Joseph Smith: Mwathani wa Ngai

Yĩla Joseph Smith waĩna ũkũũ wa myaka 14, nĩwendaa kũmanya nĩ ĩkanisa yĩva yĩla waaĩlĩte kũlikana nayo, kwa ũu nĩwamũkũlilye Ngai nthĩnĩ wa mboya yaw’o. Nthĩnĩ wa ũsũngĩo wa mboya ĩno, Ngai Asa na Mwana Wake, Yesũ Klĩsto, nĩmamumĩlĩĩle Joseph na mamwĩa Ĩkanisa yaw’o ya Yesũ Klĩsto yĩyaĩ kũũ ĩũlũ wa nthĩ na nĩmamũnyuvĩte Joseph kũyĩtũngĩĩa.

Kuma mũthenya ũsu, Joseph nĩwamũthũkũmie Ngai kwa kwĩĩyumya, aithũkũma kũũngamya Ĩkanisa ya Yesũ Klĩsto ya Atheu ma Mĩthenya ya Mũminũkĩlyo na kwaka ũsumbĩ wa Ngai ĩũlũ wa nthĩ mĩthenyanĩ ya mũminũkĩlyo. Athaithi aĩkĩĩku ma Ĩkanisa nĩ makũsĩĩaa kana Yesũ Klĩsto nĩ Mũtangĩĩi na Mwovosya wa nthĩ. Yesũ nũtongoeasya Ĩkanisa Yake ũmũnthĩ kwĩsĩla ũvuan’yo kwa mwathani ĩũlũ wa nthĩ. JosephSmith aĩ mwathani wa mũthemba ũsu. Ona vala Joseph nĩweanĩisye maũndũ maingĩ ĩvindanĩ ya thayũ wake, kya vata kyaĩ kwĩthĩwa e mũatĩĩi mũlũngalu na ngũsĩ ya Yesũ Klĩsto. Mwathani Joseph Smith na Sidney Rigdon maisye kana ĩtina wa maũkũsĩ maingĩ ala maanenganwe ĩũlũ wa Mũtangĩĩi, nĩmaumisye ũkũsĩ woo, wa mũthya wa onthe, ĩũlũ wake, kana ethayũ! (Ũmanyĩsyo na Maũtianĩo 76:22).

Ala maĩkĩĩaa ũkũsĩ wa Mwathani kwĩsĩla vinyanĩ wa Veva Mũtheu makamanya ũw’o wa wĩa ũla weetiwe eke. Ona nomamanye mũuo na ũtanu ũla ũkaa kwĩsĩla nthĩnĩ wa Mũtangĩĩi Yesũ Klĩsto, ũla Joseph Smith wathaithaa na kũmũthũkũma.