Ũthembi Kũtũngĩĩwa
Notwaendeeie na wĩa wa kũalyũla, yĩla, mweinĩ ũla waatĩĩe (Wa Katano, 1829), nĩtwaendie mũthenya ũmwe kĩthekanĩ kũvoya kũmũkũlya Mwĩaĩi ĩũlũ wa ũvatiso kwondũ wa ũekeo wa naĩ, ũla tweethĩie ũwetetwe nthĩnĩ wa ũalyũlo wa masengea. Yĩla twaendeee na kũvoya, tũimwĩta Mwĩaĩi, mũlaĩka kuma ĩtunĩ nĩwatheeie e nthĩnĩ wa ĩtu ya kyeni, na amina kũtwilĩĩla moko, nĩwatũtw’ĩĩe ithyĩ, ayasya:
Joseph Smith na Oliver Cowdery nĩmakwatie Ũthembi wa Aluni kwa kwilĩĩlwa kwa moko kuma kwa Yoana Mũvatisi matukũ 15 Mwei wa Katano 1829.
“Ĩũlũ wa inywĩ athũkũmi takwa, ĩsyĩtwanĩ ya Masia, nĩngũmũnenga Ũthembi wa Aluni, ũla wĩthĩawa na mbungũo sya kũthũkũma kwa alaĩka, na sya ũvoo mũseo wa ũalyũlo wa ngoo, na wa ũvatiso kwa kũindwa kĩw’ũnĩ kwondũ wa ũekeo wa naĩ; na ũikaumw’a kuma kũũ nthĩ mũvaka yĩla syana sya aũme sya Levi ikamumĩsya Mwĩaĩi nthembo ĩngĩ kwa ũtheu.”
Nĩwaisye kana Ũthembi ũũ wa Aluni ndwaĩna vinya wa kwilĩĩla moko kwondũ wa mũthĩnzĩo wa Veva Mũtheu, ĩndĩ ũũ tũkanengwa ĩvinda yũkĩte; na atumĩsya mwĩao kũthi kũvatiswa, na atũnenga welekelyo kana naĩle kũmũvatisa Oliver Cowdery, na itina aimbatisa.
Kwĩanana na ũũ nĩtwaendie na twavatiswa. Nĩnamũvatisie mbee, na ĩtina ambatisa—ĩtina wa ũũ nĩnailĩĩle moko ĩũlũ wa mũtwe wake na kũmũtw’ĩĩa Ũthembi wa Aluni, na ĩtina nĩwailĩĩle moko make ĩũlũ wakwa na kũndw’ĩĩa o Ũthembi ũsu—nũndũ ũũ nĩw’o twaumĩw’e mwamũlo.
Ĩkanisa ya Yesũ Klĩsto ya Atheu ma Mĩthenya ya Mũminũkĩlyo yaseũvĩw’e mũsyĩnĩ wa Peter Whitmer, Ĩthe, matukũ 6 Mwei wa Kana 1830. Vakuvĩ andũ 60 nĩmakũsĩĩie aũme 6 mayĩanĩsya mĩtalatala ya New York kwambĩlĩĩlya kyama kĩngĩ kya ndĩni.
Mũlaĩka ũla watũthokeie ĩvindanĩ yĩĩ na kũnengwa Ũthembi ũũ, aisye ĩsyĩta yake nĩ Yoana, o ũla weetawa Yoana Mũvatisi Ũtianĩonĩ Mweũ, na kana athũkũmaa uungu wa welekelyo wa Vetelo, Yakovo na Yoana, ala makwete mbungũo sya Ũthembi wa Melikiseteki, Ũthembi ũla, waisye, kwa ĩvinda ĩte yĩasa nĩtũũnengwa, na kana naĩle kwĩtwa Mũtumĩa wa mbee wa Ĩkanisa, nake (Oliver Cowdery) wa kelĩ waĩ mũthenya wa ĩkũmi na itano wa Mwei wa Katano, 1829, yĩla twatw’ĩĩwe uungu wa mũlaĩka ũũ, na kũvatiswa.
O mĩtũkĩ twauma kĩw’ũni ĩtina wa kũvatiswa, nĩtweewie ũathimo mũnene na wa ũtaĩo kuma kũla kwĩ Asa waitũ wa Ĩtunĩ. Ĩvinda yĩte yĩasa namũvatisa Oliver Cowdery, Veva Mũtheu nĩwamũvalũkĩle, na aũngama na aathana maũndũ maingĩ ala kwa ĩvinda ĩkuvĩ mekũka kũvĩta. Na ĩngĩ, o mĩtũkĩ ambatisa, nĩneethĩiwe na veva wa wathani, yĩla, nĩũngamĩte, nĩnaathanie ĩũlũ wa kwĩana kwa Ĩkanisa, na maũndũ angĩ maingĩ makonanĩtye na Ĩkanisa, na nzyawa ĩno ya syana sya andũ. Nĩtwausũiwe nĩ Veva Mũtheu, na twatana nthĩnĩ wa Ngai wa ũtangĩĩo witũ.