Kũthoka kwa Moloni
Kĩwĩoonĩ kya mũthenya ũsu mũwete vaa ĩũlũ wa matukũ mĩongo ĩlĩ na yĩmwe Mwei wa Kenda, ĩtina wa kũthyũmũa ũkomonĩ ũtukũ, nĩnalikile mboyanĩ na kũmũthaitha Ngai mweene vinya kwa ũekeo wa naĩ syakwa syonthe na meko makwa ma ũtumanu, na ĩngĩ wonan’yo kwakwa, nĩ kana nĩmanye vala nĩũngamĩle mbee wake; nĩkwĩthĩwa naĩna ũkũmbaũ mwĩanu nthĩnĩ wa kũkwata wonan’yo mũtheu, ota ũndũ ovau mbeenĩ naĩna ũmwe.
Myaka ĩtatũ ĩtina wa Joseph Smith oona Woni wa Mbee, Ngai nĩwatũmie mũlaĩka Moloni kũmwĩyĩaĩa Joseph ũndũ wa kũtũngĩĩwa kwa ũvoo mũseo wa Yesũ Klĩsto.
Yĩla ĩndĩ naĩ ũndũnĩ ũsu wa kũmwĩta Ngai, nĩnoonie kyeni kĩmulĩkĩte kyũmbanĩ kyakwa, kĩla kyaendeeie na kwongeleka mũvaka kyũmba kyeethĩwa na kyeni kĩthonokete kya katambanga, yĩla mũndũ kwa mĩtũkĩ waumĩlile ũtee wa ũkomo wakwa, aũngamĩte kĩsevenĩ, nũndũ maaũ make mayakinyĩte nthĩ.
Nĩweekĩĩte ngũa ndaasa na ndeelu ya weũ mwanake. Waĩ weũ ũthonokete kĩndũ ona kĩva naaona kũũ nthĩ; na ndikũĩkĩĩa kana ve kĩndũ ona kĩva kya nthĩ kĩtonya kũseũvw’a kĩkethĩwa kĩna weũ mũtisu ta ũsu. Moko make mayaĩna ngũa, ona mĩthamba ya moko make, ovanini ĩũlũ wa ilalawa; kwa ũu, ona, ilata syake iyaĩna ngũa, o ta maaũ make, o vanini ĩũlũ wa ngũlimũ. Mũtwe wake na ngingo iyaĩna ngũa. Nĩnaĩndonya kũmanya kana ndaĩna ngũa ingĩ ateo ngũa ĩsu ndaasa, nũndũ yaĩ mbingũe ũkethĩa no none ĩvu yake.
Ona ti ngũa yake yaĩ na weũ mũtisu yoka, ĩndĩ mwĩĩ wake w’onthe waĩna ũtisu wathonokete kũelesya, na ũthyũ wake waĩ ta ũtisi. Kyũmba kyaĩna kyeni kingĩ vyũ, ĩndĩ ti kingĩ ta ũthyũlũlũko wa vakuvĩ na ũmũndũ mweene. Yĩla na mũsyaisye ya mbee, naĩna w’ia; ĩndĩ ũw’ia o kwamĩtũkĩ wandia.
Ambĩtie kwa ĩsyĩtwa, na ambĩa kana aĩ mũlaĩka ũtũmĩtwe kuma wĩthĩonĩ wa Ngai vala nĩĩ, na kana ĩsyĩtwa yake yaĩ Moloni; kana Ngai aĩna wĩa wakwa wa kwĩka; na kana ĩsyĩtwa yakwa ĩkeew’ĩka kwa ũseo na ũthũku katĩ wa mbaĩ syonthe, ngo, na ithyomo, ona kana no ĩtonye kũwetwa o kwelĩ ũseo na ũthũku andũnĩ onthe.
Nĩwaisye vaĩ ĩvuku yaiĩtwe, yĩandĩkĩtwe masengeanĩ ma thaavu, yĩnenganĩte ũelesyo wa ekali ma tene ma ĩlembeta yĩĩ, na wumo ũla maumie. Ona ĩngĩ nĩwaisye wusũu wa Ũvoo Mũseo wa tene na tene waĩ vau nthĩnĩ wayo, o ũndũ wanenganiwe nĩ Mũtangĩĩi ekalinĩ ma tene;
Na ĩngĩ, kana vaĩ mavia elĩ nthĩnĩ wa ũta wa vetha—na mavia aa, mooveewe kakalonĩ ka kĩthũi, ila syaĩ na kĩla kĩtawa Ulimu na Thumimu—syĩianĩw’e na masengea; na kwĩthĩwa wĩnamo na kũmatũmĩa mavia aa nĩw’o ũtw’ĩkaa waĩna “syoni” mavindanĩ ma tene kana ma ĩtina; na kana Ngai nĩwamaseũvĩtye kwondũ wa ũalyũlo wa ĩvuku yĩu.
Amina kũndavya maũndũ aa, nĩwambĩlĩĩilye kũweta mawathani ma Ũtianĩo Mũkũũ. Mbee nĩwambie kũweta kĩseemũ kya kĩlungu kya katatũ kya Malaki, na ĩngĩ aweta kĩlungu kya kana, kana kĩlungu kya mũthya kya wathani o ũsu ona vala vaĩ kĩvathũkan’yo kĩnini kwĩanana na ũndũ Mbivilia sitũ isomekaa. Vandũ va kũweta mũsoa wa mbee ũndũ ũsomekaa mavukunĩ maitu, nĩwaũwetie ta ũũ:
“Nũndũ sisyai, mũthenya nĩwũkĩte ũla ũkakana ta iko ĩnene, na ekathĩĩi onthe, ĩĩ, na onthe ala mekaa ũthũku makavya ta mavuthĩ; nĩkwĩthĩwa ala makoka makamavĩvya, mũvaka ndũkamatialya mũi o na ũvonge, easya ũu Mwĩaĩi wa Nguthu.”
Na ĩngĩ, aweta mũsoa wa katano ũla ũkwasya: “Sisya, ngaũvuanĩsya ũthembi, kwa kw’oko kwa mwathani Eliya, mbee wa mũthenya mũnene na wa ũtĩsya wa Mwĩaĩi ũtanoka.”
Na ĩngĩ nĩwawetie mũsoa ũla ũatĩĩe kwa ũndũ ũngĩ: “Na akavanda nthĩnĩ wa ngoo sya syana mawatho ala matw’ĩtwe kwa maaĩthe moo, na ngoo sya syana ikeelekela maaĩthe moo. Kethĩwa ti ũu nthĩ yonthe ĩkaanangwa vyũ kũkanĩ kwake.”
Kwongeleela maũndũ aa, nĩwawetie kĩlungu kya ĩkũmi na ĩmwe kya Ĩsaia, aasya kana kyaĩ vakuvĩ kwĩanĩw’a. Ĩngĩ nĩwawetie kĩlungu kya katatũ kya Meko Ma Atũmwa, mũsoa wa mĩongo ĩlĩ na ilĩ na wa mĩongo ĩlĩ na itatũ, nesa vyũ ũndũ yĩũngamĩte Ũtianĩonĩ witũ Mweũ. Aisye kana mwathani ũsu aĩ Klĩsto; ĩndĩ mũthenya ndwaĩ ũnamba kũka yĩla “ala matĩkawĩw’a wasya wake makavetwa kuma andũnĩ,” ĩndĩ o mĩtũkĩ nũkũka.
Ĩngĩ nĩwawetie kĩlungu kya kelĩ kya Yoeli, kuma mũsoa wa mĩongo ĩlĩ na nyanya mũvaka mũthya. Na ĩngĩ asya kana kĩĩ kĩinamba kwĩanĩw’a, ĩndĩ o mĩtũkĩ nĩkĩkwĩanĩw’a. Na mbeange asya kana wusũu wa Andũ-ma-Mbaĩ-Ingĩ waĩ ũyũka o kwamĩtũkĩ. Nĩwawetie mĩsoa ĩngĩ mingĩ ya maandĩko matheu, na anengane ũelesyo mwingĩ ũla ũtawetwa vaa.
Ĩngĩ, nĩwambĩie, kana yĩla ngakwata masengea ala wawetaa—nũndũ ĩvinda ya kũmosa ĩtaĩ ĩnamba kwĩanĩa—ndikaamonie mũndũ ona wĩva; ona kakalo ka kĩthũi kena Ulimu na Thumimu; no kwa ala ngaumĩw’a mwamũlo moka ngamonia; ethĩwa ngeeka ũu ngaanangwa. Yĩla waneenaa nakwa ĩũlũ wa masengea, woni nĩwavingũiwe kĩlĩkonĩ kyakwa neethĩwa ndonya kwona vandũ vala masengea maiĩtwe, na kana kwa ũtheu na kũvathũkan’ya vandũ vau nĩnavamanyie ĩngĩ yĩla navathokie.
Ĩtina wa kũneenan’ya kũũ, nĩnoonie kyeni kĩla kyaĩ kyũmbanĩ kyambĩlĩĩlya kũmbana kwa mĩtũkĩ ũthyũlũlũkonĩ wa mũndũ ũla waneenaa nakwa, na kyaendeea kwĩka ũu nginya kyũmba kyatiwa kĩ kĩvindu, ateo ũthyũlũlũkonĩ wake; yĩla, o kwa mĩtũkĩ noonie, o ũndũ vailyĩ, mwanya wavingũka ĩmwe ĩmwe mũvaka ĩtunĩ, kyũmba kyatiwa ũndũ kyailye mbee wa kyeni kĩĩ kya kĩ-ĩtũnĩ kĩtanamba kumĩla.
Nĩnakomie nĩseng’ete mũno ĩũlũ wa ũndũ ũsu wa ũsen’yo mũno nũndũ wa ũndũ ũla naĩ nĩnatavw’a nĩ mũtũmwa ũũ ũtaĩ maela; yĩla, kati wa kwĩsilyanĩ kwakwa, nĩnoonie ĩngĩ kana kyũmba kyakwa nĩkyambĩlĩilye ĩngĩ kwĩthĩwa na kyeni, na o kwa mĩtũki, o ũndũ vailyĩ, o ũla mũtũmwa wa ĩtuni aĩ ũtee wa ũkomo wakwa.
Ambĩlĩĩlya, na ĩngĩ kũsyokea o ala maũndũ weekĩte kũthokanĩ kwake kwa mbee, atekũvĩndũa ona vanini; vala ĩtina wa ũu, nĩwandavisye ĩũlũ wa maũsilĩlo manene ala mookĩte kũũ nthĩ, mena mawanango manene ma nzaa, ũvyũ, na maũwau mathũku; na kana maũsilĩlo aa ma kĩmako makooka nthĩ nzyawanĩ ĩno. Asyokea maũndũ aa, nĩwaambatie ĩngĩ o ũndũ weekĩte mbeenĩ.
Nthĩnĩ wa 421 Ĩ.K. mwathani Moloni nĩwathikie maandĩko matheu ma andũ make nthĩnĩ wa Kĩĩma kya Cumorah. Asyokete ĩngĩ ta mũndũ mũthayũũku, nĩwamũtavisye Joseph Smith ĩũlũ wa maandĩko asu ma tene, ala mena wusũu wa ũvoo mũseo, ota ũndũ manenganiwe nĩ Mũtangĩĩi kwa ekali ma tene ma ĩlembetanĩ ya Amelika. Maandĩko asu nĩ Ĩvuku ya Momoni.
Ĩvindanĩ yĩĩ, masũanĩo maliku nĩmakwatie kĩlĩko kyakwa, kana too nĩwakĩie metho makwa, na nakoma nĩsaanĩw’e nĩ ũsen’yo wa kĩla noonete na kĩla neew’ĩte. Ĩndĩ waĩ ũsen’yo wĩva kwakwa yĩla ĩngĩ namwonie o ũla mũlaĩka ũtee wa ũkomo wakwa, na namwĩw’a ĩngĩ aisyokea maũndũ o ala vala nĩĩ o ta tene; na ambongeleela ũtao, aimbĩa kana Satani nũkũtata kũndata (kumana na mwĩkalo wa ũkya wa mũsyĩ wa ĩthe wakwa), kwosa masengea kwondũ wa kwenda kwĩthĩwa nĩ mũthwii. Ũu nĩwambatie, ayasya ndyaĩlĩte kwĩthĩwa na kĩeleelo kĩngĩ kya kwosa masengea asu ĩndĩ kũmũtaĩa Ngai, na ndyaĩlĩte kwendeew’a nĩ kĩeleelo kĩngĩ eka kĩla kya kwaka ũsumbĩ wake; ethĩwa ti ũu ndikamakwata.
Ĩtina wa kũthoka kũũ kwa katatũ, ĩngĩ nĩwaambatie ĩtunĩ ota mbeenĩ, na ĩngĩ natiwa ndyĩĩsilya ũsaanu wa kĩla kyaĩ kĩnambũkĩa; yĩla vakuvĩ omĩtũkĩ ĩtina wa mũtũmwa ũsu wa ĩtunĩ kwambata kuma vala nĩĩ ĩvinda ya katatũ, nzamba nĩyaisye, na neethĩa nĩkũkĩte kũkya, kwa ũu kũneenan’ya kwitũ no ngĩnya kwĩthĩwe kwakuie ũtukũ mũima.
O vanini ĩtina nĩnookĩlile ũkomonĩ wakwa, na, o ta tene, nĩnaendie o mawĩanĩ ala maĩlĩte ma mũthenya; ĩndĩ nditata kũthũkũma o ta mavinda ala angĩ, nĩneethĩie ndena vinya kwĩthĩwa ndathũkũmĩkya. Ĩthe wakwa, ũla wathũkũmĩlaa vakuvĩ nakwa, nĩwamanyie ũndũ ũte mũseo vala nĩĩ, na ambĩa nĩende mũsyĩ. Nambĩlĩĩlya kwenda kũthi nyũmba; ĩndĩ, nditata kũkĩla wiĩĩo nume nza wa mũũnda vala twaĩ, vinya wakwa nĩwathelile vyũ, na navalũka nthĩ ndeeyũkĩlya, na kwa kavinda neethĩwa ndekwĩĩmanya.
Kĩndũ kya mbee ndonya kũlilikana kyaĩ wasya ũkĩneena nakwa, ũimbĩta kwa ĩsyĩtwa. Nĩnasyaisye ĩũlũ, na kũmwona o ũla mũlaĩka aũngamĩte ĩũlũ wa mũtwe wakwa, athyũlũlũkĩtwe nĩ kyeni ota tene. Na ĩngĩ nĩwandilikanilye kyonthe kĩla wandavĩtye ũtukũ ũla waĩmũvĩtu, na ambumĩsya mwamũlo wa kũthĩ vala ve ĩthe wakwa na kũmũtavya ĩũlũ wa woni na mĩao ĩla naĩnĩnakwata.
Nĩneewie; nĩnasyokie kũla kwĩ ĩthe wakwa mũũndanĩ, na namũtavya kĩla ũndũ w’othe. Anzũngĩa ambĩa kana waumĩte kwa Ngai, na ambĩa nĩngeke o ta ũndũ naumĩw’e mwamũlo nĩ mũlaĩka. Nĩnaumie mũũndanĩ, na nathi vala mũlaĩka wambĩĩte masengea maiĩtwe; na nũndũ wa ũtheu wa woni ũla noonete wamo, nĩnamanyie avandũ ĩvinda yĩla navikie vo.