Mataupu 5

O Le Korama a Aposetolo e Toasefululua

O Le Faatomuaga

O le Ekalesia ua “atiina ae i luga o le faavae o aposetolo ma perofeta” (Efeso 2:20). Ua i ai i lenei mataupu avanoa e fesoasoani ai i tamaiti aoga ia iloa le ala e taitaiina ai e le Korama a Aposetolo e Toasefululua le Ekalesia i taitaiga ma molimau musuia. E tusa ai ma lenei taitaiga, sa molimau mai Elder Jeffrey R. Holland o le Korama a Aposetolo e Toasefululua:

“I le avea ai ma se tasi o e aupito itiiti o i latou o e na outou lagolagoina e muai molimauina le taitaiga o lenei Ekalesia, ou te faapea atu ma le maelega o lo’u agaga ou te lei mafuta lava i lo’u olaga faaletagata pe faalegaluega ma soo se vaega o e ua sili atu onafesootai, o e ua sili atu ona malamalama i mataupu o loo feagai ma i tatou, o e ua matua vaavaai loloto i mea anamua, e matua nofo tatala i mea fou, ma fuafua ma le faaeteete, manatunatu loloto, ma le agaga tatalo i mea uma o aofia ai” (Jeffrey R. Holland, “Ua Toe o mai Perofeta i le Nuu,”Ensignpo o le Liahona, Nov. 2006, 105-6).

I le faaiuga o lenei lesona, e ao i au tamaiti aoga ona malamalama i le i ai faatasi ma ki o le pule o le perisitua paia, e faatelevaveina e Aposetolo le malo o le Atua i le lalolagi atoa.

O le Korama a Aposetolo e Toasefululua i fafo o le Malumalu i Sate Leki i le 1931.

O Nisi o Aoaoga Faavae ma Mataupu Faavae

• O Aposetolo o ni molimau faapitoa mo Iesu Keriso i le lalolagi atoa.

• E galulue Aposetolo ina ia faaalualu i luma le malo o le Atua.

• E autasi faaiuga a le Korama a Aposetolo e Toasefululua.

Manatu mo le Aoaoina Atu

Muai sauniuniga: Pe a faapea e le masani au tamaiti aoga i uso o le Korama a Aposetolo e Toasefululua, o le upega tafailagi a le Ekalesia newsroom.lds.org o loo i ai punaoa e maua ai fesoasoaniga taua. E mafai ona e tatala ia ata, faamatalaga pupuu, po o tala o faamatalaga auiliili e fesoasoani e faamasani ai tamaiti aoga ma o tatou Aposetolo o le taimi nei.

O Aposetolo O ni Molimau Faapitoa mo Iesu Keriso i le Lalolagi Atoa.

Valaaulia se tamaitiiti aoga se toatasi e faitau le Mataupu Faavae ma Feagaiga 107:23 ma se isi e faitau le Galuega 4:33. Ona fesili atu lea o fesili nei:

• E tusa ai ma nei fuaiupu, o le a le tiute o le Korama a Aposetolo e Toasefululua?

• O le a latou te molimau atu ai?

• O fea Aposetolo latou te tauave lenei molimau “faapitoa”?

Faitau le saunoaga a Peresitene Harold B. Lee (1899-1973) i le vaega 5.2 o le Tusi Lesona a Tamaiti Aoga o Aoaoga a Perofeta Soifua. Taofi le faitau i le vaega o le upusii o loo faapea “O le a sa tatou tali?” Fesili i le vasega:

• E faapefea ona e fautuaina faifeautalai e tali atu?

A maea ni tali a tamaiti aoga, faitau le vaega o totoe o le upusii. Ona fesili atu lea:

• O a ni auala e avea ai le tali a Peresitene Lee e faailoa ai lona valaauga o se “molimau faapitoa” o Iesu Keriso?

Faasoa atu le faamatalaga lenei a Peresitene Iosefa Filitia Samita (1876–1972):

“O se tiute lenei e fitoitonu i le [Aposetolo], ia iloa o Iesu Keriso o le Alo moni e Toatasi o le Atua, o le Faaola o le lalolagi” (Joseph Fielding Smith, Saili i le Maelega [1970], 213).

Ona fesili atu lea:

• O le a sou manatu i le uiga o le saunoaga a Peresitene Samita ina ua ia saunoa o le “tiute fitoitonu”?

Faasoa ma au tamaiti aoga le saunoaga a Peresitene Howard W. Hunter (1907-1995) i le vaega 5.2 o le tusi lesona a tamaiti aoga. Ona fai atu lea i tamaiti aoga fesili nei:

• O le a se vaega na molimau patino atu ai Peresitene Hunter?

• E faapefea e le faalogo i le molimau a se Aposetolo ona faamalosia a tatou molimau?

Valaaulia tamaiti aoga e faalogo lelei pe a latou faalogo pe faitau le molimau a se Aposetolo. Valaaulia tamaiti aoga e faamalosia a latou molimau i le upumoni e faapei ona molimau ai Aposetolo.

E galulue Aposetolo ina ia faaalualu i luma le malo o le Atua

Faasoa ma tamaiti aoga le saunoaga muamua o le lua a Peresitene Gordon B. Hinckley (1910–2008) i le vaega 5.5 o le tusi lesona a tamaiti aoga. Fai i tamaiti aoga e faalogologo i le uiga o le Aposetolo. Ona fesili atu lea:

• O le a le mea na saunoa mai ai Peresitene Hinckley i le uiga o le upu Aposetolo?

• O a pule ma “tiute taualoa” na tuuina atu i Aposetolo latou te fai?

Faitau le Mataio 28:16–20 ma le Mataupu Faavae ma Feagaiga 65:5–6 ma lau vasega ma fesili:

• O le a le matafaioi na tuuina atu e Iesu Keriso i Ana Aposetolo i nei fuaiupu?

• Afai e atiae e Aposetolo le malo o le Atua i le lalolagi, o le a le malo o le Atua? (O le malo o le Atua o le Ekalesia i le fogaeleele i le aso. Ua fesoasoani Aposetolo e fausia le malo o le Atua— o le Ekalesia—i le lalolagi i ona po nei ina ia mafai ona oo mai le malo o le lagi—o le Ekalesia o le meleniuma.)

O se faataitaiga i le ala e faatunuuina ai e Aposetolo soifua lenei valaauga paia, faasoa le saunoaga lenei a Peresitene Boyd K. Packer (1924–2015) o le Korama a Aposetolo e Toasefululua

“Ua le ese mai au mai le Usoga a le Toasefululua … afai ou te faapea atu, ua faalia i faamaumauga ua silia i le faa-75 ona ou oo i Mekisiko ma Amerika Tutotonu ma Amerika i Saute, ua silia i le faa-50 i Europa, faa-25 i Kanata, faa-10 i atumotu o le Pasefika, faa-10 i Asia, faa-4 i Aferika; ae faalua i Saina; i Isaraelu, Saudi Arabia, Bahrian, o le Ripapelika Tominika, Initia, Pakisitana, Aikupito, Initonesia, ma le anoano o isi atunuu o le kelope. O isi ua sili atu nai lo lea ia atunuu ua faimalaga i ai” (Boyd K. Packer, “O Le Toasefululua,” Ensign po o le Liahona, Me 2008, 86).

Ona fesili atu lea:

• O le a se malamalama e te manatu na maua e Aposetolo mai le tele o nei femalagaaiga?

Tofi le afa o le vasega e faitau le Mataupu Faavae ma Feagaiga 107:33-35, 58 ma le isi afa e faitau le Mataupu Faavae ma Feagaiga 18:27–32. Tuu atu i tamaiti aoga e faailoa mai upu ma fuaitau e faamatala ai mea ua “auina atu” Aposetolo e fai i aso nei. Lisi i luga o le laupapa (pe fai i se tamaitiiti aoga na te tusia) upu ma fuaitau na faailoa mai e tamaiti aoga. (Nisi upu ma fuaitau e mafai ona aofia ai taitai, atiina ae o le Ekalesia, faagaoioi, tatala faitotoa, folafola le talalelei, faamanuia, faatulaga, talai atu i tagata uma lava, papatiso, ma talai atu le talalelei e tusa ai ma le Agaga Paia.) Ona fesili atu lea:

• O a nisi o auala o folafola atu ai e Aposetolo soifua le talalelei ma atiina ae le Ekalesia i aso nei? (Lauga i konafesi aoao, asiasi i konafesi o le lotoifale, asiasi i misiona, faatalanoa ia taitai o le Ekalesia o le lotoifale, taitai aoaoga faasalalau mo taitai i le lalolagi aoao, ma isi mea.)

Valaaulia se tamaitiiti aoga e faitau le saunoaga lona lua a Peresitene Gordon B. Hinckley i le vaega 5.5 o le tusi lesona a tamaiti aoga. Ona fesili atu lea o fesili nei:

• O a ni auala ua e vaaia pe faalogo i ai i le galuega o le talaiga a Aposetolo e pei ona faamatala mai e Peresitene Hinckley?

• O a ni aafiaga o Aposetolo ia te oe o se tagata taitoatasi?

E Autasi Faaiuga a le Korama a Aposetolo e Toasefululua

Faitau le Mataupu Faavae ma Feagaiga 107:27-31 ma fesili atu:

• O a mataupu faavae na fetalai i ai le Alii e taitaia faaiuga e faia e le Toasefululua?

• O a tautinoga o loo tuuina mai i le fuaiupu 31 pe afai e faia faaiuga e tusa ai ma taiala ua tuuina mai i le fuaiupu 27 ma le 30? O le a sou manatu i le uiga o lena tautinoga?

Faasoa ma tamaiti aoga le saunoaga a Peresitene Gordon B. Hinckley i le faaiuga o le vaega 5.7 o le tusi lesona a tamaiti aoga ( i le parakalafa mulimuli, o loo amata i le “Ae ou te le i vaai lava …”). Ona fesili atu lea:

• E faapefea e le iloa e autasi le faiga o faaiuga a Aposetolo ona faateleina ai lou faatuatua ma talitonuga i na faaiuga?

Faasoa ma le vasega le saunoaga a Peresitene Jame E. Faust (1920-2007) o le Au Peresitene Sili i le vaega 5.7 o le tusi lesona a tamaiti aoga. Uunai tamaiti aoga e faalogologo pe faapefea ona maua le agaga autasi i le Usoga. Ona fesili atu lea o fesili nei:

• E faapefea e lenei faatulagaga ona fai ma mea e “taofia” ai le manatu faaituau po o le fai o mea e manao i ai le tagata lava ia?

• O le a le mea na fautua mai Peresitene Faust e manaomia ina ia maua ai le agaga autasi?

Faaiu le lesona i le faasoa atu o lau molimau i le valaauga ma matafaioi a Aposetolo e Toasefululua. Lui tamaiti aoga e gauai atu i molimau a le Toasefululua ma mataupu ua latou filifili e talanoaina ia latou lauga.