« មេរៀនទី ៦ ឯកសាររៀបចំសម្រាប់ថ្នាក់ ៖ អាពាហ៍ពិពាហ៍រវាងបុរសម្នាក់ និងស្ត្រីម្នាក់ត្រូវបានតែងតាំងឡើងដោយព្រះ » ឯកសារគ្រូបង្រៀន គ្រួសារដ៏នៅអស់កល្បជានិច្ច ( ឆ្នាំ ២០២២ )
« មេរៀនទី ៦ ឯកសាររៀបចំសម្រាប់ថ្នាក់ » ឯកសារគ្រូបង្រៀន គ្រួសារដ៏នៅអស់កល្បជានិច្ច
មេរៀនទី ៦ ឯកសាររៀបចំសម្រាប់ថ្នាក់
អាពាហ៍ពិពាហ៍រវាងបុរសម្នាក់ និងស្ត្រីម្នាក់ត្រូវបានតែងតាំងឡើងដោយព្រះ
ការប្រកាសអំពីក្រុមគ្រួសារចាប់ផ្ដើមដោយសេចក្ដីប្រកាសយ៉ាងមុតមាំថា « អាពាហ៍ពិពាហ៍រវាងបុរសម្នាក់ និងស្ត្រីម្នាក់ត្រូវបានតែងតាំងឡើងដោយព្រះ » ( « ក្រុមគ្រួសារ ៖ ការប្រកាសដល់ពិភពលោក » នៅលើគេហទំព័រ ChurchofJesusChrist.org ) ។ តើអ្នកធ្លាប់គិតថា ហេតុអ្វីព្យាការី ពួកសាវក និងថ្នាក់ដឹកនាំសាសនាចក្រដទៃទៀតបន្ដបង្រៀនពីសេចក្ដីពិតនេះឥតឈប់ឈរដែរឬទេ ? នៅពេលអ្នកសិក្សាមេរៀននេះ សូមពិចារណាពីរបៀបដែលការអនុវត្តសេចក្ដីជំនឿលើព្រះវរបិតាសួគ៌ និងព្រះយេស៊ូវគ្រីស្ទអាចជួយអ្នក នៅក្នុងវិធីសាស្ដ្រទៅរកអាពាហ៍ពិពាហ៍របស់អ្នក ។
ផ្នែកទី ១
តើការដឹងពីទស្សនវិស័យរបស់ព្រះវរបិតាសួគ៌អំពីអាពាហ៍ពិពាហ៍ ជួយខ្ញុំឲ្យយល់ពីផែនការរបស់ទ្រង់សម្រាប់ខ្ញុំយ៉ាងដូចម្ដេច ?
នៅប៉ុន្មានឆ្នាំចុងក្រោយនេះ ទស្សនៈអំពីអាពាហ៍ពិពាហ៍បានផ្លាស់ប្ដូរនៅក្នុងសង្គមជាច្រើន ។ តើអ្នកបានឮពីទស្សនៈណាខ្លះនាពេលថ្មីៗនេះ ?
មិនយូរប៉ុន្មានបន្ទាប់ពីសាសនាចក្រត្រូវបានរៀបចំឡើង លីម៉ាន ខូព្លី ចង់ ឲ្យអ្នកផ្សព្វផ្សាយសាសនា ផ្សាយដំណឹងល្អទៅដល់សមាជិកនៃក្រុមសាសនារបស់គាត់ពីមុន ដែលមានឈ្មោះថាក្រុមសេកើរ ។ ក្រុមសេកើរបានបដិសេធអាពាហ៍ពិពាហ៍ ហើយបានជឿលើការរស់នៅក្នុងជីវិតដែលនៅលីវរហូត ។ ព្យាការី យ៉ូសែប ស៊្មីធ បានទូលសួរព្រះអម្ចាស់អំពីការណ៍នេះ និងជំនឿផ្សេងទៀត ហើយលោកបានទទួលវិវរណៈមួយ ។
ការសិក្សានៅក្នុងការរៀបចំសម្រាប់ថ្នាក់រៀន
សូមអាន គោលលទ្ធិ និង សេចក្តីសញ្ញា ៤៩:១៥–១៦ ដោយស្វែងរកអ្វីដែលព្រះអម្ចាស់បានប្រកាសអំពីអាពាហ៍ពិពាហ៍ ។
ដូចបានប្រើនៅក្នុង ខទី ១៥ ពាក្យ តែងតាំង មានន័យថា បញ្ជា ស្ថាបនា ឬតាំងឡើងដោយសិទ្ធិដ៏ធំជាង ( សូមមើល Merriam-Webster.com Dictionary « ordain »; សូមពិចារណាកត់ចំណាំនិយមន័យនេះនៅក្នុងព្រះគម្ពីររបស់អ្នក ) ។ អែលឌើ ឌី ថត គ្រីស្តូហ្វឺសិន នៃកូរ៉ុមនៃពួកសាវកដប់ពីរនាក់ បានគូសបញ្ជាក់ពីសារៈសំខាន់នៃអាពាហ៍ពិពាហ៍រវាងបុរសម្នាក់ និងស្ដ្រីម្នាក់ នៅពេលលោកបានបង្រៀន ៖
រូបភាពអែលឌើរ ឌី ថត គ្រីស្តូហ្វឺសិនគ្រួសារដែលស្ថាបនាឡើងនៅលើអាពាហ៍ពិពាហ៍ដែលមានបុរសម្នាក់ និងស្ត្រីម្នាក់ បង្កើតជាស្ថានភាពដ៏ល្អបំផុតសម្រាប់ផែនការរបស់ព្រះដើម្បីរីកចម្រើន—ស្ថានភាពសម្រាប់កំណើតកូនៗ ដែលកើតមកនៅក្នុងបរិសុទ្ធភាព ហើយស្លូតត្រង់មកពីព្រះ និងជាបរិស្ថានសម្រាប់ការរៀនសូត្រ និងការរៀបចំខ្លួនដែលពួកគេនឹងត្រូវការសម្រាប់មានជីវិតរមែងស្លាប់ដោយជោគជ័យ និងជីវិតអស់កល្បជានិច្ចនៅក្នុងពិភពលោកខាងមុខ ។ …
… គឺជា [ ព្រះ ] នេះហើយ ដែលបានបង្កើតអ័ដាម និងអេវ៉ាតាមរូបអង្គទ្រង់តាំងពីដំបូងមក ជាបុរស និងស្ត្រី ហើយបានផ្សារភ្ជាប់ពួកគេជាស្វាមី និងភរិយា ។ … បុគ្គលម្នាក់ៗមានរូបកាយតាមរូបអង្គព្រះ ប៉ុន្តែវាស្ថិតក្នុងតំណចំណងអាពាហ៍ពិពាហ៍នៃបុរស និងស្ត្រីតែមួយ ដែលយើងទទួលបាននូវអត្ថន័យពេញលេញបំផុតនៃការមានរូបកាយតាមរូបអង្គនៃព្រះ—ជាបុរស និងស្ត្រីនោះ ។ មិនថាយើង ឬមនុស្សជីវិតរមែងស្លាប់ណានោះទេ គឺពួកគេមិនអាចផ្លាស់ប្ដូរលំដាប់នៃអាពាហ៍ពិពាហ៍របស់ព្រះនេះបានទេ ។ វាពុំមែនជាការច្នៃប្រឌិតរបស់មនុស្សនោះទេ ។ អាពាហ៍ពិពាហ៍បែបនេះគឺពិតជា « មកពីស្ថានលើ មកពីព្រះ » [ សូមមើល Dietrich Bonhoeffer, Letters and Papers from Prison, ed. Eberhard Bethge ( ឆ្នាំ ១៩៥៣ ) ទំព័រ ៤២–៤៣ ] ហើយជាផ្នែកមួយនៃផែនការនៃសុភមង្គល ដូចជាការធ្លាក់ និងដង្វាយធួនដែរ ។ ( « Why Marriage, Why Family » Liahona ខែ ឧសភា ឆ្នាំ ២០១៥ ទំព័រ ៥២ )
ស្របតាមក្រឹត្យវិន័យរបស់ព្រះ អាពាហ៍ពិពាហ៍គឺជាទំនាក់ទំនងដ៏ពិសិដ្ឋបំផុត ដែលអាចកើតមានរវាងបុរសម្នាក់ និងស្រ្តីម្នាក់ ។ ប្រធាន ហាវើដ ដបុលយូ ហឹនធើរ បានពន្យល់ ៖
រូបភាពប្រធាន ហាវើដ ដបុលយូ ហឹនធើរបុរសមិនពេញលេញនោះទេ បើគ្មានស្ដ្រីនោះ ។ ទាំងពីរនាក់មិនអាចបំពេញតាមកម្រិតនៃការបង្កបង្កើតរបស់ពួកគេបានទេ បើគ្មានម្នាក់ទៀតនោះ [ សូមមើល កូរិនថូស ទី១ ១១:១១; ម៉ូសេ ៣:១៨ ] ។ អាពាហ៍ពិពាហ៍រវាងបុរសម្នាក់ និងស្ត្រីម្នាក់ត្រូវបានតែងតាំងឡើងដោយព្រះ [ សូមមើល គោលលទ្ធិ និង សេចក្ដីសញ្ញា ៤៩:១៥–១៧ ] ។ មានតែតាមរយៈសេចក្ដីសញ្ញាថ្មី ហើយដ៏អស់កល្បអស់កាលជានិច្ចខាងអាពាហ៍ពិពាហ៍ប៉ុណ្ណោះ ទើបពួកគេអាចទទួលបានភាពពេញលេញនៃពរជ័យដ៏អស់កល្បជានិច្ចពិតប្រាកដបាន [ សូមមើល គោលលទ្ធិ និង សេចក្ដីសញ្ញា ១៣១:១–៤; គោលលទ្ធិ និង សេចក្ដីសញ្ញា ១៣២:១៥–១៩ ] ។ ( « Being a Righteous Husband and Father » Ensign ខែ វិច្ឆិកា ឆ្នាំ ១៩៩៤ ទំព័រ ៤៩ )
អ្នកទាំងឡាយដែលចូលទៅក្នុងសេចក្ដីសញ្ញាថ្មី ហើយអស់កល្បអស់កាលជានិច្ចខាងអាពាហ៍ពិពាហ៍ ហើយកាន់តាមវានោះ អាចទទួលបានសិរីល្អលំដាប់ខ្ពស់បំផុតនៅក្នុងនគរសេឡេស្ទាល ( សូមមើល សូមមើល គោលលទ្ធិ និង សេចក្ដីសញ្ញា ១៣១:១–៤ ) ។ នេះគឺជាកន្លែងដែលយើង « ទទួលបានភាពពោរពេញនៃពរជ័យដ៏អស់កល្បជានិច្ច » ដែលត្រូវបានគេស្គាល់ថាជាភាពតម្កើងឡើង ឬជីវិតដ៏នៅអស់កល្បជានិច្ចផងដែរ ។ ( អ្នកនឹងរៀនសូត្របន្ថែមទៀតអំពីសេចក្ដីសញ្ញាថ្មី ហើយអស់កល្បអស់កាលជានិច្ចខាងអាពាហ៍ពិពាហ៍នៅក្នុង មេរៀនទី ១០ ) ។
សូមរំឭកដល់អ្វីដែលបានរៀននៅក្នុងមេរៀនមុនៗ អំពីលក្ខណៈនៃជីវិតដ៏អស់កល្បជានិច្ច ។ អែលឌើរ រ៉ូបឺត ឌី ហែល នៃកូរ៉ុមនៃពួកសាវកដប់ពីរនាក់បានបង្រៀន ៖
រូបភាពអែលឌើរ រ៉ូបឺត ឌី ហែលផែនការនៃព្រះវរបិតាផ្ដល់ផ្លូវឲ្យយើងគ្រងជីវិតអស់កល្បទុកជាមរតក ជាជីវិតដែលព្រះមាតាបិតាសួគ៌របស់យើងកំពុងមាន ។ នៅក្នុងផែនការនោះ « បុរសមិនមែនជាឥតទីពឹងអាស្រ័យដល់ស្ត្រីឡើយ [ ហើយ ] ស្ត្រីក៏មិនមែនជាឥតពឹងអាស្រ័យដល់បុរសដែរ » [ កូរិនថូស ទី១ ១១:១១ ] ។ សារៈសំខាន់ដ៏ខ្លាំងនៃជីវិតដ៏នៅអស់កល្បជានិច្ច រួមមានអាពាហ៍ពិពាហ៍ដ៏នៅអស់កល្បជានិច្ចរវាងបុរសម្នាក់ និងស្ដ្រីម្នាក់ ដែលជាផ្នែកដ៏សំខាន់នៃការក្លាយដូចជាព្រះមាតាបិតាសួគ៌របស់យើង ។ ( « The Plan of Salvation: A Sacred Treasure of Knowledge to Guide Us » Ensign ខែ តុលា ឆ្នាំ ២០១៥ ទំព័រ ២៩ )
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើអ្នកនឹងពន្យល់ពីមូលហេតុដែលអាពាហ៍ពិពាហ៍រវាងបុរស និងស្ត្រីគឺត្រូវបានតែងតាំងឡើងដោយព្រះ ហើយជាផ្នែកដ៏សំខាន់មួយនៅក្នុងផែនការដ៏នៅអស់កល្បជានិច្ចរបស់ទ្រង់ដោយរបៀបណា ?
ផ្នែកទី ២
ចុះបើខ្ញុំមិនបានរៀបការនៅក្នុងជីវិតនេះ ឬអាពាហ៍ពិពាហ៍របស់ខ្ញុំបានបញ្ចប់ទៅវិញនោះ ?
ដោយសារកាលៈទេសៈជាច្រើនខុសៗគ្នា នោះមនុស្សមួយចំនួនមិនដែលបានរៀបការនៅក្នុងជីវិតនេះឡើយ ទោះបីជាពួកគេមានបំណងប្រាថ្នាសុចរិតក្ដី ។ សម្រាប់មនុស្សមួយចំនួនដែលបានរៀបការ អាពាហ៍ពិពាហ៍របស់ពួកគេអាចបញ្ចប់ដោយការលែងលះ ។ ប្រធាន ដាល្លិន អេក អូក នៃគណៈប្រធានទីមួយបានថ្លែងពីកាលៈទេសៈទាំងនេះ នៅពេលលោកបានបង្រៀនថា ៖
រូបភាពប្រធាន ដាល្លិន អេក អូកបងប្អូនមួយចំនួនដែលកំពុងស្ដាប់សារលិខិតនេះប្រហែលជាសួរថា » ចុះខ្ញុំវិញ ? » យើងដឹងថា មានពួកបរិសុទ្ធថ្ងៃចុងក្រោយដ៏ស័ក្ដិសម ហើយអស្ចារ្យជាច្រើនរូប ដែលបច្ចុប្បន្ននេះខ្វះនូវឱកាសដ៏សំខាន់ និងតម្រូវការចាំបាច់សម្រាប់ការរីកចម្រើនរបស់ពួកគេ ។ ភាពនៅលីវ ភាពគ្មានកូន សេចក្ដីស្លាប់ និងការលែងលះគ្នារារាំងដល់គំនិតនានា ហើយពន្យារពេលនៃការបំពេញពរជ័យដែលបានសន្យា ។ … ប៉ុន្តែការរាំងស្ទះទាំងនេះគ្រាន់តែបណ្ដោះអាសន្នប៉ុណ្ណោះ ។ ព្រះអម្ចាស់បានសន្យាថា នៅឯភាពអស់កល្បជានិច្ច នឹងគ្មានពរជ័យណាមួយត្រូវបានបដិសេធចំពោះបុត្រាបុត្រីរបស់ទ្រង់ ដែលបានគោរពតាមបទបញ្ញត្តិ ដែលស្មោះត្រង់ចំពោះសេចក្ដីសញ្ញារបស់ពួកគេ និងចង់បានអ្វីដែលត្រឹមត្រូវឡើយ ។ ( « The Great Plan of Happiness » Ensign ខែ វិច្ឆិកា ឆ្នាំ ១៩៩៣ ទំព័រ ៧៥ )
ទោះបីជាពរជ័យដ៏នៅអស់កល្បជានិច្ចមួយចំនួន អាចមិនបានដកពិសោធន៍ពេញលេញនៅក្នុងជីវិតនេះក្ដី ក៏សុភមង្គល និងការបំពេញចិត្តមិនត្រូវបានលាក់ទុកពីអស់អ្នកដែលមិនបានរៀបការដែរ ។ ( ប្រធានបទនេះនឹងត្រូវពិភាក្សាបន្ថែមទៀតនៅក្នុងមេរៀនក្រោយ ) ។ មនុស្សគ្រប់រូបអាចមានអំណរដ៏យូរអង្វែង និងការរីកចម្រើនដ៏មានអត្ថន័យ ហើយចូលរួមចំណែកតាមការចាំបាច់នាពេលនេះបាន ក្នុងនាមជាអ្នកចូលរួមសកម្មយ៉ាងពេញលេញនៅក្នុងផែនការ និងនគររបស់ព្រះ ។
សញ្ជឹងគិតនៅក្នុងការរៀបចំសម្រាប់ថ្នាក់រៀន
តើអ្នកនឹងចែកចាយអ្វីខ្លះ ជាមួយនឹងអ្នកដែលមានអារម្មណ៍ថា ឱកាសរបស់ពួកគេដើម្បីមានសុភមង្គល និងជីវិតដ៏នៅអស់កល្បជានិច្ចត្រូវបាត់បង់ ព្រោះពួកគេមិនបានរៀបការ ?
ផ្នែកទី ៣
តើការអនុវត្តសេចក្ដីជំនឿលើព្រះវរបិតាសួគ៌ និងព្រះយេស៊ូវគ្រីស្ទអាចជួយខ្ញុំឲ្យយកឈ្នះលើការភ័យខ្លាច ហើយទទួលបានអំណរនៅក្នុងអាពាហ៍ពិពាហ៍ដោយរបៀបណា ?
សូមគិតអំពីសំណួរ ឬកង្វល់ដែលអ្នក ឬមនុស្សដែលនៅជុំវិញអ្នក មានអំពីការរៀបអាពាហ៍ពិពាហ៍ ។ អែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកដប់ពីរនាក់បានថ្លែងពីមូលហេតុមួយ ដែលមនុស្សមួយចំនួនពន្យារការខិតខំរបស់ខ្លួនដើម្បីរៀបអាពាហ៍ពិពាហ៍ ៖
រូបភាពអែលឌើរ ឃ្វីនថិន អិល ឃុកមនុស្សមួយចំនួនពន្យារពេលរៀបការរហូតដល់បញ្ចប់ការសិក្សា ហើយរកការងារបានធ្វើសិន ។ ទោះជាទង្វើនេះត្រូវពិភពលោកទទួលស្គាល់ក្ដី ក៏ហេតុផលនេះពុំបង្ហាញពីសេចក្ដីជំនឿ ពុំធ្វើតាមដំបូន្មានពួកព្យាការីសម័យទំនើប ហើយពុំសមស្របទៅនឹងគោលលទ្ធិឡើយ ។ ( « Choose Wisely » Liahona ខែ វិច្ឆិកា ឆ្នាំ ២០១៤ ទំព័រ ៤៧ )
ជាញឹកញាប់ ពួកសត្រូវបង្កើនឲ្យមានការភ័យខ្លាច ការមានមូលហេតុខាងជីវិតរមែងស្លាប់ ឬការរំខាននានា ដែលអាចរារាំងមនុស្សមិនឲ្យរៀបអាពាហ៍ពិពាហ៍ ។ មនុស្សមួយចំនួនមានការភ័យខ្លាចមុនពេល ឬអំឡុងពេលអាពាហ៍ពិពាហ៍ ព្រោះពួកគេបានឃើញឧបសគ្គនានា ដែលកើតមានចេញពីការលែងលះ ។ ( នៅក្នុងមេរៀនក្រោយៗ អ្នកនឹងរៀនពីគោលការណ៍ ដែលអាចជួយអ្នកឲ្យពង្រឹងអាពាហ៍ពិពាហ៍របស់អ្នក ហើយរារាំងមិនឲ្យមានការលែងលះគ្នា ) ។
តើអ្វីទៅដែលអាចជួយអ្នកឲ្យគិតពីអាពាហ៍ពិពាហ៍ដោយមានទំនុកចិត្ត ?
ការសិក្សានៅក្នុងការរៀបចំសម្រាប់ថ្នាក់រៀន
សូមអាន សុភាសិត ៣:៥–៦; ធីម៉ូថេ ទី២ ១:៧; និង គោលលទ្ធិ និង សេចក្ដីសញ្ញា ៦:៣៦ ។ សូមពិចារណាពីរបៀបដែលការបង្រៀនទាំងនេះអាចអនុវត្តបាន ចំពោះរបៀបដែលអ្នកគិតពីអាពាហ៍ពិពាហ៍ ។
ប្រធាន ជីន ប៊ី ប៊ីងហាំ ប្រធានសមាគមសង្គ្រោះទូទៅបានបង្រៀនថា ៖
រូបភាពប្រធាន ជីន ប៊ី ប៊ីងហាំពេលខ្លះយើងខ្វះការទុកចិត្ត ដោយសារយើងពុំយល់ពីក្ដីស្រឡាញ់ដ៏ពិតរបស់ព្រះ និងព្រះទ័យទ្រង់ចង់ជួយយើង ។ ប៉ុន្តែពេលយើងសិក្សាអំពីផែនការរបស់ព្រះវរបិតាសួគ៌ និងបេសកកម្មរបស់ព្រះយេស៊ូវគ្រីស្ទ នោះយើងយល់ថា គោលបំណងតែមួយគត់របស់ទ្រង់គឺជាសុភមង្គល និងការរីកចម្រើនដ៏អស់កល្បរបស់យើង [ សូមមើល ម៉ូសេ ១:៣៩ ] ។ ( « That Your Joy Might Be Full » Liahona ខែ វិច្ឆិកា ឆ្នាំ ២០១៧ ទំព័រ ៨៦ )
នៅពេលបុគ្គលម្នាក់ៗរៀបការ ហើយនៅពេលប្ដីប្រពន្ធទាំងពីរនាក់បន្ដអនុវត្តសេចក្ដីជំនឿ នោះព្រះវរបិតាសួគ៌ និងព្រះយេស៊ូវគ្រីស្ទនឹងបន្ដដឹកនាំ និងប្រទានពរជ័យដល់ពួកគេ ។ ខណៈកំពុងបម្រើជាសមាជិកក្នុងពួកចិតសិបនាក់ អែលឌើរ ហក ដបុលយូ ភិនណក់ បានបង្រៀនថា « ព្រះបានចូលរួមយ៉ាងសំខាន់ចំពោះអាពាហ៍ពិពាហ៍ [ របស់លោកអ័ដាម និងនាងអេវ៉ា ] ហើយទ្រង់មានក្ដីបារម្ភ និងរួមចំណែកគ្រប់អាពាហ៍ពិពាហ៍ទាំងអស់នៅសព្វថ្ងៃនេះ ដូចពេលមុនដែរ » ( « Making a Marriage Work » Ensign ខែ កញ្ញា ឆ្នាំ ១៩៨១ ទំព័រ ៣៧ ) ។ ព្រះវរបិតាសួគ៌ និងព្រះយេស៊ូវគ្រីស្ទសព្វព្រះទ័យចង់ជួយអ្នក ឲ្យទទួលបានជោគជ័យក្នុងការស្ថាបនាអាពាហ៍ពិពាហ៍ដ៏អស់កល្បជានិច្ចមួយ ។
កត់ត្រាគំនិតរបស់អ្នក
ប្រធាន ប៊ូនី អេច ខ័រឌុន ដែលជាប្រធានយុវនារីទូទៅបានកត់សម្គាល់ថា « យើងម្នាក់ៗត្រូវសួរខ្លួនឯងថា តើខ្ញុំអាចបន្តឈរនៅចំណុចកណ្ដាល ហើយ កុំពឹងផ្អែកលើ យោបល់ខ្ញុំតាមរបៀបណា ? តើខ្ញុំស្គាល់ ហើយធ្វើតាមព្រះសូរសៀងរបស់ព្រះអង្គសង្គ្រោះតាមរបៀបណា កាលសំឡេងនៃពិភពលោកនេះលាន់ឮខ្លាំងនោះ ? តើខ្ញុំបណ្ដុះការទុកចិត្តលើព្រះអង្គសង្គ្រោះតាមរបៀបណា ? » ( « Trust in the Lord and Lean Not » Liahona ខែ ឧសភា ឆ្នាំ ២០១៧ ទំព័រ ៦ ) ។ សូមកត់ត្រាគំនិតរបស់អ្នកអំពីសំណួររបស់ប្រធាន ខ័រឌុន នៅពេលវាទាក់ទងទៅនឹងអាពាហ៍ពិពាហ៍ ។ សូមពិចារណាផងដែរថា តើមានអ្វីមួយដែលរារាំងអ្នកពីការគិតដល់ ( ឬការគិតដែលកាន់តែខ្លាំងអំពី ) អាពាហ៍ពិពាហ៍ដ៏អស់កល្បជានិច្ចដែរឬទេ ។