O Le Faatomuaga

Na tautino mai Elder Robert D. Hales o le Korama a Aposetolo e Toasefululua:

“O perofeta soifua o loo taitaiina lenei ekalesia i aso nei. O le puipuiga sili mo tagata o Le Ekalesia a Iesu Keriso o le Au Paia o Aso e Gata Ai e ala mai lea i le faalogo ma usitai i upu ma poloaiga e tuuina mai e le Alii e ala mai i ana perofeta soifua. Ou te faamoemoe o le a malamalama le lalolagi i le taua o le i ai o se perofeta soifua i le fogaeleele i aso nei” (Robert D. Hales, “Faalogo i le Siufofoga o le Perofeta ma Usitai,”Liahona, Iulai 1995, 16).

I le avea ai o se faiaoga mo lenei vasega, ua ia te oe le avanoa e fesoasoani ai i au tamaiti aoga e iloa ia faamanuiaga o le ola ai i le vaitaimi o loo i ai perofeta soifua i le fogaeleele. E mafai ona e fesoasoani ina ia latou iloa o loo fetalai mai le Tama Faalelagi i aso nei e faapei ona Ia fai i tisipenisione uma lava. A saunoa perofeta soifua i tulaga faaletaitai i tagata o le Ekalesia, o mea uma ua latou saunoa ai “o le finagalo lea o le Alii, … o le siufofoga o le Alii, ma o le mana lea o le Atua mo le olataga” (MF&F 68:4).

Ia suesue ma le agaga tatalo ia mau ma saunoaga i konafesi. Saili i le Agaga Paia a o e filifili gaoioiga e aoaoina ai e fesoasoani i le ola faaleagaga o tamaiti aoga. Fesoasoani i tamaiti aoga e saili, malamalama, ma ola ai i upumoni ua tuuina mai i konafesi a le Ekalesia.

O lenei tusi lesona e fesoasoani i au sauniuniga e ala lea i le tuuina mai o faamatalaga tomua i mataupu, iloaina o mau ma mataupu faavae o le talalelei, ma fautuaina mai auala e mafai ai ona e fesoasoani i tamaiti aoga e malamalama i aoaoga faavae ma ola ai i o latou olaga.

Auala o Loo Faatulaga Ai le Tusi lesona Lenei

Ua mamanuina le Aoaoga Faalelotu 333 e aoao atu i se semesa e tasi. O lenei tusi lesona e fitu ona mataupu:

O Lo Tatou Manaomia o ni Perofeta Soifua
O Le Perofeta Soifua: O Le Peresitene o le Ekalesia
Faasologa i le Au Peresitene
O Le Korama a le Au Peresitene Sili
O Le Korama a Aposetolo e Toasefululua
Konafesi Aoao
Suesueina o Saunoaga o le Konafesi Aoao

O muai mataupu e ono e aofia ai anotusi ma manatu e mafai ona e faaaoga o se punaoa a o e aoao atu aoaoga faavae mo lenei vasega. I le avea ai o se faiaoga ua ia te oe le faitalia e aoao atu ai nei lesona i periota e ono muamua o le semesa pe faasoasoa atu foi i le faagasologa o le semesa. O le Mataupu 7 ua tuuina mai ai ni manatu i le anoanoai o auala e aoao atu ai ia saunoaga a le Au Pulega Aoao mai le lomiga aupito lata mai o le konafesi aoao o le Ensign po o le Liahona. O le periota o totoe e ao ona aoao mai le lomiga o le konafesi aoao.

O lesona i nei tusi lesona ua mamanuina ina ia maea i le 50 minute. Afai e faalua ona feiloai lau vasega i le vaiaso, e ao i lesona taitasi ona faaalu ai pe tusa ma le 50 minute. Afai e faatasi ona feiloai lau vasega i le vaiaso, e ao i lesona taitasi ona faaalu ai pe tusa ma le 90 minute. Mo le vasega e 90-minute e mafai ona e aoao atu se tasi o lesona mai lenei tusi lesona faatasi ai ma aoaoga mai le Ensign po o le Liahona. O le a manaomia ona e fetuunai mataupu o le vasega e fuafua i le tulaga o lau lava aoao atu. I le semesa masani, o aoaoga mai le Ensign po o le Liahona o le a faaalu ai le tusa o le 75 pasene o le taimi o le vasega.

E tolu vaega o mataupu taitasi o lenei tusi lesona:

O Le Faatomuaga
O Nisi o Aoaoga Faavae ma Mataupu Faavae
Manatu mo le Aoaoina Atu

O Le Faatomuaga

O le vaega o le “Faatomuaga” e faaataata mai ai autu aoao o loo i ai i le mataupu ma o le a fesoasoani ia e vave silafia ai le ulutala aoao.

O Nisi o Aoaoga Faavae ma Mataupu Faavae

O le vaega ua taua “O Nisi Aoaoga Faavae ma Mataupu Faavae” o loo aofia ai se lisi o aoaoga faavae ma mataupu faavae tutotonu e faatatau i le autu o lena lesona. E faaopoopo i aoaoga faavae ma mataupu faavae o loo faailoa mai i le tusi lesona, atonu o le a e maua isi upumoni taua i mau po o lomiga o le konafesi o le Ensign po o le Liahona e te lagona e faamalieina ai manaoga o au tamaiti aoga. O lau aia lea o se faiaoga. Ae peitai, atonu e te manao e sailiili isi mataupu i le tusi lesona a o le i aoaoina nisi mataupu faavae faaopoopo. Afai e le o aafia se mataupu faavae po o se aoaoga faavae i le lesona o loo aoaoina, atonu o loo aafia i se isi mataupu o lagolagoina le autu i se tulaga atoa.

Manatu mo le Aoaoina Atu

O le vaega o “Manatu mo le Aoaoina Atu” o loo i ai ni auala faapitoa e aoao atu ai mo aitema taitasi o loo taua i lalo o le “O Nisi o Aoaoga Faavae ma Mataupu Faavae.” O lenei vaega e mafai foi ona aofia ai fautuaga mo ni auala taua e aoao atu ai e le o lisiina i lalo o le “O Nisi Aoaoga Faavae ma Mataupu Faavae.” O nei “Manatu mo le Aoaoina Atu” e fesoasoani ia te oe e saunia anomea o lesona ma gaoioiga e aoao atu ai. Fetuunai fautuaga mo le lesona ina ia talafeagai ma le siosiomaga o le potuaoga, mea manaomia e tamaiti aoga, ma le taimi moomia.

O Isi Fesoasoaniga o le Aoao Atu

Faamatalaga i le tusi lesona a tamaiti aoga. O le Tusi Lesona a le Tamaitiiti Aoga o Aoaoga a Perofeta Soifua(Aoaoga Faalelotu 333) o loo maua ai faamatalaga taua a le Pulega Aoao ma Taitai Aoao o le Ekalesia. O le tele o manatu e aoao atu ai i le tusi lesona a le faiaoga e faasino oe i faamatalaga o loo maua i le tusi lesona a le tamaitiiti aoga. Uunai tamaiti aoga e faaaoga lenei punaoa i totonu ma fafo atu o le vasega. I le ma lea, o mataupu taitasi o le tusi lesona a le tamaitiiti aoga e faaiu i vaega ua faaautuina “O Manatu e Mafaufau Loloto I Ai” ma “Galuega Fautuaina.” O fesili i lalo o “Manatu e Mafaufau Loloto I Ai” ma gaoioiga i le “Galuega Fautuaina” e fesoasoani i tamaiti aoga e filifili ai ma le faaeteete ia tusi faitau faaopoopo. O le tele o nei fesili ma gaoioiga e mafai ona fetuunai i manatu faafaiaoga mo le faaaogaina i vasega.

O saunoaga a perofeta soifua, Pulega Aoao ma Taitai Aoao o le Ekalesia. A o e suesue i saunoaga mai i konafesi aoao ma lomiga a le Ekalesia, vaavaai mo ni punaoa faaopoopo e mafai ona fesoasoani i lesona i lenei tusi lesona.

Upega Tafailagi a Seminare ma Inisitituti o Mataupu Faalelotu. E i ai foi le upega tafailagi a le Seminare ma Inisitituti o Mataupu Faalelotu, institute.lds.org, faatasi ai ma le tele o punaoa e mafai ona fesoasoani ia te oe.

O Le Auala e Faaaoga ai Lenei Tusi Lesona

Faaaoga saunoaga o le konafesi aoao a le Au Peresitene Sili ma le Korama a Aposetolo e Toasefululua e matua fesoasoani i lenei tusi lesona a o e saunia lesona ma aoaoina atu le vasega. O savali mai le Au Peresitene Sili ma le Korama a le Aposetolo e Toasefululua o maua i lomiga a le Ekalesia, o saunoaga ua fofogaina mai i nisi tulaga, po o fesootaiga taualoa e lafoina atu e le Au Uso mai lea taimi i lea taimi e ao foi ona faaaoga.

E mafai ona faaaoga le tusi lesona i ni auala e aofia ai auala nei:

Atonu e te filifili e mulimulitai ma le toto’a i aoaoga fautuaina e pei ona otooto atu.
E mafai ona e faaaogaina lenei tusi lesona e fai ma taiala suesue e faailoa ai mataupu faavae ma autu e te manao e atiae i lau lesona.

Filifili Mea o Le a E Aoao Atu

Filifili aoaoga faavae, mataupu faavae, mea tutupu, ma faatinoga e sili ona taua mo au tamaiti aoga ina ia iloa ma faaaoga. O le tele o mea e te aoao atu o le a aumai mai lenei tusi lesona ma le tusi lesona a le tamaitiiti aoga; ae peitai, ia mautinoa ona faaaoga mau e faaopoopo ai i mataupu faavae mai le tusi lesona. Ia avea musumusuga a le Agaga Paia ma manaoga o au tamaiti aoga e taitaiina oe a o e filifili mea e aoaoina atu. (Mo nisi faamatalaga i mea e aoao atu, tagai i le Aoaoina Atu ma le Aoaoina Mai o le Talalelei: O se Tusitaulima mo Faiaoga ma Taitai Seminare ma Inisitituti o Mataupu Faalelotu [2012), vaega 4.3.3.)

E le faapea e noatia oe e aoao atu ia aoaoga faavae ma mataupu faavae uma ua fuatuaina atu i mataupu taitasi, ma o le a le taumate ona e iloa e leai sou taimi e faia ai. O Elder Richard G. Scott (1928–2015) o le Korama a Aposetolo e Toasefululua na fautua mai:

“Manatua, o lou faamoemoe maualuga e le o le faia o mea uma pe afai o le a le mafai ona malamalama lelei i ai. Fai le mea e mafai ona e fai ia i ai le malamalama” (Richard G. Scott, “To Understand and Live Truth” address to CES religious educators, 4 Fep., 2005], 2).

Filifili Pe Faapefea ona E Aoao Atu

Manatua le matafaioi a le tamaitiiti aoga a o e filifili auala eseese e aoao atu ai le lesona. A o saunoa atu i faiaoga o mataupu faalelotu, na saunoa Peresitene J. Reuben Clark Jr. (1871–1961), “E te le tau tolotolo atu i tua o lenei talavou ua aafia faaleagaga ma musumusu atu mataupu faalelotu i ona taliga” (“The Charted Course of the Church in Education” [saunoaga i taitai faalelotu o seminare ma inisitituti, Aok. 8, 1938], 6). E mafai ona e faamoemoeina ia tamaiti aoga ia lava le matua faaleagaga ma faatino la latou matafaioi e aoao ma le maelega. A o tapena lau lesona, fesoasoani i au tamaiti aoga i le faia o lo latou tiutetauave mo lo latou lava aoaoina. Atonu o le a aoga fautuaga nei:

Fautuaina tamaiti aoga e faitau ia vaega o le tusi lesona a tamaiti aoga po o lauga o le konafesi aoao ma mau talafeagai a o le i aoao atu lesona taitasi.
Tuu le avanoa i tamaiti aoga e fesili ma tali i fesili. O fesili lelei o ni meafaigaluega aoga e fesoasoani i au tamaiti aoga i le faia o lo latou tiutetauave mo lo latou lava aoaoina. Atonu e te manao e valaaulia pea lava pea tamaiti aoga e o mai i le vasega ma se fesili ua tusia. Fesoasoani i tamaiti aoga ia iloa o fesili na latou fesili ai i le vasega atonu e faamaonia le sili ona taua i le faagasologa o le aoaoina i lo fesili e fai e le faiaoga. A o latou suesue i aoaoga a perofeta soifua, uunai tamaiti aoga e faailoa mai mataupu faavae, faamatala uiga, fetufaai manatu, ma faasoa molimau o upumoni ua latou aoaoina. Fausia se siosiomaga e lagona ai e tamaiti aoga le Agaga o le Alii ma maua le avanoa ma le tiutetauave e faalogo ma tautala ina ia faagaeetia ai e le tasi le isi (tagai MF&F 88:122).
Saili mo avanoa e faaaoga ai mau faapitoa o se molimau lona lua ma le lona tolu i mataupu faavae ua e aoao atu mai le tusi lesona. Faaavanoa taimi mo tamaiti aoga e faailoa mai ai fuaiupu o mau e faatupulaia manatu pe molimau i mataupu faavae o loo aoaoina.
Taumamao mai le faaaogaina o le aoao tuusao ua na o se auala e aoao atu ai. A o lea, tuu atu i tamaiti aoga ina ia saili upumoni e ala i le taitaiina o i latou i upumoni ua outou maua ma isi. Na aoao mai Elder David A. Bednar o le Korama a Aposetolo e Toasefululua e faapea: O faiaoga lelei e fesoasoani i tamaiti aoga e saili tali mo i latou lava:

“Ua ou matauina se uiga masani o faiaoga o e ua tele sa latou faatosinaga i lo’u olaga. Sa latou fesoasoani ia te au ou te saili e aoao i le faatuatua. Sa latou mumusu e tau mai ia te au ni tali faigofie. O le mea moni, latou te lei taua maia lava ia te au ni tali. Ae, sa latou faasino mai le ala ma fesoasoani mai i laasaga ou te uia e sue ai au lava tali. Ou te lei fiafia i taimi uma i lenei faiga, ae o le poto masani ua ou mafai ai ona malamalama faapea, o se tali e aumai i se isi tagata e masani lava e le umi se taimi e manatua ai, pe afai foi e manatua. Peitai o se tali tatou te maua e ala i le faaaogaina o le faatuatua, e masani lava ona manatua i le olaga atoa” (David A. Bednar, “Saili e Aoao e Ala i le Faatuatua,” Liahona, Setema. 2007, 16).

Nai lo le tuuina atu o faamatalaga i aoaoga tuusao lava, saili i auala e aoaoina ai tamaiti aoga e fesoasoani ai e faataunuu la latou matafaioi i le faagasologa o le aoaoina. (Mo nisi faamatalaga i mea e aoao atu, tagai i le Aoaoina Atu ma le Aoaoina Mai o le Talalelei: O se Tusitaulima mo Faiaoga ma Taitai Seminare ma Inisitituti o Mataupu Faalelotu [2012), vaega 4.3.4.)
Valaaulia tamaiti aoga e ola ai i fautuaga a perofeta. Fesoasoani ia i latou e avea o ni soo o Iesu Keriso ae le na ona atamamai i le talalelei. Sa toe fautua mai Elder David A. Bednar ia tatou fesoasoani i tamaiti aoga ina ia “loloto atu le malamalama nai lo le na o le iloa ma le taulotoina o aoaoga” ina ia fesoasoani ia i latou “e tuuese le tagata natura (tagai Mosaea 3:19), ina ia liua [o latou] loto (tagai Mosaea 5:2)” (“Saili le Aoaoina e ala i le Faatuatua,” 64).

Fetuunaia o le Tusi Lesona ia i Latou e I Ai Manaoga Faapitoa

A aoao atu tamaiti aoga e i ai manaoga faapitoa, fetuunai lesona e taulima ai manaoga o tamaiti aoga. Mo se faataitaiga, o le tele o lesona e manaomia ai tamaiti aoga e faitau leotele pe aunoa ma se leo ma tusi tali i pepa. Ina ia fetuunai lesona mo tamaiti aoga o e e le mafai ona faitautusi, e mafai ona e fuafua e te faitauina leotele, faitau e tamaiti aoga, pe faaaoga ni mea ua maea ona pueina e faamatala ai mau (e pei o se kaseti lipine, CD, po o se mp3). Afai e manaomia e lesona ni tali tusitusia, e mafai ona e uunaia e faaleo mai tali.

Mo nisi manatu ma punaoa, alu i le disabilities.lds.org ma le mataupu i le Tusi Taulima o Seminare ma Inisitituti o Mataupu Faalelotu ua faaautu “Fetuunaia o Vasega ma Polokalama mo Tamaiti Aoga e I Ai Manaoga Faapitoa.”