Maandĩko Matheu

Kĩĩma kya Cumorah nĩta maili atatũ ĩtheo wa ngalĩko ya umĩlonĩ wa syũa wa mũũnda wa Smith ku Palmyra, New York. Ĩvindanĩ ya Joseph ngaliko ya ĩũlũ yaĩna nyeki, na ĩtheo yaĩna kĩtheka na mĩtĩ yataanĩsye. Masengea mathikĩtwe ngalĩko ya ũthũĩlonĩ wa syũa, ti vaasa kuma mũthya. Visa: Mwei wa Nyanya 1907

Vakuvĩ na ndũa ya Manchester, kaondi ya Ontario, New York, vaũngamĩte kĩĩma kĩtekĩnene mũno, na kyũkĩlĩĩlu vyũ mbee wa ila ingĩ ũtũinĩ. Ngalĩko ya ũthũĩlonĩ wa syũa wa kĩĩma kĩĩ, ti vaasa kuma ĩũlũ, uungu wa ĩvia ĩte ĩnene mũno, masengea nĩvo makometw’e, maiĩtwe nthĩnĩ wa ĩsandũkũ ya ĩvia. Ĩvia yĩĩ yaĩ yimbu na ya kĩlinge katĩ ngalĩko ya ĩũlũ, na ĩkathekeva kwelekela mĩthyanĩ, ũkethĩa katĩ wayo nĩyeneekee yumĩlĩte ĩũlũ wa mũthanga, ĩndĩ mĩthya yonthe yaumbĩĩwe nĩ mũthanga.

Ĩtina wa kumya mũthanga, nĩnoosie sululu, ũla neethĩie wiĩtwe uungu wa mũthya wa ĩvia, na kwa vinya o mũnini nayũkĩlya ĩũlũ. Nĩnasyaisye nthĩnĩ, na vau kwa w’o noona masengea, Ulimu na Thumimu, na kakalo ka kĩthũi, o ũndũ sya wetetwe nĩ mũlaĩka. Ĩsandũkũnĩ yĩla syeekĩĩtwe yaseũvĩtw’e kwa kwilĩanĩlya mavia vamwe ta mũthemba wa simiti. Ĩsandũkũnĩ nthĩnĩ vakometw’e mavia elĩ makelanĩte ĩsandũkũ, na ĩũlũ wa mavia aa vakomete masengea na syĩndũ ila ingĩ syaĩ namo.

Ngalĩkonĩ ya ũthũĩlonĩ wa syũa wa kĩĩma kĩĩ, ti vaasa kuma ĩũlũ, uungu wa ĩvia yĩteĩnene mũno, nĩvo masengea makometw’e, maiĩtwe nthĩnĩ wa ĩsandũkũ ya ĩvia.

Nĩnatatie kũmaumaalya nza, ĩndĩ navatwa nĩ mũlaĩka, na ĩngĩ natavw’a kana ĩvinda ya kũmosa yĩinamba kũvika, na yĩikavika, mũvaka myaka ĩna kuma ĩvindanĩ yĩu; ĩndĩ ambĩa nũke vandũnĩ ovau mwaka ũmwe kuma ĩvinda yĩu, na kana akakomana nakwa vau, na kana naĩlĩte kũendeea kwĩka ũu mũvaka yĩla ĩvinda ya kwosa masengea yĩvika.

Kwĩanana, na ũndũ naumĩw’e myamũlo, nĩnaendaa kĩla mũthya wa mwaka, na kĩla ĩvinda neethĩaa o mũlaĩka o ũla vau, na kũkwata woneleelyo na ũĩ kuma kwake kĩla kũneenan’yanĩ kwitũ, ndaĩanĩ ya ũndũ Mwĩaĩi waendete kwĩka, na ũndũ na kwanzĩa yĩva ũsumbĩ wake ũkaendeew’a mĩthenyanĩ ĩno ya mũthya.

Nũndũ maũthwii ma ĩthe wakwa makũũ nthĩ nĩ maĩmanyivye, twaĩna vata wa kũthũkũma na moko maitũ, tũyĩandĩkwa o kwa mũthenya ona kana yĩla twakwata ĩvuso. Mavinda amwe tweethĩawa mũsyĩ, na mavinda angĩ vaasa na mũsyĩ, na kwa kũendeea na ũthũkũmi tweethĩawa tũtonya kũkwata syĩndũ itwĩanĩe.

Moloni nĩwasyokaa ĩmwe kĩla mwaka vandũ va myaka ĩna, na kũmũmanyĩsya mwathani ũsu waĩ mũnini. Ĩtina wa myaka ĩsu ĩna, Joseph nĩwakwatie masengea, na ambĩlĩĩlya kũalyũla Ĩvuku ya Momoni.

Joseph nĩwathũkũmie mawĩa mekĩvathũkan’yo na aete mwĩkalo wa kwĩanĩwa kwoo mũsyĩ. Nthĩnĩ wa 1825 nĩwakwatie wĩa nthĩnĩ wa, Kaondi ya Chenango, New York. Vau nĩwakomanie na Emma Hale, ũla wamũtwaie matukũ 18 Mwei wa Mbee, 1827.

Otũendeee ĩvinda nĩyavikie ya kwosa masengea, Ulimu na Thumimu, na kakalo ka kĩthũi. Mũthenyanĩ wa matukũ mĩongo ĩlĩ na elĩ ma Mwei wa Kenda, mwaka wa ngili ĩmwe, maana nyanya na mĩongo ĩlĩ na mũonza, nĩnathi o ta tene mũthyanĩ wa mwaka vandũnĩ vala maiĩtwe, o ũla mũtũmwa wa ĩtunĩ nĩwamanengie na mwamũlo ũũ: kana ngeethĩwa nĩ mũsũvĩi wamo; kana ethĩwa ngaeka manyaĩĩke, kana kwĩsĩla kũlea kũũnga kwakwa, ngeethĩwa ndonya kũvetwa; ĩndĩ ethĩwa ngatata vyũ kũmasũvĩa, mũvaka we, mũlaĩka ũsu, ũkavikĩĩa kũmetya, makatonya kũsũvĩĩka.

O kwa mĩtũkĩ nĩnamanyie kĩtumi kya kũkwata myamũlo myũmũ kũmaia memasũvĩĩku, na nĩkĩ mũlaĩaka ũsu waisye namina kwĩka ũndũ wendekaa wa moko makwa, akametya. Nũndũ ti ĩvinda yĩasa namanyĩka kana naĩnamo, kwĩ vinya mwingĩ wambĩlĩĩilye kũtũmĩwa kũmosa kuma vala nĩĩ. Kĩla nzĩa yonthe ĩla yaĩ ĩtonya kũseũvw’a yeelekelaw’a ũndũnĩ ũsu. Ũnyamasyo nĩwaingĩvie mũnango na weethĩwa wĩ mũthũku kũthonoka vaũ ĩtina, na makomano nĩmeeyũmbanĩtye mavinda onthe kũmosa vala nĩĩ ethĩwa nĩvatonyeka. Ĩndĩ kwa ũĩ wa Ngai, nĩmekalile me ũsũvĩonĩ nthĩnĩ wa moko makwa, mũvaka namina ũndũ wamo wendekaa mokonĩ makwa. Yĩla, kwĩanana na walan’yo, mũlaĩka nĩwametisye, nĩnamũnengie; na enamo ũsũvĩonĩ wake mũvaka ũmũnthĩ, wĩ mũthenya wa kelĩ, wa Mwei wa Katano, mwaka wa ngili ĩmwe, maana nyanya, na mĩongo ĩtatũ na nyanya. …

Ĩvuku ya Momoni, yatumbĩthitw’e ya mbee mwaka wa 1830, oyu nĩyĩtumbĩthĩtw’e na ithyomo ithonokete 80 nthĩ yonthe.

Mũthenya wa 5 wa Mwei wa Kana, 1829, Oliver Cowdery nĩwookie nyũmba kwakwa, na ndyaĩ naamwona. Andavisye kana ethĩĩtwe aĩmanyĩsya sukulu wa ũtũinĩ vala ĩthe wakwa wekalaa, na ĩthe wakwa e ũmwe wa ala matũmaa syana sukulunĩ ũsu, nĩwaendie kũkoma kwake kwa ĩvinda, na yĩla waĩ vau mũsyĩ kwake nĩwamũeleisye ũndũ wakwa kwĩthĩwa nĩkwatĩte masengea, na kũatĩanĩa na ũũ ookĩte kũmanya mũno kuma kwakwa.

Mĩthenya ĩlĩ ĩtina wa Oliver Cowdery (wĩ mũthenya wa mũonza wa Mwei wa Kana) nĩnambĩlĩĩlye kũalyũla Ĩvuku ya Momoni, na ambĩlĩĩlya kũmbandĩkĩa.

Nthĩnĩ wa Mwei wa Kana 1829 Joseph Smith, ena Oliver Cowdery ta mũandĩki, nĩwambĩlĩĩlye kũalyũla Ĩvuku ya Momoni kwa kĩnengo na vinya wa Ngai. Ĩtina wa Joseph kũmina, andũ angĩ nĩmanengiwe ĩvuso ya kwona masengea asu ma thaavu. Ngũsĩ ii nasyo nĩsyaandĩkie maũkũsĩ moo, nũndũ “ũndũ wa makanyw’a ma ngũsĩ ilĩ kana itatũ kĩla ũndũ ũkalũlũmĩĩlw’a” (2 Akolintho 13:1).