea ‘e faavavau lava lona alofa’ Salamo 136:1;1 Nofoaiga a Tupu 16:34]” (Jeffrey R. Holland, “Ua Toe O Mai Perofeta i le Nuu,”Ensignpo o le Liahona, Nov, 2006, 104).

E maua mai i konafesi aoao se avanoa mo tagata o le Ekalesia e faalogo ai ma aoao mai e ua tatou lagolagoina o ni perofeta, tagatavaai, ma talifaaaliga. Fesoasoani i au tamaiti aoga e malamalama i le taua o le sauniuniga mo konafesi aoao ma le faaaogaina o saunoaga a perofeta soifua. I le ma lea, fesoasoani atu ina ia latou malamalama i le manaomia o le suesue pea lava pea o le Ensign po o le Liahona o lomiga o le konafesi aoao. O le a faatupulaia le naunau o tamaiti aoga e ola ai i upu a perofeta o aso nei a o latou iloa faamanuiaga e oo mai le mulimuli i lapataiga ma timaiga a perofeta. Uunai tamaiti aoga e saili foi aoaoga a perofeta soifua o loo maua i isi lomiga a le Ekalesia po o tuuina mai i isi tulaga e ese mai le konafesi aoao.

O Nisi o Aoaoga Faavae ma Mataupu Faavae

E maua mai konafesi aoao avanoa mo le faafouina o Agaga.
Tatou te tautino atu ma le faamaoni ma talia i latou ua tatou lagolagoina i le konafesi aoao.
O a tatou sauniuniga e aafia ai mea tatou te maua mai konafesi aoao.
O le faaaogaina o aoaoga o konafesi aoao o le a faaleleia ai o tatou olaga.

Fautuaga mo le Aoaoina Atu

E Maua Mai i Konafesi Aoao Avanoa mo le Faafouina o Agaga

A o lei amataina le vasega, tusi i le laupapa “Aoaoga Faavae ma Mataupu Faavae” e fa o loo lisi atu i luga. Fesili atu:

O a upu o loo i nei faamatalaga e faailoa mai ai o tatou tiute?
Aisea e faatupulaia atili ai le malosi faaleagaga o isi mai taualumaga o konafesi aoao ae le o isi?
O le a se mea e mafai ona e faia ina ia maua ai ma le atoatoa aoaoga mai konafesi aoao?

Tusi i luga o le laupapa : O le taimi o le konafesi o se tau o …

Fai atu i tagata aoga pe faapefea ona latou faaumaina lenei fasifuaitau. Lisi a latou tali i luga o le laupapa. Valaaulia se tamaitiiti aoga e faitau leotele saunoaga nei a Peresitene Howard W. Hunter (1907–1995) i le vaega 6.2 o le Tusi Lesona a Tamaiti Aoga o Aoaoga a Perofeta Soifua. Fai atu i tamaiti aoga e faalogo pe faapefea ona faamaeaina e Peresitene Hunter le fasifuaitau o loo tusia i le laupapa. Ona fesili atu lea:

O a ni auala ua e aafia ai i le faataunuuina o le saunoaga a Peresitene Hunter?

Fai atu i tamaiti aoga e sailiili i le Mataupu Faavae ma Feagaiga 43:8-9; 124:144 ma tali i fesili nei:

O a nisi o faamoemoega o konafesi aoao?
O le a le uiga o le upu faagaeetia?

Faasoa atu le uiga o le faagaeetia, na saunia e Elder Robert L. Backman o le Fitugafulu:

“O le faagaeetia o lona uiga o le atiae, ia faatupulaia le faatuatua i, faaleleia le ola mama o. Pe a e mafaufau i ai, o le auala lea sa atiae ai e le Alii Lona malo. Mafaufau i le uiga ia i tatou o le lagona o le usoga o Iesu Keriso i mea tatou te potopoto ai. O le mea lea, ia e faamaoni; tu i le tofi ua Ou tofia i ai oe; fesoasoani i e vaivai, sii i luga lima ua tautau i lalo, ma faamalosi tulivae ua vaivai.’ (MF&F 81:5..)” (Robert L. Backman, i le “Tuuina atu o Taumafa Faaleagaga i Uso e le Toaaga Mai: O se Faatalanoaga,”Liahona, Ape. 1987, 16).

Ona fesili atu lea:

O a ni auala na avea ai konafesi aoao o se aafiaga “faagaeetia” mo oe?

Molimau atu o konafesi aoao, pe afai tatou te tuuina atu i ai le loto ma amioga e tatau ai, o le a maua mai ai le faafouina o le agaga ma fesoasoani tatou te alualu ai i luma ma avea e faapei o le Faaola.

Tatou te tautino atu ma le faamaoni ma talia i latou ua tatou lagolagoina i le konafesi aoao.

Tofi le afa o le vasega e faitau le saunoaga a Peresitene Gordon B. Hinckley (1910–2008) i le vaega 6.5 o le tusi lesona a tamaiti aoga. Tofi le isi afa o le vasega e faitau le saunoaga a Elder David B. Haight (1906-2004) o le Korama a Aposetolo e Toasefululua i le vaega 6.5 o le tusi lesona a tamaiti aoga. A maea ona latou faitau, fai atu fesili nei:

O le a le mea tatou te tautino atu e fai pe a sii o tatou lima e lagolago ai o tatou taitai?
O a mea e mafai ona tatou faia e faaali atu ai tatou te lagolagoina o tatou taitai?

Faavasega le vasega i ni paga ma avatu ia tofu le paga ma se fasipepa. Fai atu ia latou faitau mau nei. Valaaulia paga taitasi e tusi se faamatalaga puupuu e faamatala ai le aoaoga faavae o lo o faaali mai i nei ata taitasi:

A ua lava se taimi, ona fai lea i tamaiti aoga e faasoa mai i le vasega nisi o mea sa latou tusia.

Tofi le afa o le vasega e faitau le saunoaga a Peresitene Henry B. Eyring o le Au Peresitene Sili mai le vaega 6.5 o le tusi lesona a tamaiti aoga. Fai atu i tamaiti o le vasega e saunia e talanoaina fesili nei:

O le a le mea tatou te fai pe a maea ona sii o tatou lima e lagolago i le konafesi aoao?
O a aafiaga o a tatou amioga i luga o o tatou taitai?
O a aafiaga o a tatou amioga ia i tatou lava?

Tofi le isi afa o le vasega e faitau le saunoaga a Peresitene Joseph F. Smith (1838-1918) mai le vaega 6.5 o le tusi lesona a tamaiti aoga. Fai atu i tamaiti o le vasega e saunia e talanoaina fesili nei:

O a ni lagona o Iosefa F. Samita e uiga ia Polika Iaga?
O a aafiaga i le taliaina o le valaauga o se perofeta na oo ia Peresitene Samita?

Valaaulia tamaiti aoga e faasoa atu o latou aafiaga i le isi afa o le vasega.

Uunai tamaiti aoga e talanoa e uiga i faamanuiaga ua maua e i latou poo o latou aiga ona o le usitaia ma le lagolagoina o auauna a le Alii. Faaali mai ou lava lagona e tusa ai ma le mulimuli i auauna a le Alii?

O a tatou sauniuniga e aafia ai mea tatou te maua mai konafesi aoao.

Faamatala atu i tamaiti aoga atonu o le a faalagolago la latou sauniuniga mo konafesi aoao i le auala latou te maua ai ia taualumaga. Fesoasoani ia malamalama tamaiti aoga e ui ina eseese auala latou te maua ma faalogo ai i konafesi aoao, o le ala latou te ave ai le faamuamua ma saunia mo konafesi aoao e faalagolago i ai mea o le a latou maua mai ai. Fesili atu:

O a nisi o mea e faamuamua i aso, vaiaso, ma masina, i lou olaga e alu ai lou taimi e saunia ai?
O le a le mea e faaosofia ai oe e saunia ai mo se tasi o gaoioiga ae le o seisi? (Atonu e te manao e lisi tali a tamaiti aoga i luga o le laupapa.)

Faasoa ma tamaiti aoga le saunoaga a Peresitene Boyd K. Packer (1924-2015) o le Korama a Aposetolo e Toasefululua i le vaega 6.6 o le tusi lesona a tamaiti aoga. Ona fesili lea i tamaiti aoga:

Aisea e te manatu ai o mea tatou te maua mai konafesi aoao e faalagolago i a tatou sauniuniga ae le o sauniuniga a failauga?

Fai i tamaiti aoga e sue i le vaega 6.6 o le tusi lesona a tamaiti aoga ma faitau le molimau mai ia Elder Paul V. Johnson o le Fitugafulu. Ona fai atu lea i tamaiti aoga fesili nei:

O a ni auala e te lagona tatou te ola faateleina ai le alofa ai i saunoaga a perofeta ma aposetolo e pei ona faia e Elder Johnson?
O a mea na faamalosiau mai Elder Johnson tatou te filifili ai?
A faamuamua loa konafesi aoao i o tatou olaga, o a ni faatinoga e fesoasoani tatou te saunia ai i le fautuaga o loo tuuina mai iinei?

Fesili i tamaiti aoga poo a ni mea sa latou maua e ono fesoasoani i le saunia o i latou lava mo konafesi aoao. A fautuaina mai loa e tamaiti aoga o latou manatu, e mafai ona faitau e le vasega le lisi o auala e saunia ai e fa i le vaega 6.6 o le tusi lesona a tamaiti aoga.

Faamatala i tamaiti aoga o le lisi i le tusi lesona a tamaiti aoga e le faapea e atoatoa; ae ua na o ni manatu ma fautuaga. Pe a maea le taimi na tuu atu i tamaiti aoga e faitau ai le lisi, valaaulia i latou e faasoa se fautuaga faapitoa sa latou faaaogaina ma aafia ai le ola alualu i luma sili. Valaaulia le vasega e molimau atu i faatinoga manuia sa latou maua.

Molimau atu i au tamaiti aoga pe a ave le faamuamua i konafesi aoao i o tatou olaga, o le a faateleina lo tatou naunau e sauniuni ai. E faaopoopo atu, valaaulia tamaiti aoga e faasoa ma aiga ma uo o latou mafaufauga ma manatu i auala e saunia ai e talia le finagalo o le Alii e ala mai i Ana auauna.

O le Faaaogaina o Aoaoga o Konafesi Aoao o le a Faaleleia ai o Tatou Olaga.

Tuuina atu le saunoaga lenei sa faasoa mai e Elder Jeffrey R. Holland o le Korama a Aposetolo e Toasefululua:

“O Peresitene Boyd K. Packer … e iai sana fesili e masani ona ia fesili ai pe a fai sa matou mataupu po o se felafolafoaiga o le tasi i le isi o le Toasefululua. E tagai ae o ia i luga e foliga o loo fai mai, ‘Ua e maea?’ Ona faapea atu lea i le o lo o saunoa … , ‘Ia, ona a lea?’

“‘Ia, ona a lea?’ Ou te manatu o le auala lea na tali ai le Faaola mai lea aso i lea aso o se elemene e le mavaeeseina o Ana aoaoga ma saunoaga. … O le a le tauaogaina nei lauga ma timaiga pe afai e le suia lava le soifuaga o Ona soo” (Jeffrey R. Holland, “Ia, ona a lea?” [Konafesi a le CES o le Feagaiga Fou, Aok. 8, 2000], 4-5).

Fai fesili nei:

Aisea e te manatu e fesili ai Peresitene Packer, “Ia, ona a lea?”
O a ni auala e mafai ona suia ai o tatou olaga ona o o tatou aafiaga i le taimi o konafesi aoao?

Valaaulia se tamaitiiti aoga e faitau le Mataupu Faavae ma Feagaiga 43:8-10. Ona fai atu lea i tamaiti aoga fesili nei:

E tusa ai ma le fuaiupu 8, o a ni faamoemoega atonu na i ai i taitai o le Ekalesia a o latou sauniuni e lauga i le Au Paia i konafesi aoao?
E tusa ai ma le fuaiupu 9, e faapefea e i tatou o tagata o le Ekalesia ona tali atu i mea tatou te faalogo i ai mai o tatou taitai i konafesi aoao?
E tusa ai ma le fuaiupu 10, o a ni taunuuga o le faia po o le le faia o mea tatou te faalogo i ai i konafesi aoao?

Valaaulia tamaiti aoga e faitau saunoaga e lua a Peresitene Spencer W. Kimball (1895-1985) i le vaega 6.8 o le tusi lesona a tamaiti aoga. Ona fesili atu lea o fesili nei:

O le a se taua sa tuuina atu e Peresitene Kimball i konafesi aoao Liahona?
O le a le mea na saunoa ai Peresitene Kimball tatou te faia i konafesi aoao Liahona?
O a manatu e oo mai i lou mafaufau pe a e faalogo i nei saunoaga mai ia Peresitene Kimball?
O a mea e uunaia ai oe e nei mau e lagona mea e ao ona e fai?

Valaaulia ni tamaiti aoga se toalua e sue i le vaega 6.8 o le tusi lesona a tamaiti aoga. Fai atu i se tamaitiiti aoga e faitau le saunoaga a Peresitene Ezra Taft Benson (1899-1994), ma fai atu i le isi tamaitiiti aoga e faitau le saunoaga a Peresitene Gordon B. Hinckley (1910-2008). Ona talanoaina lea o fesili nei:

O a nisi o auala e mafai e konafesi aoao ona taitaiina a tatou “savali ma tautalaga”?
O le a le “suega” sa faamatalaina e Peresitene Hinckley e iloa ai pe tauaogaina le konafesi aoao?
O le a le fautuaga a Peresitene Hinckley i le ala tatou te fua ai le alualu i luma i o tatou olaga? (Fai i se tamaitiiti aoga e tusi tali o lenei fesili i luga o le laupapa.)
O a ni fautuaga patino na tuuina mai e Peresitene Hinckley e fesoasoani tatou te faaaoga ai aoaoga o mea sa tatou aoaoina i konafesi aoao?
O a ni faamanuiaga e te manatu e maua e aiga o faaaoga lomiga o konafesi aoao o le Ensign po o le Liahona mo a latou afiafi faaleaiga ma le suesueina o tusitusiga paia o se aiga?

A o latou iloilo lauga o konafesi aoao, uunai tamaiti aoga e faailoa ma tusi faamanuiaga ua latou maua. I le ma lea, atonu e te manao e valaaulia au tamaiti aoga e tusia i se api, tusi talaaga, po o a latou tusitusiga paia le alualu i luma faaleagaga ua latou iloa i o latou olaga a o latou faaaoga aoaoga a perofeta soifua,

Faaiu i le faamatala atu o vaega o totoe o lenei vasega o le a fesoasoani i tamaiti aoga e malamalama atili ai i fautuaga pito sili ona lata mai ua tuuina mai e perofeta, tagatavaai, ma talifaaaliga. I le ma lea, o le a faatino mai ai le ala e mafai ona latou faaaoga atoatoa ai i o latou olaga mataupu faavae sa aoaoina i konafesi aoao ma faasoa atu ma isi. Faasoa atu ou lagona e uiga i le taua o konafesi aoao ma molimau atu o konafesi aoao o se taimi o le a momoli mai ai le upu ma le finagalo o le Alii i Ana fanau e Ana auauna a perofeta.